تنمية زوجية

البنت اللي بتعيش طفولتها و تنشأ في بيت مفيهوش حب و حنان و أمان بتكبر و هي متعطشة للمشاعر دي بشكل رهييييب بيكون سهل إنها تقع في علاقات خارج إطار الزواج. و لو في إطار الزواج فمن السهل جدًا و دا كتيير إنها بتختار شريك حياتها بشكل خاطئ بتختاره على خطى المثل القاسي اللي عاشته في بيت أهلها سواء اتربت مع أم قاسية أو أب قاسي بتختار شخص غلط مثلهم تماما بالعقل اللا واعي و في الغالب بتقابل شخص بيبهرها في البداية بالحب المزيف و الإهتمام الزايد لأنه بيكون فاهمها كويس و عارف قد ايه كل أمنياتها مشاعر الحب و الحنان و من هنا بتبدأ رحلة الاستبزاز العاطفي و التعلق المرضي و تكرار مآسي الطفولة عشان كده لا تتزوجي إلا و إنت واعية و ناضجة عشان تقدري تختاري شخص صح متزن و يعرف قيمتك بجد . ما تخليش مشاعرك هي اللي سايقاك و حكمي عقلك كويس جدًا جدًا لا تتزوجي و إنت تحت ضغط احتياج لمشاعر لأن وقتها إنت فعلا مش هتشوف الصح فين و الغلط فين ، المشاعر فقط هتعميك . إنت جوهرة جميلة و طيبة بزيادة هيعرف قيمتك الأصيل و هيصونك فلا تتعجلي أبدًا و لازم تتعافي قبل الشروع في خطوة الزواج إنت عشت في بيئة اتفرضت عليك غصب عنك ما كانش لك يد في اختيارها لكن البيئة التانية اللي هتنتقلي لها بعد زواجك هي من اختيارك فأحسني الإختيار . و ممكن جدًا جدًا تقابلي شخص صح و متزن نفسيًا لكن لأنك عاطفية بزيااااادة أوووي فمهما يقدم لك من اهتمام إنت شايفاه مقصر جدًا و هنا الغلط مش من عنده الغلط منك إنت و لأنك اتحرمت من المشاعر دي من الصغر فأنت منتظرة الفارس المغوار اللي يعيشك مشاعر حب عميقة متواصلة لا تنقطع و أي هفوة خطأ منه إنت مش قادرة تتقبليها لأنها بالنسبة لك جرس إنذار بيهدد أمانك. فلازم تتحكمي في مشاعرك و تضبطي بوصلتها . الزواج مش منظومة علاج نفسي و مش هيعالجلنا مشاكل الطفولة اللي مرينا بها ، دي مشكلتك إنت و لازم تحليها ❤ #وعي_نفسي #وعي_زواجي #سارة_العبسي ✍ أخصائية نفسية بمنهجية شرعية متاح استشارات أونلاين للإستفسار واتس فقط👇 01039617914

" الزواج عبودية العمر.. كل تفصيلة فيه بأجور عظيمة" 🤎 الشيخ محمد خيري.

سلسلة جديدة بعنوان الأمهات النرجسيات جحيم البيوت 👇👇 https://www.facebook.com/share/p/1Bjd8mKQLc/

حاجات مينفعش تكتب الكتاب وتتجوز إلا لما تكون شوفتها كويس أوى أوى فى مواقف وتعاملات كتير ومع كل حاجة هيبقى فى كام سؤال 1- العصبية أيه الأسباب (تافهه وصغيرة ولا كبيرة) ايه السلوكيات اللى بتتعمل مع العصبية دى (قمص أو شتيمة أو كتمان وهكذا) بيتصالح بسرعة ولا بياخد وقت طويل بيتصرف أزاى وقت الاختلاف 2- حل المشكلات وإتخاذ القرارات بيفكر أزاى فى المشكلة وبيفكر أزاى فى الحل بياخد رأى الناس ولا لا ومين الناس دى القرار بيتاخد فى وقت أد ايه وبيعرف يتصرف ولا لا 3- المعاملات مع الناس امتى بيقول على حد انه بيحبه او بيكرهه ازاى بيختار او بتختار الصحاب ازاى بيتعامل او بتتعامل مع صلة الرحم والأهل بيعرف يعبر عن مشاعره وارائه ولا لا 4- الماديات الدخل كام وبيتصرف أزاى بيصرف على نفسه فى ايه تحديدا لو فلوسه خلصت بيتصرف أزاى ايه الحاجات الاساسية بالنسباله وايه الحاجات الكماليه بالنسباله. أحمد الجندي

بالله عليك يا أخت فوزية، بلاش فرهدة! جوزك الغلبان ملوش في حل الألغاز وحركات الغموض دي اللي ملهاش لازمة! أكيد هو مش ساحر ولا حاوي علشان يعرف إيه اللي مزعلك من مجرد قمصة أو نظرات للقطط اللي كلها حسرة على الجراح. بلاش حوارات الـ "مفيش" و "أنا كويسة" وإنتي وشك جايب ألوان وعينيكي بتطق شرار.. ده أسلوب استنزاف للأعصاب! الراجل بطبيعته، لو فيه مشكلة وعايزة حل، لازم يسمعها صريحة وواضحة. لما بتخبي وتنتظري إنه يقرأ أفكارك، إنتي كده بتزودي الفجوة بينكم وبتحسسيه إنه فاشل في إسعادك، وهو في الحقيقة ممكن يكون أصلا في دنيا تانية ومش عارف إيه اللي حصل! يا ستي، زعلانة من حاجة مش معلومة بالنسبة له قولي له بصراحة: "أنا زعلت لما عملت كذا"، أو "ضايقني الموقف الفلاني". الصراحة والوضوح بيوفروا 90% من خناقات البيوت. جوزك غلبان ومحدود القدرات، مش جهاز بيقرأ مشاعرك عن بعد. هو مهتم والله وكل حاجة، بس للأسف "مش بيعرف لوحده" اعقلي يا فوزية، ووفري مجهودك في حل المشكلة مش في اختراع ألغاز. وفوازير. الكلمة الصريحة بتبني جسور، والسكوت المريب بيحفر خنادق! #اعقلي_يا_فوزية عمر الروبي

راجل مسؤول مع أنثى متمتعة بصفات الإنوثة والطرفان يحكمهما دين ، مع مراعاة خصوصية البيت وعدم السماح للأطراف الخارجية بهدمه = بيت سعيد متحقق فيه السكينة. محمد عبد اللطيف

زوج صالح ليس معناه متدين دا فهم خاطيء الزوج الصالح أي الذي يصلح لقيادة أسرة يكون عنده ذكاء اجتماعي وحسن إدارة وقبل كل دا يكون عنده استقامة على اوامر الله ورسوله مجتنبا الآثام والمعاصي دا اسمه زوج صالح ودا ال يتزوج من بنات الناس انما واحد رايح جاي المسجد وبيصوم ومبيسبش المصحف ومعندوش قوامه ولا رجوله فهذا بلاء على المجتمع علشان كدا اختبر العريس اجتماعيا ونفسيا واختبر علاقته بربنا قبل ما تختبر جيبه وتسأل عن فلوسه وشقته. محمد صدقي

بندخل علاقات جديدة و إحنا مستعدين نفسيًا مش بندخل علاقات عشان تنسينا حد ظلمنا و لا حد أذانا و لا بندخل علاقات عشان نداوي بها جراح قديمة ما تدخلوش أي علاقات إلا و إنتوا جاهزين نفسيا كويس جدًا و مش مضغوطين . أي علاقة لو دخلناها تحت ضغط احتياج و مشاعر ما و دا فقط اللي بيحركني في النهاية هأخسر. و شفنا كتيييير دا فركشت خطوبة من أسبوعين و بعدها اتخطبت فورا اطلقت و بعد العدة فورا تزوجت غالبا العلاقات الجديدة السريعة بعد علاقات مؤلمة مش هاقول بنقابل فيها أشخاص غلط بسبب السرعة و بس ، لكن ممكن نقابل أشخاص صح و نفقدهم بسبب كثرة المخاوف السابقة اللي لسه ما تخلصتش منها و القلق اللي حصلي وولسه مش عارفة أفوق منه فبالتالي كل دا بيتحول لضغط على الطرف التاني سواء بوعي مني أو بدون وعي ، بأحمله نتيجة علاقة سابقة لي بإني دايمًا متوجس منه خايف إنه يطلع مش كويس زي اللي قبله ، و مع أي هفوة خطأ منه بأكبرها جدًا و اربطها بما حدث سابقا في العلاقة السابقة و في النهاية لو هو شخص ناضج لازم هيتركك و مش هيتحمل الضغط بتاعك لأن دي مشكلتك و إنت المسؤول الأول عنها عشان كده ممنوع دخول علاقة جديدة قبل التعافي التام من علاقة سابقة مؤذية . #وعي_نفسي #سارة_العبسي ✍ أخصائية نفسية بمنهجية شرعية متاح حاليًا استشارات أونلاين التفاصيل خاص .

#استشارات مش مرتاحة و خايفة ارفضه ما ألاقيش زيه !! دي تالت استشارة تأتيني خلال اليومين اللي فاتوا نفس الشكوى تبقى مخطوبة لواحد و مش متحملة عيوبه تمامًا و قلقانة معاه طول الوقت و مش مرتاحة و أهلها يقولوا لها مفيش حد كامل و مش هتلاقي زيه 🙂 في الحقيقة هو فعلا مفيش حد كامل لكن فيه حد أنا عرفت عيوبه و اقدر اتعامل معها و فيه حد عيوبه دي يستحيل اتقبلها فإزاي أكمل معاه تحت مبدأ مفيش حد كامل !! إحنا مش بنبحث عن حد كامل إحنا بنبحث عن حد هنقدر نتكيف مع عيوبه و هو كذلك هيقدر يتكيف مع عيوبنا و عنده المميزات اللي بالنسبة لنا أولويات مستحيل نتنازل عنها ، فحاجة بتشيل حاجة و دا إنت اللي تقدر تحدديه إيه تتقبليه و تقدري تتأقلمي معاه و ايه اللي مستحيل تتقبليه . و سيبك من كلام الناس لأن ما حدش هيستحمل حاجة بدلا منك . و سهل نفركش ألف خطوبة مش مرتاحين فيها بدل ما نفركش جوازة و نخوض تجربة إحنا كنا من البداية مش مرتاحين فيها أصلا . اه مؤلم نفركش الخطوبة خصوصا لو كانت طويلة لكن لتجنب الأكثر ألما. و بعدين ايه مسألة ما ألاقيش زيه دي هو مفيش غيره في الكوكب🙄 احسبيها بعقلك احسبيها صح 👌 #سارة_العبسي ✍ أخصائية نفسية بمنهجية شرعية

اللي معاها زوج كويس تبوس ايده و رجله الصبح ووبالليل يا جماعة قسمًا بالله أنا باشوف في الإستشارات أهوااال و على الجانب الآخر بعض النساء عايزين أزواجهم بلا أدنى خطأ و واقفة لزوجها على كل صغيرة و كبيرة و تقعد تستحضر الماضي و من ستلاف سنة نسيت تقولي تصبحي على خير 🙄 و من ٤ شهور كنت رنيت عليك و كنسلت عليا تغاضوا عن الأمور البسيطة بلاش الوقوف على كل حاجة بسيطة لأن مع الوقت بتكبر الفجوة بينك و بين زوجك و بلااااش استرجاع الماضي و دا تخصص نسائي بحت ما شاءالله🥱 ربنا يجعل كلامي خفيف عليكم 🙂 #سارة_العبسي ✍ أخصائية نفسية بمنهجية شرعية

#استشارات في إحدى الإستشارات قالت لي أنا عايزة اطلق سألتها ليه ؟؟ قالت لي لأن مفيش بينا توافق بدأت اتكلم معاها شوية و نفكك الكلمة الكبيرة دي( مفيش توافق) و طلبت منها بعض المواقف اللي حصلت اللي أدت إنها تعتقد إن مفيش توافق بينها و بين زوجها و بُناءً عليه شايفة إن الطلاق هو الحل . حكت بعض المواقف و كان تعليقي عليها إنها اختلافات وجهة نظر و تتحل بإننا نحاول نعمل أرضية مشتركة بيننا بحيث نتراضى إحنا الإثنين و فيه بعض الكلام ممكن نقوله و بعض التوجيهات لكن محتاجة اسلوب لطيف اختيار الإسلوب مهم جدًا جدًا قلت لها لسه عايزة تطلقي ؟ قالت لي : لا ، بس فيه مشكلة كمان 🧐 ايه؟؟! لما بيكون فيه حاجة هنعملها أو قرار هناخده بينفذ اللي هو شايفه 🙄 بياخد رأيك و بيتناقش معاك ؟ أيوة لكن في الاخر بينفذ رأيه . قلت لها هو كويس جدًا جدًا إنه بيعرف يتناقش و بيسمع رأيك ، على فكرة رجال كتير مفيش عندهم الاوبشن دا اصلا 😁 و بعدين في الغالب رأيه بيكون صح ؟؟ و لا هو أراءه كلها غلط و مش مظبوطة ؟؟ قالت بيكون صح و طلبت منها برده بعض المواقف ووجدت إنها مواقف بسيطة اصلا و ليست قرارات مصيرية . أحيانا اللي بيضخم مشاكلنا إننا بنسميها بغير أسمائها فبدل ما نقول إحنا اختلافنا في كذا و كذا فبنقول مفيش بينا توافق و دي كلمة كبيرة بالظبط زي الأخت اللي أول ما تكلمني تقولي أنا زوجي نرجسي 🙄 و ممكن جدًا لا هو نرجسي و لا غيره و مش كل شخص مؤذي نرجسي لكن لما بتعيش في وهم إنه نرجسي دا بيضغطها بزيادة و بيضاعف المشاكل فعشان نقدر نحل مشاكلنا ياريت بلاش الأفورة و بلاش تهويل و مصطلحات كبيرة على مشكلات هي اصلا بسيطة و قابلة للحل إن شاء الله عشان ما نضخمش الأمور بزيادة و نضغط نفسنا أكتر . #سارة_العبسي ✍أخصائية نفسية بمنهجية شرعية متاح استشارات أونلاين

أنت بخير طول ما الجواز بالنسبالك خطوة متوقفة على وجود حد هتطمن فى وجوده على نفسك وعلى دينك وحد يستحق تسيب بيتك عشانه مش مجرد خطوة لازم تعملها والسلام. أحمد الجندي

من الحاجات اللى بتفرق جداً فى إختيارك لشريك حياتك المناسب أنك تكون بتحب نفسك وبتقدرها لأنك لو بتحب نفسك وبتقدرها صعب تقبل تتجوز بحد غير سوى نفسياً أو مؤذى أو حد ممكن يأثر عليك سلبياً أو مش مريح أو حد بيقف على الواحده وبيعمل مشاكل على حاجات تافهه وصعب إنك تتنازل أو متدافعش عن حقوقك فلو بتحب نفسك وعندك سلام داخلى لو ملقتش اللى أدامك هيساعدك أكتر إنه يكون فى سلام نفسى مع نفسك ومعاه هو شخصياً مش هتقبل بيه ومش هتتنازل عن جزء من مبادئك أو تربيتك أو دينك عشان تكسبه أو بمعنى أصح مش هيبقى عندك إستعداد تخسر نفسك عشان تكسب حد وعشان كده لما بتقدر نفسك وبتحبها بتبقى عارف حدودك كويس وعارف أنت ممكن تقبل أيه ومتقبلش أيه فأتمنى أنك لو مش عارف تحب نفسك تحبها الأول قبل ماتدخل حد حياتك وتلاقى نفسك بتتنازل عن حاجات كتير لأنك لاقيت حد قادر يتقبلك وأنت مش قادر تتقبل نفسك فتبقى عندك إستعداد تتنازل عن أى حاجة عشان هو بيقدملك الشعور اللى أنت نفسك تحس بيه منك لنفسك فخلى بالك كويس لأنك لازم تحب نفسك عشان تعرف تختار كويس. أ أحمد الجندي

وأنت بتختار شريك حياتك لازم تفهم إن اللى مش مناسب هيفضل مش مناسب حتى لو متمسك بيك وهيفضل مش مناسب حتى لو صعبان عليك وهيفضل مش مناسب حتى لو الناس كلها شايفاه كويس وأنت مش متقبله وهيفضل مش مناسب حتى لو مليان مميزات بس عيوبه مش هتقدر تستحملها أنت اللى هتتجوز فلازم تختار بعناية وأوعى تفكر ترضى الناس اللى حواليك اللى نفسهم يفرحوا بيك على حساب نفسك وإنك تكمل مع حد مش مناسب ليك. أ أحمد الجندي

#استشارات قالت لي أنا مش شايفة و لا ميزة في زوجي قلت لها و لا ميزة ؟؟! قالت ولا ميزة 😥 قلت لها تمام هاتي ورقة و قلم لو سمحت بدأت أسألها شوية أسئلة و كتبت بنفسها ٦ مميزات و قلت لها عديهم تاني كم ميزة ؟؟ قالت ٦😁 قلت لها من دقائق بسيطة كان مفيش فيه ولا ميزة 🤦‍♀️ الورقة دا تفضل أمامك دايمًا و أي حاجة تحصل فكري نفسك بالمميزات دي و ما تقوليش لحد عليها أحسن تتحسدي🙂 أحيانًا عشان بتكون فيه بعض العيوب في الطرف الآخر مضايقانا جدًا دا بيخلينا نلغي تماما المميزات لأننا مكبرين العيوووب اووي فمش قادرين نشوف غيرها و دا غلط جدًا في العلاقات لاسيما بين الأزواج . و كانت وصيتي لها الرئيسية التغاااااااافل مهم جدًا جدًا بلاش نقف عند كل حاجة و أي حاجة لأن دا مع الوقت هيخلي الطرف الآخر يتخنق و هتكون الحياة فيها توتر كبيير حجز الإستشارات المدفوعة و كذلك المجانية متوقف لبعد رمضان إن شاء الله ❤ #سارة_العبسي ✍ أخصائية نفسية بمنهجية شرعية

- الزوج الصالح مُبارك على زوجتِه، والزوجة الصالحة مُباركة على زوجِها. سرُّ الرحلةِ يكمنُ في الرفقةِ، وطولُ المرافقةِ يورثُ الإنسان طباعَ رفيقِه رغمًا عن كليهما؛ فإذا رافقتِ الكريمَ، أخذتِ من طبعِه ونالكِ من فضلِه وإذا صاحبتِ الحليمَ، تبصَّرتِ بحلمِه، وتطبَّعتِ بعفوِه والعيشُ في كنفِ صاحبِ المروءاتِ لا عيش كمثلِه. الفتاة الطيِّبة ريحانة البيتِ، وسرُّ راحته والذكيَّة في يديها بناء البيتِ وعمارته والحنونة تمنح قلبها للبيتِ؛ فلا تخشى خسارته. البيوتُ لا تصلحُ إذا صلحَ الرجل وحده، ولا إذا صلحتْ المرأة وحدها، إنما تصلحُ البيوتُ إذا كان الخيرُ في أصحابِها ينافسُ الودَّ الذي بينهما.. سمر إسماعيل

Channel photo updated

🔴حذفنا خلفيّة القناة بناءً على ما وصلنا من أنّ التحديث الجديد يتيح الاختراق عبر صورة القناة؛ من باب الاحتياط. والله الحافظ. لا يخرج أحدٌ من القناة مازلنا كما نحن ، لم تُهكر القناة بفضل الله .

Channel photo removed

لا تتزوجها إن كانت تناطحك الرأي و تريد أن تتحكم و تتسلط و لا تطيعك في المعروف و تريد أن تقود هي البيت فمثل هذه المرأة تحول حياتك إلى جحيم و لا تتزوج من تتابع النسويات المتأسلمات فهي امرأة مشحونة ضد الرجال لن تأخذ منها خير فالذي يحكمها تلك الأهواء و إن كان ظاهرها الإستقامة . كن رجلًا ذو شخصية قوية و ليس رجلًا متسلطًا متحكمًا، تراك امرأتك خير الرجال . و لا تتزوجيه إن كان رجلًا متسلطا يضيق عليك في كل شيء يريد أن يتحكم في تفاصيلك الخاصة و لا يتغافل عن الهفوات البسيطة فهذا رجل يحول حياتك إلى جحيم و لا تتزوجي من يتابع الذكوريين المتأسلمين الذين يكثرون لفظ النواشز في غير موضعه فهذا رجل مشحون من المرأة عمومًا شخصيته من أضعف ما يكون مهما بدا لك غير ذلك، لذلك فهو مُولع بالمرأة الضعيفة لكي يقتل ما بقي في شخصيتها لكي يداري ضعفه !! كوني امرأة قوية الشخصية هينة لينة مطيعة تعرف ما لها و ما عليها يحكمها الشرع لا الأهواء . #وعي_زواجي #احذروا_النسويات_والذكوريين_المتدثرين_بالدين #سارة_العبسي