Василина Попова-Текеянова сахалыы

От ыйыгар сылын аайы имэҥ туһунан кэпсэтэн, иһиллэнэн, анаан-минээн тохтоон ааһабыт. "Дьоллоох дьахтар" диэн челлендж ыыттым, сыһыан туһунан 5 эфир оҥордум, сарсын түмүктүүр көрсүһүүбүт буолуоҕа. "Влечение к жизни: творчество, самореализация" диэн. (манна диэн эттэххэ, өлүүгэ талаһыы курдук бессознательнай процесс баарын билэр буолуохтааххыт, дии?) Сексуальность темата сүрдээх уйан тема. Киһи ис нарын утаҕынан, сүрэх ылыныытынан-ылынымыытынан ааһар. Ол иһин, тас эйгэҕэ сылдьар кэриэтэ кэһэн киирэн, хаардыы хаампаккын. Итини билэн-сэрэйэн, мин тэрийэр эйгэбэр бэлэмнээх дьон кэлэллэрэ наһаа үчүгэй. Биһиги олох либидотын туһунан, ууга умсан дуоһуйа сөтүөлүүр курдук астынан туран үлэлээтибит. Мин бу күннэргэ эмоциональнай сылаас, киһи киһини кытта истиҥнэрин өйүү-убуу тутар күүстэрин-баҕаларын, ону билинэн, уйаҕастарыттан куоппат бигэ тирэхтэрин уонна итиннэ бэйэни, сүрэҕи аһа, эрэнэр ситим, таптал туһунан саныыбын. Киһи киһини кытта ситимэ икки өттүттэн өйөөтөххө эрэ баар диэн өйдүүбүт. Киһи оҕону кытта ситимэ уратылааҕын, киһи оҕотугар сылдьар/түһэр туругун туһунан эмиэ удумаҕалатабыт. Дьиҥнээх сыһыан аһаҕас буолары эрэйэр. Оччоҕо күүһүрэр. Чугаһа элбэҕи биэрэр. Аһаҕас буолуу хайдаҕын биллэххэ, сабыылаах буолуу, куотуу, бүөлэнии, бүгүү, бэйэҕэ баары харыстыыр, онно чугаһаппат/киллэрбэт буолуу көмүскэллэрэ диэн хайдахтарын "ээ, бу маннык эбит дии" диэн бэйэҕэ булан ылан бигэргэтэр түгэннэрдээхпит. Харахпыт арыллар. Ол аата, бессознательнай, киһи тута көрбөт процеһын сознательнайга көһөрөбүт. Бэйэҕэ булан бэлиэтээбитиҥ сыһыаҥҥа эмиэ көстөр. Биитэр сиэркилэ курдук, сыһыаҥҥа бэйэҕин көрөҕүн. Киһи сыһыаҥҥа төрүүр. Киһи сыһыаҥҥа сайдар, улаатар. Киһи киһиэхэ наадыйар. Киһи киһиэхэ дьулуһар. Киһи киһини кытта ситими үөскэтэр. Бу потребноһынан психика иһигэр таптыыр-чугас киһибитигэр миэстэ олохтуубут🫶🏻 Ону "мин сүрэхпэр эн куруук бааргын", "эн миэхэ күндүгүн" диэн этэбит. Ситимҥэ оҕо, дьахтар, киһи быһыытынан аһаҕас сылдьыы диэни олохпут тухары араара үөрэнэрбит буолуо. Дьахтар чувствотынан олорор. Кини элбэҕи толкуйдуура ис айылҕатыттан тэйитэр. Оҕо чувствоттан-эмоцияттан турар. Киниэхэ критическэй толкуй диэнэ улахан суох, саҥа сайдар. Эр киһи олоҕо толкуйунан салаллар. Кини чувствотынан дьахтар атттыгар, дьахтары кытта арыллар. Оҕо, дьахтар, эр киһи секс эйгэтинэн үтүөкэн ситимҥэ сылдьаллар, олох кэрэтин арыйаллар. Бу күннэргэ ити туһунан, психология хараҕынан араас өттүттэн көрөн кэпсээн, үллэстэн үөрдүм. Сарсын, от ыйын 21 күнүгэр, киэһэ 20ч таптыыр сылаас сүрэхтээх, олоххо-чувствотыгар аһаҕас, тыыннаах дьахтар туһунан кэпсэтиэхпит. Практикаҕа киириэхпит. Ыҥырабын.

Дьахтар эйгэтэ айылҕа курдук күүстээх, эмтээх эйгэ "Күн Куо" хас көрсүһүүтүгэр, үөрэх-алтыһыы дьарыгар хатыҥ күөх лоһуор саалынан наскыччы бүрүнэринии, мин махталынан уонна махталга сууланабын👐🏼 Махталынан сууланабын - дьахтар ис туонатын улаҕата биллибэт далайыгар киһи киһини кытта истиҥ, тыыннаах көрсүһүүтэ күн ойон тахсан , орто дойдуну айхаллыырын кэриэтэ сарыадыччы, сандаара-сандаарыйа турар муҥура суох үрдүк үөрүүтүгэр🫶🏻 Чаҕылыһар харахтар уоттара, уос ыпсыбат сэһэннэрэ-сэппэннэрэ, сырдык мичээрдэр олох күндүтүн, өйөһүү кэрэтин туоһулууллар👍 Маннык тобус-толору иэйиинэн угуттуурун тохтоппот үтүө көрсүһүүттэн дуоһуйбут-манньыйбыт бэйэбинэн хас биирдии ааҕааччыбын сүрэҕим сылааһынан кууһабын🥰

Тыый, аны кулгаах, харах үөрүүтэ диэн баар. Таһырдьаттан сипсиэр салгыннаах тыаһы истэн, ардах түһэрин балайда көрөн турдум. Кулгаах-харах иччитэ буоллум. Асфалька арыыламмыт чалбахха ойуу-дьарҕаа хайдах курдук үҥкүүлүүрүн саҥа билбит курдук дьиктиргээтим.

Балтыларым ийэбит курдук сибэккиһиттэр. Тыаҕа сайылыы барбыт кэмнэригэр уу кутар хотун буола сылдьабын. Сибэккилэрбин кытта кэпсэтэбин эҥин, "этэҥҥэ туруҥ, үүнүҥ" диибин. Ол сылдьан, харахпын бырахпытым, биир балтым быыкаа иһиккэ кыып-кыра сибэкки оҕолорун көһөрбүт. Онтулара тэллэй курдук тэллэччи тэбэн, түннүк сэҥийэтигэр, дьэ, күүс эбинэ тураллар эбит. Үчүгэйэ эриэхсит. Инньэ гынан, бүгүн бэйэм эмиэ сибэкки оҕолорун сууйдум-тараатым, буорга астым. Балкоммар сайыҥҥы петуниялардаахпын, куйаастан уҥуох курдук сылаарҕаабыкка дылы этилэр, билигин этэҥҥэлэр. Ити - сибэккигэ сыһыаннаах үөрүү диэххэ. Күннээҕи үөрүү, үйэлээххэ сыһыаннаах үөрүү, алаадьыламмыттан үөрүү, бэйэтэ баар үөрүү, үөрүүтэ суох үөрүү диэн арахсар курдук. Чэ, холобур, күннээҕи үөрүү түгэнигэр буолар уонна умнуллар курдук. Элбэхтэ хатыланар, оччоҕо өссө минньигэс. Оттон үйэлээххэ сыһыаннаах - дириҥ: кылыһах/хомус тыаһын санатан, долгун курдук эҥсиллэн кэлэ турар.

Үөрүү, дуоһуйуу туһунан кэпсэтэ, иһиллэнэ туруоҕуҥ❤️ Хантан кэлэллэрий? Алаадьыланар туруктартан, көстүүтэн, санааттан. Үөрүүлээхтэн үөрдүм дуу, үөрдэртэн үөрдүм дуу, үөрдүбүппүттэн үөрдүм, үөрдэрдээх эбиппин диэн үөрдүм дуу, үөрэрбиттэн үөрдүм дуу эбэтэр барыта холбуу дуу - араара үөрэнэҕин. Оччоҕо салгыы үөрэҕин - араара үөрэнним диэн. 👇👇👇