BnSamy

عشان نخلص من حوار البنك الدولي يصرح 62.8 مليار دولار ديون مستحقة على مصر خلال 12 شهر *️⃣ يا شباب أرجوكم متاخدوش معلومات من عناوين الأخبار؛ العنوان مكتوب يعمل ترافيك مش أكثر وجو جريدة النبأ في الأتوبيس "لو مولود بعد 1995 مش هتفهم قصدي غالباً". طيب لما تفتح الخبر هتلاقيه أولاً قديم؛ آه منشور جديد بس بيتكلم عن الماضي من 1 أبريل. الخبر بيقولك المبلغ متقسم Q2-2026 هندفع 24.39 مليار وQ3-2026 هنسدد 13.94 مليار وQ4-2026 هنسدد 13.7 مليار ثم Q1-2027 هنسدد 10.8 مليار دولار... كده يبقى القلق عندنا فعلياً من Q2-2026 هو المبلغ الأكبر، بل فعلياً بيساوي Q4-2026 + Q1-2027 معاً. *️⃣ يعني نعدي Q2-2026 وخلاص الموضوع بقى خفيف... هو إيه Q2-2026 دا؟ دا يعني شهور أبريل ومايو ويونيو 2026... إيه دا عدى خلاص؟ دا كان فيهم حرب؛ حد حس بشيء؟ الأستاذ اللي هناك حس بشيء؟ دا إحنا فعلياً دلوقتي في نصف Q3-2026 يعني فعلياً كده يعتبر سددنا 31 مليار دولار خلال 4.5 شهر ومحدش حس بشيء... فاضل بقى 31 مليار دولار زيهم على 7.5 شهر.... يعني إنتا سددت 31 في 4 شهور ونص فيهم حرب ومحصلش قلق؛ هتيجي بقى تقلق من 31 في 7 شهور ونص؟ *️⃣ كل ما سبق دا بقى بفرض أصلاً إنك سددت؛ في جزء كبير من الفلوس دي ودائع خليجية بيتم تجديدها؛ وفي جزء ديون لصالح البنوك المحلية بس بالدولار فبنصدر أذون/سندات جديدة وندورها تاني... أنتم فاكرين علينا 62 مليار دولار يورو بوند ولازم يتسددوا بجد؟ *️⃣ للمرة العشرومية؛ لا تقلق حالياً من الدولار... إيه مستوى الحركة 10% دا اللي يقلقك؟ يعني تبقى مواطن عدى عليه سنين الدولار تحرك فيها 100% وشوية حركات 10% تقلق؟ الدولار مستقر حالياً... وحالياً دي أقصد بيها 2026 و2027... قبل ما تقولي يعني 2028 أقلق؛ هقولك مش لما توصلها أصلاً في الكوكب المجنون دا؟ مش يمكن تولع... ومتقوليش يعني لو ولعت أقلق عشان اللي يسأل السؤال دا مينفعش يترد عليه... غير كده إحنا مستقرين وكله تحت السيطرة. *️⃣ متخليش مانشيتات بتنزل في المواقع لخلافات سياسية بين الدول تحركك؛ ومتخليش عناوين الأخبار تخليكم تخدعكم... وخرج الدولار من تفكيرك.. طيب مهو آخر 24 شهر عمل إيه؟ كان زي النهاردة من سنتين بـ49.35 والنهاردة 50.35 يعني زاد 2% في سنتين... إيه أخبار الأسعار آخر 24 شهر؟ هااا فهمت بقى... إنتا ضحكوا عليك وحسسوك إن الدولار هو السبب ولو سعره ثبت فخلاص الأسعار تمام.. إنتا صدقت فدي مشكلتك... خرج الدولار من تفكيرك لإنه مستقر وشوية هينزل كمان.

من يومين نزلت فيديو بالقناة يوتيوب من سكات عن تخارج HSBC وحكيت قصته كلها حول العالم والسياسات الجديدة ليه من 2020، الغريب إن الفيديو نزلته بدون ما أكتب عنه، ونزل كمان متأخر أسبوع (خبر بايت) ورغم كده اتشاف 57 ألف مرة 😍 😁 بدون ما أقول إني نزلت شيء في أي منصة. ⬅️⬅️ المهم بقى من شوية نزلت فيديو جديد، هو فضفضة ودردشة كده عن إعادة ترتيب للقناة عاليوتيوب وعمل قناة تانية غير اقتصادية (قال يعني بنزل في الاقتصادية 😂 سبقتكم واتريقت أهو) *️⃣ شوفوا الفيديو (الجديد بتاع النهاردة) وقولوا لي رأيكم وهتلاقوا في نص الفيديو في فيديو صغنن صورته في الصين لزجاجة بتتفتح بالبصمة، هتقولي إيه علاقتها بالموضوع 🤔، هقولك لما تشوف الفيديو هتفهم قصدي. *️⃣ شوفوا الفيديو وعلقوا وقولوا رأيكم. فيديو النهاردة https://youtu.be/u3RyFR5V6Vo فيديو HSBC لو مشوفتوش https://youtu.be/mWOAassV6gk شوفوا الفيديو وعلقوا وقولوا رايكم

بمناسبة بيان مستشفى بهية، اللي أنا فاهمه إن المستشفيات "خارج حالة الطوارئ" ممكن نبسطها حسب طبيعة العلاج والتمويل إلى: 1️⃣ مستشفى قطاع خاص، ودي بتحط أسعار خدماتها وبتقدم العلاج بمقابل. 2️⃣ مستشفى لفئات معينة زي مثلا مستشفى شرطة أو جيش ولا البنك الأهلي مثلا، ودي تعالج القطاع بتاعها مجانا أو بمبالغ رمزية، ولو جالها حد بره القطاع بتاعها يدفع فلوس زي القطاع الخاص بالظبط. 3️⃣ مستشفى تأمين صحي، ودي مخصصة لعلاج حالات برضك تبع التأمين، ولو في إمكانية للغير بفلوس ماشي وطبيعي. 4️⃣ مستشفى خيري، ودي بقى قايمة عالتبرعات، واللي بيتبرع بيتبرع عشان يساعد البشر. طبيعي المستشفى الخيري يحدد تخصصه، يقولك أنا بعالج سرطان الثدي، الأطفال، القلب، الكلى... لكن لما يجيلك مريض داخل بالفعل في التخصص اللي أنت اتعملت عشانه، ومستحق طبيا وغير قادر ماديا، وتدخل جنسيته كمعيار يحدد هيتعالج مجانا ولا لأ، هنا إحنا مبقيناش بنتكلم عن تخصص طبي أو أولوية علاج، إحنا دخلنا الجنسية نفسها كمعيار للاستحقاق، وده يصطدم بشكل واضح مع مبادئ العدالة وعدم التمييز في المبادئ والمواثيق الدولية لأخلاقيات المهنة الطبية. *️⃣ أنا مرة في معرض الكتاب زمان روحت أتبرع بالدم، فالراجل بيقولي التبرع دا هيروح لأطفال ليبيا اللي أصابوهم الممرضات البلغاريين بالإيدز، فقولت للراجل إيه المشكلة؟ أنا بتبرع لإنسان مش لجنسيات ولا لأعمار... أنا لما بتبرع لمستشفى خيري مش بشتري خدمة لنفسي ولا بدفع اشتراك في نادي خاص بجنسيتي، أنا بدي فلوسي لجهة بتقول إنها بتساعد إنسان مريض غير قادر. *️⃣ اللي بيتبرع بيقول يا رب عاوز الثواب عشان بساعد إنسان، مش بقول يا رب عاوز الثواب عشان بساعد مصري/سوري/سوداني/فلسطيني... لأن لو فتحنا الباب للمبدأ ده، يبقى نكمله للآخر. واحد يقول أنا مسلم وعاوز تبرعي يروح لمسلم فقط، ومسيحي يقول أنا عاوز تبرعي يروح لمسيحي فقط. واحد صعيدي يقول أنا عاوز فلوسي تعالج صعايدة بس، وواحدة تقول أنا ست وعاوزة تبرعي يروح لعلاج ستات فقط ومش عاوزة جنيه منه يروح لعلاج راجل. *️⃣ ممكن نكمل أكتر كمان، واحد يقول تبرعي للمصريين بس، بس يكونوا من محافظتي. واحد يقول لأ، يكون من طائفتي. واحد يقول يكون من جنسي. واحد تاني يدخل لون البشرة أو الأصل أو أي تصنيف تاني... طب فين هنقف؟ وإيه المعيار الأخلاقي اللي هيقول إن الجنسية مقبول أفرق بيها بين مريضين، لكن الدين أو المحافظة أو الجنس أو الأصل مش مقبول؟ لو الاتنين عندهم نفس المرض، والاتنين داخلين في تخصص المؤسسة، والاتنين غير قادرين، ليه جواز السفر يبقى هو اللي يحدد مين يستحق التبرع؟ *️⃣ لما بتكلم جمعية مرسال ولا رسالة على تبرعات بتقولك عندنا حالة وضعها 1 و2 و3.... بيكون فيها وضعهم الطبي والمادي، مش بيقولي دا مصري ولا غير مصري، مش بيقولي مسيحي ولا مسلم، مش بيقولي أبيض ولا أسمر. لأن المعيار المفروض هنا يكون الاحتياج الطبي والعجز المادي، مش الهوية. دي مبادئ موجودة أصلا في أخلاقيات المهنة الطبية الدولية، اللي بتحط عدم التمييز والكرامة الإنسانية في قلب التعامل مع المريض. *️⃣ أقولك شيء، لو عندك واحد من ولاد الغم ولسبب ما تعب ودخل الطوارئ فيجب علاجه، ومش هيقولوا دا من ولاد الغم ملهمش علاج... لأن الطب أصلا من المجالات اللي المفروض الإنسان لما يدخلها كمريض، هويته تتراجع للخلف ومرضه واحتياجه للعلاج يتقدموا للأمام. *️⃣ قمة العنصرية من مستشفى بهية، بل عنصرية مزدوجة إنها مش بس بتفرق في التعامل، بل كمان طالعة تتفاخر بدا. وبيقولوا إن غير المصريات بيتم علاجهم من خلال بروتوكولات مع سفاراتهم أو جهات تتحمل تكاليف العلاج... جميل، طب لو سفارتها لسبب ما عندها أزمة مالية؟ بلدها في حرب؟ السفارة اتأخرت في السداد أو أصلا ما سددتش؟ هتعالجوا المريضة غير القادرة ولا لأ؟ هنا ييجي السؤال الحقيقي: هي مريضة غير قادرة محتاجة علاج، ولا إحنا بندور الأول مين هيدفع الفاتورة؟ بس عامة متخافوش، دا قطاع اقتصادي مش سفاحين استثماريين. *️⃣ اليمين النازي العنصري المصري بينمو بسرعة صاروخية، غمض عينك وشوف مصر من 10 أو 20 سنة، وشوف العنصرية الحالية، وتخيل بعد 10 ولا 15 سنة هنكون إيه... غالبا هنبدأ في عمليات أبارتهايد مصرية وحملات جوبلز لنقاء العرق الآري، أقصد الكيميتي.

إمبارح السعودية طلعت تقرير الإنترنت في السعودية، ودا تقرير سنوي بيوضح ليك تقدم قطاع الإنترنت، وللي ميعرفش فالسعودية بتطلع تقارير كثير وفيها تفاصيل، وخاصة في مجالي الإنترنت والبنوك... *️⃣ يعني تقدر تعرف الأسبوع الماضي اتعملت كام معاملة على ماكينات الفيزا في المحلات السعودية في قطاع الملابس، وبتقارنها مع كل الأسابيع الماضية لسنين، فتقدر فورا تعرف أي قطاع إيه وضعه. ⬅️ المهم يعني أهم أرقام التقرير هي: 1️⃣ نسبة 45.2% من مستخدمي الإنترنت في السعودية بيستخدموا برامج AI... نص الشعب بيستخدم برامج AI حتى لو محادثات شات. 2️⃣ نسبة 99.6% من الشعب عنده إنترنت. 3️⃣ 61.3% من مستخدمي الإنترنت بيقعدوا عليه فوق 7 ساعات يوميا، ودا رقم عالي وشايفه مضر (لكن لو أنا صانع محتوى ولا دعاية هفرح، لأن دا معناه استهلاك ضخم). 4️⃣ متوسط استهلاك الفرد لإنترنت الهواتف 4G/5G وصل 53 جيجا 😂 رقم خزعبلّي، ويعتبر 3 أضعاف المتوسط العالمي... أظن السبب انتشار راوتر الـ5G هناك، فمحسوبين إنترنت متنقل... طبعا قطاع الاتصالات المصري يعمل من بنها دلوقتي عالأرقام دي 😂. 5️⃣ وسيط سرعة تحميل الملفات 216 ميجا، استغفر الله العظيم. 6️⃣ وسيط سرعة استغفر الله العظيم الـ5G وصلت 320 ميجا... مش فاهم أنا إزاي تقرير حكومي لدولة محترمة يكتب الأرقام الإباحية بالنسبة لنا كمصريين إزاي كده 😭. ملكش دعوة إنت يا جهاز تنظيم عطيات، إنت راجل صاحب مرض وماشي بالمسكنات. 7️⃣ نسبة 76.9% من السعوديين بيشتروا منتجات أونلاين، أوعدنا يا رب بنص الرقم دا في مصر حتى 😍😍. 8️⃣ نسبة 95.3% من المتسوقين أونلاين اشتروا من مواقع محلية، ونسبة 55.4% اشتروا من مواقع دولية... يعني إيه تسوق من مواقع دولية دي، يعني إيه دولية، طيب كارت الـDebit عندهم بيدفع دولي 😂😂... إحنا خايفين عليك وعلى فلوسك. 9️⃣ نسبة 96% بيستخدموا خدمات الحكومة الإلكترونية، يعني إيه إلكترونية، يعني إيه خدمات، يعني إيه حكومة أصلا 🤔🤔. إيه الخيال العلمي دا، دا عماد مأكدلي إننا متقدمين. 🔟 نسبة 85.9% بيستخدموا الإنترنت البنكي عشان يعملوا المعاملات، إيه الكلام الغريب دا، دا 50% من المصريين معندهمش حساب بنكي أصلا، ولو ضيفنا حسابات المعاشات وكروت زي فوري وتيلدا وكليفر ووو، الرقم هيبقى 79%، بس ابقى قابلني لو ربع الرقم دا تعامل أونلاين بنكي. ⬅️ للتذكير، الإنترنت دخل مصر سنة 93 وبقى متوفر للعامة سنة 96، مقابل السعودية دخلها سنة 94 وتوفر للعامة سنة 99... يعني نظريا المواطن المصري أقدم عالإنترنت من السعودي بـ3 سنين، لكن نقول إيه... سبقنا الكل وبعدين تعبنا وقعدنا نشرب شاي وكسلنا نقوم تاني. ⬅️⬅️ خبر ملوش علاقة، التضخم في يوليو اعلن 14.9% مقابل 14.3%... مش هيفرق كثير كده كده اجتماع 20 اغسطس تثبيت الفايدة... أتمنى الخبر الجانبي دا ميعملش تشويش عن البوست الأصلي

هو ليه عندنا تصنيف متعارف عليه ضمنيا للماديات، يعني يقولك دول الطبقة A ودول B ودول C، وممكن تزود وتقول A+ أو B+ اللي هي فوق المتوسطة... التصنيف دا بيقيس الدخل والثروة. *️⃣ لكن معندناش تصنيف تاني للعقلية والتعليم والتحضر والأسلوب، يعني تخيل كده تسميهم Local وPremium وElite بالإنجليزي عشان العقدة، ونقول للناس دا شخص A+ لكن (Local)، يعني طبقة ثرية بس تيوس معاها فلوس... ودا شخص C لكنه Elite، يعني متحركت بس أخلاق وأدب وتعليم ورقي تعامل. ⬅️ مشكلتنا إننا مجتمع بيحب يصنف ويفلتر، شئنا أم أبينا دا الواقع، وأنا مليش في جو أمسك العصاية في كل شيء، في أمور بعترف هو المجتمع كده، نحاول نصلحه آه، بس لما نتعامل معاه يكون من منطلق هو المجتمع كده. *️⃣ خناقة مطعم سيزلر أظهرت قد إيه المجتمع الليبرالي وخريجو جامعات الـ3 حروف منفصلين عن مصر وعايشين في الـلالا لاند فكريا، يقولك أصل الست مفروض تستأذن، أصلها مفروض تروح تصلي في المسجد، أصل أصل... أوكي هي غلطانة، بس إنتا كده مش فاهم المجتمع بتاعك، مش فاهم إنتا داخل صدام مع إيه؟ فحتى لو فرضنا حد غلطان، بس افهم طبيعة المجتمع ومتخشش صدام مع الموضوع دا... لكن نقول إيه، مجتمع ليبرالي وأرستقراطي عايش في فقاعة ذهنية. ⬅️ نرجع لموضوعنا الأساسي وهو التصنيفات، مشكلتنا إننا مجتمع يحب التصنيف، فإحنا لا إراديا وذهنيا عاملين التصنيف الثقافي دا، بس لأنه مفيش معايير ليه فضميناه للتصنيف المادي، فلو شوفنا شخص ثري وساكن في كومباوند بيدخل بـQR ومعاه مرسيدس وشغال مهندس ولا طبيب، وشخص تاني من الطبقة اللي بتكح تراب وبيركب أتوبيس حكومة وبرضك مهندس ولا طبيب... *️⃣ للوهلة الأولى ذهنيا بيكون الأول أكثر تحضرا وأخلاقا وآدابا من الثاني... مع إن الفلوس مش معيار، وإن كان الجوع والفقر بيخلي النفوس تتوحش... تحديدا مش الفقر، لكن الفقر يتبعه الحياة في منطقة عشوائية، عشان تتعايش فيها محتاج تتعلم سلوكيات معينة... دا طبعا تعميم، لأن مش كل اللي بيطلع من العشوائيات والمناطق الفقيرة مش متحضر، لكن ذهنيا بنفكر كده، مخنا بيعمم بس منقدرش نقول عشان شكلنا. *️⃣ فمتخيل لو عندنا تصنيف هيساعدنا نفلتر بدل ما بنلحق الطباع والأخلاق بمقياس الفلوس والدخل اللي اخترعه بتوع المبيعات عشان يعرف يصنف العملاء ويستهدفهم بالدعاية... إحنا ضمنيا بنقولها، دا واد آه من منطقة X العشوائية أو مش مكمل تعليمه، بس واد محترم جدا وابن أصول متربي 10 مرات... تعرف إنك مش هتقولها لو عيلته غنية، مش هتقول دا من سكان الكومباوندات بس متربي، لأن مخنا مصنف الفلوس كمعيار أخلاقي اجتماعي، مع إنها مجرد فلوس. لكننا سمحنا للفلوس بشكل ضمني إنها تدي رصيد أخلاقي افتراضي، كإن الثراء لوحده دليل على التربية والتحضر والأخلاق، مع إنها في الآخر مجرد فلوس. ⬅️ ياااه لو في المعيار دا، هتلاقي غالبية المشاهير زي الإعلاميين ولاعبي الكورة والممثلين، هياخدوا تصنيف A++ في الفلوس، بس Local أو C-- في الثقافة والتعليم والتحضر. *️⃣ وللحديث بقية، لكن مفيش طاقة الآن. ومتنسوش تسيبوا البوست الأصلي وتاخدوا الجزرة اللي محدوفة لكم.

فعلا سعر المتر في الساحل يعتبر من الأغلى عالمباً لما ندخل معيار الدخل مغلطتش الأسبوع الماضي لما قولت دكتور عمر شاطر في نقطة (لماذا نحن هنا) يعرف يفصص المواضيع الحلقة الجديدة نزلت ومش هعلق كثير روحوا شوفها https://youtu.be/KRMqxRDpqYQ?si=u7QjkcVBJgXawS39

⬅️ المشكلة مش بس إنه قابل تحدي جديد؛ المشكلة إن تصوره عن نفسه انهار. هو كان داخل الرحلة مقتنع إنه عارف الطريق وعارف المشاكل اللي هتقابله، وبعدها ظهر التحدي السادس اللي صاحبه ما قالوش عليه. هنا اكتشف إن القائمة اللي كانت في إيده مش هي الواقع كله، دي بس الحاجات اللي الشخص التاني عرفها أو افتكرها. ⬅️ نفس الشيء ممكن يحصل في المرض أو في أي مشكلة شخصية. الواحد يكون عارف الأعراض، وعارف إن الإنسان ممكن يدخل في حالة Denial، لكن لما الأعراض تحصل له يقول: لا، أكيد مش ده، أكيد أنا مختلف. معرفتك إن الإنكار موجود لا تمنعك من إنك تدخله لما الأمر يخصك أنت. *️⃣ على مستوى الدول والمجتمعات بنقول إن القواعد دي تنطبق على غيرنا، لكن إحنا مختلفين. على مستوى الأشخاص بنقول إن الأخطاء دي بتحصل لغيري، لكن أنا عارفها، فمش هقع فيها. مرة بنستخدم الاختلاف كأنه إعفاء من القاعدة، ومرة بنستخدم المعرفة كأنها إعفاء من الحذر. ⬅️ في الحالتين المخ بيدينا نفس الرسالة المريحة: ما تتعبش نفسك في التفاصيل، أنت وضعك مختلف، وأنت عارف الموضوع. خصوصيتنا تريحنا من فحص المعرفة، ومعرفتنا تريحنا من استمرار التركيز. ⬅️ أنا مش بقول إن اختلاف الظروف وهم، ولا إن المعرفة حاجة سيئة. بالعكس، لازم ندرس ظروفنا، ولازم نتعلم من أخطاء الآخرين. لكن الخصوصية المفروض تغيّر طريقة تطبيق المعرفة، مش تلغي المعرفة كلها، والمعرفة المفروض تخلينا أكثر استعداد، مش تدينا إحساس إننا بقينا محصنين. *️⃣ أخطر حاجة ممكن تعملها المعرفة مش إنها تخلينا نعرف أقل، لكن إنها ساعات تدينا راحة وثقة أكبر من اللي معرفتنا تستحقها. الإنسان بيستخدم المعرفة علشان يقلل مساحة المجهول، لكن أحيانا المعرفة ما بتقللش المجهول فعلا؛ هي بس بتقلل إحساسه بوجوده. ⬅️ ساعتها العقل يقولك: خلاص يا باشا، أنا عرفت الموضوع، وعرفت الأخطاء، وعرفت التجربة، فلا داعي للفرهدة ولا للتفاصيل… ما تدينيش في التفاصيل، إحنا مختلفين. *️⃣⬅️ البوست سرح مني وتشعب ودخلت المواضيع في بعض وتخاريف قبل النوم فنكتفي بهذا القدر... وعارف برضك إن في ناس منتظره بوستات اقتصاديه بس، هدنة قصيره كده وراجع تاني لا تقلقوا 🤐🤐 تصبحوا على خير

متزهقنيش بالتفاصيل… إحنا مختلفين يا عم *️⃣ ساعات أنا بسأل نفسي كتير: إحنا ليه عندنا وهم معرفي غريب عايز دايما يحسسنا إن إحنا مختلفين ومميزين؟ إن إحنا واخدين بالنا من حاجات غيرنا مش واخد باله منها، وإن الناس لو بتغلط أخطاء وأنا عرفت الأخطاء دي، يبقى أنا مش هغلط فيها. الوهم ده، أو الـGlitch ده، حصل ليه في مخنا؟ ⬅️ عندنا دايما إحساس إن إحنا غير أي حد. أنا مختلف عن اللي قبلي، أنا أذكى، أنا واعي أكتر، أنا باخد بالي من كل حاجة، أنا بعمل وبسوي. بس الحقيقة إن 99.9% من الناس مش مختلفة بالشكل اللي متخيلاه عن نفسها؛ إحنا في الغالب شبه بعض أكتر بكتير مما إحنا متخيلين. ⬅️ الموضوع ده مش بس فينا إحنا كأفراد. لما تيجي تتكلم في الاقتصاد يقولك: أيوه، ما هو اللي مشي في اقتصاد العالم ما بيمشيش في اقتصاد مصر. تيجي تتكلم في الـBusiness يقولك: لا، ما هي اللوائح اللي بتمشي في العالم ما بتمشيش عندنا. تيجي تتكلم عن التعامل مع الشعوب يقولك: ما ينفع مع شعوب العالم ما ينفعش مع الشعب المصري. ⬅️ ليه كل حاجة لازم نحس إن إحنا لينا فيها خصوصية؟ إحنا مختلفين عن كوكب الأرض كله، إحنا غير أي حد، والطفل المصري أذكى طفل في العالم، والحاجات دي. أكيد كل شخص ليه خصوصية، وكل شخص مختلف عن التاني، وده ما فيهوش خلاف، لكن الاختلاف مش معناه إن عندنا إيد زيادة أو رجل زيادة. ⬅️ الاختلاف معناه إننا مش متطابقين 100%، ومش Copy-Paste من بعض. أكيد ما ينفعش تاخد تجربة دولة تانية في الاقتصاد وتحطها عندك Copy-Paste وتستنى نفس النتيجة، ونفس الفكرة في الإدارة والـBusiness والمجتمعات والحاجات الاجتماعية. بس ده برضه مش معناه إنك تخترع العجلة من أول وجديد. ⬅️ تخيل مثلا قريت ان التجارب والدراسات بتقول إن اللي هيمشي في طريق معين هيقابل متوسط 100 مشكلة. بس دا عادة بيكون دا متوسط مش أكثر، فمثلاً دولة ممكن تقابل المشكلة بدرجة 50، ودولة تقابلها بدرجة 100، ودولة تانية توصل عندها لـ200، على حسب ظروف كل واحدة. الاختلاف هنا في شدة المشكلة وطريقة ظهورها، مش في إن دولة هتقابلها ودولة تانية قوانين الكون. ⬅️ لما نقول إن متوسط المشكلة 100 درجة، ده مش معناه إن كل الدول لازم تقابلها بنفس الشدة. ممكن أنت تقابلها بدرجة أقل أو أكتر على حسب وضعك، لكن أصل المشكلة موجود. ما ينفعش حد يحذرك من الطريق، فترد عليه: أصل إحنا مختلفين. يا عم أيوه أنت مختلف، بس مش مختلف عن الجنس البشري كله. *️⃣ ساعات تمسكنا بفكرة إن إحنا مختلفين مش بيكون بس علشان نريح دماغنا من التفكير، لكنه كمان علشان نريح نفسنا من الإحساس إننا عاديين أو أقل من غيرنا. الإنسان مش عايز يحس إنه مجرد نسخة من أي حد، والجماعة برضه مش عايزة تشوف نفسها مجرد جماعة وسط باقي البشر؛ لازم نحس إننا أذكى وأعرق وأهم. ⬅️ أوقات كتير لما الواقع يخلينا حاسين إننا متأخرين، أو محتاجين مساعدات ومعونات، أو إن وضعنا الحالي مش أحسن حاجة، بنروح نعوض الإحساس ده بخطاب زي: إحنا بنينا الحضارات، إحنا علمنا الخليج، إحنا أصل العلم، إحنا عملنا وسوينا. مش شرط يكون الكلام كله غلط، لكن استخدامه هنا بيكون علشان أقول لنفسي: أنا مش محطوط عليا، أنا مهم، وأنا أحسن من حد. ⬅️ الفكرة دي ممكن تدخل كمان في العنصرية. علشان أتعامل مع جماعة تانية كأنها أقل مني، لازم أقنع نفسي الأول إنهم مختلفين عني اختلاف جوهري، مش إنهم بشر شبهي وبيننا اختلافات في اللون والثقافة والظروف. الاعتراف إن الناس كلها شبه بعض أكتر مما إحنا متخيلين بيسحب من العنصرية جزء مهم من المبرر اللي بتبنيه لنفسها. ⬅️ ممكن واحد جاي لك من أوروبا يكون صايع وخمورجي وفقير، ومش لاقي ياكل وبينام في الشارع، لكن معاه باسبور أوروبي. في الغالب هتلاقيه يدخل دولتك بمنتهى السلاسة، وممكن ما يحتاجش تأشيرة أصلا، لمجرد إن الباسبور اللي معاه جاي من دولة غنية. ⬅️ تخيل أنت بقى تروح دولته وأنت رجل أعمال وعندك شغل وفلوس، فتلاقي دولته بتبص لك من فوق لتحت قبل ما تسمح لك تدخل. إحنا هنا ادينا الشخص الأوروبي هالة البلد كلها، وادينا الشخص التاني الشكوك والصورة النمطية المرتبطة بالباسبور اللي معاه. ⬅️ ممكن كمان ييجي لك سوري أو سوداني هرب من حرب، فتشوف حالته الحالية وتفترض إن ده كان وضعه طول عمره. مع إن الشخص ده ممكن يكون كان عايش في فيلا فيها حمام سباحة، وعنده بيزنس ومستوى اجتماعي أنت لو رحت بلده قبل الحرب ما كنتش تعرف تقابله أصلا. هو بس هرب باللي قدر يشيله، فما بقاش باين قدامك تاريخه ولا طبقته ولا ثروته. لكن احنا مش هنقعد نفكر ونفلتر، يا عم ريح مخك. *️⃣ سبب تاني مهم هو إن الإنسان بطبيعته بيدور على الـComfort Zone. ربنا خلق الإنسان بيدور على الاستقرار، ومش عايز يفضل طول الوقت في فرهدة التفكير والتحليل. لما يواجه موضوع معقد، مليان عوامل وتفاصيل وأسئلة مش عارف إجابتها، مخه بيهنج وعايز يسهّل الموضوع على نفسه. ⬅️ دولة ما عملت خطوة معينة والنتيجة طلعت ناجحة. أنت جيت عملت نفس الخطوة، لكن النتيجة ما حصلتش. علشان تعرف ليه، محتاج تقعد تحلل وتكتشف إن فيه نقطة واحد واتنين وثلاثة وأربعة وخمسة وعشرة كانوا مختلفين بينك وبين الدولة التانية. ⬅️ الحقيقة إن الخطوة اللي أنت أخدتها ما هي إلا الإطار الخارجي أو الاسم المكتوب برا. تحتها عشرين أو تلاتين تفريعة وتفصيلة، وكل تفصيلة منهم ممكن يكون تحتها تفرعات تانية. محتاج تشوف كل نقطة: دي نعملها زي ما هي؟ دي نعدلها؟ دي موجودة عندنا أصلا؟ دي محتاجة حاجة تحصل قبلها؟ ودي لو اتغيرت هتأثر على إيه؟ ⬅️ المجهود ده مرهق جدا، والكلام هنا مش بس على مستوى الدول. ده ممكن يحصل في شغلك، في الـBusiness، وفي العلاقات نفسها. بدل ما أخش في تفاصيل الثقافة السائدة، وتأثير الدين، والتغيرات الاجتماعية، وشكل المؤسسات، والمجتمع المدني، ومستوى الدخل والرقابة، الأسهل إني أقول: الكلام ده ما يمشيش عندنا. ⬅️ الجملة دي مفسرتش ليه التجربة فشلت، لكنها أنهت التفكير وخلت الإنسان يرتاح. بدل ما أقول: النموذج ينفع، بس محتاج تعديل واحد واتنين وتلاتة، أقول: لا يا عم، إحنا مختلفين. ما تدينيش في التفاصيل وتفرهدني، اقفل الموضوع كله وخلاص. 1️⃣ أوبر وكريم مثلا لما دخلوا مصر مخدوش الـ System بتاعهم Copy-Paste وقالوا للناس: لازم تدفعوا بالفيزا، واللي مش معاه فيزا ما يركبش. هما فهموا إن التعامل بالكاش منتشر هنا، فسمحوا بالدفع كاش. ما قالوش إن المصريين مش بيدفعوا بالفيزا، وبالتالي فكرة أوبر وكريم نفسها ما تنفعش تشتغل في مصر. ⬅️ هما كانوا فاهمين إيه الـCore وإيه التفاصيل القابلة للتغيير. الـCore إن العميل يطلب عربية، العربية توصله، وبعدها العميل يدفع. يدفع بالفيزا، يدفع كاش، يدفع بتحويل، يدفع بالتلاجة؛ دي طريقة تنفيذ ممكن تتغير. المهم إنه يدفع، مش إن شكل التجربة يفضل Copy-Paste من دولة لدولة وإلا المشروع كله يقع. 2️⃣ نفس الفكرة لما دولة تاخد قرار اقتصادي عنيف، زي إلغاء الدعم أو تنفيذ إصلاحات اقتصادية سريعة. ممكن دولة تعمل القرار ويتم امتصاص آثاره الاجتماعيه، ودولة تانية تعمل نفس القرار فتحصل مشاكل وكوارث، زي اللي حصل في بعض دول أمريكا الجنوبية مع تطبيق إجراءات اقتصادية عنيفة مرتبطة بمدرسة شيكاغو وتلامذة ميلتون فريدمان. ⬅️ الفرق مش بالضرورة إن النظرية الاقتصادية تنفع هناك وما تنفعش هنا. ممكن الدولة الأولى يكون عندها مجتمع مدني أقوى، ومؤسسات خيرية، وشبكات حماية اجتماعية، وقدرة أكبر على مساعدة الناس وتحمل الصدمة. أنت أخدت الإجراء الاقتصادي، لكن ما أخدتش التفاصيل والمؤسسات اللي كانت شايلة آثاره. ⬅️ الحل مش إنك تقول النظرية متنفعش. الحل إنك تقول: تنفع، بس محتاجة تتطبق عندي بطريقة مختلفة، وتتدرج، ويتبني حواليها نظام حماية يناسب ظروفي. زي أوبر وكريم؛ الهدف الأساسي موجود، لكن طريقة الدفع اتغيرت. مش لازم العميل يدفع بالفيزا علشان نثبت إننا طبقنا النموذج صح. *️⃣ تعرف إن الـComfort Zone دي ساعات بتعمل لنا فخ تاني، وهو وهم المعرفة. الإنسان ساعات ما بيعرفش يفرق بين إنه يعرف إن المشكلة موجودة، وإنه يقدر يرصدها وهي بتحصل له، وإنه يعرف يتعامل معاها أو يمنعها. دول تلات حاجات مختلفة، لكن مخنا بيحب يختصرهم كلهم في جملة واحدة: أنا عارف الموضوع. ⬅️ معرفة اسم المشكلة حاجة، والقدرة على اكتشافها وأنت واقع فيها حاجة تانية، وامتلاك نظام يمنعك منها أو يساعدك تحلها حاجة تالتة خالص. بس إحنا ساعات بنقفز من أول خطوة لآخر خطوة: أنا عرفت المشكلة، يبقى خلاص هعرف أتفاداها. أنا قريت أخطاء الناس، يبقى مستحيل أغلط أخطاءهم. ⬅️ ممكن أعرف إن أصحاب الـBusiness بيتوسعوا زيادة فيقعوا في مشكلة سيولة، وأكون حافظ عشرات القصص عن شركات وقعت بسبب التوسع، لكن ده مش معناه إني هعرف أشوف المشكلة وهي بتتكون عندي. ممكن أكون مقتنع إن وضعي مختلف، وإن توسعي أنا محسوب، وإن الأسباب اللي وقعت غيري مش موجودة عندي؛ علشان أنا مختلف، وأنا غير أي حد. 3️⃣ تخيل إن فيه شخصين هيسافروا في طريق لأول مرة. شخص محدش قال له حاجة عن الطريق، فطبيعي يمشي بحذر؛ لأنه عارف إنه داخل على مكان مجهول. الشخص التاني سأل حد مشى في الطريق قبله، فقال له: خد بالك من أربع أو خمس مشاكل ممكن تقابلك. ⬅️ المفروض إن الشخص التاني يبقى أكثر استعداد، وده غالبا ممكن يحصل فعلا. لكن ساعات بيكون دا فخ وهو إن مخه يتعامل مع الأربع أو ال 5 مشاكل كأنهم كل المشاكل الموجودة. يبدأ يتحرك بثقة، لأنه في دماغه بقى عارف الطريق، مع إن صاحبه ممكن يكون نسي حاجة، أو ما قابلهاش، أو ما يعرفش أصلا إنها موجودة. ⬅️ الشخص الأول كان عارف إنه ما يعرفش، ففضل مركز. الشخص التاني عرف شوية حاجات، لكن مخه ترجم المعرفة الجزئية على إنها معرفة كاملة، فبقى أقل تركيز. المعرفة هنا ما قللتش المجهول فعلا؛ هي بس قللت إحساسه بوجود المجهول.

ييجي أصحابي يقولوا لي ليه بتبعت رسايل صوتية طويلة دا ال ChatGPT ببعت له رسالة صوتية وصلت 10 دقايق الراجل فصل مني 😂 وقال بااااس استني اشوف دول الأول

باي باي بنك HSBC؛ الخبر دا مش غريب ولا مفاجأة لإن بنك هس بس بقاله أكثر من سنة بيدور على مشتري لقطاع التجزئة "الأفراد" بتاعة في مصر وكان في صراع بين عدة بنوك منها CIB على شراء حصة البنك رغم إنها مش كبيرة "حوالي 1.5%" لكن "متوسط الحساب" بتاع العملاء حلو. *️⃣ لو إنتا عميل لبنك HSBC زي حالاتي وهتسأل ايه هيحصل؛ فمن تجاربي في تحولات بنوك سابقة آخرها الأهلي المتحد اللي بقى بيت التمويل الكويتي؛ فإنتا مش هتعمل أي شيء وهيفضل حسابك كما هو بالظبط... لغاية في يوم محدد هتلاقي اليفط اتشالت والبنك بقى اسمه NBD وتكلم الكول سنتر تلاقيه بتاع الإمارات دبي... بعدها هتلاقي البنك الجديد باعت لك كروت بدل اللي معاك وبس خلاص اتردم عالبنك القديم... يعني مفيش شيء هيتغير؛ نفس حسابك ولو معاك كريديت كارد عليك قروض كله زي ما هو تماماً. *️⃣ اللي هيزعل الناس بقى هو إن بنك HSBC منظومة عالمية مش مجرد بنك؛ يعني لو فرضنا فاتح حساب في مصر وفي الإمارات وفي إنجلترا كنت تلاقيهم كلهم في نفس الحساب ونفس رقم العميل وكنت تقدر بدوسة واحدة تنقل الفلوس بين الحسابات عبر الدول... دا هيروح خلاص ولا ايه هيحصل محدش عارف... طيب الناس اللي فاتحين في HSBC أمريكا ودول تانية عشان هما عندهم حسابات بريمير في مصر هيكون وضع الحسابات دي ايه؟ هيحتاج البنك يوضح لهم. *️⃣ لكن المواطن العادي مش هيحس بشيء وكده كده 99% من المصريين معندهمش تعاملات مع البنك دا. *️⃣ توضيح: ما سبق أتوقع يحصل في 2027... حبال البنوك طويل لكن لا تقلق أبداً مش هتحس بأي تغيرات. ⬅️⬅️ مستني أشوف فرعهم في الرحاب السوق القديم لإنه لازق في فرع NBD فكده هيهدوا الحيطة بقى ويعملوا سوبر فرع😂😂 تحديث توضيحي: *️⃣ الخروج من قطاع الافراد يعني حسابات الأفراد و الكروت والقروض وادارة الثروات ووو، لكن حسابات الشركات والعمليات الدولية هتفضل شغالة، أصلا بنك HSBC من أكبر اللي بيديروا اقتراض الحكومة والمؤسسات الكبرى فمش هيطلع من القطاع دا، هو هيطلع من قطاع الأفراد زي ما موضح بداية البوست وبوضحها هنا. فحسابك ك فرد هيبقي في الإمارات دبي الوطني (دا اتوقع في 2027 مش هيتم السنة دي).

لما شوفت إن دكتور عمر الشنيطي نزل فيديو في القناة، فرحت قوي؛ دي أول مرة من 2019، ويمكن كثير ما يعرفوش، لكن فعلياً لا أبالغ لو قلت إن ثلاثة أرباع اللي أعرفه في الاقتصاد سببه دكتور عمر. وأنا بحبه جداً، لدرجة إن في 2018، لو فاكر صح، لقيته عامل كورس في جمعية مرسال، كان بيتكلم عن تدريب الناس اللي بتفكر تخش مجال العمل في "إدارة الاستثمارات والمحافظ وكده". وأنا راجل مليش أي علاقة بالحوار دا، أنا بقالي فاتح بيزنس مسميه دكان تك، وببيع كيبوردات وماوسات، لكن روحت وحضرت الكورس. *️⃣ من كام يوم نزلت أول جزء من 3 أجزاء هنشرهم في مقارنات اجتماعية بين ثقافات النرويج وسنغافورة وماليزيا والساحل، فأنا فعلياً مهتم قوي بالحتة دي وتأثيرها الاجتماعي عالثقافة العامة والاقتصاد السلوكي. دي هوايتي حالياً اللي مركز فيها وبقرأ فيها... هوبا، ألاقي إشعار: دكتور عمر عامل فيديو عن اقتصاد الساحل. *️⃣ يا الله، دا يوم السعد؛ شغلت الحلقة، وكنت سايق أصلاً، وقعدت شوفتها "شغلتها فيديو أصلاً، مش صوت بس"، بعدين رجعت تاني شوفتها... عاوز أكتب بوست، لكن هنا أنا في فخ بسعى للهرب منه، وهو "تأثير الهالة Halo Effect"، ومفيش مانع يكون معاه الانحياز التأكيدي "Confirmation Bias"، وهو كونك بتحب فلان، فخلاص كل اللي ييجي منه حلو، ودا خطأ كارثي كثير مننا بنقع فيه... ومن هذا المنطلق، روحت شوفت الحلقة تاني، وقلت ألبس قبعة الناقد بتاعة إدوارد دي بونو، لكن فشلت. *️⃣ ميزة دكتور عمر إنه بالرغم من إنه خريج AUC، وعنده شركة زيلا كابيتال اللي تعد بنك استثماري، بس مش بتتعامل مع العوام زينا، وبيحاضر في الجامعة الأمريكية؛ لكن لما تشوفه مش هتلاقي نص كلامه مكسر ومعوج، ويحط المصطلحات الإنجليزية من باب جينات عقدة النقص الكلاسيكية بتاعتنا، عشان نثبت إننا مثقفين. زي ما فوق أنا كتبت كام كلمة إنجليزي عشان أبان فلحوس ومثقف. خالص، هو هيتكلم معاك عربي وسهل وبسيط. ⬅️ الميزة التانية لدكتور عمر هي إنه منظم وهادي... عارفين مثلاً لما يحصل خناقة زي حوارات الساحل؛ تلاقي المجتمع مقسوم: شوية بتوع عادي يعني، ربنا خلقنا طبقات والفلوس كثير وأنتم اللي مش فاهمين؛ وفريق تاني يشتم: والناس دي بتاكلنا عشان تجيب كل دا، والفساد، وووو... في وسط الخناقة دي، تسمع صوت يقولك: "أيوة، بس هو إحنا هنا ليه وإزاي ودا هيودينا فين؟". الصوت دا هو دكتور عمر... ملوش هو في التشنجات الحنجورية... براحة كده وتعالى نفكر ونحلل ونشوف الموضوع بشكل، قدر الإمكان، محايد. ⬅️ لو فكرت في موقف دكتور عمر، فعملاؤه هما الطبقة A+ اللي قاعدة في الساحل؛ لكن السوشيال ميديا و99% من اللي هيشوفوا الفيديوهات هما إحنا؛ اللي بنقعد نعمل دراسة جدوى للسفر لمرسى مطروح، ولا نقضيها بيتزا وبرجر موفي نايت... وهنا بقى تيجي المفارقة، وهي إنه فاهم الطرفين؛ مش منفصل وعايش في البيزنس بتاعه، ومش منعزل عن الطبقة A+ (مش عارف ليه حاسس إني بكتب تصنيف ائتماني بحوار A+ دا). *️⃣ يمكن أنا كان عندي طن أسئلة بعد الحلقة، زي: 1️⃣ إيه التأثير طويل المدى بانعزال فئة وأخذها حق البحر منفصلة عن كل الشعب؟ فكانوا واخدين العلمين، ثم سيدي عبد الرحمن، ثم رأس الحكمة، وحالياً داخلين مطروح... فلو مدينا الخط 10-15 سنة، هنلاقي هييجي يوم المواطن الجربوع زينا ملوش حق في البحر... فإيه تأثير دا الاجتماعي؟ 2️⃣ وزارة المالية كذا مرة تطلع بيانات تقول فيها إن اللي يأجر وحدات في الساحل والبحر وكده، لازم يعمل تسجيل ضريبي ويقر ويدفع الضرائب؛ حالياً المالية منفضة للموضوع دا عشان توجه الدولة متخوفش حد من السبوبة بتاعة اشتري وأجر وكده، فعاوزين الناس تشتري المطروح، فبلاش نخوف حد. 3️⃣ جيل Z، الدكتور قال إنهم خطر عالمفهوم دا، عشان ملهمش في الفرهدة ولا الالتزام بملكية، وناس بتحب تتحرك وتعيش خفيفة؛ لكن في شيء: الناس بتتغير... لما يتجوز ويخلف، غصب عنه، هيبدأ يتحول لحياة الاستقرار... فإلى أي مدى الموضوع دا هيتعمل، ولو فرضنا فعلاً فضلوا كده ملهمش في الالتزامات الطويلة؟ 4️⃣ إلى أي مدى تقدر تفضل تتوسع في النموذج الاقتصادي دا؟ هل هتقدر تستمر 5 و10 و20 سنة؟ 5️⃣ فكرة جذب الأجانب للاستقرار؛ جو العواجيز الإنجليز اللي كانوا شغالين على خطة تقاعد بعد الـ60، يبيعوا كل شيء ويروحوا إسبانيا والبرتغال؛ نقدر نجذب الفئات دي تيجي مصر، ولا الأسعار الخزعبلية دي خلاص خرجت بره فئة الناس العادية في الكوكب، وهندور بس على أصحاب اليخوت واللي طال عمرهم؟ 6️⃣ هدفك تجيب أجانب، طيب بعض قوانين الدولة مش هتبقى حرة قوي للأجانب؛ بداية من سرعات الإنترنت المكسحة مقارنة بأي عالم متقدم، مروراً بقيود، مثلاً، لو جاي معاه Drone... طيب إنتا عاوز الأجانب ييجوا يستقروا في مصر، في حين لو عجبه نظارة، مثلاً، فيسبوك عملتها وراح اشتراها، هتقف في الجمارك عشان فيها بلوتوث، وتقوله: روح جهاز تنظيم عطيات NTRA واعمل تصريح... هل الأجانب الأوروبيين المتعودين على الرفاهية بتاعة يعجبه شيء يشتريه، يقدروا يحولوا حياتهم لروتين حكومي، ويروحوا يقدموا طلب ويختموه من مكتب الأجهزة اللاسلكية والجو الظريف دا، عشان شاري تابلت؟ ولا إنتا عاوز أجنبي جاي يعيش حياة الطبيعة؛ ينسى التقنية ويرجع للعصور الوسطى، هو والطبيعة؟ 7️⃣ العائد الاقتصادي عالدولة من التوسع الضخم دا؛ بالرغم من النمو الرهيب في أسعار الوحدات والعقارات، لكن فعلياً إيه العائد عالدولة اقتصادياً؟ لا تزال ضريبة القيمة المضافة وضريبة الدخل "رواتب وخلافه" هي العائد الأساسي لمعظم الضرائب؛ فأنا كدولة استفدت إيه بعيد عن الشو الإعلامي؟ ⬅️ طبعاً في أسئلة كثير تانية، لكن فكرت بعيد عن إن في منها ومن اللي فوق ما ينفعش يتجاوب، لكن في شيء... *️⃣ الحلقة اسمها "اقتصاد الساحل – الحلقة الأولى: مصيف بمليار جنيه". واخد بالك يا بن سامي؛ الحلقة الأولى... عاوز تسأل وتنقد وتعمل إيه، والراجل لسه في الحلقة الأولى؟ هتعمل زي المتابعين اللي تنزل بوست من 300 سطر وكام ألف كلمة، وبعد 3 دقايق تلاقي حد يكتب يقولك: أنا معترض عليك، إنتا ليه بتقول كذا وكذا؟ دا غلط... وإنتا أصلاً قايل الاعتراض دا، ورادد عليه ومفنده، لكن الباشا قرأ أول سطر وقرر يعيش في دور شويكار في فيلم "أنت اللي قتلت بابايا"، لما بتقول: "إنتا بتقول عز؛ يبقى إنتا اللي قتلت باباتي... آآه يا باباتي"... طالما بتقول الموضوع الفلاني، يبقى إنتا متبني وجهة نظر كذا، اللي هي غلط في رأيي عشان كذا وكذا... هو لسه هيقرأ؟ أنا عبقري، مش محتاج قراية زيكم... فأنا كتبت طن أسئلة، والراجل بيقولك الحلقة الأولى... اهمد يا زفت. *️⃣ المهم المهم؛ تابعوا دكتور عمر، سواء صفحته عالفيسبوك أو الفيديوهات عاليوتيوب... ولازم تفتكروا دا راجل عامل ماستر ودكتوراه في لندن، مش بتاع دكانة زي حالاتي... فالموضوع هناك هتلاقي بُعد علمي ومنظم جداً جداً؛ يعني تلاقي الموضوع اللي إنتا فاهمه، بس منظم نقاط وفقرات؛ عكسي تماماً، فوضوي، وكل محاولاتي البائسة للنظام باءت بالفشل. ⬅️ كل البوست 100% مكتوب يدوي، ومفيش حتى إملاء صوتي للـAI، عشان حبايبنا اللي كل بوست ينزل يقولك AI، حتى لو أنا اللي بملي صوتي والـAI بس دوره يفقط البوست، يقولك برضك AI، خلاص قفشوا... المرة دي ما كتبتش حرف بالـAI أهو. https://youtu.be/ZhEY1sqqV9o?si=xgOZG_ZOE2AzTGWw صفحة الدكتور عالفيسبوك https://www.facebook.com/omarshenety

غالبا شافوا البوست بتاع الصبح اللي بقولكم فيها المديونية 480 مليار بنهاية يونيو على الكهرباء لصالح البترول فطلعوا بيان قالوا بقت 495 مليار جنية المديونية بتزيد بمعدل 500 مليون جنية يومياً

مش أنا السبب يا جدعان في موضوع الكهرباء، أنا لما كتبت من 4 أيام إن وزارة البترول بتتفاجأ إن الصيف حر، فتعاقدت على شحنات غاز من السوق الفوري، وبناء عليه متوسط التكلفة، فكده هيضغطوا عالكهرباء اللي هتيجي تعمل نتفليكس في المواطن... ده كان مجرد قراية للمعطيات، ومن شهور وأنا بقول هيزودوا الكهرباء، ولما طلع قرار تثبيت من شهرين استغربت... أصل الموضوع مش بالدراع، الموضوع حسبة بسيطة جداً. *️⃣ إنت معتمد عالغاز الطبيعي في إنتاج الكهرباء، تقريبًا ثلثي استهلاك مصر من الغاز بيروح لوزارة الكهرباء، الغاز بقى بتاع مصر في أقل مستوى ليه من 10 سنين... عشان تفهم المشكلة، فعندك غاز بيطلع من أرضك، بتاخد نقول النص حصتك، والنصف الثاني بنشتريه بـ5 و6 دولار للـMMBtu، وحاليًا إنتاجنا نقول 3.8 مليار قدم... بعدين نروح ناخد من ولاد الغم 1.25 مليار على 8 دولار للـMMBtu، فكده معانا 5 مليارات قدم. *️⃣ لو فرضت حصة مصر بصفر دولار عشان مصر بتحبنا + حصة شريك محلي بـ6$ + مستورد من ولاد الغم بـ8$، فكده معانا متوسط 4.3 دولار، بس في مشكلة... دول تكلفة الـ5 مليارات... مصر في الشتاء استهلاكها 5.5 مليار، وفي الصيف 7 مليارات تقريبًا. والسبب في الصيف زيادة الاستهلاك + كفاءة الآلات بتقل في الحر. *️⃣ كده في الصيف عاوزين نجيب 2 مليار زيادة، دول بقى بييجوا غاز مسال، ده بقى بكااااام؟ بـ15 دولار، فكده نعيد الحسابات، وتدخل تكلفة سفن فك الإسالة، وشوية رسوم، ودفع آجل، فتلاقي التكلفة 7.5 دولار للغاز، مع مراعاة، وبكرر، بنحسب حصة مصر إنها 0$ تكلفة، وده مستحيل، عالأقل في مصاريف تشغيل وصيانة ونقل... فنقول كده الغاز بيكلفنا 8 دولارات. عاوزك تتخيل لما نروح السوق الفوري للغاز المسال أبو 20 دولار بقى. *️⃣ البترول بتروح تشتري الغاز بـ8 دولارات وتديه للكهرباء بـ4 دولارات، اللي بدورها بتنتج كهرباء وتبيعها مدعمة على حسابات الـ4 دولارات، ففعليًا مش بيلم التكلفة، وده تسبب في إيه؟ إن وزارة الكهرباء مش بتدفع للبترول ثمن الغاز والمازوت اللي بياخدوه. *️⃣ بنهاية 30 يونيو 2026، وصلت مديونية وزارة الكهرباء لصالح البترول مبلغ 480 مليار جنيه... طيب وزارة البترول دلوقتي بتشتري بـ8 وتبيع بـ4، ومش بتحصل الفلوس أصلًا، فبتجيب منين تشتري؟ الإجابة: بتاخد قروض من الجهات المختلفة، وبتدفع فوائد طبعًا، لأن كثير منها قروض دولارية. *️⃣ هتقولي الحل إيه؟ بسيط قوي، فاكر عناصر المعادلة: حصة مصر 0$، إنتاج محلي 6$، غاز من ولاد الغم 8$، ومسال بـ15$... فالحل هو تزود إنتاجك المحلي، فأرخص مكون في المعادلة يزيد حصته... والحمد لله في نجاحات مبهرة في الصحف في الموضوع ده، وبكرر هي في الصحف بس، لكن عالأرض هي مجرد تعويض التراجع. *️⃣ يعني مثلًا خبر يقولك تشغيل حقل كذا هيطلع 100 مليون قدم، الناس تقول: هيييه، طيب إيه أخبار الحقول القديمة؟ لا، دي تراجع إنتاجها 120 مليون قدم... يعني المحصلة سالب 20 😭... عشان كده بتسمع كثير عن اكتشافات ووو، ومش بتلاقي نتيجة، عشان مش بنقولك التراجع حصل في إيه. *️⃣ طيب إيه الحل الثاني؟ فهو للأسف صفقات جديدة، مثل اللي تمت العام الماضي، والأسبوع الماضي وقعنا مبدئيًا على صفقة جديدة بـ20 مليار دولار مع ولاد الغم، عشان نجيب المكون أبو 8$، فنقلل اعتمادنا عالمسال أبو 15$ ده. *️⃣ دي الخلاصة، وزارة الكهرباء عليها ديون عاوزة تسددها، والبترول عليها ديون وعاوزة أصلًا تحاسب الكهرباء بـ8$، ولو حصل فالتكلفة بتاعة الكهرباء هتبقى الضعف. *️⃣ دي حلزونة ومش هتتكسر غير لو ربنا كرمنا باكتشاف غاز كبير تاني بالصدفة بقى... إنت إنتاجك 3.8 واستهلاكك في الصيف 7 مليارات، بل وساعات بيزيد... يعني عاوز لك حقل عملاق يديك 3.2 مليار قدم... ده ظهر أيام عزه كان 2.7 مليار قدم، فإنت عاوز حقل ظهر جديد عشان نخلص... وإلا الزيادة الحالية دي هتبقى روتينية، وغالبًا هيخلوها مرتين سنوي، يناير ويوليو.

رسمياً مجلس الوزراء اعلن ان اللي حصل امبارح كان مسيرة

أهو الحوار اللي حصل في دمياط دا غالبا هيكون تجربة عملية لقاعدة "رأس المال الجبان" وممكن يخلي المركزي يدينا عادي جداً 1 جنية احترازياً لو شاف الاجانب صوباعهم بس قرب من زرار Sell حتى مداسش عليه 😢. عامة معظم الهوت ماني في مصر مؤسسات أجنبية مش أفراد، يعني جهات كبيرة بتتحرك بتقارير مش ببوستات الفيسبوك لكن خلينا نشوف حركة سعر الصرف النهاردة

إزاي المجتمعات بتتصنع رأس المال الاجتماعي؟ «1» النرويج: ما تتمنظرش على الناس *️⃣ بما إننا في كام يوم اقتصاديين نايمين، يعني البترول واخد له حتة كده بين الـ80 والـ100 دولار، يطلع وينزل فيها، والذهب برضه بيتحرك حوالين الـ4 آلاف والـ4,200 دولار، والهوت ماني تخش أسبوعين وتخرج أسبوعين، والدولار ماسك 3 جنية طالع نازل فينم 49-52 ، وحتى بكرة عندنا قرار الفيدرالي الأمريكي ومتوقع التثبيت، فلو معملوش مفاجأة غالبا مفيش أي جديد هيحصل في هذا الكوكب. *️⃣ فسيبنا من الاقتصاد وتعالوا نبدأ شوية رغي كده صغير عن إزاي الدول بتصنع مجتمعات وتحديداً رأس المال الاجتماعي، وإزاي مجتمعات تانية بتتحول بالتدريج لجزر منفصلة عن بعضها. نسيب الاقتصاد مؤقتا ونتكلم لغاية ما يحصل جديد يستحق نتكلم عنه. (الصندوق ضافنا في الاجتماع الخميس عشان صرف 1.2 مليار ودا الخبر الوحيد الاقتصادي الجديد). *️⃣ خلال كأس العالم، وبعد خروج منتخب النرويج، شفنا احتفالات ضخمة جدا بالمنتخب، وأكثر من 100 ألف شخص خرجوا يستقبلوهم في أوسلو. والملك استقبل المنتخب في القصر الملكي، وولي العهد وقف معاهم وشارك الجماهير واللاعبين في احتفال الفايكنج أو الـViking Row. *️⃣ اللي لفت نظر ناس كثير مش الاحتفال نفسه، لكن شكل الملك وولي العهد: لبس بسيط جدا، واقفين قريب من اللاعبين، مفيش بهرجة ولا تكلف ولا إحساس إن دول ناس نازلين من كوكب تاني علشان يقابلوا المواطنين. والموضوع دا غريب لينا لكن عندهم دا عادي جداً. *️⃣ علشان تفهم المشهد ده، لازم تعرف إن عندهم في النرويج والدول الإسكندنافية حاجة اسمها اليانتا — Janteloven. *️⃣ اليانتا ده مش قانون في الدولة، محدش هيقبض عليك لو خالفته، لكنه ممكن نعتبره عرف اجتماعي قوي أو قانوناَ اجتماعيا غير مكتوب. وفكرته في الآخر بتقول لك: ما تتفشخرش على الناس، وما تتصرفش كأنك أهم منهم. ما تفتكرش إنك أحسن مننا. ما تفتكرش إنك أذكى مننا. ما تفتكرش إنك أشطر مننا. ما تفتكرش إن الدنيا هتقف من غيرك. وما تتعاملش مع الناس كأن الجماعة كلها مفروض تلف حواليك لأنك غني أو ناجح أو صاحب منصب. *️⃣ طبعا اليانتا مش حاجة جميلة من كل النواحي؛ لأنها ممكن تتحول أحيانا من مقاومة للتفاخر إلى ضغط على أي شخص ناجح أو مختلف. لكن الجانب اللي يهمنا هنا هو إن استعراض المكانة والتمنظر على الآخرين مش سلوك محبوب اجتماعيا هناك. *️⃣ علشان كده افتكرت صديق لي نرويجي كان مرة قالي: يا محمد، فيه حاجة غريبة عندكم في مصر. أنا لما بقابل حد وأقول له أنا فلان، يرد عليّ ويقول: معاك الدكتور أحمد، أو الأستاذ الدكتور فلان، أو المهندس علي، أو المستشار فلان، أو المقدم أو العقيد أو اللواء فلان. *️⃣ بيقول لي: أنا بسألك اسمك إيه، ما بسألكش وظيفتك إيه. أنت ليه أول معلومة عايزني أعرفها عنك إنك دكتور أو مستشار أو لواء؟ أنت بتقولهالي ليه؟ علشان تتفخر عليا بوظيفتك وتقول لي إنك شخص مهم؟ *️⃣ وقت ما قال لي الكلام ده أنا ما فهمتوش. لأن بالنسبة لنا في مصر الموضوع عادي جدا، واللقب ساعات بيلزق في الاسم نفسه. لكن لما عرفت اليانتا فهمت هو كان شايف الجملة إزاي. *️⃣ طبعا لو أنا في مستشفى وسألت الشخص اللي قدامي أنت مين، فقال لي أنا الدكتور فلان، فده طبيعي، لأن وظيفته هنا مهمة. لكن لو إحنا قاعدين في مطعم واتعرفنا على بعض، وأنا قلت لك أنا محمد، وأنت قلت لي أنا الأستاذ الدكتور المستشار فلان، فالنرويجي هيسأل: طب وأنا مالي؟ ليه محتاج أعرف رتبتك الاجتماعية قبل ما أعرفك أنت؟ *️⃣ إحنا في مصر بنحب نتفاخر باللي عملناه، وده موجود عندنا على مستويات كثيرة. نتفاخر بالوظيفة واللقب والعربية والمنطقة والمدرسة، وحتى لما نتكلم عن دول تانية نقول لك: إحنا اللي علمنا الخليج، وإحنا اللي عملنا، وإحنا أصل الحضارة. التفاخر عندنا حاضر بقوة، بينما هناك استعراض تفوقك على الآخرين ممكن يكون شيئا مستهجنا اجتماعيا. فعلياً عندنا مشكلة نقص فعاوزين نضيف حاجة عشان تعوضنا زي منصب وظيفة تاريخ... احنا لا نكفي. *️⃣ الموضوع في النرويج مش مجرد عرف بيقول للناس ما تتمنظروش على بعض. العرف ده موجود بجانب نظام اقتصادي رأسمالي واجتماعي، لكن عنده دولة رفاه اجتماعية قوية: ضرائب مرتفعة، وفي المقابل خدمات عامة واسعة وعلى مستوى جيد. *️⃣ حوالي 95% من تلاميذ التعليم الأساسي في النرويج موجودون في مدارس عامة. والمدارس العامة مجانية وعلى مستوى يخلي المواطن في الظروف الطبيعية مش محتاج يهرب بابنه إلى مدرسة خاصة علشان يضمن له تعليم آدمي. *️⃣ النظام الصحي هناك عام وشامل وممول أساسا من الضرائب. فيه طبعا علاج خاص وتأمينات خاصة، لكن المستشفى والنظام الصحي العام مش آخر حل للفقراء؛ هو النظام الأساسي اللي بيستخدمه معظم المجتمع. *️⃣ حتى في السكن، أغلب القروض العقارية الطبيعية بتكون على 25 أو 30 سنة، وفيه قروض بداية ومنح عن طريق البلديات للفئات اللي عندها صعوبة طويلة في الحصول على تمويل من البنوك العادية. مش معنى كده إن الدولة بتدي بيت مجاني لكل شخص، لكن فيه سياسات تساعد الناس اللي غير قادرة على دخول سوق السكن بالطريقة الطبيعية. *️⃣ فممكن جدا يبقى فيه شخص ساكن في نفس المنطقة اللي أنت ساكن فيها أغنى منك عشرين أو خمسين مرة، لكنك نوعا ما مش شايفه كائن مختلف عنك تماما. *️⃣ هو مش لابس لبس هدفه إنه يتفاخر عليك بيه، ولا بيبدأ تعارفه معاك بقائمة ألقابه. ممكن عربيته طبعا تبين إنه غني، وممكن بيته يبقى أكبر، ومفيش مجتمع في العالم ألغى الفوارق. لكنك ما زلت بتقابله في الشارع والسوبر ماركت، وابنه ممكن يدخل المدرسة العامة نفسها اللي داخلها ابنك، وأنت وهو جزء من النظام الصحي نفسه. *️⃣ مش لازم تكونوا أصحاب، ومش لازم تسلموا على بعض كل يوم. وأصلا اللي سافر دول الشمال هيقول لك إن الناس هناك مش اجتماعية بالطريقة بتاعتنا، ومش طبيعي واحد يعدي جنبك هيسلم ويقعد يحكي لك قصة حياته. *️⃣ لكن رغم كده فيه بينكم ثقة افتراضية ورابط خفي. أنت عارف إنه مواطن شبهك، وبتتعاملوا مع المؤسسات نفسها، وعيالكم ممكن يتعلموا مع بعض، وبتعيشوا في المجال العام نفسه. مفيش حاجة مستمرة كل يوم بتفكرك إنه من طبقة أخرى منفصلة عنك، أو بتخليه يقول لك إنه أعلى منك. ⬅️⬅️ ده بقي ياخدنا لحاجة اسمها رأس المال الاجتماعي. *️⃣ رأس المال الاجتماعي مش معناه إن الناس بتحب بعضها. فيه نوع اسمه Bonding Social Capital، وده الترابط داخل المجموعة نفسها: العيلة، أهل المنطقة، أعضاء النادي، سكان الكمباوند، أو الناس اللي شبه بعضها. *️⃣ لكن النوع الأهم للمجتمع كله هو Bridging Social Capital: الجسور بين المجموعات المختلفة. هل الغني يثق في الفقير؟ هل المسلم يثق في المسيحي؟ هل موظف الحكومة يثق في موظف القطاع الخاص؟ هل سكان الصعيد والإسكندرية والقاهرة شايفين بعض مواطنين طبيعيين، ولا كل مجموعة عندها صورة ساخرة وعدائية عن المجموعة التانية؟ *️⃣ مش كفاية إن كل جزيرة يكون أهلها متماسكين جدا مع بعض. ممكن أهل كل عيلة ونادي وكمباوند يكونوا بيساعدوا بعض، لكن الجزر نفسها ما تثقش في بعضها. وساعتها يبقى عندك روابط داخلية قوية، لكن المجتمع نفسه ضعيف. *️⃣ قوة المجتمع بتظهر لما شخص مش من عيلتك ولا منطقتك ولا طبقتك الاقتصادية يكون عنده عندك رصيد مبدئي من الثقة. أنت ما تعرفوش، لكن مش بتفترض تلقائيا إنه عدوك أو إنه جاي يسرقك أو ياخد حقك. ولو فاكر قولنا من يومين في البوست ان المصريين الثقة بينا 20% يعني كل 5 يقابلوا بعض افتراضياً 4 مش واثقين في الآخر، وفي النرويج الثقة 73%. ودا غريب بالنسبة لنا رغم اننا اجتماعيين فمتخيلين الثقة هتكون موجودة. *️⃣ الدول الإسكندنافية ما وصلتش لكده بسبب اليانتا وحدها، ولا لأن النرويجيين اتولدوا طيبين ومتسامحين. فيه عرف اجتماعي ضد التفاخر، لكن فيه كمان مؤسسات وخدمات عامة بتجبر الناس بشكل إيجابي إنها تفضل جزء من مجتمع واحد. *️⃣ المساواة هنا مش معناها إن كل الناس معاها الفلوس نفسها، أو ساكنة في البيوت نفسها، أو راكبة العربيات نفسها. المقصود إن مساحة الحياة المشتركة بينهم لسه كبيرة بما يكفي إنهم يشوفوا بعض ويعرفوا إنهم موجودين. *️⃣ لأن المجتمع مش بيتفكك بس لما الناس تكره بعضها؛ أحيانا بيتفكك ببساطة لما الناس تبطل تشوف بعضها. *️⃣ المرة الجاية نروح لسنغافورة وماليزيا، ونشوف دول فيها صينيون وهنود وملايو، يعني أعراق مختلفة فعليا، ومع ذلك حاولت تستخدم الإسكان والمدارس والتخطيط علشان تصنع مجتمعا واحدا، أو على الأقل تمنع الناس قدر الإمكان من التحول إلى جزر منفصلة تماما عن بعضها. *️⃣ قسمت البوست ل 3 أقسام عشان الناس بتاعة بوست طويل قوي... خليتهم 3 بوستات طويلة بس 😂. المهم اللي يخلص يقولي عاوزين الباقي ولا نولع فيهم.

كالعادة اتفاجأنا إن الصيف حر، فروحنا سوق الفوري اشترينا منه شحنات غاز عشان زيادة الاستهلاك والتكييفات وكده. *️⃣ للي مش فاهم المشكلة، سوق الفوري حالياً بيلعب في 19-22 دولار للمليون وحدة حرارية، فوزارة البترول تشتري الغاز بالسعر دا، وبعدين تورده بـ4 دولار لوزارة الكهرباء، وتخيل الفارق. وطبعاً شوية والبترول تقولك عندي عجز عاوزة ازود سعر التوريد للكهرباء فلما تزود تروح الكهرباء تقولك تكلفة الإنتاج زادت يلا هاتلي المواطن دا عشان عاوزينه في موضوع +21. *️⃣ بنبهر كل مرة بأننا لسه بنتفاجئ إن الصيف حر، والشتاء سقعة، والعيد أجازة، وحاجات غريبة. دا مرة وزارة الكهرباء كانت قالت الربط مع السعودية متأخر عشان الطبيعة الجبلية في سيناء، فالإنشاءات تأخرت. اتفاجئوا برضك إن في جبال في سيناء، وكانوا حاطين الخطة إن سيناء أرض منبسطة غالبا.

نكتة قبل النوم *️⃣ السنترال كلمني أخيراً عشان تركيب الفايبر، المهم الرقم اللي عندهم نادر ما بستخدمه و بالصدفة شوفته النهاردة فالموظف قالي الفني هيكلمك خلال 5 أيام عشان ييجي يركب *️⃣ فقولت له طيب ممكن أغير الرقم إللي بتكلموني عليه عشان دا نادر ما بشوفه *️⃣ فقالي لما الفني يكلمك ابقي قوله الرقم اللي انتا عاوزه يكلمك عليه 😂... أنا هنجت وقولت له يعني لما الفني يكلمني ابقي اقوله الرقم الثاني اللي يبقي يكلمني عليه 😂 ااااه طيب *️⃣ طيب ما هو خلاص كلمني يا جدعان، أومال أنا عاوز اغير الرقم ليه 😂 مهو عشان يبقى يكلمني عالجديد... محاولتش اشرح للموظف أصلاً لإنه دي طلاسم بالنسبة له 😂 *️⃣ المهم هانت يخلصوا ويردموا ال حفر اللي بقالها شهرين وفرقعت لي فردة كاوتش العربية يوم عيد ميلادي 😭

زي النهاردة من 74 خرج الملك فاروق، والقصة المشهورة بتاعة "وقد تفضل جلالته ووافق على المطلبين"... سيبك بقى من فاروق، مش هتكلم عن مصر، لكن عن قصة دولة تم إعلان تأسيسها برضك زي النهاردة 26 يوليو، بس سنة 1847. *️⃣ بعد الثورة الأمريكية ضد الإنجليز بدأت حركات التحرر ضد العبودية تنشط؛ كل شوية أعداد العبيد المحررين تزيد؛ السياسيين الأمريكان مش عاجبهم الوضع، وبعدين تم تأسيس شيء اسمه "جمعية الاستعمار الأمريكية" اللي قالت للكل: إنتا يا أسود عاوز بلد ليك؟ إنتا يا تاجر العبيد خايف من المحررين يبقوا مثال للعبيد بتوعك ويقلدوهم؟ إنتا يا عنصري خايف من تنامي أعداد السود وانخفاض العرق الأبيض؟ إنتا رجل الدين عاوز تنشر المسيحية... إيه رأيكم نبعت الناس لأفريقيا؟ *️⃣ المهم بدأت الجمعية الشغل، وبعتت شوية ناس، هوبا مات كثير منهم؛ الأمراض الجديدة اللي ميعرفوهاش؛ لكن الجمعية فضلت تبعت المئات... طيب يقعدوا فين؟ هات يا ابني ظابط جيش أمريكي معاه قوة مسلحة، راح قعد مع القبايل، قالهم عاوز قطعة أرض أشتريها؛ شراء تحت تهديد السلاح... ويلا نبني مستعمرة أمريكية؛ بس مستعمرة مملوكة للجمعية مش للحكومة الأمريكية. *️⃣ سنة ورا سنة أعداد السود الأمريكان بتزيد؛ قالت الجمعية: حلو قوي كده، نعمل دولة نسميها Liberia، ولو واخد بالك الاسم نصه Liber، الحر، عشان دي بلد الأحرار؛ بل إن العاصمة سموها مونروفيا "لغاية النهاردة"... اسم غريب صح؟ الرئيس الأمريكي جيمس مونرو بتاع عقيدة مونرو اللي ترامبو بيحبها؛ هو اسمه بس زودوا فيا. وبالمناسبة جيمس مونرو كان ثري وعنده عبيد لكن كان من مشجعي الجمعية عشان تبعد العبيد المحررين من أمريكا.. صحيح الأمريكان الليبريين قالك عاوزين علم فنعمل ايه؟ ناخد علم أمريكا، بس نعدل شوية ونخليه نجمة واحدة. *️⃣ قصة جميلة قوي، بس اللي حصل فعلياً بقى إن المنقولين لأمريكا دول كانوا آه زنوج، لكنهم أمريكان؛ متشبعين بالعقلية الأمريكية؛ بنوا بيوت أمريكية ولبس أمريكي؛ مين بقى اللي مش زيهم؟ المواطن الأصلي اللي كان ساكن؛ هي يعني كانت فاضية من السكان... فحزر فزر، الزنجي الأمريكي عمل إيه في الزنجي الأفريقي؟ بالظبط، تخمين صحيح؛ استعباد. *️⃣ بس مش هينفع نقول استعباد رسمي، عشان كان ممنوع في بلد الأحرار ليبيريا؛ بس استعباد فعلي؛ ساعات عمل أطول، ورواتب أقل، وسكن في أماكن أقل جودة، ومفيش خدمات، وتمييز في الوظائف؛ إنتا مش من أصول أمريكية زينا؟ يبقى عمالة قسرية، وحتى تجنيد إجباري وتأجيرهم للدول زي ما عملوا مع أسبانيا كانوا بيجندوا ناس ويبعتوهم مستعمرة فرناندو بو الأسبانية يتشغلوا في مزارع الكاكاو بما يشبه السخرة. *️⃣ بعدي قالك إحنا لازم نبقى ديمقراطيين، إحنا أمريكان؛ اعملي قانون انتخابات، بس بشرط يكون ذكر ويكون عنده عقار أو أراضي؛ من الأسياد يعني؛ اللي هما مين؟ الليبرو-أمريكان عادة... دول بس اللي ليهم حق التصويت، وبالتالي بقى الحكم مع المستعمرين الجدد؛ اللي فضلوا يحافظوا على مصالح الأقلية بتاعتهم وسحق الأفارقة الأكثرية. *️⃣ لغاية ما نوصل لقمة الكوميديا سنة 1927، والرئيس الليبيري تشارلز كينج نازل انتخابات؛ في عندنا 15 ألف ناخب في ليبيريا، افتكر قانون الانتخابات... رجالة تشارلز قالوا له إن منافسه عنده شعبية وشكله هيكسب، فقالهم: على جثتي، يلا اعملوا زي أحمد شوبير وحطوا لي أصوات في الصندوق؛ رجالته بمنتهى الإخلاص حطوا له 234 ألف صوت في الصناديق، وطلعت النتيجة: عدد الناخبين 15 ألف، ومنافسه واخد 9 آلاف، وهو 234 ألف، وبذلك هو أعلن فوزه واستمر في السلطة رئيس عادي جداً. *️⃣ بس يا سيدي، واستمرت طبقة الأمريكان السود تحكم ليبيريا لغاية 1980، لما حصل انقلاب عسكري من ظابط من الطبقة الأفريقية، فالأوضاع تغيرت. *️⃣ آخر شيء هقوله إن في معلومتين عن ليبيريا؛ الأفريقي الوحيد اللي أخد الكرة الذهبية هو جورج وايا، وبقى رئيس ليبيريا من 2018 إلى 2024... ثانياً، إن ليبيريا هي واحدة من 3 دول (حقيقية وموجودة الان) لم تستعمر "فعلياً هي مشروع استيطاني أصلاً لكن لجمعية أمريكية مش للحكومة" أما فرنسا وإنجلترا وهما بياخدوا القارة تجنبوا احتلال ليبيريا عشان كانت بنت أمريكا ومشروعها لشحن العبيد المحررين، فبلاش نزعل أمريكا". *️⃣ وصحيح اللي عاوز يعرف وضعهم ايه دلوقتي؛ ليبيريا في مؤشر الشفافية "الفساد" ترتيبها 136، يعني لا تزال فاسدة؛ مصر ترتيبها 130، يعني أقل منهم فساد؛ لكن برضك بالنسبة لمؤشر الحريات السياسية والمدنية بتاع Freedom House، بتديهم 65 نقطة في مؤشرها، وترتيبهم 93 على العالم و12 على قارة أفريقيا؛ مقابل مصر 18 نقطة، وترتيبنا 161 على العالم و40 على أفريقيا. لكن استفادوا إيه؟ عندهم حريات شخصية وسياسية، بس مش عارفين يمنعوا الفساد... بقت مكلمة يعني.

بمناسبة مرور شهرين على اطلاق تطبيق الهوية الرقمية. *️⃣ الدولة مش ناوية تعلن حملة اعلامية ضخمة زي أي بلد طبيعية، اللي هو يعني لازم تنزلوه فورا وتشغلوه كدا، وحالياً هنخليك تعمل كذا وكذا بدون الذهاب لأي جهة لو بتستخدموه... *️⃣ عشان الخوف من التكنولوجيا وهيطلع لك ناس تقولك مش عاوزه وهروح الجهات دي... لااا تقول اعتبارا من 1 يناير مش هينفع تروح الجهات دي تعمل الخدمات وهتبقى اجباري من مصر الرقمية بواسطة تطبيق الهوية الرقمية. *️⃣ الجو الطبيعي بيحصل دا وتدي الناس 6 شهور تجرب، وبرضك تكتشف انتا الضغط عالسيستم هيعمل ايه. *️⃣ لكن احنا نزلنا البرنامج بهدوء وملوش استخدام حاسم، دا أنا ساعات بقول مش هكتب الباسورد واقول للموقع خش بالهوية الرقمية من باب بس استخدمه 😂 مع ان كتابة الباسورد أسهل لكن أهو. ⬅️ طبعاً لازم نفتكر مع بعض البنك المركزي المصري اللي قال في 2024 إنه هيعمل برنامج وأطلق الموقع بتاع هويتي الرقمية في أكتوبر 2025 وقالك قريباً ومشوفناش حاجة، بس دا عادي، المركزي المصري معروف بإنه بيتحرك بسرعة (فلاش كارتون zootopia) وسبق وقال في سبتمبر 2024 انه قبل نهاية 2024 هنوفر نسخة تطبيق انستاباي للشركات، استنوا نهاية 2024 بقى هاااانت، احنا لسه سنة 1448 هجرياً.