دلاع

سؤال للفضول برك عاود أقرا الجملة لولى.. كاين جماعة هنا يشوفو المنشورات بصح 0 تفاعل.. واه ماشي بسيف تتفاعل ومانيش نقلك تفاعل أصلا.. بصح حكينا في ستة وشكوكين موضوع.. ولا واحد عجبكم؟ في الفيسبوك ماتتفاعلوش واه نقدر نفهمك بلي يقدرو يشوفوك درت جام بصح هنا في تيليڤرام أنا ومانقدرش نشوف شكون دار چام.. مالذي يمنعكم بكل جدية؟ وراها مافيها حتى دراهم ميادورو مانربحها...

باش ماننساش... أمانتكم وصلت.. وتشووفو ردة فعل هذاك الإنسان... لاحول ولا قوة إلا بالله.. تخيلو بلي ماكاش داير في بالو أصلا بلي راح يدير العملية... شغل غير شاف المبلغ... نحا الموضوع أصلا من بالو... نهار شاف... الهدرة تلفتلو.. قعد غير يحمد في ربي ويقول.. ياربي مايتغبنوش... ياربي لي عندو غبينة نحيها عليه... ياربي مايزيدوش يتغبنو ڤاع في حياتهم.. وصدقوني الصدقة تفرح المتصدق أكثر من المحتاج.. قلتهالكم من قبل ونعاودها... أنتم الأفضل.. جزاكم الله خيرا جميعا كيما راكم.

هاهاها قبل ماتقراو... والله ما أحكيه هنا ليس طيرة ولا تطير... والله مجرد ضحك... علبالي كل واحد عندو هموم في حياته.. أيا نحب منين ذاك أشارككم أمور كي تخليك تبتسم برك معليش.. المهم درنا قالبنا وفتحنا الباب.. والأمور لباس.. شعلنا لكليماتيزور وطلقنا رواحنا.. ماهي إلا دقائق حتى نشمو ريحة غريبة... موراها بووم طع شعلت لاپريز تاع الكليماتيزور... ورانا ماكتيڤيين موود تريسيان.. つづく

مراسلكم ونقل الحصلة لحظة بلحظة.. つづく

هاهاها... صحة شفيتو واش صرى المرة لي فاتت؟؟ تاع المفتاح.. اليوم ماشي طموبيل اليوم دار... ورانا قاعدين برااااا.. راهم ڤاع مقلقين و أنا نضحك.. هاهاها سيزون دو... مراسلكم من قلب الحدث つづく

الله أكبر ولله الحمد.. تم إكمال المبلغ من طرف أحد الإخوة جزاه الله خيرا.. ودعواتكم له يخرج في الحج.. جزاكم الله خيرا جميعا.. بلي عاون يالوكان بچام.. بارك الله فيكم على هذه السعادة.. الواحد كان مورالو مكركر

الخاوة باش ترقدو على حاجة تطلع المورال رانا لحقنا 11 مليون و ميتين.. حب يقول بقات 13 مليون و 800 ألف.. بإذن الله غدوة نكملو معاها

رانا لاحقين بفضل الله 6 ملاين و 800 ألف... الحمد لله كبداية و بإذن الله نكملولو المبلغ

الخاوة تاع تيليڤرام درناها من قبل وماشي صعيبة علينا اليوم.. 25 مليون مبلغ كبير واه لكن يد الله مع الجماعة.. 100 ألف على 250 واحد وحنا فريناها.. ويسخرنا ربي سبحانه في إزالة المياه من عين هذا الرجل.. ونكونو سببا بعد الله عزوجل في تصحيح بصره.. الريپ وتلقاوه فلي كمونتار باش تكوپيوه بالساهل.. وكيف كيف كما قبل أي وسيلة دفع تساعدك للتبرع كاينة.. وبارك الله في الجميع

هذا الكلام ماحبيتش نديرو في الفيسبوك مخافة أن أجرح أحدهم ومايفهمش قصدي.. المهم صدقوني غير علبالي كل واحد وهمو ومشاكله وربي يفرج على الجميع كربهم ويرزقهم من حيث لا يحتسبون.. بصح باش تجي تقولي حطلي طلب يسلفوني ونرجعلهم.. و أنا وسيط بيناتكم.. لالا خاوتي لا تحملني مالا أقوى.. ياودي أنا لروحي نمووت نتخبط ومانتسلفش و إذا تسلفت نتسلف من عند واحد قريييييب ليا بزاف.. مالا غير أسمحولي.. وزيد راني نجلد نفسي جلد نقول استنجد بيا وماقدرتش نعاونو.. تأمنوني أقسم بالله غير فايت 3 شهر واحد الشيخ خاصاتو 25 مليون لعملية على عينو.. كل سمانة يعيطولي واش كشما دبرتلنا.. و أنا قاعد نعرق ونقول مزال.. غير باش مانجيش نحطها هنا.. لأني ندخل في بعضايا.. والله المستعان

المنشور هذا درتو في الفيسبوك شافوه شوية يرك.. ماعلباليش علاش.. أيا قلت نعاود نديرو هنا و من حفر الحياة لي كااامل طايحين فيها.. هي حفرة واش لازم ندير باش نولي سعيد؟؟ نشري العفسة الفلانية؟ نهدر مع فلان؟ نروح للپلاصة الفلانية؟ ناكل الدلاع؟.. أيا وتلقى روحك تتخبط غير بين هذو العفايس... بلاك راك درت كلش وكفاية!! لربما السؤال لي لازم تتطرحو هو: واش هوما العفايس لي راني ندير فيهم ولازم نحبسهم لتتحسن حياتي أفضل.. سواءً نفسيا أو جسديا.. السر للتقدم في أي مجال في الحياة متعلق مباشرة بالتوقف عن أمور سيئة راك تدير فيها.. حاب تتقرب من ربي تحبس الذنوب.. حاب جسم صحي.. تحبس الخلبايطازات لي راك تاكل فيهم.. حاب راحة البال تنقص العباد السلبيين من حياتك.. إلخ يعني السعادة غالبا تكون بالتوقف عما نقوم به ماشي البحث عن أشياء جديدة لبدئها.. دلاع وركن موتيڥايشن .

السلام عليكم الخاوة.. واحد عندو وليدو صغير عندو السكري شفاه الله وراه في حالة غير مستقرة تماما لازملو هذو Led patches زوج بوايط برك قيس شهر.. ومتوفرين خارج لبلاد.. يسما إذا كاين لي كفاش يدبرهملو مايبخلش.. وربي يحفظكم..

المهم لي ماحضرش لايف تاع البارح راني جبتلك منو جزء وين حكيتلهم كتاب يَّاش بالدارجة..

هند بنت الحارث مخترعة "أرجع غدوة" لَيْتَ هِنْداً أَنْجَزَتْنا ما تَعِدْ وَشَفَتْ أَنْفُسَنا مِمَّا تَجِدْ وَاسْتَبَدَّتْ مَرَّةً واحِدَةً إِنَّما العاجِزُ مَنْ لا يَسْتَبِدّ زَعَمُوها سَأَلَتْ جاراتِها وَتَعَرَّتْ ذاتَ يَوْمٍ تَبْتَرِدْ أَكَمَا يَنْعَتْنَنِي تَبْصُرْنَنِي عُمَرَكُنَّ اللَّهَ أَمْ لا يَقْتَصِدْ؟ فَتَضاحَكْنَ وَقَدْ قُلْنَ لَها حَسَنٌ فِي كُلِّ عَيْنٍ مَنْ تَوَدّ كُلَّما قُلْتُ مَتى مَوْعِدُنا؟ ضَحِكَتْ هِنْدٌ وَقالَتْ: بَعْدَ غَدْ! هاهاها لي ماحضروش اللايف يقلك دلاع هبل..

البارح كي جيت ننشر الفيديو هذا https://www.facebook.com/share/v/19AVe96TNy/ خرجوهالي ديراكت.. بلي أي فيديو فوق 3 دقايق ماغاديش ينتشر بزاف.. يعني ملخر هذه المنصات صح صح راها تدعم غي التعفن الدماغي وتساعد عليه.. ومن غير المنطقي أن تشرح شيء مهم في أقل من 3 دقايق... أيا تولي الأشياء المهمة ماتطلعلكش... والجماعة لي ملهيك فيديواتهم بالملاين.. ملاحظة مارانيش نقول الفيديو تاعي مهم.. راني درت بيه مثال فقط

نهدرو بمنطق.. كنا في البحر.. كنت نعوم وخرجت.. أيا تكسلت ديراكت.. الشورت طلعلي... راني متكسل.. منبعد صاحبي قالي أستر علينا فخاذك.. هل هذا يعني بلي صاحبي يتبع الرجال ويركز مع فخاذهم وشكوكو... والله ماراني ندافع راني على نقطة لي قالو بيدوفيل كفاش استنتجوها برك.

في فيديو أنا شفتو ماحكاوليش عليه.. وحدة حاليا عندها أكثر من 3 ملاين متابع... راكم متخيلين الرقم؟؟؟ دايرة فيديو توري للبنات كفاش يزنو مع صحابهم وكلش بالتفصيل.. والجماعة فلي كمونتار هابلة بالضحك وعاجبهم الحال... وقالك تضحكنا قلبها بيض.. باش تعرفو الكيل بمكيالين برك..

الخاوة لي حضرو البارح اللايف وعدتكم بلي اليوم ثاني كاين.. لكن راني تعبااان طافي.. مالا غدوة إن شاء الله.