لهفّه

‏عن حديث العيون ولذة التلميح ‏يستدل العمر مجراه .. وشروقه ‏لفحة ٍمن نسيم الفجر والتسبيح ‏وراحة ٍمن هجوع الناس مسروقه

‏لله در الكتابة و الكلام الثقيل ‏و النفس من صدها لـ اغلا مداهيلها ‏ليت التوجاد ماهو لـ ام رمشٍ ظليل ‏ماكان شيّب وعدها و انطوى حيلها ‏كان الطريق الشعور وخطوة الالف ميل ‏قصيدةٍ شفت نفسي في دجى ليلها ‏وين انت ياللي بـ قربك و بـ غيابك نبيل ‏عسى الليالي ما حطت لك محابيلها ‏تزعل وترضى لكن تبقى الحصان الاصيل ‏اللي يصون المشاعر و يعدل ميلها ‏يحزني اقول من بعد الغياب الطويل ‏مافيه ذكرى قدرت انسى تفاصيلها ‏عيني دخيلة عيونك ، يامنجي الدخيل ‏وَالله ، ما تستاهل الدمعة مظاليلها ‏اترك احبك و عطني قبل احبك دليل ‏يكسب رضى نفسي اللي طافحٍ كيلها ‏ان قلت ماني بثينه ليه اشوفك جميل ؟ ‏يا فارس احلامي اللي ضاع تَأويلها ‏اشتقت لك و اللقا معقود بـ المستحيل ‏و الروح تطفي من الوحشة قناديلها ‏يسألني الليل لا مال بـ هواه الجديل ‏وشلون يقدر يبكّي نافلة جيلها ؟ ‏ارسل سلامك ليا هب النسيم العليل ‏النود ماهيب تبطي في مراسيلها ‏وعذّبني فـ كل شي ، الا عذاب الرحيل ‏عيني ماهي من مزن يوم انك تخيلها

‏على الهون يا سود الليالي تراني ماش ‏ونفسي من ظروف الزمن باح خافيها ‏ عيوني على حظي وحظي طريح فراش ‏والآمال والله مادري ويش تاليها

‏علّم طيوفك لا تجيني فالصلاة ‏يا كم سجدنا من سبايبكم سَهو

‏منزلك فوق الثريا و العرب من دونك ‏لي معك قصه قصيره باختصر تاليها ‏ أنت ، قلبي لك لحالك و العيون عيونك ‏كيف تصفالي حياتي وأنت منتب فيها ؟

‏انا لك أصدق من الضحكة على وجهك ‏و أحنّ من خاطرك و أقرب من ظلالك !

‏( اللي يبغيك بياتيك لو على جمرك وطى , الأعذار و الظروف اللي مالها سنع لا تصدقونها أبد )

‏علمني إنّي بـ صدرك رغم كل الزحام ‏وحدي تسيّدت في قلبك وقلبك معي !

‏اخذ كل اللي تبيه وخلني في حالي ‏وانسني .. ولك الشكر ولك الفضل والمنه ‏والله اني تاركك لله .. وانك غالي ‏وانت والله ما يعوض فيك غير الجنه

‏شاحبه ماكنّك أجمل بنت في شبه الجزيرة ‏وانتي اللي في كنفها لذة - العمر القصيّر

‏لو تقول انتهينا وش بنبقى عشانه ؟ ‏تدري اني عنيده و ادري انك عنيد ‏المشارية حِده ، و المحبة ميانه ‏و الميانه تقرّب كل شيٍ بعيد ‏انت تقدر ترجّع كل شي لـ مكانه ‏لا وصلنا النهاية ، حبني من جديد

‏رف بحالي واحترم حزني وصبر سنيني ‏واعتبرني كل ماطال المدى ممنونك ‏ ودي اقسم ضحكتي من بينك ومن بيني ‏مثل ماودي بجيّانك مع اللي يجونك :)

‏أنا كني اللي في رجا واحد ً يدعيه ‏يـرويه روحـه ويتلاهوا عـلى شانه ‏يقفي كذا توه وهـو عاد عـينه فيه ‏وما قال من كـلمه ما تخطي من اذانه ‏لون ما هو بـراجيه و يوده و يـغليه ‏جزع جزعة اللي تشلعه روس جنحانه

‏تقوّي ترى الخاطر لـ هالحين باقي فيه ‏تعابير وجهك " قاطعتني " و أنا توّي ‏تزبر ( دموعك ) في محاجر عيونك ليه ‏أوآسيك ؟ والا أجرحك ؟ والا وش أسوي

‏خلوه يقراني ، و يقرا علي السلام ‏انا لي شهور و انا اشعر بقرب الآجل ‏أحب و الحزن فـ عيوني يحب الظلام ‏حتى الحزن ما يحب الا العيون النجل ؟ ‏في قلبي من الليال المضمحله كلام ‏لا صدق ماهو كلام ، اللي في قلبي رجُل ‏كريم و يمر من جنبي مرور الكرام ‏ما كنه اعز من سواه عزا و جّل ‏لو ألتفت فيه ماهو عيب ولا حرام ‏لكن وقف بيني و بينه شعور الخجل

‏انا مامحيتك من خيالي وكيف امحاك ‏ولك صورةٍ في متحف القلب موجوده ‏ㅤ ‏نساني تبسّام الفرح ، لو بغيت انساك ‏تدور الليالي ما أَخلف العاشق عهوده :)

‏يا طراة الحب يا نفحة هوا الوسم و براده ‏اعتقيني من غرامٍ لاعبٍ في جد جدي ‏والله اني شايفٍ حبش مثل فرض العباده ‏واني اللي حاسبٍ خصمش خصيمٍ لي وندي ‏لا يلحقش في الهوى شك تكفيش الشهاده ‏شاهدٍ لش رق قلب وطرف عين وقرب سدي

‏حبيبي ، وش مصير الشعر لولا طلَّة محيَّاك ؟ ‏دخيل الله لا تقتل هواي ، وتجرَح مزوحي ! ‏تخيّرتك وأنا ماني بـ جاهل وجهك ، ومبداك ‏أشوفك ديرةٍ ضمَّت مداي ، ونصف من روحي

‏سكون الليل مفتاح الطواري سبة المشوار ‏على دربٍ تمره وجهتي و الناس ما صلّت ‏صديق الأُنس ، صندوق الامانه حافظ الاسرار ‏مقادير الزمن وش كثر تاخذ .. وش كثر خلّت ؟ ‏كثر ما تاهت احلام السنين فـ وقتي الدوار ‏كثر ما يسكن احساسي قصيد ، النفس ما كلّت ‏انا ما همّني كثر الكلام .. و شرهة العذّار ‏ما دام ان السحابه في عيوني ما بعد هلّت ‏اصد من الوجيه وتستحي نفسي وانا محتار ‏ما ودي يشعرون بـ ضيقةٍ في خاطري حلّت ‏طرقت الانعزال ، و رد عقلي خير ما تختار ‏لو تزل الطريق عيونك ، الاقدام ما زلّت ‏لابد تعيد ترتيب الحياة بـ منطق وبـ إصرار ‏لعلك تهتدي وتبرّق فـ نفسك بعد ولّت ‏اخذ فتره عن الناس وعن الشعر وعن الشعّار ‏ترا لاجيت ولاّ غبت لا زادت .. ولا قلّت ‏« لاتحرص دايم لـ كثر الظهور وكثرة التكرار ‏متى ماتشبع عيون البشر من شوفتك ملّت »

‏عندي لطول انتظارك كموم ودمع عين ‏اللي من اول لـ عيني ماهي بـ قريّبه ‏أحتريك بكل ميعاد وأنتي ما تجين ‏وافقدك فقدي لـ الاموات وأنتي طيبه :(