Temur Khatamov

Google buyumlarni topish uchun Pixel Tag trekerini taqdim etdi Google buyumlarni yo‘qotib qo‘ymaslik va ularni osongina topish uchun mo‘ljallangan Pixel Tag trekerini taqdim etdi. Yangi qurilma polikarbonat va metall korpusga ega bo‘lib, IP67 standarti bo‘yicha suv va changdan himoyalangan. Qurilmaning o‘lchamlari 28 × 46,1 × 5,4 mm, og‘irligi esa atigi 11,8 grammni tashkil etadi. Aloqa uchun Channel Sounding texnologiyasini qo‘llab-quvvatlaydigan Bluetooth hamda UWB protokolidan foydalaniladi. Ular qurilmani 50 metrgacha bo‘lgan masofada aniq topish imkonini beradi. Pixel Tag Android 9 va undan keyingi versiyalar asosidagi smartfonlar bilan mos keladi. Find Hub tarmog‘idan tashqari, treker akselerometr, karnay, Fast Pair texnologiyasi va telefonni ovozsiz rejimda ham topishga yordam beradigan maxsus tugma bilan jihozlangan. Sotuvga chiqishi: 2026-yil noyabr. Narxi: bitta Pixel Tag — 29 dollar, 4 donalik to‘plam — 99 dollar.

Google Pixel Watch 5 aqlli soatlarini taqdim etdi Oldingi modeldan asosiy farqi — Gemini bilan yanada chuqur integratsiya. Yangi model, shuningdek, 3 GB operativ xotira va 64 GB ichki xotira, takomillashtirilgan Snapdragon W5 Gen 2 protsessori hamda yangi soat ekranlarini oldi. Avtonom ishlash vaqti ham uzayishi kutilmoqda. 41 mm versiyada akkumulyator sig‘imi 332 mA·soatgacha, 45 mm versiyada esa 465 mA·soatgacha oshirilgan. Soatlarda sog‘liq holatini kuzatish bo‘yicha bir nechta yangi funksiyalar, shuningdek, qon bosimidagi uzoq muddatli o‘zgarishlarni tahlil qilish imkoniyati ham paydo bo‘ldi. Biroq bu yangiliklarning aksariyati dasturiy ta’minotga bog‘liq. Shu sababli yuqoridagi funksiyalarning barchasi o‘tgan yilgi Pixel Watch 4 modellariga ham keladi. Narxi: Pixel Watch 5 41 mm — 399 dollar, Pixel Watch 5 45 mm — 429 dollar.

Google buklanadigan Pixel 11 Pro Fold smartfonini taqdim etdi Google avvalgi avlodga nisbatan ixchamroq bo‘lgan yangi buklanadigan smartfonini taqdim etdi. Qurilmaning ochilgan holatdagi o‘lchamlari 155,2 × 150,4 × 5 mm, og‘irligi esa 239 grammni tashkil etadi. Yangi smartfon ichki qismida 8 dyuymli Super Actua Flex ekraniga ega bo‘lib, u 120 Hz gacha yangilanish tezligini va 2076 × 2152 piksel aniqlikni qo‘llab-quvvatlaydi. Tashqi displeyning diagonali 6,5 dyuym, aniqligi esa 2342 × 1080 piksel. Mavjud ranglar: zaytun rang va obsidian. Asosiy xususiyatlari: • Displeylar: ichki 8 dyuymli Super Actua Flex, 2076×2152; tashqi 6,5 dyuymli, 2342×1080, 120 Hz; • Protsessor: Google Tensor G6; • Operatsion tizim: Android 17; • Xotira: 16/256 GB, 16/512 GB, 16/1024 GB; • Kameralar: 48 MP + 10,5 MP ultra-keng burchakli + 11 MP telefoto + ikkita 10 MP old kamera. • Akkumulyator va quvvatlash: 4806 mA·soat, 30 Vt simli va 15 Vt simsiz quvvatlash. Narxi: Pixel 11 Pro Fold 1900 dollardan boshlanadi.

Google shuningdek, oddiy Pixel 11 modelini ham taqdim etdi Yangi bazaviy flagman o‘tgan yilgi versiyadan unchalik katta farq qilmaydi, biroq unda bir nechta yangilanishlar mavjud. Smartfon yangi Tensor G6 chipi, asosiy kamera uchun yangi sensor, ko‘proq AI funksiyalari va yangi korpus ranglariga ega bo‘ldi. Biroq xotira bozoridagi inqiroz sababli smartfon narxi taxminan 100 dollarga oshdi. Asosiy xususiyatlari: • Displey: 6,3 dyuym, 2424×1080 OLED, 120 Hz; • Protsessor: Tensor G6; • Xotira: 12+256 GB, 12+512 GB; • Kameralar: 48 MP asosiy, 13 MP ultra-keng burchakli, 10,8 MP telefoto, 10,5 MP old kamera; • Aloqa: 5G, NFC, Wi-Fi 6E, Bluetooth 6.0; • Akkumulyator: 4985 mA·soat, 30 Vt simli, 25 Vt simsiz quvvatlash; • Suv va changdan himoya: IP68. Narxi: 899 dollardan boshlanadi.