Police Academy of Cambodia-PAC

ឯកឧត្តមនាយឧត្តមសេនីយ៍ សាស្ត្រាចារ្យ ឯក មនោសែន អញ្ជើញជាអធិបតីក្នុងពិធីបិទវគ្គបណ្តុះបណ្តាលជំនាញស្តីពី «ការគ្រប់គ្រងបទល្មើសកម្រិតធ្ងន់» នៅបណ្ឌិត្យសភានគរបាលកម្ពុជា ...................................... នារសៀលថ្ងៃសុក្រ ទី១៤ ខែសីហា ឆ្នាំ២០២៦ ឯកឧត្តមនាយឧត្តមសេនីយ៍ សាស្ត្រាចារ្យ ឯក មនោសែន ប្រធានបណ្ឌិត្យសភានគរបាលកម្ពុជា បានអញ្ជើញជាអធិបតីក្នុងពិធីបិទវគ្គបណ្តុះបណ្តាលជំនាញស្តីពី «ការគ្រប់គ្រងបទល្មើសកម្រិតធ្ងន់» មានសិក្ខាកាម ចំនួន៦០នាក់ នារី១៨នាក់ ដែលមានការអញ្ជើញចូលរួមពី លោក ជេមស៍ ម៉ាខេប (Mr. James McCabe) នាយកអង្គភាពការពារកុមារនៃអង្គការមូលនិធិកុមារកម្ពុជា និងក្រុមការងារ ឯកឧត្តមឧត្តមសេនីយ៍ឯក អនុប្រធានបណ្ឌិត្យសភា សាស្ត្រាចារ្យ គ្រូនគរបាល ប្រធាន-នាយកអង្គភាពចំណុះ និងមន្ត្រីពាក់ព័ន្ធមួយចំនួន នៅសាល សន្និសីទ -ព្រះរាម (អគារប្រពៃណី ក-A) នៃបណ្ឌិត្យសភានគរបាលកម្ពុជា។ ជាកិច្ចដំបូង តាងនាម បណ្ឌិត្យសភានគរបាលកម្ពុជា ឯកឧត្តមនាយឧត្តមសេនីយ៍ ប្រធានគណៈអធិបតី បានស្វាគមន៍និងថ្លែងអំណរគុណចំពោះ លោក ជេមស៍ ម៉ាខេប នាយកអង្គភាពការពារកុមារនៃអង្គការមូលនិធិកុមារកម្ពុជានិងក្រុមការងារ ដែលបានសហការរៀបចំពិធីបិទវគ្គបណ្តុះបណ្តាលជំនាញស្តីពី «ការគ្រប់គ្រងបទល្មើសកម្រិតធ្ងន់» បន្ទាប់ពីបានដំណើរការបណ្តុះបណ្តាលអស់រយៈពេល៥ថ្ងៃ ចាប់ពីថ្ងៃទី១០ដល់​ថ្ងៃទី១៤ ខែសីហា ឆ្នាំ២០២៦។ ក្នុងឱកាសនោះ ឯកឧត្តមនាយឧត្តមសេនីយ៍ ប្រធានគណៈអធិបតី បានថ្លែងឱ្យដឹងថា តាមរយៈកិច្ចសហប្រតិបត្តិការកន្លងមក បណ្ឌិត្យសភានគរបាលកម្ពុជា បានទទួលគណៈប្រតិភូអង្គភាពការពារកុមារនៃអង្គការមូលនិធិកុមារកម្ពុជា ដែលដឹកនាំដោយលោក ជេមស៍ ម៉ាខេប ក្នុងការអញ្ជើញម​កធ្វើការបណ្តុះបណ្តាលដល់គ្រូនគរបាលជាតិនៃបណ្ឌិត្យសភាជាបន្តបន្ទាប់ ប្រកប​ដោយជោគជ័យ ចំនួន២វគ្គ រួចមកហើយ លើជំនាញស្តីពី «ការឆ្លើយតបបឋមទៅលើបទល្មើសទូទៅ វគ្គទី១និងវគ្គទី២» ។ ជាក់ស្តែងនៅរសៀលនេះ អង្គភាពទាំងពីរបានបន្តសហការរៀបចំពិធីបិទវគ្គបណ្តុះបណ្តាលជំនាញស្តីពី «ការគ្រប់គ្រងបទល្មើសកម្រិតធ្ងន់» ដែលមានសិក្ខាកាមចូលរួមចំនួន៦០នាក់ (ស្រី១៨នាក់) នារសៀល នេះ។ ឯកឧត្តមនាយឧត្តមសេនីយ៍ ប្រធានគណៈអធិបតី បានគូសបញ្ជាក់ថា វគ្គបណ្តុះបណ្តាលស្តីពី «ការគ្រប់គ្រងបទល្មើសកម្រិតធ្ងន់» ពិតជាមានសារៈសំខាន់ក្នុងការបង្កើនចំណេះដឹងមូលដ្ឋានដល់គ្រូនគរបាលជាតិ ទាក់ទងនឹងមេរៀនមួយចំនួន រួមមាន៖ វិធីសាស្ត្រស៊ើបអង្កេតក្នុងការងារនគរបាលបែបទំនើប ករណីសិក្សាពាក់ព័ន្ធនឹងឃាតកម្ម ឧក្រិដ្ឋកម្មមានអង្គការចាត់តាំង បទល្មើសគ្រឿងញៀនទ្រង់ទ្រាយធំ ការពិនិត្យកន្លែងកើតហេតុ បទល្មើសសម្អាតប្រាក់ដែលមានអង្គការចាត់តាំង ការស៊ើបអង្កេតបទល្មើសពាក់ព័ន្ធនឹងការជួញដូរមនុស្ស បទល្មើសតាមប្រព័ន្ធអនឡាញ កោសល្យវិច័យឌីជីថលនិងភស្តុតាងផ្អែកលើបច្ចេកវិទ្យា ការស៊ើបការណ៍តាមប្រភពព័ត៌មាន បច្ចេកវិទ្យានិងប្រភពព័ត៌មានបើកចំហ ការស៊ើបអង្កេតករណីអគ្គិភ័យនិងគ្រឿងផ្ទុះ ការស៊ើបអង្កេតគ្រោះថ្នាក់ចរាចរណ៍ធ្ងន់ធ្ងរ។ មុននឹងបញ្ចប់ ឯកឧត្តមនាយឧត្តមសេនីយ៍ បានថ្លែងប្រកបដោយក្តីសង្ឃឹមយ៉ាងមុតមាំថា សិក្ខាកាមទាំងអស់ពិតជាបានទទួលចំណេះដឹងនិងបទពិ​សោធល្អៗពីគ្រូជំនាញ ដើម្បីយកទៅអនុវត្តការងារជាក់ស្តែង ប្រកបដោយជំនាញវិជ្ជាជីវៈពិតប្រាកដ៕ ...................................... #បណ្ឌិត្យសភានគរបាលកម្ពុជា #ឯកមនោសែន #EkMonosen