قناة الانكليزي مع د. براء المدلل

الله يجبر خاطركم ويوفقكم باخر امتحان ♥️ طبيعي بعد نضال ٩ مواد تحس حالك انتهت طاقتك وتبلش تشرد شوي، تبلش تحسبها اذا محرزة او مو محرزة عحسب مجموعك لهلق، وسيناريوهات اخرى عم تصير معك حاليا. المهم انك تتذكر انو هاد كسلك عم يحاول يتحربق عليك بأسلوب "منطقي". اعتبر حياتك بتنتهي بلحظة يوم الإمتحان، لا تقعد تصفن ب ولا سيناريو بعد امتحان، لا سيناريو حلو ولا سيناريو سيء. ولا تستخدم أي سيناريو تاني متل الخاصة والطبيات والهندسات وهي بتسوا وهي الها مستقبل وهي ما الها... لانو هي مجرد حيل تقنعك تبلش تفرش قبل 3 أيام من المادة، محا تفرق هال3 أيام من راحتك، بس ممكن تفرق بمستقبلك ولو ضمنت فيهم علامتين زيادة. موفقين يا شباب، الله يجبر بخاطركم وخاطر أهلكم 🌹❤️

يتم طبخ شيء حلو كتير لزملاؤكم بري 12 👀 حدا لاحظ شي غير اللون؟

One more to go ♥️ الترجمة لطلاب أسبوعا: مادة واحدة للعتق من العبودية (الحالية).

ألف مبارك لأشاوس البكالوريا بصدور العلامات 🥰 الله ينور دربكم ومسيرتكم بالمكان يلي فيه الخير لكم. د. براء المدلل للانكليزي @Dr_BMOD

بري ١٢ هي اخر دفعة تحضيرية ♥️ يا مسك الختام 🌹 هذا يعني المزيد من الوقت بعد العام القادم لمشاريعي الأخرى 👀 موفقين يشبب 🥰

الحمد لله رب العالمين ♥️ إجاني يوم الخميس مريض عمره 32 سنة، قدي إلا شوي، ب فتق نواة لبية (ديسك) مستوى L1/2 لحد L4/L5، وعامل تثبيت Caging للعمود الرقبي من C4 ل C7.. الانسان ما بيقدر يمشي اكتر من 10 خطوات بدون ألم، معم يتحسن غير عال Hydromorphone.. بيشتغل مستخدم وناطور ب نادي رياضي، يعني عمله كله حمل تقيل وإلا ما بيقدر يعيش، وهلق من ورا هالانفتاق صرله مريض شهرين ف قلعوه من شغله.. للحظة واحدة تخيلت انو هاد أنا وأي شب وأي بنت تانية لو الله ما تفضل علينا ورزقنا عقل قادر على الوصول لمرحلة جامعية.. أحيانا كونك مع زملائك التوب 10% الأكاديميين بحياتك بيخليك تنسى قديش الله منعم عليك أكاديميا مقارنة بمتوسط العالم بهالكوكب، يلي مو شايفين سيناريو يضلوا عايشين فيه إلا انهم يبدلوا صحة بدنهم بمصاري. بعرف انو الحياة صعبة وحتى يلي معه شهادة بالزور عم يلاقي شغل، بس احمدوا ربكم ولا تخلوا انغماسكم بالكلية ينسيكم النعم يلي الله فتحها عليكم، بعيد بأقل من عدة أمتار منك يوجد طفل ما كمل حتى مرحلة الابتدائي لأنو كان مضطر ينزل عالشارع ويشتغل، وشب ما كمل بعد التاسع لأن كان لازم يترك ويساعد أهله، وعالم ما طلعلها شي بالبكالوريا لأن ما صحلهم مدرسة منيحة بعد ما تهجروا بعيد عن منطقتهم. لا تخلي دوام نعمتك عليك تخليك تعتبرها من "بديهياتك" و حق للدنية إلك. نحنا مو فارقين شي عن هاد الزلمة يلي خسر ظهره غير لطف رب العالمين ♥️ د. براء - القناة العامة @More_Baraa

الف مبارك انتهاؤكم من مادة الوراثة 🎊 بس أكيد تذكرتوا تقلبوا الصفحة وتحلوا المسألة والشجرة يلي ورا ما هيك؟؟

رأيي عن أسئلة الانكليزي للفصل الثاني. الله يجبر بخاطركم وخاطر أهاليكم ❤️ استريحوا وديروا بالكم عالمادة الجاية. لا تنسونا من الدعاء 🌸❤️ نبقى على تواصل بعد هالسنة الغليظة على الانستا والقناة العامة. د. براء المدلل

مساء الخير، إليكم حل دورة 2026 للفصل الثاني 🌸 رأيي عن الدورة بعد قليل. لا تنسونا أنا والأدمنز من الدعاء. د. براء المدلل للانكليزي @DR_BMOD

تم جمع جميع الأسئلة بنجاح ✅🥰 سيتم العمل على ملف التصحيح، روحوا كلوا وارتاحوا شوي ويفترض من هون لشي ساعتين تلاتة نزله باذن الله. طبعا بحاجة لتدوين وجمع وتفريغ وتدقيق وحل عدة مرات لحتى ننقص احتمال الخطأ بس ان شاء الله خلال 2-3 ساعة. حاليا ح اختفي بلش شغل فيه، سلامات ♥️

موفقين يا شباب الله يفتح عليكم جميعا ♥️ لا حدا يخاف جوا الامتحان، اذا لقيت اول ما تبلش 5 اسئلة بمفردات ما بتعرفها فهالشي حصل ل 11 دفعة قبلك، عادي، ولا تنس تراقب الوقت. إذا حابين نصحح الأسئلة مع بعض لا تنسوا تجمعوها بالانكليزي بدقة لاقدر ساعدكم بعد المادة ♥️ موفقين

مساء الخير لجميع الطلاب 💜 آخر بوست بأسبوع اللغة الإنكليزية 🍓 انت حليت آلاف التمارين، وبتعرف إنو أغلب الأسئلة نفس الفكرة، فلا تخلي كم سؤال خارجي أو كلمة جديدة يربكوك، لأنك صرت فهمان الإنكليزي أكتر من أي وقت، وعندك الملكة تقتنص الحل الصح بالمنطق. لا تضيع وقتك ع سؤال واحد خارجي وتترك المراجعة كلها، راجع، هدي حالك، وتوكل على الله. 💜 شكراً لكل دعمكم وثقتكم واحترامكم خلال هالسنة، وإن شاء الله كون أديت الأمانة وعند حسن ظنكم وقدرت أترك أثر حلو بمسيرتكم مع اللغة وغيّر أسلوب تعلمكم لها عن السنين الماضية. متمني أشوف عندكم علامات بتفرحكن وبتجبر خاطركم غداً. بالتوفيق يا أبطال. 🐥💜 نبقى على تواصل على حسابي الانستجرام الشخصي: https://www.instagram.com/baraamodallal قناتي العامة لكل السنين: @More_Baraa قناة الطريق إلى ألمانيا: @GermanyRoad لا تنسوا تناموا 8 ساعات! د. براء المدلل

بوست شكر 🎀 هذا العمل بدأ صغيراً معي بغرفتي كطالب سنة ثالثة عم يكتب نوطة تدريب 34 صفحة! وسنة بعد سنة كبر عدد الطلاب يلي استفادت من الأعمال واعتمدتها وكبرت المسؤوليات والمعلومات والحاجة لتدقيق فصلي دائم وبحث. بآخر 3 سنين، ما كان ممكن استمر بالتطوير لحالي لولا فريق الانكليزي يلي اشتغل معي من زملائكم المتقنين يلي كانوا معي طيلة الفصل، وكرسوا لكم كل وقتهم بداخل امتحاناتكم ليفيدوكم على مدار الساعة، وأخص بالذكر: 🔸 عمار: مشرف الفريق الحالي وصاحب علامة الـ 100 ومن أكثر العالم إتقاناً وذكاء وسرعة تكيف للضغط والمسؤولية واللقط عالطاير. 🔷 ضياء: أقدم مشرف علمي ما زال مستمر معنا، ومصمم ومنسّق وبتوع كله، وصاحب أعلى وقت مكرّس وأضخم عدد إجابات دائمة عند الطلاب لعدة سنين، عنده 25 ساعة باليوم. 🔷 هيا: أسرع من تسلّق الهرم الإداري بإتقانها وسرعة تعلمها ودقّة تفاصيل ملاحظاتها، مدرّبة المشرفين الجداد، وكلشي أسئلة دقيقة ومعتّة فهي سيد مين ضل وراي لضيف شرحها بالنوطة لكم. 🔷 أمير: الأدمن المرابط لثاني سنة والرايق صاحب الذاكرة القوية والإجابات الطويلة والمفصّلة، وصاحب صبر أيوب عليكم. 🔷 سارة وريمااا: أحدث مشرفي الفريق من بري 10 ويلي عالرغم من صدمة الكلية الجديدة تعلموا على أدق الأجوبة وكانوا معكم بكل صبر كل العام. 🔷 أنس وعمر: مشرفي الفريق السابقين يلي ما خلى هذا الفصل من إضافاتهم اللطيفة. 🔷 ياسر: أقدم وأعرق مشرف علمي وإداري ما زال مصرّ على إفادة زملاءه بالمجموعة مع أنه شوي وبيتخرج 👴 🔺 ولا أنسى بالشكر زملائكم وزميلاتكم المتطوعين من بري 11 وبري 10 يلي حبوا يشاركوا بهذا الأسبوع ويفيدوكم: يزن خوجة، لجين، سارة حيدر (أ.ط)، سارة الشماط، كرم الخياط، نور قاد، سارة مقداد، زهر الدين، سانا، محمد بكر، جنى، رامي. والكثير من الطلاب اللطفاء يلي سنّوا سنّة الإفادة وحب الغير. أرجو من قلبي لهم دوام التوفيق والخير، وأرجو أن تدعوا لهم أيضاً بكل خير وتوفيق وبركة بمسيرتهم الأكاديمية. عدا عن ذلك أدعو لكم جميعاً بجبران الخاطر والتيسير ❤️❤️ د. براء المدلل للانكليزي @DR_BMOD

شكرا لتقديركم واحترامكم جميعاً 💜 أضع الاستبيان في كل عام على الملأ ضمانا لعرض النسب الحقيقية، بعد اجابة أكثر من 10000 طالب عن الاستبيان، كانت نسبة رضا الطلاب عن الفيديوهات واستفادتهم منها 85%. أفتخر بثقتكم جميعاً، وأحاول بكافة الوسائل طرح كافة أعمالي بحيادية وشفافية، ودائما أترك التقييم لكم، فأنتم الأهم، وأنا من لي شرف تدريسكم، ثلة من القامات العلمية التي تحترم علمي وعملي. أعزائي الطلاب، من المهم جدا كون المدرس واعيا لأخطاءه قبل محاسنه حتى يعرف كيف يمكن التطوير من نفسه ليساعد طلابه اكثر واكثر. كل حرف يعطيه المدرس هو مسؤولية، قد تتسبب بتغيير حياة طالب للأسوأ أو الأحسن، فاصلة قد تغير معدل الطالب وكليته وكل حياته، هذه المسؤولية ضخمة دينياً ودنيويا، ولا يجب التفريط بحرف واحد أو إعطاء كلمة مغلوطة واحدة والإصرار عليها من باب الكبرياء أو الغرور، نصف العلم لا أعلم، وكل العلم أن تتقبل الانتقاد لتصبح أفضل. نهاية، النوطة والكورس هي حصيلة من تطوير انتم سببه، على مدى 9 سنين، سنة وراء سنة من الاسئلة، ولولاكم انتم واسئلتكم وارائكم ما بنوصل لهالنقطة يلي قدرت اني اتشرف اني انحط بهالموضع و اقدر فيدكم فيه بكتاباتي واعمالي. شكراً جزيلاً لتقديركم وثقتكم، انا من استمتعت بهذا الشرف 💜 د. براء المدلل @DR_BMOD

كتير طلاب سألتني نزل مراجعة الوحدة السادسة بالمجان، تكرم عينكم ❤️ ما قصرتوا معي وقت الدعاء لامتحاني وهي جزء بسيط من رد الجميل لامتحانكم. 🔹 الفيديو يتضمن مراجعة النقاط المفتاحية في القواعد الثلاثة، بالاضافة الى ابرز مفردات الوحدة المكررة بالامتحان، مع حل اهم اسئلة الدورات. انشروه لتعم الفائدة 🌸 قناة د. براء المدلل للانكليزي @DR_BMOD