Masked team

السلام عليكم و رحمة الله تعالى و بركاته جماعة الخير ان شاء الله تكونوا بخير انا زميلتكم في الدفعة حبيت ان شاء الله نديرلكم فيديوات مساعدة تعاونكم للراطراباج خاصة في les modules

🛑 جماعة راطراباج سنة ثالثة هادي طالبة سنة ثالثة طلعت ب 16 الله يبارك حبت تعاونكم فلي موديل تاع راطراباج هادي كتعويض للفيديوهات لي مادرتهمش هايليكم قناتها و موفقين ⬇️🫶🏻

طلبة سنة ثالثة اعذروني ماوفيتش بوعدي فسدلي برطابلي بعد ماقتلكم 💔 ان شاء الله تكونوا خدمتوا فالوحدة الاخيرة

بالتوفيق لصحاب الباك ❤️

🔴 O.S.M.O.S.I.S files : 🌟 هادو ملفات مضغوطة على شكل ZIP files من الأحسن تحميلها على الحاسوب باه تتفتحلكم منظمة ببرنامج ال winrar 🌟 مازال عندي الاجهزة المتبقية + مقاييس كيما immuno , genetique .... وين نلقى انترنت جيد نحطلكم بإذن الله ➡️ Organ systems…

⛔ الدراسة في رمضان ⛔ السلام عليكم ✨ الحمد لله فوتت امتحاني و طلعتو بنقطة مليحة و لقيت روحي كنت منضبطة و لحقت نعاود كلش قبل الامتحان رغم النعاس و رمضان وووو xD ✅ ارواحوا نقولكم كيفاه كان برنامجي و كل واحد يبدل فيه كيما يساعدوا : ● كنت نقرا غالبا قبل الفطور ، نوض بعد 6 سوايع عالاقل نوم باه ماننعسش ⛔ القراية تكون من الاحسن في مكتبة ولا بلاصة معزولة في داركم ، تغلق على روحك نتا و صلاية و كتبك ، و توكل على ربي ، باه مام تنعس ماكاش وين ترقد . راني متأكدة كل بلدية فيها دار شباب و لا ثقافة حوسوا عليها و روحوا اقراو لتم . ⛔ سوشيال ميديا صدقوني ماكانش ليها وقت اصلاااا ، كاين ابليكاسيون your hour تغلق عليك كي تفوت مدة معينة و تتحل غير غدوة ، ندير 10 دقايق في كل بلاتفورم باه ندخل لهدف نهزو و نخرج . الوقت اللي راح يكون عندنا زايد استغلوه فالعبادة احسن . ● شخصيا تركيزي كي نكون صايمة يكون احسن من الفطار ، لدرجة مام بلا رمضان مالفة نصيم ، ننقص عليا لي بوز تاع الماكلة و نتشهى وووو ، عندي قراية صلاة و بس ، و علميا ذلك ناتج على تركيز الدورة الدموية تاعك على باقي الاعضاء من غير الجهاز الهضمي كيما المخ . ● معاونة فالكوزينة نتفاهم مع الدار و المهمة تاعي نديرها ساعة و لا ساعة و نص قبل الفطور ولا قبل مانبدا نقرا كل واحد واش يحب . ● الرقاد ! كان قراف طايح عليا النعاس ، لانو رقاد متقطع مايريحكش بزاف ، ايا عدت بعد التراويح نتسحر و نرقد ، نوض نصلي الفجر نجيب وردي و اذا لقيت روحي مالحقتش 6 - 7 سوايع نكمل نرقد بعد الفجر و نوض نتوكل على ربي قراية حتان موعد الفطور . ● بعد الفطور مانقدرش نقرا مع الاسف غير كي قرب الامتحان و تحتمت  ، نشرب شوية قهوة و نقرا واش كتب ربي و كي ننعس نرقد عادي لانني نكون اكثر فعالية الصباح . ⛔ ماتقعدش وقت طويل تحوس على بروقرام مليح و تجلد في نفسك ، ابدا ، لقيت روحك قاعد اقرا و لو ساعة خير من والو ، انقذ يومك مبعد خمم فاللي بعدو ، عادي تخرج على برنامجك كونوا  مرنين عادي ، هدفك العام انو مايفوتش يوم بلا ماتقرا ، مبعد ابدا عدل و زيد فالسوايع .... الخ ⛔ اشربوا الماء مليح بعد الفطور ، اذا تروحوا للتراويح ادوا قرعة كل ركعتين اشربوا ، وقت الفطور اشربوا ، مخك يحتاج الماء باه يركز ✅ هذا واش عندي نقول نورمالمون ، اذا عندكم تساؤلات اخرى خلوهملي و شاركوها مع اصدقائكم اذا نفعتكم . صحا سحوركم ♡ Reposted from last year

الحمد لله رانا بخير مينداك نسمعوا صوت طائرات حربية و انفجارات بعيدة ربي يديم الأمن و الامان على الأمة الاسلامية و يصرف عنها الشر و أهله و كيدهم 🛑 قولولي نحطلكم برنامج دراسة في رمضان ؟ راكم عارفين تقراو فيه ولا لا ؟

Guess where am I ? 💀

سلام عليكم جماعة احتاج شخص دخل راطراباج فالسنة الثالثة طب تاعو بولاية ورقلة مش شرط هاد العام ااه مثلا يكون درك سنة رابعة بالصح فالثالثة تاعو دخل راطراباج المهم عندو تجربة في راطراباج سنة ثالثة طب بورقلة إن شاء الله فهمتوني 💀 عمبالي راني مختفية عندي ظروف ادعولي تتسهل باه نرجع بحوايج تفيدكم إن شاء الله

✅ محتوى الفيديو : ✅ هاوليكم الرابط https://youtu.be/lF61iIrulSE?si=1nwWlmVxSskJu4Jq

⛔ مادامكم في بداية المشوار الطبي هادي نسخة تاع رؤية الحياة مرة جاية نديرلكم نسخة وش ندمت في تكويني الطبي و الدراسي مثلا ● مافهمتش كيفاه تغلقوا الكومنتس فالفيديو و انا زعفت مالقبت حتى واحد مكومونتي و هي انا ديزاكتيفيتهم بلا مانفيق xD https://youtu.be/lF61iIrulSE?si=1nwWlmVxSskJu4Jq

✅ الحمد لله معظمكم كملتوا العام لي طلع مبروك عليه لي مازالو راطراباج يزير روحو و يطلع بإذن الله يلتحق بزملائه ✅ كي يكمل العام يجوك بزاف اسئلة على العام لي بعدو ، بزاف ماعمبالكمش اني دايرة سلسلة نهدر فيها على كل عام من اعوام الطب بالنظام الجديد، لي موديل ، المعاملات، المصادر ، و مام سبيطارات لي خيرتهم فالعاصمة وش رايي فيهم ✅ كاين سنة 3 ، 4 ،5 ،6 اليكم بلايليست إن شاء الله تنفعكم https://youtube.com/playlist?list=PLBAo2STNuip6du3JMGA8hf8MtnBc1Vf44&si=r_r5zQIheviYm_FS

✅ زوج معايير مهمة جدا في اختيار تيران انتارنا فالعاصمة تمنيت قالوهملي : ● اختاروا تيران مايسحقوش لانتارن ++++ لانتارن فيه يعتبر صح سطاجيار وين يحب يجي يتعلم مرحبا مايحبش ماينضروش ليريزيدون و يبداو يشكيو و يديروا فالمشاكل ، كيفاه تعرف يسحقوك و لا لا : سقسي على مهام الانتارن وش هوما ● اختر القريب ليك ++ تيران سيستام تاوعهم تاع الخدمة متقلبين السرفيس لي يكون خفيف قادر يصرا كاش ظرف يولي مزير و يجيبك كل يوم مالا للقريب ليك > من الخفيف البعيد المتقلب

الحمد لله الاضراب ماكانش في باطل لي كملوا هاد العام روطار مشي في باطل عام لانتارنا تاعكم راح تدوا طوطال 12 مليون قريب 13 في 12 شهر ماراحش تخدموا باطل ♡ ( ليزانتارن تاع هاد العام مازلنا فالشك ياكلولنا 6 اشهر ولا لا xD ) We did a great job راح يشكرونا عليه الاجيال لي جايين

في غزة، تحدث مجاعة حقيقية. يُجَوَّع الناس حتى الموت، يُمنَع عنهم الطعام والدواء والماء، ويُراقَب هذا كله تحت أعين العالم "المتحضر"، الذي يدّعي الإنسانية والعدالة وحقوق الإنسان. كم هذا العالم منافق... كم هو قذر أن ترى من يموت جوعًا ولا تتحرك فيك قطرة رحمة. وكم هو مؤلم أن ترى أمة الإسلام تشهد هذه الجرائم و تشاهد بعجز موت اخوانها نعم، القلب يوجع، والعجز يقتل، والصمت خيانة. لكن أعظم جريمة يمكن أن نرتكبها الآن هي النسيان. أن نعتاد هذه المشاهد، أن نصير بلا شعور، أن نمضي وكأن شيئًا لم يكن. علينا أن نُذكّر أنفسنا وأبناءنا، أن نُعلّمهم ما يحدث في غزة، أن يعرفوا أن في عام 2025 مات أناس من الجوع، لا لأن الطعام لم يكن موجودًا، بل لأن العالم أراد لهم أن يموتوا. غزة ليست مجرد قضية، غزة جرح في ضمير الأمة.

🔴 توضيح اكثر حول سطاج تاع صيف ياك طلية الطب يحبوا يروحوا يديروا سطاج فالصيف باه يتعلموا les soins infermiers : ينحوا الدم ، يضربوا الابرة الخ هادو الحوايج تلقاوهم في اي epsp حدا داركم و لا في ولاياتكم  . 🔴 كاين لي يحب يتعلم الخياطة تاع الجروح و البلاطر و هادو فلي epsp ماتلقاوش بزاف المرضى لي يحتاجوا هاد الشي كي يعودوا شوية مايخلوكمش تطبقوا فال CHU (المستشفى الجامعي ) تاع زميرلي  راني فيه تالمون عدد المرضى بزاف يخلوكم تطبقوا عادي 😂 🔴 المكان مستشفى  سليم زميرلي بالحراش بالعاصمة هاوليكم الموقع : https://maps.app.goo.gl/4DY13PppJYf1KcjK6 🔴 المهتمين نديرلكم قروب نعلمكم فيه النظري باه كي تجوا تطبقوا تحت اشرافي ( انا طبيبة داخلية في مصلحة جراحة العظام منا لسبتمبر ) 🔴 الوقت : اي يوم يساعدكم تجوا فيه انا فالقروب نقوللكم وقتاه لي قارد تاوعي يكونوا وش من تواريخ و لي يساعدوا التاريخ يجي ( عندي قارد كل 6 ايام ) انا راح نحاول نعلمكم عليها قتلكم اذا تحبوا تجوا معايا ، اما ليزانتارن الآخرين مانعرفش اسكو يعلموكم ولا لا 🔴 لي مهتم صح درك يخليلي ميساج تحت هذا

🔴 les externes من اولى للسادسة : دركا بديت سطاج تاع جراحة العظام في مستشفى سليم زميرلي لي جاي جوايه الحراش - العاصمة - و راكم عارفين لتم المرضى بزاف غير لي يتعارك و يطيح ووو و راح نقعد فيه 3 أشهر ، لي يحب يجي يتعلم خياطة ولا بلاطر يقولي نديرلكم قروب و نفورميكم مبعد تجوا عندي تطبقوا For free طبعا مادابيا بنات و رجال ( الرجال باه نخوف بيهم المرضى )