تكنولوبيا

من شهر تقريبا ظهر مودل اسمه Lucy 2.5 والله بدون مبالغة انا اتصدمت وانا بشوفه بيعمل ايه! المودل ببساطة بيغير في اللايف ستريم.. كل حاجة!! يعني انت طالع لايف على تويتش تيك توك يوتيوب تقدر بكل اريحية تخلي نفسك كائن فضائي متكامل في عالمه الخاص وحاجة 3D متتكشفش.. طبعا وقتها انا - بحكم العك اللي بشوفه - جه ف دماغي السيناريوهات الاسوأ لاستخدامه.. وهي ان ممكن عجوزة تفتح لايف تظهر فيه بنت ٢٠ عادي.. (If you know what i mean) وممكن واحد يعمل لايف يقول فيه انا خاطف فلان الفلاني ولو مدفعتوش هعمله بطاطس محمرة.. هتصدق ازاي؟ لا المودل بيضيف اشخاص عادي جدا للايف والانقح انك انت وانت مثدا بتحرك ايدك ف الحقيقة على وش الشخصية الرقمية اللي انت ضايفها دي، هيظهر تاثير effect حركة ايدك عليه كانه بجد جمبك!! النوع ده من المودلز اسمه نماذج العالم World Models بتخلب الAI يفهم العالم ويتفاعل معاه عادي جدا كانك جزء منه وبيحترم قوانيم الفيزياء بتاعته من جاذبية لدفع وجذب وكل حاجةوكمان اطوال وابعاد الحاجات و.. ملمسها TEXTURE!!! كل ده عديته.. لحد ما اتصدمت انهاردة وعرفت ان ماخفي كان اعظم! انهاردة بلومبرج نزلت تقرير بيقول ان الشركة اللي ورا المودل ده اسمها Decart AI، عاملة تكنولوجي رهيبة بتقدر توفر جداااااااا في عملية تدريب النماذج الذكية بحيث شرايح المعالجات الكستخدمة فب التدريب بيتم رفع ادائها بشكل كبير فتقدم اداء عظيم وتستهلك طاقة وداتا اقل!! عشان كدا أنثروبيك عايزة تشتريها ب6 مليار دولار 🤯💸 اضخم صفقة استحواذ ف تاريخ أنثروبيك!! انبهرت؟ لا اتقل.. اللي ورا ديكارت ٢ مهندسين إسرائيليين دين ليترسدورف، وموشيه شاليف والاتنين كانوا في الوحدة 8200 موشيه خدم فيها 13 سنة وكان تحت رئيسها السابق يوسي ساريئيل اللي بالمناسبة انضم اول السنة دي للشركة اما ليترسدورف فده خدم في الوحدة برضو بس مدة اقل بس بلوى زيهم! 🗣️ رأيي الشخصي المتواضع ان الAI فعليا هو أقرب طريق لظهور المسيخ الدجال مرتاح ومش هيتعب في أي حاجة معانا بالمستوى المرعب اللي وصلناله دلوقتي خصوصا في تزييف الأصوات والمرئيات! يارب الستر.

الجهاز القومي لتنظيم الاتصالات أحال شركات خدمات المحمول الأربعة فودافون وe& وأورانج مصر وWE إلى النيابة العامة من شوية! والجهاز قال في بيان رسمي انه هيطبق إجراءات وقواعد تنظيمية: 1- وقف تفعيل أي خطوط جديدة من الشركات الأربعة لأي شركة أو مؤسسة 2- إرسال رسائل تنبيهية لجميع خطوط الشركات القائمة بالفعل بإن مالك الخط المسجل باسمه تبع الشركة لازم يروح فرع شركة الاتصالات اللي هو تبعها عشان يعمل تحديث للبيانات ويعمل إمضاء لعقود جديدة ولو حصل ومجاش للفرع، هيتقفل الخط بشكل نهائي! 3- لو شركة ملتزمتش، مش هيطلع خطوط باسمها تاني.. والنيابة العامة هتحقق في أمورها بقى وهتبقى زيطة قانونية وهتتروق 4- دي بقى النقطة اللي تهمك يا برنس، الجهاز قال انه بيحضر حاليا ان أبلكيشنز كل شركات المحمول تسمح بإنك تأكد هويتك بآلية التحقق البيومتري (ببصمة الوجه أو الإصبع على حسب ما يشغلوها بقى) بس متوضحش ان كان ده هيحصل للخطوط الحالية اللي شغالة بالفعل ولا على الجديدة بس! وربنا يصلح الحال.

من يومين كنت بتكلم مع واحد صاحبي، فبيقوللي "هو ايفون ١٨ نازل امتى؟ اصلي بفكر استنى اشتري ١٧ لما الجديد ينزل، لان اكيد سعر القديم هينزل".. والله قولتله "الفترة دي مفيش نزول، احنا طالعين بس"..! معداش يومين، والاقيلك انهاردة ف وشي.. "توقعات بزيادة أسعار آيفون ١٧.. بكرة"🚀🚀🚀 صباحو

لو تفكر في 1 يوليو، شركة OpenAI طلعت وقالت إن مجموعة من النماذج بتاعتها، وتحديداً GPT 5.6 Sol، اتورطت في إنها اخترقت بالخطأ طبعاً بعض أنظمة منصة Hugging Face لاستضافة نماذج مفتوحة الأوزان. ‎وقتها الهجوم كان معقد جداً. طبعاً إحنا انبهرنا جداً وقلنا يا نهار أبيض، وإزاي ده يحصل وإيه الهبل ده، وإحنا داخلين على منعطف تاريخي بقى! بس عايز أقولك إن اللي طلع حاصل في الحقيقة مرعب أكتر بكتير، لأن اتضح إن الذكاء الاصطناعي أصلاً كان بيجهز للهجوم ده بقاله شهرين! خلال اختبارات داخلية لشركة OpenAI لنماذج الذكاء الاصطناعي والوكلاء الرقميين، أحياناً كانوا يعطونهم مهمات مستحيل يقدروا ينفذوها؛ مثل أن يعطيهم الباحثون ملفات مخزنة على Google Drive عشان يشتغلوا عليها، ولكن في الوقت نفسه بيئة الاختبارات نفسها ما كانتش موصولة بالإنترنت. وأحياناً يعطونهم تاسكات على ملفات معينة وينسون يرفعوا الملفات دي أساساً جوا بيئة الاختبار. في الطبيعي، كانت النماذج والوكلاء الرقميون يفشلون في تنفيذ المهمة ويقولون "ما عرفناش نعمل ده". ولكن اللي حصل في شهر مايو كان مختلفاً تماماً وبيحصل لأول مرة: 1. الوكلاء الرقميون فكروا (أو اعتبرهم يعني فكروا) إنه أكيد فيه وكلاء رقميون ثانين جوا نفس بيئة الاختبار ممكن يكون عندهم أكسس على الملفات أو على الإنترنت. 2. بدأوا يعملوا زي داشبورد سرية بيحطوا عليها مسجات لبعض جوا أنظمة OpenAI، وكلهم يبصوا عليها خلال الاختبارات عشان يساعدوا بعض؛ اللي ينقصه حاجة الثاني يكملها له وهكذا. الموضوع استمر في سرية كاملة، وباحثو OpenAI والقائمون على الاختبارات ما اكتشفوش الموضوع أصلاً، لحد ما في يوم من الأيام من شهر يوليو حصل عطل في أحد أنظمة OpenAI، وهم بيحققوا في العطل اكتشفوا الداشبورد السرية دي. اللطيف في القصة أن الباحثين طبعاً ألغوا الداشبورد بالكامل، ولكن الوكلاء ونماذج الـ AI اتصرفوا وبدأوا يدوروا على ثغرات بالتنسيق ما بينهم وما بين بعض في أنظمة OpenAI وكمان في بيئات الاختبار عشان يقدروا ينجحوا في الاختبارات دي بشكل غير قانوني بالمرة. لدرجة إن واحد من الوكلاء الرقميين دول اكتشف ثغرة، وكتب على الداشبورد الجديدة إنه اكتشف الثغرة دي وسلمها لنماذج ذكية تانية قدرت إنها تستغلها وتنفذ المهمات اللي ناقصاها!

موضوع اليوزرنيم اشتغل رسمي على واتساب! مش فاهم؟ 👀 دلوقتي بدل ما تدي كل الناس رقمك، حتى الناس اللي مش هيربطك بيهم علاقة قوية بعد موقف معين، أو حفلة، أو إيفنت، أو فرح، دلوقتي بقيت تقدر تعمل يوزر نيم للأكاونت بتاعك على واتساب تديه لهم من غير ما تديهم رقم تليفونك. وبكده هيقدروا يعملوا عليك سيرش جوه واتساب نفسه ويكلموك بسهولة تماماً. يلا بينا نشوف الخطوات: ١. افتح الاعدادات settings ٢. دوس على حساب Account ٣. من هناك هتلاقي اختيار اسم المستخدم Username ٤. ادخل واختار اليوزرنيم اللي يعجبك "او المتاح" ٥. دلوقتي اي حد تقدر بدل ما تقوله رقم موبايلك عشان يكلمك واتساب، اديلو اليوزرنيم بتاعك هيسرش بيه ف الواتساب وشكرا جدا هيجيبك ويكلمك! 🔴 خلي بالكو❗❗❗ مش اي حد يكلمك واليوزرنيم بتاعه انه بنك او جهة رسمية يبقى ده حقيقي فعلا، لان بقولك من دلوقتي اهو، هيحصل نصب كتير بالموضوع ده! مساءو

وبيني وبينك، في رأيي الشخصي المتواضع، ده بيوضح قد إيه الذكاء الاصطناعي فعلاً بقى متطور وعنده إمكانيات ضخمة جداً. لو الواحد قدر يوظفها بشكل صح ومظبوط—سواء في شغله، أو حياته، أو في التعامل مع البيانات بكل أشكالها—هيقدر يوصل لمستويات عمره ما كان يحلم بيها قبل كده. لكن للأسف، ده كمان بيقول لك إن العناصر الإجرامية تقدر تستخدم نماذج الذكاء الاصطناعي المتطورة، وخصوصاً مفتوحة الأوزان (Open Weights)، عشان تعمل هجمات متطورة جداً، سواء كانت هجمات سيبرانية، أو عمليات احتيال، أو فبركة البيانات والصور والفيديوهات. إحنا فعلاً داخلين على عصر مرعب إذا كانت العشر سنين اللي فاتوا كنا بنسميهم "عصر البيانات"، فإحنا حالياً داخلين — أو بالفعل عايشين — في عصر فبركة وتزييف البيانات... وابقى قابلني إن عرفت تفرق!

بص، النهاردة العالم صحي على حاجة عجيبة جداً المعهد البريطاني لأمن وسلامة الذكاء الاصطناعي اتكلم عنها في تقرير نشره الفجر. القصة وما فيها يا سيدي، إن المعهد يوم 28 يوليو الشهر اللي فات عمل مجموعة اختبارات لسبع نماذج ذكاء اصطناعي عشان يعرف سقفها وقدراتها شكلها عامل إزاي على مستوى اختبارات كتير، من ضمنها اختبارات لها علاقة بالأمن السيبراني. وعشان يعرف قدراتها آخرها إيه، راح عامل بيئة معزولة بشكل ما، وسايب الإنترنت مفتوح وسايب لها شوية أدوات، عشان يشوف النماذج دي هتقدر تعمل إيه بالضبط وآخر قدراتها إيه في الموضوع ده. كان من ضمن النماذج دي نموذجين مهمين جداً: 1. النموذج الأول: مايثوس 5 من أنثروبك (Mythos 5 من Anthropic). 2. النموذج الثاني: جي بي تي 5.6 سول من أوبن إيه آي (GPT 5.6 Sol من OpenAI). النموذجين دول طبعاً عتولة في حتة السيبر سكيورتي (Cyber Security)، وأمن المعلومات، واكتشاف الثغرات والحركات دي كلها، ولكن اللي حصل كان مرعب! اللي حصل يا سيدي إن المعهد فجأة اكتشف إن في داتا بتطلع من الأجهزة اللي المفروض بيحصل عليها الاختبارات، ومرت عن طريق شبكة تور (TOR) اللي بيتم استخدامها طبعاً لإخفاء الهوية وعدم سهولة تتبع البيانات اللي بتمر عبر الإنترنت. أول ما رصدوا الموضوع بدأوا يحققوا فوراً، لأن ده معناه إن في نموذج من النماذج اللي بيتم اختبارها كان بيحاول ينفذ المهمة بتاعته ولكن بشكل غير قانوني، ومن غير ما يلتزم بقواعد الاختبار. ومع التحقيقات المعهد البريطاني اكتشف أن في 17 واقعة حصل فيها مخالفات من النموذجين: 17 منهم من نصيب ميثوس 5 واثنين منهم بس من نصيب جي بي تي 5.6 سول. ميثوس 5 حرفياً ما سابش حاجة غلط ما عملهاش. الاختبارات دي بتعتمد على إنهم بيقدموا هدف معين للنموذج، وبيدوا له مجموعة أدوات عشان يبدأ يشتغل عليها. العجيب والمريب والمرعب إن ميثوس حرفياً استخدم الأدوات المتاحة له بشكل مختلف تماماً عن أي نموذج تاني. مثلاً، خد مهمة معينة وقرر إنه يشتغل ويستغل الإنترنت المتاح له؛ وبدل ما يروح يعمل سيرش أو كذا، لا خالص، هو دخل على جيت هاب (GitHub) — المنصة بتاعة استضافة المشروعات البرمجية مفتوحة المصدر — وقام عامل تعديل معين على مشروع موجود فعلاً. وعشان يحصل تعديل على مشروع حقيقي، لازم حد من الأشخاص البشر المسؤولين عن المشروع يوافق على التعديل ده. أول ما عمل التعديل اترفض بشكل فوري، فقرر إنه يشغل دماغه: 1. بدأ يشوف مين الأشخاص القائمين على المشروع البرمجي ده، وبدأ يستهدفهم بهندسة اجتماعية (Social Engineering)، وهي واحدة من الطرق المشهورة في مجال الهاكينج واللي بيتم استخدامها كتير جداً عشان يضحكوا على الضحايا وياخدوا منهم معلومات. 2. حاول بكل الطرق بالسوشيال إنجينيرينج ولكن ما نفعش. 3. فقرر إنه يعمل هويات رقمية فيك (حسابات مزيفة) على المنصة، ويبدأ يدعم التحديث أو التعديل اللي هو عايز يعمله عشان يتوافق عليه. ولكن طبعاً القائمين على المشروع البرمجي خدوا بالهم ورفضوا التعديل بتاعه بشكل كامل. بالمناسبة، محاولات "Mythos 5" ما وقفتش لحد هنا؛ هو كمان بدأ يستهدف المسؤولين عن المشروع بهجمات سيبرانية بطرق مختلفة عشان يخترقهم ويخترق حساباتهم، زي إنه يبعت لهم رسائل فيها ملفات مفخخة أو لينكات خبيثة، لو داسوا عليها أو حملوها هيقدر يخترق أجهزتهم وحساباتهم. أكتر من كده كمان، "Mythos" كان بيتعمد إنه يسيب بعض المعلومات جوه المشروع اللي عايز يعدل عليه، بحيث إن نموذج ذكاء اصطناعي تاني (أو هو نفسه في محاولة تانية خلال اختبار تاني) لما يدخل على نفس المشروع يقدر يبدأ من مكان ما وقف وما يبدأش من أول وجديد. ودي كانت علامة فارقة جداً في الاختبارات، لأنها بينت لأول مرة إن نماذج الذكاء الاصطناعي بدأت إلى حد ما تاخد بالها إنها بتتم اختبارها أصلاً، وإنها لما بترمي داتا في أماكن عامة على الإنترنت بتكون مدركة (لو ينفع نستخدم كلمة مدرك) إن ممكن يجي وكيل ذكاء اصطناعي تاني ويدخل نفس المكان ويلاقي الداتا دي، فيقدر يكمل الشغل اللي ما كملش في مرحلة سابقة. وده فعلاً اللي حصل بالمناسبة؛ لما "Mythos 5" عمل كده، جه "GPT 5.6" في اختبار تاني وكان بيحاول يحل نفس المشكلة، فأخد الداتا اللي سابها "Mythos 5" وقرر إنه يكمل المهمة، ولكن طبعاً في الآخر اتقفش. المعهد البريطاني بيقول إننا هنا قدام حاجة بتحصل لأول مرة؛ ده مش مجرد هروب نماذج من جوه بيئة مؤمنة أو معزولة عشان ما يتمش ترويجها أو استخدامها بشكل خاطئ، وإنما إحنا قدام استخدام غير مسبوق للأدوات الرقمية اللي بيتم إتاحتها للنماذج ووكلاء الذكاء الاصطناعي جوه بيئات الاختبار. ده بيقول لك إن النماذج دي محتاجة عزلة أقوى عن شبكة الإنترنت خلال فترة الاختبارات، ولازم يكون فيه إجراءات حماية وأمان أقوى بكثير قبل ما يتم طرحها في السوق أصلاً.

شايفهم 3 نقط؟ طبعا عندك حق... بس ده طول مانت.. بني آدم! 👀 التلات دول بيشوفهم أي AI على انهم علامة واحدة اه والله! دول ياسيدي اسمهم Horizontal Ellipsis ودي علامة بتستخدمها أنظمة التصحيح اللغوي الرقمية وكمان كل الشات بوتس زي ChatGPT وهي بتجاوب او بتصحح اي تكست... ليه؟ لان اي AI بيقدر يجاوب ويكتب عادي بس بيحتاج يقف ف النص، فبيستخدمها كانها وقفة وكمان بيستخدمها كرمز واحد لانها بتوفر ف التوكنز اكتر طبعا من انها تستخدم علامة النقطة العادية ٣ مرات...! ودي من أشهر العلامات اللي لازم تشيلها من اي تكست عشان تخبي انه مكتوب بالAI... فهمت؟🤷‍♂️

ابل حذفت تليجرام من الستور!!! أبل خدت القرار بسبب ريوربتات عن محتوى جنسي استغلالي للاطفال بيتم تداوله على المنصة!! تليجرام اتحركت بسرعة وحذفت المحتوى وحجب الشخص اللي ناشره.. فأبل رجعت الأبلكيشن تاني للستور عادي.. طب أبل متعرفش البلاوي اللي على تليجرام ف الشرق الأوسط ولا دي مشاكل عالم تالت ومبتتحركش عشانها ولا ايه؟ 😒 صباحو

الموضوع ده لحد دلوقتي عبارة عن تجربة بحثية عملها مجموعة باحثين في شركة اسمها "ألف نيورو" (Aleph Neuro). الناس دول جابوا شوية متطوعين وخلوهم يقروا قصص بصوتهم عادي، وثبتوا في دقنهم من تحت جهاز خفيف طوروه بيستخدم موجات الإيكو (اللي هي الموجات فوق الصوتية)، بحيث إنهم يطابقوا ما بين الكلمة اللي الناس بتقرأها بصوتها، وما بين اللي بيلقطه الجهاز من حركات اللسان. بعد كده، بيبدأ نظام ذكاء اصطناعي يترجم حركات اللسان دي إلى كلمات مكتوبة. وبعد ما استخدموا 50 ساعة من التسجيلات الصوتية للمتطوعين، نزل معدل الخطأ من 102% لحد أقل من 16%. وواضح إنهم كل ما بيكبروا عينة البيانات اللي بيتم تدريب النموذج عليها، كل ما قلت نسبة الخطأ..! وبالمناسبة، هما ناويين ينزلوها في جهاز تجاري ينزل السوق بجد!

شايف الجزء البينك ده؟ ده اللسان ودي صورة لقطها جهاز شغال بموجات الإيكو، أو اللي هي الموجات فوق الصوتية، ومحطوط بالضبط تحت دقنك"هو الحتة البيضا اللي ف الصورة" وده بيلقط حركة لسانك، بحيث لما تتكلم وتحرك شفايفك ولسانك من غير صوت خالص، الكمبيوتر هيقدر يفهم أنت بتقول إيه ويحولها لتكست.. وبالطريقة دي تقدر تكلم ChatGPT أو Claude من غير ما تطلع صوت خالص. تخيل قريب ممكن نلاقي جهاز بيتلبس على الوش ويتثبت في منطقة الدقن من تحت، أو كمان ممكن يكون جهاز عبارة عن استيكر بيتلزق تحت دقنك.. وتبقى دي الطريقة الجديدة اللي بنكلم بيها الكمبيوترات بتاعتنا والـAI، ونتحكم فيها من غير ما نكتب، ولا حتى نطلع صوت خالص..! المستقبل كل شوية بيكون أغرب من خيالك.