كريم بن عبد العزيز || Karim Abdelazez

{الأحزاب} مِّنَ الْمُؤْمِنِينَ رِجَالٌ صَدَقُوا مَا عَاهَدُوا اللَّهَ عَلَيْهِ فَمِنْهُم مَّن قَضَى نَحْبَهُ وَمِنْهُم مَّن يَنتَظِرُ وَمَا بَدَّلُوا تَبْدِيلًا(23) عامل أي يا صديقي؟ سيدنا مصعب بن عمير رضي الله عنه و ما ادراك من مصعب بن عمير؟! أول سفير في الأسلام بعد بيعة العقبة الأولى النبي صلى الله عليه وسلم اختاره هو و أرسله للمدينة وكان سبب في إسلام عدد كبير من أهل المدينة لما أسلم على إيده سيدنا "سعد بن معاذ" رضي الله عنه اللي أهتز لموته عرش الرحمن و كان سيد من أسياد الأوس من قبيلة بني عبد الأشهل وبعدها أسلم قومه معاه. كان سبب إن الإسلام يكمل وإن النبيﷺ يروح المدينة وهو مطمن إنه هيلاقي حد يقف معاه و يحميه من قريش. فتخيل كل حسنات أهل المدنية و ذريتهم في ميزان حسنات مصعب بن عمير! سيدنا مصعب كان من اغنياء القوم قبل الإسلام وعيلته كانت من أغنى العائلات وكانت معاها مفاتيح الكعبة و ضحى بالفلوس وكل ما عنده عشان يدخل الإسلام وخسر اهله وأمه اللي كانت دائماً بتحاول تخليه يرجع عن دين الإسلام. مصعب بن عمير شارك في غزوة أحد و ماكنش بس داعية لا ده كان قائد كتيبة من كتائب غزوة أحد وحامل لواء المسلمين ومن القلائل اللي ثبتوا في غزوة أحد بعد حادثة الرماه لما نزلوا من على الجبل و دافع عن النبي لحد ما استشهد في الغزوة، ولما استشهد اُشيع في جيش المسلمين إن سيدنا محمدﷺ هو اللي استشهد بسبب إنه كان شبه النبي جدا ﷺ. سيدنا مصعب مامتش موته عادية في الغزوة لا ده قطعه ايديه اليمين وهو ماسك اللواء ولما اتطقعت مسك اللواء بالشمال قطعوا ايده الشمال، فضم اللواء بين جسمه فنزله عليه بالسيوف واستشهد في الأخر. رضي الله عن مصعب بن عمير 🤍

‏"الكل يفتقد النسخة القديمة من نفسه رغم أنها كانت أضعف وأقل نُضجاً وأكثر غباءً .. لكنها كانت أكثر سعادة." ‏- أحمد خالد توفيق ।

عامل أي يا صديقي؟ لما النبي صلى الله عليه وسلم جاله الرسالة ونزل عليه القرآن كفار قريش أعترضوا و قالوا وَقَالُوا لَوْلَا نُزِّلَ هَذَا الْقُرْآنُ عَلَى رَجُلٍ مِّنَ الْقَرْيَتَيْنِ عَظِيمٍ(31) {الزخرف} فكان رد ربنا عليهم: أَهُمْ يَقْسِمُونَ رَحْمَتَ رَبِّكَ نَحْنُ قَسَمْنَا بَيْنَهُم مَّعِيشَتَهُمْ فِي الْحَيَاةِ الدُّنْيَا وَرَفَعْنَا بَعْضَهُمْ فَوْقَ بَعْضٍ دَرَجَاتٍ لِّيَتَّخِذَ بَعْضُهُم بَعْضًا سُخْرِيًّا وَرَحْمَتُ رَبِّكَ خَيْرٌ مِّمَّا يَجْمَعُونَ(32) {الزخرف} والشاهد من الأية الأولى إنك متفكرش نفسك حكيم و هتبدر الكون أحسن من ربنا في مين ياخد أي ومين يكون معاه أي، مين يكون غني ومين يكون فقير، مين ربنا يهديه و مين يفضل على الضلال. والشاهد من الأية التانية ربنا كاتب لكل واحد رزقه، لكل واحد حالة في الدنيا و مقسم الرزق ومقسم الدنيا علينا وكل واحد وله حياته وله طبقة مجتمعية هو بينتمي ليها عشان نعرف نعيش حياتنا سوى، وعلى سبيل المثال مينفعش كل اللي شغالين في شركة يكونوا مديرين للشركة، لازم يكون في مدير تحتيه مساعد تحتيه موظف و سبحان الله كله راضي بحياته و كله بيسعى لأنه يكون أفضل و كله بيخدم كله لأن لولا الموظف ماكنش هيكون في شركة ولو المدير ماكنش الموظف قبض وراح الشركة. و ربنا بعد كده بيختم الأيات دي بأية عظيمة جدا : وَإِن كُلُّ ذَلِكَ لَمَّا مَتَاعُ الْحَيَاةِ الدُّنْيَا وَالْآخِرَةُ عِندَ رَبِّكَ لِلْمُتَّقِينَ(35) {الزخرف} أنك مهما كان طبقتك في المجتمع ومهما كان حالك في رزقك و حياتك أفتكر أن دي دنيا، دار بلاء و أختبار عشان الأخرة مش اكتر.

{الحشر} يَا أَيُّهَا الَّذِينَ آمَنُوا اتَّقُوا اللَّهَ وَلْتَنظُرْ نَفْسٌ مَّا قَدَّمَتْ لِغَدٍ وَاتَّقُوا اللَّهَ إِنَّ اللَّهَ خَبِيرٌ بِمَا تَعْمَلُونَ(١٨) عامل اي يا صديقي ؟ الأيام بتعدي بسرعة أوي، كل يوم بيعدي عليك ما هو إلا فرصة ليك بتروح عشان تعمل لبكرة اللي هي الأخرة. يمكن مش بس كل يوم بيعدي لا ده كل ساعة وكل دقيقة وكل ثانية أنت ممكن مايكونش فيه ثانية بعدها تاني، ممكن يكون اخر نفس ليك في الدنيا هو النفس اللي أنت بتتنفسه وأنت بتقرأ الكلام ده. لحد أمتى بقى هنسوف التوبة و الألتزام في الصلاة، هنسوف إننا نتعلم علم الشرعي و حفظ القرآن؟! أيامك في الدنيا عماله تقل وأنت فاكر أن لسه بدري، فكر كده دلوقتي وأسأل نفسك عملت أي لبكرة؟ عملت أي ليوم القيامة ينجيك من النار؟

{الأعراف} وَالَّذِينَ كَذَّبُوا بِآيَاتِنَا سَنَسْتَدْرِجُهُم مِّنْ حَيْثُ لَا يَعْلَمُونَ(١٨٢) عامل اي يا صديقي ؟... من الحاجات اللي لازم نخاف و نترعب منها هو الاستدراج اللي ربنا بيحطنا فيه بسبب معاصينا... إن ربنا يفتح لينا كل ابواب الخير و نفكر إنه خير و احنا أصلا بعاد عنه، بعاد عن عبادته، علاقتنا بيه متستهلش كل الخير اللي أحنا فيه ده! و نحس ساعتها إن احنا الحمدلله اوي كده ربنا راضي عنا و الدنيا ماشيه تمام ولكن للأسف ده كله استدراج! كل ده ربنا بيغرقك أكتر، أنت بتضيع، أوعى تفكر إنك لما تكون بعيد عنه و عندك نعم و عندك فلوس و عندك صحبه، إنك كده تمام و ماشي صح؛ لا أنت بتغرق أكتر و عمال تنزل تحت و تاخد دنيا و الآخرة عماله تضيع منك.. و عشان كده متأمنش لأي حاجة خير تجيلك وانت بعيد عن ربنا لأنها الجزء من جنس العمل و لما يكون عملك ميستحقش الجزء ده يبقى لازم تقلق. {الأعراف} مَن يُضْلِلِ اللَّهُ فَلَا هَادِيَ لَهُ وَيَذَرُهُمْ فِي طُغْيَانِهِمْ يَعْمَهُونَ(١٨٦)

{الأنبياء} اقْتَرَبَ لِلنَّاسِ حِسَابُهُمْ وَهُمْ فِي غَفْلَةٍ مُّعْرِضُونَ(١) عامل اي يا صديقي؟ أية نزلت من اكتر من ١٤٠٠ سنة بتقول ان الحساب اقترب و احنا في غفلة. تخيل الأية دي على قلوب الصحابة و التابعين و اتباع التابعين كانت بتعمل أي في قلوبهم و تخليهم يشتغلوا ازاي و يعملوا حساب لليوم ده الف مرة. لكن احنا الآية دي كتير منا بيقرأها أو بيسمعها و بيكون عنده طول أمل في إن لسه القريب ده بعيد ومش بيحس بحاجة أصلا كأن الاية مش بتخاطبه هو كأنه خلاص ضامن إنه من أهل الجنة! {الحجر} ذَرْهُمْ يَأْكُلُوا وَيَتَمَتَّعُوا وَيُلْهِهِمُ الْأَمَلُ فَسَوْفَ يَعْلَمُونَ(٣) ربنا قال اقترب الحساب، عداد عمرك عمال بيقل، كل ثانية بتعدي عليك بتقرب للموت أكتر؛ لكن احنا لسه بنقول بدري، لسه بنسوف التوبة، بنسوف الصلاة، بنسوف حاجات كتير أوي لو معملنهاش هنضيع و المشكلة إن ربنا بيدينا أمل و بيدني يوم جديد ولكن أحنا في غفلة؟! سنة جديدة داخله عليك، قررت هتعمل اي في دنيتك حطيت خطط السنة في تعليمك و حياتك المهنية و جوازك و فلوسك الله ينور عليك بس حضرتك نسيت تحط خطة لدينك؟! سنة جديدة داخله عليك أنوي فيها إنك هتلتزم في الصلاة لو مقصر، هتوب من معصية معينة، هتتعلم فقه، هتتعلم تجويد، هتحفظ قرآن، هتتدبر، هتحفظ أحاديث، هتتعلم أي حاجة ترفع من قيمتك كَمسلم، تقربك للجنة، تبعدك عن النار تخليك مش من الغافلين.... سنة جديدة وأمل جديد ربنا مدهولك فوق قبل ما تيجي قيامتك لأن اللي مات قيامته قامت خلاص مفيش رجوع تاني . #موضوع_كل_جمعة

{الأحزاب} يَحْسَبُونَ الْأَحْزَابَ لَمْ يَذْهَبُوا(٢٠) عامل أي يا صديقي ؟! بعد ما وصلت غزوة الأحزاب لأقصى درجات الصعوبة على النبي و الصحابة، خلص الاكل و الماية و المؤن، خيانة بنو قريظة و حصار النبي من ثلاثة جهات، قريش من الغرب و غطفان من الشرق و بنو قريظة من الجنوب وسط كل ده و الجيش يتهز و المنافقين يبان نفاقهم اكتر النبي صلى الله عليه وسلم يقول في المسلمين: الله أكبر أبشروا يا معشر المسلمين بفتح من الله ونصر. كان عنده إيمان في ربنا احنا محتاجينه دلوقتي إن ربنا هينصره. و كان دعائه( اللهم منزل الكتاب ومجري السحاب، سريع الحساب، اهزم الأحزاب و زلزلهم زلزالا شديدا) و فاجأة تتغير الأمور من عند ربنا بطل قصتنا هو شخص جه من العدم و كأنه جندي من جنود الله و هو نعيم بن مسعود " كان كافر و اسلم " و كان علاقته قوية جدا بقريش و علاقته قوية جدا في بنو قريظة و هنا جه للنبي و قاله قولي أعمل اي؟ قاله النبي خذل عنا ما استطعت.. و هنا دوره كان سبب من اسباب انتهاء الحرب بفضل الله، رجل واحد كان سبب إنه يكون النصر حليف المسلمين. فذهب لبنى قريظة وقال لهم قد عرفتم وُدى لكم وخاصة ما بينى وبينكم قالوا صدقت قال ولكن قريش ليسوا مثلكم البلد بلدكم وفيها أموالكم وأبنائكم ونسائكم ولا تقدرون أن تتحولوا عنها إذا ذهبت قريش وأما محمدًا فسينتقم منكم فقالوا وما الحل فقال لا تقاتلوا معهم حتى يعطوكم رهائن فقالوا نعم الرأى الذى أشرت به... ثم تركهم وذهب إلى قريش وقال تعلمون وُدى ونصحى لكم قالوا نعم قال أن اليهود قد ندموا على ما كان منهم من نقض عهد محمد وأصحابه وإنهم قد راسلوهم سرًا أن يأخذوا منكم رهائن يعطونه هذه الرهائن ثم يوالونه عليكم فإذا سألوكم رهائن فلا تعطوهم وذهب لغطفان وقال لهم نفس الكلام. بعد كده أرسلت قريش لبنى قريظة أنهم بقالهم كتير قاعدين وسينتهي عتادهم وطعامهم وشرابهم هنحارب أمتى بقى فييجي يبعت اليهود ليهم إن اليوم يوم السبت ونحن لا نقاتل يوم السبت ولن نُقاتل حتى تبعثوا لنا رهائن فوصلت الرُسل إلى قريش وغطفان فقالوا والله صدقكم نُعيم، فبعثوا إلى اليهود والله لن نرسل إليكم أحدًا فأخرجوا معنا حتى نهاجم محمدًا فقالوا والله لقد صدقكم نُعيم أن القوم قد نووا على الغدر. و هنا حصل فرقة في الفريقين والمعركة وقفت و الاتنين خافوا من بعض بسبب الغدر اللي ممكن يحصل منهم و عارفين إن لوحدهم مش هيقدروا يكسبوا المسلمين وبعد كده حصل رياح قوية جدا في معسكر قريش و الخبام طارت و دمر المعسكر و بقوا مرعوبين. {الأحزاب} وَرَدَّ اللَّهُ الَّذِينَ كَفَرُوا بِغَيْظِهِمْ لَمْ يَنَالُوا خَيْرًا وَكَفَى اللَّهُ الْمُؤْمِنِينَ الْقِتَالَ وَكَانَ اللَّهُ قَوِيًّا عَزِيزًا(٢٥) انتهت الحرب على كده بقوة الله و عزته و بسبب جندي من جنود الله و هو نعيم بن مسعود الاشجعي اللي كلنا محتاجين نكون نعيم بن مسعود في حياتنا، رجل واحد كان سبب في وقوف حرب كانت هتنهي جيش المسلمين... فدورك أي للمسلمين في حياتك؟ #موضوع_كل_جمعة

{المائدة} قَدْ جَاءَكُم مِّنَ اللَّهِ نُورٌ وَكِتَابٌ مُّبِينٌ(١٥) عامل أي يا صديقي؟ الواحد كتير بقى بيحس إنه تاييه، مش عارف ياخد قرار في حياته، مش عارف يختار، كإنه في أوضه ضلمة و مش شايف حاجة؛ فواقف مكانه لحد ما النور يجي، و هنا الحل في حاجة وحدة بس، نور عندنا في كل بيت و على كل تيلفون، وهو القرآن اللي ربنا قال عليه : يَهْدِي بِهِ اللَّهُ مَنِ اتَّبَعَ رِضْوَانَهُ سُبُلَ السَّلَامِ وَيُخْرِجُهُم مِّنَ الظُّلُمَاتِ إِلَى النُّورِ بِإِذْنِهِ وَيَهْدِيهِمْ إِلَى صِرَاطٍ مُّسْتَقِيمٍ(١٦) {المائدة} يعني هتعمل بالقرآن هتلاقي كل سبل السلام افتحتلك، لا ده كمان لو كنت بعيد أو غافل هيهديك، أو لو كانت الدنيا عندك مدمره و ضلمه هيخرجك من ظلماتك للنور و مش بس كده ده في الأخر هيدخلك الجنة! فأنت ليه هجره؟! وَهَذَا ذِكْرٌ مُّبَارَكٌ أَنزَلْنَاهُ أَفَأَنتُمْ لَهُ مُنكِرُونَ(٥٠) {الأنبياء} انت دايما ماسك التيلفون فلو تنزل برنامج من البرامج اللي موجودة تقرأ كل يوم ورد صفحة أو ربع واحد هيفرق معاك جدا، لو كل يوم تفتح تفسير آية وحدة هيفرق معاك جدا، بركة الوقت هتزيد مش هتقل، رزقك هيزيد، حياتك هيكون فيها خير... (اقْرَؤُوا القُرْآنَ فإنَّه يَأْتي يَومَ القِيامَةِ شَفِيعًا لأَصْحابِهِ) صحيح مسلم يعني عدد انفاسك في الحياة بيقل وأنت لسه متعرفش إن القرآن بيدخل صاحبه الجنة؟ ف مستني اي ؟! #موضوع_كل_جمعة

{التوبة} لَقَدْ جَاءَكُمْ رَسُولٌ مِّنْ أَنفُسِكُمْ عَزِيزٌ عَلَيْهِ مَا عَنِتُّمْ حَرِيصٌ عَلَيْكُم بِالْمُؤْمِنِينَ رَءُوفٌ رَّحِيمٌ(١٢٨) يمتن ‏[‏تعالى‏]‏ على عباده المؤمنين بما بعث فيهم النبي الأمي الذي من أنفسهم، يعرفون حاله، ويتمكنون من الأخذ عنه، ولا يأنفون عن الانقياد له، وهو ـ صلى الله عليه وسلم ـ في غاية النصح لهم، والسعي في مصالحهم‏.‏ ‏{‏عَزِيزٌ عَلَيْهِ مَا عَنِتُّمْ‏}‏ أي‏:‏ يشق عليه الأمر الذي يشق عليكم ويعنتكم‏.‏ ‏{‏حَرِيصٌ عَلَيْكُمْ‏}‏ فيحب لكم الخير، ويسعى جهده في إيصاله إليكم، ويحرص على هدايتكم إلى الإيمان، ويكره لكم الشر، ويسعى جهده في تنفيركم عنه‏.‏ ‏ {‏بِالْمُؤْمِنِينَ رَءُوفٌ رَحِيمٌ‏}‏ أي‏:‏ شديد الرأفة والرحمة بهم، أرحم بهم من والديهم‏.‏ ولهذا كان حقه مقدمًا على سائر حقوق الخلق، وواجب على الأمة الإيمان به، وتعظيمه، وتعزيره، وتوقيره تفسير السعدي

{البقرة} الشَّيْطَانُ يَعِدُكُمُ الْفَقْرَ وَيَأْمُرُكُم بِالْفَحْشَاءِ وَاللَّهُ يَعِدُكُم مَّغْفِرَةً مِّنْهُ وَفَضْلًا وَاللَّهُ وَاسِعٌ عَلِيمٌ(٢٦٨) عامل أي يا صديقي ؟... جي افكرني و افكرك إن دايما الشيطان هيقف زي الحيطة بينك و بين الطاعة و يقعد يديك اسباب مقنعة جدا إن لو عملت الطاعة دي في مصيبة هتحصل أو هتضر في حاجة تانية زي مثلا: الصدقة اللي لو طلعت ١٠٠ج مثلا من قبضك كل شهر الشيطان هيقعد يقولك كتير اوي انت اولى بيهم في موصلاتك و حياتك قلل الصدقة شوية و كده كده ليك أجر برضو فيجي النبي محمد ﷺ يهدم الفكرة دي في حديث ما نقص مالٌ من صدقةٍ و يقولك أنفق برحتك. وتيجي تصلي الصلاة في ميعادها أو تقول أصلي في المسجد فالشيطان يسوف و يقولك هتفرق أي الصلاة في المسجد عن البيت و يجي النبي ﷺ يقولك " صَلاةُ الجَمَاعَةِ أَفضَلُ مِنْ صَلاةِ الفَذِّ بِسَبْعٍ وَعِشْرِينَ درَجَةً" ، لكن مش بتوصل لكده بس، لا ده ممكن يخليك تسوف الصلاة لحد ما تضيع عليك اصلا و اصلا تأجيل الصلاة بدون عذر ده حرام.. تيجي يكون عندك وقت تقرأ قرآن أو ميعاد وردك جه يقعد ينسيك و يشغلك بالدنيا، يقولك استغل وقتك ده في شغلك بس أو خلص الكام حاجة دول و بعد كده الوقت لسه معانا كتير هنقرأ بليل لحد ما يضيع عليك اليوم وأنت مقرأتش و تلاقي اليوم خلص بسرعة و مكنش في بركة فيه و ده بسبب إن القرآن بيدي بركة في الوقت في قول الله {ص} كِتَابٌ أَنزَلْنَاهُ إِلَيْكَ مُبَارَكٌ لِّيَدَّبَّرُوا آيَاتِهِ وَلِيَتَذَكَّرَ أُولُو الْأَلْبَابِ(٢٩) وافتكر دايما مقولة ما زاحم القرآن شيئا إلا باركه... اذكر الله كتير و متخليش الشيطان ينسيك أهم ٤ عبادات في يومك لأنه مش هيبطل يزينلك أن الطاعة هتكبتك و المعصية هتبسطك. {الأعراف} إِنَّ الَّذِينَ اتَّقَوْا إِذَا مَسَّهُمْ طَائِفٌ مِّنَ الشَّيْطَانِ تَذَكَّرُوا فَإِذَا هُم مُّبْصِرُونَ(٢٠١) #موضوع_كل_جمعة

{المطفّفين} كَلَّا بَلْ رَانَ عَلَى قُلُوبِهِم مَّا كَانُوا يَكْسِبُونَ(١٤) عامل أي يا صديقي؟ من اكتر الحاجات المرعبة اللي سمعتها مؤخرا عن عقاب فعل المعاصي هي إنك تنتكس في دينك! يعني عقاب السيئة ميكونش حاجة ظاهريه لا دي تكون باطنه في دينك من غير ما تاخد بالك، زي مثلا إنه يكون ليك ورد من القرآن و فاجأة تقطع عنه، أو تكون بتصلي السنن و فاجأة تبعد عنها، إنك تتصدق و فاجأة تقطع الصدقة، انك تكون بتصلي جماعة و محافظ على الصلوات في المسجد و فاجاة تكسل تنزل تصلي، و ده مش بيكون مؤثر أوي أو ظاهر ليك، لكن هو أصعب بكتير من أي عقاب ظاهر... و ده كله بسبب ذنوب صغيره مثلا أنت عارف إنها ذنوب لكن مستصغرها و بتعملها، و من كتر ما أنت بقيت بتعملها و مش بتوب منها مبقتش تاخد بالك اصلا إنها ذنوب، زي النم، الغيبة، إطلاق البصر، الشتيمة، الإختلاط، وحاجات تانيه كتير كفيلة إنها تحرمك من عبادة كنت بتعملها، و تنتكس في دينك ده اصعب بكتير من إن يحصلك حاجة دنياوية. فعشان كده توب من ذنبك في اسرع وقت مهم كان، ولو وقعت توب و اعزم إنك مش هترجع له تاني، استعين بالله و اوعى تستصغر ذنب و تتعود عليه عشان كده انت بتضيع نفسك من غير ما تاخد بالك! إنَّ العبدَ إذا أخطأَ خطيئةً نُكِتت في قلبِهِ نُكْتةٌ سوداءُ، فإذا هوَ نزعَ واستَغفرَ وتابَ سُقِلَ قلبُهُ، وإن عادَ زيدَ فيها حتَّى تعلوَ قلبَهُ، وَهوَ الرَّانُ الَّذي ذَكَرَ اللَّه كَلَّا بَلْ رَانَ عَلَى قُلُوبِهِمْ مَا كَانُوا يَكْسِبُونَ الراوي : أبو هريرة | المحدث : الألباني | المصدر : صحيح الترمذي #موضوع_كل_جمعة

فَلَوْلَا أَنَّهُ كَانَ مِنَ الْمُسَبِّحِينَ(١٤٣) لَلَبِثَ فِي بَطْنِهِ إِلَى يَوْمِ يُبْعَثُونَ(١٤٤) {الصافات} عامل أي يا صديقي ؟... في قصة سيدنا يونس و الدعاء المشهور لَّا إِلَهَ إِلَّا أَنتَ سُبْحَانَكَ إِنِّي كُنتُ مِنَ الظَّالِمِينَ اللي المفسرين بيقولوا أنه كان سبب في خروجة من بطن الحوت ولكن في مفسيرين تاني بيقولوا إن سبب خروجه من بطن الحوت هو ذكره لله في وقت الرخاء و وقت القوة يعني قبل ما يكون في بطن الحوت أصلا و هو ضعيف و ملهوش حيلة غير التسبيح... فكان سيدنا يونس عابد لل،ه كان كثير التسبيح، كثير الذكر، كان دايما مع ربنا و فاكره؛ فلما وقع في بطن الحوت ذكر الله تاني، والايه هنا بتقول لولا إنه كان من المسبحين يعني التسبيح بتاع زمان هو اللي انقذه.!!!! فالشاهد من القصة إن ذكر الله دايما هينقذك، هيرفع درجاتك، هيدخلك الجنة، هيبعدك عن المعاصي و يقربك من ربنا، هيزودك حسانات و يغفرلك خطاياك، و اللي أجمل من ده كله إنها عبادة سهله مفهاش أي مجهود، تتعمل في أي وقت و في أي مكان ! و عشان كده خلي ليك ورد أذكار في يومك و ابدأ من انهاردة.... كَلِمَتَانِ خَفِيفَتَانِ علَى اللِّسَانِ، ثَقِيلَتَانِ في المِيزَانِ، حَبِيبَتَانِ إلى الرَّحْمَنِ: سُبْحَانَ اللهِ وَبِحَمْدِهِ، سُبْحَانَ اللهِ العَظِيمِ. خلاصة حكم المحدث : [صحيح] الراوي : أبو هريرة المصدر : صحيح مسلم #موضوع_كل_جمعة

إذا مات ابنُ آدمَ انقطع عملُه إلا من ثلاثٍ : صدقةٍ جاريةٍ ، وعلمٍ ينتفعُ به ، وولدٍ صالحٍ يدعو له خلاصة حكم المحدث : صحيح عامل اي يا صديقي؟ الحديث ده شارح نفسه الحمدلله و حديث مشهور جدا كلنا عارفينه تقريبا بس للأسف مش كتير مننا بيعمل بيه و يمكن بنعمل عكسه، يعني بدال صدقة جارية تكسب بيها حسانات، لا احنا بنعمل سيئة جارية بالأغاني اللي بنزلها على صفحتنا و البوستات التافهة اللي غرضها الرتش و بتنشر الفتنة بينا، و بيفضل عداد السيئات بتاعنا شغال.. و كتير منا بيكون متعلم حاجة ربنا مَنَّ عليه بيها و بيبخل بيها على الناس رغم الحاجة اللي متعلمها دي هتفيد جدا اللي هيسمعها بل ممكن تغير حياته زي ما غيرت حياتك لكن حب الدنيا بيعمي الشخص ده.. اخيرا الولد الصالح اللي لازم تشوف نفسك فيه هل انت الولد الصالح إللي لما تدعي لأبوك و أمك بالرحمة ربنا هيستجيب ليك، لو مش أنت يبقى أنت كده لما تتجوز و تخلف ابنك هيطلع بنفس طريقك و مستواك الديني، ف اشتغل على نفسك و خليك أنت الولد الصالح عشان لما تخلف تعرف تجيب ولد صالح و تربيه عشان لما تموت يدعيلك.... كل دي اعمال أنت محتاجها عشان عملك في الدنيا الله أعلم هيدخلك الجنة ول لا، فكون عداد الحسنات بتاعك شغال بسبب الصدقة أو العلم أو الولد الصالح يبقى أنت بتقرب للجنة ان شاء الله.. #موضوع_كل_جمعة

كيف لا تتفائل و تحسن الظن بالله وهو الذي صنع من طفلٍ رضيعٍ، مستضعفٍ، ملقىً في يم، هارب من حكم الإعدامِ، واقع في يد من لا يرحم؛ نبيًا من المرسلين..! سلامٌ عليك يا كليم الله موسى.

{الأعراف} وَالَّذِينَ عَمِلُوا السَّيِّئَاتِ ثُمَّ تَابُوا مِن بَعْدِهَا وَآمَنُوا إِنَّ رَبَّكَ مِن بَعْدِهَا لَغَفُورٌ رَّحِيمٌ(١٥٣) سبحان الله العجيب في الأية دي إنها جت بعد قصة بني إسرائيل بعدما عبدوا العجل؛ فتخيل ده رد ربنا عليهم وهو الغني العزيز، قالهم لو تبتوا أنا غفور رحيم، فأنت أي الذنب اللي خايف ربنا مايغفرش لك عشانه.. توب يا صديقي🤍

فَيَوۡمَئِذٖ لَّا يُعَذِّبُ عَذَابَهُۥٓ أَحَدٞ (25) سورة الفجر عامل اي يا صديقي ؟! جي افكرك إن مفيش حد هيشيل شيلتك يوم القيامة، ولا صحبك اللي بيمشيك في الحرام، ولا عيلتك اللي منعاكي من الحجاب الصح عشان أنتِ شكلك حلو بشعرك ، ولا مديرك في شغلك الحرام، كل دول يوم القيامة هيبترأوا منك.. فكل حاجة أنت هتعملها غلط أنت اللي هتتحاسب عليها لوحدك حتى لو مين وصلك ليها، كل حاجة انت عملتها غلط محدش هيشفعلك فيها ولا هيقدر يشيلها عنك.. و في حديث عن النبيﷺ : قام رسول الله ﷺ حين أنزل الله: {وأنذر عشيرتك الأقربين} [الشعراء: 214] ، قال: يا معشر قريش اشتروا أنفسكم؛ لا أغني عنكم من الله شيئا، يا بني عبد مناف، لا أغني عنكم من الله شيئا، يا عباس بن عبد المطلب، لا أغني عنك من الله شيئا، ويا صفية عمة رسول الله، لا أغني عنك من الله شيئا، ويا فاطمة بنت محمد، سليني ما شئت من مالي، لا أغني عنك من الله شيئا. الراوي : أبو هريرة | المحدث : البخاري | المصدر : صحيح البخاري في أيات القرآن: إِذْ تَبَرَّأَ الَّذِينَ اتُّبِعُوا مِنَ الَّذِينَ اتَّبَعُوا وَرَأَوُا الْعَذَابَ وَتَقَطَّعَتْ بِهِمُ الْأَسْبَابُ (166) البقرة وَكُلُّهُمْ آتِيهِ يَوْمَ الْقِيَامَةِ فَرْدًا (95) مريم مَّنِ اهْتَدَىٰ فَإِنَّمَا يَهْتَدِي لِنَفْسِهِ ۖ وَمَن ضَلَّ فَإِنَّمَا يَضِلُّ عَلَيْهَا ۚ وَلَا تَزِرُ وَازِرَةٌ وِزْرَ أُخْرَىٰ ۗ وَمَا كُنَّا مُعَذِّبِينَ حَتَّىٰ نَبْعَثَ رَسُولًا (15) الإسراء #موضوع_كل_جمعة

ما أصاب أحدًا قط همٌّ و لا حزنٌ ، فقال : اللهمَّ إني عبدُك ، و ابنُ عبدِك ، و ابنُ أَمَتِك ، ناصيتي بيدِك ، ماضٍ فيَّ حكمُك ، عدلٌ فيَّ قضاؤُك ، أسألُك بكلِّ اسمٍ هو لك سميتَ به نفسَك ، أو علَّمتَه أحدًا من خلقِك ، أو أنزلتَه في كتابِك ، أو استأثرتَ به في علمِ الغيبِ عندَك ، أن تجعلَ القرآنَ ربيعَ قلبي ، و نورَ صدري ، و جلاءَ حزني ، و ذَهابَ همِّي ، إلا أذهبَ اللهُ همَّهُ و حزنَه ، و أبدلَه مكانَه فرجًا قال : فقيل : يا رسولَ اللهِ ألا نتعلَّمُها ؟ فقال بلى ، ينبغي لمن سمعَها أن يتعلَّمَها الراوي : عبدالله بن مسعود | المحدث : الألباني | المصدر : السلسلة الصحيحة الصفحة أو الرقم: 199 | خلاصة حكم المحدث : صحيح