فِكرٌ يُزهِر 💚

الامام عَلِيُّ بْنُ مُوسَى الرِّضَا عليه السلام: "يُقَالُ لِلْعَابِدِ يَوْمَ الْقِيَامَةِ: نِعْمَ الرَّجُلُ كُنْتَ هِمَّتُكَ ذَاتُ نَفْسِكَ، وَ كَفَيْتَ النَّاسَ مَئُونَتَكَ، فَادْخُلِ الْجَنَّةَ. إِلَّا أَنَّ الْفَقِيهَ مَنْ أَفَاضَ عَلَى النَّاسِ خَيْرَهُ، وَ أَنْقَذَهُمْ مِنْ أَعْدَائِهِمْ، وَ وَفَّرَ عَلَيْهِمْ نِعَمَ جِنَانِ اللَّهِ، وَ حَصَلَ لَهُمْ رِضْوَانُ اللَّهِ تَعَالَى. وَ يُقَالُ لِلْفَقِيهِ: يَا أَيُّهَا الْكَافِلُ لِأَيْتَامِ آلِ مُحَمَّدِ، الْهَادِي لِضُعَفَاءِ مُحِبِّيهِ وَ مَوَالِيهِ قِفْ حَتَّى تَشْفَعَ لِكُلِّ مَنْ أَخَذَ عَنْكَ أَوْ تَعَلَّمَ مِنْكَ. فَيَقِفُ، فَيَدْخُلُ الْجَنَّةَ وَ مَعَهُ فِئَاماً وَ فِئَاماً حَتَّى قَالَ عَشْراً وَ هُمُ الَّذِينَ أَخَذُوا عَنْهُ عُلُومَهُ، وَ أَخَذُوا عَمَّنْ أَخَذَ عَنْهُ إِلَى يَوْمِ الْقِيَامَةِ، فَانْظُرُوا كَمْ فَرْقٌ‏ مَا بَيْنَ الْمَنْزِلَتَيْنِ

بالنسبة للحديث استقطعت منه مو كامل الي يحب يقرأه كامل هذا هو.

تعلمت من هذا السيد الجليل الكثير الكثير.. واغلب الأوقات من يكون عندي شغل معين و ماكدر اقرأ بوقتها، فقط أكدر أسمع، فـمباشرة اختار أسمع أي محاضرة إله. و الي يسمع شخص هواي يتعلم منه وخاصة طريقته بالنقاش و إدارة الحوارات العلمية وطريقة ترتيب الإجابة ودقتها والحرص على انو يكون جوابنا مصدرة قوي وموثوق يعني يعتبر حجة دامغة. فاليوم جنت بنقاش مع أحد الأشخاص وكان النقاش كلامي يعني مو كتابي ف كان محور النقاش على فد موضوع معين والحمدلله بفضل الله وفضل هذا السيد الجليل كدرت أنو أوضح هواي أمور جانت مغلوطة عند الطرف الآخر. أي فهذه والله نتيجة كثرة سماع المحاضرات العلمية عموماً و الدينية خصوصاً. و صدق الإمام لمن يگول.. ( يقال للعابد يوم القيامة نِعم الرجل كانت همتك ذات نفسك وكفيت الناس مؤونتك فادخل الجنة، إلا أن الفقيه من أفاض على الناس خيره، وأنقذهم من أعدائهم... ويقال للفقيه: يا أيها الكافل لأيتام آل محمد، الهادي لضعفاء محبيهم ومواليهم، قف حتى تشفع لكل من أخذ عنك أو تعلم منك).

لمن تردین تقدمين على وظيفة وتشوفین صاحب العمل مخلي معاییر مظهريّة كأول الشروط،، فخلیج عارفة أنه هذا "تسليع" إلج، هو يريد شکلچ ولبسچ وجسمچ، حتى لو شهادتچ دکتوراه میهمه.. إنتِ مو سلعة ولوحة إعلانيّة، إنت إلچ کیانچ الخاص وشخصیتچ وثقافتچ، فلا تخلین أحد يتحكم بیچ بحجة شغل. ولمن تشوفین منظمات مجتمع مدني حچیها حلو وتگلج تعالي نتساوی ونتحرر وننتفض، ابحثي عن نوایاهم الحقيقية لان وارد جدا یکون نیتهم الاستغلال بكافة أشکاله وأنواعه، وشي آخر مهم اضعه بين قوسين (لازم تفهمین أنه إنتِ بمرحلة من مراحل حیاتچ رح تکونين أم)، لذا شگد ما بیچ رگزی علی رفع مستواچ الفكري والثقافي، لأن إنتِ المربية وإنت اللي مخلین علیچ مسؤولية جيل کامل، زحمة تنجرین ورا التفاهات لتلوثین نفسج بهيچ أشياء، إنتِ أرقى من هیچ. - منقول

الصندوق_الأسود_لأحداث_رحيل_نبي_الإسلام_الشيخ_أحمد_سلمان.pdf

بما أنه اليوم هو إستشهاد النبي الاعظم محمد ( ص ) اليوم الصبح تذكرت كتاب ( الصندوق الأسود) - للشيخ أحمد السلمان قرأته قبل سنة ، وهذا الكتاب من الكتب المهمة و المعتبرة، يحجي عن أحداث رحيل النبي ( ص) والحقائق المهمة الي تعمدت الايادي إبعادها عن المشهد التاريخي . وعظم الله لكم الأجر

" اكو فئة من البنات نكدر نسميهن فتيات العاطفة المفرطة.. الي تقودها عاطفتها وتحطها بمواقف لا تُحسد عليها. فهاي الفئة من البنات مرات يسألوني أنو اكو شخص جاي احس انو هو معجب وكذا ويجوز اكو شي أكثر من الإعجاب شنو أسوي..؟ ف أسألها حبيبتي شلون عرفتي بالله..؟ تجاوب .. يخليلي لايك او لايكات هواي ويبدي إعجابه بطريقة او بأخرى بدون ما يتكلم والخ.. فـأكوللهن يا حبيبتي هذا اللايك الي يحرك عاطفتج ترا أسهل منه ماكو والكلام المصفط إذا سمعتي هم أسهل منه ماكو، فإذا تحسين نفسج ضعيفة أمام هيج أمور وما عندج قدرة عالية على ضبط مشاعرج - وهالشي هم مو عيب هاي طبيعتج هيج - فــحاولي تتجنبين هيج أمور من الأساس وقبل ما تصير وتبدي، وما جاي أبالغ لأن هي خطوات ترا وحدة تجر الثانية.. يبدي الموضوع بلايك، بعدها تحسه انو هو مهتم ، بعدها تفسير لكل تصرف يتصرفه ، وبعدها تلكي نفسها متعلقة بشخص ما تعرفين شنو نيته تجاهج، ويجوز فعلاً الرجال بريئ يعني اللايك عنده ما يعني شي مو مثل ما انتِ مفكرة.. وانا اعرف بنات بحجايتين ينضحك عليهن خطية لأنهن عاطفيات زيادة وعبالها كل شي ينكال إلها هو حقيقي. فمرات هاي العاطفة المفرطة تكون مزعجة وتحسيها مرات عبء مو لأن العاطفة شيء سيئ، لا.. ابداً.. هاي نعمة من رب العالمين وهبها للنساء بصورة أكبر وميزهن بهاي الميزة ، بس إذا ما توظفت بمكانها الصحيح، تخلي البنت تشوف أشياء مو حقيقية وتضخم أي موقف او حجاية عادية تنكال إلها. و برأيي ضروري أنو يكون عند البنت جانب منطقي بشخصيتها، لأن المنطق راح يحميها من هواي مواقف وحتى مشاكل تواجهها بحياتها عامة والعاطفية خاصة. وبعد ميحتاج نعقّب اخيراً ونكول الي يريدج صدك وبالحلال يا طريق يسلك.. "

" شباب هذا الجيل الجديد والجيل الي قبله وحتى جيل الثمانينات، ما اريد اكول الكل وأعمم، لكن نسبة كبيرة منهم تعرضوا لتهشم الطفولة .. واتكلم على الجانب النفسي بأعتباره الجانب الأكثر أهمية لأنه يرافق الإنسان لحد الممات ومستحيل يكدر إنسان يتخطاه، وإذا تخطاه فأبد مو بسهولة لأن يكون على حساب  أمور ثانية تاخذ من صحته أو طاقته أو من صفاته الجيدة. فالفئة الي عائلتهم المفروض تكون لهم مصدر الأمان الأول.. هي نفسها مصدر  الأذى، وتحمل من الأذى ما تحمله منهم لان هو بالطفولة ما عنده الأدوات إلى يكدر يدافع بيهن عن نفسه، فهذا شلون نتوقع منه من يكبر راح يكون إنسان سويّ النفسية..؟ فيكبر هذا الطفل ويصبح شاب و يطلع للمجتمع ،، يشوف أن أغلب المجتمع ما يختلف هواي عن البيئة اللي تربّى بيها، لأن أساساً مجتمعنا تربّى ويربي على العادات والتقاليد أكثر مما يربي على التربية الإسلامية الواعية الي تراعي بدقة كل تفصيلة من تفاصيل الإنسان ونفسيته، فما راح يرحمه ولا راح يمنحه المساحة الكافية، ولا الوقت الكافي، حتى يفهم نفسه ويتعافى من اللي مرّ بيه. والكلام يشمل الرجل والمرأة على حد سواء، لكن الفرق أنو المرأة تكدر تشكي وتبجي وهاي وحدة من الأمور الي تخفف عنها بس الرجل ميكدر ويكون الأمر أشد عليه، لان هو سمع و تعلم انو عيب تظهر ضعفك حتى لاقرب الناس الك وكون أنت تظل تحاول  دائماً ان تبقى صلب النفسية حالك حال الجدار، وهاي هم وحدة من المساوئ. فالأمر صعب و يحتاج توفيق إلهي خاص.. لان إذا نظل على البشر محد يكدر ينقذ نفسه إلا الي سخرله رب العالمين شخص بحياته يكدر يساعده ويهيأله مسببات الشفاء ".

من فضائل القراءة ومحاسنها إنها ترفع مستوى الجدّية لدى القارىء في حياته اليومية، فـتمنحه حساً يدفعه لمقاومة كل أشكال التفاهة والبلاهة المهيمنة التي تُفقِر معنى الحياة وتُفرغها من قيمتها.

وحدة من التحديات التي تواجهنا بالوقت الحالي كمجتمع إسلامي عموماً، وكـشباب خصوصاً هو التحدي الثقافي.. فاليوم احنه عايشين بساحة صراع ثقافي بين ثقافتنا الإسلامية القائمة على أساس الوحي والنبوة و بين الثقافة الغربية القائمة على الإلحاد والمادية. و نكدر نكول انو هذا الصراع هو يعتبر الاشرس بين انواع الصراعات، فلا مكان للمهادنة بهيج صراع مثل بعض انواع الصراعات الي ممكن تصير بيهن هدنة. لكن الغريب ومع الأسف الشديد انو احنه دورنا بهذا الصراع هو دور دفاعي محض، أو مثل ما يُقال بلغة الرياضة انو الصراع بساحتنا وبملعبنا ودورنا فقط الدفاع وماكو أي تقدم نحو دور الهجوم الا الشيء البسيط جداً، لا يُكاد يُذكر حتى، فنلاحظ احنه دائماً بحالة دفاع أمام كل ما يُوجه ضدنا، والأمر السيء أنو احياناً يستسلم البعض لقوة المهاجمة، و الأسوأ من هالشي أنو البعض يتبنى الثقافة الدخيلة ويدافع عنها.. مثل بعض مثقفينا الي يدافع عن الثقافة الغربية و يذكرها كمثال يُحتذى به . فمجرد فكرة كوننا في حالة دفاع دائمة عن ثقافتنا ومو بموضع هجوم هي أساساً نقطة ضعف. وطبعاً هالنتيحة طبيعية كون الغرب أستخدم بهذا الصراع آليات أكثر تطور مثل التلفزيون والشبكات الفضائية وشبكات الانترنت والكتب والأفلام الخ... فمثل منكول غزونا ونحن في عُقر دارنا وفي بلادنا.

والله فد مرة بنية كسرت خاطري تكولي تقدملي ولد كل مواصفاته حلوة وحباب ومؤدب وعددت مواصفات هواي زينة، بس رفضته لان ميعرف الشهيد الفلاني..! واني أعرفه و اقرأ عنه وووو وقتها ظليت صافنة بوجهها مادري شنو اجاوبها. مادري بعض البنات خطية شلون جاي يجرمن بنفسهن...

" طبعاً هاي السالفة الي حجة عنها الولد وصلت العدوى مالتها حتى للي على أساس هم متدينين، ف تجي هاي البنية الي عايشة بعالم المثاليات تنصح البنات،، انو لا تتزوجي إذا ميصلي صلاة الليل، ولا تتزوجي إذا مو يومياً يوديج للزيارة، ولا تتزوجي إذا صوته مو حلو بقراءة القرآن والخ.... من أمور مو بس مثاليات لا وإنما فوق المثاليات..! هو وين اكو هيج إنسان كامل المواصفات...؟ الطبيعي أنو كل إنسان عنده مواصفات حلوة يصير الاختيار والقبول لأجلها و عيوب بسيطة نكدر نتقبلها بمرور الوقت إذا الإنسان خوش إنسان ويستاهل. وطبعاً الي تاخذ بهاي النصائح هي أساساً نفسها الي حياتها قائمة على المقارنات، فإذا ما حصلت هيج مواصفات تظل تندب حضها وتظل بحالة مقارنة بين شريكها وشريك صديقتها الي عبالها ماكو منه، والي هو هم متروس عيوب بس ميعرفها غير الي عايش وياه، ف المقارنة أساس الخراب والبلاء الي يفتك بيوت الناس.. فيا بنات حبيباتي مالجن علاقة بهاي السوالف واختارن على أساس الدين الحقيقي والخُلق الحقيقي مو بس مظاهر وانتن تربحن دنيا وآخرة إن شاء الله. - ها وطبعاً اكو سالفة جديدة هم من ذني السوالف انو لا تتزوجي إذا مو سيد من نسل رسول الله 😆 بلة هاي شلون سالفة قابل بيد الإنسان ويغيرها..؟ ومستمرات بعدهن كل يوم راح يطلعن سالفة تعجيزية جديدة والبنات واكعات بهاي الأوهام خطية ".

طُوبى لأهل العراق فيض الأربعين يومًا ... 🤍 عطاء يدعو للفخر والله.

اليوم قريت فد منشور كلش حلو عن الكتب والقراءة وشلون أنو الكتب تصنع شخصيتك بدون ان تشعر ولابد أنو يكون إلها تأثير واضح عليك تلاحظه بعد فترة، ف عجبني المنشور وشاركته ف أجاني رد لطيف من بنية تتابعني صار فترة .. لا بأس بمشاركة ردها معكم و الغاية منه تحفيز الآخرين على القراءة.

- لا تستغلون زيارة الأربعين لأجل الاستعراض والمصالح الشخصية.. - لا تستغلون زيارة الأربعين لأجل الشهرة.. - لا تستغلون زيارة الأربعين لأجل المحتوى السيء.. - لا تستغلون زيارة الأربعين لأجل الاختلاط.. والأهم من تحدث هذه الأخطاء فلا تبررون الخطأ تحت عنوان تصرفات فردية، وما تأثر على صورة الزيارة ، فالتصرفات الفردية ممكن أنو تتحول إلى ظواهر جماعية إذا تكررت وسكت عنها الجميع وتقبلها.

" حالياً اكو نوعين من الدين : - دين المجتمع و - الدين الحقيقي و الأمران مختلفان .. اذا تريد طريق مستقيم وواضح يضمنلك الآخرة فـألتزم بتعليمات و أوامر الثاني، أما إذا تريد طريق اعوج و شاق أمشي ورة الاول. وانت بكيفك بعد .. العاقل يعرف شنو يختار ".

" للناس اللي تخدم الإمام الحسين (ع) بعيدًا عن الأضواء و التصوير المبالغ به والستوريات ... لكم كل الاحترام لأنكم تقاومون أن تكونوا مثل الأغلبية ".