القصائد المكتوبة للملا مصطفى السوداني

*{شيعوها روحي}* شيعوها روحي الشيعوا نَعْشَه بدمع النظر صلّيت إلَه الْوَحْشَة   ١/ مِن يموتِ الأَب تِصِيرِ الدِّنْيَة سودَه مگبرة ايصبح البيت بلا وجوده هذا بوية العشت بالدنية اعلى موده ربي لو تاخذ حياتي لو تعوده حته الإله اهتز ركن عرشه بدمع النظر صلّيت إله الْوَحْشَة   ٢/ صدگ من گال الأبو يا ناس خيمة العنده أب خل يدعي من الله يديمه راح من ايدي محمد يا هضيمه الله يرضه فاطمه الزهرة يتيمة خلاني أبوي بحيرة و بدهشة بدمع النظر صلّيت إله الْوَحْشَة   ٣/ راح أبوية التارس البيت بضحكته وسفه ذاك الطول بالتابوت شفته علي من شال النعش مالت رگبته صاح چن العرش فوگ أچتافي شلته جنّاز أبوية ايعثر بالممشة بدمع النظر صلّيت إله الْوَحْشَة   ٤/ چان حيدر للنبي نفسه و عضيده اشلون حيدر گدر يدفن نفسه بيده من رجع للبيت و اتراب اعله جيده رحت گتله البگه براسك يالصميده حيدر يموت من القهر أخشه بدمع النظر صلّيت إله الْوَحْشَة   ٥/ فوگ هضمي اعله الأبو و فگده و غيابه الناس بس غاب النبي انگلبت ذيابه و الصحابة بس إسم طلعوا صحابة بالگلب كفروا بدين الله و كتابه ناس برداء الدين تتغشّه بدمع النظر صلّيت إله الْوَحْشَة   ٦/ يا محمد يالمشيت و فارگتنه الناس عافت دين ربك من عفتنه الناس باعتنه تره و ما بايعتنه بعدك بنار و حطب للدار إجتنه طير الحزن وسط الگلب عِشّه بدمع النظر صلّيت إله الْوَحْشَة *الشاعر الموفق كرار حيدر الخفاجي* قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني https://t.me/MSudane رابط قصيدة " شيعوها روحي " : https://youtu.be/l-B7c2Y7mpU القناة الرسمية للملا مصطفى السوداني على telegram : https://t.me/Mustafa_Sudane

•{اذا صادف ظهورك}• إذا صادف ظهورك عاشر محرم...يمهدي و نسمعك تقرى مقتل و بعيونك دم...يمهدي الجزع ساعتها ما ينفع..اذا نسمع صحت آه...حسيناه ١/ يا يوسف كربله متى نگلك هلا لقد ضاقت صدور الشيعه مولاي بأحر منّ الجمر ظهورك ننتظر شوكت نسمع خبر إبن الحسن جاي؟! يالماخذ اوياك عيون و گلوب صبر هجرك يموّت حتى أيوب متعوبين بعدك و انت متعوب يا محجوب بمحرم گالوا اترد النا يمسافر...يمهدي و بقينه ننتظر من عاشر لعاشر...يمهدي نريد لكربله نفزع..اذا نسمع صحت آه...حسيناه ٢/ شرايين الحزن ينزفن عالوجن مثل ما چان ينزف نحر الحسين بعيونك مو دمع وريده المنگطع لذلك حمره صارت دمعة العين شهيق انفاسك بكل مغربيه مثل شهگة نفس عمتك رقيه لمن ماتت على طشت المنيه سبيه مشاهد كربله لو مثلك نشاهد...يمهدي نموت امن البچي واحد بعد واحد...يمهدي أكيد ارواحنا تطلع..اذا نسمع صحت آه...حسيناه ٣/ صباحا و مساء تنوح لكربلاء ألف مقتل عشت مو بس ألف عام ألف مره إذن متت يابن الحسن منّ التل إلى بوابة الشام شصاير بيك يالمهدي من النوح و صوتك صار مثل الزهره مبحوح مو بالسيف منّ الحچي مذبوح يمجروح تفاصيل السبي نسمعها من عندك...يمهدي و على زينب نطيح وياك مو وحدك...يمهدي نموت بأول المطلع..اذا نسمع صحت آه...حسيناه *الشاعر الموفق ياسر المطوري* رابط قصيدة "اذا صادف ظهورك": https://youtu.be/nb48Zbkj_9U?is=J39M1TfZICkLKtnp _ قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني https://t.me/MSudane _ القناة الرسمية للملا مصطفى السوداني على telegram : https://t.me/Mustafa_Sudane

Channel photo updated

•{راح حزام ظهري}• يا خيل...راح احزام ظهري يا خيل...ركضي و سحگي صدري هيچ اصيحن من شفت عباس أخوي راح أموت من البواچي و روح أبوي يم عون...صبريني و اصبري ١/ زينب شگلّچ عالگمر صاير مثل گلبچ وذر عباس تعبان من شاف دمعي الما نشف حاول يمسحه و ماكو چف مدّالي الِردان گتله شهاضمك حاچيني عباس گلي ام عون راح تشوفها الناس زينب ما ألومچ لطمي عالراس مات عباس.. ساعات...وآنه انطيچ عمري يم عون...صبريني و اصبري ٢/ يتلوّه شفته من السهم و ايشيل راسه اعلى الخيم و ايطيح و ايگوم گتله المن تعاين تظل هاي الخيم يا ابا الفضل يحترگن اليوم أحط ايدي اعلى ظهره عود اسنده دفعت السهم ثاري شلون شِدّه حرت يم عون أسحبه مدري أرده مات عباس.. يا حيف...أناشغ تالي عمري يم عون...صبريني و اصبري ٣/ تمددت يمه من التعب شاورته الحسين انهب بس گوم وياي تچيلي خل نرجع سوى رجّع للخيام الهوى طايحلك الماي نزعت عمامتي و عداي صاحت مو هوّه النّزعها هِيّه طاحت شوف عيونه عالعباس راحت مات عباس.. ويلاه...بـِيّه شسوه دهري يم عون...صبريني و اصبري ٤/ شامت يصيح من العدو لا ظل إبن لا ظل أخو من شجره مشلوع عن محبسك خل أخبرك من هسه حضّر خنصرك مگطوع مگطوع تدرين الشماته ام عون شتگول اليوم حسين جسمه يترس الچول منو الفزعلك العباس مكتول مات عباس.. ظليت...ميت عدل مدري يم عون...صبريني و اصبري ٥/ سبعين واحد شيعت و ياهو اليموت ويا متت حيلي انگضه و راح بس من وگع آخر هلي حاولت أكض ظهري و علي و تيّهتِ الِصفاح زينب عافنه الما عدنه غيره لِمينه سوه بنفس الحصيره الله يعينها التفگد عشيره مات عباس.. بالحال...زينب الله يدري يم عون...صبريني و اصبري *الشاعر الموفق سعد شميل* رابط قصيدة "راح حزام ظهري": https://youtu.be/NFEMPYg2uk4?is=j-lUGjA-oQ1uLJ3c _ قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني https://t.me/MSudane _ القناة الرسمية للملا مصطفى السوداني على telegram : https://t.me/Mustafa_Sudane

•{ويلاه يا زينب}• ويلاه ويلاه يا زينب واويلاه ليش يا زينب دمعتچ سايله ليش العصابة لبراسچ مايله ١/ ليش عصابتچ مايله شالسبب و انتي بت سيد الأعاجم و العرب خاف دولاب الدهر بيچ انگلب و عالت اعليچ الأيام العايله ويلاه ويلاه يا زينب واويلاه ٢/ گالت أم الخدر زينب بالجواب شرد اگلك عن عظم هذا المصاب اشحسبت و اشطلع بالتالي الحساب ابگلبي خيل اهموم ضلت جايله ويلاه ويلاه يا زينب واويلاه ٣/ بگلبي خيل اهموم فزعت بالطراد و نزل بعيوني من ابچاي السواد مالت العصابة من ثگل الرماد البيهه چفي امن المخيم هايله ويلاه ويلاه يا زينب واويلاه ٤/ و بعد يالتنشد عن العصابة هاي البيه عزي و هيبتي و شيمة صباي مالت بحين الوگع بالطف لواي الچنت أباهي ابحيل اخوي الشايله ويلاه ويلاه يا زينب واويلاه ٥/ هاي قصتي و بعد اگلك لو تريد اجدامي لمت شوك كل هذا الصعيد ابحبل چتفوني مثل چتف العبيد و چتفو ابحبل الچتفني العايله ويلاه ويلاه يا زينب واويلاه *الشاعر المرحوم طاهر السلامي* رابط قصيدة "ويلاه يا زينب" https://youtu.be/X9UIIe66xpw?si=etUClBRyUxsJfkgJ __ قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني https://t.me/MSudane __ القناة الرسمية للملا مصطفى السوداني على telegram : https://t.me/Mustafa_Sudane __

•{أتعلق بس بالمهدي}• إختصارًا للمشاعر و الكلام ماكو شي بالدنيا أغلى من الإمام بيّه يجيب الحُب و يودي أرد أتعلق بس بالمهدي ١/ مهدمّني...بفراگه وعذابي من الشكل واضح بيا نسمه...بيا مطره؟ اختلط عطرك يبو صالح آنه الأنسان المتعذب و يريد أهتمام آنه المحروم من الگمره وعايش بالظلام آنه الما غمضها عيونه ولا شاف المنام آنه الما فاتحها عيونه بعيون الإمام اليختنگ بالجمعه يحتاجك أنيس آنه ذاك اليختنگ من الخميس كون بصحره و أصيح لوحدي أرد أتعلق بس بالمهدي ٢/ أفكاري تاخذني و أذكره ويّه كل مطره من ألقاب الإمام المهدي ماي ﷲ <-- "الماء المعين" بوجوده تخضّر الصحره المهدي الماي اليحييني من أغرگ آنا بيه المهدي الماي اليرويني من أعطش و أجيه المهدي الماي اليطفيني من نار العذاب المهدي الماي الينطيني الرحمه بچف أيديه تمطر الدنيا و أصيح بعالي صوت يمتى تمطر غيمتك مو راح أموت غربه و غير دموعي شعندي أرد أتعلق بس بالمهدي ٣/ معقوله ما أهتم و أگول الدنيا خلصانه معقوله للمهدي سبب حزنه أصير آنه معقوله أجرح گلب المهدي الراحمني بدواه معقوله أتبسّم بذنوبي و هوّه ينادي آه معقوله الدنيا تخليني اتجرأ عليه معقوله من أختلي وي نفسي و كأَن لا أراه هاي أذاني التطرب لصوت الغناء بصوت أبو صالح ولا تسمع دعاء بس هالمره صادق وعدي أرد أتعلق بس بالمهدي ٤/ تقصيري وإسرافي على نفسي يعذبني أوصله بس فترة و ترد الدنيا تاخذني هل ممكن حاسبني المهدي من الغافلين هل ممكن ماشاف دموعي امن ابچي اعلى الحُسين هل ممكن فعلاً يطردني لا مو ظني بيه هل ممكن لا لا مو ممكن أعرف بي حنين عطفه أكثر من الأم اعلى الرضيع مستحيل المهدي يتركني أضيع و هاي الدنيا تحارب ضدي أرد أتعلق بس بالمهدي ٥/ أَبِرَضوَى وين أَنتَ؟ بعد چم جمعه أرددها عَزيزٌ عليّه عيونه ما أشاهدها أصعب شي من عندك غايب مجهول الديار أصعب شي من تسأل روحك هسه شلونه صار أصعب شي من ما تعرف بي يمتى يرد عليك أصعب شي من ما عندك حل غير الإنتظار أنتظر و أسأل على مَر السنين هل أنا فعلاً من المُنتَظِرين؟ بالحُب كل عام أكتب عهدي أرد أتعلق بس بالمهدي *الشاعر الموفق ياسر المطوري* رابط قصيدة "أتعلق بس بالمهدي": https://youtu.be/rDtB_dls-IM?is=wEhm8jeIzr6eTPio _ قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني https://t.me/MSudane _ القناة الرسمية للملا مصطفى السوداني على telegram : https://t.me/Mustafa_Sudane

•{بويه مشتاقه}• تدري ما تدري...انكسر ظهري بويه مشتاگه و چلچل الليل ضاعوا اخواني...و طاح صيواني و ماتت اجدامي بهدة الخيل ١/ لمن إنت رحت...و حقك ما نمت أگضّي الليل أبچي و انحب اعليك إذا حنّ الگلب...أرسمك عالترب و اشابگ بالتراب أتخيل ايديك يعني ترضاها يبابا؟! هيچ انام اعلى الترابه آنه يا مسلم حميده و ما يفض گلبي مصابه يا أعز ناسي...شيبت راسي و ما شفت راحه بس شفت ويل آنه من دونك...ميته و اعيونك و ماتت اجدامي بهدة الخيل ٢/ يبويه بهالسفر...متت منّ القهر لمن ذو الحجه صار انمرد چبدي أعاين للضعن...البنات تعايدن كلمن يمها أبوها و آنه وحدي موتي حسرة يا حميده چانت أيامچ سعيده ما يفرحچ عيد الأضحى انتي هالمره وحيده والله يا روحي...هاجت جروحي و تبچي لدموعي نجمة سهيل احترگ دمي...و انته مو يمي و ماتت اجدامي بهدة الخيل ٣/ وصل طارش شفت...لبو اليمه و خفت وگفت بخيمتي و إيدي اعلى گلبي أشوفه بكل قهر...شبگ عمي الگمر شنو الصاير صحت سترك يربي حسين إجى يمي أنظره ضمني كل حيله اعلى صدره عظم الله اجرچ يگلي والدچ گطعوله نحره بحضن ابو رقيه...و انغمى اعليّه و طاحت ادموعه اعلى الوجن سيل شما يصبروني...يبچن اعيوني و ماتت اجدامي بهدة الخيل ٤/ وصلنا لكربله...و بده علينه البلا و شفت بعيوني ضيم الدنيا كله وگع راعي اللوه...و عليْ ضاگ الهوه چنت وجهك أشوفه من أصد له كل زلمنه الهاشميه تذبحوا بالغاضريه و الحسين بصدره داسوا بالخيول الأعوجيه أنظر بعيني...تفرهد حسيني و انطحن صدره...طحنت الهيل زينب تحشمه...و هوه شيلمه و ماتت اجدامي بهدة الخيل ٥/ يمذبوح القصر...شسولف يا كسر؟ يبويه بكربله وليه ولونا شفت ضيم الدهر...عگب گطع النحر خيول و نار للخيمه اجونه و السلم من المخيم من الحوافر صعبه يسلم و آنه بالسوط اعلى ظهري و كل عباتي انصبغت بدم أركض و أعثر...و انضرب أكثر طفله يا بويه و ما إلي حيل بويه تعبانه...بويه عطشانه و ماتت اجدامي بهدة الخيل ٦/ أخيرا بالضعن...و ليس آخرا بحبل واحد خذونا يا هضيمه رقيه بلا أبو...حميده بلا أبو و يتيمه اعلى السبي تصبّر يتيمه الصبرتني اعلى الأذيه تالي هم عافتني هيّه من وصلنا للخرابه عالطشت ماتت رقيه بويه شحچيلك...و عنمن أشكيلك بجدمي ما ظلت طاقه للشيل الصارن ويايه...كلش هوايه و ماتت اجدامي بهدة الخيل *الشاعر الموفق ياسر المطوري* رابط قصيدة "بويه مشتاقه": https://youtu.be/SjqrmbDVfNI?is=g0zPeyE3wm7eaaKy _ قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني https://t.me/MSudane _ القناة الرسمية للملا مصطفى السوداني على telegram : https://t.me/Mustafa_Sudane

•{محرم الحسين}• خدم خدم خدم...صحنه نعم نعم بسم رب الحسين..بدينه أهل العزه منو؟...الذين آمنوا محرم الحسين..سفينه ١/ إنت و أنا انتاني سنه و هسه دِنه...شهر المدامع بأغله شهر لأغله بشر ترفع صور...كل الشوارع عاشور اله صحنه هلا بيه كربلا...نحس بيها واقع يا صحبة الخدامه...عاشور اجه بسلامه يلا تشد ظهرها...براية علي النشامه فلتجهز العوابس...و لتسود الملابس و تُفتح المواكب...و تعلن المجالس شهر شهر شهر...إليفوته خسر بروايات البكاء..قرينه و فقط من أحسنوا...الذين آمنوا محرم الحسين..سفينه ٢/ إنت بكتر و آنه بكتر و انمد جسر...بينك و بيني جسر الهوى لمنه سوه هذا هو...الحب الحسيني شلنه العلم إحنا الخدم بيهن خيم...عينك و عيني الينظرنه انت و آنه...گلب بگلب لگانه ما نفترگ لأنه...كربله ملتقانه بالموكب البدايه...شتتخيل النهايه باچر علينه يُكتب...ما أجمل الحكايه أنا و انت دمع...فلازم ننجمع و خيام ام الحسين..علينه بإبنها أيقنوا...الذين آمنوا محرم الحسين..سفينه ٣/ تريد الصدگ هذا الصدگ شهر العشگ...بيه ثاني دنيه جو منعزل من بيتي لل مجلس عدل...هاي أحلى مشيه شگد مطمئن أهلي تون عندي إبن...ناصبله تكيه بيتي الصغير أنظره...الرايه العليه تكبره بيه تشتغل قصايد...وياه عيالي تقرى بينه الوفه تجدد..مع آل محمد رفعنه كذب للموت...حسيننا مخلد فخر فخر فخر...نعيشه بهالشهر رماد امن الجدور..بإدينه اليحبونه شنو...الذين آمنوا محرم الحسين..سفينه ٤/ بهذا الشهر محله الخبر ها قد ظهر...مهدي البريه نشوف الظعن گلبنه حن لبن الحسن...نركض سويه وجهه اليشع بيه ننجمع و نهل دمع...بالغاضريه عجل يا رب ظهوره...و ارزقنا في حضوره أول إمام أشوفه...و حي مو شهيد أزوره بالطلعة الرشيدة...و الغرة الحميده مو غيبه نقرى باچر...عن جيته القصيده ظهر ظهر ظهر...أبونه المنتظر و قصايد للقاء..حنينه زحف اله اعتنوا...الذين آمنوا محرم الحسين..سفينه *الشاعر الموفق ميثاق الحمداني* رابط قصيدة "محرم الحسين": https://youtu.be/pU9EQyR4unk?is=PzK84DfcqFSKo8Oo _ قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني https://t.me/MSudane _ القناة الرسمية للملا مصطفى السوداني على telegram : https://t.me/Mustafa_Sudane

•{خايف أموت}• خايف اموت وتخلص سنيني وهاي السنه ما اخدم حسيني محرم...أحسب و تاني لجيته محرم...أحيى و أموت بخدمته ١/ تركض سنين العمر جدم حافي اعله الجمر وآنه خايف عمري يخلص هالليالي خوفي مو من الأجل ولا أبد فرگة الأهل خايف مچاني بمحرم يبقى خالي الله يشهد والنبي آنه روحي بموكبي و آنه غير حسين أبد ما عندي غالي شلون لو لفني الچفن والمحرم گلبي حن بالگبر وبلايه خدمه شلون حالي متعود آنه بنص الولايه واحد محرم أرفع الرايه عزائي...شلي بحياتي بفرگته محرم...أحيى و أموت بخدمته ٢/ كل سنه بشهر الدمع أبچي والطم عالضلع رايد أسعد فاطمه بكل ونة اونها وابچي ما بطل لأن تحب دمعتي ام الحسن دمعتي كون الله لا يرحمني منها والله صعبه انحرم من البچي ومن اللطم وما أواسي الزهره يا ناس بحزنها شلون أعوفن فاطمه تضل وحيده بمأتمه وانه مواعدها أظل أبچي اعله ابنها رايد أساعد فاطمه بهمها أدري بضلعها هوايه يلچمها غريبه...وتبچي اعله ابنها وغربته محرم...أحيى و أموت بخدمته ٣/ اندعي ودمعي يهل لمن محرم يهل الله لا يستبدل اسمي باسم ثاني خوفي لو ذنبي كبر ما اخدمه هذا الشهر ويجي خادم غيري انه وياخذ مكاني سولفتها بدمعتي الله يدري بنيتي رغم تقصيري ورغم زلة لساني أنه روحي بهالعزه وما ردت كل جائزه ردت بس ماتنشف دموعي ثواني خايف أضيع وتبرد جروحي ويوصل محرم و التهي بروحي عذابي...لمن افارگ خيمته محرم...أحيى و أموت بخدمته ٤/ شرف ما بعده شرف اسمي بالخدمه نعرف وصارت الوادم تقدرني بسببها ابد ما مرني الندم تعرفت بحسن خدم خوش وادم تخدم حسين بتعبها لو متت وانه شقي وعنهم أصبح مفرقي وبجهنم روحي تتچوه بلهبها راح اصيح من احترگ حسين احبك من صدگ بتوبة الحر روحي اقبلها بذنبها انه دخيلك يا أبو اليمه ما عندي غير دموعي والخدمة رضيعك...اقسم عليك بذبحته محرم...أحيى و أموت بخدمته *الشاعر الموفق ياسر المطوري* رابط قصيدة "خايف أموت" https://youtu.be/wPsMleDKZE4?si=YsCr9gJruT-zzDth __ قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني https://t.me/MSudane __ القناة الرسمية للملا مصطفى السوداني على telegram : https://t.me/Mustafa_Sudane __

•{نبض گلبي محرم}• ما ريد أضيع و أنحرم مأتمه عاشور إجه سجليني يا فاطمه ثبتي إليّه قدم...بالمجلس و يالخدم عاشور إجه سجليني يا فاطمه ١/ صخرة بلال اعلى الصدر مرت عليْ الايام موعد محرم أنتظر يوصلني طول العام عيني على الساعة مثل عين الگمر لحسين يمتى أردّ لموكبي يمتى أشد احزام شهور أتاني...محرم ليلة عظيم شعوري...بحروف الحب قليلة عزيز عليّه...وعلاقتنا طويله أموت بدونه...دخيل الله و دخيله منّ الطفولة و آنه احب خدمته من گمّطتني الوالده برايته متعود أرفع علم...بالمجلس ويالخدم عاشور إجه سجليني يا فاطمه ٢/ حضّرته ثوب الأسود و جيت بگلب مكسور شگد حلوه من بعد التعب من أسمع ال مأجور ما بين قوسين اكتبت جمله لجميع الناس (ما الحب الا للحبيب الأوّلي عاشور) أسير ملكني...و انه بِحروفه مُغرم حرام أعوفه...و اخونِ الحبِّ الأعظم طبيب جُروحي...و أبد ما غيره يِرهم اختصار كلامي...نبض گلبي محرم حظ و بخت أحچي و أبد ما أضم عايش على الله و عايش اعلى اللطم أجمل لقاء انرسم...بالمجلس ويالخدم عاشور إجه سجليني يا فاطمه ٣/ رفرف دليلي امن اسمعت گالوا محرم جاي مثل الحمامه النكتت جناح الها ناگع ماي يا فاطمه الدمعه رزق لوليدچ المذبوح ما أطمع أكثر بالرزق منّچ ردت بس هاي دموع عيوني...بمحرم من أهِلها أمير كأني...و ملكت الدنيا كلها جمال حسيني...المجالس ما مثلها بصريح العباره...كبر صيتي بفضلها لو ما دمعتي التجري منّ الجفن ما عندي قيمة و لا إليّه وزن و اتمنى كون أبچي دم...بالمجلس ويالخدم عاشور إجه سجليني يا فاطمه ٤/ شديته بالحضره العلگ يم الگمر عباس و گتله دخيلك سيدي يا صاحب النوماس ما رايد امن الدنيا بس خدمة أخوك حسين الخدمه ذِلّه و خدمة حسين التشيل الراس دخيل چفوفك...أنا چفوفي گصيره إجيت و اريدك...تحط براسي غيرة أريد أنادي...بهالحچايه الچبيره الحسين خِدَمته...بفضِل بدر العشيره قاضي الحوائج يا كفيل الخدر مو صعبه للمثلي تسهّل أمر لا ما أشوف الندم...بالمجلس ويالخدم عاشور إجه سجليني يا فاطمه ٥/ المهدي يم باب العزه و لابس ثيابه السود خايف يدورني السنه و يلگاني ما موجود ما أنصر المهدي إذا ما أخدم بعاشور أهل المجالس تنحسب عند الإمام جنود رضاچ عليه...يمولاتي ضماني جواز عبوري...لگلب صاحب زماني بعزاء محرم...أريد أحجز مكاني دخيل إمامي...لَيِستَبدلني ثاني لو ما حضرت بهالسنه للعزه بجيش الإمام امچاني ما أحجزه واجب حضوري نعم...بالمجلس ويالخدم عاشور إجه سجليني يا فاطمه *الشاعر الموفق ياسر المطوري* رابط قصيدة "نبض گلبي محرم": https://youtu.be/aASjkbpqfbM?si=I98CFrn1X7t0woHR _ قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني https://t.me/MSudane _ القناة الرسمية للملا مصطفى السوداني على telegram : https://t.me/Mustafa_Sudane

•{يلايم يلايم}• -أنه الغديري- يلايم يلايم...خُف لومك عليه أنا حبي و غرامي...للهادي و وصيه ١/ يفرحة حياتي...صارت أمنياتي أنا كِملت صلاتي...بحب حامي الحمية يلايم يلايم...خُف لومك عليه أنا حبي و غرامي...للهادي و وصيه ٢/ يعيش بضميري...بس حيدر أميري آنه الغديري...و الحد المنية يلايم يلايم...خُف لومك عليه أنا حبي و غرامي...للهادي و وصيه ٣/ أنا واحد كلامي...بس حيدر غرامي يعشگي و إمامي...يا روح الزچية يلايم يلايم...خُف لومك عليه أنا حبي و غرامي...للهادي و وصيه ٤/ أشوفه البداية...و اشوفه النهايه أجدد ولايه...و الرايه بِدَيّه يلايم يلايم...خُف لومك عليه أنا حبي و غرامي...للهادي و وصيه ٥/ أبد ماكو غيره...شيخ النه و عشيرة وگفاته الچبيره...واگفهن إليّه يلايم يلايم...خُف لومك عليه أنا حبي و غرامي...للهادي و وصيه ٦/ يا أول خليفه...غصبا عالسقيفة و النطفة الشريفة...تحب الرافضية يلايم يلايم...خُف لومك عليه أنا حبي و غرامي...للهادي و وصيه *الشاعر الموفق حمزة السماوي* رابط قصيدة "أنه الغديري": https://youtu.be/vBeJeWeFN4I?si=WwBHiKuMSiqqh6MU _ قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني https://t.me/MSudane _ القناة الرسمية للملا مصطفى السوداني على telegram : https://t.me/Mustafa_Sudane _

•{زور سيد الشهداء}• زور سيد الشهداء و انت في حالة عزاء زُر حبيبك الحسين جعفر الصادق يگول اللي طاحنته الخيول زوره مكروب و حزين ١/ إقرى اذن الدخول بعتبة الجنة للدِخلوْا خيام أهله بدون إذنه بناته تشابگن خوله بحضن سكنه و طلعن من خِيَمهِن هِنّه مو هِنّه و بلا إذن ثاني مرة...داست خيولِ اعلى صدرة چانت اتشبگه رقيه...هسّه انطبگ ويّه ظهره بلا إذن سحگوْا عليه بلا إذن گطعوْا إديه و هشّموا منّه الجبين مصيبته تحير العقول اللي طاحنته الخيول زوره مكروب و حزين ٢/ بعد إذنِ الدخول لْمَرقَده اتقَرّب وِ استقبل بوجهك وجهه الِمخَضّب ملامح ماكو بِيه هالرّاس الِمترّب بكِثر ما بالحجر فوگ الرمح يُضرب وجهه اليِحبّه مُحمد...امْنِ الضرُب و الحَر تِفرهَد من تجي وِ اتبوسه أمّه...تبوسه بس مِتورّم الخَد تِشِم من خَدّه الدخان راسه بالتنور چان شيبِته مَمقدّرين اليِحِب وجهَه الرسول اللي طاحنته الخيول زوره مكروب و حزين ٣/ بعدها إتجه من راس أبو سكينه إلى إبنه علي الگبره اعلى رِجلينه تخيّل توصَلَه ما تدري بيه وينه بكثر ما بالسيوف العده مگَطعينه إتخيّل إبنك تِجَمعه...منّ الرمل قطعه قطعه و كلما تلمه بحصيره...يوگع و ترجع تضيعه علي الأكبر طَشّروه وصله وصله گبال أبوه تَعَب كل ذيچ السنين و الدّهر مهما يِطول اللي طاحنته الخيول زوره مكروب و حزين ٤/ بعد هاي الزيارة لْجِثّة الأكبر على الأنصار سلِّم وِ انكِسِر أكثر عليهم سلّمِ حسين و رجع يعثر لگاهم عالثرى موذّر على موذّر هذا اليفارگ صُحُبتَه...من يمشي تعرف كسرته يتعثر و ظهره مايل...هذا الحسين بعظمته شايف الرايه التطيح من يهبّ اعليها ريح حسين طاح من الونين مثل حزن ابن البتول اللي طاحنته الخيول زوره مكروب و حزين ٥/ ثمّ عالقبر ضع خدّك الأيسر و تِخيّل حال خدّه اليچوي منِّ الحر و من رجليه بعدها لراسه رد إفتر مثل ما دارت ام عون اعلى أبو الأكبر ظلت تحوم اعلى جسمه...و من رُگبته يِجري دمّه منّ الهوا اتحامي عنه...عن لا يفوت و يِلِچمه مثل زينب من تزور اندعي يعجل الظهور و موعد المهدي يحين و للدعاء شرط القبول اللي طاحنته الخيول زوره مكروب و حزين *الشاعر الموفق ياسر المطوري* رابط قصيدة "زور سيد الشهداء": https://youtu.be/Rh8Q_bnvnKc?si=lrSiQx7-qvmJuRdz _ قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني https://t.me/MSudane _ القناة الرسمية للملا مصطفى السوداني على telegram : https://t.me/Mustafa_Sudane _

•{طلعنه بليل}• طلعنه بليل خويه اندوّر عليك و عثرنه بالجثث من جبنا طاريك ١/ طلعنه بليل وحده تدلي الأخرى بشفايف ذابله و رياگ مُرّه و تكسر بالصدر يحسين عبره گلنه حسين من نوصل نخبره نگله الماي هذا و جينه نرويك و عثرنه بالجثث من جبنا طاريك ٢/ حرنه حسين خويه شلون نلگاك چثيره الموته بالطف ظاله وياك و يا جثه النكضهه نگول لا ذاك گبل ما نمشي ردنا نحصّل ادواك عسى دمع الحزن يبن امي يشفيك و عثرنه بالجثث من جبنا طاريك ٣/ اجيناك بدمع و الحسره و الآه و گلنه حسين هسه اهناك نلگاه نعرف المحبس و ما هو اعلى يمناه و الخنصر بعد مسلوب وياه و علامتنه صفت هاي العرف بيك و عثرنه بالجثث من جبنا طاريك ٤/ يخويه تعثرت ببني و گلت لا أعوف حسين زحمه وابقى وياه أودع احسين و ابني بردتي الگاه اذا خاله يظل ما جيب طرواه وگلتله بردّتي يوليدي أرد ليك و عثرنه بالجثث من جبنا طاريك ٥/ هواي الموته يمك ظلمه و ندوس بس طعنات بيها و سالمه الروس بس جسمك نعرفه اسهام متروس و راسك عالرمح مبيوع بفلوس وصلتك بالدمع يبن امي احاچيك و عثرنه بالجثث من جبنا طاريك *الشاعر الموفق أبو سلام الجابري* رابط قصيدة "طلعنه بليل": https://youtu.be/4Uydopm1CKo?si=LZSvGZvE1PiB_cs- _ قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني https://t.me/MSudane _ القناة الرسمية للملا مصطفى السوداني على telegram : https://t.me/Mustafa_Sudane _

•{الطير دلاهم عليك}• يا هضم روحك...و انت بجروحك بغربتك محّد يجيك...وين اهلك عالسطح حاير...تكسر الخاطر الطير دلاهم عليك...وين اهلك ١/ غريب لوحدك...منو اللي يساعدك و عليك مقفّله البيبان مولاي ضمه و حر و شمس...منو بجرحك يحس تريد الماي محّد جابلك ماي بعمر العشرين و أيامك ذبلن يا عود الياس و حتى الجلمود اعلى مصابك ذاب وظل يبچي احساس يا هضمة روحه ابن آدم من يوگع و تعوفه الناس بموگد احزانك...شيطفي نيرانك دمعتك عالخد تصيح...وين اهلك و تنظر بعينك...محّد يعينك يا أبو الگلب الجريح...وين اهلك ٢/ چنت صايم چنت...و على السم افطرت و بقيت من الألم تتلوى بالبيت تنازع بالأجل...غريب بلا أهل أهل بغداد فزعتهم تمنيت أيام تلاثه و ما گالو شو ما شفنا المعصوم ما يدرون بسطح ديارك ميت ضامي و مسموم حتاجيت الهم من ضليت تطيح من السم و تگوم رايد احبابك...تحضر امصابك تلتفت عينك غريب...وين اهلك جرحو احساسك...و شيبو راسك و تندعي بأمّن يجيب...وين اهلك ٣/ حمامات السمه...إلك يبچن الدمه عليك تجمعن و يسوّن فياي لمن صوتك سكت...نواعيهن علت و هذا اول عزاء عليك مولاي جنح الطير عليك اتكسّر و تكسّر گلبي عليك يالما جارح گلبك واحد ليش الناس تأذيك نزلت من الجنه الزهره و صاحت بيّه و لا بيك چم حمامه تون...و مأتمك تعلن و تسأل جروحك سؤال...وين اهلك ظلن بصحنك...ينعن لحزنك و حتى صحنك چنه گال...وين اهلك ٤/ علي الهادي إلك...إجاك و غسّلك و دمعتك سالت اعلى الوجنه مهضوم شفت طف كربله...و جسد ظل بالفله و تغسّل بالدفن من فيض الدموم من شالوا نعشك بضلوعك حسيت تدوس الخيل شفت حسين شلون تطشر و ظل عاري نهار و ليل محّد شيّع جسمه و زينب ما عدها متون وحيل نعشك اتهزهز...ما قبل يركز تنعه لحسين و تگول...وين اهلك ميت و تبچي...و بالدمع تحچي يالخذت صدرك خيول...وين اهلك ٥/ على مصابك مضه...زمن يبن الرضا و إلى إبن الحسن وصلت المأسآة مثل حالك و أشد...جرح ثالث ولد ورث منك غربتك و المعاناة ماهي جديدة الغربة عليكم و اجيال تورث اجيال و المهدي اليوم من غيابه ما شايف راحة بال و مثل الغربة البيكم بينا و نعيش بأصعب حال المهدي بجروحه...عايش بروحه و يسمع بأذنه كلام...وين اهلك غربته صعبه...و دمرت گلبه كلشي يسأل بالإمام...وين اهلك *الشاعر الموفق ياسر المطوري* رابط قصيدة "الطير دلاهم عليك": https://youtu.be/iLLFZKKVSc0?si=ulrKKhdUxuNYsgxD _ قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني https://t.me/MSudane _ القناة الرسمية للملا مصطفى السوداني على telegram : https://t.me/Mustafa_Sudane _

•{راحوا و عافوني}• يا ناگتي يا ناگتي راحوا و عافوني اخوتي و محمله العيون يدرون بيّه معلعله و الروح كلها بكربله و تباري الضعون ١/ گلب البنيّه اعلى الأبو و هواي بيني و بينه يا ناگه كلما يلتفت عيني تصير بعينه بچفوفي أعصر و انتظر بلكت يگلي مشينه حتى الرضيع ال بالمهد ويّاهم مصعدينه ضليت أصيح بصوت كلمن نصيبه و لمّن مشو ظليت مثل الغريبه لهنا خلص كل الحچي و بالگوه ضميت البچي خافن يحسون و شحال اليفارگ هله و الروح كلها بكربله و تباري الضعون ٢/ أصعب شعور اعلى البشر لمن هله يخلونه محتار لمن ينسأل شيرد عاليسألونه لو ماخذيني اشگف نبل عالأهل من يرمونه و عباس لو جاله السهم بعيوني أضم اعيونه كلمن يريد الماي من عيني أروّيه و السهم عن عباس بعيوني ألاگيه الله يسلّم خوّته و محّد يطيّح خيمته و باچر يشمتون و الرايه بيده مدلله و الروح كلها بكربله و تباري الضعون ٣/ يا ناگه شيرجعه الضعن هلبت تذكرچ نوگه ايمرون لو مرة هوى ايشوفون گلبي و شوگه أصعد على التل الظهر و اشتم خيم محروگه و ترچيه من رجل الرجل بين الزلم مسحوگه باچر يصير الراس صوغه بحضنها و يختلط دم الراس وي دم إذنها أشبگ عليها بحرگتي و انطي اليظل من صحتي للما يردّون بلساني محبوسه الهلا و الروح كلها بكربله و تباري الضعون ٤/ مرعوبه أفز من الحلم ما مستلذه ابنومه و عبد الله أخافن لا يفز وياي أنوم اهدومه آنه العليله اتعلعلت صعبة عليّه الگومه صح عدله بس أهل البچي ايسموني المرحومه بيّه المرض و الشوگ طاحن سويه و بالگوه أوصل الروح للمغربيه أربع حياطين و قهر حال اليظل بلا سفر و العنّه يمشون صبرك يوصلك مرحله و الروح كلها بكربله و تباري الضعون ٥/ يا ناگه الحگيهن بعد و احچيلهن عن حيلي و كلما يتعبن بالسبي صعديهن و سلميلي و لو شفتي زينب عمّتي حلفيها خل تدعيلي كل الاعزاز اعلى الرمح و الشمر شمخليلي فوگ الرمح يمشون رايه اعلى رايه و القصر كلّه ايطيح يم العبايه القصر يهتز منبره نسوان كلها امعتبره يمهن يدنگون رغم الحصل راسي اعتله و الروح كلها بكربله و تباري الضعون *الشاعر الموفق علي حسن علوان* رابط قصيدة "راحوا و عافوني": https://youtu.be/9bNso5spEF4?si=NDHndn_-93wXlkoD _ قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني https://t.me/MSudane _ القناة الرسمية للملا مصطفى السوداني على telegram : https://t.me/Mustafa_Sudane _

•{نفس المهموم}• نفس المهموم لنا تسبيح و بيد الزهراء كل دمعه تطيح إحيو أمرنا وابچو عالحسين إحنا الما نضيّع دمعة العين ١/ إبچو هواي إبچو الدمعه ما تنعز على الرگبه البگت منّ الگُفه تنحز ثنعش طبره بوريده و كلشي ظل يهتز بحيث ابنه الرضيع امن الترايب فز حتى سيف عداه هلّت عيونه من حز وريده و سكنه صاحت آه لا تذبحونه عوفوه أريده و الأكبر شاغ و القاسم ناح من راس احسين شاله الذباح إبچو الجسمه ذاكه الباقي نصين إحنا الما نضيّع دمعة العين ٢/ إذا ضگتو العذب بي لذّة بروده ذكرو الما شرب لو گطره من جودة العطش نشّف لهاته و ذبّل خدوده و سگاي الضعينه مگطعه زنوده و النبي عطشان يصرخ بصوته و شفافه خشبه و من ونين حسين فزّت الموته و العازة جربه ما ضاگ الماي ضاگ التربان من تعطشون ذكرو العطشان و ابچو اعلى الكفيل بلايه چفين إحنا الما نضيّع دمعة العين ٣/ إبچو الطفله ماتت عالطشت حسره ملهوفه اعلى صدره و ما لگت صدره حچه وياها أبوها حسين من نحره بس ما سمعته اعلى الإذن منسطره فتحت الأحضان رادته يجيها و ركضت رقيه من وريده حسين جاوب عليها ما عندي اديه شبگته الراس و ترجف الإيدين مضروبه هواي حس بيها حسين ضيعتي التراچي گلها لو وين إحنا الما نضيّع دمعة العين ٤/ إبچو لعمتي زينب غربه غربتها اركضت مستحيه و مچلبه بعبايتها على التل لوچبت و الخيل لحگتها و لو ما دعوة الزهراء سحگتها حرمه بين الخيل و الزلم كل صوب تنظر عليها و على وجهه حسين بالرمل مگلوب ما بيه يجيها إبچوها شلون صعدت عالنوگ و فرجة اخت حسين صارت بالسوگ إبچوها لأن مچتوفه الإيدين إحنا الما نضيّع دمعة العين ٥/ بعد عندي وصيه و تمرد بچبدي أسولفها و أنا كل حيل ما عندي مثل ما آنه وصيت البچي لجدي إبچو هواي إبچو هواي عالمهدي نفت رقادي غيبته و ما يوم جفني طبگته وحده لا تنسوه منهضم ملچوم حسّو بغربته لا لتعوفوه گلبه يأذّيه يبچي اعلى حسين و انتو ابچو عليه شگد بيكم بواچي ابچو على الإثنين إحنا الما نضيّع دمعة العين *الشاعر الموفق ياسر المطوري* رابط قصيدة "نفس المهموم": https://youtu.be/JO_yCfk9Oss?si=tJ5h-FgmM6b7Q6KR _ قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني https://t.me/MSudane _ القناة الرسمية للملا مصطفى السوداني على telegram : https://t.me/Mustafa_Sudane _

•{عاشق محرم}• عاشگ محرم و حسين عاشگ محرم سر الله الأعظم عاشور سر الله الأعظم وجيها بالحسين آنه بخدمتي أمانه بشيبة المهدي دمعتي عاشگ محرم ١/ بالذاريات آيه شفت و تخاطب الكون الله خلق جن و إنس حتى يعبدون و من شافك اتصلي إله و بصدرك اسهام خله اللطم مثل الصلاه عند اليلطمون هذا اللطم حياتي بي تنقبل صلاتي دمعاتي من أذكره عندي اغلى من بناتي من أعرگ بمجلسه يغفرلي سيئاتي يجمعنه حبنا كل عام يجمعنه حبنا دگّة گلبنه الحسين دگّة گلبنه يا روحي بخدمة ابن الزهره صرتي أمانه بشيبة المهدي دمعتي عاشگ محرم ٢/ من أسمع بمجلس إلك أحسب ثواني و مو بالعزا بگلبك أجي و أحجز مكاني و الكامره العندي مُهمّه اعيون الحسين يا بو علي فدوه رحت لعيونك آني يا صاحبي بزماني گلبي إلك خذاني أول غريب أشوفه إسمه وطن حناني أصدق عبارة عندي والله أحبك آني سوّانه عابس عُقّال سوّانه عابس ترعاها عين الزهراء هاي المجالس تِباوِعلي الزچية شكبره بختي أمانه بشيبة المهدي دمعتي عاشگ محرم ٣/ أول مراسيم العشگ يا جرح السنين خادم يبدّل رايتك عالگبه يحسين من كربلا لآخر شبر بالگاع رايات الما عنده الحسين و علي ما عنده كل دين عاشورك البدايه و انته البلا نهاية كل بيت الك رفعنه يا بو رقيه رايه دم النحر كتبها ما تنتهي الحكايه ما عدنه غيرك مولاي ما عدنه غيرك شكرا إلك يا بو الخير غرّگنه خيرك فقير و خدمتك صارت كشختي أمانه بشيبة المهدي دمعتي عاشگ محرم ٤/ عاشورك بكلشي اختلف يا سيد النوح اليتمَرّض ابنه بفطرته للمنبر ايروح بجسمك ألف طعنة رمح بس انته دكتور ما شفنه غيرك منجرح وِ يْداوي الجروح أعظم طبيب حسيني كشفيته دمعة عيني مستشفى فقره اترابه من أمرض ايشافيني أوگف ملك يم بابه عالوادم معلّيني كبّر إسمنه الحسين كبّر إسمنه إحنه خدم و العباس شايل علمنه يوقّع چف أبو فاضل صفحتي أمانه بشيبة المهدي دمعتي عاشگ محرم ٥/ أهلا محرم يا شهر نحسبله أيام من كربله هب عالخدم دخان الخيام شهر اللطم شهر البچي شهر اليطبرون اشلون اسكت و زينب مشت مسبيه للشام بت فاطمه سبوها وياها راس اخوها و لهالزمن غريبه هضموها بت أبوها و الوادم السّبتها رايتها نزلوها زينب غريبه بالشام زينب غريبه وين ابو صالح و يشوف هاي المصيبه اعلى زينب ونّتي و نوحي و حسرتي أمانه بشيبة المهدي دمعتي عاشگ محرم *الشاعر الموفق كرار حسين الكربلائي* رابط قصيدة "عاشق محرم": https://youtu.be/37kpYZvqZzw?si=zJoVm2yZXLDNOZDp _ قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني https://t.me/MSudane _ القناة الرسمية للملا مصطفى السوداني على telegram : https://t.me/Mustafa_Sudane _

•{يا هلا بجيتك}• ١/ غيرك والله ما عندي...يمهدي انتظرك لو أظل وحدي...يمهدي يومي ينتهي و يبدي...يمهدي بس المهدي يا مهدي...يمهدي ها خوتي ها يا هلا بجيتك گمر مثل العباس ٢/ هاي الدنيه ما تسوه...يمهدي لو ما عينك الحلوة...يمهدي افراگك عالگلب بلوه...يمهدي فدوه كلشي الك فدوه...يمهدي ها خوتي ها مبروك هاشم صار عدهم مولود ٣/ وجهك للعشگ قسمه...يمهدي احروفك تسوه ألف كلمه...يمهدي محبتك مستوى القمة...يمهدي عيونك واهس النجمه...يمهدي ها خوتي ها يعگال اهلنه الما يطيح امن الراس ٤/ أجمل ما خلق ربي...يمهدي و أجمل ما دخل گلبي...يمهدي مو بس بالحچي حبي...يمهدي محبتك نوّرت دربي...يمهدي ها خوتي ها فرحو يهلنه اليوم حلوه الهوسات *الشاعر الموفق حيدر العماري* رابط قصيدة "يا هلا بجيتك": https://youtu.be/h6zSLnEq8Q8?si=ZU2rjaOGVamSOoi9 _ قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني https://t.me/MSudane _ القناة الرسمية للملا مصطفى السوداني على telegram : https://t.me/Mustafa_Sudane _

•{هم تزورون}• همّ تزورون لولا هالعام وين الزوار خانگني الشام والله صعب...كلها غرب...يمتى تطب خدامي وحدي ترى...و آنه مرى...شنهو جرى خدامي خانگني الشام ١/ بالشام محّد إلي...حرمه و بعيده هلي من ما تجون و علي...خيمه الگلب يحترگ صعبه امن أظل وحّدي...و طافي ضوه مرقدي و ليل اهدعش يبتدي...بيباني من تنطبگ ما ريد يوصلني رجب و انتم بعيدين منهو اليواسيني على ظيم الدواوين و هالشام أبد مو ديرتي ودوني لحسين فزعولي دموع آنه أم احزان فزعوا مشيعين ما عندي اخوان ما ظل ولي...لا بو علي...لا كافلي و لا خيامي وحدي ترى...و آنه مرى...شنهو جرى خدامي خانگني الشام ٢/ مشتاگه الكم أنا...و متانيتكم سنه گلبي منو ايطمنه...لو خالي يبقى الگبر تعالو محّد يحن...بالشام شحّة حزن يخلوني وحدي أون...و اهنا شماتة شكثر معقولة سكته و ما تجي زواري هالعام معقولة اموتن وحّدي و ما يمّي خدام الحزن العراقي هالسنه أفتقده بالشام أنده زوار و ما ألگه جواب و افگد بالليل الگعده اعلى الباب ماكو جزع...ماكو هلع...ماكو فزع گدامي وحدي ترى...و آنه مرى...شنهو جرى خدامي خانگني الشام ٣/ العباس يمته يمر...گولوله أم الخدر بأيام صعبه تمر...مو ماي محتاجه أخو گلّوله تالي الزمن...طبوا عليْ للصحن گولوله آنه بوطن...يبغضلي أم و أبو گولوله زينب بالگبر و ايديها عالراس ما ريد مرتين أنسبي لحّگ يعباس يا مايله الدنيا صدگ مالت يهالناس مالت دنياي چن ميلة نوگ وگفت دنياي چن وگفة سوگ ليلي قهر...عوزه گمر...تگضي سهر أيامي وحدي ترى...و آنه مرى...شنهو جرى خدامي خانگني الشام ٤/ شيجيبني لكربله...ابن أمي مشتاگه اله بگبري و أريد أوصله...شگد صحت يا بو علي يمتى يجي المنتظر...و ينقلني يم الگمر گولوله لاون ظهر...بين الحرمين إلي كافي يظل گبري بغرب و عيوني تندار و لو تجي الزوار برجب لو ماكو زوار بس كربله ترهم دوه لجروحي الكبار الغربه تعرفون أنساها شلون حسين و عباس و بالنص أم عون عندي أمل...لمّة أهل...الله كفل أحلامي وحدي ترى...و آنه مرى...شنهو جرى خدامي خانگني الشام *الشاعر الموفق ميثاق الحمداني* رابط قصيدة "همّ تزورون": https://youtu.be/SyE6D3jFab4?si=yIpr5wB9yFSPC0dr _ قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني https://t.me/MSudane _ القناة الرسمية للملا مصطفى السوداني على telegram : https://t.me/Mustafa_Sudane _

•{رايحه}• رايحه...بعد مو وكتچ ييمه و رايحه الفاتحه...ايطيح گلبي و ما تطيح الفاتحه بدمعتي غرگت عباتي و البقيه في حياتي...رايحه ١/ يا يمه اموت بدونچ و فدوه رحت لعيونچ...من غمّضن لِبنيه من دون امها محّد يحس بهمها...امضيعه وطن أوصل افراشچ ييمه آنه و ارجع خايفه هيچي منظر شگ دليلي عمري لا ما شايفه غمّضت عينچ يويلي و بچت كل الطايفه يالمشيتي بلا وداعي زينب المن عايفه خاليه...الديره ظلمه و من حنانچ خاليه غاليه...ارخيصه روحي يمه و انتي الغاليه ابروحتچ گرب مماتي و البقيه في حياتي...رايحه ٢/ شحّت بريتي انفاسچ و الشيب تارس راسچ...و ضاگ الهوه مات الورد وي روحچ ازغيرة و چبيره جروحچ...و مامش دوه ضاگت ابعيني دمعتي و الهوه البنفاسي يالحنينه و گلبچ أبيض چنه يشبه راسي انتي جنه و بيها تلتم كل هلي و كل ناسي و تالي نمتي بالترابه و فز جرح بحساسي العافيه...ابروحتچ يا يمه تمشي العافيه غافيه...و آنه كل ظني يا روحي غافيه أبچي يمچ و بصلاتي و البقيه في حياتي...رايحه ٣/ تغفه الشمس بحضانچ و الدمع وازه اردانچ...من البچي لمّانه بيت احزانچ و ظهره انكسر دفانچ...و ظل ينتچي گلت كلشي يروح فدوه و هايه موش ابالي مني اتروحين يمه و تبچي خوتي گبالي حسين غالي حيل عندي و حگه فاگد غالي و يبچي الحسين اوي ابونه و الحسن يبرالي گبالچ...گابليناچ و گعدنا گبالچ اطفالچ...گومي فدوه و مسحي دمع اطفالچ شيّعت كل أمنياتي و البقيه في حياتي...رايحه ٤/ ناس السلف محتاره و الجار ينشد جاره...شنهي الحصل مكسوره كل القاده چن ميته أم الساده...و حيدر زعل أحچي وياچ بدمعتي و تبچي كل الديره يمه مو مالت مگابر انتي حيل ازغيره بدمعتي مدري بسبحتچ رايده اخذ خيره الأم اذا ماتت يعالم بتها تبقى بحيره راسها...اتعيش بالذله و يشيّب راسها ناسها...يعني دفنت بالگبر كل ناسها و الگبر ماخذ حلاتي و البقيه في حياتي...رايحه ٥/ چانت تجي يوميه تغطيني بالحنيه...من البرد يم راسي تبقى تساهر حد ما يبيّن باچر...تروح و ترد من اغيبن چنت لحظه امي تلفي اطروشها اتگلي امچ بالمدامع غرگت كل حوشها حافيه اركض و اجيها و انشد اويه هروشها آنه من أبرد تضمني أمي بين ارموشها خيمه...أمي يا هالناس چانت خيمه ايتيمه...تالي زينب من عگبها ايتيمه بالگبر يا يمه باتي و البقيه في حياتي...رايحه *الشاعر الموفق ماجد حبيب الخيگاني* رابط قصيدة "رايحه": https://youtu.be/w-ax5z_xtzs?si=P1H6dk1V2ladFLXz _ قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني https://t.me/MSudane _ القناة الرسمية للملا مصطفى السوداني على telegram : https://t.me/Mustafa_Sudane