تَذكيّرات | REMINDERS

كُل محاولاتك بالحياة هي ربح حتى لو چانت بدون نتيجة ، ماعدا محاولتك وي شخص ما يعترف بخطأه محاولة عقيمة منين متحطها تلگه روحك خسران ومن تعاملك وياه راح تتعلم شغلتين : الاولى ، مو دائمًا المصارحة حتوصلك لحل مرات لازم تضُم الحچي بگلبك لان تدري الحجي ماراح يفيد او يغير شي الثانية ، حتتعلم تعامل كل شخص على حسب شخصيته وتفكيره لان متكدر تعامل كل الناس مثل ما انت تريد ولو نرجع للحقيقة هو خسران لان ما يگدر يواجه حقيقته ، دورك انتَ ان متخسر نفسك بدخولك معارك وياه اتعلم تختار حتى المعارك الي تدخلها.

إختيارك للناس الي موجودة بحَياتك هو انعكاس لاحترامك وحُبك لنفسك في حال چنت مخلي لنفسك قيمة، ما راح تقبل بأي شخص يشكّك بيها فـ داري نفسك واختار محيطك زين ..

وأريد اذكرك انه مو غلط انُ تختار غلط هذا شي طبيعي ويصير للكُل -لان مَحد يعرف نوايا الثاني - الغلط انك تستمر وي شخص انت تعرف بي غلط

فكرة "عاشر حتى تعرف "فكرة قديمة وممكن بالنهاية تدرك ان انت ضيعت وقت وي شخص جان المفروض من البداية متحطله مكان بحياتك الي اني أشوفه صح ويختصرلك وقت ومشاعر وكلشي ، ( خلي بموقف ) لان المواقف تريد افعال وميمشي بيها التمثيل يا موقف يهمك أختبره بي

الغلط إلي علمّك هواي أشياء صَح ، لتتندم عليه.

حبايبي كل عام وانتو وعوائلكم بألف خير ويارب أيامكم كلها اعياد وسعادة. هذا ثالث عيد واحنا سوا الله يبارك بعمري وبعمركم حتى اعايدكم كل سنة 🙈🤍

بسم الله الرحمن الرحيم “وَمَنْ أَعْرَضَ عَنْ ذِكْرِي فَإِنَّ لَهُ مَعِيشَةً ضَنْكًا” اول مقريت هاي الاية موجودة بسورة طه تقريبا قبل سنتين واتذكر گد ما خفت من قريتها صورتها حتى تبقى گبالي وماانسى اذكر الله لان ماريد الدنيا تضيگ بيه 😅 *ضنكا يعني ضيق ، حيرة…

بسم الله الرحمن الرحيم “وَمَنْ أَعْرَضَ عَنْ ذِكْرِي فَإِنَّ لَهُ مَعِيشَةً ضَنْكًا” اول مقريت هاي الاية موجودة بسورة طه تقريبا قبل سنتين واتذكر گد ما خفت من قريتها صورتها حتى تبقى گبالي وماانسى اذكر الله لان ماريد الدنيا تضيگ بيه 😅 *ضنكا يعني ضيق ، حيرة ، قلق ..الخ المهم وره فترة صفنت بيها گلت معقولة رب العالمين رغم كل الرحمة وحرية الاختيار الي منطيها النه راح يضيق عيشتنا اذا مذكرناه ؟ بحثت عن تفسير ومعنى الاية ورب العالمين لمنو چان يخاطب ويقصد .. بعد البحث طلع فعلا رب العالمين يقصد بيها كل الناس يعني مو فد قوم معين بزمن معين زين ، حتى اطمنكم إذا جاكم هالتساؤل مثلي بما ان احنه عدنا حرية الاختيار فلمن نختار ( نبتعد عن ذكر الله ) ف تلقائيًا حياتنا حتضيك بينا نتيجة اختيارنا يعني رب العالمين ماراح يجي يعاقبنا بدون سبب ، اختيارنا هو السبب فهذا مو تناقض وي رحمته وهذا الشي همات ينطبق على موضوع ان اذا ألله مقدر وكاتب كلشي فليش حيحاسبني؟ لان هو ما جبرك تسوي الفعل هو بس يعرف شنو راح تختار قبل لتختاره زين ، مرة لخ .. اكو ناس ميذكرون الله ومرتاحين بحياتهم ذولة استثناء لو شنو الوضع ؟ رب العالمين يختبر الناس بطرق مختلفة ، الي نتفق عليه كلنا ان رب العالمين واسع العطاء ويعطي لمن يشاء كيف يشاء يعني مو ينطي شي وياخذ شي علمود يحقق مساواة مثلا الناس الي عدها صحة وفلوس وكلشي -الي تشوفها مرتاحة من بره يجوز تلگاها فارغة من جوه وماحاسه بطمأنينة - وممكن هذا بنفسه يكون ابتلاء يعني الابتلاء مو بس ضيم وقهر اكو ابتلاء ان رب العالمين ينطيك كلشي حتى يشوفك شلون تتصرف واذا شافك مو خوش تتصرف واستمريت على هالشي شراح يصير ؟ ﴿ وَيَمُدُّهُمْ فِي طُغْيَانِهِمْ يَعْمَهُونَ﴾ وبالنهاية ، اني مو داعية اسلامية على گولة امي 🤣 بس يا جماعة لتخلون الدنيا ومشاغلها تنسيكم ذكر الله ..

- حَسْبِيَ اللهُ لاَ إِلَـهَ إِلاَّ هُوَ عَليهِ تَوَكَّلتُ وَهُوَ رَبُّ العَرشِ العَظِيم. -سُبْحَانَ اللهِ وَبِحَمْدِهِ. -لاَ إِلَـهَ إِلاَّ اللهُ وَحْدَهُ لاَ شَرِيْكَ لَهُ، لَهُ الْمُلْكُ وَلَهُ الْحَمْدُ وَهُوَ عَلَى كُلِّ شَيْءٍ قَدِيْرُ. -أَسْتَغْفِرُ اللهَ وَأَتُوْبُ إِلَيْهِ. -اَللَّهُمَّ صَلِّ وَسَلِّمْ عَلَى نَبِيِّنَا مُحَمَّدٍ. -يَا حَيُّ يَا قَيُّوْمُ بِرَحْمَتِكَ أَسْتَغِيْثُ، أَصْلِحْ لِيْ شَأْنِيْ كُلَّهُ وَلاَ تَكِلْنِيْ إِلَى نَفْسِيْ طَرْفَةَ عَيْنٍ.

احفظوا يمكم يفيدكم ، والله يتقبل طاعاتكم ويستجيب دعواتكم 🤍

خلي الاوضاع تسوء شوية ، حتى تعرُف منو أختاريت ..

الخطأ اللي سويته بالماضي وانت صغير يعتبر "تجربة" ، بَس اذا عدته وانت جبير حيكون غلطة آلفريد يگول : أولئك الذين ينسون الماضي، محكومٌ عليهم بتكراره. انت مسموحلك ترجع للماضي بحالة وحدة بَس ، ترجع حتى تفهم وين غلطت وليش ، لان الغلط اذا متعلمت منه حتعيده بمكان وزمان مختلف ووقتها حيكون الثمن اقسى لان جان "المفروض" تعرف الصح بأعتبارك انسان ديكبر مو ديصغر يعني ما عندك عُذر الجهل بَعد اما اذا رجعت للماضي بصفة ضحية وتبقى شايل همه على راسك فمبروك عليك .. راح تعيش نفس السنة ٦٠ مرة وبدون أي تغيير 🩶

مو ضروري تكون محقق كُل أهدافك الي حطيتها ببداية السنة حتى تعتبرها سنة مثمرة وناجحة ، اكو اشياء ثانية-محد يشوفها غيرك- أهم من الف هدف تحققه مثل انُ تختار نفسك وسلامك النفسي قبل كلشي هذا انجاز انُ تگدر تلملم نفسك وترجع توگف من جديد هذا انجاز انك ما صرت أسوأ رغم كل الأسباب الي جانت تدفعك هذا انجاز جرب هالسنة تبطل تقيس نجاحك بـ كم هدف حققت لان الاهداف ماراح تضيفلك شي إذا انت من داخلك متدمر

كل عام وانتو بألف خير حبايب ان شاء تكون سنة جبر خاطر وتحقيق الاحلام للجميع 🤍

أدركت مؤخرًا انُ مو كل واحد تغير أسلوبه وياك يعني طلع على حقيقته ، يجوز چان منطيك أكبر من حجمك واكتشف بعدين انك متستاهل ..

سامعين من يگولون دائما اطلع من منطقة الراحة وجرب اشياء جديدة ؟ اني هسه هم راح اگلك اطلع من منطقة الراحة بَس مو الي بحياتك ، إلي بعقلك الافكار الي عودت عقلك يفكر بيها بحيث لمن يبدي يفكر بشي حلو يستغرب ، اطلع منها أكو ناس متعوّدة تفكيرها يكون سوداوي، أو متوقعة الاسوأ، عقلهم تبرمج على هالشي فحتى لو جتهم لحظة حلوة العقل يرجع لمنطقته القديمة ويظل ينكد 🤣 ولهذا السبب يكلك التغيير يبدي من تغير طريقة التفكير اني شخصيًا كلما أحس انُ دأفكر بأشياء متسوه الواحد يفكر بيها اصلا اذكر نفسي بهاي الجملة - الحياة اوسع وابسط بهوااي مما تتخيل و والله ممحتاجة هلگد- وفعلا يطلع ميحتاج هلگد

الي بعدهم باقين لحد هسه انتو على راسي

الي بعدهم باقين لحد هسه انتو على راسي

يا يابه شگد مقصرة بحقكم