نُقطة.

شگد راح تصادف عرقلات بحياتك؟ وشگد الدّنيا راح تخلّيك باختبارات وظروف بوقت مو مناسب؟ تتعب؟ تضوچ؟ تتأذه؟ توگف؟ ولشوكت؟ اسمح لمشاعرك تعيش تعبها بس بعدين گوم علىٰ حيلك وواجه كلشي تشمره عليك هالدّنيا وناسها. لا توگف عند الّي ما صار والّي اجه خارج توقّعاتك وتگعد تلوم القدر عليه، لأن أني وأنت نعرف إذا شكينا شنو يتغيّر مثلًا؟ خو نگعد ندعي ونقوّي توكّلنا وصبرنا أكثر، حتّىٰ ما تسمح لأفكارك تصدگ إنّها مالها نصيب باللي تريده، وما تسبق الأحداث ولا تخلّي خوفك يسيطر علىٰ أشياء بعدها مجهولة المصير ما تعرف وضعها. وبدل ما تبقي حياتك بصفّ الانتظار واگفة علىٰ باب واحد، جرّب تلتفت حواليك شويّة وراح تشوف گدامك ألف باب وباب كلّ واحد أحلىٰ من غيره. حتّىٰ لو جانت معركة أفكارك چبيرة وصوتها عالي، ابقىٰ حاول تخلّي احتمالات واختيارات متوفرة تغنيك عن الّي راح وما صار. الله يخلّيك لا تخلّي عمرك تاكله الأيّام وأنت واگف علىٰ لحظة وحدة لو تصير لو ما تصير وتخلّيها هيَ الأساس! صدگني حياتك سلسلة من اللحظات كلّ جزء بيها قائم علىٰ لطف ورعاية الله وآلِ محمّد، لا تنسىٰ هالشي وأنت حزين ومحتار وضايع، لا تنسىٰ إنو باب الله وآلِ محمّد علىٰ طول مفتوح إلك وبكلّ وقت وزمان ومكان وحال.

أي يا إنسان شفت؟ شگد ما تحاول تلزم گلبك وتضبط مشاعرك، راح تبقىٰ تتأثر وتفكّر وتحلّل، شفت السكتة شتسوي بيك؟ تخلّيك تبني أفكار تطحن بيك، رغم إنّك محتاج كلمة وحدة تطمنك، وهمَّ مستعزين بيها عليك، وأنت بعدك تحاول تضبط بإعدادات هالگلب ومو راضية تضبط، وتحاول تهدّم جبل هالأفكار لأن هلكت، وبدل ما ينتهي تلگاه يكبر، ما أعرف ... چا شوكت تتعلّم بعد وتحمي روحك؟.

"كَفيلي شوف" أحِسّ هالكلمتين وحدهن قصيدة، يگدرن يقدّمن شعور مُفجِع، ومشهد يمرِّد الگلب مجرّد ما تتخيّله، شمثگلها من كلمات وشگد بيهن وجع! "كَفيلي شوف" ... شلون مصيبة كاملة تنحچي بهالكلمتين؟.

الإنسان مرّات ما يحتاج يضرب لو يتصرّف بفد فعل حتّىٰ يبيّن إنّه مؤذي، مرّات بكلمة ونظرة يگدر يقدّم أذيّة أكثر من الأذيّة الجسديّة، ويترك أثر وندوب أكثر من الأثر الّي تخلّيه الضربة، وحتّىٰ لو الضربة تركت أثر، شگد يستمر ألمها؟ ما يستمر ترا، وحتّىٰ إذا بقىٰ أثر قابل يهيج عليك كلما تذكرت الضربة؟ لا ماكو شي يوصل للأثر الّي ينحفر بالگلب وبالذاكرة، بحيث أقل وأصغر شي يذكّرك بيه وتعيش الألم من جديد، بس وي الوقت ممكن يقل بس ينتهي؟ حسب الشخص وتعامله وي الموقف بوقتها. فَ ديروا بالكم من هالنقطة أذيّة الشخص مو هيّنة عند ربّ العالمين، ومن جانب إذا گدرتوا تعفون وتصفحون عن الّي أذاكم وما عدكم مشكلة بالعفو ولا راح يفرق عدكم، فَ سامحوا واعفو علمودكم أكثر ممّا يكون علمودهم. "إنّ أعفىٰ النّاس من عفىٰ عند قدرته." ـ الإمام الحُسين (عَليهِ السّلام). *المصدر: الدّرّة الباهرة من الأصداف الطّاهرة. "اعفُ عمّن ظَلمك، كما أنّكَ تُحِبُّ أنْ يُعفَىٰ عنكَ، فَاعتبِرْ بِعَفوِ اللهِ عَنْكَ، ألا تَرىٰ أنّ شَمسهُ أشرَقت علىٰ الأبرار والفُجّار وأنّ مَطرهُ ينزِلُ علىٰ الصّالحين والخاطئين." ـ الإمام جَعفر الصّادِق (عَليهِ السّلام). *المصدر: بحار الأنوار.

يمكن بيوم راح توصل مرحلة، تغيب أيّام أو تكون موجود، بس ما تلگه أي رسالة توصلك ينسأل بيها عن حالك، ولا تصادفك أي ''شلونك"، بوقتها لازم تعرف إنّك مو مطالب بأي شي تجاه أي شخص، أنت مطالب تكون خوش إنسان وي نفسك، وإنسان سَوي ومعتدل وي غيرك، وتساعد باللّي تگدر عليه، بس مو مجبور تسوي شي خارج إرادتك، ولا شي أكبر منك علمود ترضي غيرك علىٰ حساب تعب نفسك، لأن غيرك من إجتهم الفرصة ساعدوا نفسهم، وأنت هم ساعد نفسك أوّل حتّىٰ تگدر تساعدهم بعدين.

مرّة بالإنستا صادفني منشور أو ريلز ما أذكر بالضبط، مضمونه إنّك من تريد تتفاهم وي شخص بعد ما تصير بينكم مشكلة أو تريد تعتذر إله، حاول قبلها تعرف شلون هوَ يحب يكون التفاهم وشلون يحب يوصل إله الاعتذار؛ لأن كلّ شخص بينا عنده طريقته بالتفاهم والاعتذار وحتّى العتب. مثلًا من تصير مشكلة ما أحِبّ أنترك وحدي، أريد بوقت المشكلة يصير النقاش ونتفاهم ونوضح رأينا وشنو كلّ واحد بينا فهم من الموقف الصار، ما أحِبّ السكتة أو ينترك الموضوع كم ساعة أو كم يوم وبعدين ينفتح من جديد؛ لأن أحِسّ إذا أنترك الموضوع معناها خاطري هم أنترك وإنّه مو مهم :( أعرف يمكن هالشي مو منطقي بالنسبة للبعض بس هذا الّي أحِسّه. فَ أي ... شنو يضر لو حاولنا نتعامل ويا المقابل بالطريقة الّي يرتاحلها، وبنفس الوقت نوضحله شلون إحنا نرتاح بالتفاهم والاعتذار؟ يمكن بهالطريقة نتفادىٰ طول الزعل وسوء الفهم والأفكار الّي تتكوّن وتكبر وي الوقت.

إذا انطفت لمعة عيونچ تجاه نفسچ بيوم من الأيّام، تذكّري إنو أكو عيون أشخاص يحبّونچ، عيونهم تلمعلچ بدون سبب ولا مناسبة ولا حتّىٰ أي إنجاز، لمجرّد إنّچ أنتِ، لا تشوفين نفسچ بعيون ناس عابرة ما تعرف قيمتچ، ولا تدورين علىٰ لمعة نجمة تعيد نورچ بسما غريبة عنچ، سما أحبابچ موجودة ونجومهم دائمًا تضوي علمودچ، وتذكّرچ بالنور الّي يمكن أنتِ نسيتيه بنفسچ بس همَّ ما نسوه.

ما أخاف ولا أجامل علىٰ حساب عقيدتي والحقّ، عيب بعدنا لحد هاللحظة نسكت، وكأن الرايح شي عابر، عيب نگول ما علينا لأن الرايح مو منا، ولأن القصف بعيد عنا، عيييييب نحچي بالبديهيّات وشلون كرامة وعزّة نفس ابن بلدك الّي وگفلك من الـ ٢٠١٤ هيَ من كرامتك وعزّة نفسك، لشوكت الواحد يگول ما عليه وشعليه وشبيدي؟ حتّىٰ حچاية الحقّ وأنت گاعد وما يمك شي صرت تستثگلها ؟ مو والله عيب.

عيب وزحمة ما تنقهر من تشوف خيرة الزلم تروح من عدنا بسبب حثالة مثل آل سعود، ويگعد كم واحد يخلّيلهم تبريرات وسبب منطقي ومقنع للقصف! مقتنعين؟ ابن بلدك الّي راح ترا!!!!! ولا واحد ولا اثنين الّي راحوا، وأنت تعرف من يروح شهيد معناها خلص أهله راحوا وياه بعد، ما يحتاج أگعد أحچيلك عن الفقد حتّىٰ توعىٰ وتفتهم حجم المصيبة والكارثة الّي تصير، القهر من تروحلنا زلم تسدّ عين الشمس، الّي بسطال واحد من بسطال هالزلم يسوا آل سعود ودول الخليج كلها ... وهواي عليهم هم. الحكومة الّي ما تحفظ دم ولدها هاي حكومة فاشلة وما يُعوّل عليها، والّي تسكت وتسلم سلاحها وما ينسمع صوتها، وتخلّي صوت القصف هوَ بالمنطقة مسموع، هاي حكومة خاضعة وذليلة، نقطة راس سطر.

وبالنسبة لكلام النّاس فَ همَّ بكلّ الأحوال يحچون سواء بالزين أو بالشين يحچون وينطون رأيهم الّي محد طلبه، وأعرف مو بسهولة ما نسمعلهم وما نفكر بكلامهم، بس نحاول نتجاهل، حچاية زينة وطيبة ناخذها، حچاية تغث وتأذي نتجاهلها هيَ وصاحبها، نركز علىٰ الأمور الزينة الّي عدنا وبس، ما تضبط من أوّل مرّة بس تضبط بعدين.

والله يسهل عليكم ويوفقكم جميعًا، ويكتبلكم الخير بالمكان المناسب إلكم، ويبارك بكلّ خطوة تعبتوا وسعيتوا إلها.

ديروا بالكم علىٰ نفسكم وعلىٰ صحّتكم ونفسيّتكم لأن ماكو شي بالدّنيا يعوّضهن إذا راحن.

يجوز راح تفهمون كلامي وتسمعوا زين بعدين لأن هسّة بعدكم شرارة الحدث وضغط النتيجة ما أنتهىٰ وهذا حقّكم، بس بعد فترة راح تشوفون الأمور بصورة أهدأ وأوضح.

ومُبارك للكلّ وفرحانة وفخورة بيكم واحد واحد، والّي عنده دور ثاني فَ الفرصة بعدها موجودة ومو نهاية الدّنيا.

خصوصًا بهالوقت إحنا بزمن الشغل الحر، وكلّ واحد وشطارته شلون يطوّر نفسه ويستثمر تخصّصه ويصنع منه فرصة ومستقبل.

والذكي هوَ الّي يصنع نفسه مو المعدّل يصنعه.

أتمنّىٰ ما تجون علىٰ نفسكم زايد، وتعيشون فرحة هالتعب بكلّ تفاصيلها، كلها درجات حلوة إجت بعد كدّ وتعب، وكلّ درجة بيها جزء منكم ومن صبركم ومحاولاتكم.

صدگوني كلشي يتعوّض ويتبدّل ويتغيّر، وبعد كم سنة راح تتذكرون هالأيّام، وأنتوا بغير رأي وبغير نظرة.

محد عاش هالفترة غيركم ومحد تعب غيركم ومحد سعىٰ وقدّم وراح امتحن غيركم.

فرحوا بمعدلاتكم وقدّروا حقّ تعبكم لا تبخسون حقّ تعب اللّيالي وسعيكم بسبب الهالة الّي مسويها المجتمع أو الأهل أو الحچي الّي تسمعوا.