الشاعر والرادود موسى الخادم

خدامك … يالرضا

خدامك … يالرضا … خدامك أيامك … ما نست … أيامك 📝1 كل وكت خدام الك يبن الزجيه واللطم واجب يضل حد المنيه اوداعت الدمّه نزف بالغاضريه ماكو تعب ابخدمتك راحتنه هيه نحجي واقع مو وهم يمك احسبنه خدم خدامك … يالرضا … خدامك 📝📝2 ساعه ساعه ننتظر هاي الليالي حتى نبجيلك بواچي بصوت عالي كل مجالسنه ابخدمتك انت غالي ما يهمنه اليعترض بي ما نبالي خل يرامينه ابسهم يمك احسبنه خدم خدامك … يالرضا … خدامك 📝📝📝 3 يالجبت عمرك تحث اعله الشعائر نحِي يوم امصابك ابدمع النواظر ماكو بينه الما يعيش احزان عاشر خدم نبقالك نردد عالمنابر يا شفيع اهل الشيم يمك احسبنه خدم خدامك … يالرضا … خدامك 📝📝📝📝 4 ما كو بينه المايحب عيشه ابكرامه والكرامه شفنه احنه ابهل خدامه سيدي اوداعت علي نصبح يتامه ابغير خدمه الحضرتك يابو الشهامه خدمتك تشفي الألم يمك احسبنه خدم خدامك … يالرضا … خدامك 📝📝📝📝📝 5 يا أنيس الروح يل كل حجيه دافي إلك لو نكسر عظم هم ما نوافي انريد كلنه انصير بشر الركض حافي الوالدك واعلن التوبه ابكَـلب صافي المهم أنته نعم يمك احسبنه خدم خدامك … يالرضا … خدامك 📝📝📝📝📝📝 6 تنتظر كل الخدم جيَّت المهدي اهواي ثارات اصبحت يا لطمه اشهدي ماكو خادم ما يحب ايكون جندي ابدولة العدل الإلهي الراح تبدي بثارك ايرف العلم يمك احسبنه خدم خدامك … يالرضا … خدامك _______________________ ✍️🏻 كلمات #موسى_الخادم

يبن شبيب .. ان كُنت باكياً لشي … فبكِ الحسين ////1 قال مولانا الرضا … والدمع عالخد يسيل خل بجيكم كل وكت… على داست فوكه خيل ماكو مثل امصيبته … اولا يصح الهه مثيل جسمه ظل اعله الترب … ما لكه وادم تشيل يبن شبيب … أتلث ليالي ابلا دفن … ظل الحسين ///2 مثل ما يذبح لكبش … حسين ياناس اذبحوه وبالعطش فوك الثره … اكبال اهل بيته اتركوه وبالحوافر يا وسف … مره مرتين ا سحكوه وحتى ثوبه البي عطر … امن الزجيه سلبوه يبن شبيب حتى اعله ثوبه ما سلم … يا مسلمين ////3 ابكربله يبن شبيب … حركو اعله اهلي الخيام وعمت عيني ام الخدر …. ظلت اتلم باليتام ما رعو حرمت نبي … ولا رعو حرمت امام منحره انحز من كفه … وكابلو صدره ابسهام يبن شبيب الف وتسعمية جرح … فوك الانين //4 جان كل وكته بجي … يخلص ونوح ونحيب وشاهد لهذا الامر … صحبته وابن شبيب اه يا جد صيحته … من الصبح حد المغيب ياهو مثلك بالشمس…عاري ظل جسمه وسليب يبن شبيب اتغيرت رسومه امن الشمس … جدي الحنين //5 لاخر ايام العمر … ناصب ابكلبه العزاء مره ينعى اعله السبي … اومره ينعى الكربلاء وثوب الاسود ما نزع … اولا نزع حزنه البكاء ايد رافع للطم …. وايد رافع للدعاء يبن شبيب الرايد اذنوبه تنغفر … يبجيله عين ///6 موتاه كثر القهر … على جده الظل وحيد موتاه حال الاخو …. من بقى ابلا عضيد موتاه ذاك النحر …. المنكطع من الوريد موتاه درب السبي … اوطبت الحره اليزيد يبن شبيب ميت امامك من قهر … هاي السنين ….. كلمات #موسى_الخادم

على مر العصور .... صور متناقله الكصد بابه يزور ... كزاير كربله سلام الله ... على الضامن ... ابو محمد رضا ....... تشبه حضرته حضرت ابو سكينه اليدخلهه يحس جن زاير حسينه مثل جده الحسين ايحيي بالزاير وينطي امراد للكاصده ابجفينه كرم جوده يفور .... عظيم المنزله الكصد بابه يزور .... كزاير كربله سلام الله ... على الضامن ... ابو محمد رضا ....... كلمن عنده حاجات ويهم بيهه خل يكصد غريب الطوس يكضيهه ما واحد كصدله ومنه رد خالي موش انه الاحجيهه الناس تحجيهه ذكر اسمه يدور .... يحل كل مشكله ...... حاير ما يعوفه اليعتني البابه مفتاح الفرج دمعه على اعتابه من طبعه سخي مثل الحسن طبعه للغربه يعزب اشلون بحبابه عطاءاته بحور .... شهد كلشي اله ...... ابو محمد رضا شمحلاه محله اسمه شمس الله الجبيره التجلي كل ظلمه يمه الصعبه تسهل ما تظل صعبه وكل مهموم صدره ينشرح يمه على كل السطور ... ذكر اسمه حله ....... الضامن للغزاله ضامن الزاره يحضر دفنته ويصير خطاره يشفع لليزوره بعمره لو مره هاي اعظم ابشاره الكم يزواره كبر زواره نور .... امن اخيره الاوله ....... هنياله الصبح خادم لبو محمد باجر بالقيامه جاهه ما ينعد يجوز اعله الصراط ابصاية الخدمه ويدخله الجنه بيده المصطفى احمد الحواري والقصور ... ابهله تستقبله ....... كلمات موسى الخادم

قال مولانه الرضا // ورواه ابنُ شبيبْ إنَّ جَديَ الحُسين // ماتَ عطشاناً غريبْ //////////////////// ١= هايه معناهه الرضا جان اعله جده بروحه ناصب فاتحه ودمعه اعله خده لحد يوم السمو الضلام جبده يشكي حال حسين  من خلوه وحده دامياً في كربلاء // عاريَ الجسمِ سليبْ إنَّ جديَ الحُسين // ماتَ عطشاناً غريبْ ///////////////////////////// ٢== عاش بالغربه لحد آخر حياته  مخاوي حزنه ولوعته وهضمه الوفاته جرع كاس المر على حسين وبناته وعلى زينب شيَّب وتشهد صلاته ولخدرِ زينبٍ // شيَّبهُ صارا كثيبْ إنَّ جديَ الحُسين // ماتَ عطشاناً غريبْ //////////////////////// ٣=== ذبحت العطشان يذكر كل مسيه بالهضم  والنوح و الونه الخفيه  وعمره ما بطل بواجيه الرقيه خلصاهه يصيح ويلي اعله السبيه يا عزيزةَ الحسين // يا ترى هل من مجيبْ إنَّ جديَ الحُسين // ماتَ عطشاناً غريبْ ///////////////////////////// ٤==== ليله ما شاف الفرح ثغره وتبسم وجابهه من الصغر هم ابكتر هم اسنينه مسبيه اعله عماته تكلم ومحترك كَـلبه مثل حرك المخيم يا أبا الجود الرضا //، قد قضى العمر نحيبْ إنَّ جديَ الحُسين // ماتَ عطشاناً غريبْ /////////////////////////// ٥===== وبنهاية صفر ودعهن سنينه وعاف ذكراه المجالس على حسينه كربله ما فاركَـت لحضات عينه والشهود بهاي يا سامع ونينه للشفاهِ الذابلات /// دمعهُ امسى خضيبْ إنَّ جديَ الحُسين // ماتَ عطشاناً غريبْ ////=====================//// ✍️🏻 كلمات #موسى_الخادم

يا انيس النفوس ... ياغريباً بطوس يا ملاذ الحياره ... الحياره اكتبلي يمك زياره ... زياره ...... الك مديت الجفوف وادري متردهه خليه سخي معروف بعطائك مثل حماي الحمية عليك امشي حسينك وعباس والزهره الزجية اعلية تتكرم ازورك كبل ميعاد المنية يا كريم العطاء ... لا ترد الدعاء امنيتي اشوف المناره ... المناره ...... ارزقني مولاي الزياره منهه لا تحرمني فدوه كلشي بالدنية ميسوه ازيارتك بس هي تسوه الف هنياله الاجاك ومن عذب مايك ترَّوه ياملاذ الخائفين الشوفته الاملاك تهوه يا امير  الخلود ... انت سر الوجود بيدك الكون ومساره .. ومساره ..... سارح ابعالم جمالك  يا امامي عمري جبته اعليه كل يوم اليعدي اجري الك دمعاتي سكته انا ذاك الماله غيرك انت المترجمهه قصته كلبي حبيته اعله مودك جي يحب ذكرك عشكته انت معنى الجمال ... انت زين الرجال يا امير الغياره ... الغياره ..... على جنح الطير ابعث الك اشواكي وسلامي خادم ازغير اعله بابك ريت اصيراً يا امامي اليوزع الماي بسمك يروي كل انسان ضامي كلشي ما ريد ابحياتي بس رضاتك يا غرامي خادمك ريت اصير ... عبد عندك ياامير خدمتك اعظم تجاره ... تجاره ...... سامع الزارك يحصَّل كل طلب منك يطلبه وانه كل طلبات عندي تحضر الكبري وتطبه من يحفروهه حفرتي وعني يمشون الاحبه جيَّتك مولاي اتاني تدري هاي الساعه صعبه مالي غيرك ينور ... يحضر الكبري يزور وحشه كبري ابلا زياره ... زياره ...... كلمات موسى الخادم

السلام عل علي ابن موسى الرضا ع

https://youtube.com/watch?v=XaZmx-IpyXw&t=9&feature=shared

https://youtu.be/Uedav3PG0qM?si=LpCH7z1LiEHeEnmZ

https://youtu.be/25IgVIl1dus?si=V9iMFj_pSeHtiTFA

اه واعلياه

آه واعلياه  … آه واعلياه ... آه واعلياه .................................... 📃1 وحده علي الليله صفه عن عينه غاب المصطفى خلصت حياته وظل علي بالدمعه  والهم  مبتلي .. عظمه المصيبه عالمصطفى ابحركَـه يون وبدمعه غركَـان الجفن بعيونه بانت  غربته جان النبي كل دنيته ..  عظمه المصيبه ظل وحيد ابوجع كَـلبه يقره راح اخوي وحبيبي يزهره ياهو اليه بعد هالمسيه والمدامع يصب عشره عشره اه وافقيداه … اه وافقيداه … اه وافقيداه آه واعلياه  … آه واعلياه ... آه واعلياه 📃📃 2 ظهره انكسره بعد النبي ما جنه ذاك الطالبي الوكت الشدد مثل الجبل متنه اعله محبوبه انهدل … ما ظله حيله من وسده ابكَـبره ورجع  بس نوحه من عنده انسمع بالكَـوه يمشي اعله الجدم يتعثر بثوب الألم … ما ظله حيله ويه روحه يسولف سوالف هذا آنه علي الكَـوه واكَـف بيدي هايه ادفنت كلشي عندي وجاي احس الكَـلب بعده خايف اه واقتيلاه … اه واقتيلاه … اه واقتيلاه آه واعلياه … آه واعلياه … آه واعلياه 📃📃📃 3 لا عايش ولا منذبح حيدر صبح كبره جرح  حقه اليفاركَـله محب كل عمره يخلص يتنحب ... عالفاركَـاهم اي هوه والميت سوه حيدر طفه مثل الضوه من وسد الهادي ابكَـبر  حيدر دفن بيده العمر  ... عالفاركَـاهم حقه حقه علي امصابه كلفه بيده دافن اخو روحه ترفه ما يلومه علي المثله فاكَـد كلهه جفه اوعلي امصابه جفه اه واوحيداه …اه واوحيداه …اه واوحيداه آه واعلياه …. آه واعلياه … آه واعلياه 📃📃📃📃 4 حال الوصي بجه السمه وشهدتله ويلي فاطمه ما شاهدت ضحكاته ابد بعد النبي  جبده انمرد … والضيم حاله يتعثر ابممشه الدرب وبجفه ملزوم الكًـلب مثل الغصن عوده يبس وكَـوه يجر صار النفس …. والضيم حاله وحشه داره صبح بعده وحشه وبالمدامع علي امتاني نعشه وي دموعه سهر كَـاضي ليله والحزن  يلكَـه واكَـفله غبشه اه واحبيباه .. اه واحبيباه … اه واحبيباه آه واعلياه … آه واعلياه … آه واعلياه 📃📃📃📃📃 5 حيدر صبح مضرب مثل للفاركًـ احبابه وذبل ما واحد ابكَـده بچه كلشي اعترف بسمه حچه …. احزانه غيمه اهوايه علي اهوايه كبر شابت لحيته امن القهر يعكَِوب حزنه بصف علي ابساعاته الاولى ينجلي …. احزانه غيمه روحه طلعت علي وي حبيبه كل وكت عايش ابنص نحيبه ايعينه الله علي كلهه صاحت امصابه أكبر واشد كل مصيبه اه وامصاباه … اه وامصاباه .. وامصاباه آه واعلياه … آه واعلياه … آه واعلياه :::::::::::::::::::::::::::::::::::::: ✍️🏻 كلمات #موسى_الخادم

مشايه مشايه

درنه اتجاه البوصله … من كربله للنجف بعد اربعين حسين للنجف متعنين مشايه … مشايه 📜1 اي نعم عدنه بعد ازياره نكَـصدهه ابعدد ومثل يوم الأربعين انادي يا حيدر مدد ازيارة الهادي الأبي تجي من بعد السبي للنجف نكَـصد نزور انواسي بيهه اعظم نبي كل موكب … بيهه انطب  … ياخذنه ابهله والخادم  … هم خادم  …. جان ابكربله نفس المواكب والخدم … من كربله للنجف الشفناهم امعزبين للنجف متعنين مشايه … مشايه 📜📜 2 ما يرد من كربله زاير حسين وهله للنجف يطلع مشي ابدمع عينه السايله النيه معقوده بفخر للغري من النحر ماكو اليحس بالتعب امن اول الآخر صفر شي تلطم … شي تخدم … شي تطلع بچي  مشايه  … والرايه  …. هي ام الحچي زوراه حد اخر نفس … من كربله للنجف ابهذا النهج باقين للنجف متعنين مشايه … مشايه 📜📜📜 3 للنجف كلهه اللتجت بكَـلب صافي اتوجهت اتعزي حماي الحمه الشيعه ما لحضه نست ازيارة الهادي فرض ايروح كلمن يعترض ما نفاركَـهه أبد نعتني من كل أرض كل ميه .. ابلطميه … يطون الدرب والناظر …ظل حاير .. بالرقم الصعب كثره العدد واكثر بعد … من كربله للنجف مليون في عشرين للنجف متعنين مشايه … مشايه 📜📜📜📜 4 نوصل الصحن الولي وصيحت الحب تعتلي وراية المهدي ترف لا فتى إلا علي نترس الحضره لطم ذلك اليدكَـ بالعظم ونندعي ابجاه النبي انصير للمهدي خدم للمهدي … جم جندي .. باچي اعله السبي يحسبنه … ويكتبنه … زوار النبي وبدولته نطلع مشي   … من كربله للنجف وتشوفه هاي العين  للنجف متعنين مشايه … مشايه ::::::::::::::::::::::::::: ✍️🏻 كلمات #موسى_الخادم

يا بويه

مو مالت اتخليني واتروح حزني ابغيابك يكتل الروح يا بويه .. يا بويه 💔1 يبويه افتحلي عينك واحجي وياي احس دكَـات كَـلبي صارت اهواي وراك اشلون اعيش ابهاي دنياي يماخذ روحي مني وشوف عيناي حالي ابوداعك يشبع اجروح مو مالت اتخليني واتروح يا بويه .. يا بويه 💔💔2 انه الزهره يبويه حالي يا حال وراك ابقى حزينه امدوهنه البال يريت اوياك بالتابوت انشال شلي ابعمري ويتيمه اعليه ينكَـال هد حيلي موتك هد الاصروح مو مالت اتخليني واتروح يا بويه .. يا بويه 💔💔💔 3 بعد عينك اذوبن مثل الاشموع  واخلص ليلي بس اجريلك ادموع راح الناس تحجي امن اول اسبوع هاي البعد ابوهه ونهه مسموع كل الحجي الينكَـال مسموح مو مالت اتخليني واتروح يا بويه .. يا بويه 💔💔💔💔 4 جرح فركَـاك ما يشفي سهر ليل ولا نوح وبواجي التاخذ الحيل وحق ابني التدوسه ابكربله الخيل حزني اكبر كَـلب ما يكَـدر ايشيل نبضات كَـلبي احزاني والنوح مو مالت اتخليني واتروح يا بويه .. يا بويه 💔💔💔💔💔 5 يعز من روحي عندي وشوف الاعيون أخذني اوياك خل ماتت يكَـولون اذا ابقى الضلع مني يكسرون وبابي ابلا خجل فوكَـي يطيحون ومحسن اشوفه اكَـبالي مذبوح مو مالت اتخليني واتروح يا بويه .. يا بويه 💔💔💔💔💔💔 6 بيت احزان بعدك راح ابو حسين يبنيلي واضل انعاك كل حين بعدك عمري ما يتعده شهرين واجيك ابكسر ضلعي وسطرت العين ودمي العلى التربان مسفوح مو مالت اتخليني واتروح يا بويه .. يا بويه ::::::::::::::::::::::::::::::::::::::::: ✍️🏻💔 كلمات #موسى_الخادم

يعينك الله يا علي

ايعينك الله يا علي ابهل ليله مات اخوك الجان حيلك حيله 🗓️ 1 ايعينك الله يا علي اعله افراگه توك ادفنته وتريد املاگه عايش وروحك اله مشتاگه اشلون عمرك تگضي بعده ادخيله 🗓️🗓️ 2 اشلون وحدك نزليته الگبره وانت حيلك راح گبل العصره محني ظهرك على افراگه وتقره راح اخوي الجنت دوم اشكيله 🗓️🗓️🗓️ 3 يالجنت بلسم الكل اجروحه روحك اشگالت ابطلعت روحه هذا نوحك منسمع لو نوحه اشويه ارحمو ابفاطمه التبجيله 🗓️🗓️🗓️🗓️ 4 مات ابو الزهره وبقيت الحالك شنهو ظلتك كلشي ما ظلالك بعد موته موتتك تحلالك المات اخو محد يجي ايتجيله 5🗓️🗓️🗓️🗓️🗓️ المات اخوه محد يهم ابحاله وليل وانهار الدمع يحلاله ايعينك الله اوياك محد شاله ولا حضر واحد يعزي العيله 6 🗓️🗓️🗓️🗓️🗓️🗓️ راح طه المصطفى محبوبك وراح وحشه اتصير كل ادروبك اولون الاسود ما يفارگ ثوبك لحد يوم الراح بي تمشيله ::::::::::::::::::::::::::::::::::: ✍️🏻 كلمات #موسى_الخادم

فتح اعيونك