شوية ضو

صلِّ على النبي ﷺ... حتى ينتهي الوقت. فما يدريك؟ لعلَّ همًّا يُفرَّج، أو ذنبًا يُغفَر، أو كربةً تُكشف، أو أمرًا تنتظره يُقضى قبل أن تنتهي. اللهم صلِّ وسلم وبارك على نبينا محمد، عدد ما ذكره الذاكرون، وغفل عن ذكره الغافلون. #غيث

علابالكم بلي أبو لهب كان قادر يحاول يكذب القرآن بإعلان إسلامه، بصح مدارهاش؟ كامل نعرفوا سورة المسد، لي نزلت وأخبرت أن أبا لهب حيموت على الكفر ويدخل جهنم.. بعد ما نزلت السورة عاش أبو لهب سنين وسنين، وكان قادر يحاول يعلن إسلامه ويكذب ما جاء به النبي ﷺ، يا لوكان نفاق.. ولهذا يقولوا الناس كيفاش الآيات لي نزلوا على محمد تقول أبو لهب يصلى نار جهنم ﴿سَيَصْلَىٰ نَارًا ذَاتَ لَهَبٍ﴾، وهو دخل للإسلام، ويصرا مشكل كبير بهذا التناقض ويكذبوا الإسلام؟ لكن كل هذا ما صراش، وأبو لهب مات على الكفر تمامًا، كما أخبرت سورة المسد، فلو كان القرآن تأليفًا من سيدنا محمد ﷺ، كان أبو لهب يقدر يكذب القرآن. وهنا يظهر الإعجاز القرآني، سبحان الله شكون يقدر يخبرنا بمستقبل إنسان وواش حيختار في مستقبله من غير ربي سبحانه؟ سبحان الله، كلما تدبرنا الآيات ازددنا يقينًا أنها من عند الله، لا من عند البشر. #إكرامات

زوجوه يستعقل! راكم متخيلين الزَّواج كمنظومة كاملة، وكشراكة في الحياة، وكعشرة عمر قادرة تمتد لسنوات، يجي دون تخطيط، ودون وعي، ودون توافق، ودون نضج، فقط لأنو لحق وقت الزَّواج ولازم نتزوجوا وفقط! خصنا نعرفوا باللِّي الزَّواج مهوش مصلحة إعادة تأهيل، ولا مصلحة تربية ثانية، ولا مصحة نفسية! عيوبك اللِّي والديك والقراب ليك ما همش حاملينهم، بدل ما أنك توقف عندهم وتراجع نفسك وتحاول تحسّن من روحك، تروح نتا تجيب بنادم وديروا شريك حياة وتطلقهم كامل عليه، وتقلو اِستحمل بحجَّة الميثاق الغليظ؟ بما أنكم عارفينه ميثاق غليظ، عاملوه على هاذ الأساس من قبل الشُّروع فيه أصلا! ماشي حتن يوقع الفاس في الرَّاس، ومنبعد توليوا تحاولوا ترقعوا وكيما ديروا ما تصدقلكمش! والكلام راه موجه لكلا الجنسين، ماشي بمعنى كي نقول زوجوه راني نهدر على الرّجل فقط، الكلام موجّه للنّساء أيضا، لأنو الاِثنين يهمهم الموضوع ويعنيهم. الزَّواج للمستقرِّين، وليس للاِستقرار! #سام

"إن العين لتدمع، وإن القلب ليحزن، وإنا بفراقك يا إبراهيم لمحزونون، ولا نقول إلا ما يرضي ربنا إنا لله وإنا إليه راجعون." في السنة الثامنة للهجرة ولد إبراهيم ابن محمد ﷺ، بعد ما فقد كل أولاده من قبل، إبراهيم أمه السيدة مارية القبطية نور شيخوخة النبي ﷺ وسماه إبراهيم على خليل الله ابراهيم عليه السلام، وكان ﷺ يحمله بين يديه، يقبله ويشم ريحته بكل حنان. إبراهيم كانت مرضعته أم بردة بنت المنذر في عوالي المدينة، والنبي ﷺ كان يقطع دايما هاديك المسافة باش يروح يشوف ولده ويحمله بين ذراعيه ويضمه إلى صدره، لأنه كان متعلق به تعلق كبير. بصح كي لحق إبراهيم ثمانية عشر شهر مرض، مرض شديد، حزن النبي ﷺ وكان يقعد عندو بزاف يدعيلو بالشفاء حتى جاء اليوم لي دخل عليه وهو في سكرات الموت، يشوف قطعة من قلبه قدام عينيه وهي تفارق الحياة حمله في حضنه، وبكى عليه بكاء شديد. حتى الصحابة تأثروا لأنهم ما شافوش الرسول ﷺ لي دايما يوصيهم بالصبر يبكي بهاديك الحرقة من قبل فقالوا وأنت يا رسول الله كان في بالهم أنو الأنبياء لازم ما يبكوش، فرد النبي صلى الله عليه وسلم وقال: إنها رحمة، وقال كلمات خرجت من قلب أب مكسور لكنه راضٍ بقضاء ربه: "إن العين لتدمع، وإن القلب ليحزن، وإنا بفراقك يا إبراهيم لمحزونون، ولا نقول إلا ما يرضي ربنا إنا لله وإنا إليه راجعون" وصلى عليه النبي ﷺ مع الصحابة، والدموع ما فارقتش عيونهم وبعدها مشاو بيه إلى مقبرة البقيع، ونزل النبي ﷺ بنفسه إلى القبر باش يوسد ولده، ورمى عليه التراب بيديه، ولما شاف فرجة بين اللبنات يعني فتحة بين الطوب، أمر بإصلاحها. وفي نفس ذلك اليوم، كسفت الشمس، فالناس ظنوا أنها كسفت حزنا على وفاة إبراهيم، لكن النبي ﷺ خطب بين الناس وقال: "إن الشمس والقمر آيتان من آيات الله، لا ينخسفان لموت أحد ولا لحياته." و بشر ﷺ كل أب وأم فقدوا طفلهم، وقال: "إن له مرضعًا في الجنة تتم رضاعه." وكانت هذي البشرى أعظم عزاء، بأن الفراق ما هو إلا إلى حين، وأن اللقاء الحقيقي يكون في الجنة بإذن الله. فاللهم اجمعنا بمن نحب في جنة النعيم. #طيف

يقول الله عز وجل في سورة القيامة ﴿أَيَحْسَبُ الْإِنسَانُ أَن يُتْرَكَ سُدًى (36)﴾ يعني أن يُتركَ الإنسان يفعل ما يُريد بلا ضوابط وأوامر شرعية مثلا: مرات نقولو إنسان راحت حياتو سُدى... يعني ضاعت حياتو هكاك بلا فايدة... في وقت مضى كان العرب كي تكبر الناقة فالعمر وتولي ما فيهاش الحليب وما تولدش ويولي لحمها ما يتكلش (يعني تولي ما فيها حتى فايدة) يدوها للصحراء ويربطوها رباط غير محكم ويخليوها... من وراها الناقة تفك الرباط تاعها وتبقى هايمة فالصحراء... حتى آخر عمرها... في هذاك الوقت العرب كانو يسموها "السُدَى" #من_آية

الوالدين اللِّي كانوا في يوم ما هوما السَّند تاعنا، ومصدر الأمان، كبروا اليوم وولاوا بحاجة لينا نكونوا ليهم سند، ونعطفوا عليهم، ونقدروا ظروف الكبر! ولاو يسقسيو أسئلة بسيطة، ويحكيولنا حكايات حكاوهالنا من قبل، ويهدروا قليل، ويخدموا قليل، ويدبروا قليل، وجهدهم يشوفونا وحنا نكبروا ونعيشوا حياتنا! المشكل أنو بزاف منا ميفهموش هاذ الاِنقلاب الطَّبيعي في الأدوار، وتبانلهم باللِّي والديهم ولاو مزعجين بطريقة ما؟ بصح في الحقيقة، الشِّي اللِّي قاعد يصرا، راهو تأثير الزَّمن على الإنسان بأكثر صورة طبيعية، وحتمية الكبر! ما هوش الوقت باش نصححوهم، ولا باش نحاولوا نغيروهم! راهو الوقت باه نرافقوهم في هاذ المرحلة الحسَّاسة _لينا وليهم_ ونحتويهم كيما راهم، ونتقبّلوا دورنا الجديد، وكيما حملونا وحنا صغار، نحملوهم وهوما كبار! "وَاخفِض لَهُمَا جَناحَ الذُّلِّ مِنَ الرَّحمَةِ وَقُلْ رَبِّ اِرحَمهُمَا كَمَا رَبَّيانِي صَغِيرًا." سورة الإسراء، الآية 24. #سام

هذي الأيـام رانا نعيشو وحـد السخانة ما تتصـدقش.. والناس كامل راهي تشكي وتعاني من هـذا الحـر الشـديـد...بصح على بالكم بلي هذي السخانة عندها قصة عظيمة وموعظة حكاها لنا النبي صلى الله عليه وسلم؟ قال اشتكت النار إلى ربها فقالت: رب أكل بعضي بعضًا، فأذن لها بنفسين: نفس في الشتاء، ونفس في الصيف، فأشد ما تجدون من الحر من فيح جهنم، وأشد ما تجدون من الزمهرير من زمهرير جهنم يعني الله عز وجل ربي أذن لهـا بـنـفـسـين... نـفـس في الشتـاء وهو أشد ما نحسو بيه من البرد والزمـهـريـر القاطع..ونـفـس في الصـيـف وهو هذي السخانة الكبيـرة لي رانا نحسو بيها درك. مـالا يا خاوتي كي نعـرقـوا وتـحـكـمـنـا هـذي السـخـانـة وتضيق بينا، مـالازمـش بـرك نـتـقـلـقـوا ونـشـكـيـو للناس... لازم نـتـفـكـروا نـار جـهـنـم ونـخـافـوا منـهـا، وندعوا الله ونقول اللهم أجرنا من النار، وأعذنا من عذاب جهنم.. #من_عندكم

سيب الباب موارب! فات علي ريل لواحد مِصري، يقولك سيب الباب موارب! يعني في العلاقات متسكرش الباب تماما بينك وبين واحد، خلي ديما مجال باش توليوا لبعض. وبلاك أقرب مثل شعبي عندنا لمعنى كلامو هو: متزرعش الشُّوك في طريق خوك، يجي نهار وتمشيه حفيان! السَّيد قال، كي تتهاوش نتا ومرتك، وتروح للخدمة مقلق، وتعيطلك هي، ردّ من أوَّل مرَّة! لاشتة راهي واصلة بيك وين واصلة، ردّ ونتا مقلق، وقال ماذا تريدين يا اِمرأة؟ هكذا بقلقة. لأنو قادر يكون اِتِّصال جدّ مهم! وبالاك اِحتاجاتك لضرورة! يا سيدي معيطتش هي؟ عيّط نتا. ودير روحك تسقسي على الدَّار، على الولاد، على الماكلة، قال وش درتي للغدا؟ اهدر على أيّ موضوع، المهم تطمَّن على حال مرتك وحال أهل بيتك! عندك صاحبك تخالفتوا، ابعثلو ميساج قال وش راهي يماك؟ قال اليوم تلاقيت بفلان راهو يسال عليك؟ دير السّبايب باش تخلق هدرة معاه، وابقا ديما شادّ حبل العلاقة بيناتكم ومتطلقوش! لأنو بصراحة الفُجر في الخصومة ماهوش من طباع المسلم، واللِّي زاد هرد الحالة هو مواقع التَّواصل والدَّعوات الهدَّامة المتكرِّرة لإنهاء العلاقات في لحظات! تحت شعار اِعتزل ما يؤذيك. وأنت تستحق الأفضل، وهم ليسوا من مستواك؟ هي صحّ كاين ناس كي تنهي علاقتك بيهم متتأثرش، باِعتبار أنهم بعاد عليك وميأثروش في حياتك، خاصة إذا اِنتهت بطريقة مليحة ماشي سيئة. بصح النَّاس اللِّي يكونوا جزء من تفاصيل يومك، هاذو مستحيل تقطع علاقتك بيهم كيفما درت! الأصح في العلاقات، أنو الواحد يستغل كلّ فرصة باش يحافظ عليها، وإيلا كامل الفرص اللِّي مدهم راحوا هكاك، وحاجة ما نفعت، كسّع يجبد روحو بالّتي هي أحسن! لأنو إذا كان كاين اِحتمال ولو ضئيل باش ينقذ العلاقة ومنقذهاش، راح يندم طول حياتو! واحد في الدّنيا هاذي ما راهو محور الكون، ولو كان ندخلو في قلوب بعضانا نلقاو كوارث وأثقال مكنَّاش متخيلينها، والسَّبيل الوحيد للتَّعايش معاها، هو أنو نرحموا، ونساعفوا بعضانا قد ما نقدروا. البعض حاسبين القوة في أنك تحط نقطة النهاية لكل علاقة. في حين القوة الحقيقية هي أنك دير فاصلة، وتزيد تكتب سطر جديد في علاقة كان ممكن تنتهي! #سام

عسى أن تكرهوا شيئا وهو خير لكم.. نمروا على مواقف وظروف في حياتنا نرفضوها، ونحزنوا وكل واحد فينا يقول: "علاش صراتلي أنا؟". نتحسروا على باب تغلق، وفرصة ضاعت، وشخص راح، وخطة ما نجحتش .. لأنو الإنسان بطبعه يشوف غير اللحظة لي راه عايشها، أما واش راه مخبي المستقبل ما يقدرش يشوف. ربي سبحانه قال: ﴿وَعَسَىٰ أَنْ تَكْرَهُوا شَيْئًا وَهُوَ خَيْرٌ لَّكُمْ... وَاللَّهُ يَعْلَمُ وَأَنْتُمْ لَا تَعْلَمُونَ﴾. هذه الآية تعلمنا أن نظرتنا للأحداث محدودة، بينما تدبير الله مبني على علم كامل وحكمة ما يحيط بيها حتى واحد. مرات الشيء لي نحسبوه مصيبة، يكون هو سبب نجاتنا، ومرات الفرصة لي بكينا عليها، لو تمت، كانت راح تجر علينا ما لا نحمد عقباه. كم من باب تغلق في وجه إنسان، وبعد مدة اكتشف أنو هداك الباب لو انفتح لكان فيه هلاكه. وكم من أمنية تأخرت، ثم عرف صاحبها أن توقيت الله كان أرحم وأجمل من توقيته هو. لهذا، ما تحكمش على قصتك من فصلها المؤلم، لأنه لي تعيشه اليوم، بلاك يكون مجرد بداية لخير مازال ما بانش. وختام الآية: ﴿وَاللَّهُ يَعْلَمُ وَأَنْتُمْ لَا تَعْلَمُونَ﴾ يزرع في القلب راحة عظيمة لأنك لما تعترف أن علمك محدود، تنقص على روحك الحيرة والقلق، وتفوض أمرك لمن يعلم ما كان وما يكون. حسن الظن بالله ما يعنيش أن الحياة راح تخلو من الابتلاء، وإنما يعني أنك على يقين أنو الله ما يمنعش إلا لحكمة، وما يؤخرش إلا لخير، وما يبتليش عبده ليهلكه، وإنما ليهذبه، ويقويه، ويرفع درجته. اطمئن .. فما دام المدبر هو الله، فلا يوجد قدرٌ يمر بك إلا ويحمل في طياته رحمة، وإن تأخر عليك فهمها. #طيف

حبيت نقول كلمة للوالدين: ولادكم أغلى بزايد من أي معدل.. النتيجة، أياً كان نوعها، هي مجرد محطة، بصح وليدك هو رحلة عمرك.. إذا كتب ربي وفرح، فرحو، وإذا ما كتبش، هنا وين تبان قيمة السند. راهو محتاج حضنكم ودعمكم أكثر من أي وقت آخر، محتاج يسمع منكم "ماعليهش، الجاي خير" بدل "كلمات العتاب". الدنيا ما تحبستش هنا، والنجاح فيه بزاف طرق مش غير طريق الباك، كونوا نتوما 'النور' لي يضويلهم طريقهم كي تظلام عليهم الدنيا، ماشي القاضي لي يحاكمهم على تعبهم. احضنوهم، شجعوهم، وفهموهم بلي قيمتهم عندكم أكبر من 'زغاريت' الناس. كونوا الحضن لي يرجعوله كي يعياو، ماشي العاصفة لي تزيد تكسرهم. #سِين

قصة نبي الله يعقوب عليه السلام علمتنا أنو الشكوى للناس ما تقدّم ما تأخر، ومرات ما تجيب غير المذلة والشفقة، أما الشكوى لله سبحانه فهي عبادة، لأنه هو وحده يكشف الضر ويفرج الهم. البث هو الحزن الشديد اللي ما يقدرش صاحبه يكتمو في قلبه، وهذا كان حال سيدنا يعقوب عليه السلام مع فراق ابنه يوسف.. لكن في نفس الوقت الآية علمتنا أنه البكاء والحزن الشديد ما يتعارضوش مع الصبر الجميل، ما دام العبد ما تسخطش على قضاء الله، لأنه يعقوب زاد قربه من الله عز وجل وفرغ هداك الحزن باللجوء إلى ربه. وفي ختام الآية يعقوب عليه السلام يقول ﴿وَأَعْلَمُ مِنَ اللَّهِ مَا لَا تَعْلَمُونَ﴾، وهذا دليل على يقينه التام بلي الله راح يردله يوسف، وأنو بعد العسر يسر. الآية هذي رسالة لكل مهموم ومكروب بدل ما تكتم حزنك حتى يتعبك، ولا تبث همّك للناس بلا فائدة، خلي شكواك لله، وأكثر من الدعاء، لأنو هو القادر على تغيير الضيق فرج، والحزن طمأنينة. #طيف

وجملة "أوهن البيوت" عندها زوج معاني (معنوي ومادي). المعنى المعنوي: في بعض أنواع العناكب، الأنثى تقتل الذكر بعد التزاوج، وفي أنواع أخرى الصغار كي يكبرو يتغذاو على الأم، بصح هذي حالات خاصة وماشي عند جميع أنواع العناكب.. والمعنى الأساسي لي تقصدو الآية هو أن لي يتخذ من دون الله أولياء، راه اعتمد على حاجة ضعيفة، كيما العنكبوت لي حسبت بلي بيتها يحميها وهو أوهن البيوت.. المعنى المادي: شباك العنكبوت رقيقة بزاف، ما تحميش من الشمس والمطر والرياح، وممكن تتلف بسهولة.. بصح الخيط لي تخرجو العنكبوت في حد ذاتو قوي جدًا مقارنة بوزنو، ولهذا  العلماء راهم يدَرسو فيه للاستفادة من خصائصو في بعض المجالات الطبية والهندسية.. سورة العنكبوت من أولها لآخرها تحكي على الابتلاءات والفتن وكيفية الثبات على الحق.. ولكن المقصود الأساسي من الآية هو بيان ضعف الاعتماد على غير الله سبحانه وتعالى.. قال تعالى: ﴿سَنُرِيهِمْ آيَاتِنَا فِي الْآفَاقِ وَفِي أَنفُسِهِمْ حَتَّى يَتَبَيَّنَ لَهُمْ أَنَّهُ الْحَقُّ﴾. #أســامة

بين الدقة اللغوية والعمق العلمي.. بزاف علماء ومفكرين وحتى ملحدين سابقين، لقاو في آيات القرآن الكريم إشارات خلاتهم يعيدو النظر في قناعاتهم بالكامل، آيات مكانتش مجرد كلمات بالنسبة ليهم، بل كانت دعوة صريحة للتأمل والتراجع عن قناعاتهم الفكرية. على سبيل المثال في قوله عز وجل: ﴿مَثَلُ الَّذِينَ اتَّخَذُوا مِن دُونِ اللَّهِ أَوْلِيَاءَ كَمَثَلِ الْعَنكَبُوتِ اتَّخَذَتْ بَيْتًا وَإِنَّ أَوْهَنَ الْبُيُوتِ لَبَيْتُ الْعَنكَبُوتِ لَوْ كَانُوا يَعْلَمُونَ﴾ [العنكبوت: 41]. شفتو تاء التأنيث في كلمة «اتخذت»؟؟ هل نقول هذا عنكبوت؟ ولا هذه عنكبوت؟؟ الجواب الصحيح أنو نقولو هذا عنكبوت لأنه مذكر، بصح علاه جات بـ تاء التأنيث؟ هنا المشككون والطاعنون في دين الله بانتلهم بلي لقاو ثغرة وقالو بلي هاذي غلطة فالقرآن والعياذ بالله... قالو بلي نورمالمون نقولو: "كمثل العنكبوت اتخذ بيتا". بصح المشيئة تاع ربي سبحانه أنو خلاها حجة عليهم... كي جا العلم الحديث بيّن بلي أنثى العنكبوت هي لي تنسج شبكة الصيد في أغلب أنواع العناكب، أما الذكر فيستعمل خيوطه غالبًا للتنقل والتزاوج... وجملة "أوهن البيوت" عندها زوج معاني (معنوي ومادي). التكملة 👇🏻👇🏻

هل نقدر نحط وليدي في لاكراش ولا الروضة بلا مانحس بتأنيب الضمير ؟ أولا، مرناش نهدرو على ناس عندهم ظروف قاهرة وصعبة تفرض عليهم يخلو ولادهم فالروضة .. بل على الأغلبية اللي يستحسنو فكرة الروضة في السن المبكرة، بحجة انهم يخففو على رواحهم مسؤولية التربية وفي نفس الوقت باش يبنيو حياة اجتماعية لطفلهم .. الفكرة هاذي فيها إنقاص من حق الطفل ونوع من الأذى ليه .. طبعا هذا الطفل مسؤولية والديه، والمسؤولية هاذي تفرض عليهم الأولى من راحتهم، وهو أنهم يربو وليدهم ويعطوه الحب والحنان ويتهلاو في صحته النفسية والجسدية وين الأب يخدم، يدبر راسو ويوفر متطلبات العيش الكريم .. أما الأم تتولى مهمة عاطفية بدرجة أولى ..التكملة 👇🏻👇🏻

حبّ الذَّات؟ في السَّنوات الأخيرة، اِنتشر بزاف مفهوم حبّ الذَّات، وباللِّي لازم الإنسان يحطّ روحو أولوية ديما _خاصَّة في العلاقات_ وباللِّي ما يقدّم حتى معروف للغير دون مقابل، بحجة أنو عارف قيمة روحو، ويحبّ نفسو، وميتكلحش! وبهاذ الشَّكل اللِّي صدرولنا بيه هاذ المفهوم، تشوّه، وتحوّل من حبّ ذات _اللِّي المفروض يكون حاجة مليحة_ لأنانية صافية هلكت بزاف علاقات! واليوم حبيت نوضَّح الفرق بين حبّ الذات الإيجابي اللِّي نحتاجوه في حياتنا كامل، وبين النُّسخة المشوَّهة منو؛ الأنانية، اللِّي لازم نتحكموا فيها! ببساطة، حبَّك لذاتك هو اللِّي يخلِّيك تحطّ حدود متوازنة في حياتك تساعدك باش تربح راحة بالك، وتتطوّر، وتمشي للقدام. ما تنقّص من قيمة روحك، ما تنقّص من قيمة غيرك! بينما الأنانية، فهي أنك ترفض مساعدة بنادم، ونتا قادر تساعدو بلا ما تخسر من جهدك، ولا من وقتك، ولا من صحتك! بصح ترفضها فقط بحجَّة متتكلحش وتحبّ روحك! بدل ما تعاون خوك في قرايتو، تضيع وقتك في مواقع التواصل. بدل ما تعاوني يماك في الكوزينة ولا شغل الدَّار، تفضلي ترقدي ولا تحكمي التّليفون! بدل ما جمَّع مع ناس داركم تفضّل تنعزل وحدك! معليش ترفّه على روحك، وتريّح، وتحطّ نفسك أولوية، بصح ساعات لازم تحطّ ناس آخرين أولوية في حياتك، كيما والديك، خاوتك، الأصدقاء المقربين، وناس العايلة اللِّي ملاح معاك! حبّ الذّات الصِّحي يعلّمك تحبّ غيرك، وتحترمهم، وتخدم لآخرتك، أمَّا الأنانية فتسجنك في وهم كبير، وتعلّمك البخل، وتبدلك للأسوأ، بلا ما تفيق. #سام

الإنسان لي يقضي حوايجو بالكتمان أغلب الناس يشوفوه إنسان غامض حقود، ولا ما يحبش يشارك فرحتو مع غيره، حتى أنك تشوفهم يقولو يمشي لتحت لتجنب ماشي كيما حنا لي كاينة نحكيوها وما نخبيو والو. بصح الحياة علمتنا بلي ماشي كل حاجة تستحق تتقال، وماشي كل خبر لازم يخرج للعلن قبل ما يثبت. شحال من واحد يحكيلك على كل تفاصيل يومه، ومن بعد تسمع من عند الناس بخطبة تاعو، ولا حمل، ولا مشروع، ولا نجاح كان يخدم عليه من مدة، تتفاجأ لأنو ما قال حتى كلمة، وشحال من واحد آخر ما يهدرش بزاف، ونهار لي تكتمل أموره يقولك بكل بساطة: "الحمد لله، صرات." لكن الكتمان ماشي معناه جحود النعمة، وماشي معناه الكذب على الناس أو التظاهر بلي حياتك كلها مشاكل وتقعد تنشر للقريب ليك السلبيات، وإنما هو أنك تفهم أنو بعض الأمور تحتاج الهدوء أكثر من حاجتها للضجة. حاجة مليحة تفرح الناس بنجاحك، بخطبتك، بمولودك، أو بمشروعك، لكن ماشي بالضرورة تشارك كل مرحلة وكل تفصيلة قبل ما تكتمل، لأن الإنسان أحيانًا يحتاج يحمي خططو من كثرة الآراء، ويعطي للأمور وقتها الطبيعي حتى تستقر. ولهذا ما نقدروش نحكموا على شخص من خلال كمية التفاصيل لي يشاركها.. وكاين تاني لي يكتموا خوفًا من الحسد أو العين، وهذا حقهم سواء اتفقت معهم ولا لالا، ما نقدروش نلومو إنسان اختار يحافظ على خصوصيته ويحتاط لأموره بالطريقة لي يشوفها مناسبة، خاصة في زمن ولى فيه بعض الناس يتابعوا أخبار غيرهم أكثر مما يفرحولهم. وفي الأخير، السلف قالوا: "استعينوا على قضاء حوائجكم بالكتمان." فالحكمة ماشي في أن تحكي كل شيء، ولا في أن تخفي كل شيء، وإنما في أن تعرف ما الذي يُقال، ومتى يُقال، ولمن يُقال. #طيف

فاتت علي عبارة تقول، التَّواصل ليس ما تقوله بل ما يفهمه الآخر! يعني قادر فلان يقلك نحبك بصح أفعالو كامل تبينلك العكس. وقادر بنادم يقلك نحترمك بصح تصرفاتو كامل تذلك وتهينك وتنقص من قيمتك، ونظراتو تحسسك بالدُّونية. قادر واحد يظل يشكر فيك بالفم بصح كي طيح بيك، متلقاش منو تحريكة وحدة! وهذا هو المعنى تع التَّواصل صح، أنك تقدّر الإنسان بالقول والفعل، ومن تمام الأخلاق وحسن النِّية، أنو قولك يوافق فعلك! ماشي الهدرة زي والأفعال زي، ومنبعد نلوموا الطَّرف الآخر على واش فهم! النَّاس مهمش مغفلين، وقادرين يقراو النَّبرة والنَّظرة ويفهموها بلا كلام. يمالا ديروا بالكم، وما تنساوش باللِّي ديننا تعامل! #سام

صلاة الفجر ما تنوضلهاش وماتش تاع بالون تنوضلو!! العبارة هذي ڨد ما راهي قاسية ڨد ما راهي تعبر على الواقع لي عايشينو، لأنو أغلبنا ما ينوضش لصلاة الفجر وأغلبنا يصلي الفجر فالأيام لي يخدم فيهم ونهار مايخدمش ما يصليهش... للأسف كاين فئة من الناس يقدرو يسهرو بالساعات مع ماتش ولا فيلم ولا خرجة من الأصدقاء، وما يحسوش بالوقت ڨاع كيفاش يفوت، بصح كي جي في 10دقايق لي يوقفو فيها بين يدين رب العالمين، يعجزو وتولي تبانلهم ثقيلة.. باش نكونو صرحاء مع نفوسنا، المشكل ماشي فالتعب ولا الوقت... المشكل فالأولوية لي داخل قلوبنا، فالأصل الإنسان لازمو يجـ اهد على الحاجة لي يشوفها مهمة، ويصبر مهما كانت صعيبة وشاقة... ربي سبحانو ما طلبش منا الكمال، ربي سبحانو يطلب منا الصدق في المجاهـدة، لأنو كل دقيقة تفوت وكل يوم يطلع علينا فيه فرصة جديدة باش نعرفو الأخطاء تاعنا وباش نصححو التقصير ونتقربو لربي سبحانو أكثر وأكثر... الماتشات تاع كأس العالم بينت وأثبتت بلي كل انسان يجـ اهد في واش يحب... كي تشوف مجاهدة الناس للماتشات Automatiqurment راح تعرف بلي العجز ماشي فالأبدان، إنما العجز في الهمـم... هاذ الماتشات أسقطت شحال من عذر، كيما(غدوة خدام نوض على 6، راني عيان، النــوم تاعي ثقيل... الخ) يقول الله عز وجَّل: ﴿وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا وَإِنَّ اللَّهَ لَمَعَ الْمُحْسِنِينَ (69)﴾ اللهم رُدنا إليگ ردا جميلا... #أســامة

الماء هو ألين حاجة خلقها ربي.. تمسو بيدك يتفلت، وتحطو في كاس يدي الشكل تاعه في هدوء وصمت.. بصح جرب تخلي قطرة ماء تطيح فوق حجرة قاسحة، وخلها تطيح ديما، في نفس البلاصة وبلا ما تحبس.. مع الوقت، هاديك القطرة الخفيفة والناعمة راح تثقب الصخرة الكبيرة. هادا هو "منطق الماء" لي لازم نتعلموه ونطبقوه في حياتنا اليومية.. في وقتنا هادا، البشر ولى يحب الزربة والحاجة لي تدير البريق والضجيج ضربة وحدة، نحبوا نربحوا الملايين في نهار، ونتعلموا صنعة في سمانة، ونلحقوا لقمة النجاح في شهر...!! ونهار نشوفوا باللي الطريق طويلة وما بان والو في الأول، نفشلو، نربعو يدينا ونحبسو كامل.. بصح الثّقل والتبات يعلموك بلي القوة الحقيقية عمرها ما كانت في هادوك الصدمات الكبار والاندفاع العاطفي، القوة الحقيقية راهي في كلمة واحدة "الدوام". حاجة صغيرة تديرها كل يوم بانتظام وبلا ما تحبس (مثلا: صفحة تقراها، عشر دقائق تتعلم فيها عفسة جديدة في صنعتك أو قرايتك، مبلغ بسيط تخبيه، أو سجدة تصليها في السكات تع الليل) تبانلك عفسة تافهة وما تبدل والو اليوم، بصح مع الوقت هي لي راح تدير الفارق وتريب جبال تع العوائق في مستقبلك. كي تضيق بيك وتشوف الصخرة لي قدامك كبيرة والطريق طويلة، ما تفشلش وما تزربش على النتيجة، دير كي الماء.. امشي بالسكات، اتقن قطرتك اليومية، وخلي الاستمرارية هي لي تهدر.. #سِين

كاين ناس كي يشوفو واحد نجح عليهم ولا ربي فتحلو باب من الأبواب، أول حاجة يديروها هي البحث على السبب خارج أنفسهم.. هذا محظوظ، هذا عندو معارف، هذا جاوه الظروف مناسبة. وقليل لي يوقف مع روحو ويسقسي واش هو الخطأ لي راني نديرو أنا؟ قصة ابني آدم تعلمنا درس كبير، تأملوا هاد الآية، قال تعالى: {و اتل عليهم نبأ ابنيَ آدم بالحق إذ قربا قربانا فتقبل من أحدهما و لم يتقبل من الآخر قال لأقتلنك قال انما يتقبل الله من المتقين} سورة المائدة: الآية 27. لما تُقبِّل قربان هابيل وما تُقبِّلش قربان قابيل، كان يقدر قابيل يراجع نفسه ويصحح تقصيرو، بصح اختار طريق آخر... خلا الحسد يدخل لقلبو، والحسد ولى حقد، والحقد جرّو لأبشع جريمة. المشكل ما كانش في خوه، المشكل كان في نفسه، لكن الأنانية والكبر يخليو الإنسان يشوف عيوب الناس كامل إلا عيوبه. هابيل يمثل الجانب الروحي والأخلاقي، قبول قربانه كان لإخلاصه الصادق، وقدم أفضل ما عندو حباً ورغبة في القرب من الله .. تواضعه هو الذي جعل قربانه مقبولاً، وهاد الشي مازال يتكرر لليوم، بعض الناس يتألمو من نجاح غيرهم أكثر مما يتألمو من فشلهم هوما، لأنهم مشغولين بالمقارنة أكثر من الانشغال بالإصلاح. لهذا جا الجواب واضح وبسيط: ﴿إِنَّمَا يَتَقَبَّلُ اللَّهُ مِنَ الْمُتَّقِينَ﴾إذا حبيت ربي يباركلك ويرفعك، ما تضيعش وقتك تراقب غيرك... راقب قلبك، واصلح نفسك، وخلي المقارنات السلبية جانباً. #طيف