خواطر د/حازم عبدالتواب

عارف وانت قاعد مزنوق على كتاب بتعد سطوره وفقراته وصفحاته وتنسى أوله لما توصل آخره. عارف وانت مستنزف لحظات طويلة زهق وتخبط وفقدان شغف وأمل ورغبة في الضحك. عارف وانت مستني دعوة او مستني حد يدعمك او يقولك كلمة حلوة تكمل بيها الطريق. عارف وانت تعبان جدًا ونفسك تخش تنام وتضربها صرمة وتقول كده كفاية وبعدين تقول لأ عشان ابويا او امي او نفسي. عارف كل دول ، ربنا شايفهم وبيرعاك فيهم كلهم. عارف ان شوية هيقولوا كلام إنشاء مش فارق بس عارف ان شوية اكتر هيصدقوا ان دول كلهم عدّوا عليّا وعدّيت عليهم وبقولكم الكلام من القلب. ابذل مجهودك وادعي ربك وارمي حمولك في الدعاء وكل ما تلقى نفسك تعبت قول عشان ابويا عشان امي عشان نفسي عشان حد محتاجني .. عشان دول قوّيني يا رب. #خواطر_قد_تصل د حازم محمد عبد التواب

اِحتسب عند الله تعبك احتسب عند الله سهرك على العلم احتسب عند الله ضيق نفسك وتوتّر قلبك احتسب .. لن ينساك.. أصلًا هو لا ينساك #خواطر_قد_تصل

الحمد لله وبفضله أكملت عامي الثامن والأربعين قطعتُ دون شك أكثر مما تبقى حاولتُ ألا أوذي أحدًا بكل قواي حاولتُ ترك ذكرى طيبة في القلوب لم أكن لأظنّ في نفسي الخير أنا عبدٌ فقير يظنه البعض أكبر مما هو ويظنه البعض لا يستحق العناء الحمد لله على ما مضى وادعو الله بالخير في ما هو آت د حازم محمد عبدالتواب

رزقك ونجاحك ومكانك اتكتب خلاص. مش في ايد حد ينقص منه اي شعرة ولا يغيّره. اللي اتكتب في علم الله ليك محدش هيقدر يبدله. عشان كده وبشكل قاطع اطلب الرزق بعِزّة فليس بيد أحدٍ من الأمر شيء. #وانت_بتبدأ_يومك_النهارده د حازم محمد عبد التواب

مش من حق اي حد يحكم على تجربة غيره في ناس شقت الطريق في مكانها ونجحت وناس مالقتش اللي يسندها في مكانها وفشلت وناس عافرت ونحتت الصخر في مكانها ونجحت وناس اتحاربت واتشتمت واتهمت بأبشع الافتراءات وسافرت وناس تانية نجحت جوا وبرا وناس اكتفت بنجاحها في مكانها وناس نجحت في كل مكان راحتله اوعى تاخد تجربة غيرك copy مفيش Idol في اي تجربة لأن كل واحد ليه ظروفه حارب في مكانك وانجح ولو فشلت غيّر مكانك ولو لقيت اللي يسندك اشبط فيه ولو لقيت اللي يحاربك سيبه وانجح بعيد عنه وبعد كده انت حر #خواطر_قد_تصل

انت فاهم يعني ايه ويمكرون ويمكر الله يعني يباتوا ينصُبوا في مكايد وربّك شايف ومطّلع وبيردّ كيدهم ومش بس كده ، كمان بيجيب حقك خليك مع ربنا وما تشغلش بالك بحد

مش كل كلمة تتقال في ضهرك ترد عليها خلي اللي بيتكلم يشبع بكلامه لا هو عارف يوقفك ولا هو حافظ مقامه #خواطر_قد_تصل

اتعلمت في حياتي ان التردد أسوأ من اني آخد قرار وأندم عليه لازم أفكر كويس في القرار وبعدين آخد القرار بعد الاستشارة او حتى بيني وبين نفسي مع الاستخارة وبمجرد أخد القرار انتهينا ولازم اديله كل الاهتمام وكل المجهود ولو حصل وطلع غلط مش هعذّب نفسي بالندم لأن ربنا هو اللي يسّر القرار ده حياتنا كلها كده قرارات امشي هنا ولا هنا أتخصص في دا ولا دا اشتغل دا ولا دا استقر ولا أسافر أسيب الشغل ولا اكمل الشغل التردد قاتل يا جماعة وال comfort zone اكتر حاجة تضيع شخصيتك وأحلامك خد قرار بعد التفكير بس اوعى تموت متردد #خواطر_قد_تصل

تلات حاجات تعملهم مع اللي مش بيحبك ١- مش لازم ترد على سفاهاته وكلامه في ضهرك ٢- مش لازم ترد على مواقفه السيئة بالعكس طنش ٣- مش لازم ترد اصلًا عليه

(ولا تنسَوْا الفضل بينكم) لو زعلت مع حد بتحبه بلاش تفتكر الموقف الوحش بس افتكر كل الخير اللي كان بينكم افتكر لما كنتم سند وعون لبعض متخليش الشيطان يطلعك برا حدود العشرة الطيبة امشي وأبعد لو عايز بس اوعى تنسى انه كان بينكم عيش وملح #خواطر_قد_تصل

النفس ضعيفة جدًا جدًا so fragile كلمة ترفعك السما وكلمة تنزل بيك الارض. كلمة تزقك لأدام وكلمة تخليك مش طايق نفسك. فن التعامل مع الناس مش سهل لكن ليه قواعد واحكام بتقول خليك سهل خليك ليّن خليك طيب خليك صبور خليك متعاطف خليك متفهم خليك متسامح خليك بسيط. النفوس لما بتنكسر مش بتتصلح للأسف بالذات لو النفوس دي ملهاش حرية الاختيار او التصرف او حتى الهرب. ألسنا أحق بقلبٍ سعيد! #خواطر_قد_تصل

(ومن مشى مع أخيه في حاجةٍ حتى يقضيها له ثبَّتَ الله قدميْهِ يومَ تَزِلُّ الأقدام)

اكتشفت مع الوقت ان في ناس ممكن متشوفش انت بتعمل ايه عشانهم. ممكن كمان ناس تانية تنكره. وممكن ناس تالتة تقولك انت ما عملتش كفاية. وناس غيرهم ممكن يطنشوك اصلًا كأنك مش موجود. في ناس بقى مكانها في رأي الشخصي عمق صفيحة الزبالة ودا بينصح ازاي تعمل عشان تاخد رضاه من خلال وجهة نظره هو الشخصية. وعلى العكس بقى ان في ناس بتشكر في العلن وناس تانية بتشكر في السر وناس تالتة لا في العلن ولا في السر بس بيدعيلك في صمت وسكوت. النهاية ان المؤمن مثاب على كل الناس دي دون ان يدري فاللهم ارزقنا حسن النية وتحمّل أذى الناس.

اسندوا بعض يا جماعة الكبير يسند الصغير والأستاذ يسند التلميذ والمعلم يسند الصبي الدنيا صعبة والبرّ لا يبلى

حلو اوي لو حلمت ووصلت وحلو اوي لو ما وصلتش وصبرت وحلو اوي لو صبرت وبعدها فرحت

تعامَل مع العالم حواليك بشكل واقعي خلي عندك بدل الخطة اتنين ومتحكيش الخطتين لأي حد #خواطر_قد_تصل

ما تستناش الوقت ولا الظروف ولا المكان عشان تبدأ ابدأ مفيش حاجة بتستنى ومش لازم الظروف تتهيأ عشان تبدأ ابدأ انت وبعدين الظروف هتتهيّأ #خواطر_قد_تصل

اللي يطلب منك حاجة تقدر تعملها : اعملها بس بقولك ايه: اعملها بإتقان وحرفنة اعمل الشغل في أجمل صورة ربّك بيحبّ اللي بيعمل حاجة يعملها بإتقان وربّك كريم بيكافيء المحسن أضعاف إحسانه #خواطر_قد_تصل

معنى التسليم لله انك تكون في ورطة بس عارف انك خارج منها ، ازاي وامتى مش عارف.. بس انت عارف انك خارج منها بتصريف الله للأمور ودا المعنى الحرفي لجملة ( لا حول ولا قوة الا بالله) #خواطر_قد_تصل

انت مش مدرك يمكن كتير من النعم اللي معاك عشان كده نفسك في حاجات كتير مش معاك هل تصدق ان قوت يومك اللي معاك وانت اخدته for granted مش مع غيرك. شغلك اهلك عيالك رزقك منصبك صحتك حتى نضافة قلبك حاجات كتير من كتر ما هي في حياتك انت واخدها for granted ومش مدرك قيمتها وطمعان في غيرها وحاسس انك محروم احنا غلابة اوي في ملك الله ومش فاهمين حاجة وبنزعل لما بنتحرم والحقيقة ان ربنا عالم جوانا ايه وايه ينفعنا وايه يضرنا. نحمد ربنا عاللي معانا وندعيه يرزقنا باللي مش معانا ونرضى لو مكتبهوش لينا #خواطر_قد_تصل