حسن علي الغالبي

مَثلاً .. بچفوفي ورقة و أگدر أرسم بيت حيل صغير بي مرجوحة حلوة ومكتَبة .. وعصفورة صَفرة و ورد جوري ويمّه انتِ .. مَثلاً .. من أرد للبيت تالي الليل وأدخِل وأفتح الباب إعلَه كيف .. من اطب الگاچ منتظره بغرفتي .. مَثلاً .. نفرش إعله الگاع ونطشّر ورقنا نجيب چاي .. ندخّن ونكتب قُصص لا، إنتِ قُصتي ! حَسن علي الغالبي

أنت حزنٌ، والحزن هو كلّ ما أعرف ..

أنتَ خلّيت الهوىٰ يسد باب روحي ويَتّمت فَرحة عيوني التِبدي بيك .. ليش كل هذا الحِسِن ع الرُمح يصعد؟ ليش ما خَلوّك بالقُرآن آية .. ليش ما كِتلوا غُربتك مِن إجيت وشافوا عيونك ولاية .. يا حسَيني، عيونك بلا رمل حِلوة وصوتَك شِما تَعب يحلَه .. كون ألم لَك كِل ندىٰ بروحي وأجيك وعادي اذا ينحِسب دِهلَه .. أنتَ وحدك تَعبّتني .. وما بچت عَيني إعلَه غيرك، لا وحگك .. أنتَ يالتسوه دَمعتي وخاطري الينكِسر يَمّك .. انا كل أمنيتي ذاك اليوم يَمّك ..! حَسن علي الغالبي

أَنتَ اَلَّذِي تَجَلَّتْ بِهِ عَظَمَةُ اَلْخلقِ كَأَنَّكَ تَجْسِيدٌ لِكُلِّ مَا يَسْتَطِيعُ اَللَّهُ فِعْلَهُ ..! حَسن علي الغالبي

أحملُ رأسي كما لو إنني متورطٌ بجنازة ..

سيّدي حُسين، يا حَبيبي .. هلّا نظرت إليَّ قليلاً؟ آنا من ذُريّتكُم وإبنكُم علّمني كيف أصقلُ دمي ليكون مرآةً لثباتك فلا يمرُّ عِرقٌ في جسدي إلا وهو يرتّلُ اسمك علّمني كيف أجعل من صبري محراباً ومن صمودي درعاً فلا تكسرني الدنيا وفي صدري شيءٌ من كبريائك علّمني كيف أرى الله قبل كل شيء، ومع كل شيء، وبعد كل شيء .. حتى تذوب بصيرتي في نوره فلا أهابُ ظلام الدنيا سيّدي حُسين، يا حَبيبي .. في منزلنا القديم كانَت لدينا صورةٌ واحدةٌ لكَ عندما كُنت طِفلاً، كنت أسمع والِدتي تُخاطبك بِلهجتنا العامّية وهيَ تقول: ( وانتَ بكيفك مولاي، ضلّت يمّك بعد ) كُنت أشعر بأنّك واحِدٌ من عائِلتنا وعندما أسألها من الذي تخاطبينه ؟ كانَت تقول (خلّي أيدَك على گلبك وانتَ تعرفه) عندما وضعتُ يدي على قلبي كما أمرتني أمي لم أجد نبضاً وجدتُ كربلاء .. هُناك عرفتُ أنك لستَ غائباً يُستحضر، بل حاضرٌ لا يُغادر سيّدي حُسين، يا حَبيبي .. أنا أصغرُ من أن اكتبَ لك رسائلٌ كهذهِ لكِنني وضعتُ يدي على قلبي، وكتَبتها لا لأعرف من أنت، بل لأعرف من أنا معك .. أحبُّـكَ يا مَولاي، فكُن لي وجهاً في الزِحام. حَسن علي الغالبي

مدري ليا گمر مَنسي خطَفني اللَيل أخَذ لوني وضِوه عيوني .. هاي اللَيلة إذا خلصَت وغرّد طير لَتگعدوني إدفنوني ..! حَسن علي الغالبي

كانَ لابُدَّ مِن نَحن، ومَعًا ..

انتَ تضحَك .. وآنا أغمّض حيل، أريد أشرَب ضِحكتَك .. حَسن علي الغالبي

حِزن .. واللِيلْ ما يطفىٰ بجِگارة وكاس حِزن طَيرة وسِرَح بيها الفِكِــر طاحَت بچَف الناس .. حِزن اغنيّة من يغفى اليشَغّلها وتِظل تغَنّي للحيطانْ .. حِزن، مَرّات أشوفه إنسانْ .. يتَعّبني، يكَبّرني .. مَگابر غاد يوگَفلي عَلىٰ العِتبَة ..! حَسن علي الغالبي

يا فَي يبقى لسنيني ؟ مِن شَحّة المِزنَة وشرب لوني الفاس مِن شفت السواجي عيون ما تِهوىٰ غصِن مَتعوب .. الشَرارة التِطفَح من النار، هذا آنه .. الكِحلَة التبقى مِن فَرّاشة عَالشبّاچ، هذا آنه .. التَراب بهامَة الدَفّان، هذا آنه .. يا چَف اليصافحني وسَراب آنه ؟ العِجاف إستوطَن بروحي ولا بير الفزَع يوسِفْ ..! حَسن علي الغالبي

الصَعبة لو فَتّحت عيني وما لگيتِچ .. الهَظمة لو غَيري اليصير إسمَه بهَويتِچ الغَيمة من تعبر الگاع .. تخَلّي كَسرة چبيرة بعيون الفلِح لا تخسريني وأخسرِچ، ما يلوگ إلنا الجَرح ضَلّي يَمّي .. هذا آخر صوت بيََ وصاح أريدِچ إنطيتي بَس إصبِع الحَلقة وراح أخلّي الدِنيا بيدِچ ..! حَسن علي الغالبي

@LP9BOT - 06:00, 5.6 MB

الدنيا جوع، وبين أصابيعَك شلِب .. لا تگلّي شعندَك وشتريد مِنّي آنا أجيتَك بَس أحِب .. بروحي ماي بگَد ضِماك شمَحلىٰ إذا من ماي البروحي تشِب .. الغَيم ما يعثَر إذا ماعندَه گاع وبين گاعَك والمطَر خلّيت روحي آنا أريدَك .. مَرّة شفتَك بالحلِم فَزّيت حِلَّك يزغَر ويكبر بكيفه اليهوىٰ مِثلَك .. لا تكبّرني الوَكت ما طاوعاني .. منين ماشوفَك هَلاهل مشتهيها وشَمعة بضلوع الصواني .. حَسن علي الغالبي

لا تِحسدني وتگلي البرود شلون .. إذا احچي الضگتهِن ظَهرك ايحدّب گابلني وأسولف كون عدك حِيلْ .. والزَم سبحتَك وآنا أحچي وانتَ احسِب الهدوء البيََ وادم مصخَت وداعيك مولَح حَتّى أسمهم، والعرِج يغلِب الهدوء البيَّ موقِف ردتّه بس ماصار وعالمسوّيهن الوادِم شعر تكتِب .. الهدوء البيَّ أخذ من عِندي بالي الچان بارِد وأصفى من الماي مال الحِب .. الهدوء البيَّ كلفني دليلي الچان .. يعلم الفاهي مِن يعشَگ شلون يحِب حَسن علي الغالبي

بعـد ماجيب گلـبي لچفّك موَزّر ولا أدنّي لسچاچينَك دفو المَنحر شفتَك ساجية بلوحة وصفنت عليك مدنّگ چنت يمّـك فاتني المنظَـر .. شلّت راسي وشفِت شَط يشبه الفيروز أزرَگ مِن جفِـن عَيني العليك إنطَر .. وأكو إعلَه الجرف نورَس صاحني، أتعنيّت .. مسَح جنحَه إعله صَدري وگالّي أرتاحيت ؟ گتله آنا غريب وهسّه ضگت البَيت .. گال آنا هَلك، والفات يتدثّـر .. بعـد ماجيب گَلبي لچفّك موَزّر ..! حَسن علي الغالبي

انتَ من تضحَك .. گناطِر حِزني تمليها النَوارس والوَرد بعيوني يلتَم .. انتَ من تضحَك حَبيبي الوَطن ينشَم أضحَك بهيدَه، أرد أعيش .. لا تِخلّي الحزِن يتشَلبه إعلَه گلبي .. ولا تِگلّي بدوني عيش .. ياحَبيبي .. ضلوعي خَشّنها الحزِن، لاگيني ريش .. دوّر بشامات خَدّك تلگَه روحي .. ودوّر بروحي شتحِب تِلگاك انتَ .. ولا أتعّب بالَك شتِحچي وأحبَّك .. حابَّك سَنتين سَكتة ..! حَسن علي الغالبي

الشَمس لمّت ظفايرها ومِشى بدمّي البَرد، خطوَة نَبي إعله الماي خطوَة خيل مذعورة .. وخَذتني جدامي يَم شبّاچ أنا بدونه ضوَه بصورَة .. لگيَت إعلَه الوَفر مَرسوم نص عَيني وتراچي ثنين هِمَست إلهِن دِفَن .. لِمعَن .. وگالَن راح .. ما تانيتني بشَمعة وَره الشِبّاچ ؟! حَسن علي الغالبي