هدب

‏يا مملوح الكلام اللي بصدرك في العيون اقراه ‏اشوف البعد في وجهك خذا رسمه و تلوينه ‏اعرف الساكت اللي نظرة عيونه تقول حكاه ‏يرد لسانه من البوح لكن تفضحه عينه ‏حبيبي دامك معزم على الفرقى فمان الله ‏عسى الله ما يعرّض خطوتك للعرضة الشينه ‏و اذا خوفك على اللي وسط صدري خلني و انساه ‏عليه الله و امانه من عيون الحسْد و يدينه ‏اصون السر يوم يلوذ في وجهي و يشرب ماه ‏عليه اقبض بكفي كني القابض على دينه ‏امان المستريب الداجي اللي غايبة قمراه ‏ولو كانت مصابيح السما في جيدها زينه ‏مغاليق الصدور يحصّل الحاير بها منجاه ‏عليها من ظلام الليل حفظ علوم سارينه ‏هنا سرك فـ بيرٍ ناشفٍ دلوه على مسقاه ‏هذا اول بير لا يمكن يبل كبود راوينه ‏حبيبك لو يموت من الغبن ما يعرفون اقصاه ‏ما تدري قلت له و الا نسى الموضوع من حينه ‏ضميره لو نشد عقله وش اللي فيه قال عفاه ‏لو يمينه تجسس في الحنايا يقطع يمينه ‏كريم يعتق احزان الجميع و تزبن محيّاه ‏شجاعٍ تنتزع روحه و لا يعتق مساجينه ‏يموت السر في سور الضلوع و يندفن وياه ‏ولا يمكن يسولف فيه حتى بينه و بينه