Muzaffar Murodovich

Marokashlik sayyoh ibn Battutaning mashhur iqtibosi bor: “Traveling leaves you speechless, then turns you into a storyteller”. Sayohat albatta chetda boʻlishi shart emas. Kichik, mahalliy sayohatlar ham insonni storytellerʼga aylantiradi. Bolaligimizda vaqt sekin, hozir esa tez oʻtayotgandek tuyuladi koʻp hollarda. Lekin asosiy sabab hayotimiz rangsizlashgani, monotonlikka oʻrganib qolganimiz boʻladi. Qoʻshimchasiga, yangi narsalarni sinab koʻrish borasida ichki olovimiz bolaligimizdagisidan koʻra kuchsiz. Chunki vaqt otar ekan, insonda tavakkal qilishga moyillik susayib boradi. Xavfsiz yoʻlni tanlaymiz. Ammo sinab koʻrilgan yangi narsalar hayotga rang qoʻshadi, shu qatori vaqtimizni majozan sekinlashtiradi. Ushbu jarayonlarni esa albatta muhrlab qoʻyish kerak. Koʻp tanishlarim bilsa kerak: videolarga olib yuraveraman (Redmi tutsam ham). Va baʼzida yaqin tanishlarim xotiramni yoʻqotmayapmanmi, yoʻqmi, shuni mendan hazillashib soʻrashadi. Yaxshi xabar: yoʻq, yoʻqotmayapman. Vaqt oʻtib, oʻsha tasvirlarni qayta koʻrish odamga oʻsha onni yana bir marta yashash imkonini beradi. Qolaversa, miyamiz oʻzini oʻzi aldaydi, oʻtmishni oʻzgartiradi, yaxshi koʻrsatadi yoki yomonlashtiradi. Videolar esa lahzalarda qanday olingan boʻlsa, oʻshanday chiqaradi. Shuning uchun ham jarayonlarni muhrlash muhim. Lekin rasm/videolardan asosiy maqsad Instagramga post qoʻyib maqtanish boʻlmasligi kerak. Xuddi bularni oʻzimiz uchun emas, boshqalar koʻrishi uchun qilgandek koʻrinamiz. Asosiysi — esdaliklar, xotiralar, hikoyalar. Bizdan qoladiganlar orasida qiymatdori shular boʻladi. Yashagan hayotimiz haqidagi farzandlarimizga, nevaralarimizga aytib beradigan hikoyalar. Xudoning oʻzi esa bizni yaxshi/koʻp hikoya aytuvchilardan qilsin.

9-semestrni ham tugatib oldim. Faqat yakuniy nazoratlar qoldi. Oʻzim tengilar bitirib ketgan yo magistraturaga kirgan payti haliyam bakalavr bosqichida oʻqib yurish boshqacha his berarkan. Haliyam kursdoshlarni ismini yaxshi bilmaymiz. Hazillashib, “Vinetkaga rasmga tushsak, oʻshanda hamma bir-birini ismini bilvoladi” deb qoʻyamiz.

Buxorodan esdaliklar. Oʻtgan hafta oxirini Buxoroda Bukhara Biennial va Bukhara Night Race bahonasida oʻtkazdim. Umid Baqoyev birodarimiz (shahar Arkida tadqiqotchi-ekskursovod) menga hamrohlik qildi. Qayerga borgan boʻlsak, oʻsha joylarni obdon sharhlab berdi. Sitorai Mohi Xossa saroy-bogʻi kutganimdan ancha hashamdor chiqdi. Biennial'da turli joylarda inson tana aʼzolari miniatyura uslubida bezatilgan joylar ham bor. Shu va tashqi yozgi namozgoh mega ancha yoqdi.