រដ្ឋបាលខេត្តមណ្ឌលគិរី

នារសៀលថ្ងៃទី១៤ ខែសីហា ឆ្នាំ២០២៦ ក្រោយទទួលព័ត៌មានអំពីក្រុមគ្រួសារសាច់ញាតិកងទ័ព ដែលជាត្រូវម្តាយកំពុងមានជំងឺ លោក ចាន់ រតនា អភិបាលរង នៃគណៈអភិបាលខេត្ត រួមមានអាជ្ញាធរស្រុកពេជ្រាដា និងក្រុមការងារយុវជនគណបក្សប្រជាជនកម្ពុជាស្រុកពេជ្រាដា បានអញ្ជើញចុះសាកសួរសុខទុក្ខ និងនាំយកថវិការបស់ឯកឧត្តម គង់ គឹមនី អភិបាល នៃគណៈអភិបាលខេត្ត រួមទាំងថវិកាសប្បុរសជន និងអាជ្ញាធរភូមិ ឃុំ ចូលរួមឧបត្ថម្ភជាថវិកាមួយចំនួន ព្រមទាំងសម្ភារៈ គ្រឿងឧបភោគ និងបរិភោគ រួមមាន អង្ករ ត្រីខកំប៉ុង ទឹកស៊ីអ៊ីវ អំបិល ប្រេងឆា និងទឹកសុទ្ធ សរុបជាថវិកាជាង ១លានរៀល។ អំណោយទាំងនេះត្រូវបាននាំយកជូនដល់បងស្រីដែលកំពុងមានជំងឺ ជាស្ត្រីមេម៉ាយ មានកូនចំនួន ១២នាក់ ស្រី ០៣នាក់ ក្នុងនោះមានកូនប្រុសចំនួន ០២រូប កំពុងបម្រើកងទ័ព និងរស់នៅក្នុងឃុំពូជ្រៃ ស្រុកពេជ្រាដា ខេត្តមណ្ឌលគិរី។

ពិធីយុទ្ធនាការដាក់អាប៊ែតជុំទី២ តាមខ្នងផ្ទះប្រជាពលរដ្ឋ ដើម្បីការពារជំងឺគ្រុនឈាមក្នុងក្រុងសែនមនោរម្យ នារសៀលថ្ងៃសុក្រ ១កើត ខែស្រាពណ៍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១៤ ខែសីហា ឆ្នាំ២០២៦ ឯកឧត្តម គង់ គឹមនី អភិបាល នៃគណៈអភិបាលខេត្ត បានអញ្ជើញជាអធិបតីដឹកនាំពិធីយុទ្ធនាការដាក់អាប៊ែតជុំទី២ តាមខ្នងផ្ទះប្រជាពលរដ្ឋ ដើម្បីការពារជំងឺគ្រុនឈាមក្នុងក្រុងសែនមនោរម្យ។ ពិធីនេះមានការអញ្ជើញចូលរួមពីសំណាក់ លោកស្រីអភិបាលរងខេត្ត លោកនាយករដ្ឋបាលសាលាខេត្ត លោក លោកស្រីប្រធាន-អនុប្រធានមន្ទីរ អង្គភាពពាក់ព័ន្ធ លោកស្រីអភិបាលរងក្រុង ចៅសង្កាត់ លោកគ្រូ-អ្នកគ្រូ សិស្សានុសិស្ស យុវជនកាកបាទក្រហម យុវជនកាយរឹទ្ធិ មន្ត្រីជំនាញពាក់ព័ន្ធ និងប្រជាពលរដ្ឋជាច្រើនរូប។ ពិធីនេះប្រព្រឹត្តទៅនៅសាលប្រជុំសាលាសង្កាត់ស្ពានមានជ័យ ក្រុងសែនមនោរម្យ ខេត្តមណ្ឌលគិរី។

ប្រជាកសិករចំនួន ១០០គ្រួសារ នៅស្រុកកោះញែក ទទួលបានកូនឈើហូបផ្លែ ដើម្បីលើកកម្ពស់ជីវភាព និងគម្របបៃតង នាព្រឹកថ្ងៃសុក្រ ១កើត ខែស្រាពណ៍ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី១៤ ខែសីហា ឆ្នាំ២០២៦ ដើម្បីចូលរួមចំណែកក្នុងការលើកកម្ពស់កម្រិតជីវភាពរស់នៅរបស់ប្រជាពលរដ្ឋ និងបង្កើនគម្របបៃតងនៅក្នុងមូលដ្ឋាន អាជ្ញាធរខេត្តមណ្ឌលគិរី សហការជាមួយមន្ទីរកសិកម្ម រុក្ខាប្រមាញ់ និងនេសាទខេត្ត បានរៀបចំពិធីប្រគល់ និងចែកជូនកូនឈើហូបផ្លែ ជូនដល់ប្រជាកសិករ នៅស្រុកកោះញែក។ ពិធីនេះបានប្រព្រឹត្តទៅក្រោមអធិបតីភាពឯកឧត្តម អ៊ួង កុសល រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកកោះញែក លោក ជាក់ ម៉េងហ៊ាង អភិបាលរង នៃគណៈអភិបាលខេត្ត តំណាងឯកឧត្តម គង់ គឹមនី អភិបាល នៃគណៈអភិបាលខេត្តមណ្ឌលគិរី ព្រមទាំងមានការអញ្ជើញចូលរួមពីសំណាក់ថ្នាក់ដឹកនាំមន្ទីរអង្គភាពពាក់ព័ន្ធ អភិបាលរងស្រុក មន្ត្រីជំនាញកសិកម្ម និងប្រជាកសិករចំនួន ១០០គ្រួសារ ដែលប្រព្រឹត្តទៅនៅសាលាស្រុកកោះញែក។