أحلامـ":

تداويتُ من ليلى بليلى عن الهوىٰ🔥

(على أن الطريق الطويلة يهون من مشقتها عون الرفيق ومحبة الإلف الموافق!)

كنت النهاردة في مشوار وقدرًا عديت على مكان ليَّ فيه ذكرى سيئة، وخسارة من خساراتي الفادحة:)) مش عارفة حاسة بإيه.. بس وأنا ماشية رغم كنت ماشية بسرعة، وزحمة والجو حر، ويدوب دقايق بس مشيت منه، لكن عقلي كأنه عاش نفس المشهد من سنوات بنفس التفاصيل، بنفس المشاعر اللي كنت حساها وقتها، أنا كنت تحت أوووي أوووي، وحزينة أوووي، ونسختي الغامقة اللي كانت بترتجف وقتها من الخوف اللي كان ساكن جوايا.. روحت ضيعت (بأيدي) شيء كان ثمين بالنسبالي في الوقت ده، خسرت شيء وفقدته (بإيدي برضه).. أنا مسامحة النسخة دي مني ومتعاطفة ورحيمة بيها؛ علشان هي مكنتش فاهمة حاجة، كانت بتعاني وبس :)) بس كل فترة والتانية بفتكر اللي حصل، بسمح لنفسي أحس بأي حاجة وعادي يعني بسلم لله في اللي حصل وإنه معلش وقتها مكناش فاهمين، بس أنا النهاردة لما عديت من المكان ده حسيت بمكان الشرخ في حتة من قلبي:))) وقاعدة يسأل هل تستاهل أحزن عليها الحزن ده، عقلي بيقولي لا لأسباب كتيرة، بس مشاعري بتقولي آه أنت حزينة أوووي وندمانة وكان نفسك الحاجة دي متروحش منك، كان نفسك حاجات كتير كانت تبقى مختلفة، كان نفسك وقتها إنه العالم يسعك، وحاجات تانية كتير.. الحمد لله قدر الله وما شاء فعل. معلش نحزن على الفقد، هنا والآن نحزن عليه، حتى لو مر عليه سنواااات، مش لسه بيوجع؟ حقي أزعل عليه مرة وألف يا رب أرزقني التخطي الجميل;(( .. - ١١ أغسطس ٢٠٢٦مـ l سندوب. (رثاء لكل ذكرياتي الجميلة التي عشتها وأنا هناك في القاع ولم أستطع أن أرى أنها كانت حلوة ولم أكن قادرة على عيشها -أقول شكرًا ووداعًا ممزوج بالحنين-، وللخوف ألف مرة... )

https://youtu.be/4yM_izrSziQ?si=R9P4d0iD7rdkrKnp

صديقة بياترس عادت إليكم. 🌿🤍

(حسي بالذنب وما تلعبيش الدور) :)) - شكرًا يا دكتور، لحم رأسي من خيرك والله.❤️‍🩹

(الكفاءة الرجولية في أصدق تعبير لها عند المرأة هي أن يملأ الرجل عينها؛ أن ترى فيهِ ما يبعث فيها القبول، والاحترام، والاطمئنان، ويجعلها تستكين إليهِ دون تكلّف؛ وإن الرجولة التي تملأ العين ليست صفة طارئة، ولا هيئة شكلية، بل هي أثر تراكمي لصدق مع النفس، وانضباط في السلوك، واتساع في الصدر، وقيام بحقوق العلاقة ظاهرًا وباطنًا.)

أول ما شوفت الصورة قولت الله! حد يطول حد يجي ينقذه وأبقى مستموتة زي الراجل ده بدل ما الحياة نزلة ضرب وأنا ماشية بعرج.. يا عم شيل بلا ضحية بلا بتنجان. ♥️ - محاضرة مثلث الدراما (أو برمودا أيهما أقرب)

مش قادرة أتخطى جملة أ. محمود سعد وهو بيقول الحياة دي كلها من أولها لأخرها ما تستاهلش كل اللي إحنا فيه:))) يعني كل يوم بحس كده بس بكذب إحساسي وبحاول أفتش عن أي حاجة تخليني قادرة أكمل، بس هي فعلًا ما تستاهلش كل اللي إحنا فيه ده..

"أحب الأشياء التي أكتشفها عني وأنا معك". - صالح.م

"على الإنسان أن يوقف البحث عن الضمانات لنفسه، ويروح يغرف من الحياة بملء كفَّيه، يعانق الوجود كما الحبيب حبيبته، ويتقبَّل الألم كشرط من شروط الحياة" - لماذا أخشى أن أقول لك من أنا.

☀️

((أشياء كلها موجودة ومتاحة في الدنيا. أعمل حلو = ربنا يديني حاجة (حلوة) من وجهة نظري. أعمل حلو = ربنا يديني حاجة (وحشة) من وجهة نظري. أعمل وحش = ربنا يديني حاجة (حلوة) من وجهة نظري. أعمل وحش = ربنا يديني حاجة (وحشة) من وجهة نظري. إحنا دورنا إيه في الكوكب؟ دورنا نلتزم باللي ربنا أمرنا بيه، بغض النظر عن نتايجه وتفسير نتايجه. دورنا إيه لما نغلط؟ ننشغل بالتوبة، ومحاولات الخروج من اللي إحنا فيه. الإحساس بالذنب المبالغ فيه والمرضي والانشغال الدائم بالبحث عن تفسيرات، في كثير من الأحيان بيكون معطل لينا في رحلتنا. نحاول نعمل صح. نتوب ونستغفر ونرجع عن الغلط ندور على إيه اللي وقعنا. ونرجع نحاول نعمل صح. ونعرف إنه ده شيء غير منتهي، غير بموتنا.))

كنت بقلب في الصور وقعدت أتفرج على صور الجامعة بتاعتي، وعلى أيامي، وذكرياتي وأنا مبتسمة، وأنا ممتلئة بكل اللي عشته الحلو والوحش والحلو غالب الوحش الحمد لله:) كان من ضمن مخاوفي بعد التخرج إنه أحس إني لم أعش الأشياء، وإنه أحس بالحنين القاتل اللي يخليني أتنصّل من اللحظة الحالية وأبقى عاوزة أرجَع للفترة دي من حياتي؛ علشان أعوض حاجة. بس وأنا بتفرج حسيت إني بجد عشت كل اللي أنا عاوزاه وأكتر، ومش عاوزة أرجع أغير حاجة أو أعوض حاجة، ببص للصور وأنا غرقانة امتنان الحمد لله يا رب على رزقي. يا رب اللي جاي يكون أحلى كمان وأقدر أعيشه زي ما أنا عاوزة، ويكون شبهي. 🤍

أن تُسند رأسك إلى كتفِ من تُصدّقه ويُصدّقك، فيستكين العالم في قلبك… ولو للحظات. - د. مصطفى عبده

المروءات طريق عمران العلاقات! - د. خالد فهمي رحمه الله.

🤍