الشاعرمهندالعطواني القناة الرسميه

نعي وابوذيات استشهاد الرسول ص &&&&&&&&& من شيعو صاحت الزهره افراگ الابو ياناس كسره المثل النبي مو هين امره جرح الابو محّد يجبره فرگاك احس مارد دليلي من رحت مني راح حيلي ويلي الهجر شيحمله ويلي طفو الشمعه التضويلي افراگ الابو بالگلب علّه بلبيت عگبه اتصير خلّه الرايح ابوه بالدنيه شلّه باقي بعد يگضيهه ذله الدنيه ما اتحصل راحه منهه الجنه الزهره يشتم راحه منهه الزچيه اليوم ابوهه راحه منهه الله يعينهه ابهاي الرزيه يبويه الدنيه من بعدك مردهه وروحي افراگك اذاهه مردهه الابوهه ايموت من تبچي مردهه وبچيت وصاحت الوادم عليه وحيده ابدار حزني ماحد وياي وحديت وبچه الحادي ماحدوياي غيرك ياهو عندي ماحد وياي حزن ما ادري شنهي ايصير بيه الشاعر مهند العطواني

نعي لاستشهاد الرسول محمدص &&&&&&&&& صاحت يعزي ويا دَلالي غالي البچه والراح غالي فگد الابو موش اعله بالي ياناس حال الضيم حالي ابفگد النبي ضل موحش الدار راح وحناهه اضلوعي الاگصار حار الامفارگ والدمع حار بيه الم من كل الاكتار اليوم الزچيه اتصيح ويلي افراگ الابو هدالي حيلي اضلم نهاري ويه ليلي امنين اجيب اليتچيلي محمد راح بالهَم راح ابونه وگضينه العمر كله راح ابونه الزهره اتصيح الحگو راح ابونه وضلت دارنه عگبه خليه الدهر خلّف حزن بيه ولچمات لچم طاب ولچم بعده ولچمات يروحي اللي تحبينه ولچمات وبقت لوعات فكده لهسه بيه بچيت امن البواچي الناس لامات وگالو هذا حزنچ يضل لامات ياهو اللي يعوض الابو لامات تضل جمرة افراگه للمنيه الشاعر مهند العطواني

نعي وابوذيات استشهاد الرسول ص &&&&&&&&& بفراگ الابو ماضل بعد حيل حياة الفاگده تخلص تواسيل يخلص بلبچي كلما يمر ليل حصد گلبي الحزن حصد المحاصيل ما ريّض ابد تابوت اهلنه يفراگ الاهل كلش كتلنه انجاوب بالدمع كلمن سألنه بويه بفرگتلك يهدل حملنه ابد ماينحمل يفراگ الاحباب من حرگت دليلي طلع عطاب تره اعيوني عمت ردو يغيّاب تاخذ گلبي ضلت دگة الباب الدار الحزن فاطمتك يبوهه ومامش صوت كون الهه يبوهه عماهه البچي گوم الحگ يبوهه ليل انهار بس تبچي الزچيه بگلبهه الحزن نيرانه وجلهه وبين شيبهه وهمهه وجلهه الاخذ منهه النبي اذاهه وجلهه وضلت تنتظر گرب المنيه المصايب حيل فاطم حدبّنهه موبس ظهر حدّب حدبّنهه المصايب من ابوهه حدبّنهه بچي امن النبي لحد الغاضريه @@@@@@@ كلمات مهندالعطواني

حسين خالي وجيت اضحي لخالي اليوم يم اخيامه اذب اعگالي عون شد احزامه..وگام لف الثامه &&&&&&& نص 1.. صدگ ثلثينه الخواله...ما وگف واحد اگباله عون من طب للحرب گام كض الرايه بيده… وصال صولات الصميده يغلب وما ينغلب الزلمه بيكم خل ينازل… وحگ ريشات ابوفاضل اله اترسكم رعب اتعنو حسين ومشو يشكوله فكنه من ابن اختك يگلوله ما نگف جدامه..عون شد احزامه &&&&&&& نص2.. الحرب عركه وماكو عطوه..خالي بس صيح انت تگوه اله ادوس اعله الزلم راح اطب اعليهم انا..الزلمه خل يبقه ابمكانه وتدري ببن اختك شهم ماخذ امن احسين حيله ..وشد وزرته ولكد خيله وگله الحسين ونعم خالي گلهم ابن اختنه امعاند اليوم ماضن يبقه منكم واحد الجيش عض ابهامه..عون شد احزامه &&&&&&&& نص3.. محّد ايلحگه ابسبوگه..واليطيح يدوس فوگه وسد عله الجيش الهوه فك مضيفه وطبخ طبخه..عله خاله الحسن كشخه وكاشخ بچفه اللوه حسين گله ناصرتنه… والنعم من ابن اختنه اليعطش وشافك روه گله خالي هسه شنهي الغايه أَنه امن ايدك هاي ليدك هايه راح اودي اگوامه..عون شد احزامه &&&&&& نص4.. وزينب اتصد الولدهه..وحاطه چفهه اعله خدهه وتنظر اعليه من برز گلهم انا حسين خالي..الزلمه خل يوگف اگبالي هيچ هوّس وارتجز والعساكر كلهه جفلت..واكو ابنص الزلم ختلت بلرگب من سيفه حز وقسم صاحت عون فدوه اغديلك تره هذا الجيش ميكفّيلك حيراهه ازلامه..عون شد احزامه &&&&&&& نص5.. طب اسد مجروح چنه..الوادم اتباعدت منه وياهو يگرب للأسد زلم من الخوف شردت..خيل عالخيّاله صعدت شال بتّاره وحصّد گضه الجيش وخلص نصه..ولبوفاضل خلّه حصه وصاح جيبو اكثر عدد بي صفات العد علي موجوده طشّر الجيش وكتل شاهوده هامه طگهه بهامه..عون شد احزامه &&&&&&& مهندالعطواني

گلي ابوي .. يلله شيل الرايه گلي ابوي .. طلعت المشايه گاصدينك.. گاصدينك &&&&& نص1.. گلي يلله.. اذكر الله .. وكربله اتعناهه تره زينب ..بويه تتعب..ياهو يتلگاهه مت تجي زواره.. تنحسب خطاره الزهره تمشي وياهم (( عابس يتلگه المشايه)) ((وحسين ايشيل الهم رايه)) گلي ابوي .. هيه هاي الغايه گلي ابوي طلعت المشايه گاصدينك.. گاصدينك &&&&& نص2.. بويه انصحك.. لا تعطلك .. كل الايضدونه نزف دمه.. المات يمه ..بويه الف خيعونه روح يمه اتباچه.. والدوه ابشباچه المرضه يمه ادواهم (( واليوصل غاد يطيبونه)) ((وسالم لعياله يرجعونه)) گلي ابوي.. لا تعطلك هايه گلي ابوي.. طلعت المشايه گاصدينك.. گاصدينك &&&&&& نص3.. وصل حدهه.. صير گدهه.. وعالجدام امشيهه الماتعنت ..لبو اليمه ..خل تغم رجليهه والگصد خيعونه.. باچر يحظرونه ابقه دوم وياهم (( واليمهم صيته يعلونه)) (( وفوگ امن الغيم ايوصلونه)) گلي ابوي.. انطيني هسه احچايه گلي ابوي .. طلعت المشايه گاصدينك. .گاصدينك &&&&&& نص4.. هيه غايه.. السنه هايه .. تختلف عن غيرهه والتضدنه .. وماتودنه.. ينكسر تحذيرهه رادو يبعدونه.. بحجة الكورونه واحنه سكتناهم (( ويمك ذبينه الكمامه )) (( يحسين الحگ ذوله ازلامه )) گلي ابوي.. التضدنه اهوايه گلي ابوي ..طلعت المشايه گاصدينك.. گاصدينك &&&&&& نص5.. بويه امشي.. افدي كلشي.. وموكبك لتعوفه وعله اجدامك.. صوب امامك.. ولاتهمك خوفه حسين جنه وغايه ..وكعبه للمشايه الراد يتعناهه (( واليوصل يمه يحسدونه)) (( ومن اهل الخير يحسبونه )) گلي ابوي ..لازم امشي برايه گلي ابوي .. طلعت المشايه گاصدينك ..گاصدينك &&&&&&&% كلمات مهندالعطواني

رآح..بس اگلك هايه شوف.. شنهي تعني الرآيه @@@@ نص1.. نخوتنه..العباس ..كلمتنه ..العباس .. غايتنه..العباس..هيبتنه ..العباس عاده عد اهل البخت موجوده..ومعهوده..ومريوده..ومحلاهه بكل فصل رايه اكو ايقدرونهه..يعرفونهه..يجلونهه..تلگاهه بس لمن تنعگد..للرايه من نشد كل فتنه تنخمد..كون يعرفهه ابن الاصل..بالرايه مايزل يوگع نص بلفصل..كون هاذ .. بالعشاير ثايه شوف..شنهي تعني الرايه @@@@@ نص2.. قائدنه..العباس..ساندنه..العباس عاهدنه..العباس..ما ردنه..العباس الگصد شد رايته يتعافه ..ويتشافه ..وبشفافه..حاجاته يرد ماخذ طلبته وبأيده ..اللي يريده..ويزيده..بطلباته هالرايه معدله..متروسه مرجله يشهد طف كربله..هاي ماطاحت عالثره ..من سبع الگنطره شايلهه بمفخره..هاي وين..العنده شك وغايه شوف..شنهو تعني الرايه @@@@@ نص3.. يدرونه..العباس..يهابونه..العباس يعرفونه ..العباس..من اعيونه..العباس تعتنيه مشايته وبرايته..وبحمايته..وبزياته..يگصدوله هذا هيبة كربله واحبابه..بمصابه..يم بابه..يمشوله واليوصل حظرته..ويشاهد گبته ويحصل حاجته..راح بس حلفه بالخدر..ورقيه واليسر لتضنه يعتذر..راح روح… اسئل المشايه شوف..شنهو تعني الرايه @@@@ نص4 يرزقنه..العباس..يحفظنه ..العباس كل حبنه..العباس..جننه..العباس القلهو الله احد عباسنه..بنفاسنه ..بس ناسنه..يحرفوهه لم يكن له احد صولاته..وكلماته..ووگفاته..يعرفوهه لمّن طب للنهر..كل الجيش انكسر صاحو رد يالگمر..خوف طب ليهه بصارمه..سواهه ملحمه رد بيده الغانمه..خوف هيچ..النهر يرجف مايه شوف .. شنهو تعني الرايه @@@@@ نص5.. لطمتنه..العباس..دمعتنه..العباس صيحتنه..العباس..طبرتنه..العباس ولو نظرنه الرايته نتباهه..شمحلاهه..خلاهه..بچفوفه ولو نشاهد خزرته لمن طب..من ضهضب..ريح وهب..بطفوفه عدوانه اتراجفت..من عنده اتشاردت موتتهم گربت..بي دگ صدره وغيرته.. ما ثنّه بظربته چن حيدر شمرته..بي خوف..والنهر جف مايه شوف ..شنهو تعني الرايه @@@@@@ كلمات مهندالعطواني

نداء..نداء..طلعت المشايه @@@ نص1.. شد حيلك من هسه وحظرّ رايتك اتواسي المسبيه بهايه خطوتك من تطلع معناهه الزهره اختارتك خطواتك تنكتب..صاع ابصاع تنحسب..وبأسمك تنسّب..واعيونك جبرائيل يلزمك..ميكائيل يخدمك..الله يريد يكرمك..خيعونك وفاء..وفاء..يالرفعتو الرايه نداء ..نداء..طلعت المشايه @@@@@ نص2.. هنيالك يالطالع گاصد كربله ملاچك ينتضرك لازم توصله كل خطوه التمشيهه اترفعك منزله ايامك من تمر..لتضنهه امن العمر..انخدمك نفتخر..خدامك كل موكب بالدرب..يتفاخر بي تطب..يتبرك بالترب..بجدامك ولاء..ولاء..حد حدود الغايه نداء..نداء..طلعت المشايه @@@@@ نص3.. خطواتك بالممشه محسوبات الك وبس تنوي تمشيله حسين يسجلك واليخدم موخادم يتسجل ملَك من تنزل دمعتك..معناهه شافتك..والزهره اتلگتك..هنيالك حط هايه بحكمتك..مقبوله ازيارتك..ثق تاخذ حاجتك..لبالك شفاء..شفاء..بلمسير اهوايه نداء..نداء..طلعت المشايه @@@@ نص4.. ارد اوصيك أبكلمه خل بالك حذر من اتشوف ابدربك اخيام وستر اتوقع بالخيمه تلگه ام الخدر متكفله بعايله..ومعزبه بكربله..واليگصد بلهلا..اتحييله واتگلكم شيعتي..بس بيكم نخوتي..اتعنو لاخوتي..بهاليله عزاء ..عزاء..عفيه يالوفايه نداء ..نداء..گصدت المشايه @@@@@ نص5.. الاملاك اتحسده اليمشي اعله الجَدم والاشراف ابدربه يلگاهم خدَم بس احسين اليسوه والباقي عدَم يستاهل تخدمه..هذا ابن الغانمه..واليخدم يكرمه..بالراده يگضيله حاجته..ويرزقه بجنته..ويعظم هيبته..وزياده رياء..رياء..لا تحط ابهايه نداء..نداء..طلعت المشايه @@@@ نص6.. ياهو الگبلك ميت واتضل نعمته والعالم شبعانه كلهه بسفرته وحته الله بكل جمعه يزوره بحظرته هالواقع نجهله..مانقبل ننقله..حسين الله مجلله..شعليهم الما يحظر باللطم..من خيره ينحرم..واليخدم ينكرم..خليهم دماء..دماء..الك ننطي احچايه نداء ..نداء..طلعت المشايه @@@@@ كلمات مهندالعطواني

جبريل اجه بآيه..خدمة المشايه مي هايه وي هايه..الكم سبيل @@@@ نص1.. ملّك نازل..بديه شايل..اضن جربة ..ابوفاضل .. نزل يروي ضمه الزوار اجه يخدم نصب موكب..ملك وبهيئة امعزب كتب موكب عزه الجبّار دگ الثايه ..وعلّگ رايه..ويلمشايه ..يحيكم الله الشاهد..مو كل واحد..انتو الله..المستنگيكم التراب البلجدم..اذا مس الجسم فلا تتوقع بجهنم تتچوه يگاصد سيدك..الملائك تحسدك وعلي تتمنه لو تهبط تتروه الحور تتمنه..الزاير يخدمنه چم نهر بالجنه..الكم سبيل .. @@@@ نص2.. صدگ نعمه ..تره الخدمه..الفتح موكب..صدگ زلمه وگدر يخدم لبو السجاد تره الله بهاي اله راده..المواكب كل سنه ازياده وتضل ابكل سنه تزداد لكلمن يخدم..ربك يكرم..يترس ايده ..بخيراته كلما يصرف..ربك يعرف..ينطيه أبگد مالاته قسم يقسم قسم..هنيئآ للخدَم التطب للجنه خدام ولطامه والاتعنه مشي..يطب ومنتشي الحسين بچفه مسجلهم خدامه النصبو مواكبهم..بدفتره مسجلهم وبالجنه ويگلهم..الكم سبيل @@@@@ نص3.. يمن تگصد ..عله الموعد..اخذ اجرك..گبل لترد احسين يخاطب المشاي عله اجدامك اجيت النه..قليله بحقك الجنه لأن تستاهل انته اهواي انه ايمامك..تعب اجدامك..ثق گدامك..تلگه اجره هذا الواقع..ثق يلسامع..اليحظرنه ..انحظره بگبره اليريده يحصله ..جنان ومنزله ويقين انزوره من ينزل بمچانه نزوره لحفرته..ونخفف وحشته منو اليدناله اليتسجل ويانه باچر عله المعبر..احسين يتصدر ويگلكم الكوثر..الكم سبيل @@@@@ نص4.. المشه خطوه..الفده اليسوه ..يحس چنه ..انولد توه ابد ماتبقه عنده اذنوب الفتح للخدمه بيبانه..حسين يعلي من شانه واسمه ويه الخدم مكتوب الشد احزامه ..وشال اعلامه..وخف اجدامه..بمشايه ياخذ اجره..بكلشي يخسره..اتعرفه الزهره..امن الرايه المواكب تستمر..الى يوم الحشر يخسى كل واحد يتوقع يمنعهه وغدآ راعي العصر..يصدرلهم امر ويشيل الرايه وبچفه يرفعهه ويصيح اتبعوني..انتم تمثلوني وماي اللي بعيوني..الكم سبيل @@@@@@ نص5.. عله اليهوه ..التعب يسوه..منو انته..ومنو هوّه ملك واحنه اله خدام تحير اشما گلت عنه..اليخدمه يملك الجنه رفعناهه محبته وسام كلشي انقدمه..ابهاي الخدمه..ثوره بعزمه..وشيعيه حسين معدّل ..كلشي مسجل..ربانه اعله اعزوبيه الايخدمه انتصر..والايضده خسر عله زواره تتسابگ خدامه الرخص عمره الك..يحس روحه ملك الوگف بالخدمه ماتنعد ايامه حسين اليحبونه..بالروح يفدونه وكلشي يقدمونه ..الكم سبيل @@@@@@ كلمات مهندالعطواني

خادم انا وعسكري..ومنك اخذ مصدري انته ديني وقبلتي..وبس خدمتك رتبتي @@@@@ امنيتي هايه وبيهه بس الباري يعلم كون الزم واجب اباب المخيّم وكون گبلك سيدي احنه انتقدم وگبل نحرك من نحرنه ينزف الدم امنيه هايه وحلم..هيچي تتمنه الزلم وثابت انا بكلمتي..وبس خدمتك رتبتي @@@@@ انا جندي وافتخر جندي بخدمتَك واعلى رتبه منبرك عندي ومحبتك ملك عايش سيدي بنعمة سفرتك لوّن مو قائد محنّك ما عشگتك صامد وما انتكس..خذت من عابس درس لطم صدري بصمتي..وبس خدمتك رتبتي @@@@@@ امنيتي يخلص عمري كله بالتحاقي وتشبه احزام الطبخ شدت نطاقي الرتب كلهه اتروح وانته الدوم باقي ابخدمتك يتشرف الجندي العراقي خدمتك راية شرف..صيتي من عدهه انعرف يمك ارخص دمعتي..وبس خدمتك رتبتي @@@@@@ رتبة الخادم ابگد نيته ودمعته ويختلف كل شخص مقداره ورتبته يخطر ابالي سؤال وهذا وكته امخلي سيد جاسم بيا رتبه انته الجاور حسين وهله..شنهو من رتبه اله انته غاية غايتي..وبس خدمتك رتبتي @@@@@@ باربعينك من تجي المشايه يمك شرف لمن اجي واتحزم واخدمك ثورة الحب ارتوت من فيض دمك هوى واترد روحي لو ميت واشمك هذا قانون العشگ.. بس محبتكم صدگ ياحياتي وسلوتي..وبس خدمتك رتبتي @@@@@@@ كلمات مهندالعطواني

الرايه الرايه الرايه..شيلوهه يالمشايه @@@@@ نص1.. انسه التعب يالمشاي ..بالرايه شد احزامك تاخذ اجر صاع بصاع..من تعتني لأيمامك ايام عزيات احسين..لاتضن من ايامك محسوبه خطواتك هاي..تلگه الاجر گدامك شويه العمر يم حسين..بس الحسين اهوايه @@@@@@ نص2.. ابكلشي نخدم لحسين..كلهه ونگول شويه دخان طبخ العزيات..ينعش ابشمه الريه تنصب مواكب لحسين..كل الكره الارضيه والكره الارضيه اتصير..حسبالك احسينيه ومنين ما تگصد راح..تسمع لطم واقرايه @@@@@@ نص3.. تنزل اهنانه الاملاك ..واتعاين الممشاكم واتصيح يامن تمشون..نتمنه احنه وياكم ياهلا بزوار احسين..بزنده الگمر حياكم والكربله امن اتطبون ..الزهره تتلگاكم يسوه التعب يم حسين..هيه الكرامه بهايه @@@@@@ نص4.. اهل المواكب خدام..واليمشي يتلگونه واليتعب امن الزوار..كلشي اله يقدمونه نصبو مواكب لحسين..والزاير يخدمونه كلشي فده لجل احسين..شنهي الحياة بدونه كل التعب هذا يروح..لمّن ترف الرايه @@@@@ نص5.. اتعنت واجت كل ميسان..ماضل بشر بالديره والناصريه يعزبون ..كلهم شهامه وغيره والبصره گصدو حفاي..خلو الناس بحيره كلشي سهل بس احسين..كلش صعب تفسيره وي الله يربطنه احسين..هو الاصل والثايه @@@@@ نص6.. والنجف من داحي الباب..جابو علگ وياهم والكوت اجو متحزمين..بلبيرغ اشمحلاهم والحله توگف بلباب..والاجو تتلگاهم وكربله تتلگه الناس..واتصيح ياحياهم وبكربله ينجمعون..كل التعنت هايه @@@@@ كلمات مهندالعطواني

يابوصلة كل العشگ..بدربك ابد ما نفترگ..مشي مشي نسمع نواقيس الخدم..حي على سير الجدم..مشي مشي @@@@@@ بس حبك مابي غايه..يابوصلة المشايه. اسمك حرز الوفايه ..حسين ياكلشي وسر الكلشي..وحُب لجله العالم تمشي وانضحي لاجلك اي شي ..حسين شوگ..بينه بمحبتك شوگ..باليدخل حضرتك انترك كلشي..واجت تمشي ..الكره الارضيه كلهه مُدن فرغت..زلم فزعت..خدمتك كل املهه فلا تتعب ..تره التصعب..تجيك وانته حلهه نرتاح لمّن نوصلّك..من كل درب نتعنه الك..مشي مشي @@@@@@ ياعله وسر العله..دربك يرفض كل ذله اليخدم يمك يتعله..عجيب نيوتن واللي ايعرفونه..خل يراجع قانونه يالجاذب ليحبونه ..عجيب هاذ..قانونك لليحب هاذ..انته سر الجذب النصب موكب..والايعزب..فلا يترك قضيته عله اليسوه..المشه خطوه..اله اجره اعله نيته الحظر مجلس..واليأسس..خدمته اتضل هويته من البحر حد مرقدك..ناس التحبك تگصدك ..مشي مشي @@@@@@ ماعرفو ليش انخدمك..بس اليعشگ يفتهمك لوَّنت الحب بدمك..جميل لوما انته اموحدنه..چا كلشي اتبدل عدنه نتفاخر چي قائدنه..جميل شوف..يالمحبتك دوه شوف..والتحب مو سوه التعب فدوه..لان يسوه..اذا چان العشگته العشگ يكمل..يصير اجمل..اذا محبوبي انته يبو اليمه..يبو النعمه..الگلب بسمك كتبته لوگالو امنيتك شني..حته امن اموت ارد اعتني ..مشي مشي @@@@@ من اگصد شايل رايه..واتعنه ويه المشايه .. ناذر كل تعبي بغايه..ثواب ادموعي لغيرك ما احبهن..وابقه استنكف لو اصبهن ومن ابچيلك احسبهن..ثواب وين..الگه مثلك محب وين..حته حبك عذب اجي ابرايه..الي غايه..ضريحك من اطوفه عشگ مدمن..گلت يمكن..ابوصالح اشوفه السبب هايه..جبت رايه..اسلمهه بچفوفه العنده علّه اشفيهه اله..گلوله يگصد كربله ..مشي مشي @@@@@@@@ اشما رادو نترك امرك..لو ما رادونه انذكرك نگصد حفاي الگبرك..نجيك كل عام ايضدونه اكثر..كل ضنهم احنه النخسّر ما يدرون اشما ننظَر..نجيك كون..نعتنيلك وذر كون..مايهمنه الخطر يضدونه..وينقدونه..ويضل واحد عددنه يريدونه..يغيرونه..عله نهجك بعدنه فلانهتم..ولا نندم ..اخذ هذا عهدنه كل سنه نتزايد بعد..ما نعتني ابنفس العدد..مشي مشي @@@@@ كلمات مهندالعطواني

يخدام..وصلو المشايه @@@@@ اجو متحزمين كلهم فرغوهه ابيوت اهلهم منو ايلاگونه يگلهم هلا بالمشايه الرايه رفت بين اديهم تنطوي الگاع ابمشيهم عزم من عباس بيهم گصدو الوفايه المواكب..ترحب ..هلا ومية هلا اجيتو..وفيتو..تگلكم كربله مشو ..اجو..وفو..صدگ كفو منهم نعِم صدگ.. عشگ ..گلب ..يدگ زلم تخدم زلم (( كلهه اترحب بالمشايه)) @@@@@ لزمو الخدام واجب زرعو الشارع مواكب والزغير ايخدمه شايب والخدم هنياله واليشيل الرايه بيده ايحصل امراده اليريده حسين عنده اكبرعقيده وماكو غيره اباله تره اهواي..يسألون..لان عدهم عجّب اليگصدون ..للحسين..جدمهم ماتعّب اليمل ..منو..التعب..شنو.. اله فدوه العُمر الخدَم..اله..يحس..علا.. لذلك يفتخر (( وحسين امسجل خدامه)) @@@@@ كض حبيب وگام يكتب بده بالزوار يحسب كتب كلمن عنده موكب سجّل المشايه كتب كلمن عنده هِمّه المشه خطوه امسجل اسمه يالگصدتو لبو اليمه تشفعلكم هايه اليشوف..المواكب..يضل حاير صدگ القضيه ..چبيره .شنو سر هالعشگ عله..الوعد..الى..الأبد.. نضل ابهالدرب بلا..غلو..درب..حلو سهل لّكن صعب (( هنياله اليگصد مشايه)) @@@@@ الشاعر مهند العطواني

اليوم المبراك يم الحظره ويم گبر حسين نلگه الزهره تصيح اهلا يزاير كربله بحضورك ياهلا ومية هلا يم الحضره @@@@@ ابرك بالصحن..وخل گلبك وطن..وتلگه الضعن هنيالك يالمشاي تتلگاك الزهره وثق تاخذ اجرك راح وانته ابنص الحظره حزن گرب..تره انصّب..عزه الله بكربله ونزّل ملّك..يحيي الك..هلا ومية هلا الحظر منو..اله شنو..اليريده ايحصله وحسين ايگول ذوله انصاري المشايه اليوم من خطاري الگصد النه نرفعه منزله بحضورك ياهلا ومية هلا يم الحظره @@@@@ نسمع هالحچي..حر ياهو اليجي..مارادو مشي نهرين ابهاي الگاع نذكرهن للغايه والنهرالثالث صار من سيل المشايه اليحب حظر..واذا خطر..ولايهم ابد شمس شنو..اليرد منو..نزيد اكثر عدد جمر برد..ولا نرد..اخذ منه وعد لو ردنه انعيد كل الحاصل اول مشاي چان الكافل گصد ممشه ويه ضعن العايله بحضورك ياهلا ومية هلا يم الحظره @@@@@ عاجل يابشّر..نشرو هالخبر..بالكون انتشّر اشكد تحچي ابحاتم ناس ابرايح جاي ايچلّب خل حاتم هسه ايشوف بلد ابكبره يعزّب تعّب سهّر..حزن قهر..مواكب تنصّب تره الحظر..عدد عبر..كسر جدول ضرب سهل صعب..سمح حرب..شنو هذا الرعب لو حاتم شاف هاي ايامك يتفاجئ حيل من خدامك يمّن تگصد دموعك سايله بحضورك ياهلا ومية هلا يم الحظره @@@@@ انرحب بلملا..الگصدو كربله..يامية هلا يامية(( خوش آمديد)) بكل زاير ايراني و(( بخسته نباشيد)) ومعزب تلگاني ((بيا ))وهلا..اليجي اله..تگلهم هالخدّم الكفو اليجي..وگصد مشي..وبديه شايل علّم حرگ چوي..بچي دوي..مثل حرگ الخيّم اهلا بالجاي من كل ديره خدام حسين كلكم غيره النصب موكب وجوده مرجله بحضورك ياهلا ومية هلا يم الحظره @@@@ من كثر الهلا..تكبر كربله..اليمشي اندلله كل خادم هيچ ايگول هاي الخدمه التسوه صح نتعب بيهه اهواي بس ايامك حلوه عله العزم..تجي الزلم..ولاواحد رجع عله الوعد..عله العهد..غُبش غبشه وطلع تره الفلك ..اجه الك..عله الحيهم فزّع بس ربع حسين كلهم هِمه اشرف ايام هاي الخدمه هنيئا بالنصب موكب اله بحضورك ياهلا ومية هلا يم الحظره @@@@@ الشاعرمهندالعطواني

لاهل المواكب الله نزل آيه عنوانهه الخدام والمشايه @@@@@ چادر ابصف چادر فرد صينيه نصبو عله طول الكره الارضيه ماكو اختلاف وكلهه نفس النيه نيتهم الخدمه وحسين الغايه @@@@@ اشمحلاهم ابخدمتهم اشمحلاهم بردت الدنيه ومابرد ملگاهم ويوم الحساب الزهره تتلگاهم الخدمه نعمه وهم اجرهه اهوايه @@@@@@@ هنياله كلمن گاصد الملاچه امن البيشه حدما يوصل الشباچه الحور والاملاك بي تتحاچه مو اي بشر يوصل رتبهم هايه @@@@@@ ايفرحون لو سمعو اجركم واصل انطو العدهم كله لليستاهل وبخدمتك يحتار حته العاقل ودرب المسيره رايه تسبگ رايه @@@@@ اشمحلاهم ابگعدتهم الصبحيه حاتم تعلّم منهم اعزوبيه ينگطون كلهم مرجله وحنيه وهنيال كلمن هسه وزع مايه @@@@@@ الشاعر مهند العطواني

قصيدة ((طف العباس ع )) الرادود عبدالهادي الكربلائي الشاعر مهند العطواني https://youtu.be/bbMpYJgNr1k?si=av28MgGm-COa8opD

ابفاتحة الحسن..مانوگف اشلون @@@@@ لاعزيات يمه ولا يلطمون ولاشباچ اله ووادم يزورون اتمنيت الحسن لويمنه مدفون عزيات ومواكب يمه تلگون حته اليبچي يمه..مايقبلون @@@@@ عله المثله قليله ادموع الاعيون كون امن اللطم تتهدّل امتون يبيرغ للهلا لكل اليعزبون مواكب هسه يمك تنصب كون واكل زاد الحسن ..كلهم يصيحون @@@@@@ لابد يجي يوم ونبني الاگبور ونسويلك مجالس مثل عاشور ونقره كربلائي يمك وشور وكون امن اللطم نخسفهه الاصدور وابوصالح يجي وي اليعزون ابفاتحة الحسن مانوگف اشلون @@@@@ الشاعر مهند العطواني

المستهل.. افراگ الاخوان..منو يحمل اذيته افراگ الاخوان..لموتي مانسيته ياخويه مو وكته البين آنه اليحاچيك حسين يخويه..يخويه &&&&&&& نص1.. لمن تفارگلك اخو..كلمة الخويه اتهضمك تحني الضهر ماتنحمل..لمن اتشيع ابن امك لمن تطيح ابمشكله ..وما تلگه اخوتك يمك ساعتهه تتمنه الاجل..واتريد گاع اتضمك صعبه ياناس..تره اليفگد اخوته صعبه ياناس..يضل يتمنه موته يالحسن رايح لاوين آنه اليحاچيك حسين يخويه ..يخويه &&&&&&&& نص2.. أخ واخو صار الحچي..سوالف ولا مألوفه سولفو بدموع وبچي..واشمحله هالسالوفه بهالموقف وزينب اجت..واعله الحسن ملهوفه گله يخي غطي الطشت..لتخلي اختنه اتشوفه اتخيل الحال..اخت واتودع اخوهه اتخيل الحال..اشلون ايصبروهه صار البچي امن الصوبين آنه اليحاچيك حسين يخويه..يخويه &&&&& نص3.. زينب والحسين وگمر..اتجمعو ويحاچونه وكلما يلوج امن الألم..همه بحچي يصبرونه ذبلت ملامح وردته..والوجه ذابل لونه والحسن مره يفك جفن..مره يسد اعيونه عرفو الحال ..لمن طوّل سكوته عرفو الحال..اخوهم حان موته صار الحچي ابدمع العين آنا اليحاچيك حسين يخويه..يخويه &&&&&&&& نص4.. اشمحله اليموت ابنص هله..واخوته ويه الجنّازه ولمن ينزلونه الگبر .. تلتم عليه اعزازه اشما الك صحبه ابكل وكت..عازة ابن امك عازه لو دار وياك الزمن..تحتاجه من تتوازه آخ الافراگ..ولا يرحم حبايب آخ الافراگ..يراويك العجايب ما يرحم الموت اثنين آنا اليحاچيك حسين يخويه..يخويه &&&&&&&& نص5.. عادة الميت تنجمع..جيرانه ويودعونه وتسير وي اجنازته ..وكل ديرته يشيعونه شمسوي تابوت الحسن ..بسهامهم يرمونه سموه وذابت چبدته..چا بعد شيطلبونه شنهو الاسباب..حقد لوبيهه غايه شنهو الاسباب..تبينهه النهايه صار المصاب امصابين آنا اليحاچيك حسين يخويه ..يخويه &&&&&& كلمات مهندالعطواني

المستهل.. عمه يسجاد..ما ينسي السوگ عمه يسجاد..من عثرت النوگ واحد يگل للثاني زينب طاحت والصايحه ابين الطوايف صاحت عمه يسجاد ..عمه يسجاد &&&&&&&& نص1.. من هذيچ الساعه وانا لهسه عمه معلعله هذا همي وكل اذيتي من مصايب كربله عمه شفت ابعينك انت من سبوهه العايله ولسه آثار اعله اديه مال گيد السلسله عمه يسجاد..شرد احچي احتار عمه يسجاد..مشبوحه الانضار من طحنه اكو وادم شفتهه ارتاحت واحد يگل للثاني زينب طاحت عمه يسجاد ..عمه يسجاد &&&&&&& نص2.. امنهد طف كربله عمه لهسه روحي ماصحَت وعمت هاي اعيوني احسهه عمه هلگدما بچت حيل جروهه الاحبال وللقصر جابونه عت وادم ابلا رحمه عمه عالضعينه اتجمعت عمه يسجاد..والتمت الناس عمه يسجاد ..هاي اخت عباس هالصيحه من بالي ابدما راحت واحد يگل للثاني زينب طاحت عمه يسجاد..عمه يسجاد &&&&&& نص3.. اكو موقف ألماني ريت ما اشوفه ومتت ارقيه من رادت ابوهه وجابو الراس ابطشت بآد حيلي وبوكتهه گمت ياعمه وطحت ومن مكاني لحد رقيه والله عمه شيّبت عمه يسجاد..الصارن اوياي عمه يسجاد ..شحچيلك اهواي الدنيه دورت رحه ابعمتك دارت واحد يگل للثاني زينب طاحت عمه يسجاد..عمه يسجاد &&&&&&&& نص4.. ردت ليل ايگضي عمري وما يجي كون الصبح ضلمه ياعمه الخرابه وجرح مشدود ابجرح ومن اجه صبح الهضيمه اتخذته الوادم ربح وعيني صدت لبوفاضل عمه واهتز الرمح عمه يسجاد..دلآلي مكسور عمه يسجاد..بس گتله معذور ورقيه اجت مرعوبه يمي وناحت واحد يگل للثاني زينب طاحت عمه يسجاد..عمه يسجاد &&&&&&&& نص5.. رادو يذلونه عمه وطفح بركان الغضب اشتطلع العباس اخوهه واكل وياهه وشرب خطبتي چانت يعمه اتصفن افحول العرب چانو يضنون كلهم علي بلكوفه خطّب عمه يسجاد..كل ذني الاهموم عمه يسجاد..ما ينسن دوم عگب المراجل والاعطور الفاحت واحد يكل للثاني زينب طاحت عمه يسجاد..عمه يسجاد &&&&&& كلمات مهندالعطواني

تشرفنا بحضور تشييع السيد علي في كربلاء