الشاعر صباح العزاوي

‏قصيدة بعنوان(شوقٌ دفين) ‏ ‏                      بالبصيرة هواي اشوفك يا إمامي ‏وكل صُباح يمرني أبعثلك سلامي ‏يمته اشوفك بالبصر  طوّل اعليّه السّفر ‏يغالي  ‏ ‏١_ ‏آنه اشوفك، بالبصيرة، وآنه متلمس وجودك بيد الاحساس ‏وآنه احسّك، جوّه گلبي، نورك التارس عتمتي ويّه لنفاس ‏شهگتك مو نفس لا شغلة حيل ابعد ‏وحـي الـعـشّاك هـذا الينـزل ويصعد ‏ ‏جايب ويا سورة من عالم موازي ‏سـورة الوجدان أجـراء احـترازي ‏باقي صابر بالسّور  طوّل اعليه السّفر ‏يغالي ‏ ‏٢_ ‏ارد اكلك، بمنياتي، ارد احضنك حضنت احزام اعله ظهرك ‏بلكي يطهر، كلشي بيّه، من يلامسني طهورك ويّه عطرك ‏وانه امنيتي رضاك وكلشي غيره يهون ‏وتكرمني بدعائك وادري بـي مـضمـون ‏ ‏آنه عايش وب أمل فكرة ظهورك ‏ارد امهـد سيّـدي لساعة حضورك ‏يا أمامي المنتظر  طوّل اعليّه السّفر ‏يغالي ‏ ‏٣_ ‏شوگي يكبر، يوم جمعة، وبدعاء الندبة حسراتي ودمعتي ‏وابقه حاير، خاف اموتن، وبظهورك ما توافق عن رجعتي ‏الخسارة الكبرى هاي الي احسبلها ‏آنـه الـنصـرتـك مـولاي اچـلـبـلـهـا ‏ ‏عـلّـكـت آمالي كـلهـا برگبتك دين ‏لا تخيب امنياتي اعليك الحسين ‏انت للمؤمن مفر  طوّل اعليّه السّفر ‏يغالي ‏ ‏٤_ ‏وبقدومك، يا إمامي، تشرق اعلينه الارض وبنورك اتشع ‏واليضدّك، هذا ميّت، سيـفك يلوحه وعلى ‏الرگبة يوقع ‏اتـخـايـل مـشـاهـد آنـه بـيـهـا وياك ‏اقاتل بأمرتك واگطعها روس اعداك ‏ ‏هـذه احلامي وخيالي البيها ‏نثرية ‏وانته يا اعظم شعار بگلبي صنته ‏غايب وتارك أثر  طوّل اعليّه السّفر ‏يغالي ‏ ‏٥_ ‏آنه اسف، واعتذرلك، وجهي اسود من ذنوبي التدري بيها ‏آنه واحد، بي صلافة، يعرف الشغلة الرديّة ويعتنيها ‏وارد ارجع ادك بابك سماح اطلب ‏ابن عاق ورجع نادم يريد ايطب ‏ ‏انت باب الله وابد ميسده بابه ‏وانت نار وجنّة الله وكل حسابه ‏شلون ادورك بالدهر  طوّل اعليّه السّفر ‏يغالي صباح العزاوي https://t.me/wx_xx0

‏يمته تظهر سيّدي……وتاخذ بثار الضلع ‏                      وثار الحسين……ثار الحسين ‏ ‏طـوّلت غيبـتك ... اظـهر ابهيبتك ‏خـل نكحل النظر … من تصد نظراتنه ‏بشوفتك نرتوي … وغيبتك تنطوي ‏چنها طي السجل … للـكـتـب آهـاتـنه ‏ ‏وتبتدي المرحلة… تنتقم بيها ‏سيف ذو الفقار… كلها يفنيها ‏ربّك مسـدّدك… جمرة ترميها ‏             (وبكل شيطان.. ترجم وتخلص الناس) ‏وتنتصر رغم العده……وحگّك مربع بده ‏                     وثار الحسين…… ثار الحسين ‏ ‏مستتب الظلم … والعدل في عقم ‏والامان انفقد … من النفوس الحايره ‏الضلال انتشر … والصواب انحسر ‏انت فرض السقي … للـعلوم الـدايـره ‏ ‏ظـلمـه وبكل شبر… يصرخ الباطل ‏وعالعقيدة شكثر… مرجـئة اجامل ‏تـظـهـر ابـجـيتـك… ديـنـك الكامل ‏                 (الله يتمـم .. دينـه بأيـدك مـولاي) ‏وتنتقم ياسيّدي……من الهجم عالزهرة ‏                         وثار الحسين……ثار الحسين ‏ ‏ثلّة مـن شـيعتك … بالجُمع تنـدبك ‏بـس تريـد الفرج … وتنـتـهي مأساتها ‏ياشمسنه وصعب … غيّبتّك سُحب ‏اشـرق اعله الامم … خـل تـهل راياتها ‏ ‏تطـلع اتـنـاصرك … سـيّـدي الـقائد ‏تمحي كلمن على … شيعتك حاقد ‏والخدعهم امس … يــدّعـي زاهـد ‏              (انت تحاسب.. كلمن يخدع هالناس) ‏وتكشف الخان النهج…… ومنّه تاخذ سلطته ‏                     وثار الحسين…… وثار الحسين ‏ ‏بخدمتك نفتخر … وكل وكت ننتظر ‏بـيـنـه يـكبر امـل … تــظـهـر بـأيـامـنـه ‏يا وعـد مـنـتـفه … والله مايخلفه ‏نحـقـق بجـيّتك … كلشي مـر بحـلامنه ‏ ‏بـحـكـمـتك نـنـتـفع … واحـنـه شراية ‏ومايضل اي شخص … يفتي من رايه ‏لـنـحـراف الـحـصـل … كـلـش هـوايـه ‏            (وانت اتعدل.. كل اعوج يامولاي)   ‏اترجع الدين الاصل…… تحاسب انت اعله الكسر ‏                 وثار الحسين…… وثار الحسين ‏ ‏فاطمة تنتظر … ونسوة من اليسر ‏تندعي للفرج … ولنتقامك تنظر ‏سيف يگطر دمه … يحصد بموسمه ‏يشفي جرح الگلب … من يغير ويبتر ‏ ‏بلسم اعله الجرح … جـيّـتـك النه ‏تكشف اهل الكفر … سيفك ايدلنه ‏والخذل فاطمة … بـتـري اتـعـلنـه ‏                (تكطع راسه.. كلمن الخان الزهراء)  ‏عالاعادي زلزلة…… وكل مصايب كربله ‏وثار الحسين…… وثار الحسين ‏ ‏تمت يوم الخميس 20/2/2025 ‏الموافق 21 شعبان 1446 هــ ‏ صباح العزاوي https://t.me/wx_xx0

‏من الشام والكربله جيتك جيتك يضي عيني ‏والالـم بـالـمـتـن     خويه جيتك اون ‏                          جيتك جيتك يضي عيني ‏ ‏** ‏بـين الـمدينة وكـربلـه اتخـيّرت ‏ياخـويه واختـاريتـك وماحـرت ‏شلي بـدياري العـنها انت ابعدت ‏وحشة بدونك خويه من ارحلت ‏درب المشيته صعب وذكر اذكر امأسريني ‏مـو بديّه الامر    طـوّلـت باليـسر ‏                            جيتك جيتك يضي عيني ‏ ‏** ‏جيت وجبت راس الجسد للجسد ‏ارد ادفـن الـچـان بـمسـيـري سند ‏راسك على امصاب الجرالي شهد ‏ضـلّيـت انـه بنص الـصبر عالوعد ‏ايام ماتنحمل صعبة جارت على اسنيني ‏دهري بيه الغدر   ضهري بيك انكسر ‏                          جيتك جيتك يضي عيني ‏ ‏** ‏شهكة بچي بيها الصدر مختنك ‏ويـاهـا دخـان الـخـيـم والـحرك ‏صعبـة الاخـت عن الاخو تـفترك ‏الطم اجـيـت بهذا درب الـعـشك ‏وبچايه طول الدرب وانعى انعاك يحسيني ‏آنـه والـعـايلـة    نـكصد الـكربله ‏                            جيتك جيتك يضي عيني    ‏ ‏** ‏لـمن وصلت الكبرك استحضرت ‏بـعد الچتل بالخيل مـن اندست ‏صوت الضلع يتكسر آنه اسمعت ‏بس بيّه كل هذا الالم واصرخت ‏ارد احضن بجثّتك واشكي بالچن تواسيني ‏بيّه كومة حجي    بس سبقني البچي ‏                            جيتك جيتك يضي عيني ‏ ‏** ‏چيتك لچن لوني اختلف بالشمس ‏مـو ذاكـه شكـلي التعرفه ولانفس ‏من التعب صوتي امنسولف همس ‏ياريـتـه لـو وكـتي بـعـذابي يحس ‏كل ليلة اذكر الم بدربك وكل خطوة ياذيني ‏موقفي شكد صعب    وآنه دمعي يصب ‏                        جيتك جيتك يضي عيني ‏ ‏** ‏انـت ارسـمـت لـوحـة ظـلـم بالدمـه ‏وآنـه الـنـشـرت الـفـاجـعـة الـمؤلمـه ‏هـل لـيلـه كـمـلـت صـورة الـخـاتمـه ‏وانت اصبحت بكلب المحب عاصمه ‏ياخويه واستوطنت روحي بلچن تحاچيني ‏بالنفس تنشلع    لهفتي وتنسمع ‏                             جيتك جيتك يضي عيني ‏ ‏تمت الجمعة 16/8/2024 ‏الموافق 11 صفر 1446 هـ ‏ صباح العزاوي https://t.me/wx_xx0

‏قصيدة بعنوان(بطلة كربلاء) ‏ ‏ ‏ ‏زينب بالشام.. بدور الاعلام.. رعبت ظلام ‏كلمات حجار ‏نـزلـة زلـزال.. واعله الانذال.. كلمة التنكال ‏تلسـعـهـم نار ‏١- ‏ ‏يـا عـلـمـها.. عالمه وكـلّش فقيها والها سرها ‏ورثت امها.. ادّت الدور بفصاحة الحد گبرها ‏هزّت اعروش آل امية وكلها خافت من خطرها ‏آيـة الله الــخــطــابــة رتّــلــت زيـنــب نـشـرها ‏ ‏صدعت وبصوت.. ضد الطاغوت.. عل حك للموت ‏بت حامي الجار ‏نـــــذّكــــر دور.. فاطـم والجـور.. ضلـع المكسور ‏هجمه اعله الدار ‏٢- ‏ ‏بالفصاحة.. خـطبـة الحـوراء زينب زلزلتهم ‏واسمعوها.. ضلّو بصدمة چبيرة ودوختهم ‏معجزة وبرهـان سولف عـالسبيّة الي سبتهم ‏بيّنت وبكل جـدارة شـكـد قـويّة وخـوّفـتهم ‏ ‏صوت القرآن.. وبزينب بان.. طور الاحزان ‏يتلحن صار ‏ثبتت قانون.. بس آنه ام عون.. يمها يدنگون ‏بت حامي الجار  ‏٣- ‏ ‏يا صبرها.. المـتن لـون السـمـه واطـوخ متنها ‏والـضربـها.. خـله زينـب حـتى لسوالف تونها ‏بالنـواعي وبالقصايد حـيرة شتوصف حزنها ‏كل وكت زينب اسيرة والحزن صاير سجنها ‏ ‏كبّرها الجور.. بعشرة عاشور.. بشّام الدور ‏لا ماتنساه ‏ولهسّه الجيش.. متحزم ليش.. خايف لتعيش ‏واطّيح الواه ‏٤- ‏ ‏وبجدمها.. يروي سالوفة الجمر كلش طويلة ‏نيته چانت.. مـوچـويها يقبّل اجـدام العقيلة ‏راد يتشرف تـدوسه بلچن يحصّل فضيلة ‏والرماد بوجه زينب ملحمة وقصة طويلة ‏ ‏مأسات هواي.. واولها الماي.. ماخذ وفاي ‏بطيحة عباس ‏وايتام اتشوف.. بخيام اطوف.. والنار تحوف ‏تحرك بالياس ‏٥- ‏ ‏المصايب.. خرّبت كلشي بملامحها المنيرة ‏والنواعي.. رتـلتها النوگ چي زينب اسيرة ‏واليسر سوّه العجايب بالحبل گيدو أميرة ‏هل جريمة آذت الله وآذت اگلوب البصيرة ‏ ‏تنزف لگلوب.. حر دمها اذوب.. خدر المسلوب ‏گطّع لوصال ‏والحرگة ازيد.. ماظنهه اتهيد.. ماشافت عيد ‏عاشت هل حال ‏٦- ‏ ‏والمصيبة.. زينب بّرحّا الزمان وبيها يطحن ‏من المها.. كـل جـرح چـان بگلبها بنوح أذّن ‏رايت احفاده آل امية يم گبرها اليوم تعلن ‏وبينو اتباع السقيفة سم حقدهم فار دخّن ‏ ‏احقاد الگوم.. تتورث دوم.. بينت هل يوم ‏انذال هواي ‏بت حامي الجار.. وبغربة الدار..  وسط الاشرار ‏بهيبة رماي ‏ ‏ ‏تمت يوم الاثنين 13/1/2025 ‏الموافق 12رجب الاصب 1446هـ صباح العزاوي https://t.me/wx_xx0

‏حاير شوصف مقتلك.. يالبيك يندار الفلك ‏ابدي بيمن..وانت محور..شما اگولن.. مصابك اكبر ‏ ‏من اسولف عن عطشكم وحده يتفطر كلامي ‏والحبر مرات ينشف لو كتبت احسين ضامي ‏عن عظمتك كلي شحچي وآنه لزغير مقامي ‏مو حدث تاريخي اكتبه انت كينونة نظامي ‏ ‏عنوان الك صار العطش.. وبچبدك الضامي انفرش ‏من جفافة.. الگطرة تعثر.. والحقيقة.. مصابك اكبر ‏ ‏اذّن الدّم عالخناجر نحرك يصلي الشهادة ‏والجروح الفوگ جسمك چانت اتقبلك عبادة ‏والدمه النازف خلودك الكطرة اكسير الولادة ‏لهل سبب ماميت انت وجملت عرش القيادة ‏ ‏بضلوعك الدين انتچه.. وبدمك النازف بچه ‏هذا دمك.. مدري كوثر.. آنه حاير.. مصابك اكبر ‏ ‏انت اصل الدين كله انت قانون الطبيعة ‏بمقتلك دين الله ماضل حرفو كل الشريعة ‏والبداية چانت اصلا من كسر ضلع الوديعة ‏تبقى ديني وكل حياتي وآنه ديني ما ابيعه ‏ ‏للجنّة انت البوصلة.. واول خطاها بكربله ‏روحي الها.. هوايه تنجر.. يم حنيني.. مصابك اكبر ‏ ‏صدرك وظهرك عجيبة والي صاير بيهن اعجب ‏داخلك قرآن شايل طبكن وآياته تنحب ‏داست بصدرك حوافر ودمك برجليها يلهب ‏تنطحن سورة محمد والمحمد انت الاقرب ‏ ‏كل وذره من جسمك تون.. جوه الحوافر تنطحن ‏موجريمة.. چانت اكثر.. وبدليلي.. مصابك اكبر  ‏ ‏يالنطيت الدين نحرك ويه ولدك چن هديّة ‏والله كلشي انطاك بيدك كل تفاصيل القضيّة ‏كلشي لله يهون عندك وارسمت اكبر رزيّة ‏والهدف چان بقتالك تحيي دين الله ونبيّه ‏ ‏يالمنولد يوم المتت.. ذكرك رغم انف الصمت يالوجودك.. حارب الشر.. ضده يبقى.. مصابك اكبر ‏ ‏يالي شرفت الشهادة ودمّك اللون شكلها ‏لوحة من آه ومصايب يعجز الناظر يملها ‏قدمت اروع مشاهد عالعقل يصعب حملها ‏الذلة برزت ضد اباءك وانت فنان بقتلها ‏ ‏كل العقول النيّرة.. بهذا الجره متحيّرة ‏شخصك انت.. ماتكرر.. عل مصايب.. مصابك اكبر ‏ ‏تمت يوم الخميس 18/12/2025 ‏الموافق ٢٦ جمادي الاخر ١٤٤٧هـ ‏ صباح العزاوي https://t.me/wx_xx0

‏هل خدمة بيها الفخر للخادم اتهذّبه ‏والمـاعـرف خدمـتـه هـل منبر يأدّبه ‏من عنده ناخذ درس    لازم نطهر النفس ‏                           للـخـادم اتـهـذّبـه ‏ ‏ ‏الـخـدمة مـعناها التواضع والتواضع منزلة ‏الـحـسـيـن يـريـد مــنـك للـعــواج اتـعـدلـه ‏وتصبح انت قدوة للكل وكل كلامي اتحلله ‏واجـب تصـفّي نيّتك ‏وتترك مظاهر دنيتك ‏بـلچن تبـيّض رايـتك ‏والامـامـك مـا تـفـشـلـه ‏لازم تبيض الوجه يم فاطمة وحيدرة ‏وتغير انـت الوضع والاعـوج اتـحـذّره ‏تترك اثر ينذكر   موبالوكت يندثر ‏                                 للـخـادم اتـهـذّبـه ‏ ‏ ‏اتـرك الغيبة واهلها مجلس الغيبة ذميم ‏هـذه لفـعال الرديئة فعلة ابليس الرجيم ‏ماتناسب اي موالاي اتقلل بشأنه العظيم ‏حـافـظ عـلى هذا الاسم ‏الـخـادم بأحـسـن قـسـم ‏بهل خدمة امرك ينحسم ‏واسـمـك الـزهـره تـسجـلـه ‏ويـه الـخـدم تـنكـتـب دنيا اربحت وآخرة ‏هذا انت مرضي صرت وهذه تره المفخرة ‏هيچ انت قدوة اصبحت   بمنهج امامك سرت ‏                       للـخـادم اتـهـذّبـه   ‏ ‏لا تخلي اخطوط حمرة غير اهل بيت العلم ‏ذولـه سـادات الـبريـة وبــنـهـجـهـم نـلـتـزم ‏واليخـالف منهج الحـق يذنب ويكسب اثـم ‏والخـدمـة مـنـك تنسلب ‏عن منهج الحق تنحجب ‏والـصـورة عـنـدك تنقلب ‏هـوايـه بـاطـل حـق تـشـوفه ‏والخاسر انت اصبحت والباطل اتقدسه ‏بـس الـتـمـسك نـجى والـمـجلس يآنسه ‏بالدمعه عينك تصب   هذه تطهر الكلب ‏                             للـخـادم اتـهـذبـه ‏ ‏كلشي ماعدنه بعملنه وكلش احنه مقصرين ‏ياحسيـن انـطينه منّك خـل نعـرفك باليقين ‏كـل جهل خـلّصنـه منّـه بجاه زيـن العابدين ‏منّـك نريـد احنه القرب ‏مـن دونك الـروح بغرب ‏انت التسهـل كـل صعب ‏انــت بـالـمـحـشـر نـجـاتـي ‏اشفعلي يامن عرف غيرك امل ما ألي ‏بـس الخدامة امتلك وبموكبك منزلي ‏ماعندي غيرك عمل  حبّك يصلح الخلل ‏                                للـخـادم اتـهـذبـه ‏ ‏قـدّمـت كـلشـي تملكـه مـن اجـل رب العباد ‏واضحة كل تضحياتك ماوكفت اعله الحياد ‏نـحـرك الـدامي يسولـف معـنى ايآت الجهاد ‏كل كطرة من دمك حچت ‏عـن تـضـحيـاتـك فـهّـمـت ‏كـل الـعـيـون الـي بـچــت ‏غـسـلــت اذنـوب الـچـبـيـرة ‏والي اشد عالكلب زينـب سبـوها بيسر ‏والشام خلت الم من عنده ضاك الصدر ‏جمر الكلب ماطفه   والكل محب عاطفه ‏                             للـخـادم اتـهـذبـه ‏ ‏صارت مصايب بالسبي وكل الحرم متكيده ‏وبين الغرب يمشن سره تتنوّع اعليهن عده ‏والناس تـرمي بالـحجر مـن الحقد واتسدده ‏يحسين زينب عودت ‏مـن اليسر يمك اجت ‏عن المتن يمك شكت ‏ولون الوجه حيل اختلف بيها الشمس مترصده ‏ ‏تمت الاربعاء 21/8/2024 ‏الموافق 16 صفر 1446 هـ ‏ صباح العزاوي

‏مـظـلـوم الـحـسن مانـصفـتـه اقـلام ‏حتى الشيعة قصرت تكتب اطروحه ‏تـبـيـّن خـطـتـه وتـمـهـيـده لـحسيـن ‏للـطـف خـلـه عـيـن الناس مشبوحة ‏واذا عن الـكرم چـبده اصبح مضيف ‏لسم جـعدة جميع احـشـائه مفتوحة ‏يـجود بـنـفسه حـتى يعيش هـل دين ‏ومــن گــد الــكــرم عــزّب بـــروحــه صباح العزاوي https://t.me/wx_xx0

‏اسمع زين    هذا حسين ‏هـذا الـينطي الـكـل العالم مايحتاج الناس ‏هذا الضحى بدمه الدينه وطاح ويا عباس ‏اسمع زين ‏ ‏ ‏اسـمـعو يهل الـمآتـم هـل رسـالة وركـزو بيها ‏تضحيات الطف چبيرة واجب اعلينه انوعيها ‏الحسيني عِبرة ياخذ مـو فـقـط عَبرة يبچيها ‏كـون الـتزامـه يـمـيّزه ‏نيته السليمـة اتـحفزه ‏موش الرياء ال بالعزه ‏والمظاهر يمتطيها ‏ ‏بذمتك دين   فعل الشين ‏لاتـلچم بـجـروح الـعترة بـفـعـالك يفلان ‏حسينك صار لمنهج جده يالخادم قربان ‏اسمع زين ‏ ‏ ‏احضر وقيم المجالس بس مجالس بيها فكرة ‏تطرح الچلمة السليمة وتمزج العَبرة وي عِبرة ‏واتـرك الـطـشة واهـلهـا والا مـلا فـلان يـقـره ‏مذمومة كل هاي السنن ‏مـامـش وراهـا الا الفتن ‏خل مجلسك لام الحسن ‏اخلص النية تحضره ‏ ‏يجلي الرين   من الصوبين ‏لو صار المجلس عالفطرة بي روحيه هواي ‏انـت الـفـايز يابـو الـمـوكـب تـتسجل وفاي ‏اسمع زين ‏ ‏ ‏باللطم عوف المناصب والا باول جوكه تظهر ‏وانت ابو الموكب لزوما والا توكف جوه منبر ‏وهذا وخره وذاك اطرده والقضية زادت اكثر ‏بـعـض الـكـلام اليـنـطـرح ‏البعض النواصب بي مدح ‏لـزهـرة سـبــبـتـو الـجـرح ‏وهل مصيبة هاي اكبر ‏ ‏هل اثنين   چن ركنين ‏الشاعر والرادود امحاسب عالچلمة التنكال ‏واليسمع خـل ياخـذ عِبـرة من هاي الامثال ‏اسمع زين ‏ ‏ ‏لختلاف الويه ربعـك واخـتـلافـك ويـه زايـر ‏انـت ياخـادم اعـبـره مـو تـسـوّيـهـا عـشـايـر ‏زحمة من حسين واخجل يمته تهتز الضماير ‏اتـرك خـلافك من اجل ‏مولاك ابو اليمه الاصل ‏ولـخاطره طيح الفصل ‏واترك افعال الضراير ‏ ‏والچفين   وسهم بعين ‏قدمهن عـباس الخاطر مـولاه ومولاك ‏شتقدم هاي بميزانك وانت تفوز هناك ‏اسمع زين ‏ ‏ ‏وانت يالرادود افهم واعرف ابمعنى القضية ‏مـو عـلى حساب المصالح تكسر الضلع بأذية ‏ويـاحـزب يـدفعـلك اكـثر  ادّفّع اباب الزچية ‏بـسمارك اقوى بهل وضع ‏والـبـاب تـشـلـعـها بـدفـع ‏وضـلـوع تـكـسر مـوضلع ‏لا تكول آنه اشعليه ‏ ‏تشب نارين   بضّلعين ‏ضلع الزهرة وضلع المهدي راعي الهذا الثار ‏لتـبيع آخـرتك بالدنيا وتـخـذل حامي الجار ‏اسمع زين ‏ ‏ ‏ ‏تمت يوم الخميس 5/12/2024 ‏الوافق 5 جمادي الاخر 1446 هـ ‏ صباح العزاوي https://t.me/wx_xx0

‏من كربله راحت جسد والكربله رجعت روح ‏بنتك رقية الرادتك يم راسك وماتت نوح ‏لمن اجاها.. راسك سباها ‏يم راسك وماتت نوح ‏ ‏لتربت بعزك يبو اليمه سبوها ‏لمدلله بجالك تره بيك افجعوها ‏مالحكت تشبع دلال ويتموها ‏ ‏طفلة بعمرها شتريد  غير الابو والخوان ‏لمن صرت عنها بعيد خيمت عليها الاحزان ‏ ‏دور الحزن كوّه انفرض مالايگ اعليها الدور ‏هاي العزيزة الغالية من فگدتك شبعت جور ‏جيش الولاها.. راسك سباها ‏يم راسك وماتت نوح ‏ ‏وردة اذبلت من ابعدت عنها بسفرها ‏درب السبي تراب وضرب ضيع عطرها ‏هل طفلة عانت يالابو چتلك كسرها ‏ ‏الچانت غصن اخضر دوم  يابس صباح وتكسّر ‏وضل العطش بيها يحوم  ولشوفتك تتحسّر ‏ ‏يالشوفتك تروي النظر جان بأملها تشوفك ‏ماتدري بالراس انبتر واصبع نقص بچفوفك ‏فگدك طفاها.. راسك سباها ‏يم راسك وماتت نوح ‏ ‏روح وجسد وياك اجت هاي الحنينة ‏فجأة انهدم بيها الامل صارت حزينة ‏تفطر گلبها من الالم الله اليعينه ‏ ‏صارت نحيلة وبالآه تتجرع بحسرتها ‏انت السند الها وجاه مصابك صبح كسرتها ‏ ‏طفلة بعمرها تنسبي وحز الحبل بيديها ‏وذيچ الصياط اعله المتن طول الدرب تچويها ‏خصمك ولاها.. وراسك سباها ‏يم راسك وماتت نوح ‏ ‏اول طقوس الفاجعة لموتت رقيّة ‏رسك اجاها وبالطشت ذيج المسيّة ‏صدمة وابد ماتنحمل هاي الرزيّة ‏ ‏صرخت يبويه المذبوح وين الجسد لبراسك ‏منهُ اللعين المفضوح لبسيفه هد وجاسك ‏ ‏تشهك بچي يم لحيتك لمخضبة بدم نحرك ‏شويّه وهدأ صوت البچي شو لنها ماتت كترك ‏اجدد عزاها.. راسك سباها ‏يم راسك وماتت نوح ‏ ‏والكربله رد الضعن جدد بلآلآم ‏بس روح البنية ارجعت والجثة بالشام ‏چنها اصبحت نسمة هوى ويم راسك اتنام ‏ ‏واعله الطشت مسرح ضيم ودور البطولة البنتك  ‏ضل يبچي مولايه الغيم عاللحية دمك حنتك ‏ ‏منظر الم ماينسي وماتنحمل آحزانه ‏بهاي الخرابة مختلف حتى الحزن بالوانه ‏والجدها طه.. راسك سباها ‏يم راسك وماتت نوح ‏ ‏تمت يوم الاثنين 21/7/2025 ‏الموافق 25 محرم الحرام 1447هـ ‏ صباح العزاوي https://t.me/wx_xx0

بطبت السوگ حار الملگه چان احجار ‏نخل شافونا والحدر النخل يزغر ‏ ‏لو عدهم بصيرة وذرة من الدين  ‏ چا شالو جبل هدوه اعله العسكر صباح العزاوي

‏مشى الضعن يوثّق بالالام ‏صحافة زينبيّة الى الشام ‏ ‏مشى الضعن ويه الروس على ارماح تلالي ‏يويلي هذا لمصاب تعانيه ليالي ‏مجالس ضلت تقيم على ارواح غوالي ‏ ‏تأسس للمآتم ولقلام ‏صحافة زينبية الى الشام ‏ ‏تأسس للخطابة بفصاحة ابوها ‏وتبين هل جريمة الي حلت بخوها ‏منابر صارت النوگ ترجّف عدوها ‏ ‏تصوّب بذن الاطرش حجي اسهام ‏صحافة زينبية الى الشام ‏ ‏مهمّة عدها زينب اليمة وعظيمة ‏فضح اهل السقيفة سبب هل جريمة ‏اراذل حرفت الدين يوسفة وهظيمة ‏ ‏وجب لازم تبين بالاعلام ‏صحافة زينبية الى الشام ‏ ‏دخول الكوفة هيج المها بخذلهم ‏توجه كل حجيها وتذم بفعلهم ‏دعت وبحرگة ضلت تشخص خللهم ‏ ‏بقت خطبتها راية للاسلام ‏صحافة زينبية الى الشام ‏ ‏يعور كل كلام التگوله العقيلة ‏ياامه الخذلت الحق تخاذل ذليلة ‏تره الي ناصروهم فئتهم قليلة ‏ ‏ذكرهم يبقه خالد للاعوام ‏صحافة زينبية الى الشام ‏ ‏فكد كيدك تگله وترده بشجاعة ‏تذله بمجلسه وهم تحطم قناعة ‏وتبين هل جريمة ارتكبها ابشاعة ‏ ‏صداها باقي يرتد بالايام ‏صحافة زينبية الى الشام ‏ ‏تمت يوم الخميس 7/8/2025 ‏الموافق 12 صفر 1447هـ ‏ صباح العزاوي https://t.me/wx_xx0

‏مضرب مثل صار عن علمه وشجاعه ‏هـذا ابـن الـحسين هـل ليـلـه وداعـه ‏هل مجلس اليوم انعقد عنّه ‏نتـعلـم دروس وحـكــم منّه ‏هـذي عـن قـنـاعـة ‏ ‏اسمع اول موعـظـة انـته وركـز بـهذا كلامـي ‏الـصّبر حـكمـة وارادة اثبـته السجـاد امـامي ‏من صبر عالعلة مرّة وباليسر وحده اليحامي ‏اكبر جـريمة وفاجعة ‏شو چنّه يوم القارعة ‏كل هل الم ويصارعه ‏محنه ماتشبهّا محنه ‏نتعلّم هنا عن حجم المصيبة ‏كلّش چـبيرة وقصتها عجيبة ‏كـل مـشكـلة بـيـك التـمر هـينه ‏يالشيعي افهم هل حجي وبينه ‏هـذي عـن قـنـاعـة ‏ ‏درسك الثاني الشجاعة وكلمة الحق اتحچيها ‏وبـوجـه سلطان جـائر افضـح افـعاله السفيها ‏كل فساده وانـحرافه بالچي هالناس اتـوعيها ‏واتبطل اجّامل بـعد ‏متصدك بكلمن وعد ‏واتنزّل الباطل صعد ‏هذا منهج كل موالي ‏هيچ انته مفروض متخالف امامك ‏وتـحـارب الـجـور وتبـيـنـه بكلامك ‏هـذا الحـصل وبـخطبته يعلمك ‏كلماته سيف اعله العدو يفهمك ‏هـذي عـن قـنـاعـة ‏ ‏ثالـث دروس التـهـمّك ماتـساوم عالـعـقيدة ‏واحـذر الـمتستر بـدين وزهـد هـذي مكيدة ‏يخدع الناس بكلامه ويدّعي بنفسه رشيدة ‏يـظـهـر الك كــل الـورع ‏بـس هـوّه بـاك ومـاشبع ‏حارب نهج بالحق صدع ‏چـنّه ابـن مرجـانه ظالم ‏بالعمّةوالدين من حارب امامه ‏افهـمها يفلان من هاي العلامه ‏منهج يزيد اليفتي من رأيه ‏حـارب ولـي ومتورّع بنهيه ‏هـذي عـن قـنـاعـة ‏ ‏اعرف الكلمة وحجمها شكد تأثّر لو حچينه ‏بالفـصاحة اتبـين انـته البـاطل ولازم تهينه ‏افـضح الاعـوج واكـشفـه بالدليل ولا تعينه ‏كعد الغفل من نومته ‏لازم تـنبـهـا بلـومـتـه ‏بلچـن تعيـنه بكومته ‏ويكشف انواع الخديعة ‏هذي الاشارات مصداق الحقيقة ‏نـفهـم عبـارات مسبوكة ودقيقة ‏هـذا الكـلام اترسّـخه ابالك ‏بلچن يشيعي اتغيّر احوالك ‏هـذي عـن قـنـاعـة ‏ ‏اسـمع الدرس الاخير اعلـه العـفاف وكله غيرة ‏شلون صان بهل حراير بالسبي وطول المسيرة ‏رغـم الـحـبال الـتـكـيّـد زيـنـب الـحـرّة اسـيـرة ‏بالعـفّـة ضلّـت والستر ‏هـيـبة عـلـي ماتـنكسر ‏ويشاكف ومن كل كتر ‏والـمـره عـنـده امـيـرة ‏حافـظ عليها مـن فـكر الاعادي ‏من السفارة الهجمت كل بلادي ‏صونو الحراير صونة الدرهم ‏لـهـذي الـوصـيّـة لازم نـعـمّـم ‏هـذي عـن قـنـاعـة ‏ ‏ ‏تمت يوم الثلاثاء 30/7/2024 ‏الموافق 23محرم  1446هــ ‏صباح العزاوي https://t.me/wx_xx0

لسان حال مولاتي العقيلة ‏صدى صوت الحوافر مالمتني ‏عسى الدنيا التطشرك مالمتني ‏تعال وشوف الازرگ مالمتني ‏وحمار اوياه چنه المغربية https://t.me/wx_xx0

‏القصيدة المسرحية الواقعية الحزينة ‏بعنوان (مسرحية الرأس المقدس) ‏ ‏ ‏باعجازك   راسك حييته اعله الرمح   بعجازك ‏نـظراتـك  ضلّـت تـراقـب بالـنـسـه نـظـراتك ‏ماغمضت العين   نظراتك حسين ‏هاي العناوين        بيها آنه محتار ‏* ‏باقي عالي                  يصدح بنور  ‏راسك انت لو شمس هاي بمكانه ‏بالطشت ليش           راسك يصير ‏ويضرب بشفتك زنيم بخيزرانه ‏ ‏بدر خلّت حقدهم ينزل اعليك  ‏           بذبحك والسبايه ‏هـذا الـخـلـه ابـن زيـاد ياذيـك ‏           بـضربه للـثنـايـه ‏ ‏وجه الله   انت وصرت بيد الكفر    وجه الله ‏مـاخـلله  حرمـه لوجه بي شيبتك   ماخـلله ‏وجهك مثالي           شيبك يلالي ‏ابعث سؤالي        عن هاي الاسرار ‏* ‏سورة النور               ضمها تنور ‏ معجزة تصير وتصرح انت مظلوم ‏دايـخ بهـاي           شنهو تـعنـي ‏مـن يـسولف راسك وكلماتك اتحوم ‏ ‏انه العطشان ذبحوني بها الحال ‏             وراسي صالبينه ‏بـجـوابك بـيـنـت ابـشـع جريمة ‏           وحـقـك سالبينه ‏من نحرك صاح المسك ليش انسفك ‏من نحرك ‏من صبرك  مـذهـولـة افـلاك الـسـمـة  ‏من صبرك ‏تبچيلك اعيون        طول الوكت كون ‏راسك بلاامتون        من وحده يندار ‏* ‏نورك الصاح          راهب الدير ‏يدفع امواله ويضيفك ليله يمّه ‏باقي مذهول          من جمالك ‏وبقداسة راسك الاعظم يشمّه ‏ ‏علامة واسلم الراهب لجلها ‏          هذي هم كرامه ‏نعـاك بليـل ماطـوّل بقائه ‏         بدموعه اختتامه ‏ ‏مكتوبة   كل حادثة براسك جرت     مكتوبة ‏مـنـصـوبة   عـنّـك مـآتـم سـيدي  منصوبة ‏عايش ولا مات          براسك كرمات ‏رسمتلي آهات             مليانه آثار ‏* ‏بالخرابة          صرخت بصوت ‏تطلبك بنتك رقية بس تشوفك ‏ماتظن بيك         انت بس راس ‏شهكت اعليك ونظرها ضل يطوفك ‏ ‏بچيها هواي طال وفجأة سكتت ‏           من كطعت نفسها ‏اثاري الموت اخذها العالم الشوك ‏            من راسك لمسها ‏ ‏مشهد موت   يرسم الم ماينحمل ‏مشهد موت ‏سكتت صوت  من طفلتك فوك الطشت سكتت صوت ‏هايه النهاية          من هل رواية ‏درب السباية        چتال الصغار ‏* ‏مجلس الشام       هان الاسلام ‏من تجاسر بالخمر يم آية الراس ‏والمصيبة            الة اقمار ‏وعله راسك يلعب الطاغي بالأرجاس ‏ ‏وكت خلّه اللعين اتماده وياك ‏        بسلوب الشماته ‏نظر عينك يسولف كل الم بيك ‏          ويوضح صفاته ‏ ‏بالآيات      صوتك يرتل وبحزن      بالآيات ‏مسبيات   كل الحراير بالقصر      مسبيات ‏شيخلصه هاليوم          عالعترة مشؤم     وبراسك اهموم               واثار الحجار ‏ ‏ ‏تمت يوم الثلاثاء 13/8/2024 ‏الموافق 8 صفر 1446 هــ ‏ صباح العزاوي https://t.me/wx_xx0

‏سبي سبي باليسر حكاية ‏سبي سبي شافت الرزاية ‏لبوة واجت للشام  فضحت نهج ظلّام ‏ ‏ ‏اوّل قيام  مـنّ الخيام  نـحـچي الحصل ‏زينب تصول بنصّ الخيول تحمي الاهل ‏ ‏ضلّت تشاكف كل كتر وتحامي لعيال ‏تشـبه عـلي وكـت الشـدد للقوة ميال ‏ماهزها جيش ولا حرب لاهزها خيال ‏بـنـت البتول بكـربله مفـخرة الاجيال ‏ ‏عده عده للسبي جابوها ‏عده عده خافو وهابوها ‏يرفع فعلها الهام  فضحت نهج ظلّام ‏ ‏ ‏طول الطريچ تارسها ضيچ بنت النبي ‏صارت بديل  عـن الكفيل درب السبي ‏ ‏صارت سند كل الحرم وتحامي عنهن ‏زينب كفيلة بالسبي وعن كل محنهن ‏عـفّة وشـجاعة والـستر هذي سننهن ‏آيـة طهـر وبـنص كـفر هـذا الحزنهن ‏ ‏شمع شمع محترك يضوّي ‏دمـع دمع نـازل ويـچـوّي ‏زينب سند ليتام  فضحت نهج ظلّام ‏ ‏ ‏عدها انتصار بالكوفة صار من سولفت ‏وجهت سهام بـوجه الطغاة لـمـن رمـت ‏ ‏هـانـت ابـن مـرجـانه وبـقـصر الامـاره ‏خـلّتلـه عبـرة تـصـير الـه وتذكره عاره ‏كل چلمة منها اعله العدو چنها حجاره ‏سـجّـيـل ربّـك بالحـچي مـنها ايـتجاره ‏ ‏شذر مذر طشرت شملهم ‏نفر نفر خـرّبـت حـفـلهـم ‏بت حيدر الضرغام  فضحت نهج ظلّام ‏ ‏ ‏كبرت سنين بهل اربعين درب اليسر ‏مـاظن تـنام لا مـا تـلام بـهـذا العسر ‏ ‏كلّـش قـوية وصـامدة شـو چنها عبّاس ‏كلمن يحاول ينـتقص من عدها ينداس ‏روس الـنشامـة الـبرمـاح وياهـا حرّاس ‏يتخازرون اعله العدو رعبو هل ارجاس ‏ ‏رعب رعب لليـصد عليهن ‏ستر ستر حتى وبسبيهن ‏ماكدرتلها ازلام  فضحت نهج ظلّام ‏ ‏ ‏صار الوعيد بمجلس يزيد زينب ترد ‏هذا الخطاب اكبر جواب يـلا استعد ‏ ‏اسمع يبن هند الحجي واتخذه عبره ‏چـتلك اخـوي بكـربله مايمحي ذكره ‏ربـك خلـقلـه اتـبـاع اله تـحيلـه امره ‏وانت الخزي والعار الك جايبنه اسره ‏ ‏خسر خسر كلمن يعاديهم ‏بـشر بـشر كـلمن يـواليهم ‏وتبنت الاعلام  فضحت نهج ظلّام ‏ ‏ ‏تمت الخميس 8/8/2024 ‏الموافق 3 صفر 1446هــ ‏ صباح العزاوي https://t.me/wx_xx0

‏يازهرة حسينچ متگطع  ‏مطشر لحمه اعله التربان ‏رايد فزعة..  وانت البضعة ‏كومي ولمي بهل قربان ‏ ‏يوم العاشر من محرم ‏ادري بگلبچ منه اتورم ‏ارد اسأل عن ردت فعلچ ‏لمن شفتي حسين مثرم ‏چم سيف الماكل من جسمه ‏حتى يبين جسمه مقرم ‏ ‏هم شفتي اضلوع اعله الغبرة ‏سحكتهن خيل العدوان ‏يصعب وضعه.. وانت البضعه ‏گومي ولمي بهل قربان ‏ ‏چم يوم اعله الكاع امطشر ‏جسمه وداست بيه العسكر ‏ياكاع التقبل تتحمل ‏لحم حسين اعليها اموذر ‏غرگان السيف بدم نحره ‏رش اتراب الطف وخضر ‏ ‏هم هزت صبرچ مولاتي ‏هاي الصورة بهل نيشان ‏ولدچ صرعة.. وانت البضعة ‏گومي ولمي بهل قربان ‏ ‏كل جرح بأبنچ بي قصّة ‏كل آلة حرب اخذت حصّة ‏حتى حجار الكاع مشارك ‏كلهن اخذن ضده الفرصة ‏وصلت بيهم حد الخسّة ‏ضربو جسمه حتى بعصّة ‏ ‏وينادي بصوته ويستنصر ‏وترد سكته من الخذلان ‏بيچ الوجعة.. وانت البضعة ‏كومي ولمي بهل قربان ‏ ‏كل گطره السالت من دمّه ‏ماسالت صعدت للقمّة ‏وصبغة لون الدنيا بحمرة ‏ومطرت فوگه تريد اتشمّه ‏الا اشويّه اطيح العليا ‏من طاحت من راسه العمّه ‏ ‏طبطب عالگاع بچف ايده ‏وعدل كفتين الميدان ‏لحگي بسرعة.. وانت البضعة ‏گومي ولمي بهل قربان ‏ ‏يتلفت بالحومة ويبصر ‏ضل اوحيد وماكو الينصر ‏اصعب خذلان بهل عالم ‏هاي الامة بحقه تقصّر ‏وصار اكبر من هذا بحقه ‏گطعو من چف ايده الخنصر ‏ ‏وضعچ شنهو بهذا المشهد ‏بأول نظرة اعله الجثمان ‏مرّه الجرعة.. وانت البضعة ‏گومي ولمي بهل قربان ‏ ‏ضل عطشان وحسرة الگطرة ‏والشفة مگسبة ومتفطرة ‏ومن گد ما فتحات بشفته ‏بسيوف اتحسهن مطّبره ‏ويرتلن قرآن وتطلع ‏منهن نار اچوّي الجمرة ‏ ‏ونار بدلالچ ماتبرد ‏من عدها يصير البركان ‏تچوي الدمعة.. وانت البضعة ‏گومي ولمي بهل قربان ‏ ‏تمت يوم الاربعاء 7/1/2026 ‏الموافق 17 رجب 1447هــ ‏ صباح العزاوي https://t.me/wx_xx0

‏كبر قدرك ‏ ‏يالمـصابك مـاخذ اعماق الخيال ‏ماوسع عشرك وحك رب الجلال ‏ ‏من كبر قدرك يبو اليمه استحيت ‏اكـتب وعـن المصاب اقرالي بيت ‏يـاجـبـيـر ازغـيـر انـه وقـصـريـت ‏اوصـل اعمـاقك انـه كـلش محال ‏ ‏وبرغم تقصيري بالبال اسرحت ‏راودتـني صـورة الراس بطشت ‏جـم حلم مات لرقـية وطـشرت ‏ياطشت من عنده ماشبعت دلال ‏ ‏وعالرمح قـرآن ناطـق معتلي ‏مخضب بدمه أبن حيدر علي ‏ياعجيـبة شلـون مثلك ينولي ‏ومن بعد جتلك سبو كل العيال ‏ ‏والسبي مو بس على اعيالك جره ‏الـسـمــه والـكـون كـلـهـا مـجـمـره ‏عــاصــفــة دم بــتـراب مــعــفــرة ‏اتـهـدمت لـمـصابك اركـان الـجبال ‏ ‏حيرتي بصفنة خيالي اعله النهر ‏لنـخلق مـنك عـليك مـن انـحسر ‏يـااصـل كـل الاصول بـكـل دهـر ‏يـالذي بـنـورك خـلـق ماي الـزلال ‏ ‏ياأخـيـر اهـل الـكـسـاء الطـاهرين ‏نـحـرك الـدامـي دلـيـل الـحـائـرين ‏طيحتك بالطف تحول الشك يقين ‏تـيقـنـت للـباحـث انـت اكـبر مثال ‏ ‏نهجك الواضح درس لهل العلم ‏يـعـتـقـد بـيـك الحـليم اليفتهم ‏انـت يـامـولاي واضـح كـنـجـم ‏صحبتك مضرب مثل سوح القتال ‏ ‏تمت يوم الاثنين 23/10/2023 ‏المصادف 7/ربيع الاخر 1445هــ ‏صباح العزاوي https://t.me/wx_xx0

‏يابويه مذبوح  عطشان الحسين ‏بالچن ترويه  عطشان الحسين ‏ ‏لمروي دين الله بدمه چبده تفطر ‏فوك العطش صدره انسحك حيل وتوذر ‏وآنه انظر الحالة وبالم گلبي تعور ‏بعيوني ياريته العمى ولا هيچ منظر ‏ ‏خل تعمه هل عين  عطشان الحسين ‏ ‏ماي الشريعة اعلينه شح وراح اليفجها ‏ماشفنا ماي بكربله بس ماي وجها ‏وطاح اعله وجها امخضب وگاع الله رجها ‏كل ذرة اتراب احرمت يم جسمه حجها ‏ ‏چي ذروة الدين  عطشان الحسين ‏ ‏يابويه كلشي بكربله ماينحمل صار ‏واولهن الگاع وسمه يمنه اصبحن نار ‏بالعاشر الطف انگلب ياحامي الجار ‏وحسينك اتحيطه العده وضل وحده محتار ‏ ‏ينطي الوجه وين  عطشان الحسين ‏ ‏ماشفنا ناصر من وگع ينصر ولينه ‏ضلت على اخيامي تصد مشبوحة عينه ‏موقف ابد ماينحمل الله اليعينه ‏وبس غمضت عينه وطفت احنه انولينه ‏ ‏جنب الصواوين  عطشان الحسين ‏ ‏ماضل مكان بلا جرح كل جسمه ينزف ‏وجروحه من كثر الكرم ماتقبل اجف ‏عالغبرة طايح وبرعب عدوانه ترجف ‏ضجت ملائكة السمه ويحسين تهتف ‏ ‏مابي كتر زين  عطشان الحسين ‏ ‏ضلوع الحسين بكربله داستهن الخيل ‏من شفته ياحيدر علي ماضلي كل حيل ‏واظلمت الدنيا الظهر وتحولت ليل ‏كون الخيول السحگته يشملهن الويل ‏ ‏بجسمه النياشين  عشان الحسين ‏ ‏بحال الاخوها ينچتل بس الله يعلم ‏بفراگه لو ميته بقهر لو عايشة بهم ‏من شفته عاري بلا چفن وموسد بدم ‏ريحت مسك بالطف بقت من كترة نشتم ‏ ‏كل هل عناوين  عطشان الحسين ‏ ‏تمت يوم الجمعة 8/8/2025 ‏الموافق 13 صفر 1447هـ ‏ صباح العزاوي https://t.me/wx_xx0

‏حبيبي ياحسين حبيبي ياحسين ‏ ‏ ‏بـدايـات الـذبـح مـن مـولـده چــتـله بـده ‏وسفه وحرامات ‏وجه چنّه الصبح ينكط نده يغيض العده ‏هـاي الـعـلامـات ‏ ‏ذبيح اهل الكسه وعطشان من مات ‏مــاتــكـدر تــوصـف الـصـار كـلـمـات ‏نـعـبّـر عــن وجـعـنـه بــزفـرة آهــات ‏نـهـز بـيـهـا اليـضـدنـه بـهـل عـبارات ‏ ‏حبيبي ياحسين حبيبي ياحسين ‏ ‏ ‏بالطف قارعة اهتزت سمه تمطر دمه ‏من نحر الحسين ‏صارت فاجعـة رسمت ضمه نار وحمه ‏ومكطوعة چفين ‏ ‏يـوم الـعـاشـر بـعـاشـور يـصـدم ‏آلام اعــلــه آل الــبــيــت يـقـدم ‏ذب حمله اعله خير الناس يعدم ‏اســيــاف الـعــده بــل آل تــردم ‏ ‏حبيبي ياحسين حبيبي ياحسين ‏ ‏ ‏كل جـسمـك جرح لـمن طحت واتـعـفّـرت ‏وضمادك تراب ‏وبــيـوم الــذبـح لا مرضخت شامخ صرت ‏والموت چذاب ‏ ‏ذكـرك خـالـد بـكـل الـمـجالس ‏بمرتـبت الخدم واحدنه فارس ‏بمدرسة العشق يحسين دارس ‏بالـكن نرتـقي لـجون ويعـابس ‏ ‏حبيبي ياحسين حبيبي ياحسين ‏ ‏ ‏اسمع مقتلك من زغري اون عشت بحزن ‏ضل يكبر وياي ‏ثابت بس الك لو ضـل قرن عايـش احـن ‏من اشرب الماي ‏ ‏اذكـر چـبدك العـطشان يـسعر ‏چـن نـار المـخـيـم بـيك تـفـتر ‏عينك شاحبة وبالحـسرة تكبر ‏بخيالي وصدمني الواقع أكثر ‏ ‏حبيبي ياحسين حبيبي ياحسين ‏ ‏راسك عالرمح آيـه ونزف يـقره الكهف ‏رتل عناوين ‏تحتاج الشرح صوتك هتف بيهن كشف ‏عن البراهين ‏ ‏حكـمة وبينت بيـها الـتريـده ‏ياشيعي الاصل هي العـقيده ‏نحـرك ينطـق ودمّـه نـشيـده ‏سبط الهادي انت ودم وريده ‏ ‏حبيبي ياحسين حبيبي ياحسين ‏ ‏ ‏تمت الخميس 11/7/2024 ‏الموافق 4 محرم 1446هــ ‏ صباح العزاوي https://t.me/wx_xx0

‏نزفك نهر من فاض واتبده دمك ‏نحرك مسك فواح يبني امنشمك ‏وليدي شبيدي لمن رحت فكدك طفه عيوني ‏ ‏لـمـن خـذك عـطـشان ظـنيـتك اتـعـود ‏وبحضني اضمك حيل واشتمك اردود ‏لاچن رجعت اسكوت جثه انت ممدود ‏نحرك اجاني يفيض شـط الله مـهدود ‏وليدي شبيدي لمن رحت فكدك طفه عيوني ‏ ‏لمن رجعلي حسين للخيمة جابك ‏سابح چنت بدماك هدني مصابك ‏حاچـيني دمـك ليش غـرگ ثيابك ‏امنـيتـي بـمناغـات اسمـع جـوابك ‏وليدي شبيدي لمن رحت فكدك طفه عيوني ‏ ‏فز كلبي فزه اعليك جمرة وچوتني ‏والـحسرة خنـكت روح بيّه ولوتني ‏بـمـصـابك اللـوعـات منجل حوتني ‏والـبـيـه بـس آهـات مـنّـك روتـنـي ‏وليدي شبيدي لمن رحت فكدك طفه عيوني ‏ ‏صـار الچـفـن لكـماط ومـلـفلـفك زين ‏حـار السهـم مـن جـاك فـززلك ايدين ‏نـحرك سهم مصيوب وآلامه بحسين ‏ارد ابچي آنه اعليك خل يعمن العين ‏وليدي شبيدي لمن رحت فكدك طفه عيوني ‏ ‏طـول الـسهم ويـاك مـسّاوي طـوله ‏بس نحرك انت زغير حجم الطفوله ‏مسموم اجـاك بحيف لحظة وصوله ‏لـمـن نـبـت شـو داخ ضـل بـذهـولـه ‏وليدي شبيدي لمن رحت فكدك طفه عيوني ‏ ‏بـفراكـك انـسليـت وصـرت العـليله ‏نـار اسعـرت بالـروح مابـيـدي حيله ‏بس ربي يدري شلون كمت اشتكيله ‏رامـي السهـم مـلعـون مـن الله ويـله ‏وليدي شبيدي لمن رحت فكدك طفه عيوني ‏ ‏ ‏تمت الثلاثاء 16/7/2024 ‏الموافق 9 محرم 1446 هـ ‏صباح العزاوي https://t.me/wx_xx0