قصائد نزلات ( نزلة نزال نزله فزاعية حماسية )

ايعينك  الله  ياعلي  اعله  غيابه اليوم   خالي  من  النبي  محرابه ،،،،،،،،،،،،، ايعينك الله ياعلي ابفرگه الخليل دمع هذا  يو دمه  اعيونك  تسيل ويه  ونتك  تبچي  املاك  الجليل وعين  كل  مرسل   دمع   سچابه ،،،،،،،،،،،، الحالك انته  ياعلي امهدم الحيل واكثر من الماي دمعك عل غسيل الموت ردت يكون گبلك والرحيل وجمرتك وسط   الگلب   لهابه ،،،،،،،،،،،، واستك كل عين ياحامي الدخيل تدري همك  عل گلب  كلش ثجيل الوح خط اعليه  قلم صبرٌ  جميل يوم   وسدت  النبي  اعله   ترابه ،،،،،،،،،،، يوم وسدت النبي  وتسمع  عويل فاطمه  وينصاب  لبچاهه  الدليل اشلون حالك ياعلي  واگبل الليل وبس نواعي  التسمع  من احبابه ،،،،،،،،،،،، عفيه  گلبك  بل صبر  ماله   مثيل منين ما ملت  الحزن  اصبح يميل اوياك وانته اوحيد ماعندك معيل والفرح  عگب   النبي  انسد   بابه ،،،،،،،،،،،، انسدت ابواب الفرح  گامت تعيل بيك هل ناس  أمنت  من الصقيل شحال گلبك  ياعلي  امسى چتيل الحال   فاطم   والنبي   ومصابه ،،،،،،،،،،،،، ذبلت  ام  حسين  واتهدم   الحيل تگضي  ون  الليل   ونات   العليل بويه  بعدك  گام  يهظمني  الرذيل ومنع وني  اعليك  ويه   اصحابه ،،،،،،،،،،،،،، لخادم خدمة الحسين ع ابو عمار الدراجي https://t.me/adoamar

يبو ابراهيم الدموع اجريها وقصة استشهادك ارد ارويها …. قصة استشهادك ارويها بدمع الاصل هيه وطلع منها شچم فرع السند انت ومن غبت طگ الضلع وعترتك صب المصاب اعليها …1 قصة استشهادك البيها استدل من كتاب الله الشرح واضح يهل افأن مات محمد او قتل القتل معناها ويأكد بيها …..2 قصة استشهادك البيها جره غدر من بيتك وچبدك وذره وهذا يالهادي اجه من احقر مره ردت لاعقابها تاليها ……3. ردت لاعقابها وعبدت هبل حرمه ملعونه وابد ماالها حل اليوم بالسم باچر تگود الجمل والفتن بالدم تضل تسگيها …4.. السم مرد چبدك بلحظات الونين وساعه تنظر للحسن ساعه الحسين تدري باچر بيهم تدور السنين وبالمصايب من تدور سنينها ……5 وعلي مايبقى علي عگب القهر اعليك مو ظهره انكسر عمره انكسر وياك ودع روحه ياسيد البشر وعلى فراگك روحه الله يعينها ….6 والفتن عگبك على دارك تمر تهجم ولاذت وره الباب الطهر دنيك وضلع الزچيه ينكسر واعله عتبتها يطيح جنينها …7 على عتبت دارها يبدي المصاب وتنرسم طبرة علي داحي الباب وچبد من الحسن من الغدر ذاب والطفوف ونايبات ونينها …8 بالطفوف يطيح شيال العلم ونار من كل صوب تنهش بالخيم حسين ماضلع الذي بصدره سلم بالحوافر جثته مهشمينها ….9 مهشميها وزينب اعله التل تصيح طاح اخوي حسين بالحومه ذبيح تركض من الهضم وبهمها تطيح عالرمح شاهدت راس حسينها …10… الفاتحة لابي خادم الحسين ع فخري الخطيب والشهيد مصطفى الشمري

لك العزاء ياعلي لك العزاء ياعلي ........... اليوم جبرائيل ينصب مأتمه تدري بمصابك تون حتى السمه للحزن حضري دموعج فاطمه كون نبجي عليك فيض من دمه لك عزاء ياعلي لك العزاء ياعلي ...... الله اليعينك يحيدر عالجره تشوف فاطم بعد ابوها محيره شافتك وتصيح لا يا حيدره بالسمه يندفن مو بالمگبره لك عزاء ياعلي لك العزاء ياعلي ،،،،،،،،،،،، شلون حالك ياعلي بهذا الحزن بياحزن وبيا مواجع تمتحن اليوم وياك السمه تنوح وتون مشيبك فراك النبي ياابوالحسن لك عزاء ياعلي لك العزاء ياعلي . . ،،،،،،،،،،،،، اليوم دلالك يحيدر بي جرح لادوه الينفع ولا راحه التصح طاحت ايه التنقري بوجه الصبح فرگت عيون النبي تذبح ذبح لك عزاء ياعلي لك العزاء ياعلي .............. يالتشيل الباب بيدك بالحرب تشيل حيلك ياعلي الليله صعب من رحل هادينه ماضلك گلب فرگت حزام الضهر عثره بدرب لك عزاء ياعلي لك العزاء ياعلي الشاعر مصطفى فوزي المالكي

إنّـني تـــارك بكــم ثقليـنـــهه حيدره وإم الحسن وحسينـهه إنّهــــم قُـــرآن الله وعتــــرتي بيـهم بحجّــة وَداعي اوصيّــتي من قبــل كل الخــلايق كلمــتي يم عرش رب العرش حاچينـهه راحِـل ومــا إن تمسّكتــم فــلن من بعــد عينــاي يغــويكم وثن حيـدر أ كتابي وعترتي ام الحسن بينــكم لا يحچي ســوء وبينــهه حفظوا هالكلمات بعثتهه السما وصيحوا يا خلاق ومــروي الظما يلي ترزقنــه الهـوا بحـق فاطمه خلنـــه نتتبــع اثرهــه ودينــهه راح اغيــب وابتعــد عـن البشـر وبعتــرتي راح تلگـــون الاثـــــر كلشي سويتــه جعلتــه مُدّخــر بيـــهم واســــرارهم خافينــهه شيعوني وللدفن اخذوا الجسد ولا تظنون الوحي صـوته ابتعـد تبقى تصــدح قُــل هـو اللهُ احد وْيــاي لحّد يِحْسب مودعيـنهه صار توديعي بمدامِــع وبنحيب والحبيب يهيـل بتــراب الحبيب بالكم سهم الطمع يگدر يصيب وتصبح اوصيتي الخلگـ ناسينهه بالكم طــاغوت يگـدر والجِبِــت يخفي عن گـــلوبكم كلشي گِـلت حسين كون يصير مرجعكم ردت ولا تظل جثته العدا مسلبينــــهه علي كاطع البهادلي

راية رفت بالحرم .... يا رسول الله بسمك انباهي الامم .... يا رسول الله .... راية رفت بل الاعالي تحمل اسمك اتعزي بنتك فاطمة الوادعت رسمك يارسول الله اعلى بابك باقي رسمك الله يلعن كل شخص يالهادي سمك السمموك بمعرفة  .... يا رسول الله نورك الطاهر خفة  .... يارسول الله ...    يالحيت الدين بسمك والله نهواك عايش بوسط الضماير ما نسيناك اشما يعادينة الزمن باقين وياك صرخة الاحرار ثورة تسمع اعداك ثارك ابوسط الكلب .... يا رسول الله عايش وما ينشطب .... يا رسول الله ....... يا شمس رب الجلالة الضاوي نورك للأبد ما يخفى عل الاسلام دورك رحمة الله اجسدت كلهة بظهورك الف هنيالة الوصل كبرك يزورك لجلك الكون انخلق ... يا رسول الله اي وحك رب الفلق ... يا رسول الله ........ يارسول الله لضريحك نوصل ازحوف بلمدامع والبواجي كبرك نطوف مايمنعونه النواصب عينك اشوف احنه تربات الكفيل الرجف الخوف نسحك ابصدر الرجس ....  يارسول الله لجلك انضحي النفس .... يارسول الله ........ مثل عاشر من محرم نحي ذكرك والمواكب تنصب هيج على دربك ابد ما خاب اليخدمك خدم ربك دنيه فاز واخره كل شخص حبك جنة الله جنتك .... يارسوك الله يا شفيع الامتك ..... يا رسول الله ....... الحمدلله رب العالمين اللهم صل على محمد وال محمد موسى الخادم .........

الما رِضَو يكتب نبينا اوصيته هُمَّه نفس الـــــحاربو ذُريته ــــــــــــــــــــــــــــــــــــــــــــــــــــ الگالو اعله الهادي يهجُر بلـ لِسِن هُمَّه نفس الگالو لفاطم وأن للنبي ما حضرو ابوكت الدفن اشيحضر التتنفس الشر ريته ــــــــــــــــــــــــــــــــــــــــ ( بَـخٍ ) الگالوها ياحيدر چذب وبالسقيفه ابلا شرف سوّو حزب ايبايع ابليس اللي رايد ينتسب ويمسح الشيطان فوگ الحيته ــــــــــــــــــــــــــــــــــــــــ ضَرَّو الدين وفلا بيهم نفع أذو اگليب النبي وشلعوه شلع سوده صفحتهم بثر كسر الضلع واليزعِّل فاطمه اشــــتاليته ــــــــــــــــــــــــــــــــــــــــ العن اللهُمَّ كل صبح ومسه كلمن اتعده وصفع خير النسه بالنفاق الثاني صاحب مدرسه والكفر لايذ حدر خاچيته ــــــــــــــــــــــــــــــــــــــــ زمرة اجلاف ونواصب آثمه همه اصل كل الرزايه القادمه لو رجعلك حيدر امخضب دمه الصوباه ، گومك تره اموديته ــــــــــــــــــــــــــــــــــــــــ يلنبي وتتواله علعتره المحن وجعده تتورث مقاليد الفتن چفها مسموم ويسم چبد الحسن حقق الشيطان بيها امنيته ــــــــــــــــــــــــــــــــــــــــ من فُلان ومن فُلان اعظم جرح ضامي ابو الاكبر يَــ طه وينذبح ينگطع راسه ويرفعونه ابرمح وجسمه مسلوب وترب غاطيته ــــــــــــــــــــــــــــــــــــــــ يارسول الله واشد كل الجروح تنسبي ام عون وعلى الهزَّل تروح حگها اذا علـكافل اتون وتنوح ابلا چفوف ابـكربله امخليته ــــــــــــــــــــــــــــــــــــــــ سيد علي عبدالزهره الناجي

ستشهاد النبي محمد ص واويلي يبو الزهراء واويلي واويلي يبو الزهراء واويلي ،،،،،،،،،،،،،،،،،،،،،،،،،،،، ضج العالم ابكبره ... واويلي يبو الزهراء طاح اليوم ابو الزهره ... واويلي يبو الزهراء عيونه من الوجع حمره ... واويلي يبو الزهراء بالله افراگه شيگدره ... واويلي يبو الزهراء فاطم صاحت احجيلي واويلي يبو الزهراء واويلي .. حيدر تهمل دموعه ... واويلي يبو الزهراء يمشي ولازم ضلوعه ... واويلي يبو الزهراء روحه الليله موجوعه ... واويلي يبو الزهراء ضل يحشم ابلوعه ... واويلي يبو الزهراء فراگك والله هد حيلي واويلي يبو الزهراء واويلي .. رايح يانبي الرحمه ... واويلي يبو الزهراء فاطم ضلت بصدمه ... واويلي يبو الزهراء صاحت فرگتك هضمه ... واويلي يبو الزهراء ياهو اليحمل اللجمه ... واويلي يبو الزهراء اسهرلك حزن ليلي واويلي يبو الزهراء واويلي .. مكسور الحسن وحسين ... واويلي يبو الزهراء صاحو جدي رايح وين ... واويلي يبو الزهراء فگدك ما تحمله العين ... واويلي يبو الزهراء حسبنه من الهجر ميتين ... واويلي يبو الزهراء رايح يا صبح ليلي واويلي يبو الزهراء واويلي .. زينب تمشي محنيه ... واويلي يبو الزهراء عگبك ياهوى الريه ... واويلي يبو الزهراء اسمي يصير مسبيه ... واويلي يبو الزهراء وشيسوي الهضم بيه .... واويلي يبو الزهراء شكيلك وانته تشكيلي واويلي يبو الزهراء واويلي ابوفايز الرافضي

لا اله الا الله خل نشيع الهادي وي حيدر علي //////// ١= وي علي محد حضر تشّيعه ولا بجه واحد على توديعه يله شدو احزامكم يا شيعه وللغري نكصد علي مشايه ونصيح لا اله الا الله خل نشيع الهادي وي حيدر علي //// ٢== الهادي عن تشيعه ما نتعذر عل الاجتاف انشيله ساعت نحضر  ويبقى خالد ذكره بينه ويكبر   وكل وكت للمصطفى الوفايه ونصيح لا اله الا الله خل نشيع الهادي وي حيدر علي //// ٣=== ثوب الاسود نلبس اعله اغيابه ونعتني الأرض النجف يحبابه انعزي حيدرنه علي بمصابه وبالصحن ننصب عزه واقرايه ونصيح لا اله الا الله خل نشيع الهادي وي حيدر علي ////////// ٤==== الليله ننصب مأتمه ابكل شارع وفاتحه ننصب لحد السابع واللطم منعوفه ابد يا سامع على الهادي اصدورنه امدمايه ونصيح لا اله الا الله خل نشيع الهادي وي حيدر علي ///////////// ٥===== اومن تحت قبة علي والينه   ندعي بالتعجيل الى مهدينه يظهر يقيم العدل بيمينه وخلفه نطلع رايه تتبع رايه ونصيح لا اله الا الله خل نشيع الهادي وي حيدر علي ========================== ✍️🏻 كلمات #موسى_الخادم

#السلام_عليك_يارسول_الله بـوُداع الـنـبـي يا هـو أكـثـر أحـتـار گـلـب الــزهــره لـــو گـلـبـك يـكـرار                                          *---------------*---------------* يوم الغاب جد الـحـسـن وحـسـيـن و اسوَد الفضه ونـاحـت الـكـونـيـن منهو احتار اكثـر يـبـو الـحـسـنـيـن وگـلـب مَـن بالمصيبه يـشـتعـل نار                                          *---------------*---------------* مـنـك غـصـب رادوا بـيـعـة للـجـور ومن فاطمه الـزهـره الضلـع مكسور وبـعـد هاي الـمـصـايـب غايب النور نـور الهادي الـمـصـطـفـى الـمـخـتـار                                          *---------------*---------------* من يـا فــاجــعــه طـرفـك تـغـضـه وتـنـادي فــاطـمـه بـدمـعـه اتشضّه وگع مـحـسـن إلـحـگـيـلـي يـفـضـه انهار الحـيـل من ضـربـة الـبـسـمـار                                          *---------------*---------------* مـن گـربـت وفـاتــه والـنـبـي غـاب أبيا جمره يـحـيـدر گـلـبـك أنصـاب غصب البيعه أشد لو مـحـنـة الباب منو التـركـت ابـگـلـبـك سيدي آثار                                            *---------------*---------------* قـريـش ولـلـحـقـد رسمـت عـلامـه تـريـد الـمـا يـريـده اللــه بـنـظـامـه اعـتـرضـت عــالــنــبــوه والامـامـه يـنـجـمـعـن بهاشم ،، رفضت الصار                                          *---------------*---------------* انقطع عنهه الـوحـي والامه مولاي على قـطـع الـرحـم مـتـوحـد الراي جفن الزهره ظل بـدمـوعـه شچّاي وبچه مـسـجـد قِبا والـركـن والغار                                          *---------------*---------------* بيت البي زغب جنح الوحي اليوم بنار الحقد يابو الـحـسـن مـضـروم گلب النبي بصدر الـزهـره مـلـچـوم الـ بخآ ناداك امس هـالـلـيـلـه غـدّار                                          *---------------*---------------*   الشاعر سعد هادي الشمري

من غفت عينك يطاها المصطفى امتك ضد عترتك متحالفة بالسجن و القتل شو صار الوفه بالسلب و النهب شو وافوها بين من ذبحوه و بحر الظهر بعطش گلبه و گلبه يتلاهب جمر بين من سموه اصحاب الغدر و چبدته بسهم الغدر گطعوها بين من مسجون ضل طول السنين بعيد عن اهله و فلا تنظرله عين بين من متشرد و گلبه حزين بهل شكل كل عترتك جازوها يالنبي و اعظم و أشد كل فاجعة مصيبة الزهرة البگت متروعه خلاف عينك يالنبي متصدعه و حتى من عبراتها منعوها يالنبي و عاشت عمرها بالحزن بجفن يجري الدمع مُحمر الجفن على مصابك فاطمة تبچي و تون و عگب عينك ابد ما راعوها _ الملهم عدنان جدي

من غفت عين المختار.    دار النبي حركوها ٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪ اكبر مكيده حصلت بهالأمه قتل النبي وبجفوف اديها اتسمه عكب الرسول الدنيه صارت ظلمه لجل الخلافه سموه.   وكل الذمم باعوها ٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪ الخانت نبيها كل شرف ما بيها اقره الكتب وانته تعرف ماضيها هالكلمه راح بكل صراحه احجيها ليش الحقيقة يا ناس.   شفت البعض جهلوها ٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪ اول جريمه هجمو اعله الزهره وكسؤو ضلعها والضلع شيجبره ومحسن سكط عالكاع من العصره والاشد واعظم من هاي    ام الحسن سطروها ٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪ عزلو علي ونطيك عندي المصدر ما قبلو تصير الخلافه الحيدر وضد النبي ائتلفو دعات المنكر يهجر الهادي يكولون.    ووصيته خانوها ٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪ لوله النبي ما يستيقم الأسلام واهل الجهل تعبد بعدهي الأصنام شرع الدين وطبقاها الأحكام امن الظلم حررها الناس.   وفعاله ما ينهوها ٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪ ميزه عن كل الخليقه الخلاق وضاها الجمال بنوره رب الأرزاق جان النبي مضرب مثل بالاخلاق جا ليش ذيج الأصحاب.   احدود النبي تعدوها ٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪ الشاعر تحسين الخفاجي ليلة ٢٨ /صفر /١٤٤٨ هجري الأربعاء 12\8 \2026 ليلة استشهاد الرسول الأعظم صل الله عليه وآله وسلم #ميمر #قصائد1448

هاي الزهره اتنوح الليله ٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪ نور--الباري--ايّودع---احبابه چم لوعه وچم حسره غيابه كل ونه  اتصير  من امصابه حضرت والحور اتناديله هاي الزهره اتنوح الليله ٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪ نار   افراگك   تسعر  بينه يوم الهجره اشگد ياذينه مكه  وزمزم  تنشد  وينه ما ينشف مدمعنه انسيله هاي الزهره  اتنوح الليله ٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪ مفجوعه--الامه- ابخاتمهه مشغوله ---الدنيا --ابعالمهه مظلومه الزهره وكل همهه بعدك بالحسره وتحچيله هاي الزهره  اتنوح الليله ٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪ فگد---  المختار--  الاذاها تنحب-- ما يهدئ مبچاها صوت الناعي چن ينعاها فززها  امصابه وتشكيله هاي الزهره اتنوح الليله ٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪ واليهه -- المفگود-- اتنوحه مظلوم  وسولف  بجروحه فاطم هيه اتعيش ابروحه ياربي-ايديمه--وتدعيله هاي الزهره اتنوح الليله ٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪ ابروحة واليهه  انواسيهه يم حيدر  جينه  انعزيهه يوم- افراگه ايعز اعليهه لوعة  فاطم من  تبچيله هاي الزهره اتنوح الليله ٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪ ضاعت  بعدك شفنه الامه امست دنيانه ابهل الظلمه ما تنزاح  اشگد هل الغمه أمة  طه --اشگد  تعنيله هاي الزهره اتنوح الليله ٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪ الشاعر يوسف الفتلاوي ليلة ٢٨/صفر /١٤٤٨ هجري الأربعاء 12\8 \2026 ليلة استشهاد الرسول الأعظم صل الله عليه وآله وسلم #قصائد1448

.      واويـلاه     داره خـلــيـــه        واويـلاه     سـيد الـبــريـه        واويـلاه     هــاي الـرزيّــه                                      *---------------*---------------* اللـيلـه الـكـون مـظـلـم كـلـه بـغـيـابـه نـبـي الرحمه الـوكـف جبريل بـعـتـابـه دمــوع العين لـجـلـه بحسره سـجـابـه بـوداعـه الـحـزن لـيـنـه انـفــتـح بـابـه         لـلـمـخـتـار     نـنـصـب عـزيـه                                      *---------------*---------------* خـلـه بـكـل گـلـب نـيـرانـه والجـمـره الـلـه ايعين گـلـبـچ فـاطـمـه الـزهـره كـسـر المصطفى يصعب بـعـد جـبـره تـرك بـيـنه الـدمـوع الجاريـه وعَـبـره        مـانـنـسـاه     حـد الـمـنـيـه                                      *---------------*---------------* الـهـادي الـچـان نوره مـنـوّر الـسـبـعـه رحـل والـدار ضـلـت تـلـطــم وتـنـعــه انفجعت كلهه بـمـصابـه وتـهـل دمـعـه ونـظـام الـكون هاليله اختلف وضـعـه       يـامـعـبـود       صـبـر الـزچـيـه                                      *---------------*---------------* على الـعـتـره الصحابـه اتـأمـروا بعـده ركـضـوا لـلـسـقـيـفـه ومـاوفـوا وعـده بس حـيـدر عـلينـه الـوسـّده بـالـحـده وتسيل ادموعه حسره وحفـرت بخده      بـالـدمـعـات      حامـي الـحـمـيه                                      *---------------*---------------* عـافـوا نـور ربـنـه وعـاشـوا بـظـلـمـه الگالـوا صـحـابـه اهـل الـجـهـل هُـمـه بجـهلهـم مـارعـوا عـتـرت نـبـي الأمـه حـيـدر ينچتف هظمـه وشـنـو جـرمـه      يـالأصـحـاب     ويـن الـوصـيـه                                      *---------------*---------------* مـنـهـم راح يـشـكـي المصطفى الـربـه كظم غيضه وأذيتـه بمضامره وگـلـبـه أنـحرفـو عـن طريـقـه وخـالـفـو دربـه ذولـه أعـداء كـلـهـم ما اظـن صـحـبـه       مـايـدرون     عـدنـه قـضـيـه                                      *---------------*---------------* ✍خادم الرسول الأكرم الشاعر رعـد الجـريـخـي

قصيدة في شهادة الرسول الأكرم صلى الله عليه وآله وسلّم … لسان حال الزهراء عليها السلام ــــــــــــــــــــــــــــــــــــــــــــــــــــــــــــــــ آه واويلاه يا بويه الحبيب آه واويلاه يا بويه الحبيب ــــــــــــــــــــــــــــــــــــــــــــــــــــــــــــــــ عيــــني ما ترتــــاح إلاّ بشــوفتك وما تروح ٱهمومي بَس بحَـضرِتك ٱتحَــوّل الآهـــات بَســمة نظــرِتك والجروح بلَمسِتَك تِشفى وتِطيب آه واويلاه يا بــــويه الحــــــبيب ـــــــــــــــــــــــــــــــــــــــــــــــــــــــــــ چِنت أبويه وچِنت أخويه والسنَد وچان حيـــدر إبــن عمك والمَــدد والشجَر وَي سَجـدِتك خَر وسَجَـد والبَدُر من نورك ٱمحصّل نصيب آه واويـــــلاه يا بـــويه الحبيب ـــــــــــــــــــــــــــــــــــــــــــــــــــــــــــــ إنتَ مشـكاة ٱهـــتدت بـيك الأنــام وٱنتِـشَلت الغارگ بــبحر الــظـــلام على ٱحروفك يا حبيب الله السلام حتى عالظلموك ظل دمعك سَكيب آه واويــــــلاه يا بـــويه الحبـــيب ـــــــــــــــــــــــــــــــــــــــــــــــــــــــــــــــ چِنت بالوادم يبو الــقاسم رحيم وإنت بالـقرآن ذو الخُـلق العظيم غـيث نازل عالأرض چــفّك كريم طاهر الأصلاب يا طه النجيب آه واويــــلاه يا بويـه الحبيب ــــــــــــــــــــــــــــــــــــــــــــــــــــــــــــــــ ما حِسبت ٱحساب تتــركني وتروح بــويه من عگبك تـــولّتني الجـروح ما طبگ جفني وعلى ٱفراگك أنـوح بالحزن راح أگضي عمري والنحيب آه واويــــــلاه يا بويـــه الحــــبيب ــــــــــــــــــــــــــــــــــــــــــــــــــــــــــــــــــــــــــ بويه عگبك ظهر أبو حسين ٱنكِسَر والدلــــيل ٱعلـــيك بحزانه ٱستَعَـر رِحِــــت عنـي وسَـــــلّمتني للقــهَر الكون ظلمة ٱيصير لو شمسك تِغيب آه واويــــــلاه يا بويـــــه الحبــــيب ــــــــــــــــــــــــــــــــــــــــــــــــــــــــــــــــــــــــ تبــــچي دم ٱعلــيك آيات الكــتاب والشمس مفجوعة غطّاها السحاب عظّــــم الله أجـورنا بهذا المــصاب واللقاء ٱوياك قد أصبح قريب آه واويـــلاه يا بــويه الحبيب ــــــــــــــــــــــــــــــــــــــــــــــــــــــــــــــــــــــــ بقلم الأستاذ / ستار عذاب الحچامي

قصيدة بلسان حال الزهراء عليها السلام ، تنعى أباها المصطفى صلّى الله عليه وآله وسلّم ... ـــــــــــــــــــــــــــــــــــــــــــــــــــــــــــ أويلاه غاب نور المصطفى أويلاه غاب نور المصطفى ـــــــــــــــــــــــــــــــــــــــــــــــــــــ آنه فاطم يابو فاطم من عفتني بنوحي للمآسي سلمتني وللهضم وجروحي چنت أبويه وچنت اخويه وأنت توأم روحي يالچنت لسراري كهفي ونته مسمع بوحي لچن آه شوفي منك ما اكتفى أويلاه غاب نور المصطفى ــــــــــــــــــــــــــــــــــــــــــــــــــــ مِن جمالك من وصالك مِن عَذِب بسماتك مِن سكونك من هدوءك مِن درر چلماتك عيوني ما شبعن يطه ولوقع خطواتك بالأمان أشعر عليّة من تگع نظراتك عفتني وي جروحي النازفة أويلاه غاب نور المصطفى ـــــــــــــــــــــــــــــــــــــــــــــــــ من چنت يا بويه تدخل وبحنانك داري أشعر بخير وسعادة يا كهف أسراري تمشي جدامك رحمتك يا جلال الباري كون اشوفن وجهك آنه ليلي ويه انهاري حياتي عگبك اعليها العفى أويلاه غاب نور المصطفى ــــــــــــــــــــــــــــــــــــــــــــــــــــــ غادرتني بويه وَدري عگبك يظلموني أمّتَك نكروا وصيتك بويه ما حشموني جاروا عليّة بفعلهم وبالضلع صابوني شِعلَوا النار علبابي ومِن فدك حرموني يتيمة دمعي بالدم اذرفه أويلاه غاب نور المصطفى ـــــــــــــــــــــــــــــــــــــــــــــــــــــ تدري بعدك آنه تالي يالنبي محزونة مِن شفت جور السقيفة وحيدر يظلمونه صُبّت ٱعليّة المصايب وبابك يحرگونه بيت مهبط للملائك قسراً ايدخلونه جنيني غدر أُمتَك يخطفه أويلاه غاب نور المصطفى ــــــــــــــــــــــــــــــــــــــــــــــــــ بقلم الأستاذ / ستار عذاب الحچامي

بعده ماحان الرســـــول اغيابه حاربوه اليدّعــــــــــون اصحابه ــــــــــــــــــــ ــــــــــــــــــــ الباري يشهدله وصل وادي طوى ارسله ثم على العرش استـــــوى عاصمه وماينطقُ عن الهــــــــوى وأثنه ربه شگد عليه بكتابه ــــــــــــــــــــ ــــــــــــــــــــ اشرف واكرم جميع الانبيــــاء واوصيائه اجل كل الاوصيــــاء محد بكثره ظلم عانه وبــــــلاء بنفسه آذوه العده وبحبابه ــــــــــــــــــــ ــــــــــــــــــــ شگد رؤوف بأمته جان ورحيم راد يوصيها بصراط المسـتقيم لاتسمعوه يهجــر يگول الزنيم وهاي اول لوعته وامصابه ــــــــــــــــــــ ــــــــــــــــــــ ضدته بت الخليفه وعــــــادته اتعاونت ويه اليهود وسمتــــه ومهدت لبن صهاك وسنــدته والهجوم اصبحت اولى اسبابه ــــــــــــــــــــ ــــــــــــــــــــ بعد ماميت نبيهم يحتضـــــر انگلبو اعله اعقابهم ردو كفر وبالسقيفه اتآمرو ضد الطهر وصار امرهم يهتكون احجابه ــــــــــــــــــــ ــــــــــــــــــــ بحجر حيدر راسه وبنفسه الاخير يبجي واعيونه على الزهره تديــر ياعلي اصبر گالّه اعله اللي يصير الذيب تگطر سم عليك انيابه ــــــــــــــــــــ ــــــــــــــــــــ گالله الزمره بحقـــد دارك تطــب والظهر حگّكم يحيــــــدر ينغصب وفاطمه جدّام عينــــــــك تنضرب والضلع تخفي عليك اصوابه ــــــــــــــــــــ ــــــــــــــــــــ يصيح احرگو الدار وتسمعه وتون فاطمه ايگلــــــــوله ويگلــــهم وإن بحيله يلطم فاطمه ويدمي الجفن الهتك حرمة الله يحـرگ بابه ــــــــــــــــــــ ــــــــــــــــــــ جنب فاطم موضلع بس ينكســـــر وميّت المحسن يطيح امن العصر الماله ناصر ياعلي يخاوي الصبــــر ويجي اليوم الحگ يرد طلاّبه ــــــــــــــــــــ ــــــــــــــــــــ علي محسن الزيادي

وينه الي ايواسي المظلومه وينه الي ايواسي المظلومه *** وينه الي الليلـــه ايساعدها فاطم مفجوعــــــه بوالدها اغلى الناس المـــيت عدها ومن بعده اتنوح وملجومه *** وينه الي ايواســي بدمعاته يحضر مجلســــــنه بآهاته يندب يالهـــــــادي بلطماته ويساعد هـــــاي المهظومه *** وينه الي يجبر كســـرتها والليله اينشــــف دمعتها من صارت تخنك دنيتها وحدها وتبجــي ومهمومه *** وينه الي ابدمعه ايعزيها وبلطمه الليلـــه ايواسيها والدها وفكَـــــده امأذيها تنعه ام حســين ومالومه *** خل نبجي ونتصور همها موت الاحبــــاب أمألمها وجرح المختار اللاجمها من حضن الوالد محرومه *** ماشبعت محتاجه الحضـنه اشلون اتفكــــــر تبعد عنه اشلون اوياه اتكطع الضنه وكل ساعه اطلــع بهدومه *** ابو علي الركابي

انصبي فاتحه اعلـه الهادي يالبضعه وخلي الناس تبجي و تنحـب وتنعه *** انصبي فاتحة احــــــــــزان هالليله زيدي الونه يم حســــــــين وانعيله العرش الله اعله فكَـــده منهدم حيله بجي الي تحبه وشـــــــيعته وربعه *** بجي الي تحبه بصــــــــوت حنيه انعيله يزهره وجيبــــــــي طاريه وخلي الكون تتهــــــــــيج بواجيه واجرام السمه البالكـــون مرتفعه *** واجرام السمه وكل السكن بيها بطورج يالزجيه الليلــــه بجيها تنتظرج الدنيا امصــيبه تقريها المقتل يالزجيه بصوتج انسمعه *** المقتل يالزجيه وانتــــي تروينه بصوتج يم حسن هيجي بواجينه الكبل الحادثـــه والبعـده تحجينه من موت النبي والبابـــج ودفعه *** من موت النبي والصـــــار بأحداثه ومنعو كل حقوقـــــــج حتى ميراثه قريتي قل اعــــــــــوذ اشرور نفاثه على الردو الدين الات مجتمـــــــعه *** على الردو الدين الجاهلي وعهــــده احركو باب النبـــــــوه وانهتك حده دره الثاني ابعملته محــــــــــد ايرده وأن كال وتعدى اعله النبي وشرعه *** ابو علي الركابي

الليله عن الــــــدار شايل نورها وابتده اوي ام الحسن عاشورها *** الليله كل الكون بالهــــــم مبتلي الليله مكسور الظهر يبجي علي راح الي ايكل للزجيـــــه ادللي حارس الزهره النبي وناطورها *** الليله عن بيت النبي شال الضوه وفاطمــــــــــه دلالها نار انجوه خنكه دنياها وتحس ضاع الهوه والمدينه موحشـــــه كل دورها *** راح يبدي انوب ضــيم ام الحسن اجيوش احزان ومصيبات ومحن منين ماجـــــــــان النوايب لو لفن بعد ابوها ايحين فاطـــــم دورها *** آه الله ايعينــــــــها اشتحمل حزن فوك فكد الهادي واجــروح الدفن خدها مسطور ويظل دامي الجفن وينهتك بيت الزجـــــيه وسورها *** أمة السؤء اللعينــــــــــه الفاجره باجر اتخلي الوديعــــــه امرمره اضلوعها بالله اشجنت وامكسره اتصير ماتكدر تكف مكدورها *** تثكَل اعليها المصـــيبه فاطمه تفزع المن ياهــو بالله اتحشمه والوصيه امجتفه حامي الحمه وللشريعه يحتـمل كل جورها *** انصبت المأساة جن سيل وهجم اجروح وهموم ومناحــات وألم سوط شمات وضلع منها انهشم وباجر اللجمات تلفـي ابدورها *** ابو علي الركابي

لأستشهاد الرسول محمد عليه وعلى آله الصلاة والسلام ------------------------------------------ مدفون ابوهه اليوم ونت فاطمه --------------------------------------------- يا بويه ها يلحيد من عندي رحت بعيد كل الدمع ميفيد يا چفي ليش تبيد ارد ابچي والچفين علخد لاطمه مدفون ابوهه اليوم ونت فاطمه ******* يمك ردت يلروح وگليبي هل مذبوح گبرك عطر ويفوح بويه الدمع مسموح حد ما تموت العين يلفيهه العمى مدفون ابوهه اليوم ونت فاطمه ****** غرب عجيد الگوم يوم الحزن هليوم ها يلمتت مسموم ظل الگلب ملچوم وياك اريد وياك آنه إمعلمه مدفون ابوهه اليوم ونت فاطمه ******** بويه الترب غطاك من عمري هاك وهاك ما عيش آنه بلياك خليني اموت وياك عطشانه الك بس گوم كاتلني الضمه مدفون ابوهه اليوم ونت فاطمه ****** راح الحنين شلون يا حيرة المدفون اهل الوفى ايغربون بس من وكت يمشون تحت التراب الحيد يمضوي السمى مدفون ابوهه اليوم ونت فاطمه ******** من عمري كون سنين لاهل الوفى الطيبين بين المنيه وبين مكسوره أم حسين وياهه ابو الحسنين حماي الحمى مدفون ابوهه اليوم ونت فاطمه ********* وشلون ارد للدار بالبيت اظل خطار شيطفي هاي النار يا گلبي يلمحتار راح ابقى بالدمعات دوم امحزمه مدفون ابوهه اليوم ونت فاطمه كلمات الخادم / رعد الفريجي ثوابها الى روح والدتي