أنِيسْة

‏ ‏ ‏ ‏الذوق الفني والثقافي يعتبر سلاح سياسي قوي مثلا ‏الملكة إليزابيث الأولى استخدمت الذوق كأداة سلطة ‏ملابسها جانت مدروسة بدقة ترسم من خلالها الهيبة والشخصية الملكية الي تأثر على اتباعها وخصومها ‏وطبعا رعت المسرح والشعر (والشعب عرفها من خلال الأعمال الأدبية الي حولتها لشخصية شبه خيالية وانطتها هالة قدسية) ‏دعمت أعمال ويليام شكسبير وكسبت حب الناس من خلالها هذا الذوق الثقافي ساعدها وبفضله ازدهرت الثقافة الانجليزية ‏ ‏ ‏تدرون حتى الأميرة ديانا استخدمت الذوق كسلاح ‏بسبب ستايلها الراقي المتميز صارت أيقونة ورمز مشهور بالعالم كله وشهرتها غلبت شهرة الأسرة الملكية  وجان زوجها يغار منها لأن تخطف الانظار واضواء الكاميرات  منه لما يتواجد وياها يحس نفسه ملبوس ..وحازت على اهتمام الإعلام والصحافة من ظهورها الاول والى هذي اللحظة .. ‏ ‏

‏ ‏ ‏ ‏ ‏ ‏اكو نوع من الثراء نكدر نكتسبه بشكل مجاني وسهل وسريع وهذا النوع اغلب الي اهتموا بيه حققوا ثراء فاحش فيما بعد تعالوا اشرحلكم السالفة من البداية ‏ ‏اكو  نظرية بعلم الاجتماع للعالم الفرنسي بيير بورديو تشرح انواع (رأس المال ) ‏بورديو يشوف إن الإنسان ميعيش بس على رأس مال واحد (الفلوس) وانما الإنسان يعيش  على "رؤوس أموال" متعددة اكو منهامادي واكو  لا ‏ ‏"رأس المال" مو شكل واحد ‏هو اشكال  متعددة من القوة والموارد اللي تملكها وتحدد مكانتك بالمجتمع وقدرتك على النجاح ‏واكو اربع اشكال أساسية ‏تكدرون تشوفون يا شكل منها عدكم  وياهو الي تحتاجون تشتغلون عليه ‏ ‏ ‏1. رأس المال الاقتصادي ‏هذا النوع الي كلنا نعرفه ‏الفلوس، الأملاك، الذهب ،العقارات، والأسهم ‏طبعا هذا مهم لانه بسهولة تكدر تحوله لأشكال ثانية من رأس المال وتستثمر بيهن وتكبرهن ‏(ولحد يكتبلي الفلوس وصخ دنيا ..ترا رب العالمين يكول عليها زينة الحياة الدنيا تجي انت تسميها وصخ دنيا؟انطينياهن احسن ) ‏ ‏ ‏ ‏2. رأس المال الثقافي ‏هذا يتعلق بالمعرفة والذوق والمهارات والمواهب ‏مثلا  شهاداتك الجامعية،  كم لغة تحجي ،طريقة كلامك، اهتماماتك الفنية ، ثقافتك الأدبية ،معلوماتك التاريخية والدينية ، وحتى "الإتيكيت" والأسلوب اللي تربيت عليه ‏أهمية هذا النوع انه يساعدك تندمج بأوساط معينة.. مثلاً، الشخص اللي يعرف يحجي لغات أو يفتهم بالفن المرموق، يفتح لنفسه أبواب بمجالات العمل الراقية. ‏ ‏ ‏ ‏ ‏3. رأس المال الاجتماعي ‏هذا يعتمد على "منو تعرف" مو "شنو تعرف" ‏مثلا شبكة علاقاتك، معارفك معارف ابوك وعمامك وخوالك، أصدقائك، وانتماءاتك للعشيرة أو النوادي أو المؤسسات يعني ابن صاحب الشركة الفلانية  علاقاته وعلاقات والده  تختلف عن علاقات الموظف  البسيط.. لهذا الأغنياء ينطون اهتمام جبير كلش للعلاقات الاجتماعية لأن كلها يشوفوها كفرص تبادل منفعة ‏طبعا أهميته هذا  يوفر لك الدعم والواسطة والفرص اللي ممكن متحصلها بجهدك الشخصي وحده. ‏ ‏ ‏4. رأس المال الرمزي ‏هذا هو "البرستيج" أو السمعة. ‏اخلاقك ، هيبتك ، شرفك ، كلامك ،ذكاءك ،سمعتك الطيبة ، والاعتراف الاجتماعي بيك من الناس ‏أهمية هذا النوع هو القوة اللي تخلي الناس يثقون بيك ويحترمون رأيك لمجرد إنك فلان (مثل الطبيب المشهور بأخلاقه  أو شيخ عشيرة معروف بصدقه) ‏ ‏بالمختصر  بورديو يگول إن حياتنا هي عبارة عن لعبة بس بميادين مختلفة (شغل، تعليم، فن)، وإحنا نستخدم هذي الأنواع من رؤوس الأموال حتى نحقق مكاسب ونقوي مركزنا الاجتماعي ‏واليوم راح نركز على رأس المال الثقافي الي من خلاله ممكن تحصلون فرص تكدرون تطورون بيها باقي الانواع من رؤوس الأموال ‏ ‏ ‏ ‏ ‏الذوق هو  مو مجرد إعجاب شخصي بشي معين وانما  هو جزء من الرأسمال الثقافي للإنسان  لهذا من  تتدهور الذائقة غالباً ينحدر مستوى الشخص ثقافياً وطبقياً، لأن الذوق يعكس نوع البيئة الفكرية والجمالية اللي يعيش بيها ‏ ‏مثل ما تلاحظون حاليا الذوق الي يصدره التيكتوك شكد ديأثر على المجتمع ‏بس ليش ؟ لأن ‏ ‏          الذوق مرآة الثقافة ‏الشخص اللي يستهلك فنون رديئة أو أفكار سطحية غالباً راح  يتأثر بيها ومع الوقت راح  تقل حساسيته للجمال والدقة والعمق فيصير تفكيره أبسط وأقل نقدا ‏ ‏             الذوق يحدد البيئة الاجتماعية ‏الناس غالباً تتجمع حسب الأذواق مثل نوع الفن ،طريقة الكلام ، ستايل لبس ،الاهتمامات ‏وهذا يعني أن الذوق  الرفيع يفتح أبواب طبقات ثقافية أعلى، بينما الذوق الرديء والمتدني يقرب الشخص من بيئات أقل ثقافياً ‏ ‏       الذوق يؤثر على القرارات والسلوك ‏الشخص اللي عنده حس جمالي غالباً يميل ‏للنظام للتوازن للتفكير المتأني ‏بينما الذوق الفوضوي يرتبط أحيانا بسلوك اندفاعي أو استهلاك سطحي ‏ ‏ ‏الذوق  الفني والثقافي رفع أشخاص من العدم لمناصب عليا  بالتاريخ وحسن حياتهم رغم أنهم ماجانوا من عوائل نبيلة أو من طبقات مرموقة ‏ ‏مثل مدام دي بومبادور الي تحولت من مجرد بنية عادية من عائلة بسيطة إلى ملكة غير متوجة لفرنسا والمؤرخين يرجحون أنها جانت تدير الحكم بأكمله بشكل غير رسمي  بسبب ذوقها الأدبي والفني (اريد احجيلكم قصتها واسولفلكم عن دهاءها ) ‏أثرت بالفنون والعمارة ورعت الرسامين والكتاب والشعراء وساهمت  بانتشار أسلوب الروكوكو(هواي راح تتونسون بقصتها) ‏ ‏زرياب البغدادي الي تحول من مجرد تلميذ مولود لأسرة بسيطة إلى رائد الثقافة والذوق المقرب الاول من البلاط الأندلسي والأسرة الحاكمة  ‏وبسببه تغير الذوق العالمي للابد لانه  نقل الاتيكيت للغرب ودول أوروبا بأكملها والى اليوم قواعد زرياب متبعة بالمحافل الراقية والحياة اليومية للناس وبفضل ذوقه الراقي ارتقى بالمراتب والثراء لدرجة متنوصف

هذا تحليل جورجينا الي طلبتوه

جورجينا من الشخصيات القليلة الي جنت رافضة انزل عنها شي بس لأن هواي طلبتوه راح اكتبلكم وجهة نظري عنها ‏اني اشوف جورجينا متسلقة انتهازية لكن ذكية ‏جورجينا  عاشت بعائلة فقيرة عانت من الفقر والتحقير  شالت مسؤولية جبيرة بعمر صغير اشتغلت بوظائف عدة كدرت من خلالها تحصل فرصة العمر ‏بحكم أنها عاشت حياة صعبة تعلمت بيها البقاء للاقوى ‏الكل يكول انها جانت عاملة بمحل ‏بس برأيكم وين هالمحل؟ ‏هالمحل جان دار الأزياء الفاخرة گوتشي ‏يعني مو اي شخص يشتغل بيه الا لو كان شخص مستقتل على الاختلاط بالطبقات الي أعلى منه  ويعرف يصطاد الفرص وبعده جورجينا حصلت على فرصة مع كريستيانو وتمسكت بيها الى ابعد حد ‏هذا النوع من النساء تعلمت من الصغر اقتناص الفرص وتدربت لا إراديا على معرفة مفاتيح البشر ‏فأول ما تقابل الرجل تعرف احتياجه الخفي وتشبعه لكن الخوف من الفقر مازال متملكها والدليل صمودها لسنوات بدون زواج وانتظارها للزواج منه بدون ما تحس على كرامتها بالعكس اصلا وقعت عقد يمنعها من الحصول على أمواله تحت اي ظرف كان فشنو سوت ‏وافقت على العقد لأن كريستيانو ورقتها الرابحة ‏وصنعت مستقبلها وصارت وجه اعلاني وصارت عارضة ازياء وبدت تبني ثروتها بنفسها  وتكون هي البراند وسبب شهرتها كله قائم على اقترانها بورقتها الرابحة كريستيانو ‏ولان كرستيانو الولد الفقير الي حفر بالصخر وحقق حلمه انغرم بجورجينا وهذا الموضوع صعب نحدد سببه بالضبط بس ‏عندي عدة نظريات  عنه لكن الأقرب إن كريستيانو تعرض للاستغلال من كل الي حواليه تقريبا وبالذات أهله لأنهم استغلوا شهرته وثروته بشكل علني بوجود امه المتسلطة ولأنه يفتقر لشعور الود والعائلة صار جائع لوجود أسرة تدعمه ‏بس جورجينا ما استغلت أمواله بشكل مباشر بالعكس  استغلت وجوده وياها معنويا وليس ماديا ‏منحته الاطفال والعائلة واهتمت بابناءه ورسخت بعقله فكرة اني ماريد فلوسك اني اريدك انت واريد حبك ‏جورجينا عدها شخصية حلوة من تترك التفاخر والتصنع ذكية ومرحة وممتعة وممكن تكون حنونة اني شخصيا ما احب اشوفها كعارضة بس احب اشوفها تسولف كأنها وحدة مننا شخصيتها الحقيقية افضل واحلى من الشخصية المصطنعة الي تحاول تكونها(متحمل شخصية سيدة أعمال )وغصب تحاول تكون هيج ‏كريستيانو خان الجميلات وياها لأنها المخلصة المسكينة البريئة الي تحتاج إنقاذ بالإضافة إلى أن طاقتها الجنسية ممكن تكون موافقة لطاقته وتعرف تشبع رغباته كفاية ‏هي ممتنة لوجودها بحياته وهالشي يمنحه مساحة آمنة أنها موجوده لأجله مو لأجل امواله ‏

بنات اشتاقيتلكم هنا

تتخيلون؟ كانت خطة من البداية! سكارنو ما حبها… حب صورتها، وقلمها، وتأثيرها. وبذكاءه، استغل علاقتها وياه ليصنع "بطاقة نجاة" من الانقلاب. النتيجة؟ الصحفية غرّت العالم، بس سكارنو هو اللي فاز! كل إنسان عنده خطوط دفاع.. مثل لاعب شطرنج، ينتظر اللحظة الصح. وسكارنو عرف شوكت يتحرك.. وعرف يربح بدون ما يخسر صورته ولا كرامته. اللي جانت تظهر مغرية؟ طلعت أداة بخطته! وهو؟ بذكاءه غيّر صورته گدام أمريكا والعالم كله… ويفوز الثعلب على العگرب

تخيلو ديكتاتور مثل هت.لر بنفس الشدة والقوة والشهرة .. بس آسيوي مكروه من الغرب وكلها تحاول الإطاحة بحكمه وحتى الي بداخل بلده يتمنون الانقلاب ضده وإسقاطه بس محد كدر يتجرأ على هالخطوة شلون مجرد صحفية ممكن تسيطر عليه؟ أواسط الستينات، رئيس أندونيسيا سكارنو، لقبوه بـ"هتلر آسيا" وجان مستميت على استقلال اندونيسيا ولهذا السبب العالم الغربي جان يكرهة . هو مسلم ومشهور عنه أنه زير نساء متزوج أربعة وعنده ١٠٠عشيقة أو اكثر بس القصة مو سياسة اليوم، القصة عن لعبة إغواء خطيرة! امريكا تسكت؟طبعا لا صارت عدهم فوبيا من التاريخ الي يخافون ينعاد فيقال حسب بعض المصادر أن تم تجنيد صحفية جميلة ومشهورة اسمها "سيندي ادامز " مشهورة بجمالها وجرأتها وعقليتها المميزة .. طلبوا منها تعرف عنه اي معلومة تصرفاته شخصيته علاقاته اي شي تكدر تسحبه منه بالكلام خلال المقابلة الي راح تجريها وياه باندونيسيا ومقابلتها وياه جانت بداية لعبة جبيرة سيندي حتى وإن كانت صحفية مشهورة بس تبقى شخص عادي وتملكتها الرهبة والخوف من مقابلة دنجوان اسيا وهت.لر الثاني فقررت انو بما أنه يحب النسوان هي راح تبدي الحديث وياه بمزح لطيف أنثوي ناعم وحسب استجابته تكمل وبالفعل من أول لحظة، المقابلة صارت كلها ضحك وغزل... وهو ظل يرمقها بنظرات ما توحي إنها مقابلة سياسية 😂 بس سيندي جانت ذكية وسألته اسئلة محد تجرأ يسألها بعد المقابلة طبعا غرگها هدايا ولما رجعت لأمريكا وهو بدا يراسلها برسائل حب طبعا هي رفضته لأنها متزوجة، بس بعد سنة .. اتصل بيها وعرض عليها أن تكتب سيرته الذاتية بكتاب (هالشي كأنه قدملها عرض على طبق من ذهب لأن مو شي طبيعي أن صحفي عادي يكتب سيرة ذاتية عن رئيس بحجم سكارنو) طبعا هي عرفت أنه اختارها لأن حبها وقدملها فرصة عظيمة حتى تصير افضل من أقرانها بالمجال وطبعا وافقت قبلت تكتب السيرة، بس قررت تستغل حب الرئيس الها و بدأت تطلب طلبات غريبة: طائرة خاصة وهو وافق بعدين كالتله لا ..اريد طائرات خاصة أيضا للكادر والمعدات ، فندق خمس نجوم، خدمات ممتازة وكلشوية تعترض على شي وكلشوية تغير فندق ! حاولت تختبر لاي مدى هو يحبها وشنو ممكن يقدملها وهو طبعا يوافق عالكل، بدون اعتراض! غرگااان حتى تذمراتها المستمرة جانت على گلبه مثل العسل يضحك ويمشيها، ولما رفضت العلاقة الجسدية وياه وكالتله اني متزوجة واحب زوجي سكارنو مازعل واحترم رغبتها وضل يحبها ويظهرلها حبه ! هو جان ينتظر، خطوة بخطوة، يربح المعركة بطريقته. بدأ يفتح گلبه الها ، يحجي وياها بدون رسمية، وصار يتصرف وياها فقط بعفوية وهي لاحظت أنه يظهر شخصيته الحقيقية البريئة الها ولما يستضيفها بقصره يتخلى عن ملابسه الإيطالية وكل ازياءه الفخمة ويلبس لبس عادي يمشي وياها على الأرضيات الرخامية حافي يتناقشون ويسولفون وهي تنبهر بثقافته وجاذبية شخصيته وإتقانه لعدة لغات وذوقه الموسيقي والأدبي يشاركها بنشاطات هواي ومرة من المرات سألها عن لون شعرها الأسود المزرق وسولفتله عن الصبغة الي تستعملها وطلب منها أن تصبغله شعره بنفس اللون وفعلا جابت صبغة وصبغتله شعره لبس عادي، يضحك، يشاركها نكاته! حتى مرة صبغ شعره مثل لون شعرها الأزرق! 😂 بدأت تلتقي باصدقاء طفولته وأصحاب الحي الي تربى بيه وطبعا كلهم يكولولها سكارنو ؟جاية تسألين على سكارنو هو اكو واحد بحلاوة سكارنو لو بأدب سكارنو لو بأخلاق سكارنو (سكارنو احسن حتى من ابن خالته صدك جذب ) سكارنو اطيب واحن من زنود الست اكيد همه ماجانوا يكدرون يحجون براحتهم ياجماعة لأن الرجال دكتاتور المهم سيندي كتبت السيرة الذاتية ورجعت لأمريكا طبعا الكتاب كسر الدنيا وانشهر بسرعة( لأن الناس جانت شايفته حمادة والكتاب مطلعة حمادة ثاني خالص ) سكارنو الديكتاتور المج*رم الي مخوف الدنيا كلها يطلع كيوت لهذي الدرجة وطبعا خلينا مركزين الامريكان ماجانوا يدرون وتعامله اللطيف وي سيندي فطبيعي يصدگون الكاتبة الأمريكية (الي منهم وبيهم)… بس المفاجأة وين ؟ الرأي العام بأمريكا صار معجب بسكارنو ولما واحد ينتقده سيندي تطلع تدافع عنه وتكوللهم انتو متعرفون حقيقته ولا عايشتوه اني اعرفه احسن منكم ! وصورته للعالم بصورة إنسانية ومو ديكتاتور مجرم بالبداية جان مبين انه هو المأخوذ بجمالها… بس بالحقيقة؟ هو اللي أغواها! هو اختارها، وخلّاها تكتب له سيرة تغيّر صورته گدام العالم! قلم امريكي يخاطب الامريكان بلغتهم وأفكارهم امرأة يكدر يغويها ويخليها تشوف الي يريده لأن اكيد لو مختار رجل ماراح يكدر يراويه هالجوانب ولا راح يكدر يكسب تعاطفه بسهولة عكس سيندي الي اعتقدت أنها اذكى منه وإن السيطرة بايدها وأنها هي الي تتلاعب بيه هالشي خلاها واثقة من نفسها زايد بحيث أرخت دفاعاتها ومالاحظت الخدعة الي عبرت عليها