مٌحِبة للِسٌنةَ وَ أهْلهـَا ١٤١٤ هـ 🇩🇿🇸🇦

#تلاوة 🌹

ما تستنايش من الدنيا تعطيكِ راحة كاملة… لأنكِ ببساطة راكي ماشي في الجنة. رانا في الدنيا، والإنسان خُلق فيها في كَبَد… تعب، همّ، مسؤوليات، فراق، مرض، خيبات، وأيام تثقل على القلب. فماشي كل ما تعبتِ معناها حياتك راهي غالطة، وماشي كل ما بكيتِ معناها ربي ناسيكِ، وماشي لازم كل أبواب الدنيا تتحلّ باش تحسي بالطمأنينة. ربي ما وعدناش بدنيا بلا وجع، إنما وعدنا أن التعب ما يروحش هباءً، وأن الصبر ما يضيعش، وأن الجزاء الحقيقي راهو ثمّة… ماشي هنا. 🤍 هنا نعيشو ونصبروا ونسعوا ونحتسبوا… وهناك، في الجنة، ما تشتهيه الأنفس وتلذّ الأعين. لهذا إذا ضاقت عليكِ الدنيا، قولي: "هذي دنيا… وماشي دار راحتي." واصبرى… فربما كل تعبكِ هنا، هو ثمنُ راحةٍ أبديةٍ هناك. 🌹

إنَّ اللهَ جلَّ شأنُه خلقَ الدُّنيا وكتبَ على أهلِها الشَّقاءَ فيها؛ فالمرءُ فيها لا يكادُ يخرجُ من بلِيَّةٍ حتَّى يقعَ في أُختِها الأصغرِ منها -عُمُرًا- الأكبرِ منها -صدمةً وألَمًا، ولكنَّ المُتأمِّلَ يعلمُ أنَّ هذا من أكبرِ العلاماتِ على أنَّها ملعونةٌ، وأنَّها فانيةٌ لا خيرَ فيها -إلَّا ما كان من الخيرِ الذي شرعه اللهُ ورسولُه؛ لذا لا بُدَّ للإنسانِ من أن يعلمَ أنَّ الخيرَ المُطلَقَ ليس إلَّا في طاعةِ اللهِ، والصَّبرِ على أقدارِه واحتِسابِ ذلك عنده، وأن يعلمَ أنَّ ما أصابه لم يكُن لِيُخطِأَه، وما أخطأه لم يكُن لِيُصِيبَه؛ فيكسب بهذا الأجرَ والثَّوابَ عند اللهِ تعالى.🌹

ماشي كل خصومة لازم تدخلي فيها! كاين نوع من الفتن يبدأ بحاجة صغيرة بزاف… كلمة، خلاف، منشور، محادثة، ولا حتى "سكرين" يتنشر للناس، ومن بعد تلقاي روحك دخلتي في قضية ما كانتش تخصك أصلًا! خصومة بين زوج نساء، تدخل ثالثة، ومن ورا الثالثة جماعة، ومن الجهة الأخرى جماعة… ومن بعد تبدأ الحميّة: "أنا مع فلانة!" "وهذي لازم نردّوا عليها!" "هذي خرجت عن المنهج!" "هذي لازم نحذّروا منها!" وتتحول مسألة كانت بين شخصين إلى معركة كبيرة، فيها كلام، سخرية، تشهير، تبديع، وتراشق… حتى يولي الإنسان ما عادش يعرف واش كان أصل المشكلة! يا أختي، ماشي كل حاجة تسمعيها لازم يكون عندك فيها موقف، وماشي كل خصومة لازم تكوني طرف فيها. قال النبي ﷺ:«مِن حُسنِ إسلامِ المرءِ تركُه ما لا يعنيه». نعم، كاين مواقف لازم فيها نصرة للحق ودفع للباطل، وكاين شبهات لازم تُبيَّن، بصح هذا ما يكونش بالاندفاع، ولا بالعاطفة، ولا بنشر محادثات الناس وأسرارهم، ولا بتحويل الخلاف إلى حرب بين الأتباع. إذا قدرتي تنصحي بحكمة، بعلم، وبلا ما تزيدي النار حطبًا فانصحي ،وإذا ما عندكش علم كافي، ولا الأمر ما يعنيكش… مرّي مرور الكرام. ماشي لازم كل مرة تثبتي ولاءك بالدخول في الخصومات. وماشي كل من سكتَ عن معركة يكون جبانًا؛ أحيانًا السكوت حكمة، وترك ما لا يعنيك عبادة. لأن أخطر حاجة أن تبدأ الخصومة باسم "نصرة الحق"، ثم تتحول مع الوقت إلى نصرة للأشخاص، وحميّة للجماعة، وعداوة لمن خالفهم. فاسألي روحك قبل ما تدخلي: هل أنا فعلًا أنصر الحق؟ ولا غير نفسي حابة تدخل في الخصومة؟ وإذا ما كانش عندك جواب واضح…خليها. ربي يرزقنا البصيرة، ويجنبنا الفتن، ويعلّمنا متى نتكلم ومتى نسكت، ومتى ننصر الحق ومتى نترك ما لا يعنينا. فهل أنتِ تاركةٌ لما لا يعنيكِ؟ عسى أن تزول الغمّة. 🌹

قبل ما تنشر... سَقسي روحك: واش الفائدة لي راح تجنيها من نشر صور النساء؟ وواش الفائدة من نشر صور الرجال؟ وواش الفائدة من عرض زوجك، ولا حتى عرض نفسك وجلبابك للناس كامل؟ راك تقول: "عادي"... بصح هذا "العادي" هو لي وسّع باب الفتنة حتى ولى الناس ما عادوش يحسّو بيه. للإخوة... بارك الله فيكم، جنّبونا صور النساء في المنشورات، حتى ولو كانت النية طيبة. وللأخوات... جنّبونا صور الرجال، فما كل قلب ثابت، وما كل عين تغض بصرها. وللمتزوجات... زوجك نعمة أكرمك الله بها، ماشي محتوى للقصص والمنشورات، خلي حياتك الخاصة مستورة، فالستر زينة. ولبعض الأخوات الملتزمات... حتى صوركن وصور جلابيبكن، خليها بينك وبين ربك. ما كل خير يُفعل لازم يُعرض، وما كل مباح يُنشر. كثرة الظهور تميت هيبة الستر، وتفتح أبوابًا ما كان لها أن تُفتح. رانا في زمن ولات فيه الفتنة تدخل للبيوت من شاشة صغيرة في الجيب، وكل واحد يزيد يفتح بابًا ويقول: "ما فيها والو." بصح فيها... فيها إطلاق للأبصار، وتعلّق للقلوب، وإشغال للناس بما لا ينفع. الشيطان ما يبدأش بالكبائر... يبدأ بخطوات صغيرة حتى تولي المنكرات مألوفة، والقلوب ما عادش تنكرها. اتقوا الله في أنفسكم، واتقوا الله في قلوب إخوانكم وأخواتكم. والله، الستر ما عمره ندم صاحبه، لكن كم من صورة نُشرت، بقي إثمها يجري بعد سنوات، وصاحبها يحسب أنه كان يفعل خيرًا.🌹

قبل ما ترقدي حبّيت نقولك حاجة يا الشابّة ♥️ واش فايدة أنك تدخلي لفراشك وجسمك راقد... وعقلك مازال يجري بين همّ البارح، وخوف غدوة، وتخمام ما يبدّل حتى حاجة؟ راه كاين ربّ ما ينعسش، وهو لي بيده كل الأبواب المغلوقة، وكل الأمنيات المؤجلة، وكل الدعوات لي قلتيها بينك وبين روحك. يمكن الحاجة لي بكّاتك اليوم... هي نفسها لي غدوة تخليك تسجدي شكرا لله. ويمكن التأخير لي راكي شايفاه عقوبة... هو في الحقيقة رحمة، لأن ربي يعرف الوقت المناسب أكثر منك. نامي وقلبك مطمئن، وخلي أمورك عند الكريم، فما خاب من وكّل أمره لله. ﴿وَمَن يَتَوَكَّلْ عَلَى اللَّهِ فَهُوَ حَسْبُهُ﴾. تصبحي على طمأنينةٍ تملأ قلبك، وبشائر تُفرح روحك. 🌹

ربما الكلام هذا ما يعجبش بزاف ناس... بصح الحق ما يتبدلش على خاطر الناس زعفوا منه. كاين لي كانت البارح تستحي يبان منها حتى طرف ثوب، واليوم ولات تصور روحها، وتخرج في الفيديوهات، وتقول: "راني نخدم للدين"، "راني نوصل رسالة"، "هذا نجاح"! لا يا أختي... النجاح ما هوش أنك يعرفوك الناس، النجاح هو أن يرضى عليك رب الناس. واش ربحتي إذا زاد عدد المتابعين ونقص رصيدك عند الله؟ واش الفايدة من محتوى فيه كلام طيب، والطريقة لي يتقدّم بيها فيها مخالفة لشرع الله؟ المشكل ماشي غير فتور... المشكل كي يولي الحرام يتسمّى تطور، والظهور يتسمّى إنجاز، والتجرد من الأحكام الشرعية يتسمّى شخصية قوية! الشيطان ما يجيش يقولك: اعصي الله مباشرة... يجي يزيّنلك المعصية، ويغيّر اسمها، حتى تولّي تفتخري بها وتحسبيها نجاحًا. يا أختي... إذا كان لازم تختاري بين رضا الناس ورضا الله، فاعرفي بلي الناس لا ينفعوك يوم القيامة، ولا يتكلم واحد منهم كي توقفين بين يدي الله وحدك. الثبات على الحق اليوم ولى غريب... لكن الغربة في طاعة الله أشرف من شهرةٍ تُغضب الله. كوني معروفة عند أهل السماء، وما يهمكش إذا كنتِ مجهولة عند أهل الأرض.🌹

📍ليس كل من تكلمت في الدين صارت قدوة... في هذا الزمن كثُر من يرفع شعار "الوسطية"، حتى صار بعض الناس يستعمله في مقابل الالتزام بالسنة، وكأن التمسك بالحق تشدد! ترى بعض صانعات المحتوى يبدأن بنقل كلام العلماء، ثم لا يلبثن أن يستبدلنه بآرائهن، ويقدمن النصيحة بما يوافق أذواق المتابعات أكثر مما يوافق الدليل. نصيحة ممزوجة بالمؤثرات، وظهور مستمر، وابتسامات، وروتينات، وفلوغات... حتى يضيع الحد الفاصل بين الدعوة وصناعة المحتوى. والداعية لا تقيس نجاحها بعدد الإعجابات، بل بصدق الاتباع. ولا يكون الحق حقًا لأنه أعجب الناس، بل لأنه وافق كتاب الله وسنة رسوله ﷺ بفهم السلف الصالح. فاحذري يا أمة الله من كل خطاب يخلط بين الحق والباطل، ويزين التنازلات باسم اللين أو الوسطية، فإن الحق لا يحتاج إلى تلوين حتى يُقبل. قال الله تعالى: ﴿وَلَا تَلْبِسُوا الْحَقَّ بِالْبَاطِلِ وَتَكْتُمُوا الْحَقَّ وَأَنْتُمْ تَعْلَمُونَ﴾. نسأل الله الثبات على السنة، والبصيرة في تمييز الحق من الباطل.🌹

📍"أنا نخرج بصورتي باش نعلّم النساء الدين." بصح... واش لازم يبان وجهك ولا صوتك باش يوصل الدين؟ يا أختي، إذا كان قصدك فعلاً هو نشر الخير، فالخير ماشي مربوط بالصورة تاعك. كاين القرآن، والحديث، وكلام العلماء، والكتب، والفوائد، والمقاطع النافعة... أبواب الخير مفتوحة. أما تقولي: "محتواي للنساء فقط." هذا مجرد شعار... لأن المواقع ما فيهاش باب مكتوب عليه: "الدخول للنساء فقط." أي رجل يقدر يدخل، يشوف، يسمع، ويتابع... وأنت ما عندك حتى قدرة تمنعيه. وزيد اسألي روحك... إذا كنتِ كي تخرجي للشارع تتستري، وتخافي يبان منك شيء، وتحرصي على حيائك... علاش كي تدخلي للدار تفتحي الكاميرا، وتخلي آلاف الناس يطّلعوا على صوتك، وحركاتك، وحتى تفاصيل يومك؟ الغريب أن بزاف حسابات بدايتها كانت: "ننشر الدين." وبعد أشهر ولات: "روتيني الصباحي." "واش شريت." "تعالوا حضروا القهوة معايا." "هاذي بيجامتي الجديدة." "هاذي مشترياتي." وشوية بشوية... يولي المحتوى من دعوة إلى استعراض حياة. أختي... الشيطان ما يجرّش الإنسان دفعة وحدة. يفتح عليه باب صغير، ومن بعد باب أكبر، حتى ينسى علاش بدا أصلاً. الدعوة إلى الله عبادة عظيمة، وما تحتاجش المرأة تعرض نفسها حتى تكون نافعة. قد يكون منشور تنقليه من كلام عالم، أو فائدة من كتاب، أو آية مع تفسيرها... أعظم أجرًا عند الله من عشرات المقاطع اللي يكون فيها ظهورك. احفظي حياءك... فالحياء إذا خرج، صعب يرجع. ليس كل ما نقدر نفعله، ينبغي أن نفعله. وليس كل نية حسنة تجعل الوسيلة صحيحة. اللهم ارزق نساء المسلمين الحياء والعفة والثبات، واجعلنا ممن يستمعون القول فيتبعون أحسنه. 🤲🌹

كاين نعم عايشين فيها كل نهار، بصح من كثرة ما ألفناها ولّينا نحسبوها عادية. تقدري تتحملي الحر والبرد... بصح راكي في دارك، مستورة وآمنة، هذي نعمة. تقدري تاكلي خبزة و ماء ولا أكلة بسيطة... بصح راكي بصحتك وما يوجعك حتى شيء، هذي نعمة. أولادك يعيّوك، يكسرولك راسك، يخلوك ما ترتاحيش... بصح راهم معاك. الدار عامرة بيهم، وضحكتهم ترد الروح. والله كاين لي يتمنى يسمع كلمة "ماما" مرة وحدة وما قدرش. تصبحي الصباح وتفيقي بلا وجع، بلا مستشفى، بلا إبر، بلا تحاليل ولا مواعيد عند الأطباء... والله هذي من أكبر النعم لي لازم نحمدو ربي عليها كل يوم. والرزق ماشي غير دراهم. الرزق زوج صالح يسندك وقت ضعفك، وأهل يدعولك، وقلب مطمئن، وستر، وأمان، وراحة بال. المشكل أننا ما نحسّوش بقيمة النعمة حتى تروح، ومن بعد نقولو: "يا ريت ترجع كيف كانت." لهذا، قبل ما تشكي من واش ناقصك... شوف واش عطاك ربي. يمكن راك عايش اليوم نعم يتمناها غيرك ليل ونهار. ﴿وَإِن تَعُدُّوا نِعْمَةَ اللَّهِ لَا تُحْصُوهَا﴾. الحمد لله على كل نعمة عرفنا قيمتها، والحمد لله على كل نعمة غفلنا عنها وهي سبب في راحتنا.🌹

الدنيا ما عمرها كانت دار قرار... هي مجرد محطة قصيرة، وكل يوم يقربنا من آخرها. اليوم نفرحو... وغدوة يمكن نبكيو. اليوم نضحكو... وغدوة يمكن نفارقو. واليوم نخططو لأحلامنا... ويمكن ما نلحقوش نشوفوها. لهذا قال الله تعالى: ﴿وَالْآخِرَةُ خَيْرٌ وَأَبْقَى﴾. هناك ماكانش نهاية... يا نعيم ما يفنى، يا عذاب نسأل الله السلامة منه. وماكانش طريق ثالث. لهذا اسألي روحك كل يوم: هل الذنب لي راني مصرّة عليه يستاهل نغامر بآخرتي؟ هل الأغنية لي نسمع فيها تستاهل؟ هل اللباس لي يغضب ربي يستاهل؟ هل الغيبة والكلام في أعراض الناس يستاهل؟ هل ترك الصلاة أو تأخيرها على خاطر الدنيا يستاهل؟ هل دقائق المعصية تستاهل سنوات من الندم... ثم وقوف بين يدي الله؟ والله ما كاين حتى شهوة، ولا موضة، ولا شخص، ولا متعة مؤقتة تستحق نخسر عليها جنة عرضها السماوات والأرض. ما دام الروح في الجسد... باب التوبة مازال مفتوح. راجعي نفسك، صححي طريقك، وكثري من الطاعات، وردّي المظالم لأهلها، واستعدّي للقاء الله. الدنيا راح تخلّيك... أما الآخرة هي لي راح تبقى معاك للأبد. اللهم ارزقنا توبةً صادقة قبل الموت، وثباتًا على طاعتك، واجعل الجنة هي دارنا وقرارنا. آمين. 🌹

اشتقت لصباح كان يبدأ بوجه أبي و بصوت أبي وبحديث أبي اللهم أنر قبر أبي بنورك الذي لا ينطفئ أبدا و اجمعني بوالدي في جناتك 💧💧

📍 يا أختي... علاه راكي مقلقة؟ وعلاه كل نهار طالعة هابطة وكأن الدنيا راح تسالي؟ واش راكي حابة تستعجلي؟ الرزق؟ الزواج؟ الفرج؟ ولا تحقيق حلم معين؟ اسمعي مليح... لو كان الأمر بيد الناس، يمكن ما تنالي حتى حاجة، لكن الأمر بيد الله، والله إذا أراد شيئًا قال له: كن فيكون. كم من إنسان ظن أن الأبواب كلها تسدّت في وجهه، ثم فتح الله له بابًا ما كان حتى يتخيلو. وكم من دعوة تأخرت سنوات، فلما استجابها الله، عرف صاحبها أن التأخير كان رحمة، وأن اختيار الله كان أجمل من كل ما كان يتمناه. ما تتعبيش قلبك بكثرة التفكير، وما تقتليش روحك بالقلق... لأن القلق ما يقدّم حتى حاجة، وما يأخر حتى حاجة، وما يغيّر حتى قدر. إذا كتبها ربي... تجيك ولو كانت بينك وبينها آلاف الأسباب. وإذا ما كتبهاش... ما راح تناليها ولو اجتمع أهل الأرض كامل باش يعطوهالك. لهذا... كالمي روحك، وأكثري من الدعاء، وخلي قلبك معلق بربي، ماشي بالظروف. 🌿 واطمئني... ما أخّره الله عنكِ ليس نسيانًا، وإنما لحكمة، وما خبأه لك قد يكون أجمل مما تتمنين. فاصبري، فإن تدبير الله دائمًا خير من تدبيرنا لأنفسنا🌹

يا أختي... ما تغرّكش حياة الناس. راك تشوفي لقطة من حياتهم، بصح ربي وحده يعلم واش مخبّي وراء الستار. يمكن لي حسدتيها على زوجها، راهي صابرة على ابتلاء ما تطيقيهش. ولي قلتي عليها محظوظة بالمال، يمكن محرومة من راحة ما يشرى حتى بثروة الدنيا. ولي عجبك علمها، يمكن وصلتلو بسنين من التعب، والسهر، والدموع. ما كان حتى واحد في هاذ الدنيا عايش حياة كاملة. كل واحد عندو ابتلاء، وكل واحد ناقصو شيء، وكل واحد راه يستنى فرج من ربي. راك تقارني قدرك بظاهر الناس، وناسية بلي ربي يقسم الأرزاق بالعدل والحكمة، ماشي بالهوى. يمكن الحاجة لي حرمك منها اليوم، هي نفسها لي راح تحميك غدًا. ويمكن الحاجة لي تتمنيها، لو جاتك في وقتها كانت راح تكون سبب في شقائك. إذا شفتي نعمة عند واحد، باركي وقولي: "ما شاء الله، اللهم بارك، اللهم ارزقني من فضلك." وما تدخليش روحك في دوامة الحسد والمقارنات، لأنها ما تزيدك غير همًّا، وتخليك تنسي بحر النعم لي راكي عايشة فيه. أكبر نعمة ماشي دار كبيرة، ولا سيارة، ولا زواج، ولا منصب... أكبر نعمة أن ربي يثبتك على دينه، ويعافيك في بدنك، ويشرح صدرك، ويختم لك بخاتمة حسنة. ارضي بقضاء الله، وتوكلي عليه حق التوكل، واسأليه من فضله، فما خاب قلب تعلّق بالله، وما رجع عبد طرق باب ربه صادقًا إلا فتح له من الخير ما لم يكن يحتسب. اللهم ارزقنا قلوبًا راضية، ونفوسًا قانعة، وأرزاقًا مباركة، واجعل نصيبنا الأكبر من الدنيا طاعتك، ونصيبنا الأكبر من الآخرة جنتك. 🤍🌹

📍آخر مرة... بكيت بينك وبين ربّي على ذنوبك، وقتاش كانت؟ ماشي بكيت على همّ، ولا على ضيق، ولا على خسارة... بصح بكيت لأنك عصيت ربك؟ واش عمرك قعدت وحدك، بلا هاتف، بلا ناس، وقلت: "يا نفس... وين راكي رايحة؟" نحاسبو أرصدتنا، ونحاسبو أعمارنا، ونحاسبو الناس على أخطائهم... لكن قليل اللي يحاسب روحو قبل ما يوقف قدّام الله. كل يوم يمرّ علينا، يا يزيدنا قُرب من الجنة... يا يقرّبنا من النار. وكل ذنب نستهين به اليوم، غدًا نلقاه مكتوبًا في كتاب لا يغادر صغيرة ولا كبيرة إلا أحصاها. الدنيا راهي تجري، والعمر ينقص، والقبور راهي كل يوم تستقبل ناس كانوا يقولوا: "مازال قدّامي الوقت." إذا قسا قلبك، ارجع للقرآن. إذا كثرت ذنوبك، أكثر من الاستغفار. إذا غلبتك نفسك، جاهدها ولا تستسلم. ربي ما يغلقش باب التوبة حتى تطلع الشمس من مغربها أو تبلغ الروح الحلقوم. فما دامك حيّ... الباب مازال مفتوح. 📌 حاسب نفسك اليوم... قبل ما تتحاسب غدًا. وما تخليش الشيطان يقنعك بلي "ما عندها حتى معنى"، فرب دمعة صادقة من خشية الله، تكون سببًا في نجاتك يوم القيامة.🌹

اللي ما كتبوش ربي ليك... لو تجري وراه عمرك كامل، ولو تحارب الدنيا كاملة باش توصلو، والله ما يكون من نصيبك. واللي كتبهولك ربي... لو كانت بينك وبينو ألف حجرة وألف باب مسدود، يجيك حتى لعندك بلا ما تتعب روحك. احنا نتعلقو بالأشخاص، بالأحلام، وبالأمنيات... وإذا راحت، نحسبو بلي الدنيا حبست. والحقيقة أن ربي صرف علينا حاجات كنا نحسبوها نجاة، وهي كانت ممكن تكون هلاك. ما كل باب تسد في وجهك خسارة... وما كل فراق عقوبة... وما كل تأخير حرمان. الرضا ماشي كلام يتقال، الرضا أنك تبكي، يوجعك قلبك، ومازال تقول: الحمد لله... هذا قضاء ربي، وربي ما يظلمش عباده. خلي قلبك معلق بربي، ماشي بالمخلوق. لأن المخلوق يتبدل، يرحل، ويخذلك... أما ربي إذا منعك، فمن رحمته، وإذا أعطاك، فمن فضله. ارضَ بالمكتوب... راك ما تعرفش من شنو نجاك ربي، وما تعرفش واش مخبي لك من خير. 🌹

الناس لي يضحكو على الحجاب الشرعي، ويقولو: "خيمة"، "كيس قمامة"، "متخلفة"، راهم ما يعرفوش خطورة الكلمة لي تخرج من أفواههم ، المسألة ماشي رأي شخصي، وماشي ذوق في اللباس، وماشي قضية "يعجبني ولا ما يعجبنيش". الحجاب الشرعي حكم من أحكام الله، أمر به سبحانه في كتابه، وأجمع عليه علماء المسلمين. والاستهزاء بشعيرة من شعائر الإسلام أو بحكم ثابت من أحكامه أمر خطير جدًا، قال تعالى:﴿قُلْ أَبِاللَّهِ وَآيَاتِهِ وَرَسُولِهِ كُنْتُمْ تَسْتَهْزِئُونَ ۝ لَا تَعْتَذِرُوا قَدْ كَفَرْتُمْ بَعْدَ إِيمَانِكُمْ﴾. فانتبه قبل أن تكتب تعليقًا أو تنشر نكتة أو تسخر من امرأة لأنها تمسكت بما أمر الله به. المؤلم اليوم أن بعض الناس لا يكتفون بترك الحجاب الشرعي، بل يحاربون من تلبسه، ويصفونها بأبشع الأوصاف، بينما يصفقون لكل لباس يخالف شرع الله، وكأن المقياس أصبح رضا الناس لا رضا رب الناس. والأشد من ذلك، أن البعض يريد دينًا على مقاس هواه؛ يقبل من الشرع ما وافق رغبته، ويرد ما خالفها، فإذا ذُكر الحجاب قال: "المهم الأخلاق"، وإذا ذُكر الستر قال: "الله ينظر إلى القلب". ونحن نقول: نعم، الله ينظر إلى القلب، لكنه أيضًا أمر الجوارح بالطاعة، وأمر المرأة بالحجاب، وأمر الرجل بغض البصر، ودين الله يؤخذ كاملًا لا نختار منه ما يعجبنا ونترك ما لا يعجبنا. اليوم في حر الدنيا، لا يكاد الإنسان يتحمل دقائق تحت الشمس، يبحث عن الظل والمكيفات والماء البارد، فكيف بحرّ يوم القيامة؟ يوم تدنو الشمس من الخلائق، ويشتد الكرب، ولا ينفع إلا عمل صالح ورحمة من الله. فاحذر أن تلقى الله وقد سخرت من حكم من أحكامه، أو أعنت غيرك على الاستهزاء بدينه ،باب التوبة مفتوح، فتب إلى الله، واستغفره، وعظّم شعائره، فإن من أعظم علامات الإيمان تعظيم ما عظمه الله، قال سبحانه:﴿ذَٰلِكَ وَمَنْ يُعَظِّمْ شَعَائِرَ اللَّهِ فَإِنَّهَا مِنْ تَقْوَى الْقُلُوبِ﴾. نسأل الله أن يرزقنا تعظيم دينه، والثبات على طاعته، وأن يهدينا جميعًا إلى الحق قبل أن يأتي يوم لا ينفع فيه الندم.🌹