شێعرێ هەورامیێ

وێرەگانەو بێکەسی وێرەگانەو بێ‌کەسی کێ تیشک و دیڏارش دیەن؟ کێ جە ئی تۆزێنە ڕەنگی سوور بە ڕۆخسارش دیەن؟ تاسەمەن شنیۆ گیانی یەک هەناسەو دڵوەشی حەیف جەوەرپەنگوو شنەی دڵ بەرزەدیوارش دیەن ڕاڕەوو ئی‌ ڕایە هەرچن تاسەبارێوەن بەڵام ئاڏ جە پاڵوو هەر حەزێوەش پیرەکەمتارش دیەن هەرکە بێ میراوو جۆی وشکاوە ئەورێ سەرچەمەی سا ئەگەرچی باخەوان وەرمەی بە ڕووبارش دیەن چێگە نان و ڕشوە باوەن تا بلی سردێرە سەر پەی دز و تاڵانکەرەی دوورۆوە ئەنبارش دیەن مانگەشەو مەڏیۆرە واری پێسە کێشکچی شەوێ داخەکێم هەرگیز نەواتش دز جە کام شارش دیەن ئەی فەڵەک! چاوەختە داخێ سۆچنان ئۆخەی جە دڵ ئی دڵەی مێحنەت‌زەڏەم تا ئیسە ئازارش دیەن #ڕه‌حمەت_سەففاری(#شەفەق) @hawramyanah

"هانەو بڵ"ی ئاخ پەی ویەردٚەو هانەکەو بڵی جەسەم شادٚ کەرێ، هەر پێسەو گوڵی هانە وەشەکەو قەدٚیم جارانی فێنکی وزێ، جەسە و هەم دڵی بەیدێ با بلمێ ساتێو دیدٚارش فرێحە وزمێ، یانە و مەنزڵی هەرزەلە بەسمێ پا ملەگاوە وەرانوەر هەجێج، هەوارگاو خێڵی بنیشمێ وە شادٚ خەفەت لا بەرمێ هۆردەیمی دەوار، هەواروو کێڵی #هومایون_موحەممەدنژاد @hawramyanah

تۆ چەمێت پێسەو شەراوی مەس کەرا ئا چەمێ بدٚیا، شەراویچ هەس کەرا چا پیاڵا ئەر پیاڵێوەم گنۆ ئا پیاڵێ ئی چەما نەوڕەس کەرا پا چەما تیرێ، بیاونیما فەنا ئا چەمێ دیدٚێ کوشا، ئەنقەس کەرا تا چەمێم بدٚیا چەمانت نوورەکێم! ئا چەمێ دیدٚەو کەسی، بێکەس کەرا چا چەما ڕەنگوو چەما یاوا چەمام ئی چەمێ مەدٚیانێ هەر وەس‌وەس کەرا پێسە ڕۆجیاری پرۆشەت دا چەمام ئا چەمێنێ ئی چەما قەقنەس کەرا چەم چەموو تۆن و چەموو سەیێدٚ جە تۆن پەوکەتەی دیدٚێم بوینات مەس کەرا #سه‌یێد_ڕه‌حمان_مه‌حموودی @hawramyanah

من و تۆ، من و تۆ تەنیا و بەس باڵێ گێرمێوە ڕوو بە ئاسمانوو وەشەسیایی سەربەستیما نەکریۆ کەلەپچە و پاوەن بیاومێ ئاسۆگاو تەختی، چێگە! یاوان کۆپڕ وەشبەختی. دوورێ گنمێوە جە تەنافەو سەختی. ئی وەڵاتە، کە حەر ئەجۆ بەهەشتا دەسوو ناحەزاوە کەوتە و کەنەفتا من و تۆ و بەس بازدەموو خەمانە ئازادٚ کەرمێ نەفەس بازمێ جگا دنیای پەڕ خەمی ئێتر چی کاولاوێنە هۆرمەگیریۆ کۆڵی قورسوو ماتەمیی شانەو حەقیقەتی لار بیەن جە تاوەو سەنگینی ستەمی نان تێکەڵوو ونێن ویژدان ئاوەڕووش شیەن، چە ڕسوان ڕاساڵی! من و تۆ و بەس بازمێ جگا، ئۆکسیژن گڵوەو بێتاوانیەنە یاوان تەنگی نەفەس پا هۆرگێرمێ بلمێ دێرا هەژار ئاوران، دارا سێرا جوان کێشیان لێواروو مەرگی شەرم نەمەن پینە نمەکریۆ دڕیای بەرگی ئای چننە بێزارەنا دڵی پەڕ، چەمێ هەرسینێ، بە تیرەو ناکەسا کۆڵەوارەنا من و تۆ و بەس، دەسم گێرە، حیچ بازگێوەنە نەمدرمێرە وات و واچما با نەژنەویۆ قفڵێو دەیمێ سەروو زوانی پەی چن وەختا وێما بسپارمێ بە گێلێ و نەزانی چوونکە ئەچی دەورانەنە هۆشیار زوو گنۆنە دامی ئێما و ئێشارە وزمێ یاگێو نوکتە و کەلامی تەنیا من و تۆ و بەس... #ڕه‌عنا @hawramyanah

نەووەهار و وەروێ تازێ و چایی داخ تا سەر مەبا گوڵعوزار و دڵنەوازێ و سه‌وزه‌ باخ تا سەر مەبا ئێدٚ بە مڵکوو نەوجوانیم ئەو بەهانارنجوو تۆ چایی داخیچ پەی شەرابیم عەینوو چاڵوو زنجوو تۆ واتەبێم هەر زوو بە بابایم باسوو عەشقیم پەی کەرۆ باسوو ناروو دوری یاری پێسه‌ مه‌شقیم پەی کەرۆ تۆ قەراخوو ئاسمانی دەفتەروو عەشقوو خەما تۆ هەسارەو نەوسووەیلی هەرسوو گۆشەو ئی چەما مەکتەبوو تۆ هەر مەبەسیۆ چارەو ئێمەیچ هەر وەناین ئاوی زاتش پەی لواین و مدرۆوە ئاخر گەناین تۆ وەکوو شەوبۆ دەدەی پێم دەرسی عەشقان هەر لە دوور شەو بە هاتن بۆنی زوڵفت ڕۆ بە ڕەنگی لێوی سوور #بورهان_حوسه‌ینی @hawramyanah

نازەنین! نازت بە چن؟ جیاتی چەکی گیانی کێشوو تاڵ بە تاڵ،  تاڵی شەوات تاتا بکێشوو موو بە موو دیدٚە وەش! کلنی چەمێو، تاوان تەوانش کێشۆ سەر سەر بە سەر، شەو دەیمێ سەر  کەیف و وەشیما دوو بە دوو #شارۆ @hawramyanah

گەڵایێوم مەنەن ڕێزوو جە عەمری خەزانش چن غەریبا، به‌شکوو نه‌مری وەری تازەو سەباحانەو جوانی سەیێ پیریش چەمێ مازارە عەسری سەرەوکۆیما سەراوار بۆوە ئەیزەن بە سەبکوو نەوهێلالوو شۆنوو بەدری جە تەقدیروو سناریۆ فیلموو ژیوای بیانێ ئەکتەرێوو نەقشوو زەجری نەوارەو کارەساتوو مەینەتاما کەرۆ وەرمێو بەیانوو شەرحوو سەدری چەمێت تۆشەو نەژیوایم بێنێ ئازیز بیێ تەسکینوو ڕۆو میزانوو حەشری وزووشا دامەنوو دوعا و نەجاتی بە مەیلیشاوە بدٚیاناوە جەبری چەمێ لاڵێ و دەمی کۆر و سەره‌ی شەل مەسێ و هوشیار بە مەنگی جاموو خەمری ملا یۆ یۆ عەزیزێ چی هەوارەو نیا چارێو مەگەر دامانوو سەبری #خالێد_ئه‌حمه‌دی @hawramyanah

بەرمەشە تاقەت شارەینە جە خەم گەورە بەشەن، بەرمەشە تاقەت ئی‌چارە ئەگەر چارە ڕەشەن! بەرمەشە تاقەت چی‌ دەورەنە یاوای بە وەشی سەخڵەتە ڕانە سەرکەوتە بە سەر بەرزە کەشەن، بەرمەشە تاقەت ئانەی کە مەوینینە بە شاڏ، شێتە مەجازەن یا سەروەشەن و مەنگ و نەشەن، بەرمەشە تاقەت تیکێوە بە دەم ژاویێ ئەوەڵ ئیسە بە گۆشەن ئا تیکە بە گیانت هەڕەشەن، بەرمەشە تاقەت تۆ کاوەترەینی کە جە سەردانە ڕەمای‌بێ پەی تازە وەهارەی ورەشەن، بەرمەشە تاقەت هەرکەس بە ئومێڏێوە مەنەن زنڏە بە پاوە تۆ واچە دماڕۆیوە وەشەن، بەرمەشە تاقەت ئەیرێوە کە گیسیانەنە تا ناحەقێ سۆچنۆ چی وەزعە شپرزێنە گەشەن، بەرمەشە تاقەت #ڕه‌حمه‌ت_سه‌ففاری (#شه‌فه‌ق) @hawramyanah

نمەی ڕۆیوە وەشی بوانم بە شێعرە وەشی بوانۆ دڵ و زوانم بە شێعرە بە مەرگم هەر بەمەرگی شێعرێ مەی پەیم جەسەم بی بە ئەسقوانم بە شێعره‌ *** وەشی کۆچش لوا قەورە نمەیوە بە مەرگوو پیری دەی گەورە نمەیوە لوا ئاوەختە دەم قەلبەن خوێ، حەیف چە زوو کۆچش کەردٚ ئا دەورە ، نمەیوە *** خەمێ کەوتێ دلێ ناقوو هەناسەی وەشی کەوتەن ملوو ئاواتوو تاسەی وەشی ڕاسی درۆینە ئارۆ ڕاسەن؟ وەشی ڕاسی و درۆینە پێسە ڕاسەی! *** دەمم بخوۆ دڵم مەخوۆ دەمیمه‌و دەمم کەی زانۆ پەی زام و خەمیمه‌و فرەن ئێشم جە شادٚیم کەم نمارۆ خەمێ من چن فرێنێ لێ کەمیمه‌و *** جە شادٚی من خەمم گۆرانی واچۆ پەژارەیچم بە چۆپیشه‌و مەساچۆ کە چووزێوەو وەشی بخوۆ جە ساقەم خەزانم مەی لەقوو داریم مەپاچۆ *** ئەچا گازێ خەمم ئاما بە ئیمان دماو ئا ساوێ خێزا تن ڕەویمان بە گوونی ساوێ سانوو ترشەساوی تەرێق نەویانێ، نەویانێ پەشیمان *** بە شین ئامانێ دونیا هەر نمەخوو جە بازار و جە یانە و بەر نمەخوو سەرەم مێشۆ جە واقەو ڕۆو ئەدٚا بیەیم پەڕەن مەژگم جە دەردٚیسەر نمەخوو *** خەموو ئەم بێ حەریف و بێ ڕەقیبەن جە بەزموو شادٚیانەی بێ نەسیبەن بە قورس و شەربەتێ دەرمان نمەکریۆ جیام نمازۆ و چن دۆسێ عەجیبەن #سه‌یێد_ڕه‌حمان_مه‌حموودی @hawramyanah

شێعرە: ڕابڕان نویستەی: بێهرووز موحەممەدپوور(شارۆ) ڕێکوستەی: ڕێبوار مەحموودپوور https://t.me/cherpewpawdange

تۆش دیەی چەم، ئەلوەداعش کەردٚ چەنی وەرموو شەواش «ناسکێ وەی»م پەی تۆ ملۆ تا ئاسمان نەغمە و نەواش تۆ بلی من ئەر دڵیچم دۆ وەنە و کێشوو نەفەس مەردٚەنا و سەهوارێ دەفنوو پەیکەری ئارۆ و سەواش بووعەلی چووزانۆ دەردٚەو بێ‌تۆیی دەرمان کەرۆ تامی تاڵوو زایێقەو فەرهادی شیرینا دەواش تۆ بەرۆ و بەندوو دڵیم کێشۆ و منیچ چارەم نیا واچە پا شۆفیری دڵما پڕچیا، نەختێ یەواش یا ڕەبی کەی بۆ دڵش سۆچۆ بە حاڵیم یەک نەفەس یا دەمێ ساکن بۆ قار و جەور و زوڵمی ناڕەواش مەحکەمەو عەشقی دڵی سۆتەی چەنی مەحکووم کەرۆ؟ پیرەزامم ڕاسە ماچۆ و کورپەهەرسیم با گەواش شاهێدٚی سەرتەر جە قازی کۆن ئەگەر ژیرێو مەنەن وێم کەروو ئێقرار حەیاتمنی تۆ خەڵکیچ مژنەواش نەزمێ زۆر و زاموو تۆ و زاری و زریوەیم بەر وزۆ مشیۆ «سەعدی»ش شەرحە دۆ کورتێو دلێنە و موحتەواش #سەعدی_غەریبی @hawramyanah

@hawramyanah

هەڵسێوە تکا ڕانە سەرێوو یەهەریش دا بەردٚش چنی وێش شەوقوو دڵی و بۆو سەفەریش دا ئاورا بێ چەم و سێروو تەماشەو چەمەڕایی ئی دوورییە دانێتەنە تاموو سەقەریش دا تاڵی خەمە قورسێوی وەنۆ بانوو چەماتەو ساڵحانوو سەڵاو مانگێ بێ جاڕوو خەبەریش دا لەرزێوەنە سۆچیەونە کزی کونجوو خەمێوی تاڵاوه‌و شەوێ غوسڵوو خیاڵوو سەحەریش دا سەوزیابێوە ئاواتوو چرۆو داهۆڵە پیرەی هۆرکەردەیەو هەوروو کەرمیت سۆو تەوەریش دا تاویانێوە زقموو خەفەتاتەو بێقەزا بی ئی تاوێ بە دەرس کۆپڕی وانا و بە وەریش دا ماتوو ڕوخوو دڵداری بە نازیش کەرۆ گەڕیێ غافڵ جە خوماری چەمی کیشوو زەفەریش دا ئیمانە هەرامەننە توفەیلوو چەمەکات بێ ناقووسێوە زڕیامەنە بانگوو خەتەریش دا #خالێد_ئه‌حمه‌دی @hawramyanah

ئی نەسڵە کە ئامێنمێ بە قەرزاری ویارمێش چارما نەمەنەن عارەنە بــێ عاری ویارمێش هەرزانتەرینوو هەر یەهەرێ ئێمەنە وریا هاوارتەرینوو هەر هەڕەشێ ئێمەنە کریا جۆرێوە فەقیری شەکەتیش وسنە گیانی پیری وەڵێ وادٚەیشنە بیەن کۆڵێ جوانی کانەو چەمیما و بەینوو چەما و تەختوو تەوێڵێ بی حــەکیـــەتوو وارانــێ کە دۆ کـۆنــە کەوێڵێ ئۆخــەی دلێ ئاخا دڵــی  وێرانیــنە پــێسەن ئا دەنگوو پەپووی چۆڵە هەوارێوە هورێسەن وەڵڵاهـــی خیاڵیـــچنـە بە ئاواتــێ مەیاومــێ هاوار ئەرێ هاوار ئــــتر ئـی باری مــەتاومــێ شێعرە: ناتێق ئەداک

کەمانوو چەمات مانگەو چواردەی ئینتیزار کێشەن ئاخۆ کەی بەر بەی مەرامی دەروون کەرۆ بە حاسڵ تلسمی بەسیای وێساڵ بۆ باتڵ #شاهۆ_مەعازی @hawramyanah

وەسێن ئەی بێ‌خەمی دێوانەحاڵ شێتی وەسێن دڵ بێ‌کەسا دایێم بە یادٚت دوورەماڵ جامش بە دەس گێج و مەسا بۆرێ کەسم دڵ بێ‌دەوان بەش لابەری دێوانەگی یانەو وەشی بانش تەپان ئاواش کەری وێرانەگی دڵ‌بێقەراری کوشتەنا شەوزینەداری تا بە کەی‌؟ دڵدارەکەی بێ‌بەشتەنا نامەی وەهاری تا بە کەی؟ ئەر تۆ نەبی زامدارەنا ئێشوو دڵی هەر چڵ کەرۆ بێ تۆ جە وێم بێزارەنا ئی گردٚ خەما کێ لا بەرۆ ئەر ڕوێو نەوینوو ئا چەما بێمارەنا تۆم بی قەسەم دایێم چەمێت وینوو کەما بێ‌تۆ دەوام نمارۆ جەسەم دڵ بی بە تالاروو خەمات بێ تۆ هەناسەم بەرنمەی پەی زیارەتوو کەعبەو چەمات تاکەی کەروو ئارۆ و سەبەی تاقەت نەمەن هاوار وەنەم هێجری هەناسەش ناست پەنەم سڵامت کەروو ئەی دڵ وەسێن بەشکەم تۆ واز باری چەنەم #مه‌نووچێهر_ته‌وفیقی @hawramyanah

زوڵفێش خەناوی و مێخــەکی ملیش سورمەساو چەما، بە ڕەشتەی کلیش هـــــەورامیش پۆشان پەریسا شێوە چەم و دڵ کێشـۆ تــەمــاشاو جلیش #شارۆ @hawramyanah

ماچا دڵ وەشی ڕەنگش کاڵ بیەن شیرینیش جە دەم بێشک تاڵ بیەن ماچا دڵ وەشی جە کیسەی پەڕەن ئاسوودە خاتر جە گۆشی کەڕەن ماچا دڵ وەشی هەر بە نام مەنەن چوون تەم تەمانی ڕوومەت جام مەنەن ماچا دڵ وەشی سەوزە وەهارەن یا خۆ ساڵ بە ساڵ وەشڵەی بە پارەن ماچا دڵ وەشی هەر ئێنتیزارەن ڕۆیای سەرمەستی قەراخ ڕووبارەن بەڵێ ڕاس ڕاسەن گرد ویریە ڕاسەن دڵ پەی دڵ وەشی هەر ئاوات واسەن بەڵام دڵ وەشی بێ ڕیشە نیەن چەنی خێلقەتی جە ئەدٚای بیەن هیچ‌وەخت جە دڵی مەبۆ بە جیا مەیاوۆ دەسیچ موفت و مەرحەبا دڵ وەشی یانی هەوڵی بێ وچان دوور جە بێ لەشی و زەحمەتی سەرشان قەدیمیا واتەن هەر یاگیە وەش بی یا کە پەڕ بە دڵ دڵتا چا گەش بی ئینەی بزاندێ دڵ چاگە بەندەن تۆموو دڵ وەشی لەیلێ چا شەندەن #شاهۆ_مه‌عازی @hawramyanah

گجار بێتاقەتەو ژیوای بوو مەسەڵەن یۆ پەرسۆم پەی! بێ ئانەی واچۆ: وەشە بیێنە یا نا؟ یا کەمتەر سۆچوو ڕۆحمەو گێرەش تا باریکتەرین ڕەگم! یا سەروو گردٚوو ئی دێمەنە وەشاو دنیاینە بەشم دەلاقێوە هەناسە تەنگوو بیمارەسانی نەبۆ... گجار ویرێ کەرووە کریێ گردٚ چیو جۆرێوتەر بیەی من چزێ سۆرەنگا و ئەخمووتەخموو پەرەستارا لامۆ ئاسایی نەبیەیوە من شەوێوە وتەینێ تا سبحەی و دەردٚێوە وڕ نەشیێ ملمرە یا لاشەم ئێننە تەوانش بیێ ڕۆحم-ڕۆحی سای سالێقەم- بەردێش ڕاوە... گاهەس کریێ جیاو وشکی ئۆکسیژنی وەرواوەو گەناوێم قوورت دەیوە یا جیاو ئانەی تاوو ئێشێوەنە پێچیەو چەنی بزه نەچیراو کۆساڵانی کێڵێم کەردٚێنێ یا کریێ جیاو ئانەی پەنا باروو بە جەرگبڕتەرین کەلیما چێروو سەیەو گوڵەچنووروو ژاڵاینە پیشێوە دەو... گاهەس کریێ مێڵێو سیاوی ئەشقیم کێشتێ چەمە کاڵەکام و هەنگامێم سەرمەس جە جوانی چێروو نێگایاو شوانەینە لوەینێوە گەلە ئاننە سادٚە و ئاننە بێ داڵغە، گاهەس کریێ ترەکەو سینەیم جیا هارەقوو یاوی چۆرەو دەبە ئاوەو هەواری لوەی ملشرە یا جیاو ئانەی چێروو ئی لامپە مەهتابیانە زەردٚە بوو کریێ کزەو سەرسبحوو پێڕۆسەمی گۆنام ترەکنەیشەو. کریێ تۆشوو خەمی ئامەینێ ساڵەنە چن جارێ و ئێننە ڕەوتوو ڕاینە کە ڕواڵەتی بۆریش سپاروو یادٚی، کریێ گرەوەینێ بەڵام قوورتم نەدٚەیوە، کریێ باریم قورس بیێ بەڵام مازیم نەمەڕیێ... کریێ هەر شاعێرە بیێنێ بەڵام شاعێرەو کەلیمە دەماخەکا، کریێ وەختێو ئاشقانەم نویستەی دەسم پەی ئەزموونی کێشتەی نەک خیاڵی، یا کریێ شێعرەم وەیوەو ڕواریا بیەی کناچێ لادەگاو ژیواری نەک کناچڵێوە کزۆڵێ و ماتەمپۆشە... بەڵام نەکریا و بێ کڵووزیایوە کەسی نەپەرسانێ پەی بەڵام نەکریا و چارەنویس چەنیم بابەکوشیش بی... #ژوانە/وەهاروو ۲۷۲٦ بیمارەسانوو فەجری، مەریوان @hawramyanah

شێعرەو پارادۆکسی (موتەناقزنما) ژیان و ژیواو ئارۆی بە نامێ خودٚای بێ خودٚای بێ‌تامی شیرین شلۆغی بێ‌دەنگ نەرمە دڵ دڵ سەنگ وەشحاڵی دڵتەنگ شیرین زوان تاڵ، دەنگ ناسازی وەش تووڕە ڕووی وەش ڕوو بێ فەڕی مەهوەش لاڵ گوفتار زوان بینای ڕەوشەندڵ نەفامی ئەدیب بێ‌عەقڵی عاقڵ چەرمەی سەوزەڕەنگ قژ کاڵی سیاو مانگەی تاریکە ڕەشی وەرەتاو سنەوبەر باڵای شۆڕەبی ئەندٚام دۆسی دوشمەن فام حەراڵی حەرام دڵ نەرمی دڵ ڕەق زوان قورس دەم لەق قسەزانی وڕ دانایی ئەحمەق لەنجەڕەوتی لار وەش پۆشی بێ فەڕ کۆتا باڵای بەرز وشکە سەوڵی تەڕ جافی هەورامی هەواری گەرمیان کەلام تێژی سەنگ زوان نەرم و نیان شارنشینی دێی تازەی کۆنەساڵ پەنجەی گەوهەرسەنج بە چنگاڵی داڵ وەش پۆشی ونتاڵ بەرگی باڵاپۆش ئارامی مەتین نائەمنی چەمۆش هەواڵ نەپەرسەو پەرسا هەواڵی شێتی ژیر عەقڵ و هۆ پەڕی خاڵی دەس، دەس و دڵواز خەسیسی حەسوودٚ زیننەی مەردٚەڕەنگ مەعدوومی مەوجوودٚ کارداری بێکار شپرزی زەریف شێویای دەقێق شافعی حەنیف ئوممی باسوادٚ کافری مۆمن مەلائکونناس بەشەری ئەجێن مەعبوودٚی عابێدٚ پادٚشای گەدٚا ڕەوای ناڕەوا دەنگی بێ سەدٚا کڵاش پۆشی خاس پاپەتی پاڵا درێژی باریک ئەی کۆتاباڵا تن ڕەوتی ئارام تەمەڵی زیرەک نەزانی فرەزان خاڵداری بێ لەک سالمی ناوەش وەرماڵۆس بێدٚار ڕوودٚاری کەمڕوو دڵسۆزی بێعار وەش مەشرەبی بەدٚ ئەر هۆ گێلی ژیر ژەنەو پیایی هۆ جوانی پیر بایەقوش بوڵبوڵ کاوەتر قاڵاو ڕەنگینی بێ ڕەنگ هۆ چەرمەی سیاو گۆشەگیروو لێ تێکەڵاو قاڵی قاڵوو سکووتی ناحاڵی حاڵی یه‌واشی سەریع کەوتەی بەرزەپا ئەسیری ئازادٚ گەدٚای پادٚشا دەوڵەمەن گەدٚا گەدٚای دەوڵەمەن نیمەمەنی مەن مەنی نیمەمەن نەدٚاری دارا فەقیری غەنی لاغری خپل وەش بۆو بۆگەنی یەکڕەنگی دوو ڕوو مەککاری سادٚق تەبیبی ناوەش نەزانی حازق نادرووسی ڕاس ئەی سالمی لار دمارەکۆڵی عال ئەی ئەفعی بێ ژار سۆڵی خامی خام تورشی شیرین فام سامناکی بێ سام تامدٚاری بێ تام ئەلخەنناسی خاس ئاشنای نەشناس مامەڵە لار ڕاس ڕیلەکسی وەسواس لاڵی سوخەنوەر ئەی شنەوای کەڕ سادٚقی کەززاب مەساڵحولشەڕ ئاوی خاک سێفەت ئایری وافام شێتی ژیر و شێخ جوولەکەی ئێسلام ئایروو ئاوێ خاکوو وا گێجەی گوڵەڕنەی بارێک قایمی نەیجەی تێری ئاورا لەم ناقوڵای وردٚی تەنیای تێکەڵوو جامێعەو گردٚی ڕۆشن ویری کۆن کۆنە فێکرە فام مەسی بێ حاڵ و ناکامی باکام شۆخی دژمان دەر درۆزنی ڕاس چەورزوانی وشک قاڵ کەری بێ باس ئارامی دەنگ زل قێڕە کەری نەرم ساکنی ڕەوان بێدٚاری وەش وەرم دڵ گەرمی مەئیووس ناوەشوو وەشی سارا و دیمەنوو کوێسان و کەشی ڕام بیەی وەحشی و شاخ درێژی کۆڵ ڕەقۆڵی شل و توەنی نەرم و نۆڵ بەگزادٚەی بۆرە پیای ژەنانە زەمینی ساکت وەفای زەمانە مەککاری سادٚە سفڵەی با وەفا مەزڵوومی زاڵم وەفای با جەفا ڕیش چەرمەی جوان زارۆڵەو پیری ڕۆشنی تاریک ڕەشی لێ نووری شاخسی بەدٚنام سووکەسەر ماقووڵ خەواسی عەوام بێکاری مەشغووڵ ژیانوو مەرگی ڕەحمەتوو وەرگی کاوڕی کەمتار خوەو توەرگی سەیێدٚ ی ئوممی شاعری نووسەر کۆرتە ڕاواری شێعرە بێ سەمەر با وەس بۆ فرەو درێژوو کوڵی با بەیۆ بوەو دڕەیێو گوڵی تا نەوۆ ئازادٚ فێکر و مەراممان حەرام حەڵاڵ و حەڵاڵ حەراممان سەیێد_ڕەحمان_مەحموودی @hawramyanah