☘️ حسين البصري ☘️

اكو تخمة صارت بالنصائح الجميع يحب ان ينصحك الكثير يتكلم بمثالية عالية لهذا تسمعهم كثيرا ما يتحدثون -بحديث لا ينفذ الى القلب - عن الفضيلة وقلة اللي يمارسهه بالواقع ليش قلة ؟ بالرغم من انها فضيلة وتنطي شعور جميل ببساطه لان كلفتهه باهضة قد لا يتحملها من يدعيها ولان الكلام وحده فيها غير معلوم الأثر في نفوس الآخرين ربما لهذا ورد عن المعصوم ع " خير الدالّين علينا الصوامت" و "كونوا لنا دعاةً صامتين " !

ستألفُ فِقدانَ الذي قد فقدتَهُ كإلفك وِجدانَ الذي أنتَ واجدُ ! ابن الرومي

"وتطفح البسمه اعله بال المبتلين الماي يضحك من تشك صدره السفن !" من اجمل ابيات المكابرة للشاعر الراحل عريان السيد خلف

أوصاهم بشيءٍ واحدٍ فقط "إلّا المَوَدّةَ فِي القُرْبَى" !

الانجذاب والحب .. يجعل العلائق تبدأ ولكن لا يمنحها الاستمرار ربما يختفي في منتصف الطريق ربما يتلاشى مع كثرة المنعطفات او يضمحلّ في تقادم المواقف والتجاريب يجب ان يمحّص الانسان قرينه قبل أن يقترن به .. واكثر ما يبرّز معدن الانسان هو لحظة الخلاف لا تشترط ان يكون الخلاف معك .. انظره كيف يصنع مع من يختلف معه -أيّ كان- .. هل ينصفه ؟ ام يقلب حسناته الى سيئات ؟ هل يشيطنه ام يذكره بأحسن ما فيه ؟ هل يمكن ان يجد نفسه مخطئا فيعتذر ؟ ام دائما هو الصحيح والمثالي ؟ هل يستطيع التجاوز عن سفاسف الامور ام يريد الانتصار في كل نقاش وفي كل خصومه ؟ ان كان سينصفك فالمفروض انه ينصف الاخرين ان كان سيسامحك .. ستجده ليّنا مرِنا .. حتى مع المختلفين معه ان كان سيعتذر منك .. يعني انه مستعد للاعتذار من غيرك اذا أخطأ معه ان كان سيقبل اعتذارك .. تجده متسامحاً مع أخطاء الاخرين بالفضل .. والانصاف .. والتنازل .. وال "كبّر عقلك" .. وال "مشّيهه هالمرة" .. والمبادرة بالصلح .. وشبيه ذلك تدوم العلاقات .. وتزدهر ..وتتوطّد وذلك لا يجب ان يكون من طرف واحد فيكون مستهلَكًا في كلّ مرة حتى يصل الى نقطة الإعياء النفسي .. بل الأمر يعتمد على الطرفين حتماً .. يجب تبادل الانصاف وتبادل الابتدار وتبادل التنازل .. وتبادل التسليم للآخر محقّا كان ام مخطئا .. الانجذاب وحده قد يكون اليد التي تسحبك الى مقبرة الندم ..

شايف من يهزأ بيك القدر في يوم ما وتضطر تدخل بسجال مع واحد أقل مشاكله أنّه ما عنده احترام .. وتطلع وراه شلة مال هتلية -حشى القارئ- شغلتهم اي شي يحجيه كلهم يكلوله عظيم .. هاي شلون اجت ببالك ؟ خطية ارحم هذا المسكين اللي كاعد كبالك ؟ ومهما تكون حجتك ودليلك وقوة ردك .. يجيب جماعته نفسهم ويستخفون بي ويقللون من شأنك ويتهموك بشتى اوصاف النقص فقط حتى يصنعون لنفسهم ولصاحبهم انتصار وهمي وهذه وهؤلاء يصطلح عليهم بـ "القرود الطائرة" ووظيفتهم الهجوم بالنيابة عن صاحبهم للتشويش على من يظنونه خصما .. هنا انت اذا ما واقف على ارض صلبة راح تشعر بالهزيمة .. واذا متمكن من ادواتك راح تشفق عليهم وتكلهم "سلاما" .. هاي تصير هواي بالواقع .. بالكهاوي .. بالكية .. من يجتمع الاصدقاء حتى من يصير نقاش منو افضل ميسي لو كرستيانو وتدرون القرود راح تشوش عليمن بي 🫠 .. وجاي تنتقل للمواقع ايضا هنا المنصف اللي يشوف امثال هاي السجالات مراح يهمه مقدار الضوضاء والغثاء الأجوف .. بقدر ما يهمه الحجة المطروحة والدليل المقام .. ومراح يشوف التطبيل والتصفيق دليل على قوة الحجية .. مجرد راح يشوفه هوسة مال شلة هتلية .. لا اكثر

على سبيل الزوال وسرعة الانتقال .. لاحظ تشبيهه بظل الغمام .. اي ظل غيمة مغادرة .. ما اسرع انتهاءه وتبدّله ذكر علي عبادة

اما من يبرّره .. فهو من ذنب الى ذنب ..

فهّمني روحي البيهه ريحة "عفن" ليش من ازورك ترجع مهيّلة ؟! فهّمني أمي الگاضية من التعب ليش بعزائك .. توگف مشچّلة؟! احمد عاشور

بالنسبة للزوار اللي راجعين من كربلة للنجف اكو مئات المنشآت الجديدة والمبردة والمريحة تنقل نقل مجاني من كربلاء الى النجف .. طبعا مستأجرتهه الحكومة ومخصصتهه للزائرين مشكلتهه ابعد بحوالي ٢٠٠ متر عن الكيات والكوسترات الموجودة لذلك الناس ما تندلهه ودائما ما عليهه زخم مكانهن بكراج سيد جودة من ينوى الذهاب لحين الان .. ومن هو في الطريق .. ومن وصل الى قبلة العالمين .. نسألكم الدعاء كثيرا كثيرا ..

كل افعال الخدمة جميلة ومحمودة .. ولكن يجب ان يدرك الخادم والزائر أنّ لا شيء يقرّبه من مولاه الحسين ع اكثر من "الاستقامة" .. أن يستقيم الانسان في نيّته .. وعمله .. وتعامله .. ووظيفته .. وصمته ونطقه وجميع جوارحه وجوانحه .. او على الاقل يطلب من الله ذلك جزاءا لخدمته !

هذه أيام مصاب وعزاء .. استغلال مثل هذه المناسبة من قبل بعض طالبات الكليات الطبية والتمريضية للاستعراض الرخيص في بعض المفارز والمواكب شيء مقزز وقبيح .. في خضمّ هذا الجلال الأربعيني المقدّس استحوا من إمامكم الغائب عن الانظار..الحاضر في الضمائر والاعمال احترموا حرمة تلك الاجساد التي قطّعت على رمضاء الهجير لا تقتلوا ما خرج الحسين ع من اجل إحياءه وإصلاحه ..وقدم الغالي والنفيس في سبيل ذلك ليست خدمة الحسين استعراضا ولا طلبا للشهرة او زيادة في التفاعل .. لا يغرّركم الشيطان بمكائده ولا تذهبنّ بكم المعاذير الفاسدة الى طريق معوجّ

"لا تكطعووون بينا حيل حبيناكم " هذا الشيعي الجنوبي صارله الف سنة غشيم وميعرف منو وياه ومنو عدوه .. متدري فطارية زايده مدري سذاجه غير مبرّره مدري جهل مدقع مدري ذاكره ذبّانية تخيل الخليج يدزوله مفخخات عشرين سنة لسبب واحد وهو انه شيعي وصار بالحكم ..بس هو برغم كل الدماء اللي خسرهن مجاي يشوف هاي الحقيقة البسيطة و مستعد - ويتمنى - يرجع لاحضانهم بدون ثمن .. بدون تعويض .. بدون فرض ضمانات .. ومع كل هذا دائما يبقى منبوذ ومرفوض وهذا استحقاقه الطبيعي لحد ما يعرف حجمه ويقدّره ويعرف مكانته ويحترمهه ويعرف منو صديقه ومنو عدوه ويتعامل وياهم وفق ما تقتضيه المصلحة .. ويميّز بين التعايش السلمي وتبادل المصلحة وبين اللواكة المفرطة والثول اللافت وهاي شوكت يصير ؟ شكد نحتاج بعد نخسر دماء ؟ .. ما اعرف حقيقة

يمتى الدول العربية صارت وي العراق؟ فقط في حربه مع ايران اتحدت الدول العربيه ووقفت مع العراق بالتسليح والرجال والاموال نعم انها المرة الوحيدة حين قرر العرب استخدامنا كوقود للحرب مع ايران بالنيابة عنهم فقتل الشيعي اخاه الشيعي على الجانب الاخر بينما وقف ال سعود يشاهدون ذلك ويرسلون الاموال للاستمرار وبعد ذلك بسنتين في عام 1991 اتحدت الدول العربية واعطت تفويض اممي للامريكان من اجل تشكيل تحالف كبير لضرب العراق وشاركت السعودية في هذا التحالف وقصفت طائراتها العراق مع الامريكان ثم اشتركت الدول العربية في حصار العراق وتجويع ابناءه هذا والحاكم كان سني ابن سني اما حين احتلال العراق هل وقفت الدول العربية مع العراق ؟ لا فقد كانت الجيوش الامريكية تنطلق من قواعد في هذه الدول العربية وحين بداية تشكيل النظام الجديد هل وقفت الدول العربية مع العراق ؟ ايضا لا فقد اتحدت الدول العربية على افشال هذا المشروع وجميع الدول قاطعت العراق ولم تقبل الاعتراف بالعملية الجديدة وقد اجبرهم الواقع لاحقا على الاعتراف ولكنهم نشروا الفتاوي والمفخخات وقتلونا تحت كل حجر وامام كل حسينية وفي كل سوق وهكذا لم يشهد التاريخ ان وقف العرب مع العراق الا حين كان العراق في حرب مع ايران ولا اعرف بصراحة البعثية شنو يقصدون من يكولون نريد نرجع العراق للحضن العربي اكيد قصدهم الحرب مع ايران لان هاي الطريقة الوحيدة الي تخلي العرب يرضون علينا

السعودية لم تملك الجرأة على قصف ايران ولكنها تتبنى رسميا قصف الشيعي العراقي لأنها تعلم ان حكومته لا تملك جرأة الرد .. بل لا تملك جرأة التصريح من يهن يسهل الهوان عليهِ ما لجرح بميت إيلامُ ! ولا حول ولا قوة الا بالله العلي العظيم ..

اكو بيت شعري بسيط لشاعر بصري اعتبره وصية اخلاقية جميلة واحد يبني تعامله ويه الاخرين ع اساسهه يگول : "آنه حتّى الشتّماني براسه أبوسه زحمة أگولن .. خاف رايح للزيارة وساحگ تراب الحسين " ! هنا الشاعر يقرر يعامل كل الناس بكل العام على انهم زوار الحسين ع .. يعني يعيش كل ايامه بالاربعين ☘️

بصالة العمليات دخلت وحدة اربعينية تمشي على استحياء وكانت هادئة وخايفة كانت التجاعيد تملأ وجهها .. والتجاعيد اما نتيجة التقدم بالعمر .. او التقدم بالحزن او تراكم التعب المريضة تعاني من ورم حميد في احد المبايض ولكنه ورم يستدعي اقتلاع المبيض سألتني قبل لا تاخذ تخدير : دكتور المبيض الثاني والرحم راح يبقون مو ؟ كتلهه ان شاء الله حسب التحاليل العندج ما بيهن شي ورة شوي هم سألتني بس بإلحاح اكثر فسألتهه ليش هيج جاي تكررين السؤال ؟ شكد عمرج انتي ؟ فكالت عمري ٤٠ سنة وما عندي اطفال .. وبلكي الله يصير عندي بالمستقبل ! حقيقة صدمني هذا الأمل المعلّق .. الانسان شكد ضعيف وما يملك لنفسه ضرّ ولا نفع ومستعد يتعلّق بأي خيط أمل للسعادة المرجوّة بالعملية للأسف تبيّن أن كلا المبيضين يحملان الورم وتم اقتلاعهما معا مع قطع هذا الخيط الضعيف الذي كانت تعلّق عليه الآمال الحِسان ! فسبحان الله الحكيم المتعال ..

"واكو بمشية قطارك عينه تحتار وباللحظة الاخيرة وياك يصعد ! "

هاي الايام فرصة والفرص ينتهزوهه السعداء فقط تخيل بهذا الحر اللاهب تتوفق تصير سبب تبرد كلب احد زوار الامام الحسين ع اللي ضجّت الروايات ببيان مقدار عظمة مقامهم ما دامهم تحت هذا العنوان المشرف

اقل شيء متعب بدوامنا هو التعب البدني وكثرة ساعات الوقوف والعمل واتعس شي واسوأ شي هو التعب النفسي اللي نواجهه بسبب انعدام وجود نظام صحي ..هاي الخربطة اللا نهائية عدنا .. وبسبب العجز المالي اللي بده يبين بشكل بيّن للمريض والطبيب والكوادر يجي المريض حالته خطرة ومستعجلة انت هنا لازم اول شي تسويله خطة تشخيصية حتى توصل للتشخيص وبعدين تتخذ القرار العلاجي سواء كان عملية او شيء اخر المشكلة كثير من التحاليل المهمة ما موجودة بالمستشفى .. وهنا انت راح تصير بموقف متكرر ومؤلم بكل مرة يجيك مريض ما عنده فلوس يسوي التحاليل اللي تحتاجهه تحتاج مفراس .. عاطل بالمستشفى .. كون تحوله لغير مستشفى بعملية تطول من ساعة الى ٣ ساعات حسب توفر الاسعافات ووقت الروحة والرجعة والوقت المصروف بالمستشفى الاخرى .. زين اذا المريض حالته خطرة وميتحمل هذا التأخير ؟ .. اشبع قهر وظل اقره عليه بلكي تعرف شبي السديات اغلبهه خربانه .. اجهزة المراقبة اغلبهه عطلانه .. السبالت يومية عطل بحيث كمنا نعرف لعطلات السبالت اكثر من امراض الناس .. الدار مال الاطباء اللي يسكن بي الطبيب اكثر مما يسكن ببيتهم لا يطاق ويخلو من اغلب ضروريات الحياة البسيطة ومو بصدد نخوض بيهن هسه بعض المرضى بسبب هذا النقص الحاد جاي يغادرون الحياة وهمه حتى تشخيصهم ما متأكدين منه وكثير منهم جاي يعاني كثيرا نفسيا وماديا حتى يحصل حقه بالعلاج والتشافي وبنفس الوقت تشوف المليارات متكدسة بالحيطان .. والتنانير والمجاري وتشوف عشرات العقود المليارية تنصرف ع امور تافهة وما تمس حياة الناس ومن تجي للادوية والاجهزة الطبية والمختبرات يكلك تعذرنا العراق مفلس تسكت يكتلك القهر تحجي .. كلشي ميصير عادي ..