|شعر اوجاغی|

▫️خلقین ایمانینی گر مکر ایله شیطان آپاریر، او پریچهره نه‌دن‌دیر کی، بس ایمان آپاریر؟ ای کمان‌قاشلی، منی یاره‌له‌دی موژگان اوخون، زولفونو باس یاراما، قویما، منی قان آپاریر! عشق‌دیر الدن آلان دین ایله ایمانی، ولی خلقدن تهمتِ بیهوده‌نی صنعان آپاریر. دل چکر جانی سرِ کویینه، زبح ائتمک اوچون، سانکی حجّاجْ «منا» داغینا قوربان آپاریر. زاهد اول زولفده روخسارینی گؤردوکده دئدی: «بو او هندو بچه‌دیر، مکتبه قرآن آپاریر.» گئیمه‌یه کیمسه کی، میدانِ محبّتده کفن، اونو معشوقِ ازل محشره عریان آپاریر. چکمه‌یین «سیّدِ» لامذهبی میخانه ساری، کافری کعبه آرا هانسی مسلمان آپاریر؟! #سیدعظیم_شیروانی #شعر_اوجاغی @SheirOcagi

▫️جانلی بیر قادین اوره‌یی نه‌دیر کی؟! منیم عشقیم داشلاری دا اریدردی. 📚 مارتین ایدئن #جک_لندن #شعر_اوجاغی @SheirOcagi

▫️اؤلوم! من سنی تانیییرام. ساعات 5-ین یاریسی... گئجه... خوش گلدین، اؤلوم! من سنی کؤلگه‌م کیمی تانیییرام. سن منی، سن منی نئجه؟ گئجه 5-ین یاریسی... بوغولورام پنجره‌می آچین! نه هاوا وار، نه روزگار، نه گؤزله‌دیگیم زنگ وار، نه بیر خبر، آنا! کندده‌کی مزارلیغین کؤلگه‌سی دوشوب اوتاغیمین دیوارینا. اوشویورم... آوگوستون اورتاسیندا. پنجره‌می قار دؤیوب قار دؤیوب بورم-بورم... و من هئچ کیم بیلمه‌دن یاواش-یاواش اؤلورم. شیکایتیم، فیلانیم یوخ، ایچیمده نه قورخو، نه حوزن، نه کدر... اولسا دا، اولسون، فرقی یوخ! اونسوز دا گئجدی، گئجدی... عؤمروم- بیر تابوتو، یاشیم- بیر اؤلومو سوسله‌یه‌جک قدر گؤزل کئچدی. ساعات 5-ین یاریسی... گئجه... اؤلوم! من سنی کؤلگه‌م کیمی تانیییرام، سن نئجه؟ #رستم_بهرودی #شعر_اوجاغی @SheirOcagi

▫️Fəridəm #İmamverdi_həsənov @SheirOcagi

دیالوق ▫️- کیمسه گئرچه‌یی اونوتمور، اینسان‌لار فقط یالان دانیشماقدا اوستالاشیرلار. 🎬 Revolutionary Road 2008 #سام_مندس #شعر_اوجاغی @SheirOcagi

▫️ایندی اوجوز اولان نه‌دیر؟! هر شئی باهادیر. تکجه درد اوجوزدور. باخ، بو دردی لاپ مۆفته آلیرسان! 📚 سفیل‌لر #ویکتور_هوگو #شعر_اوجاغی @SheirOcagi

▫️آی ایلاهی خانیم، سۆفاهی* خانیم! نه ارکلی سؤز ایدی، اونو سن دئدین، محبّت شعریمی سئویرسن دئدین! ایندی او دویغولار سنه گرک‌دی، سئو منیم او سئوگی دویغولاریمی، سئو منیم کؤنلومون وورغولارینی! بولود دان یئرینه بویلانان کیمی، یازدا ایلک بنؤوشه بویلانان کیمی، قلبینین ان درین گوشه‌لرینده ان ظریف حیسلرین قالخسین آیاغا، کؤنلون اودا دؤنسون، روحون چیراغا! بیر آز دا گؤزل‌لش، بیر آز دا آچیل، سئوگی شعریمده‌کی بو یازدا آچیل، آچیل، قانادلان! ان عولوی دویغولار قوینونا آتلان، بو حزین سئوگینین اؤنونده اَییل! سیندیر غورورونو، هر عینادی آت، گونئی قاری کیمی گونشده اری! سونرا دؤن بیر توپا قار چیچه‌یینه مؤعجوزه‌ یارات! شعریمی تزه‌له، یئنیدن یاشات! تیتره‌سین کؤنلونده کؤنلومون سسی، گؤینَتسین سینه‌نی حسرتلی بیر آه! سنین یاناغیندا او داغ لاله‌سی منیم شعریمده‌کی یانغی‌دی واللاه! آی ایلاهی خانیم، سوفاهی خانیم، سئودیگین آداما یاناش بئله‌جه! گؤرورسن اوره‌یین تیتره‌ییر نئجه؟! گؤرورسن اللرین نئجه ایسیندی؟! او منیم اووجومدو، سنین الیندی، شعریم اللرینی ایسیدیر ایندی. همین او ووجوددور تیتره‌ییب اسن، شعریمین الی‌دیر ساچیندا گزن. ایندی منه باخان منیم گؤزومدو، همین باخیش‌لاردیر، همین هیجان. بو منیم سئوگیده شیرین سؤزومدو، سنین اوره‌یینی آلیر ناگهان. بو همین مقام‌دیر، بو همین ساعات... پؤهره کؤتویونو یاشادان کیمی غؤنچه اؤرتویونو یاشادان کیمی شعریمی تزه‌له، سئوگیمی یاشات! عشقین حسرت-حسرت گؤینه، گؤیَرسین منده تزه‌لنیب کؤهنه گؤیرسین! پاخیل‌لار، کوبودلار یاشاتماز بیزی، اوره‌یی قوردلولار یاشاتماز بیزی، سیز کیمی گؤزل‌لر یاشاداجاقلار بیزیم شعریمیزی، اوره‌ییمیزی. آی ایلاهی خانیم، سوفاهی خانیم! یوخدور بو دونیادا شاعیر اؤلومو. بئله دویغولارلا یاشات شعریمی، بئله سئوگی‌لرله اوزات عؤمرومو! * یاراشیقلی- سهمانلی #موسی_یعقوب #شعر_اوجاغی @SheirOcagi

▫️اینسان، عشقین درینلیگینی ساده‌جه آیریلیق لحظه‌‌لرینده آنلاییر. #جبران_خلیل_جبران #شعر_اوجاغی @SheirOcagi

▫️گؤره‌سن ائله دۆزدن هامیسی بو قدر دایاز دوشونجه‌لی‌دیرلر یوخسا فقط سنین یوخلوغون باشقا اینسانلاری گؤزومده بو قدر دیَرسیز، بو قدر کارسیز ائله‌ییب؟ #غسان_کنفانی #شعر_اوجاغی @SheirOcagi

▫️«تموز» چوخدان بیتدی، «آوگوست» دا بیته‌جک. «ائیلول»ده اللرین اوشویه‌جک، ایسینمک اوچون گله‌جکسن، بیلیرم. ائیلول تام بو ایشه گؤره‌دیر، گل باغیشلایاق بیر-بیریمیزی! #یاووز_یۆنت #شعر_اوجاغی @SheirOcagi

▫️خوش اول زمان کی، یار منه همزبان ایدی، بزمیم جمالِ یار ایله رشکِ جنان ایدی، سلطان ایدیم کی، هر یانا حؤکموم روان ایدی، دولت غلام ایدی منه، بختیم جوان ایدی، جانِ حزینه همدم و آرامِ جان ایدی، دملر او دملر ایدی، زمان اول زمان ایدی. خورشیدگون شراب ایله دولموشدو جامیمیز، اول ماه ایله کئچیردی بیزیم صبح و شامیمیز، دورِ فلکدن حاصل اولوردو مرامیمیز، خاکِ دریندن اؤزگه یوخ ایدی مقامیمیز، بولبول‌لره او ساحتِ قدس آشیان ایدی، دملر او دملر ایدی، زمان اول زمان ایدی. هجرین اگرچی گؤرموش ایدیم مبتلالرین، دیلدن-دیله ائشیتمیش ایدیم ماجرالرین، بونجا تصوّر ائیله‌مز ایدیم بلالرین، جان چکمیش ایدی محنتِ هجران جفالرین، خلوت‌سرای وصلده دل کامران ایدی، دملر او دملر ایدی، زمان اول زمان ایدی. کؤنلوم او ماهدن آچیلیردی کرم گؤروب، مهرین زیاده، جور و جفاسینی کم گؤروب. اول گول منه آچیلدیغینی دم‌به‌دم گؤروب، بزمِ وصالده اؤزونو محترم گؤروب، رشک ایله غنچه‌تک دلِ بدخواه قان ایدی. دملر او دملر ایدی، زمان اول زمان ایدی. اول گول منیم‌له همدم ایدی هر بهارده، گه دامنِ چمنده، گهی لاله‌زارده. بولبول تکی ایشیم یوخ ایدی آه و زارده، «سیّد» کی، مسکن ائتمیش ایدی کوی یارده، اعزاز ایله بیر آدمِ جنّت‌مکان ایدی، دملر او دملر ایدی، زمان اول زمان ایدی. #سیدعظیم_شیروانی #شعر_اوجاغی @SheirOcagi

▫️یاشیللیغین ایزی ياشيلليغين ايزی گئتدی، تالاندی ماهني­لاريم و يار سانديغيم اينسانلار اولدولار حاصاريم. جوجرمه‌ميش، بوغازيمدا باغيرتی سولدو يئنه  اليم­ ده چيخدی بوشا، باتدی ان سونونجو واریم. گئجه­‌يدی، سيندی فانوس، سؤندو، سؤيله­‌دی: «گئتمه!» اوْل­‌ ايله سس-سسه وئردی آياقداكی قاباريم. جوماندا ثانيه­‌لر ايچره، دؤندولر قيفيلا دوْن آتدی بو «من»يمی منده، دوْندو شاه­‌داماريم. آچيق قالان باجالار! سيز صاباحی سسله­‌مه­‌يين! نه اوزله نيسگيلمی من صاباحلارا آپاريم؟ گئدن صاباحا، گونش نورونو آچار آپارار منه ايشيلدايان اولدوز دا يوخ، اولا آچاريم. #محمد_صبحدل @SheirOcagi

▫️قادین قادین، قادین... اونو دۇیماق، دۇیورماق ایسترکن، یاخار دوشونجه‌می بیر شؤعله، بیر زهرلی دیکن. بوتون حیاتی چیچک‌لندیرن فقط او... نئچین، نئچین ازیلسین او، بیلمم نئچین سۆروکلَنسین؟! قادین گونش، جوجوق آی... نورو آی گونشدن آلیر، قادینسیز اؤلکه چابوک محو اولور، زاواللی قالیر. قادین الی‌یله فقط بختیار اولور بو جهان، او بیر ملک... اونو تصدیق ائدر بؤیوک یارادان. او چوخ سئویملی، گؤزل، اینجه، نازلی بیر خلقت، اونون آیاقلاری آلتیندادیر فقط جنّت: قادین گولرسه بو ایسسیز موحیطیمیز گوله‌جک، سۆروکلنَن بشریّت قادین‌لا یۆکسله‌جک. #حسین_جاوید #شعر_اوجاغی @SheirOcagi

▫️سنین ساچلارین اوزاندیقجا، منیم عؤمروم ده اوزانیر. #نزار_قبانی #شعر_اوجاغی @SheirOcagi

▫️بیر آوگوست سحری سویونوب تامام، بوز توتدوم، گونش ده اریتمز منی. ائله کؤورَلمیشم، ائله غمگینم، قاییتسا آنام دا، کیریتمز منی. چیخیب بو دونیانین لاپ جیزیغیندان، باخیب گؤرموشم کی او دونیا یوخدو. ائله بیلمیشم کی آزارلامیشام، اوشویور اللریم، اسیر آیاغیم. سورگون یوللارینا دوستاق گؤزلریم، گیروودو اللریم، اسیر آیاغیم. باخیب گؤرموشم کی او دونیا یوخدو، آوگوست‌دو... بس نییه منه سویوق‌دو؟ بس نییه هئچ کیمین خبری یوخدو؟ چؤلده کولک اسیر، چؤلده توفان‌دی، بلکه ده هئچ کیمین خبری یوخدو. تانری بیلیر تکجه... منیم هاوام‌دی. بو دلی کوله‌یین، غریب یاغیشین، نه‌سه بیلدیگی وار، نه‌دی‌سه دئمیر. بیر آوگوست گونونده، بو گونش آلتدا، قاپان اؤز ایچینه، ییغیل کؤکسونه، بورون طالعینه... سیغین بختیه، دیشله دوداغینی، قیر بارماغینی، دولا ساچلارینی، قولونا دولا، دید، داغیت ایچینی، اؤزونو گمیر! بو دلی کوله‌یین، دلی یاغیشین نه‌سه بیلدیگی وار... نه‌دی‌سه دئمیر. من بئله بینه‌*دن اوزو یولایام، منی یوللار دوغوب، یوللار بؤیودوب. منی داش آلتیندا داغ چکه-چکه، حسرت گوَه‌له‌ییب، کدر اۆیودوب. منی بو آوگوستا، بو سویوغا وئر، اوزاق دور بیر دنه‌م... اللرین دونار! بیر ده ائله باخما، بیر ده دانیشما، بیر ده قوجاقلاما ساچیمی ائله، بیر ده اللریم‌له وئریب ال-اله بیر ده قوربان اولوم، دانیشما ائله! آخی تزه-تزه سویوقلامیشام، سؤز وئرمه گونشی، وعد ائتمه داها، اوزاق دور، بیر دنه‌م، اللرین دونار! بو آوگوست آییندا بئله هاوادا، آدام اومید ائدر، آدام اینانار. داها نه اومیدم، داها نه آرزو یورولدو بو روحدان، سیخیلدی بو جان، سنی گؤزله‌یه‌جم سون گوجوم ایله، بو گوندن آوگوستون آخیریناجان. #باهار_زامانلی * کؤچری‌لرین کنددن قیراقدا یئرلشدیگی یئر #شعر_اوجاغی @SheirOcagi

دیالوق ▫️- بو گۆزگو سینیب. + هه، بیلیرم، بئله‌سینی سئویرم. منی اولدوغوم کیمی گؤستریر. 🎬 The Apartment 1960 آمریکا #بیلی_وایلدر #شعر_اوجاغی @SheirOcagi

▫️«یازیق اوشاق، سنین موطلق سیلاحین اولاجاق، لاکین بو سیلاح سنه خوشبختلیک گتیره‌جک‌می؟» دئیه دوشوندوم. 📚 قفقاز سفری #الکساندر_دوما #شعر_اوجاغی @SheirOcagi

🔹تحکییه ادبی درنه‌یی (553-جو جلسه) 🔹آزاد 🔹مهدی سلیمان‌نژاد 🔹ایران تورک ادبییاتی 🔹اورمیه-چهارراه آپادانا- مجتمع فرهنگی هنری اورمیه 🔹سه شنبه-20 مرداد ماه ۱۴۰۴ 🔹ساعت 16:30-19:30 @tahkie آدرس تلگرام Butajournal.com 🟦 کانالیمیزین تلگرامدا لینکی https://t.me/Tahkie 🟦 کانالیمیزین بله‌ده لینکی. ble.ir/join/A2Hg8F3tmf #ادبییات #آذربایجان_تورکجه_سی #مودئرن_نثر_تحکییه #اورمو #مهدی_سلیمان‌نژاد

▫️اویما هر زولفو قارا سئوگیلی جانانه، کؤنول، بو وفاسیزلار ائدرلر سنی دیوانه، کؤنول! ممکن اولدوقجا چالیش یانمایاسان عشق اودونا، شمعدن گؤر نه چکیر هر گئجه پروانه، کؤنول! سن هله عشق کمندینده اسیر اولمامیسان، اویما مجنون کیمی هر زولفو پریشانه، کؤنول! گولده اولسایدی وفا، خار ایله یار اولماز ایدی، بولبولون آهی یاییلمازدی گلستانه، کؤنول! آشنا اولماق عبث‌دی بو پری‌چهره‌لره، یئنه بیر گون اولاجاقلار سنه بیگانه، کؤنول! سئودیگین اولسا زلیخای زمان، سن یوسف، مکر ائدیب سالدیراجاقدیر سنی زندانه، کؤنول! «واحد»ین عؤمرو بوتون نازلی گؤزل‌لرله کئچیب، بو حقیقت سؤزو ظنّ ائیله‌مه افسانه، کؤنول! #علی‌آغا_واحد #شعر_اوجاغی @SheirOcagi

دیالوق ▫️- بو راحاتلیقدا یوخ اولان دویغولارا نئجه گووَنمک اولار؟! 🎬 Blue Valentine 2010 آمریکا #درک_سیانفرنس #شعر_اوجاغی @SheirOcagi