በአዲስ አበባ ከተማ አስተዳደር የከተማ ውበትና አረንጓዴ ልማት ቢሮ

የአረንጓዴ አሻራና የኮሪደር ልማት ለአእምሮ እፎይታና ለከተሞች አዲስ ህይወት ***** ሕይወት በውጥረትና በተደጋጋሚ እንቅስቃሴ በምትሞላበት በዚህ ዘመን፣ አእምሮ ከዕለት ተዕለት ጫና ራሱን ለማሳረፍና ሰላምን ለማግኘት ተፈጥሯዊ መጠለያዎችን ይፈልጋል። የአረንጓዴ አሻራ የጋራ ጥረት ውጤት የሆኑ ለምለም ስፍራዎች አካባቢን ከማስዋብ ባለፈ ሰዎች ቆም ብለው እንዲያርፉ፣ እንዲወያዩና ከዕለታዊ ጫና ለጥቂት ጊዜ እንዲርቁ አዲስ የመንፈስ እፎይታና የአእምሮ እረፍት ይሰጣሉ። በአረንጓዴ እፅዋት ከተከበቡ መናፈሻዎች የሚገኘው ተፈጥሯዊ ጸጥታ፣ የአእዋፍ ድምፅና የአበቦች መዓዛ አእምሮን ከተወጠረበት ሁኔታ ቀስ ብሎ ወደ መረጋጋት እንዲመለስ ከፍተኛ አስተዋፅኦ ያበረክታል። ጥናቶች እንደሚያመለክቱት ከተፈጥሮ ጋር ጊዜ ማሳለፍ፣ ችግኞችን መትከል፣ ማጠጣት፣ አረም ማረምና መንከባከብ በጭንቀትና በውጥረት ላይ አዎንታዊ ተፅዕኖ አላቸው። እነዚህ ትኩረትን የሚጠይቁ ተግባራት ሰውን ከዕለታዊ ሀሳቦች አርቀው በሚያደርገው የበጎ ስራ ላይ እንዲያተኩር ከማድረጋቸውም በላይ፣ ከቀላል እስከ መካከለኛ የአካል ብቃት እንቅስቃሴን ከማስገኘታቸው ጋር ተያይዞ የአንድን ተክል እድገት ከትንሽ ችግኝነት እስከ ለምለምነት ማየት የስኬትና የዓላማ ስሜትን ያጠናክራል። ይህም ከተፈጥሮ ጋር ቀጥተኛ ግንኙነት በመፍጠር ለሰውነት እንቅስቃሴና ለስሜት መረጋጋት ትልቅ ድርሻ አለው። ይህንን የተፈጥሮ እፎይታ በከተሞች ውስጥ ለማስፋፋት እየተከናወነ ያለው የኮሪደር ልማትም በከተማዋ መሃል የሚገኙ አረንጓዴ ስፍራዎችን፣ የእግረኛ መንገዶችን፣ መናፈሻዎችንና የመዝናኛ ቦታዎችን ከዘመናዊ የከተማ ልማት ጋር በማዋሃድ የነዋሪዎች ማረፊያና መገናኛ እያደረጋቸው ይገኛል። የአረንጓዴ አሻራና የኮሪደር ልማት ተፈጥሮን የመጠበቅና ከሰው ልጅ ዕለታዊ ኑሮ ጋር የማገናኘት ታላቅ ሀገራዊ ርዕይ በመሆናቸው፣ ዛሬ የተተከለው ዛፍ የነገ ጥላ፣ ዛሬ ያለማነው አረንጓዴ ስፍራ ደግሞ ነገ ሰዎች የሚገናኙበት፣ የሚያስቡበትና እፎይታ የሚያገኙበት ዘላቂ ሀብት ሆኖ የሚያገለግል ነው።

የአረንጓዴ ልማት የህብረት፣ የዕውቀትና የውጤታማነት ማሳያ የአረንጓዴ ልማት ስራ የአንድን ተቋም አመራርና ሰራተኛ በአንድ አላማ ስር የሚያስተሳስር ጠንካራ ድልድይ ነው። ይህ ስራ የመሪዎች ተነሳሽነትና የሰራተኞች ቁርጠኝነት በተግባር የሚታይበት ተጨባጭ የውጤት ማሳያ ነው። አመራሩና ሰራተኛው እጅ ለእጅ ተያይዘው በመስክ ላይ በሚያደርጉት ንቁ ተሳትፎ ተቋማዊ አንድነትን ከማጠናከር ባለፈ ለአካባቢ ጥበቃና ለሀገር እድገት ጉልህ አስተዋጽኦ ያበረክታሉ። ይህ ዓይነቱ ትብብር በተግባር የታገዘ የጋራ ስኬት መፍጠር እንደሚቻል ማረጋገጫ ነው። የዚህ ታላቅ ስራ ስኬታማነት በዋናነት የሚመነጨው ከብቁ አመራር እና ካላቸው ከፍተኛ የባለሙያ ጥምረት ነው። አመራሩ ስራውን በስትራቴጂ በመምራት፣ ግብዓቶችን በማሟላትና አቅጣጫ በማሳየት ረገድ ግንባር ቀደም ሚና ይጫወታል። በአንጻሩ ባለሙያዎችና ሰራተኞች ሳይንሳዊ እውቀታቸውንና ጉልበታቸውን በመጠቀም ስራው በዕቅድና በጥራት እንዲከናወን ያደርጋሉ። የዕውቀትና የልምድ ጥምረት የሆነው ይህ ቅንጅት፣ የአረንጓዴ ልማት ስራዎች በዘፈቀደ ሳይሆን በዘላቂነትና በውጤታማነት እንዲመሩ ያስችላል። የአረንጓዴ ልማት ዋነኛ መለያው በቢሮ ግድግዳዎች ውስጥ የሚቀሩ ሪፖርቶች ሳይሆኑ በምድር ላይ የሚታዩና የሚጨበጡ የመስክ ስራዎች መሆናቸው ነው። በሂደት የሚለመልሙት ችግኞች፣ የሚጠበቁት ደኖችና የሚከለሱት የአፈርና ውሃ ጥበቃ ስራዎች በሙሉ የልፋቱ ቀጥተኛ ምስክሮች ናቸው። ይህ በተግባር የሚታይ ለውጥ የተቋሙን ሰራተኞች የስራ ተነሳሽነት ከማሳደጉም በላይ፣ ህብረተሰቡ በተቋሙ ላይ ያለው እምነት ከፍ እንዲል ያደርጋል። ይህ ስኬታማ የመስክ ስራ የአመራሩና የባለሙያው የጋራ የመተማመኛ ዋስትና ነው። በጥሩ ቅንጅት የተገኘው ተጨባጭ ውጤት የጋራ ኩራትንና መተማመንን ይፈጥራል። ወደፊት ለሚሰሩ ማናቸውም ከበድ ያሉ ተቋማዊ ተልዕኮዎችና ስራዎች እንደ ትልቅ አቅምና ዋስትና ሆኖ ያገለግላል። በአጠቃላይ፣ የአረንጓዴ ልማት ስራ የአንድነት ሃይል ምን ያህል ተአምር መፍጠር እንደሚችል በተግባር የሚያሳይ ተጨባጭ ምስክር ነው።

አረንጓዴ ዐሻራ፡- የኢትዮጵያውያን የሕብረትና የፅናት ህያው ሐውልት ****** ኢትዮጵያውያን በጋራ ስንቆም የሚያስቆመን ምድራዊ ኃይል እንደሌለ የቀደመው ታሪካችን ቁልጭ አድርጎ ያሳያል። በዓድዋ ጦርነት በአንድ ልብ ተሰልፈን ቅኝ ግዛትን ድል እንደነሳነው እና ታላቁን የኢትዮጵያ ሕዳሴ ግድብን የሀገራዊ ቁርጠኝነት ምልክት አድርገን እንደገነባነው ሁሉ፣ ዛሬ ደግሞ በተፈጥሮ ጥበቃ ታሪክ አዲስ ሀገራዊ ገድል እየፈጸምን እንገኛለን። በጠቅላይ ሚኒስትር ዐቢይ አሕመድ (ዶ/ር) አነሳሽነት በ2011 ዓ.ም የተጀመረው ታላቁ የአረንጓዴ ዐሻራ መርሐ ግብር፣ በሕብረትና በፅናት ከተጓዝን ሁለንተናዊ ለውጥን በተግባር ማምጣት እንደምንችል ያረጋገጠ ደማቅ የስኬት ማሳያ ሆኗል። ባለፉት ስምንት ዓመታት ውስጥ እስከ 56 ቢሊዮን የሚጠጉ ችግኞችን በመትከል የሀገራችንን የደን ሽፋን ከ17.2 ወደ 23 ነጥብ 6 በመቶ ማሳደግ ተችሏል። በቅርቡም "ተስፋን እንትከል" በሚል መሪ ቃል በአንድ ጀምበር ከ805 ነጥብ 3 ሚሊዮን በላይ ችግኞችን በመትከል ኢትዮጵያውያን በድጋሚ ዓለምን ያስደመመ ታላቅ የአንድነት ድል አስመዝግበዋል። ይህ ከሊቅ እስከ ደቂቅ፣ ከአርሶ አደር እስከ ከተሜው የተሳተፈበት ሰፊ የህዝብ ንቅናቄ የተራቆቱ መሬቶችን ከማገገም ባሻገር፤ እንደ አቮካዶ፣ ማንጎ፣ ፓፓያና ቡና ያሉ የፍራፍሬ ችግኞችን በማካተት የምግብ ዋስትናን ለማረጋገጥና የኢኮኖሚ አቅምን ለመገንባት ትልቅ መሰረት ጥሏል። ኢትዮጵያ በተፈጥሮ ጥበቃና በአረንጓዴ ኢኮኖሚ ግንባታ እያስመዘገበችው ያለው ይህ አስደናቂ ስኬት፣ በዓለም አቀፍ ደረጃ የተፈጥሮ እንክብካቤ ተምሳሌት እንድትሆን አድርጓታል። ከዚህም የተነሳ ሀገራችን ቀጣዩን ታላቅ ዓለም አቀፍ የአየር ንብረት ለውጥ ጉባኤ (COP32) እንድታስተናግድ ታሪካዊ ኃላፊነት ተጥሎባታል። የተተከሉትን ችግኞች በተከታታይ መንከባከብና ማሳደግ የነገ ሀገራዊ ፅናታችንን የሚያረጋግጥ በመሆኑ፣ እያንዳንዱ ዜጋ ይህን ኃላፊነት በመወጣት ለቀጣዩ ትውልድ የበለጸገችና ያሸበረቀች ኢትዮጵያን በሕብረት ሊያወርስ ይገባል።

የአረንጓዴ ልማት ንቅናቄ በሀገር በቀል ዕፅዋትና በፍራፍሬ ችግኞች ላይ ትኩረት ማድረጉ ለሀገራችን ዘላቂ ዕድገትና ተፈጥሮ ጥበቃ ወሳኝ ምርጫ ነው። የሀገራችን መልክዓ ምድርና የአየር ሁኔታ የተለያየ በመሆኑ፣ የአረንጓዴ ልማት ስራው እንደየአየር ንብረቱ ሁኔታ ከቦታ ቦታ የሚተከሉ ችግኞችን ለይቶ መትከል ላይ ያተኩራል። ይህ አሰራር እያንዳንዱ አካባቢ ለአፈሩና ለሙቀቱ ተስማሚ የሆነውን የዕፅዋት ዝርያ እንዲያገኝ ያስችላል። የሀገሩን የአየር ንብረት የተላመዱ ሀገር በቀል ችግኞች በሽታንና ድርቅን የመቋቋም አቅማቸው ከፍተኛ ነው። በመሆኑም መሬት ላይ ከተተከሉ በኋላ የመፅደቅ ዕድላቸዉ እጅግ ሰፊ በመሆኑ የልፋትንና የወጪን ብክነት ይከላከላሉ። ከጊዜ ወደ ጊዜ ከህዝቡ ቁጥር እየጨመረ መምጣት ጋር የሚመጣጠን ለምግብነት የሚዉሉ ፍራፍሬዎችን በበቂ ሁኔታ ለማምረት የፍራፍሬ ችግኞች መተከላቸው ትልቅ መፍትሄ ነው። ይህም ማህበረሰቡ በቀላሉ የተመጣጠነ ምግብ እንዲያገኝና የኑሮ ውድነትን እንዲቋቋም ይረዳል። ይህ ስራ የችግኝ አቅርቦቱን ሙሉ በሙሉ ከሀገር ዉስጥ ለማግኘት ያስችላል። የሀገር ውስጥ ማህበረሰብና የግል አልሚዎች በችግኝ ማፍላት ስራ ላይ እንዲሰማሩ በማድረግ ለበርካታ ወጣቶች የሥራ ዕድል ይፈጥራል። ከባህር ማዶ የመጡ እንግዳ እፅዋትን ከጥቅማቸዉ አንፃር በሀገር በቀል እፅዋት መተካት ሌላው ዋና ግብ ነው። ይህ የውጭ ምንዛሬን ከማዳኑም በላይ፣ የሀገር በቀል እፅዋትን ስነ-ምህዳራዊ ሚዛንና ውበት ጠብቆ ለማቆየት ይረዳል። ከእነዚህ በተጨማሪ፣ ሀገር በቀል እፅዋት የአፈር መሸርሸርን የመከላከልና የከርሰ ምድር ውሃን የመጠበቅ ተፈጥሯዊ ባህሪያቸው የላቀ ነው። ይህም የደረቁ ምንጮች እንዲያንሰራሩና የደን ሽፋናችን በተፈጥሯዊ መንገድ እንዲያድግ ያደርጋል።

የአዲስ አበባ ዘመናዊ የከተማ ልማት ስትራቴጂዎች የነገዋን ኢትዮጵያ የሚቀርጹ ናቸው አዲስ አበባን ለኑሮ ምቹ፣ ለጎብኚዎች ማራኪ እና ለኢንቨስትመንት ተወዳዳሪ ለማድረግ የተዘረጉት ዘመናዊ የከተማ ልማት ስትራቴጂዎች የመዲናዋን ገጽታ ከመቀየር ባለፈ የዜጎችን ሕይወት እያዘመኑ ይገኛሉ። ቀደም ሲል ለጤና አደጋና ለቆሻሻ ተጋላጭ የነበሩ የወንዝ ዳርቻዎችን ጨምሮ የተከናወኑት የመሰረተ ልማት ስራዎች፣ ከተማዋን ማስዋብ ብቻ ሳይሆን ዘላቂ የኢኮኖሚ እድገት እና የስራ እድል እየፈጠሩ ይገኛሉ፡፡ የዘመናዊ ከተማ ዋና መለኪያ ሰዎች በምቾት የሚንቀሳቀሱበት፣ የሚዝናኑበት እና የሚኖሩበት ምቹ አካባቢ መፍጠር ነው። በዚህ ረገድ ከእንጦጦ እስከ ቀበና የተዘረጋው የወንዝ ዳርቻ ልማት፣ ቀደም ሲል ለቆሻሻና ለተለያዩ የጤና አደጋዎች ተጋላጭ የነበሩ አካባቢዎችን ወደ ለምለም አረንጓዴ ስፍራዎች ቀይሯል። በተጨማሪም የአካባቢ ጥበቃን ከኢኮኖሚ እድገት ጋር አስተሳስሮ ማሳየት እንደሚቻል በተግባር አረጋግጧል። የአዲስ አበባ ዘመናዊ ከተሜነት በውበቷ ብቻ ሳይሆን በሁለንተናዊ የልማት እንቅስቃሴዎቿ የሚለካ ነው፡፡ በከተማዋ የተገነቡ ፕሮጀክቶች የከተማ ቱሪዝምን ያነቃቁ ሲሆን፣ ለምሳሌ ወዳጅነት ፓርክ ባለፉት አራት ዓመታት ውስጥ ብቻ ከአንድ ቢሊየን ብር በላይ ገቢ ማስገኘት ችሏል። ፕሮጀክቶቹ በርካታ ቀጥተኛና ተዘዋዋሪ የስራ እድሎችን ከመፍጠራቸው ባለፈ፣ የአቅም ግንባታና የእውቀት ሽግግር እንዲፋጠንም አድርገዋል። የዲጂታል መንግስት አገልግሎቶች፣ የንግድ እንቅስቃሴ፣ ፈጣን የመጓጓዣ አማራጮች እና የኢንቨስትመንት ምቹነት የዚሁ ዘመናዊ ስትራቴጂ ውጤቶች ናቸው። ይህ በአዲስ አበባ የተጀመረው የልማት ስራ አሁን ላይ ወደ ሌሎች የሀገሪቱ ከተሞች እየተስፋፋ ይገኛል፡፡ ይህም ከተሞች የራሳቸውን ልማት ብቻ ከመከታተል ይልቅ በንግድ፣ በቱሪዝም፣ በሎጅስቲክስ እና በኢንዱስትሪ እንዲተሳሰሩ እድል ፈጥሯል። የቱሪዝም እና የኢንቨስትመንት መሠረተ ልማትን በመሳብ ኢትዮጵያ በዓለም አቀፍ ደረጃ ያላትን ተወዳዳሪነት ያጠናክራል። ጠቅላይ ሚኒስትር ዐብይ አሕመድ(ዶ/ር) እንዳመለከቱት፣ በስርዓት የታቀዱ የሕዝብ አገልግሎት መስጫ ቦታዎች በከተማ ልማት ውስጥ ከፍተኛ አስተዋጽኦ እያበረከቱ ከመሆናቸውም በላይ ሰዎችን በበጎ ዓላማ እንዴት ማቀናጀት እንደሚችሉ በተግባር እያረጋገጡ ይገኛሉ። በአሁኑ ወቅት እየተከናወኑ ያሉ ቀጣይነት ያላቸው፣ አረንጓዴ እና ለሁሉም ተደራሽ የሆኑ የከተማ ልማት ስራዎች የዛሬውን ችግር መፍታት ብቻ ሳይሆን፣ ለነገዋ ኢትዮጵያ የከተማ መዋቅር መሠረት የሚጥሉ ስልታዊ ኢንቨስትመንቶች ናቸው።

የአረንጓዴ አሻራ መርሃ-ግብራችን ከስራ ዕድል አንፃር ለዜጎች ምን ጥቅም እያስገኘ ነዉ? የአረንጓዴ አሻራ መርሃ-ግብር በአዲስ አበባ ከተማ ለአካባቢ ጥበቃ ብቻ ሳይሆን ለሺዎች የሚቆጠሩ ዜጎች ሰፊ የስራ ዕድል የፈጠረ የኢኮኖሚ ምሰሶ መሆን ችሏል። መርሃ-ግብሩ በተለይም ለመዲናዋ ወጣቶች እና ሴቶች ቋሚ ገቢን በማስገኘት የኑሮ ደረጃቸውን እንዲያሻሽሉ ትልቅ እገዛ አድርጓል። ይህ ሀገራዊ ጥሪ በመዲናዋ ለሚኖሩ በርካታ ወጣቶች እና ሴቶች አዲስ የተስፋ በር ከፍቷል። ቀደም ሲል ስራ ያልነበራቸው ወጣቶች በቡድን በመደራጀት በችግኝ ማፍላትና በከተማ ውበት ስራዎች ላይ ተሰማርተዋል። በተመሳሳይ መልኩ ሴቶች የችግኝ ጣቢያዎችን በመንከባከብ የራሳቸውን ቋሚ ገቢ ማግኘት ችለዋል። ነዋሪዎች በችግኝ ማዘጋጀት፣ መትከልና ከተማዋን የማስዋብ ልማት ላይ በመሳተፋቸው ቀጥተኛ የገቢ ምንጭ አግኝተዋል። ከዚህም በላይ የተተከሉ ችግኞችን በመጠበቅ፣ ውሃ በማጠጣትና በመንከባከብ ስራ ላይ የተሰማሩ ዜጎች ዘላቂ የስራ ዋስትና ተፈጥሮላቸዋል። ይህም ከተማዋ አረንጓዴ እንድትለብስ ከማድረግ ባለፈ ለነዋሪዎቿ የዕለት ጉርስ መሸፈኛ ሆኗል። ለችግኝ አቅራቢዎች ሰፊ የገበያ ትስስር ተፈጥሯል። የመንግስት ተቋማት፣ የግል ድርጅቶችና ነዋሪዎች የሚተክሏቸውን ችግኞች በቀጥታ ከእነዚህ ማህበራት መግዛት የሚችሉበት ሁኔታዎች ተፈጥረዋል። ይህም ለአምራቾቹ አስተማማኝና ቀጣይነት ያለው ገበያ እንዲያገኙ አድርጓል። መርሃ-ግብሩ ዜጎች ራሳቸውን ችለው ወደ ላቀ የንግድ ስራ እንዲሸጋገሩ እንደ መነሻ ካፒታል አገልግሏል። በችግኝ ሽያጭና እንክብካቤ ያጠራቀሙትን ገንዘብ በመጠቀም ወደ የአትክልትና ፍራፍሬ ልማት፣ ወደ ላቁ የገጸ-ምድር ማስዋብ እና ወደ ተለያዩ የንግድ ዘርፎች በመሸጋገር ራሳቸውን የቻሉ ስራ ፈጣሪዎች መሆን ችለዋል።

#አዲስ አበባ በአንድ ጀንበር 1ሚሊዮን ችግኝ ለመትከል አቅዳ 1.5 ሚሊዮን ችግኞችን መትከል ችላለች። በዚህ ደረጃ ይህን ቁጥር እንዴት ማሳካት ተቻለ?

#የከተማ ውበትና አረንጓዴ ልማት ቢሮ አሁናዊ ስኬቶች፣ችግሮችና መፍትሄዎች #ዕሮብ ምሽት 2፡30 በአዲስ ሚዲያ ኔትወርክ ይጠብቁን