بەرهەمه شێعرییەکانی خاتوو کەژاڵ شێرزاد

شێعر:کەژاڵ شێرزاد ئاماده کردنی گۆرانی مامۆستا عومەر خاکی

«پەشیمانم » لە دەستی خۆم و مەیلی دڵ، خەریکی جەنگ و گریانم بە ڕێگەی عیشقی تۆدا چووم و ئێستا زۆر پەشیمانم چیم چاند و چیم دروویەوە لەم دەشتە بێبەریەدا؟ جەوانیم دا بە با و ئێستا خەریکی کۆچی زستانم نە تۆ بووی بەو کەسەی جارێ بزانی حاڵی شێواوم نە من بووم بەو کەسەی بگریم بە دەم ئازاری ویژدانم وەکوو مۆمێ دەسوتام و شەوانم ڕوون دەکردەوە نەزانی بووم کە دەمبینی، بە فیڕۆ عومری تالانم! بە هەورم وت کە ببارێ بە سەر ئەم سینە پڕ ئاگرە کەچی ئەویش بە جێی هێشتم،  لەگەڵ تەنهایی میوانم #کەژاڵ_شێرزاد 04/04/1405 http://t.me/kezhalsherzad

دواندنی باران ​هاتیەوە، ئەی دڵۆپە زێڕینەکەی ئاسمانی دوور؟ بۆچی وا پەلەتە؟ دەتەوێ بەم شەوە زەنگاڵییە، کام برینی کۆنی زەوی ساڕێژ بکەی؟ ​تۆ کە دێی، بۆنی خاک و مێخەک و بارووت تێکەڵ دەبن، بەڵام تۆ هەر دێیت و دەشۆیتەوە، تۆزی سەر گەڵای دارەکان، پەڵەی سەر جلی مێژوو، و خەمەکانی ناو دڵی من... ​هێواش ببارە، باران گیان! لێرە کەژاڵ چاوەڕوانی گەڕانەوەی کۆچەرێکە، لێرە دایکێک، سۆبەی ماڵەکەی بێ نەوتە و منداڵەکەی لەبەر لێزمە دەلەرزێت. هێواش ببارە... بەڵام مەبڕەوە ​تۆ زمانی هاوبەشی هەموو دڵخوازی دونیای کاتێک لە پەنجەرەی تەڕی ژوورەکەم دەدەیت، دەزانم چیت پێیە: نامەیەکی تەڕ، لە لایەن خوداوە بۆ دڵە پڕهەستەکەم ​ببارە باران... ببارە، با منیش لەگەڵ تۆدا بگریم کەس نەڵێ ئەوە فرمێسکی کێیە؟ کەژاڵ_شێرزاد 21/03/1405 http://t.me/kezhalsherzad

تەمەن و تیشک ​له‌ نێوان دوێنێ و سبەیدا من ڕێبوارێکی ماندووم، جانتاکەم پڕە لە سێبەری بێدەنگی و دڵم... ​تۆ دێیت و بە بزەیەک، تەمی سەر پەنجەرەی دڵم دەشۆیتەوە. ئەی ئەو کەسەی لەو سەری تاریکییەوە پێناسەی ڕووناکیم بۆ دەهێنیتەوە! ​ژیان، گرەوێکی سەخت بوو، بەڵام هیوا... هەموو یاساکانی دەگۆڕێت #کەژاڵ_شێرزاد http://t.me/kezhalsherzad

ئاوێنەی خەیاڵ هۆنراوەی:کەژاڵ شێرزاد ئامادە کردن :مامۆستا عومەر خاکی جێی ئاماژەیە ئەو گۆرانییە بە ژیری دەستکرد و بە هیممەتی مامۆستا عومەری خاکی ئامادە کراوە

کاتێک کە ڕۆییشتی گیرۆدەی قەڵەم بووم، لە ناو کۆلکە زێڕینەی وشەکان دا، هەر کاتێک قەڵەمم لە تاسەی دووریت دەهاتە گەڕ، من وەک نێچیرێکی ئازاد لە ناو شاخ و داخەکانی خەیاڵت دا دەسووڕامەوە #کەژاڵ_شێرزاد 13/3/1405 http://t.me/kezhalsherzad

هاواری بەرد و کڕنۆشی هەور ​لەوێ، کە چیا دەبێتە زمانێکی بێ‌دەنگ، دەنگێک دێ... نەک لە گەرووی مرۆڤ، نەک لە نەی، بەڵکوو لە سنگ دڕینی تاشەبەردەکان! ئەوە دەنگی کێوە... کە هەزاران ساڵە قورسیی زەوی هەڵگرتووە و ئێستا دەیەوێت بەسەر بێدەنگیدا بتەقێتەوە #کەژاڵ_شێرزاد 07/12/1404 http://t.me/kezhalsherzad

«قیژەی ئاسمان» ​ئاسمان تەنیا شینایی نییە، هەندێک جار دەبێتە برینێکی کراوە. کاتێک هەورەکان وەک کێڵگەیەک دەسووتێن، ئەوەی دەیبیستی هەورەتریشقە نییە؛ ئەوە قیژەی ئاسمانە! کە لەبەر ئازاری تەنیایی خۆی، سینەی شەو دەدڕێ و بە هەورەبانە و برووسکە، ناوی ئازادی دەنووسێتەوە. #کەژاڵ_شێرزاد 5/12/1404 http://t.me/kezhalsherzad

تەم و مژی دوێنێ لە کوێی؟ ئەی ئەو دەنگەی ئێستا تەنیا لە خەودا دەبیسترێ ئەی ئەو دڵەی کە بێ‌خەم بوو، ئێستا بۆچی وا دەلەرزێ؟ ڕابردوو وەک ماڵێکی کۆن، پەنجەرەی ڕوو لە باخێک بوو کەچی ئێستا دەرگاکانی، بە کلیلێکی ژەنگاوی بەستراوە. یادگارییەکان   هەموو ڕۆژێ پۆلێ خەیاڵ، دەچنەوە ناو ئەو کۆڵانە   دەگەڕێن بۆ ئەو سێبەرەی، کە ئێستا بۆتە چیرۆکی خەیاڵی   ژانێک هەیە لە ناو دڵدا، ناوی خۆزگەی بەخۆڕاییە تەمەن ڕۆیشت و نەیگێڕایەوە، تەنیا یەک دەقیقە لەو ژیانە. دەمەوێ بگەڕێمەوە، بۆ ئەو شوێنەی منی تێدا بوو بۆ ئەو ساتەی کە پێکەنین، تەنیا مەبەستی دونیا بوو بەڵام بەداخەوە ڕێگای گەڕانەوە وەک خەونێکی دوورە ڕابردوو تەنیا برینێکە، کە ساڕێژبوونی بێ سنوورە. 01/12/1404 #کەژاڵ_شێرزاد http://t.me/kezhalsherzad

لووتکەی ئەوین دوو ڕووگەم هەن لە ژیاندا، بۆیان دەبم به قوربانی خاکی پاکی کوردستان و تۆ و چاوی پڕ لە گریانی نیشتمانم کێو و بەردە، تۆش وەک هەناسە و وەک گیانی هەردووکتان لای من هەر یەکن، لە شکۆ و لە بێ پایانی ئەگەر خاک بێ و عەشق بمێنێ، وەک زستانێکی پڕ تەمە تۆش بێ خاکی ، وەک پەپوولە ، بێ گوڵزاری نیشتمانی هەتا چاوم بڕ بکات و هەتا گیانم تێدا بمێنێت هەم بۆ تۆ و هەم بۆ خاکەکەم، دەچڕم من هەزار گۆرانی. 29/11/1404 #کەژاڵ_شێرزاد http://t.me/kezhalsherzad

سوێند بە خاکی نیشتمان بەو خاکە سوێند، کە جێگەی سەری باپیر و باوانە بەو بەردە سوێند، کە قەڵایە بۆ ئەم کوردە وەک گیانە بەو لووتکە بەرزانەی، کە سەر ناکەنەوە بۆ هیچ کەس بەو دەشت و دەرە، کە بۆ ژینم هەوێنە بۆو جەستە و گیانە سوێندم بەو ئەشکەوتانە کە جێی شێرانی مەیدان بوون بەو دار و بەردانە، کە سێبەرن بۆ خەڵکی ئەم کوردستانە ئەگەرچی تەم و مژ بڕژێ و زریان بێتە سەر ڕێگەم لە عەشق و خزمەتی خاکم، مەحاڵە بێمە سەر لەرزانە نەیشتمانم! تۆ نەک هەر خاک، تۆ ئیمان و هەناسەمی بەو پیرۆزییەت سوێند دەخۆم، کە ڕووگەی گشت کوردانە #کەژاڵ_شێرزاد 24/11/1404 http://t.me/kezhalsherzad

من دێمەوە... وەک چۆن باران بۆ لای تینوویەتی خاک دێتەوە، وەک چۆن تریفە بۆ باوەشی شەوی ڕووت دێتەوە، بۆ گشت ئەو شوێنانەی جێم هێشتوون دێمەوە، نەک هەر بە جەستە، بەڵکوو بە هەناسەش دێمەوە، بۆ سڕینەوەی فرمێسکی ئەو چاوە ماتانەی کە لە پەنجەرەی چاوەڕوانیدا مۆم بوون، من دێمەوە تا پێی بڵێم: دڵتەنگی کۆتایی هات، ئەو باڵندەیەی فڕیبوو، گەڕایەوە بۆ هێلانە. #کەژاڵ_شێرزاد 15/11/1404 http://t.me/kezhalsherzad

گەشتێک بە ناو تەمەندا ،لە پشت مێزی خەیاڵم، کزەی یادی تۆ هاتوو برژاندی حاڵ و ماڵم، وەک خاتوونێکی دڵ پڕ، کە دەڕوانێتە ئاوێنە دەبینم ڕەنگی زەردم ، خەمی دووریت بە وێنە دەنووسم: بۆو ساتانەی، کەنارم دەستت گرتووم ئەوێ ڕۆژێ کە هاتی، لە عەشقی تۆدا ون بووم "یادی بەخێر" ئەو تەمەنەی، بە پێکەنینت ڕازاوە ئێستا لە ناو لاپەڕەی دڵ، تەنیا ناوێک جێماوە خۆزگە دەبووم بە پەپوولە و، دەفڕیمەوە بۆ لانە بۆ ئەو شەوانەی پڕ بوون لە، زەردەخەنە و بەهانە #کەژاڵ_شێرزاد 15/10/1404 http://t.me/kezhalsherzad

هەناسەیێکی سارد لەو ماڵە چۆڵەدا، بوونەتە هۆی ئەوەی تاڵ تاڵی خەیاڵەکانم بهۆنمەوە ، تاکوو ببنە پردێک و بگەنە دەستت، نازانی چەندە سەختە غوربەت، کاتێک دڵت لە شوێنێک بێت و خۆت لە شوێنێکی تر! هەر دەم لە ناو قوڵایی بیر کردنت ، دەگەڕێم بۆ دڵۆپێک ئارامی ، تۆ بەشێکی لە هەناسەی بە جێماوم... http://t.me/kezhalsherzad

لە دڵی شەودا گڕکانی داهاتوویێکی  ڕوون دادەگیرسێنم بۆ ڕۆژانی نوێ ، چاوەڕوانی تیشکی بەختەوەری دەکەم ، پر بە دڵ بانگی خۆشەویستی دەکەم تا تۆزی خەمی پێ بسڕمەوە و ئاوازی پێکەنینی پێ بژێنم، ژیان ئاوازی بەهارە و هەورە بروسکەکانی هەوێنی بەڵێنێکی نوێیە ، هەر بۆیە ، باوەڕ بە بەیانی بکە و خۆت بە تیشکی پڕشەنگداری ئەوین بسپێرە 27/09/1404 http://t.me/kezhalsherzad

. دایک ، کێوی بێ چەمانەوە ​ئەی دایک، کاتێک شتەکان تەواو دەبێت، کە دارەکان لەناو ڕەشەبا دەشکێن، کە قاچەکان ماندوو دەبن و بڕیارەکان دەمرن، تۆ بە تەنها وەک کێوێکی بەرز دەوەستی. ​تۆ ئەو دیوارە بەردینەی کە لافاوەکان ناتوانن بیڕوخێنن. ​ئەو برینانەی لەسەر جەستەی تۆن، نەبوونەتە هۆی کەوتن، بەڵکو بوونەتە نەخشەی ڕێگە بۆ ئەوەی ئێمە ون نەبین. ​تۆ فێرت کردووین، گریان تەنها حەسانەوەیە، نەک کۆتایی ڕێگا. لەناو دەستە ماندووەکانت، هەزاران ئومێدی نوێ جێی خۆش کردووە تۆ ئەو ڕووبارەی کە هەرگیز ئاوەکەی ناگەڕێتەوە، بەڵام بەردەوام دەڕوات و وشکی ناکات. ​ئەی بەردی بناغەی ژیان، تا تۆ دەوەستی، ئێمە هەرگیز ناڕوخێین. تۆ پەیماننامەی ئازادی لەناو قەفەزدا، و ڕووناکی بێ کۆتایی لەناو تاریکیدا... 19/09/1404 http://t.me/kezhalsherzad                  #کەژاڵ_شێرزاد .

بۆ تۆ کە لێرە نی هۆنراوەی خاتوو کەژاڵ شێرزاد دیکلەمە :مامۆستا ئومید لاڵ http://t.me/kezhalsherzad

خۆشەویست و نیشتمانم لێرە لەم خاکە پیرۆزە، دڵ پڕ لە ژان و خۆشییە، بۆنی گوڵی باغی وەتەن، لەگەڵ هەناسەم تێکەڵە نیشتمانم، ئەی گیانی گیان، قوربانتبم بە ماڵ و حاڵ، خۆشەویستی تۆ لە دڵما، نە دەمرێ نە دەبێ بە تاڵ. چاوی بەهاری کوردستان، پڕە لە ئاو و ڕووناکی هەموو ڕۆژێ، هەموو ساتێ، هیوام بۆتە سەربەستی * مێژووی تۆمان شانازییە، پڕە لە داستان و قوربانی، * تۆ قەڵای بەرخودانی و، لە هەموو ناخەکاندا ماوی. لە هەر کوێ بم، لە هەر جێ بم،  تۆم هەرگیز لەیاد ناچێ، ئەم دڵە بە عەشقی پاکی تۆ، هەمیشە دەژی و ناڕزێ. ئەو خۆشەویستی لەم خاکە جوانە، ڕازاوەیە و پێکەنینە، نیگای ئەو، بۆ من چرایە و هیوای ژیان و ژینە.   تۆ جوانی، تۆ جوانی، ئەی دایکی شیرینم،   تۆ هێزی، تۆ هێزی، ئەی خۆشەویستی ژینم. با گوڵ بگرێ خۆشەویستی، لەسەر خاکی تۆ، ئەی وڵات، با ئاشتی بێتە ناو ماڵ و، نەما بێترس و نەفرەت. ئەوینی تۆ و ئەوینداری، لە یەک دەچن، دوو ڕووی یەکن، چونکە ئازادی نیشتمان، هەردەم بۆ ئێمە قەدرە و لایەکن. ئەوینی خاکم بە دڵە و، خۆشەویستی دڵدارمە، هەردووکیشیان بۆ من مانا و، چرای ڕێگای ژیانمە.               #کەژاڵ_شێرزاد http://t.me/kezhalsherzad 03/09/1404 .

. دەنگی تۆ لە قووڵایی بێدەنگی شەودا مایەوە برینێک بەر دڵم کەوت و لە پێت دەنگی دایەوە ژیانی ئازیزت لە من وەرگرت لە جێی دڵتەنگی هات و هەرگیز لێم نەکشایەوە   ‌          #کەژاڵ_شێرزاد . 1404/09/01 http://t.me/kezhalsherzad