Rashid Xo‘jamov | she'rlar

TALOTUM Eng gʻamgin kuy chaling, eng gʻamgin, (Oqib) tovonimga tushsin yuragim. Simyogʻochda boshi xam, nochor musichaga etmayin rahm yomgʻir sharros quysin ohangdan. Jirkanch yuzlar dilni xoʻrlasin, Har notadan koʻzlari ma’sum odamlarning ohi oʻrlasin. Tunday sitib tashlasin, kunday siyqalashib ketsin avj parda… Nega kerak shuncha sonata, Hanuz ruhing hayiqsa jardan?! Tosh devorda yelkamning izi qolguncha to tinmasin nagʻma. Telbarishim nahotki qiziq?! (Oʻylaysizki, hali ham sogʻman) Eng gʻamgin kuy chaling, eng gʻamgin, Bir yonay qaqnusday gurkirab. Qaytaman soʻng azal holimga – Meniki emas bu kulgilar. 2025, avgust ✍️ Rashid Xoʻjamov

Bilga tur o‘zining ilk faoliyatini boshlamoqda. Jamoa sayohatlarga madaniyat, tarix, ilm, adabiyat va san`at ruhini olib kirishni maqsad qilgan. Bizning tur bilan Siz shunchaki sayohatchi emas, bilgaga aylanasiz. Ilm, madaniyat, adabiyot, san`at insonlari bilan bir davrada bo‘lasiz! Ular bilan borar manzilingiz ruhini, ahamiyatini yanada teran anglaysiz! Jamoa Sizni ilk sayohatga taklif etadi. 15-16-avgust kunlari yilning eng sehrli yulduzli kechasini tomosha qilish imkonini o'tkazib yubormang! Sayohat davomida sizni kutmoqda: 📝 Shoir Najmiddin Turon bilan she'riy kecha; ☀️ Markaziy Osiyoda yagona bo‘lgan Toshkent viloyati Parkent tumanidagi Quyosh shaharchasi bo‘ylab olim ishtirokidagi qiziqarli sayohat; ✨Faqat shu kunlarda bo‘lib o‘tayotgan yulduzlar yog‘dusini tomosha qilish; 🔥 Gulxan atrofida unutilmas suhbatlar; 🪕 Xalqona ohang va ashulalar; ☕️ Issiq qahva, yoshlikka qaytaruvchi cho‘g‘da toblangan kartoshkalar; ⛰Toza havo va betakror tabiat; 🏕 Chodir ostida tunash; 🌓Quyosh chiqishini kuzatish; 📸Kechadan foto va video lavhalar 🗓 Sana: 15-16-avgust ⏳Vaqt: 15.00 da Toshkent shahridan jo‘nab ketish 📍 Joy: O‘zbekiston mehmonxonasi oldidan 💰 Ishtirok narxi: 450 ming so‘m Ro'yxatdan o'tish: 📱Telefon: +99850024-26-47 ⚠️ Muhim eslatmalar: Joylar soni cheklangan! 🤍O‘zingiz bilan yeguliklar va issiq kiyim olishni unutmang! 🌏 BILGA tur – aql va ruh bilan sayohat! Rasmiy sahifalar: 📱 Telegram 📱 Instagram 🌐 facebook 🔻 sayt

КОШКИ Айтолсайдим кўзингга қараб, Айтолсайдим – бошқа одамман… Ва шунда ҳам деворлар қулаб кетмасайди мангу оламдан. Лойим қайта қорилса, кошки, Шудринг гулдан олмайин бўса чўлда булоқ топган ит каби сенга борсам энтикиб, сувсаб. Ўлдирмасанг эди сазамни, Қайтмасайдим шаштдан сўнгги бор, Манзилидан адашган ўқнинг Ўзидами ахир ихтиёр?! Қачонлардир ичган онтимдан Етти қават осмон ёришган. Ўйнаб ўтдим гарчи ўт билан, Лек қўрқаман олов бўлишдан. 2025, август Рашид Хўжамов

Boʻlaveradi)

ЭҲТИМОЛ Тўқнашмайди энди нигоҳлар, Ёмғирдан шикоят этмайсиз менга, Соябон остида, Қуёш тиғида Қўлларимга тегиб кетмас қўлингиз. (Устун келмас ақлдан юрак) Мени қизғанмайсиз қанча истамай, Қанча кутмай ҳатто адашиб Рақамимни термайсиз, бешак… Мен қирғоқда қолган балиқдай Пичирлайман осмонга, сувга, ерга… Дон сочаркан кабутарларга Юрагимни қўймайсиз тергаб. Наҳот энди сизни йиғлатган, Китобларни ёқмам, фариштам?! Сиз дуога очмагайсиз қўл Сўз тиланиб менга Аршдан… Бирга юлдуз санаб, учириб, Ойнинг фонусини ўчириб, Самарқанду Бухороларни Сайр этаркан танҳо кечалар, Гўё амир эдим ўшанда Ва қисматимга ўзим эга… Қайта гувоҳ бўла олмаймиз Истасак-да, истамасак-да Тун шу қадар қисқалигига. Кезаркансиз хиёбонларни Қўлимдан ортиқ жасорат кутмассиз, Хаёлан шеърларим хиргойи этмассиз, битта бўлса ҳам икки жаҳон, Ўқиб беринг яна бир марта, Дея ялинмайсиз энди ҳеч қачон… Яна Худо билади, жоним, яна Худо билади… Май, 2025 Rashid Xoʻjamov

ЭНДИ Энди маъно йўқдир, тунни элашдан, Ёмғирларда ивиш, қорда ёнишдан, Тушда денгиз тубига чўкиб, Саҳроларда сувсиз уйғонишдан! Ойни сайр эттириб нор ўркачида, Хаёлга эрк бердим, ўзидан ўзсин. Шу бадбахт умрнинг қоқ чилласида Сени илонпўстдай ечарман, ғусса. Руҳим аросатда, Ақлим узлатда, Қирқинчи фонусин ёқади само. Қўлимни кишанла, кўзимни боғла… Энди мен одаммас – шамолман-шамол! Биламан, осонмас ғурбат фаслдан Кўнгилни шарт юлиб кетмоқ – лутф айланг. Янги замин туғмас энди коинот, Дунёни авайланг, сўзни авайланг. Энди маъно йўқдир… чўккан туялар – тоғларни турғизмоқ бўлманг кучаниб, Мен эса эрк ҳақда қўшиқлар куйлаб, Йиғлатиб кетаман бутун кечани. Рашид Хўжамов 2025, июль https://t.me/R_Xojamov

ЖАЗМ Тўнкарилган осмон остида, Майдалашиб боради жуссам. Юлдузларнинг бевақт қасдида Шубҳасиз, бор менинг ҳам ҳиссам. (Ер остида юлдузлар пайдо) Ҳар қадам ғам, фожиа... чиндан, Лек ҳеч бири бўлмади сабоқ. Боши қонлиқ қавм ичинда Мен ўзимга ачиндим кўпроқ. (Ўзимники бу ғалат савдо) Забун икки кўзимдан ғолиб иккиланмай ўтар даҳри дун. Яшалмаган йилларим қолиб Шеърларимга ясайман якун. (Фасллардан бўлиб мосуво) Шундай ўтар дунёдан кимдир Худди мендай умр ютқизиб... Ва билурман кетмас умрбод Юрагимдан оёқлар изи! (Қалбда қолмоқмиди муддао) О, бу ўйлар... олис ломакон... Ҳар парчамни битталаб тердим. Кўзларимни мен кун кўрмаган Суғдиёна тунларга бердим! (Кўрурмисан пойингга раво) ___ 2023 Рашид Хўжамов

YALDO KECHASI #premyera #soʻz Nihoyat, barchamiz kutgan “Yaldo kechasi” asarining teatrlashtirilgan taqdimoti “Soʻz”ning YouTube sahifasiga joylandi. Tomosha qiling, doʻstlaringiz bilan baham koʻring va fikrlaringizni yozib qoldiring! https://youtu.be/XkdXhfgC-6E?si=fn6toW6sYo7YQHVz

“Qanday qoʻshiq tavsiya qilasiz eshitishga?” debdi bittasi. Shunda qoʻshiqni eshitishdan boshqa maqsadlardayam ishlatish mumkinmi? “Eshitishga” degan soʻzga nima borakan)) Hay, eshitishga boʻlsayam, qanday qoʻshiq tavsiya qilasilar, yuborib qoʻyinglar izohga. :)

СЕН КЕЛМА Сен келма – қайғумнинг эркини Қўлларингга тутмоқ истамам... Фасллар оғриқларин ёзиб ўтса-да Замин уйғонишга куч топар такрор, мен ҳам! Менинг кимлигимда, ҳеч кимлигимда Қуёшдай мағруру ичкинлигимда бутунлигим, чилпарчинлигим Етти ётлигимда…

СЕН КЕЛМА Сен келма – қайғумнинг эркини Қўлларингга тутмоқ истамам... Фасллар оғриқларин ёзиб ўтса-да Замин уйғонишга куч топар такрор, мен ҳам! Менинг кимлигимда, ҳеч кимлигимда Қуёшдай мағруру ичкинлигимда бутунлигим, чилпарчинлигим Етти ётлигимда, юз хотиримда Сенинг қайғуларинг туғилар... Узаман гулларнинг баргини, Сезаман: жон берар чақмоқлар... Бу дунё ичимга беркинар, У дунё ўтади баҳримдан оҳ-воҳлаб... Ўлик шаҳарларнинг тирик қалби бор, Мунғайган тоғларда бордир тазарру. Қўлимдан ташқари – қўнимсиз висол, Ўлимдан ташқари кўнглимнинг қаъри. Сен келма Бу фироқ ўзимни базўр еб битирар, битарман... Чақмоқнинг шаклига кирибоқ Умрингдан чақмоқдай ўтарман – Сен келма! Рашид ХЎЖАМОВ

“Sen bilmaysan” sun’iy ong ijrosida🤷🏻‍♂️

ҲУКМ Қучганим ғул – ичганим оғу, Қайтарманми қайта ўзимга?! Нега бунча гўзал кўринур гуноҳларнинг кўзи кўзимга? Сўрамасни сийламас Тангри, Мен ўтинган дарёлар тақир. Кўз очирмай отган тонгларни севаман деб ўйлардим ахир. Қанотидан ўзиб кетди қуш, Қуйқадирман – қадаҳ жасадим. Мен – ранглардан тўйган Сиёвуш Сенга рангсиз кунлар атадим. Гул бўл дедим, гулобинг тўкиб, (Гарчи чеҳранг ойдан сув ичган) Кўр жаллоддай кетдим кўникиб Қон бағрингга қараб кулишга. Даврангиздан қувманг, халойиқ, Чанқоғингиз кесмас кетмоғим. Дор қидирманг бўйнимга лойиқ – Ўзим билан менинг сиртмоғим. 01.08.2022 Рашид Хўжамов T.me/R_Xojamov

SAFAR She'r boshlashday hamisha qiyin, Bir qarorga kelgan odamga Shu qarorga aylanib yashash, Va maslaging boʻlmasa tayin Mushkul kechar vaqtni uddalash. Kundan kunga hayratlar xira, Kundan kunga taxayyulim gʻar, Iyagimni poyingga tirab Yetti koʻkni qildim tomosha — Shir yalangʻoch bari yulduzlar. Ixlosimni obdan chaynadim, So'ng tuflashga izladim pana. Yoʻlga chiqsam, yoʻllar aynidi, Yoʻlga chiqsam, iblis avjida – Meni jangsiz yengdi yigirma(m). Xayollarga ketdim uloqib, Yer iskamas – ruhim qush emgan. Gʻazabimni oʻrniga qoqib, Hammasini sugʻirib otdim – Yolgʻizlik koʻp botdi tishimga. Men gazaksiz sipqordim oʻzni, Uloqtirdim koʻzim kosasin. Ammo hamon umidim soʻzdan: Xonishimda toshday nedir bor, Nimadir bor — yomgʻirday hazin. Meni qutla – peshonam sindi, Meni qutla – gʻanimlar ildam. Tushlarimni itqitib tunga, turnaqator ko'rgiliklarning Qoniga bosh yuvgani keldim. 2022-yil Rashid Xoʻjamov T.me/R_Xojamov

КЕТАЁТГАН ОДАМГА Кетаётган одам жим кетади... Жар сололмагани каби бир кундан сўнг ўлишини. Орқасига қайта-қайта боқмай унутиб қолдирган ҳеч нега ачинмай йўлларнинг чигилини ёзиб кутмай кимдир йўлдан қайтаришини оламга ўт қўймай ўзига ва ўз йўлига сиғиниб тушларига таъбир изламай исботлашга уринмай ҳақ эканини тишларини чайнаб, тилини ютиб Илондай силлиқ чиқиб кетар. Пойламай қуёш ботишини отишини ёмғир ёғиши-ю тинишини... дарёдай пишқирмай денгиздай тошмай Худодан қайтган Худога қайтаётгани каби шивирсиз ишораларсиз... дуойи саломлар заҳарли-заҳарсиз хандалар эсдаликлар эслатмаларсиз эзилмай эзмаланмай эзмай хат-хабар қолдирмай муҳими, сездирмай афсусдалигин. Эй менга қарорини ҳижжалаб тушунтираётган одам, кетаётган одам жим кетади! ✍ Рашид Хўжамов 🎙 Умид Абдуҳакимов T.me/R_Xojamov

Bugun shunday kun boʻldi. Yozuvchilar uyushmasi a’zoligiga qabul qilindik. Yoshlar kuniga yaxshi sovgʻa boʻldi. Endi yozish va faqat yozish kerak. Soʻzdan qismasin. Sizlarga ham rahmat 🙌

ТУШ Туш кўраман тушлар ҳақида, Сувга қўнган қушлар ҳақида, Сўнг кўзимга сўйлаб бераман Қонаб ётган тошлар ҳақида. Туш кўраман тушлар ҳақида. Қуён қусиб ташлаган шерни, Чувалчангдан туғилган филни, Аввал тугиб, кейин гуллаган... Пул ютоқиб ўзин пуллаган. Хожасига нон отган қуллар, Бошга ақл ўргатган салла, Суяк билан тишимни кавлаб, Ҳаммасини англамай-англаб Туш кўраман тушлар ҳақида. Қамар чўккан кечалар ёруғ, Ойни ичдим тугамади у. Шамол пусиб ётганда мулзам, Иягимга ёпишиб тиззам Туш кўраман тушлар ҳақида... Нега мени уйғотмайсан, гул, Ухлармизми қиёматгача? Бугун қулман, эртага ҳам қул... Шоҳ бўларим билмасман қачон. Деворларнинг елкаси чирик, Нураб борар эски ақида. Тун мизғийди... мен қоқмай киприк туш кўраман тушлар ҳақида. Бўйнимизга сиртмоқ осилган, Ё кундага мустаҳиқмиз нақд. Сеҳр кутар дор остидан ҳам Тушларига сажда қилган халқ. 2022 йил 4 июль Рашид Хўжамов t.me/R_Xojamov

КЕЛДИМ Кўзларингга қуйилган шароб бўлгани келдим, Суробда эмасдим-у, хароб бўлгани келдим, Майда-майда бўлгани, қолганимдан ўрганиб, Яна ўзинг билганинг – туроб бўлгани келдим. Қўлимдаги асонинг қисмати мендан расо, Қадим чинор шаклида чекаётирман азоб, Битилган бўлса, недан бунча кечикмиш қазо, Қўлларингда ёқилур Китоб бўлгани келдим. Ай шеъримда доғлиғим, ай Ширинга боғлиғим, Нигоҳларинг бунча ўт – нигоҳларинг бунча жим, Юракка сиғмай, кўздан бўртиб чиққан оғриғим, Туш эдим, тушга сиғмас рўёб бўлгани келдим. Қулфи дилим очгани нима қолди жилвагар? Дунё – битмаган сурат, ранг чапла эпласанг гар, Тирик бўлиб сўйламас, ўлик бўлиб жилмаяр, Шарпалардай дарбадар, сароб бўлгани келдим. Бир умр ёмғир ёғса, шамлар ўчмасми, жоно? Қуш қўнмаса, бир куни балиқ учмасми, жоно? Менга жазолар берма, бўсалар бериб жон ол. Ўтли сукутларингга жавоб бўлгани келдим. 2022 йил, 2 июль Рашид Хўжамов T.me/R_Xojamov

ХОҲИШ Кўзимни ботириб оламан қонга, Изтироб ичаман уйқу олдидан... Тун – сабил бошимга қулаган харсанг, На парчалаб бўлар, на бўлар қучиб. Сочингга қўлимни ювсам, қизарсанг, Сўнг кетсак дунёнинг ёдидан ўчиб. Булутдан ясалган юрак шаклини Юрагингга боссанг, мен тутсам гардан. Кўзларингдай ҳалол, кўз ёшдай тиниқ, Ичсак замин кутган ҳур ёмғирлардан. “Сен сабаб шоирман ва мангу ошиқ...” Дарвеш калишидай судралар жуссам. Куз. Мажнун тераклар бошлайди қўшиқ, Ёз. Улғайиб борар кун сайин ғуссам. Мени кечирарми топталган гуллар, Сукутлар чўктирган иқрорлар ёди?! Қарама, кўзларим қўяди гуллаб, Бу кеча ўпкамда жон берсин додим. Аксига олмади шу сафар қазо – Оташда ҳам куйдим, сувда ҳам куйдим. Сен бироз шоирни севардинг, аммо Мен бироз одамдай яшамоқчийдим... 20.07.2022 Рашид ХЎЖАМОВ T.me/R_Xojamov