Bugun.uz — SPORT

«Бунёдкор»га ажратилган 5 млрд сўмнинг ярми солиққа ушлаб қолинган. Бу ҳақда жамоа бош мураббийи Илёс Зейтуллаев маълум қилди. 30 июль куни молиявий қийинчиликка дуч келган клубга ПҚ-107-сон қарор асосида 5 млрд сўм ажратилган эди. Зейтуллаевнинг айтишича, 2,5 млрд сўм дарҳол солиққа ушлаб қолинган, қолган 2,5 млрд сўм эса футболчиларнинг йиғилиб қолган маошларига берилган. Бу маблағ бор-йўғи 1—1,5 ойлик маошни қоплаган, клубни тарк этган айрим ўйинчилар эса ҳали ҳам пул олмаган. «Бунёдкор»даги молиявий муаммолар шу даражага етганки, жамоа аввалроқ «Қизилқум»га қарши сафарга маблағ етишмаслиги сабаб бора олмай, 0:3 ҳисобида техник мағлубият олган.

Беҳруз Каримов фаолиятини Швейцариянинг «Лугано» клубида давом эттиради. Ўзбекистон миллий терма жамоасининг 19 ёшли ҳимоячиси Европа клуби билан шартнома имзолади. Бу ҳақда Ўзбекистон футбол ассоциацияси маълум қилди. 2007 йил 7 августда туғилган Каримов футболчилик фаолиятини «Одил Жуниор» академиясида бошлаган. Кейин «Олимпик»да ўйнаган, 2025 йил февралида эса Термизнинг «Сурхон» клубига ўтган. Ўнг қанот ҳимоячиси қисқа вақт ичида миллий терма жамоагача етиб борди. ЖЧ-2026да Колумбия ва Португалияга қарши учрашувларда Ўзбекистоннинг асосий таркибида майдонга тушди. Энди у Швейцариянинг энг тарихий клубларидан бири саналган «Лугано» сафида ўйнайди. 1908 йилда ташкил этилган клуб уч марта Швейцария чемпиони бўлган ва тўрт марта мамлакат кубогини қўлга киритган. «Лугано» 2025/26 йилги мавсумни Швейцария Суперлигасида 3-ўринда якунлади ва УЕФА Конференциялар лигаси саралашида иштирок этиш ҳуқуқини қўлга киритди.

Ўзбекистонлик ҳакамлар Жанубий Кореядаги интим массаж можаросида тилга олинди Жанубий Кореяда 2011–2012 йилларда хорижлик футбол ҳакамлари учун интим хизматлар кўрсатилган массаж салонларига KFA корпоратив карталари орқали тўлов қилингани ҳақида аудит ҳужжатлари очиқланди. Yonhap маълумотига кўра, ушбу ўйинларда ишлаган ҳакамлар орасида Ўзбекистон вакиллари ҳам бўлган. Хусусан, 2011 йил сентябрда Жанубий Корея — Уммон учрашувидан олдин тўрт нафар ҳакам учун 760 минг вон тўланган. Бу ўйинни ўзбекистонлик ҳакамлар бригадаси бошқарган. Бироқ очиқланган ҳужжатларда қайси ўзбекистонлик ҳакам ушбу хизматдан фойдалангани аниқ кўрсатилмаган. Шунингдек, бу тўловлар ҳакамлар қарорлари ёки ўйин натижасига таъсир қилганини тасдиқловчи далиллар ҳам йўқ. KFA воқеалар қарийб 15 йил аввал содир бўлганини билдирган. 2013 йилдан федерация корпоратив карталарни массаж салонлари ва караокеларда ишлатишни тақиқлаган.

Лионель Мессининг отаси Хорхе Месси 68 ёшида вафот этди. У сўнгги вақтларда давомли касаллик билан курашиб келаётган ва Аргентинанинг Росарио шаҳридаги клиникада даволанаётганди. Унинг вафоти ҳақидаги хабарни Newell’s Old Boys, Аргентина Профессионал футбол лигаси ва CONMEBOL ҳам тасдиқлаб, Месси оиласига ҳамдардлик билдирди. Хорхе Месси Лионелнинг нафақат отаси, балки узоқ йиллик агенти ва карьерасидаги энг муҳим шахслардан бири бўлган. У 2000 йилда 13 ёшли ўғли билан Барселонага кўчиб борган ва кейинчалик футболчининг профессионал ҳамда тижорий ишларини бошқариб келган. Унинг соғлиги билан боғлиқ муаммолар Жаҳон чемпионати пайтида жамоатчиликка маълум бўлган. Месси Аргентинанинг Жазоир устидан 3:0 ҳисобидаги ғалабасида ҳет-трик қайд этганидан кейин майдонда кўз ёшларини тия олмаган ва бу ҳолат футбол билан боғлиқ эмаслигини айтган. «Спортга умуман алоқаси бўлмаган масала туфайли. Бир неча оғир, мураккаб кунларни бошдан кечирдим», — деган эди Месси. Кейинроқ у оиласи «оғир даврни бошдан кечираётганини» ҳам айтган. 18 июнь куни Месси оиласи расмий баёнот бериб, Хорхе шифокорлар назоратида экани ва аҳволи ижобий томонга ўзгараётганини маълум қилган, шу билан бирга унинг соғлиги бўйича тарқалаётган тасдиқланмаган хабарларга ишонмасликка чақирган эди.

Абдуқодир Ҳусанов асосий таркибда майдонга тушган баҳсда Manchester City Корея лигаси юлдузларини 3:1 ҳисобида мағлуб этди. Ўзбекистон терма жамоаси ҳимоячиси Сеулда ўтказилган ўртоқлик учрашувининг биринчи бўлимида ҳаракат қилди. Ҳусанов танаффусга қадар Рубен Диаш, Йошко Гвардиол ва Райан Айт-Нури билан бирга Manchester City ҳимоя чизиғида ўйнади. Иккинчи бўлим бошида уни Витор Рейс алмаштирди. Баҳсдаги барча голлар дастлабки 23 дақиқа ичида урилди. Англия клуби сафида Айт-Нури, Тижжани Рейндерс ва Дивин Мубама гол киритди. Корея жамоасининг ягона голига Ким Дэ Вон муаллифлик қилди. Бу Энцо Маресканинг Manchester City бош мураббийи сифатидаги илк ғалабаси бўлди. Жамоа Осиёдаги сафарини 9 август куни «Атлетико»га қарши учрашув билан якунлайди.

Камилла Раҳимова Торонтодаги WTA 1000 турнирининг учинчи босқичига чиқди. Ўзбекистон номидан иштирок этаётган теннисчи иккинчи даврада чехиялик Катержина Синякова билан куч синашди. Синякова биринчи сетни 7:6 ҳисобида ўз фойдасига ҳал қилди. Раҳимова кейинги сетда рақибасига бирорта ҳам гейм бермади — 6:0. Ҳал қилувчи сетда ҳисоб 5:2 бўлиб турганида чехиялик теннисчи баҳсни давом эттира олмади. Раҳимова National Bank Open турнирининг учинчи даврасига йўл олди. Учрашув 2 соату 31 дақиқа давом этган.

Блаттер Инфантинонинг очиқ танқидчисини FIFA президенти этиб сайлашни таклиф қилди FIFA собиқ президенти Йозеф Блаттер Норвегия футбол федерацияси раҳбари Лизе Клавенессни ташкилот президентлиги учун муносиб номзод деб атади. У бу фикрни Жанни Инфантино атрофидаги раҳбарлик инқирози кучайган пайтда билдирди. «Клавенесс энг юксак ҳурматга лойиқ. У доимо аниқ позиция билдирган ва оқимга эргашмаган ягона инсон эди. FIFAни аёл киши бошқарадиган вақт келди», — деб ёзади Блаттер. Клавенесс FIFA раҳбариятининг кўп йиллик очиқ танқидчиларидан бири. У 2022 йилги FIFA конгрессида инсон ҳуқуқлари, шаффофлик, коррупцияга тоқатсизлик ва аёллар футболи масалаларини очиқ кўтарган. Июль охирида эса Клавенесс FIFAнинг Жаҳон чемпионати тижорий ҳуқуқларини бошқарувчи янги тузилманинг 20 фоизини хусусий инвесторларга сотиш режасини «жуда жиддий вазият» деб атади. Унинг сўзларига кўра, Инфантино аъзо федерациялар ишончининг катта қисмини йўқотган. Қаршиликлардан кейин 4,2 млрд долларлик лойиҳа бекор қилинди, айрим Европа федерациялари эса Инфантинони қайта сайлашни қўллаб-қувватламаслигини билдирди. FIFA президенти сайлови 2027 йил 18 мартда Марокашнинг Работ шаҳрида ўтади. Номзодлар 18 ноябргача ҳужжат топшириши керак. Клавенесс ҳозирча ўз номзодини расман илгари сургани йўқ.

«Менинг маошим 4 миллион евро эмас» — Фабио Каннаваро Ўзбекистон миллий терма жамоаси бош мураббийи Фабио Каннаваро ўзининг йиллик маоши 4 миллион евро экани ҳақида тарқалган хабарларни рад этди. Каннаварога кўра, у ҳатто ўзи билан бирга жалб қилинган мутахассислар маошини ёнидан тўлайди. Масалан, ҳужумчилар мураббийи Роландо Бьянки терма жамоада бепул ишламоқда, физиотерапевт Симоне Сиджильо эса аввалги маошининг атиги 20 фоизига ишлашга рози бўлган. Каннаваро, шунингдек, терма жамоа ичида маълумотларни сиздириб юрадиган шахс борлигини, бу эса нотўғри хабарлар тарқалишига сабаб бўлмаётганини маълум қилди.

Channel created