بالوحي نُرَبِّي - سمر إبراهيم

أسعد الله صباحكم بكل خير 🌸 نود إعلامكم أن هذا الأسبوع إجازة و استدراك . فبادروا باستدراك ما فاتكم ، و استعينوا بالله و لا تعجزوا . وفقكم الله لكل خير 🌸

المقالة رقم 357 #لقطة "33" 📸 ابنك لما ((يتخبط)) في حاجة أو ((تضيع منه)) حاجة 📸 🍓🍓 أول ما ابنك يتخبط و يتوجع بمغص أو أي ألم، بجانب إنك هتطبطبي عليه وترقيه وتقوليله معلش وكده : ➖علميه إنه يقول الحمد لله.. ➖ هيستغرب؟.. ➖ فهميه إن ذهاب السيئات نعمة تنسينا كل ألم (ولو كان ابنك دون البلوغ: كلميه بشكل عام كمسلمين مش إن هو عنده سيئات)... لإن ذهاب السيئات بيقربنا من الجنة، حيث لا ألم.. بل إن أشقى أهل الأرض هينغمس غمسة واحدة في الجنة = يفقد بسببها ((ذاكرة الآلام))، لدرجة إنه هيقول بعدها لربنا بدهشة وذهول: "وعزتك! ما رأيتُ شقاءً قط!!".. ➖عشان كدة من السُنة عند الشدة نقول ((الحمد لله على كل حال)).. ➖ وطبعا علميه إنه لما توجعه حتة في جسمه، يحط إيده اليمين على موضع الوجع ويقول الذكر الخاص بالوجع والألم: ((بسم الله))=3 مرات، ثم ((أعوذ بعزة الله وقدرته من شر ما أجد واحاذر))=7 مرات.. 🍓🍓 كذلك لما ابنك يخسر شيئ / أو متاع دنيوي.. ➖علميه إن الخسران والإفلاس الحقيقي هو خسران الحسنات والإفلاس منها... قال رسول الله صلى الله عليه وسلم: "أتدرون ما المفلس؟" قالوا: "المفلس فينا من لا درهم له ولا متاع".. فقال: "إن المفلس من أمتي، من يأتي يوم القيامة بصلاة وصيام وزكاة، ويأتي وقد شتم هذا وقذف هذا وأكل مال هذا وسفك دم هذا و ضرب هذا، فيُعطَى هذا من حسناته، وهذا من حسناته، فإن فنيت حسناته قبل أن يَقضِي ما عليه أُخِذَ من خطاياهم، فطُرِحَت عليه، ثم طُرِحَ في النار". ➖ وعلميه يحتسب العوض عند ربنا والرغبة فيما عنده من ثواب: {...عَسَىٰ رَبُّنَا أَن يُبْدِلَنَا ((خَيْرًا مِّنْهَا)) إِنَّا إِلَىٰ رَبِّنَا ((رَاغِبُونَ))...} 🌿علموا ولادكم الرضا والاستهانة بالدنيا وأحوالها الفانية، والتطلع للآخرة الباقية... 🌿وعلموهم يرقوا أنفسهم عند الألم، ويحمدوا ربهم عليه ويرضوا بصبر جميل مافيهوش سخ وشكو وتبرم، و يلجأوا لربهم القوي المتين الولي الحميد الصمد الشافي.... 🌿وطبعا ما يضربش الأرض((النوتي naughty)) ولا يشتم الترابيزة الشريرة إللي ربنا حطها في طريقه ((أستغفر الله زي ما ناس بتقول) .. تعبنا نقول إن دا بيخدش مباشرة الركن السادس من أركان الإيمان: الرضا بالقدر خيره وشره، وبيعود ابنك على البحث دايما عن ضحية/سبب يعلق عليهم مشاكله، وبيلغي عنده منطق التفريق بين: 🍂1.إن فيه أخطاء بنبحث عن أسبابها عشان نتفاداها فيما بعد بإذن الله.. 🍂2.وإن فيه أقدار مش بنبحث عن أسبابها والا مين الغلطان وغير قابلة للتفادي إلا بالدعاء المستجاب، ولا نملك معها إلا الرضا والتسليم من غير تحميل حد أو شيء الخطأ.. #لقطات_تربوية #أسماءمحمدلبيب أمةالله-عفا الله عنها

المقالة رقم 356 #لقطة "32" 📸 ابنك والخوف 📸 🐥ابنك لو خايف من شيء معين مسببله فزع وخوف بسيط - زي مثلا خايف من الظلام/المكنسة، الترموس الكبير...الخ، خوف طفولي معتاد كدا ومش الخوف المرضي الشديد- وحاولتي تقنعيه إنها حاجة ما تخوّفش خالص، وبردو مش راضي وبيخاف: ● علميه أيوة إنه ما يخافش ويكون شجاع، لكن إديله مساحته الطبيعية في الخوف الفطري بردو بدون ما تحسسيه إنه جبان وعيل ومايص بخوفه دة وتقوليله إنت كدة مش راجل!!.. 🚩🚩 سيدنا موسى عليه السلام، النبي القوي الشديد المؤيدُ بالله، وإللي كان الرجال بيستغيثوا بيه في المواقف من كتر ما هو معروف عنه قوته ومهابته وشدته، وإللي بقوته الرهيبة بضربة إيد واحدة -وَكْزَة!- قتل راجل بالخطأ = سيدنا موسى دة كان بيخاف أحيانا وبيحتاج طمأنة...! ● خاف من أعداؤه لما هو قتل الراجل اللي تبعهم بالخطأ، فخرج من البلد وهو خايف وبيتلفت حواليه: {..فَخَرَجَ مِنْهَا ((خَائِفًا)) يَتَرَقَّبُ..}.. ● وخاف ووَلّى مدبرًا لما ربنا -عز وجل- أراه آية العصا جانب الطور: {.. فَلَمَّا رَآهَا تَهْتَزُّ كَأَنَّهَا جَانٌّ ((وَلَّىٰ مُدْبِرًا)) وَلَمْ يُعَقِّبْ..}.. وربنا -عز وجل- قال له بعد الموقف دة: {..يَا مُوسَى ((أَقْبِلْ)) وَ((لَا تَخَفْ)) ... إِنَّكَ مِنَ ((الْآمِنِينَ))...} 🚩🚩 خوف وطمأنة = ثم خوف وطمأنة = ثم في ختام التدريج على عدم الخوف = اجتاز البحر المنشق: 🌿بدون خوف🌿 ⬅️ الخوف الفطري طبيعة بشرية، لا يُذَمُّ شرعًا.. ⬅️ حتى مع اليقين في الله والاعتصام به، ممكن الإنسان يبقى خايف خوف فطري قلبي جِبِلِّي.. ⬅️ يعني الخوف الطبعي الفطري لا يتنافى مع الإيمان واليقين والاعتصام بالله، إلا لو كان خوف عبودية، بمعنى: هخالف واجبات في ديني بسبب خوفي من شيء أو شخص.. لإن كده بقى نوع من الشرك بالله المنافي لكمال التوحيد.. وساعتها 👈: {..فلا تخافوهم وخافونِ إن كنتم ((مؤمنين))...} ⬅️ فعادي إننا كبشر نخاف من أمور حوالينا، ومطلوب إننا نتمرن على تخطيها بشجاعة واحدة واحدة، بدون تعقيد نفسي.. 🐥علمي ابنك يحارب خوفه وطمّنيه بالمنطق والعقل والمعنويات والتشجيع والتذكير المستمر بقوته وقيمته ومكانته العالية: ((يَا مُوسَىٰ لَا تَخَفْ إِنِّي ((لَا يَخَافُ لَدَيَّ الْمُرْسَلُونَ))..}... {...قلنا لا تخف.. إنك ((أنت الأعلى))..}.. 🐥 بدون ما تتريقي عليه أو تحسسيه إنه جبان ومُهان بسبب خوفه دة.. 🐥 وحبة حبة = هيتعلم عدم الخوف.. بالتدريج والمواقف والصبر والحكمة... 🚫🚫أما لو حسيتي إنه بيخاف بشكل مش طبيعي، خوف شديد من حاجة معينة في دماغه -مكان أو أشخاص- وخايف يتكلم معاكي فيها حاولي تطمنيه انه يتكلم، ولو ما عرفتيش = استشيري مختص نفسي أطفال، لعل الأمر محتاج متابعة طبية.. وارقيه كتير طبعا.. لقطات_تربوية #أسماءمحمدلبيب أمةالله-عفا الله عنها

المقالة رقم 355 #لقطة "31" 📸 "لأرجمنك واهجرني" 👈 "سلامٌ عليك"! 📸 #فين_التربية_الحديثة_من_البِر_دة؟ شوفوا الحوار العجيب دا بين أب ((كافر))، وابنه ((نبي مرسل))...! ➖ قَالَ: أَرَاغِبٌ أَنتَ عَنْ آلِهَتِي يَا إِبْرَاهِيمُ.. لَئِن لَّمْ تَنتَهِ لَأَرْجُمَنَّكَ.. وَاهْجُرْنِي مَلِيًّا...!! ➖ قَالَ: سَلَامٌ عَلَيْكَ.. سَأَسْتَغْفِرُ لَكَ رَبِّي... ما أحلمك يا سيدي إبراهيم.. تستحق أن تُوهَب غلامًا حليمًا بحق! ✖️ أبوه بيأمره بالكفر وإنه يترك الإسلام. ✖️ وبيهدده لو فضل مُعرِض عن الأصنام واستمر في التعرض لها بالرفض والنقض والنقد بالكلام والفعال = إنه هيرجمه بالحجارة لحد ما يموت.. ✖️ وكمان في الآخر قال له خصام بيني وبينك طوييل -بلغة أمهات عصرنا ((خصام بيني وبينك ليوم الدين😠))!! ➖➖ويكون رد سيدنا إبراهيم عليه السلام -المُؤَيََّد من ربه بالرسالة والسلطان والقوة والتمكين- يكون رده إيه مثلا؟ -ما تقدرش..؟ -طيب وريني تقدر تعمل لي إيه....؟ -مش من حقك تلمسني أصلا......؟ -أنا حر مالكش دعوة بيا......؟ === ولا حاجة من دي رغم كل الإهانات والعقوق الأبوي دة كله.. طيب رده كان إيه....؟ 🌿 أبوه آزر بيقول له هرجمك حتى الموت: -فقال له سلامٌ عليك.. -وهطلب من ربنا يسامحك، وهو كريم وبيحبني وظني بيه إنه هيفرّح قلبي بعفوه عنك وهدايته ليك للإسلام... -وظل مخلص في الدعاء له كتير بالهداية الجالبة للمغفرة، لحد ما اتضح له بوحي الله إنه عدو لله وما فيش فايدة من الدعاء له = فتبرأ منه بعد طول صبر و بِرّ... الحليمُ الأواهُ المنيب... {..فَلَمَّا تَبَيَّنَ لَهُ أَنَّهُ عَدُوٌّ لِّلَّهِ تَبَرَّأَ مِنْهُ.. إِنَّ إِبْرَاهِيمَ لَأَوَّاهٌ حَلِيمٌ...} ❗➖ فين ((التربية الحديثة)) من البِر دة...؟ ❗➖ وفين ولادنا من التربية القرآنية دي...؟! ● علمي ابنك إنه حتى لو في يوم من الأيام لسانك فلت و زلّ وقلتي له عبارات تهديد ووعيد وقاطعتيه وخاصمتيه = إنه يتأدب بأدب الأنبياء، ويِدعي لك بدل ما يقف قصادك ويزعق و يقل أدبه ويقول لك ما تقدريش ومش من حقك وإنتي أم وحشة...إلخ ● وعلميه إن هي دي المروءة والأخلاق والإحسان الحق، والمصاحبة بالمعروف المطلوبة، والنخوة الإسلامية إللي بجد.. مش تربية الغرب الكفرة لولادهم.... {..وَإِن جَاهَدَاكَ عَلَى أَن تُشْرِكَ بِي مَا لَيْسَ لَكَ بِهِ عِلْمٌ فَلَا تُطِعْهُمَا... وَصَاحِبْهُمَا فِي الدُّنْيَا مَعْرُوفًا..}.. ●● وعلميه إن دة لمصلحته هو وميزانه هو قبل ما يكون لمصلحتك إنتي... ●● وعلميه يربي ولاده على كدة... #لقطات_بر_الوالدين #وصاحبهما_في_الدنيا_معروفا #لقطات_تربوية #أسماءمحمدلبيب أمةالله-عفا الله عنها

المقالة رقم 354 #لقطة "30" 📸 ..المَنّ والأذَى.. 📸 لما تطلبي من ابنك يعمل لك خدمة، وتلاقيه عملهالك بشكل غير اللي إنتي عاوزاه، بس إنتي لمستي منه محاولة صادقة للاتقان والاهتمام ولو قليلا يعني مش قاصد يقصر في إنه يعملها كويس.... ⬅️ بلاس ساعتها تتريقي، و تقللي من قدر مساعدته، و تقولي كلام زي: ((شكرننننن😑!! مش عاوزة حاجة منك😡! أنا غلطاااانة إني طلبت منك! أنا أستاهل😒! أنا بعد كدة هعمل حاجتي بنفسي👊! ماهو أصل الحاجة لو تهمك كنت عملتها بضمير😏!...إلخ))... ✋إوعي= د اكدة مَنّ وأذَى.. ⬅️ولما تكوني متأكدة إنه كَروِت فعلا (يعني عملها فعلا بسرعة بشكل فيه إهمال وتقصير واستهانة) عشان يخلص منك بسرعة = عاتبيه طبعا.. لكن باحترام ورحمة وحلم.. ⬅️ و يبقى غرضك من العتاب = توجيهه وتقويمه لإتقان العمل عشان يكسب حب ربنا، يعني مصلحته هو مش مصلحتك إنتي.. ⬅️ مش الغرض تقريعه وتشويهه وفش غِلك منه... ⬅️ وتكوني متأكدة فعلا👌، مش سوء ظن..... 📚مثال📚: ➖جزاك الله خيرا يا حبيبي طبعا على إللي عملته، بس عاوزة أعلمك حاجة، دي بتتعمل كدة مش كدة، أو أنا بحبها كدة، أو المرة الجاية حاول تظبطها أكتر كدة، إن الله يحب المحسنين، ويحب إذا عمل أحدكم عملا أن يتقنه.. بس كتر خيرك والله إنت شيلت من عليا جزء كبير جدا، ربنا يحبك ويجعلك من عباده إللي اختصهم بقضاء حوائج الناس وإللي قال عنهم خيركم خيركم لأهله...... وهكذا 🌿🌿ببساطة: ➖ علمي ابنك إن العفو والمغفرة والتغافل عن السوء أقرب لحسن الخلق.. ➖ وما تعلميهوش يضطر يرد بشكل فيه مَنّ وأذى على إللي قدامه عشان يدافع عن نفسه.. ➖ وماتعلميهوش يكره عمل المعروف.. ➖ و يبقى عنده وسواس دائم في إرضاء الناس وتحقيق المثالية والكمال، والمنّ دفاعًا عن نفسه.. ➖ ويبقى عنده إحباط تام من بلوغ إرضائك.. ➖ و ينقل دة كمان للي حواليه... المن والأذى دي أمور بتبطل المعروف: .....{..قَوْلٌ مَّعْرُوفٌ وَمَغْفِرَةٌ خَيْرٌ مِّن صَدَقَةٍ يَتْبَعُهَا أَذًى..}...☝️ #تحديث_من_التعليقات_عن_المَنّ = المَنّ يطلق في اللغة على عدة معان يُقَال: مَنّ إِذا أعْطى، وَمنّ إِذا قطع، وَمنّ إِذا تمدح بالعطاء.؛ قال ابن منظور في اللسان: والمَنُّ الِاعْتِدَادُ، والمَنُّ الْعَطَاءُ، والمَنُّ الْقَطْعُ، والمِنَّةُ الْعَطِيَّةُ، والمِنَّةُ الاعتدادُ...اهـ. / والمنّ والأذى مُبطلان للصدقة، ومذهبان لمعنى الإحسان؛ كما قَالَ تعالى: يَا أَيُّهَا الَّذِينَ آمَنُوا لَا تُبْطِلُوا صَدَقَاتِكُمْ بِالْمَنِّ وَالْأَذَى {البقرة:264}. // وفي المعجم: الْمَنُّ : تعداد الفضل والاحسان يَمُنُّ بِمَا أَعْطَى ، ويَعْتَدُّ بِهِ اعْتِداداً... مَنَّ الشيءَ : قطعه.. =الشرح: واحد أنا طلبت منه معروف، فلما عملهولي، بدل ما أشكره = قللت من قدر المعروف دة ومَنّيت عليه بإني حسسته إنه صفر، وهمنعه من أداء المعروف دة ليا بعد كدة لإن أسلوبي أنا في أداء الحاجة دي أفضل من أسلوبه -اعتداد- وهو مش بيشتغل حلو، فهحرمه من خدمتي الجليلة -من بالقطع- وهبعده عن دايرة امتناني لعونه ليا... إلخ === كل دا صورة من صور المن والاعتداد.. وهو أذى و مَنّ في نفس الوقت.. من الأم أولا، ثم فيما بعد الولد هيتعامل بالمن والأذى مع الآخرين لما هيعمل لهم معروف ويمن عليهم بيه دفاعا عن نفسه.. #لقطات_تربوية #أسماءمحمدلبيب أمةالله-عفاالله عنها

وجاري الاستعداد بإذن الله لبدء مساق جديد لكتابي المتواضع العيال والمذاكرة | الدفعة الثانية.. التفاصيل في نَص الإعلان والبطاقة 👇🏻  ┉┅━❀   ❀━┅ ❓ليه المذاكرة في بيوت كتير بقت معركة يومية؟ ليه الطفل الذكي ممكن يكره الكتاب؟ وليه ساعات المشكلة مش في الطفل... ولا في المنهج؟ 🤔 إيه السر اللي بيخلي بعض الأطفال يتعلموا بحب، وغيرهم يهربوا من أول صفحة؟ الإجابة ممكن تلاقيها في كتاب "العيال والمذاكرة" للكاتبة أسماء محمد لبيب. 📖 كتاب هيخليك تبص للمذاكرة بعين مختلفة، ويجاوب على أسئلة بتدور في ذهن كل أب وأم: ✔️ هل مشكلة المذاكرة تعليمية فقط أم تربوية أيضًا؟ ✔️ إزاي نتعامل مع بيئات التعليم المختلفة؟ ✔️ هل فيه خطة علمية تبدأ مع الطفل من الصغر وتستمر حتى يكبر؟ ✔️ وإزاي نربي أبناءنا على حب التعلم في ضوء القرآن والسنة، مع الاستفادة من حقائق العلم الحديث؟ لو تعبت من الصراخ، والزن، والخناقات اليومية بسبب المذاكرة... يمكن الكتاب ده يكون بداية التغيير. مش كل مشكلة مذاكرة حلها "ذاكر أكتر"... أحيانًا الحل إننا نفهم الأول. 📲📲للانضمام للدفعة الجديدة #مجانا: https://t.me/labinah_tarbeyah/545 #أسماءمحمدلبيب أمةالله-عفاالله عنها

المقالة رقم 353 #لقطة "29" الأمهات إللي بشتكي مُر الشكوى من ابنها ودايما بتقول: ((ابني ده محتاج معجزة عشان يتعدل وينصلح حاله خلاااااص😥☹😭)) : ..... بين إيديكي المعجزة يا حبيبتي بس إنتي إللي مركزة في حتة تانية.... ..."القرآن".... كلامي دة كلام علمي حقيقي والله مش مجرد وعظ مستهلك ودروشة... ✔️اتعبي مع ابنك في القرآن في الصغر = وانتي مش هتتعبي معاه في الكِبَر بإذن الله.... مانتي كدة كدة هتتعبي لإن هي دي طبيعة الحياة حبيبتي: {.. يَا أَيُّهَا الإِنْسانُ إِنَّكَ كَادِحٌ إِلَى رَبِّكَ كَدْحًا..}.. ✔️فاتعبي في الاتجاه الصح إللي يجيبلك كل حاجة من جدورها من الآخر.. وصدق من قال: ((علمي ابنك القرآن، والقرآن سيعلمه كل شيء..)). ...باقي التفاصيل: في سلسلتي: االعيال والقرآن: https://t.me/asmaa_labib/21 #لقطات_تربوية #أسماءمحمدلبيب أمةالله-عفا الله عنها

المقالة رقم 352 #لقطة "28" 📸 "في ذمة الله" 📸 🚫🚫ما تعلميش ابنك إن ((في ذمة الله)) معناها = مش هيحصل له أي حاجة تزعله أو تسوؤه أو يكرهها.. ➖ بكرة يحصل له أمر بيكرهه أو أمر يكون ظاهره إنه مشكلة أو مصيبة أو سوء، ويحصل له وهو في ذمة الله = فيتصدم.. ➖ أقرب مثال: ماهو الشيخ ياسين -رحمات الله عليه- صلى الفجر جماعة –يعني كان في ذمة الله بنص الحديث: "من صلى الصبح -وفي رواية: في جماعة- فهو في ذمة الله"، ثم استشهد بصاروخ صهيوني على باب المسجد وهو خارج.. هل الموتة بصاروخ على يد أعداء الله تتعارض مع كونه في ذمة الله ؟ ده هو نفسه لو كان هيختار لنفسه موتة = كان هيختار الشهادة في سبيل الله.... وأي خير وعافية وفضل وأمان وأي جزاء يكون مع "ذمة الله" = يكون أعظم من ذلك؟ علميه إن ((في ذمة الله)) معناها: ➖ لن يُقَدِّر الله له إلا ما فيه سعادته الحقيقية ومصلحته الحقيقية وعافيته الحقيقية والخير والأمان والضمان الحقيقي، وإن لم يستوعب عقله الخير فيهم في الظاهر.. ➖ وإنه لن يفتنه مثلا فتنة مُضلة، وما إلى ذلك.. ➖ وإنه لو مات في يومه دة فهو في حفظِ الله وأمانِه وعافيتِه... ➖ وإن واجب على المسلمين يحترموه وما يتعرضوش له بأذى أو اعتداء لإنه في ذمة الله، ولو حد اتعرّض له بأذى وهو في ذمة الله = فهو كدة بيتعرض لغضب الله لتعرُّضِه لمن أمَّنَهُ الله، و ((من عَادَى لي وليًّا فقد آذنتُه بالحرب))*البخاري #لقطات_تربوية أسماء محمد لبيب أمةالله-عفا الله عنها

المقالة رقم 351 #لقطة "27" 📸 أصل الممنوع مرغوب 📸 🐥🐥بعض الأمهات بتقول: ما ينفعش أمنع الاختلاط عن ابني وأمنعه عن صحبة السوء وأمنعه عن الأفلام والنت والمسلسلات والأغاني و...إلخ، لإن فيه قاعدة معروفة ولازم نعمل حسابها، إن ((الممنوع مرغوب))..!! كدة ابني هيعمل كل دة من ورايا..! فيعمله من قدامي أحسن وتحت رقابتي... ● أحب أقولك حبيبتي.. ((الممنوع مرغوب)) دي قاعدة بالفعل.. ➖ لكنها موجودة عشان تدفعنا لمقاومة "الممنوع" المرغوب فيه دة، في السر والعلن، وعدم الحصول عليه إلا وهو "غير ممنوع".. بالحلال يعني... ➖ ماهياش موجودة عشان تدفعنا إننا نمارس "الممنوع" دة في العلن عشان ما يبقاش "مرغوب" في السر! فنيجي إحنا بقى نخلي ولادنا يعملوا "الممنوع" بقى ويعتادوا عليه في العلن، بدل ما يضطروا يعملوه في الخفاء من ورانا والعياذ بالله...! هو الفرق بين الاتنين كدة بقى إيه...؟! = السر أو العلانية.. فقط.. لكن الخطأ المرتكَب = يظل خطأ، سواء كان سرًا أو علانيةً... ابعدي ابنك عن الفتن بشكل عام ما استطعتِ إلى ذلك سبيلا، وعن الصحبة السيئة بشكل خاص، لإن الجليس الصالح كحامل المسك، والجليس السيء كنافخ الكير.. وديننا أمرنا نختار الجليس، من باب الوقاية والعصمة والحفظ لديننا.. وأكيد ولادنا أولى بده... = كلكم راع وكلكم مسؤول.. 📌أيوة احنا مش هنحط ولادنا في بيئة معقمة، لإن البيئة كدة كدة فيها فتن، وإحنا بنربي ولادنا على تلاشيها والتوبة إذا وقعوا فيها وتقوى الله في السر والعلن و... إلخ، لكن إن أنا أحطه بنفسي في بيئة فتن وأقول له "قاوم"، وكل دة كمان وهو لسة بينمو انفعاليًا ونفسيًا وإيمانيًا ولم ينضج بعد ويبلغ أشده...؟! 📌 دة النبي ﷺ أمرنا "لا تتمنوا لقاء العدو.. واسألوا الله العافية" = عشان الثبات في الفتن شديد حتى على أقوى الأقوياء، فمين عاقل يطلبها بنفسه ويسعى لها..؟ // .....((قال المناوي في شرح الحديث: لا تتمنوا لقاء العدو، لما فيه من صورة الإعجاب، والوثوق بالقوة، وقلة الاهتمام به، وهو مخالف للاحتياط...))... 📌 وأمر ﷺ الرجال بستر العورات وغض البصر، وأمر النساء بالحجاب وستر زينتهم وغض البصر = عشان الوقاية من "الممنوع" -الفتنة- خير من علاج الوقوع فيه لا شك..! طيب هو كدة النبي ﷺ عَقَّم المجتمع مثلا؟ ➖ إطلاقا.. ➖ دي إجراءات وقائية مش هتمنع الفتن = لكن بتقلل من شدتها وعددها وانتشارها لا شك.. ((وقاية)).. ➖ مع تأكيده ﷺ دايما على الثبات والمقاومة ومجاهدة النفس عند الفتن == تكملة حديث لا تتمنوا لقاء العدو: "فإذا لقيتموه فاثبتوا". ((علاج)).. ما ((أحطش ابني ف بيئة غلط)) وأقول: فرصة يتعلم.. لكن أعلمه إزاي يقاوم ((لو اتحط في بيئة غلط)).. تفرق كتير.. عشان لما يشتد عوده ويتحط فيها "بقدر الله" فقط مش "بإيدي أنا" = يكون قادر على المقاومة والثبات.. بإذن الله.. وطبعا أنتشله من أي بيئة غلط يقع فيها، قدر الاستطاعة.. #لقطات_تربوية #أسماءمحمدلبيب أمةالله-عفا الله عنها

المقالة رقم 350 #لقطة "26" ((ابنك وعدم تنفيره من كلمة إن شاء الله)) وأنا بعمل الأكل، لقيت بلال -كان عنده 3سنين- بيقول: - ماما عاوز آكل. (جعان). - "إن شاء الله" يا بلال.. - "لأ..! أنا حاوز آكل النهاردة..! مفيس إن ساء الله!.. (الترجمة: لأ أنا عاوز آكل النهاردة، مفيش إن شاء الله!)... - !!! •••••••••••• 🐥🐥رغم كل محاولاتي إني ما أربطش في ذهن أولادي بين كلمة (إن شاء الله) وبين (التسويف والمماطلة وتعليق الأمور) = إلا إن ساعات بتفلت مني وبنسى للأسف.. ودي النتيجة الطبيعية.. خدوا بالكم.. 🔹️🔹️طيب إيه الصح...؟ نصيحتي والله أعلم، عشان ما تكرّهيش ولادك في كلمة ((إن شاء الله)) : ➖ ما تقوليهاش على حاجة عاوزة تريحي دماغك من الرد عليها دلوقتي وخلاص، ومانتيش عاوزة تكذبي عليه طبعا بأي رد ومش قادرة تناهدي وتجادلي معاه حاليا، فبتقومي قايلة له "ماشي ماشي إن شاء الله".. = بلاش تعملي ده.. ➖ وطالما قلتيها = ابذلي كل مجهودك إنك تحققيها.. ➖وقوليها على حاجة إنتي قايمة أهو تعمليها خلاص.. ➖وممكن تستبدليها بكلمة تانية أقل قدرا، لو مش عاوزة تردي دلوقتي وبردو مش عاوزة تكذبي ولا تسرفي في استعمال ((إن شاء الله))... 👈 قولي ساعتها مثلا: ((أما نشوف/ اصبر/ لو ينفع هبقى أقولك...الخ).. 🔹️🔹️طيب ليه......؟ ➖عشان ما تربطيش في أذهان ولادك، الكلمة الجليلة دي، بالتعليق والتأجيل والإحباط.. لأ تربطيها بالتحقيق والبشرى والأمل في إرادة الله.. كما قال د. سلمان العودة: ((قولوا "إن شاء اللهُ" تحقيقًا لا تعليقًا)).. #ابنك_وإن_شاء_الله #ابنك_وعدم_تنفيره_من_المشيئة_الإلهية #لقطات_تربوية #أسماءمحمدلبيب أمةالله-عفا الله عنها

المقالة رقم 349 #لقطة "25" -ماما... أنا عيانة جالي برد.. مع إننا في الصيف🤧🤒.. =ماهو عشان ما بتسمعيش الكلام وبتلبسي هدوم كتير، فبتعرقي، فبتستهوي.. -ماأنا طول عمري في الصيف كدة يا ماما🙄..! إشمعنى جالي برد دلوقتي بس🤔..؟ =عشان ما بتسمعيش الكلام... ➖➖➖➖ -ماما.. أنا شيلت القنوات إللي عندي على تليجرام عشان أبطل فرجة على الأخبار كتير يمكن الخنقة إللي عندي تروح.. =مانا ياما قلتلك تقللي فُرجة.. وإللي إنتي فيه ده بسببها، بس إنتي ما بتسمعيش الكلام.. -مانا سمعت الكلام أهو بقالي شهر، بس الخنقة لسة ما راحتش بردو🤔..؟ =أكيد فيه حاجة تانية ما سمعتيش كلامي فيها وعملتيها.. إنتي فاكرة إيه؟!.. ➖➖➖➖ -ماما.. صباع رجلي اتخبط في الترابيزة الخشب.. عااااا😭😭... =ماهو عشان ما بتسمعيش الكلام، وبتشربي كوبايتين شاي في اليوم مش كوباية واحدة.. -إيه العلاقة بقاااا🤔....!؟ =الشاي نبات معمول من الشجر، والشجر أصله خشب، فبيبقى جوة الشاي ساعات نشارة خشب، والخشب بيحن للخشب لما بيزيد في الدم، عشان كده رجلك اتخبطت في الترابيزة💁.. -👀 ➖➖➖➖ -ماما.. أنا فرحانة😍... =ماهو عشان ما بتسمعيش الكلام وبتاكلي شوكولاتة كتير... ➖➖➖➖ ✖✖إوعي تكوني من النوع دة من الأمهات يا حبيبتي. ✖✖سيبي فرصة للإيمان بالركن السادس من أركان الإيمان ينمو ويكبر بشكل سليم في قلب ابنك يا غالية ... ✔✔ فيه أخطاء وعواقب ومآلات منطقية = ننبه عليها ماشي، وما يكونش التنبيه من باب ((لو)) اللي بتفتح عمل الشيطان، لأ يكون من باب ((لو)) إللي بتعلم الواحد مسارات الفعل وعواقبه المحتلمة وما يمكن تفاديه مستقبلا بالدروس المستفادة من تتبع الأخطاء.. ✔✔ وفيه قَدَر = لا نملك أمامه إلا التسليم والإيمان به خيره وشره، ثم الحمد أو الصبر حسب هو نعمة والا نقمة.. ✔✔يعني المشكلة مش في "عشان ما بتسمعش كلامي" لوحدها. المشكلة فيها لما تكون في أمور قدرية.. ...... 🦋🦋سؤال متكرر من التعليقات: أسماء، إزاي نفرق بين إن اللي حصل من ابني دة كان قَدَر الله، وبين إنه كان تقصير منه؟ إزاي نفرق بين الاتنين وأنا بحاول أعلمه وأقوّمه بحيث مش كل حاجة اقول له ((ماهو دة حصل لك عشان ما بتسمعش الكلام😈)) ؟ 🦋🦋الإجابة: لما هكون حريصة من جوايا إن غايتي فقط هي تعليم ابني الصح من الغلط وعواقب الأمور و نتايج المسارات الغلط وعاقبة عدم الاستماع للنصح الصادق اللي في محله ، مش إن غايتي هي السيطرة عليه ووضعه في قالب محدد تبعا لتصوراتي و تحكماتي ونظرتي الشخصية للحياة وفقط =ساعتها هعرف أمسك لساني عند المواقف اللي كانت مجرد قَدَر محض هو مسيّر فيه، والمواقف اللي كانت بكامل إرادته وكان مخيّر فيها. وكله طبعا في قدر الله ولا يخرج عن المشيئة الإلهية، سوا دة أو دة .. الفكرة فقط في اللوم عند الأمور الارادية اللي الانسان كان مخير فيها ويميز الصواب من الخطأ فيها، مش الأمور اللي احنا مسيرين فيها . **أمثلة: -لما سيدنا عمر كان عاوز يخرج من البلد اللي فيها الطاعون، فواحد صحابي قال له: أتفر من قدر الله يا عمر؟ فقال عمر كما علمه النبي صلى الله عليه وسلم من قبل وثابت بالأحاديث: بل أفر من قدر الله إلى قدر الله. يعني كله كدة كدة في قدر الله ولا يحدث شيء إلا وتحت قدره وقضاؤه عز وجل ولا يعزب عنه مثقال ذرة في السموات ولا في الأرض. لكن لو سيدنا عمر مكث في البلد = غالبل هيجيله طاعون.. هل هيُلام ساعتها؟ أكيد.. لاننا من حقناشرعا نهرب من المجزوم واصحاب الأمراض المزمنة المعدية وخلافه. طب لو لم يمكث في البلد و خرج منها ثم أصيب بالطاعون إما بأثر رجعي لإنه كان خلاص حمل المرض قبل ما يلحق يتفاداه، وإما بعدوى من حد في البلد الجديدة دي مثلا = هل هنا هيُلام؟ أكيد لأ.. طب ليه؟ او إيه الفرق؟ الأولانية لم يأخذ بأسباب النجاة والتفادي لوقوع الخطر. التانية أخذ بالأسباب. والاتنين دة كدة في قدر الله زي ما قلنا. **مثال من حياتنا اليومية: -كوب ماء وقع من إيد ابنك و اتكسر ع الأرض واللي فيه اتدلق، بدون تقصير من الولد في شيء، فقط كان جنبها. فيه أمهات = بتقوم تدور على أي سبب تحمّل بيه ابنها المشكلة.. (ماهو اصل انت عديت جنبي وانا ماسكاه!) او (اصل انت ما سمعتش الكلام)! وفيه أمهات مش بتحاسب إلا على الخطأ بالفعل. يعني انه زق ايديها فوقع منها وانه يكون قاصد اصلا مش مجرد خبط غصب عنه...الخ **كثرة تبكيت الابناء على امور يختلط فيها الخطأ المختار طوعا بالخطأ الحادث دون اختيار = بيخليهم يظنوا إن القدر بإيد الأم بشكل كبير والعياذ بالله، ومع الوقت بيسلب إرادتهم الذاتية لانهم بيحسوا ان ارادتهم بتؤدي دايما لخطر وسوء. **وكثرة ادعاء الأم علم عواقب الأمور كلها سواء اللي هتكون نتيجة لأخطاء مختارة بارادتنا او اللي هتكون نتيجة لأخطاء دون اختيارنا = بيخليها كإنها عايشة في دور الإله كدة والعياذ بالله، مسيطرة على المقاليد وكدة. وصلت؟ #لقطات_تربوية #أسماءمحمدلبيب أمةالله-عفا الله عنها

المقالة رقم 348 #لقطة "24" بمناسبة انتشار فيديوهات ترويع الأطفال على سبيل الهزار: ✖️ إذا كان لما مجرد حبل بسيط أخده مجموعة من الصحابة من جنب واحد صحابي تاني كان نايم وغافل عنه، فأخدوه وأخفوه عنه عشان يخضوه و يهزروا معاه = النبي ﷺ قال لهم لا يحل ترويع المسلم...! ✖️ مابالكم بإللي يقنعوا طفل إنه اختفى بالكامل عن عيونهم، ويشوفوا نظرات الهلع على وشه ودقات قلبه تكاد تكون مسموعة، مع بكاء حقيقي لمدة مش قليلة = ويبقى موضوع انخلاع قلبه دة مضحك بالنسبالهم! مع إنه في لحظة معينة ممكن قلبه دة يقف من شدة الخضة، والهزار يقلب بجنازة..! 👈👈 فيه ناس هتقول لنا -كالعادة: بطلوا نكد دول مجرد شباب بيهزروا مع بعض! قرفتونا بقى كل حاجة لا يحل لا يحل لا يحل.....! 👈👈ودول هنقول لكم بردو -كالعادة- مش هنقدر نبطل نوصل بلدنيا كلها منهج النبي ﷺ وشريعته الأقوم، ولا هنقدر نبطل نجاهد أنفسنا ونطوّع هوانا عشان نربي ولادنا على مراد الله ورسوله، حتى لو ده يخالف أنفسنا و هوانا، أوحتى لو ده سببلكم خنقة مننا! ➖ كل واحد بيختار لنفسه هو جاي الدنيا ليه! = جاي عشان يستمتع ويبتهج بإشباع هواه حتى لو خالف رِضى رب العالمين ورسوله؟ = والا جاي عشان يخلي هواه تبعًا لما جاء به النبي ﷺ {وَنَهَى النَّفْسَ عَنِ الْهَوَى}..؟ = والحديث: "لا يؤمن أحدكم حتى يكون هواه تبعا لما جئت به". ➖ ثم لو كان مجرد فيديو واحد كنا سكتنا.. دة الموضوع قَرّب ينافس فيديوهات الأخبار في العدد والانتشار! ➖ إحنا ليه بقينا ملهوفين بالشكل ده على تلقف الخطأ بالقبول السريع؟ ولا حول ولا قوة إلا بالله... 📌علمي ابنك إنه لا يحل لمسلم أن يروع مسلما.. لا يهوّشه بلعبة جامدة هايرميها في وشه ولا طوبة ولا نبلة ولا خشبة ولا حديدة..إلخ، 👈 ولو عمل كدة = الملايكة بتفضل تلعنه لحد ما يسيب الحاجة دي من إيده وينتهي ترويعه بيها لأخوه: "من أشار إلى أخيه بحديدة فإن الملائكة تلعنه حتى يدعه"*رواه مسلم. 📌علميه ما يخبيش حاجة أخوه عشان يخضه عليها.. 📌ولا يطلع له من الضلمة ويقول له "بخخخخخ" وهو عارف ان ده بيرعبه، ولا يطفي عليه نور الأوضة والباب فجأة = وهو عارف إن أخوه بيخاف من دة.. (لكن لو أخوه بيحب ده ومش بيخوفه = ماشي خلاص). 📌ولا يحشر في دماغه خرافات مرعبة.. 📌ولا يمثل عليه حكاية مش حقيقية عشان يضحك على شدة خوفه.. 📌علميه إن ترويع المسلم ما يعتبرش لعبة، ولا هو ذنب بسيط، لأ ده فيه علماء اعتبروه ضمن ((الكبائر)) نظرًا لتشديد الوصايا النبوية عليه، (زي الإمام محمد بن عبد الوهاب وابن حجر الهيتمي).. 🌴🌴دة هدي النبيﷺ.. عضوا عليه بالنواجذ... 🌴🌴وسيبكم من إللي بيقول عليكم "دقة قديمة".. 🌴🌴إحنا فعلا دقة قديمة ونفتخر، أقدم ثلاث قرون في الأمة هي أفضلها وأخيَرها وأعدلها وأمضاها على الاستقامة.. 🌴🌴فاللهم اجعنا على خطاهم، ولا تفتنا بزمان الغربة الذي نعيشه.. #لقطات_تربوية #أسماءمحمدلبيب أمةالله-عفاالله عنها

المقالة رقم 347 #لقطة "23" ✔️عادي جدا إن ابنك يحاول يقنعك إنه عنده معلومة مش عندك، خصوصا في زماننا دة.. عادي جدا إن بنتك تعمل صينية كيكة مقاديرها مظبوطة أكتر من بتاعتك.. ما تاخديش الأمور دي على أعصابك.. دة أمر طبيعي.. 👈 {يَا أَبَتِ إِنِّي قَدْ جَاءَنِي مِنَ الْعِلْمِ مَا لَمْ يَأْتِكَ}.. الجملة دي إحنا متعودين انها تتقال فقط مننا إحنا كآباء وأمهات لولادنا.. وبننفعل جدًا ونحس بإهانة منهم وإنهم تجاوزوا الأدب، لما يحسسونا إن فيه معلومة عندهم ممكن تكون مش عندنا : ((إنت هتعرف أكتر مني يا ولد!!))... ((إزاي أبين لها إنها أنصح مني!! أنا بردو أمها!)).. 👈 الانفعال و رد الفعل ده أنا بصنفه ضمن 🔹"الكِبر التربوي"🔹.. 👈وده بينفّر القلوب الغَضَّة النقية جدا دي، و بيضاعف عِنادها وإعراضها عن الحق اللي بيبقى نفسنا نوصله ليهم بدورنا إحنا كمان.. 👈 في الحديث ((الكبرُ: بطرُ الحق، وغمطُ الناس))، يعني رفض الحق وعدم التواضع له، واحتقار الناس. ✔️ يبقى #الصح: اسمعي منه قبل ما تحكمي عليه.. ✔️ ولو فعلا أول مرة تعرفي إللي هيقولهولك زي ما بيحاول يقنعك = اضربي مثال في التواضع للحق ساعتها وقوليله "ماشاء الله عليك! أنا بتعلم منك.. إنت ولد ممتاز وذكي".. 🔹أهم حاجة تكوني حريصة إنه يفهم إنك مؤمنة بالمبدأ دة أولا وأخيرا لإن ربنا أورده في القرآن.. 🔹لكن في نفس الوقت ابنك يكون فاهم إن الأدب وهو بيكلمك في دة لا غِنى عنه، زي ما سيدنا إبراهيم كان بيكلم أبوه ((الكافر!)) وبيحاول يقنعه إنه أعلم منه في حتة معينة بس بـ ((أدب)) ➖ وقمة الأدب ده إنه ما قالوش: ((أنا بفهم أحسن منك يا ماما / والا أنا أعلم منك يا بابا / والا إنت دَقَّة قديمة يا بابا وعايش في الكهف..إلخ))... لا.. ➖ إنما قال له: ((فيه علم معين جه عندي (يا أبتِ) ولسة ما جاش عندك)).. 👈 كإنه بيحسسه إن العلم زي قَطر معَدِّي عند الناس كلها، و كل واحد بياخد حتة غير التاني. 🌹🌹القرآن منهج مش مجرد ترانيم.. أكيد إنتوا مقتنعين إننا لو مشينا عليه في كل حاجة هنلاقي السعادة وراحة البال والصفاء والسلام الاجتماعي والأسري والنفسي والقلبي والتربوي.. هي التربية إيه غير قرآن وسنة...؟ #لقطات_تربوية أسماء محمد لبيب أمةالله-عفا الله عنها

المقالة رقم 346 #لقطة 22 دعوة من قلبي لكل أم بتقبل من ابنها عند الخطأ كلمة آسف ومش بتصده.. دعوة من قلبي لكل أم علمت ولادها إن فرق من الفروق الكبيرة جدا بين آدم وإبليس: (((( اعتذار )))) لما يقول آسف اقبليها.. بلاش إذلال.. دة لسة طفل بيتعلم ويتمرن.. مهما كررها وكرر نفس الخطأ = سامحي ووسعي صدرك لهفواته.. بلاش تيئسيه من عفوك وتقنطيه من رحمتك.. .. "فاغفر لي = فغفر له".. كل ما يغلط إديله أمل إن ((معلش إنت لسة بتتعلم و أنا عارفة إنك مش قصدك تكون وحش، وكلنا بنغلط وخير الخطائين التوابون، ركز انت بس على نفسك وشيطانك وإنك المرة الجاية تكون أقوى وأحسن، و ادعي لنفسك و ادعيلي معاك يا ابني يا حبيبي)).. #لقطات_تربوية أسماء محمد لبيب أمةالله-عفا الله عنها

المقالة رقم 345 لقطة "21" [[والصبيُّ وإن لَم يَكن مُكلَّفًا، فوليُّه مُكلَّف.. لا يَحِل له تَمكينُه من المُحرَّم؛ فإنه يَعتاده، ويَعسُر فِطامه عَنه]]*ابن القيم.. ● الصبي؟ = من سن الإدراك ولو بأبسط علاماته = لحد قبل البلوغ---الدليل: {((كيف نكلم من كان في المهد ((صَبِيًّا))}.. #تربية_السلف_لمن_يهمه_الأمر. بيؤيد الكلام دة حوادث من السنة طبعا، أشهرها: ⛔لما الحسين رضي الله عنه وهو 7 سنين أكل من تمر الصدقات النبي صلى الله عليه وسلم دخل صباعه الشريف في بؤه وخرجها بكل اللعاب إللي حواليها، وزجره ولامه وقال له: كِخ كِخ! أما علمت أنا لا نأكل الصدقة. ❓ولادك بيساوموكي على الحاجة الغلط شرعًا؟ ومش مقتنعين بكل الأدلة إللي جبتيهالهم لتحريمها، وبيقولولك خلينا نشوفها أو نعملها قدامك بدل ما نشوفها من وراكي...؟ وبيفضلوا يزنوا على دماغك وإنتي مالكيش طولة بال ع المناهدة والغولب دة ، فبتخافي من تهديدهم لا يشوفوها من وراكي فبتستسلمي لرغبتهم وتوفريهالهم..؟ ●● عاوزاكي تحطي في بالك قاعدة تتكلمي بيها مع ولادك لو دة بيحصل: قولًا واحدا، هتقوليلهم بكل ثقة: 🚦 لا لا إطلاقا خالص نهائي، إنتوا كدة مش بتهددوني أنا إطلاقا، إنتوا بتهددوا نفسكم .. لما إنت مثلا تقول لي ارميني في النار بدل ما أرمي نفسي من وراكي، يبقى كدة انت بتهدد مين؟ "كل إمرءٍ بما كسب رهين" يا حبايبي. 🚦أنا إللي عليا وإللي ها اتسئل عنه = هو الفلوس والتسهيلات إللي سهّلت ليكم بيها أي شيء حرام أو فيه مخالفات شرعية مهما قل شأنها وأيًّا كان المبرر.. وبقدر حجمها = هشيل في صحيفتي.. فبالتالي الحاجة إللي فيها أقل شبهة حرام وحكمها ثابت عندي قطعًا بدليل صحيح شرعًا = ليا كامل الحق إني أصون صحيفتي عنها لإن محدش في الدنيا دي كلها _حتى أمي وأبويا ربنا يرضى عنهم- يستاهل إني أديله ولو ذرة من حسناتي أو آخد نقطة من سيئاته لإن كل الناس -حتى إنتوا وأمي وأبويا- هيهربوا مني يوم القيامة ومحدش هينفعني يوميها إلا "التقوى" بإذن الله.. ومش هشيل ذنب لو منعتكم عن أي شيء غلط حتى لو المنع دة خلاكم تشوفوا الغلط دة أو تعملوه من ورايا. 🚦وإنتوا إللي عليكم وإللي ها تتسئلوا عنه = إنكم تمتنعوا عن كل ما هو معلوم بالضرورة شرعا إنه حرام وتتقوا الله في السر والعلن -بالذات في السر- وتحفظوا حدود الله والعهد بالغيب، لإن دة مقياس لإيمانكم بالله "والحافظون لحدود الله وبشر المؤمنين".. 🚦فا تشوفوا الغلط والحرام من ورايا أو من قدامي، أو ما تشوفوهوش === دة مباشرةً بيصب في صحائفكم إنتوا مش صحيفتي أنا طالما ربنا شاهد إني مانعاه ومش ميسراه لكم وبقول إن هذا منكر لا يُرضي الله ومش هكون طرف فيه.. 🚦وطول ما انتوا في مسؤوليتي وتحت رعايتي وقوامتي المالية والتربوية وكل شيء = هو دة النظام المتبع. ولما بقى تشتغلوا وتجيبوا فلوس تخصكم بذمة مالية خاصة بيكم وتصبحوا مكلفين ومسؤولين عن كل أفعالكم أمام الله = ابقوا هاتوا بيها إللي تقدروا تشيلوه في صحيفتكم براحتكم خالص ساعتها.. 👈👈"فمن يعمل مثقال ذرة خيرًا يره.. ومن يعمل مثقال ذرة شرًا يره".. 👈👈"فمن أبصر فلنفسه.. ومن عمي فعليها.. وما أنا عليكم بحفيظ..".. 🔹🔹🔹🔹🔹 💡💡في الحوار المتكرر ده، ولحد ما الأمر يستتب بعون الله مع الوقت وتختفي الظاهرة دي تماما من بيتكم خلال فترة بسيطة إن شاء الله، هتحتاجي: 🔍1-إنك تستعيني بالله على المناهدة والجدال والزن والصبر.. فلا حول ولا قوة لنا جميعا إلا به عز وجل.. فأكثري من الحوقلة والصلاة على النبي ﷺ والاستغفار.. 🔍2-تكون علاقتكم حلوة، مبنية على أساس من الحب والثقة والاحترام والتقدير.. 🔍3-تكوني مربياهم أصلا على العقيدة –ربوبية وألوهية وأسماء وصفات- وأركان الإيمان الستة = لإن دول المفاتيح إللي بتأسس التقوى والمراقبة ومعرفة قدر الله وقدر الآخرة وحقيقة الدنيا والعبودية و...إلخ، زي ما هنفصل في مقالات العقيدة بإذن الله.. 🔍4-تقابلي قوتهم في الزن = بقوة مضادة، مساوية لها في القوة ومضادة لها في الاتجاه، اسمها الزن بردو🤖 .. لا َيِفلّ الزن إلا زن مثله... بس زن الحق يفرق عن زن الباطل.. اثبتي 🔍5-تكوني جاهزة بدليل صحيح شرعا لما تكوني ناوية تحرَّمي أو تمنعي شيء، عشان تعلميهم إننا مش بنتكلم بالهوى وتأسّسيهم على عقيدة مهمة جدا ألا وهي إن مصادر أفعالنا بناخدها من مصادر التشريع الرئيسية وعلى رأسها: القرآن والسنة. 🔍6-تاخدي الموضوع بهزار غالبا وفي نفس الوقت بحب وحسم وثبات على المبدأ، وتكوني قدوة فيه قبل أي حد.. كما بدأنا بابن القيم نختم به.. قال: [[من رحمة الأب بولده أن يُكرِهَهُ علي التأدُّبِ بالعلمِ والعمل..فإن أهملَ ولدَهُ كان لقِلةِ رحمتِه بِه، وإن ظن أنه يرحمُه و يرفهُه ويرِيحُه = فهذهِ رحمةٌ مقرونةٌ بجهلٍ]].. ●● اصبري على المنهج دة وصابري ورابطي واتقي الله، وأنا بببشرك: ...هيلينوا ف إيدك بعون الله... #لقطات_تربوية أسماء محمد لبيب أمةالله-عفا الله عنها

المقالة رقم 344 لقطة "20" أم من معارفنا بتشتكيلي مر الشكوى من إن ابنها عنيد. زرناهم في بيتهم وقعدت أنا مع ابنها ف أول زيارة. الولد عسل ربنا يحفظه ومندمج جدا مع ولادي ومش باين عليه أي اعوجاج سلوك. قلتلها: -ماهو فلة آهو ماشاء الله عليه جايباني ليه أحوش بينكم؟ قالت لي: -هو آه فلة بس اختلفي معاه بقى في الرأي هتشوفي الفلة اللي على أصله.. ● أنا طبعا سكت لاعتبارات كتير كانت تمنعني ساعتها... وكان نفسي أقول لها: "ذاك الشبل من ذاك الأسد حبيبتي بكل أسف.. وابنك اكتسب العند ورفض الخلاف في الرأي معاه = منك بكل أسف".. ● إوعي تيجي تشتكيلي من عيب في ولادك وانتي شخصيا يا كبيرة يا عاقلة يا ذات الإرادة = بتعمليه و مش قادرة تبطليه وعاذرة نفسك بالقدرة والوسع وموقفة مجاهدة لنفسك في تزكية نفسك فيه... زي مانتي عاذرة نفسك... للأسف هو كمان عاذر نفسه.. فاعذريه هو كمان بقى! ● وقيسي على كدة بقى: غضبك، كذبك، شتيمتك، غيبتك، كروتك للصلاة، احتقارك للناس، شكوتك المستمرة، نكرانك للجميل، فجورك في الخصومة، ضعف شخصيتك، كسلك، إهمالك لمسؤولياتك، تدخينك، جزعك عند المصيبة، طولة لسانك....الخ 🍃...وبالمثل: أي خصلة طيبة....🍃 🌴قبل ما تشتكي من ولادك، فتشي الأول في مرايتك السلوكية.. وأول ما تلاقي فيها نفس الشكوى عن نفسك، وتحسي بالذنب وإنك غلط وانك عاوزة تنقذي بنتك، يبقى مبروك حطيتي إيدك على بداية طريق التقويم الفعّال: القدوة...🍃 والله عز وجل لا يغير ما بقوم حتى يغيروا ما بأنفسهم... ● إحنا كأمهات مسلمة نفسها تربي أجيال النصر، مافيش حاجة عندنا اسمها أنا بس اللي أشتم أو أنا بس إللي أزعق أو أنا بس اللي أدخن أو أنا بس اللي ألطم عند المصيبة....إلخ 🍃...القدوة من أهم صور التربية القرآنية على مر الأمم....🍃 {لقد كان لكم فيهم ((أسوة حسنة)) لمن كان يرجو الله واليوم الآخر}.. ✔️✔️ آه معاكي إن فيه حاجات الطبع فيها بيغلب التطبع والمجاهدة في التزكية، ولا يكلف الله نفسا إلا وسعها، لكن بيبان للطفل إنك بتحاولي تتغيري للأفضل، عن طريق: 🔹1-الحوار واستنكارك للفعل بدون مراوغة ولا محاولات لتبرير أو تجميل ذاتك، 🔹2-و من خلال كمان إبرامك لاتفاق معاه إنه يساعدك وتساعديه في التغيير للأفضل من باب التعاون على البر والتواصي بالحق والصبر والتناصح والصحبة الصالحة والتزكية...إلخ، 🔹3*وإنه يشوفك فعلا بتجاهدي نفسك عند مواضع الاختبار، وبتنجحي، ولو أحيانا.. ودة في حد ذاته بيقدمله أعظم قدوة في التزكية والمجاهدة والتواضع.. ✔️✔️ و آه فيه حاجات للكبار وحاجات للصغار، لكن بتكون منطقية وبيتقبلها الطفل بالحوار والفطرة والدليل من المنهج النبوي أو من منطق الحياة عموما.. زي سهرك بالليل وهو لأ، زي سواقتك للعربية وهو لأ...الخ.. ...لكن غير كدة: فإن التربية = قدوة.. والقدوة = بتحتاج محاسبة وتزكية وتواضع للحق.. ودول محتاجين = علم وصبر.. علم الأخلاق وعلم الإيمان.. 🍃... وإنما العلم بالتعلم... وإنما الحلم بالتحلم.. والله المستعان... #لقطات_تربوية أسماء محمد لبيب أمة الله-عفا الله عنها

المقالة رقم 343 لقطة "19" #انحراف_مين_فيهم؟ .. #الأهل_والا_الطفل؟ ☝️من أول صف في ابتدائي، ماتدخليش ولادك مدارس الفصول فيها مختلطة، حتى لو إسلامية وهتحفظهم قرآن!.. ☝️ولو قادرة من أول حضانة مفيش اختلاط في الفصول= يبقى أفضل طبعا، لإن جيلهم غير جيلنا خاااالص بكل أسف.. دخلي ابنك مدرسة فيها فصل بين الولاد والبنات في الفصول والفسحة والرحلات والأنشطة وووالخ (دول مكان ودول مكان). أنا مش عارفة إمتى هنفوق و نبطل نحط ولادنا الصبيان مع بنات في فصل واحد من ابتدائي لثانوي! و تعدي عليهم مرحلة المراهقة و نتعجب ونشد شعرنا إن ولادنا انحرفوا قبل البلوغ ! والله ما ((انحرفوا)) ! بالعكس حبيبتي هما لَبُّوا نداء الفطرة الطبيعي..!! الأهل هما اللي انحرفوا عن الأصل للأسف عشان عاوزين يحطوا النار جنب البنزين و مصممين ان النار مش هاتولع، اهو بالعافية كدة!! هو دة الانحراف الفطري والله.. ☝️والله لو حَفّظتي ابنك القرآن كله وقعدتيه في مدرسة مختلطة = ما تلوميش إلا نفسك لو زاغ قلبه وضل بعد ما كان حامل للقرآن جميل ومؤدب..! قرآن إيه اللي بتحفظيهوله وانتي مقعداه جنب الفتنة ليل نهار يا حبيبتي بس...؟ لحد امتى الشيزوفرينيا التربوية اللي إحنا فيها دي.. شكاوى كتير كدة بتجيلي ببقى هتجنن! ✖️أم بتشتكي إن ابنها كل يوم والتاني يرجع لها بجوابات غرامية من بنات معاه ف الفصل، وتناقشه تلاقيه مصاحب دي و"مفركش" مع دي و "منفض" لدي!! -((دي ألفاظه هو!!)) ✖️و أم بتشتكي ان بنتها عينها زاغت على زميلها في الفصل، وقفشتها في مكالمة مخجلة معاه.. ولما واجهتها، البنت مش حسة بندم ، "دة حب بريء يا مامي"!! والأم باعتالي منهارة مش عارفة تعمل ايه معاها لانها بتوديها المدرسة لسة -إللي فيها الولد دة أيوة!!- وقلقانة عليها طبعا... معقولة مش عارفة تعمل ايه......؟؟ ●● دي لو بنتي، والله أقعّدها في البيت لو مش لاقية لها مدرسة محترمة من غير اختلاط.. تعليم إيه ومستقبل فاضي ايه دة اللي أضيع بسببه مستقبلنا اللي بجد إحنا الاتنين -أنا وبنتي أو ابني: الآخرة!! ⬅خرجي بنتك/ابنك من مدرسته اللي فصولها مختلطة، ودخليهم فصول بلا اختلاط.. ⬅بلاش مسخرة وتفلُّت من ديننا لهثًا وراء منظومة تعليمية فاشلة أصلا يا أمي.. ⬅مش هتتسئلي عن درجات ابنك واسم مدرسته ومستواه الدراسي.. ⬅لكن هتتسئلي عن البيئة اللي إنتي موفراها لابنك عشان تساعديه ينشأ في طاعة الله، بعيد عن الفتن والجليس السيء قدر المستطاع.. ⬅مطلوب تحصني ابنك بالدين والعقيدة كويس، و في نفس الوقت تنتقي بعناية المحيط الملازم له و تحت سيطرتك وقدرتك.. ⬅خلي المدرسة شبه البيت ف الأساسيات -دين واخلاق- على أد ما تقدري لإن معظم عمر ولادكم بيقضوه هناك.. ⬅ارحموا قلوب عيالكم ونقاء فطرتهم وقللوا الفتن من عليهم، كفاية الفتن اللي بيشوفوها بالغصب في الشوارع من البيت للمدرسة ومن المدرسة للبيت.. ⬅ما تحطيش ابنك وسط بنات وتقولي دة لسة طفل بريء، وترجعي تعيطي وتتصدمي إنه ما طلعش بريء..! إنتي إللي كسرتي براءته 🌴🌴وعشان أشجعك وما تتخيليش إني بكلمك وإيدي في المية الباردة: ⬅أنا ولادي -نتيجة لظروف الغربة- مالقيناش مدرسة هنا تطمني على دينهم وأخلاقهم والقرآن إللي في قلوبهم، زي ما كنت مطمنة عليهم في مدرستهم في مصر، جربنا تيرم واحد فقط لعل وعسى لكن اتصدمنا من مستوى الأخلاق والدين، قمنا قعدناهم في البيت مضطرين، وعوضنا المدرسة بدروس للمواد الصعبة وبنذاكر الباقي سوا وبننزلهم ع الامتحانات.. ⬅صعب؟؟؟---أيوة جدا، وبعاني ووقتي بقى ضيق بسبب دة، لكن مفروض إن دول مشروع الآخرة حبيبتي، أولى الأمور بوقتي يعني أصلا.. يستاهلوا عناية وصبر وصيانة... ⬅دة كدة وهما صبيان أصلا وكل قلقي من سوء الأخلاق مش الاختلاط، ما بالك بنتك بقى الجوهرة المصونة..؟ مش هاتقلقي عليها إزاي حبيبتي في مدرسة مختلطة و جوّها كله فتنة..؟؟!! ●● الحقي غيّري الواقع المُهلك دة بصدق وإخلاص وتجرد للآخرة فقط، وربك هيعينك.. "إلا الذين تابوا من بعد ذلك وأصلحوا فإن الله غفور رحيم"... والله المستعان #لقطات_تربوية أسماء محمد لبيب أمةالله-عفا الله عنها

المقالة رقم 342 لقطة "18" ⬅ أي قسوة أو حرمان أو ألم اتعرضتيله في بيت أهلك الكرام -عفا الله عنهم وعنا- ركزي واجتهدي إنك تجنبيه لولادك.. وكلنا ذوو خطأ، غفر الله لنا جميعا.. ⬅وكذلك أي فضيلة أو قيمة محفورة في ذكرياتك عنهم ولا تُنسى، اتعلمتيها في بيتهم الكريم -جزاهم الله الجنة- ركزي و اجتهدي جدا إنك تعلميها لولادك، وتُذكُري أهلك بالخير ساعتها قدام ولادك وتدعيلهم بصدق، سواء كانوا أحياء أو أموات. ● في المشاعر والعطاء والعلاقات، انسي تماما القاعدة المشهورة: "فاقد الشيء لا يعطيه".. القاعدة دي خاصة بالعلم فقط أو المال مثلا.. فاقد العلم/المال = لا يعطيه.. لكن مش خاصة بالمشاعر والمعاملات.. ● وافتكري فقط القاعدة الإسلامية الأصيلة والمضمونة "قد أفلح من زكاها".. ● #فاقد_الشيء أحيانا بيكون هو أقدر الناس على إعطائه، لإنه أكثر الناس معرفة بقدر الشيء دة وبقيمته و بأثر الحرمان منه.. #هذا_فقط إن كان القلب سليما، لم يفسد بنبض الثأر، ولم تُقَسِّيه القسوة، ولم تحرقه شهوة الحقد والانتقام؛ ونفسه يقدم أجيال مسلمة قويمة بقى وخالية من التشوهات النفسية والإعاقات الروحية... .. سلامٌ على كل ابنةٍ رحمت أبناءها من أي ابتلاء تربوي كانت تعانيه، وجبرت نقص والديها ونفسها بإصلاح حال أبنائها فيه، وأوقفت مسلسل التشوهات والعقد النفسية عندها.. 🍃.....سلامٌ على كل روح مُتعَبة، وتأبى إلا الإحسان.....🍃 #التربية_أخلاق_أولا #قد_أفلح_من_زكاها #والبر_لا_يبلى #لقطات_تربوية أسماء محمد لبيب أمةالله-عفا الله عنها

المقالة رقم 341 #لقطة "17" [[يارب يا ابني يا تاعب قلبي 😡😡، يارب كل المتاعب والصعاب والمشاكل والعناد والتعنت اللي وريتهولي أشكال وألوان في تربيتك 😣😢، وكل القلق اللي أنا عيشت فيه بسببك😠😠، وكل الجدال والمماطلة والمراوغة والمشاغبة اللي وريتهملي في تربيتك، ونتعة القلب وحرقة الدم وفرمة الأعصاب وكسرة الخاطر وكل عمايلك دي فيا 😭😡😡 ياااااااا رب . . . . . . . . . . . . . . ياااااااارب ما تشوفهوش في ولادك يابني يا ضنايا... يااارب... اهديهم يا رب واهديلهم ولادهم وولاد ولادهم، فكل أملنا إن حال الأمة ينصلح بيهم وذريتهم..]] ☝️الدعاء عليهم = دعاء على الأمة الإسلامية إن عدد الفشلة والضالين والتائهين فيها يزيد.. خدي بالك.. ☝️مش هنستفيد حاجة لما ندعي عليهم إنهم يشوفوا اللي شوفناه معاهم في تربيتهم، ولا مفروض نفرح بدة ☝️الأمومة والأبوة الحقيقيين مافيهمش تشفّي ولا ثأر للذات ولا فشّ غل.. لأ، إطلاقا...✋ ☝️بل فيهم إخلاص لله عز وجل وحمل هَم الأمة، و عين ساهرة على ترميم كسرها بإصلاح أبنائها، مهما كان المشوار صعب، ومهما كانت مشاكلهم مرهقة ومتعبة وخانقة أحيانا كتير.. لكن الثمرة تستحق.. أنالَ اللهُ قلوبَنا ما تتمناه في ذريتنا، من صلاح حال في الدنيا، ومآل في الآخرة. ..... {وَأَصْلِحْ لِي فِي ذُرِّيَّتِي}..... #ماتدعوش_على_ولادكم_مهما_حصل #دعائك_عليهم_دعاء_على_أمة_الإسلام #الأمة_مش_ناقصة #لقطات_تربوية أسماء محمد لبيب أمةالله-أصلحَ لها في ذريتها