ИСЛАМ БУЛАГЫ

АКЫРЕТТИ КААЛАГАН АДАМ АГА ЖЕТҮҮ ҮЧҮН АРАКЕТ КЫЛАТ Адам баласы бул дүйнөдө эмнени кааласа, ошого жараша аракет кылат. Дүйнөлүк нерсени каалаган адам анын артынан эмгектенет, убактысын коротот, кыйынчылыкка чыдайт. Ал эми Акыретти каалаган адамдын да ага жетүү үчүн жасаган аракети болушу керек. Бул тууралуу Аллах Таала мындай дейт: «Ким Акыретти каалап, ага жетүү үчүн аракет кылса жана ыймандуу болсо — мына ошолордун кылган аракеттери кабыл болуп, сыйлыкка татыктуу болот». 📖 Куран, Исра сүрөсү, 19-аят. Бул аятта Акыретти каалаган адам үчүн үч маанилүү нерсе айтылган: каалоо, аракет жана ыйман. Акыретти каалоо — жөн гана кыял эмес. «Мен Бейишти каалайм», «Аллахтын ыраазычылыгын каалайм» деп айтуу жетишсиз. Чыныгы каалоо адамды аракетке түртөт. Бейишти каалаган адам таухид илимин үйрөнөт, намазына көңүл бурат. Аллахтын ыраазычылыгын каалаган адам күнөөдөн сактанат. Акыретти каалаган адам убактысын текке кетирбөөгө аракет кылат, илим үйрөнөт, жакшы амалдарды көбөйтөт, адамдарга жакшылык кылат жана тообону үзбөйт. Анткени чын жүрөктөн каалаган нерсең үчүн аракет кылмайынча, каалооңдун чындыгы көрүнбөйт. Кээде адам дүйнөлүк максаттары үчүн таң атпай туруп аракет кылат: акча табат, үй курат, соода кылат, билим алат, келечегин камсыз кылат. Бирок намазга келгенде жалкоолонуп, Куран окууга убакыт таппай, зикирди кийинкиге калтырат. Ошондо өзүбүздөн сурашыбыз керек: Мен эмнеге көбүрөөк убакыт бөлүп жатам? Эмне үчүн көбүрөөк тынчсызданып жатам? Кайсы нерсеге жетүү үчүн көбүрөөк аракет кылып жатам? Анткени адамдын чыныгы максаты анын сөзүнөн гана эмес, күнүмдүк аракетинен да көрүнөт. Акыретке даярдануу сөзсүз чоң иштерден башталбайт. Таухид илимин үйрөнүү. Беш убак намазды өз убагында окуу. Ата-энеге жакшылык кылуу. Жубайына жакшы мамиле кылуу. Балдарына туура тарбия берүү. Гыйбаттан тилин сактоо. Харамдан көзүн буруу. Күнөө кылса, дароо тообо кылуу. Куран окуу. Пайдалуу илим үйрөнүү. Жашыруун садака берүү. Ар бир күн — Акыретке даярдануу үчүн берилген мүмкүнчүлүк. Усман ибн Аффан (радиаллаху анху) мындай деген: «Чындыгында, Аллах силерге бул дүйнөнү Акыретти издөө үчүн берди. Аны силерге бул дүйнөгө байланып, ага ыктап калууңар үчүн берген эмес». 📚 Аль-Бидая ван-Нихая, 7/241. Бул дүйнө — максат эмес, каражат. Байлык — Аллахка жакындаууга каражат. Ден соолук — ибадат кылууга мүмкүнчүлүк. Убакыт — сооп топтоого берилген аманат. Имам Ахмад (рахимахуллах): «Дүйнө — амал кылуучу жай, ал эми Акырет — сыйлык ала турган жай. Ким бул жерде амал кылбаса, ал жерде өкүнөт». 📚 Аз-Зухд, Байхакы, №282. Ойлонуп көр… Биз дүйнө үчүн канча аракет кылабыз? Ал эми Акырет үчүн канча аракет кылып жатабыз? Дүйнөдө топтогон нерселерибиздин баары бир күнү артта калат. Биз менен мүрзөгө байлыгыбыз да, үйүбүз да, аброюбуз да кирбейт. Биз менен амалдарыбыз гана калат. Ошондуктан бүгүнкү мүмкүнчүлүктү текке кетирбейли. Таухид илимин үйрөнөлү. Намазыбызды оңдойлу. Куранга кайрылалы. Тообо кылалы. Садака берели. Бирөөнү кечирели. Жакшылык кылалы. Анткени бүгүн — амал кылуучу күн, эртең — эсеп күнү. Дүйнө менен жашайлы, бирок дүйнө үчүн жашабайлы. Аллах бизди Акыретти чын жүрөктөн каалап, ага жетүү үчүн аракет кылган жана амалдары кабыл болгон пенделеринен кылсын. ➖➖➖➖➖➖➖➖ ✍ Нематулла Кадайев ▶️ YouTube: 👉https://youtu.be/6ZepES2xVGc?si=HmZWwRrYjScMNTMF

👉https://youtu.be/6ZepES2xVGc?si=HmZWwRrYjScMNTMF

МЭЭРИМДҮҮЛҮК — ҮЙДӨГҮ ЭҢ ЧОҢ БАЙЛЫК Үй-бүлөдө дайыма эле баары сен каалагандай боло бербейт. Кээде күйөө чарчайт. Кээде аялдын көңүлү чөгөт. Кээде бири ката кетирет. Кээде бир сөз жүрөккө оор тиет. Дал ушундай учурда сүйүүдөн да маанилүү нерсе — мээримдүүлүк. Буга далил Аллах Таала: «Силер жубайыңар менен тынчтык таап, көңүлүңөр жай алышы үчүн өзүңөрдөн жубайларды жаратканы жана ортоңорго сүйүү менен мээримдүүлүктү орноткону — Анын (Аллахтын) белгилеринен. Чындыгында, мында ой жүгүрткөн адамдар үчүн чоң сабактар бар». Куран , Рум: 21. Нике — жөн гана бир үйдө жашоо эмес. Жубайыңдын жанында жүрөгүңдүн тынчтык табышы — Аллахтын чоң нематы. Сүйүү — жубайыңды жакшы көрүү. Ал эми мээрим — ал кыйналганда түшүнүү, чарчаганда жардам берүү, ката кетиргенде кечирүү жана оор учурда жанында болуу. АЯЛ КҮЙӨӨСҮНӨ, ЭРКЕК АЯЛЫНА МЭЭРИМДҮҮ, БООРКЕР БОЛСУН! Бул тууралуу пайгамбарыбызﷺ: «Силердин эң жакшыларыңар — аялдарына эң жакшы мамиле кылгандарыңар». Дагы: «Ыймандуу эркек ыймандуу аялын жек көрбөсүн. Эгер анын бир мүнөзү жакпаса, башка бир мүнөзүнө ыраазы болот». (Муслим, 1469) Ошондуктан жубайыңдын бир кемчилиги анын бардык жакшылыгын жок кылбасын. ЫРАЙЫМ — АЛСЫЗДЫК ЭМЕС Бул тууралуу Аллах Таала: «Алар ачууларын тыйып, адамдарды кечиришет. Аллах жакшылык кылуучуларды сүйөт». Куран, Али Имран: 134. Үй-бүлөдө ар бир талашты жеңүү шарт эмес. Кээде унчукпай калуу — жеңиш. Кээде кечирүү — жеңиш. Кээде бир оор сөздү айтпай коюу — үй-бүлөнү сактап калуу. Бул тууралуу пайгамбарыбызﷺ: «Ырайым кылбаган адамга ырайым кылынбайт». (Бухари, Муслим) Ошондуктан жубайыңа кылган ырайымыңды кичинекей нерсе деп көрбө. Жакшы сөз айт. Кечир. Жардам бер. Сабыр кыл. Кадырын сакта. Бул тууралуу Аллах Таала: «Алар силер үчүн кийим, силер да алар үчүн кийимсиңер». Куран, Бакара: 187. Кийим адамдын кемчилигин жаап турат. Жубайлар да бири-биринин кемчилигин жаап, сырын сактап, аброюн коргошу керек. Ошондуктан өзүңдөн сура: «МЕН БҮГҮН ЖУБАЙЫМА ЫРАЙЫМ КЫЛДЫМБЫ?» Балким, сен күткөн өзгөрүү биринчи болуп сенден башталышы керек. Аллах үй-бүлөлөрүбүзгө сүйүү, ырайым, сабыр жана береке берсин. Жубайларды бири-бирине бул дүйнөдө да, акыретте да жакшылыкта жолдош кылсын. ➖➖➖➖➖➖➖➖ ✍ Нематулла Кадайев ▶️ YouTube: 👉https://youtu.be/6ZepES2xVGc?si=HmZWwRrYjScMNTMF

👉https://youtu.be/6ZepES2xVGc?si=HmZWwRrYjScMNTMF

ДҮЙНӨГӨ АЛДАНЫП КАЛБА! Аллах Таала «Аль-Хадид» сүрөсүнүн 20-аятында: «Билгиле! Чындыгында, бул дүйнө жашоосу — оюн-зоок, алаксытуу, кооздук, араңардагы мактануу жана мал-мүлк менен бала-чаканы көбөйтүү гана…» деп эскертет. Бул аят адамдын дүйнөгө болгон мамилесин өзгөртө турган улуу эскертүү. Адам бул дүйнөгө келгенде көп нерсеге умтулат: жакшы үй, кымбат кийим, байлык, атак-даңк, жакшы унаа, көп мал-мүлк, бала-чака… Алардын баары өзүнчө тыюу салынган нерселер эмес. Бирок көйгөй — адам ошол нерселерди жүрөгүнүн максаты кылып алганда башталат. Дүйнө адамга убактылуу берилген. Аллах Таала дүйнөнү жамгырга салыштырат. Жамгыр жаап, жер көгөрөт. Өсүмдүктөр өсүп, адамга суктанарлык кооз көрүнөт. Бирок бир аз убакыт өткөндөн кийин ал өсүмдүк куурайт, саргаят жана акырында майдаланып жок болот. Адамдын дүйнөдөгү жашоосу да ушундай. Бала кез — өтөт. Жаштык — өтөт. Ден соолук — өзгөрөт. Байлык — калбайт. Сулуулук — өчөт. Атак-даңк — унутулат. Жада калса адамдын өзү да бул дүйнөдөн кетет. Бүгүн биз ээлик кылып жаткан нерселердин баары бир күнү биздин колубуздан чыгат. Кээде адам бүт өмүрүн дүйнө үчүн коротот. Байлык топтойт, үй курат, мал көбөйтөт, элге көрүнүүгө аракет кылат. Бирок өлүм келгенде анын жаны менен кошо эч бир үй, эч бир унаа, эч бир байлык кетпейт. Адам менен кошо бара турган нерсе — ыйманы жана амалдары. Ошондуктан акылдуу адам дүйнөнү таштап койбойт, бирок дүйнөнү жүрөгүнө киргизбейт. Колунда дүйнө болот, бирок жүрөгүндө акырет болот. Аллах Таала аяттын акырында: «Дүйнө жашоосу — алдамчы ырахаттан башка эч нерсе эмес» деп айтат. Эмне үчүн «алдамчы» деп айтылды? Анткени дүйнө адамга: «Мына ушул нерсеге жетсең, бактылуу болосуң» — деп көрсөтөт. Адам бир нерсеге жетет — кайра башкасын каалайт. Бир үй алат — чоңураагын каалайт. Бир унаа алат — жакшыраагын каалайт. Байлык көбөйөт — дагы көбөйткүсү келет. Ошентип адамдын өмүрү каалоолордун артынан өтүп кетет. Бирок жүрөккө чыныгы тынчтыкты дүйнө эмес, Аллахка болгон ыйман жана акыретке даярдык берет. Аяттын эң таасирдүү жери — Аллах дүйнөнүн убактылуулугун эскерткенден кийин акыретти эске салат: «Акыретте катуу азап жана Аллахтын кечирими менен ыраазылыгы бар.» Демек, адамдын алдында эки жол турат: катуу азап же Аллахтын кечирими жана ыраазылыгы. Бул тандоо азыр биздин колубузда. Эгер бүгүн өлүм бизге келсе, биз эмнени даярдадык? Канча байлык топтогонубуз эмес, канча сооп топтогонубуз маанилүү. Канчалык элге көрүнгөнүбүз эмес, Аллахтын алдында кандай болгонубуз маанилүү. Канчалык дүйнө курганыбыз эмес, акыретибизди кандай курганыбыз маанилүү. Ошондуктан дүйнөдө жашап жатып акыретти унутпайлы. Үй-бүлөбүзгө кам көрөлү, адал эмгек кылалы, мал-мүлк табалы. Бирок жүрөгүбүздүн эң чоң максаты — Аллахтын ыраазылыгы болсун. Анткени дүйнө — канча узак көрүнбөсүн, бир күнү бүтөт. Ал эми акырет — бүтпөйт. Бүгүн биз дүйнөдө конокпуз. Эртең кайтып кетебиз. Ошондуктан өзүбүзгө көп суроо берели: «Мен дүйнө үчүн жашап жатамбы же акырет үчүн даярданып жатамбы?» Дүйнө бизди алдап кетпесин. Өтүп кетүүчү нерсе үчүн түбөлүктүү жашоону курман кылбайлы. Аллах Таала бизди дүйнөнүн убактылуу кооздугуна алданып калуудан сактап, акыретте Өзүнүн кечиримине жана ыраазылыгына жеткен пенделеринен кылсын. ➖➖➖➖➖➖➖➖ ✍ Нематулла Кадайев ▶️ YouTube: 👉https://youtu.be/6ZepES2xVGc?si=HmZWwRrYjScMNTMF

👉https://youtu.be/6ZepES2xVGc?si=HmZWwRrYjScMNTMF

АЯЛ ЗАТЫНЫН ЧЫН БАКТЫСЫ — АЛЛАХКА ЖАКЫНДЫГЫНДА Бисмиллахир-Рахманир-Рахим. Урматтуу мусулман эже-карындаштар! Бул дүйнөдө аял затынын сулуулугу, байлыгы же адамдардын мактоосу түбөлүктүү эмес. Жылдар өтөт, жүз өзгөрөт, дүйнөлүк нерселер артта калат. Бирок Аллах үчүн жасалган амалдар гана түбөлүк калат. Аялдын эң чоң кооздугу — анын ыйманы, уяты жана жакшы мүнөзү. Кийимдин кооздугу эмес, жүрөктүн тазалыгы адамды көркөм кылат. Аллах Таала аялды ардактуу кылып жаратты жана ага үй-бүлөнүн берекесин сактоо, муун тарбиялоо сыяктуу чоң жоопкерчиликти берди. Кээ бир аялдар өз бактысын адамдардын көңүлүнөн, байлыктан же дүйнөнүн убактылуу ырахаттарынан издешет. Бирок чыныгы тынчтык — Аллахты эстөөдө. Буга далил Аллах Таала айтат: «Билип койгула! Жүрөктөр Аллахты эскерүү менен гана тынчтык табат.» (Раад сүрөсү, 28-аят) Урматтуу эже-карындаш! Сенин көз жашыңды да, жашыруун кайгыңды да, сабырыңды да Аллах билет. Адамдар түшүнбөгөн нерсени Аллах билет. Ошондуктан кыйынчылык келгенде үмүтүңдү үзбө. Сабыр кылган пенделерди Аллах жакшы көрөт. Эгер сен эне болсоң — балаңдын жүрөгүнө ыйман себүү сенин чоң сообуң. Эгер сен жубай болсоң — үй-бүлөңө жакшылык кылууң ибадат. Эгер сен жалгыз болсоң — Аллах сени эч качан жалгыз калтырбайт. Өзүңдү дүйнөнүн өлчөмү менен эмес, Аллахтын алдында болгон даражаң менен баала. Бүгүнкү күн — тообо кылууга, жакшы амал баштоого берилген мүмкүнчүлүк. Оо, мусулман эже-карындаш! Намазыңды сакта. Жүрөгүңдү көрө албастыктан, тилиңди жамандыктан сакта. Уятыңды жана ар-намысыңды корго. Анткени сенин эң чоң байлыгың — Аллахтын ыраазычылыгы. Бул дүйнөдө жакшы аял болууга аракет кыл, анткени жакшы аял — үйдүн берекеси, балдардын тарбиячысы жана коомдун пайдубалы. Аллах Таала бардык мусулман аялдарды ыймандуу, сабырдуу жана Бейиш ээлеринен кылсын. ➖➖➖➖➖➖➖➖ ✍ Нематулла Кадайев ▶️ YouTube: 👉https://youtu.be/6ZepES2xVGc?si=HmZWwRrYjScMNTMF

👉https://youtu.be/6ZepES2xVGc?si=HmZWwRrYjScMNTMF

ТИЛИҢДИ ГЫЙБАТТАН ЖАНА ЖАЛААДАН САКТА! Бисмиллахир-Рахманир-Рахим. Адамдын эң чоң сыноолорунун бири — тилин сактоо. Анткени тил аркылуу адам көп сооп табышы мүмкүн, ошондой эле көп күнөөгө да батышы мүмкүн. Ислам дини мусулмандын аброюн сактап, анын артынан жаман сөз айтпоого чоң көңүл бурулат. Буга далил Аллах Таала мынтип айткан: «Бири-бириңерди аңдыбагыла жана бири-бириңерди артыңардан жамандабагыла. Силердин бирөөңөр өлгөн бир тууганынын этин жегенди каалайт белеңер? Албетте, муну жек көрөт элеңер. Аллахтан корккула. Чындыгында, Аллах — тооболорду кабыл кылуучу, Ырайымдуу.» («Хужурат» сүрөсү, 12-аят) Хасан Басрий (рахимахуллах) гыйбаттын үч түрү бар экенин айткан: 1️⃣ Гыйбат (ушак). 2️⃣ Ифк (жалган жалаа). 3️⃣ Бухтан (жалаа жабуу). 1. Гыйбат — бир тууганыңда бар болгон кемчиликти анын артынан айтуу. Мисалы: адамдын мүнөзүндөгү, көрүнүшүндөгү же башка кемчилигин ал укпаган жерде айтуусу. 2. Ифк — бирөө жөнүндө уккан нерсени тактабай туруп айтып таратуу. Адам өзү билбеген нерсени: «мен уккам» деп башкаларга жеткирсе, бул жалган сөзгө жана күнөөгө себеп болушу мүмкүн. 3. Бухтан (жалаа) — адамда жок нерсени ага таңуулап айтуу. Бул эң оор күнөөлөрдүн бири. Анткени адамдын аброюна шек келтирип, адилетсиздик кылат. Бул тууралуу Пайгамбарыбыз ﷺ айткан: «Ким Аллахка жана Акырет күнүнө ыйман келтирсе, жакшы сөз сүйлөсүн же унчукпасын.» (Сахих аль-Бухари, Сахих Муслим) Мусулман адам ар бир сөзүнө жооп берерин унутпашы керек. Кээде бир эле айтылган сөз бирөөнүн жүрөгүн оорутуп, адамдардын ортосунда душмандыкты пайда кылат. Ошондуктан сүйлөөрдөн мурун өзүбүздөн сурайлы: «Бул сөзүм Аллахка жагымдуубу? Бул сөздө бирөөгө зыян барбы? Эгер бул сөздү мен жөнүндө айтышса, мага жагат беле?» Эгер жооп терс болсо — анда унчукпай коюу жакшы. Аллах Таала бизге тилибизди сактоону, бир туугандарыбыздын аброюн коргоону жана жакшы сөздөрдү гана сүйлөөнү насип кылсын. Амин. ➖➖➖➖➖➖➖➖ ✍ Нематулла Кадайев ▶️ YouTube: 👉https://youtu.be/6ZepES2xVGc?si=HmZWwRrYjScMNTMF

👉https://youtu.be/6ZepES2xVGc?si=HmZWwRrYjScMNTMF

ТУУЛГАН КҮНДҮ МАЙРАМДООДОН САКТАН! Бисмиллахир-Рахманир-Рахим. Урматтуу мусулман бир тууган! Аллах Таала бизди бул дүйнөгө бекер жараткан эмес. Бизге өмүр берди, акыл берди жана туура жолду көрсөтүү үчүн пайгамбарларды жиберди. Ошол туура жолдун эң акыркысы жана толугу — Пайгамбарыбыз Мухаммад ﷺ алып келген Ислам дини. Аллах Таала айтат: ﴿الْيَوْمَ أَكْمَلْتُ لَكُمْ دِينَكُمْ﴾ «Бүгүн силер үчүн диниңерди толук кылдым жана силерге берген нээматымды толуктадым.» (Маида сүрөсү, 3-аят) Эгер дин толук болсо, анда мусулман адам динге жаңы майрамдарды жана жаңы жолдорду кошууга муктаж эмес. Туулган күндү майрамдоо — Исламдан келген амал эмес Бүгүнкү күндө көп адамдар туулган күндү кадимки эле салт катары көрүшөт. Бирок мусулман адам ар бир ишинде: «Бул иш Пайгамбарыбыз ﷺ жана сахабалардан келгенби?» — деп карашы керек. Пайгамбарыбыз 23 жыл бою үммөтүнө динди үйрөттү. Бирок ал ﷺ өзүнүн туулган күнүн белгилеген эмес. Анын эң жакын сахабалары — Абу Бакр, Умар, Усман, Али (радиаллаху анхум) жана алардан кийинки улуу муундар (салафтар) да мындай ишти кылышкан эмес. Эгер туулган күндү белгилөө Аллахка жакындатуучу жакшы амал болгондо, алар бизден мурда аны кылышмак. Анткени алар Аллахты эң көп тааныган жана Пайгамбарыбыздын ﷺ жолун эң жакшы карманган адамдар эле. Бидаттан сактануу — динди сактоо болот Пайгамбарыбыз ﷺ айткан: «Ким биздин бул ишибизге (динибизге) андан болбогон нерсени киргизсе, ал кайтарылат.» (Бухари, Муслим) Дагы бир хадисте: «Чындыгында, силерден ким көп жашаса, көптөгөн айырмачылыктарды көрөт. Ошондо менин сүннөтүмдү жана туура жолдогу халифаларымдын сүннөтүн кармангыла. Аны азуу тиштериңер менен тиштеген сыяктуу бекем кармагыла. Жаңы киргизилген иштерден сактангыла. Анткени ар бир бидат — адашуу.» (Абу Дауд, Тирмизи) Бидаттын коркунучу — адам аны жакшы иш деп ойлойт. Бирок Аллахтын алдында кабыл боло турган амал — Пайгамбарыбыз ﷺ көрсөткөн жолго ылайык болгон амал. Чыныгы сүйүү — сүннөттү карманууда Пайгамбарыбызды ﷺ сүйгөн адам анын туулган күнүн белгилөө менен эмес, анын буйруктарын аткаруу, сүннөтүн кармануу жана тыюуларынан сактануу менен сүйүүсүн көрсөтөт. Аллах Таала: ﴿قُلْ إِن كُنتُمْ تُحِبُّونَ اللَّهَ فَاتَّبِعُونِي يُحْبِبْكُمُ اللَّهُ﴾ «Айткын: Эгер Аллахты сүйсөңөр, анда мени ээрчигиле. Ошондо Аллах силерди сүйөт.» (Аали Имран сүрөсү, 31-аят) Эй мусулман бир тууган! Өмүрүбүздүн ар бир күнүн Аллахтын ыраазычылыгы үчүн өткөрөлү. Сүннөткө жабышалы, бидаттардан сактаналы. Анткени кутулуу — Пайгамбарыбыздын ﷺ жолунда. Аллах Таала бизди акыйкатты таанып, аны ээрчиген жана адашуулардан сактанган пенделеринен кылсын. ➖➖➖➖➖➖➖➖ ✍ Нематулла Кадайев ▶️ YouTube: 👉https://youtu.be/6ZepES2xVGc?si=HmZWwRrYjScMNTMF

▶️ YouTube: 👉https://youtu.be/6ZepES2xVGc?si=HmZWwRrYjScMNTMF

⚖️ АДИЛЕТСИЗДИК ЭМНЕ ҮЧҮН КӨБӨЙДҮ? 👉https://youtu.be/6ZepES2xVGc?si=HmZWwRrYjScMNTMF Бүгүнкү күндө адамдар: «Коом эмне үчүн бузулуп бара жатат? Эмне үчүн адилетсиздик, алдамчылык, ажырашуулар, зомбулук жана ишенимсиздик көбөйдү?» – деген суроолорду көп беришет. Ар ким өз жообун айтат. Бирок Ислам бизге булардын түпкү себебин так көрсөтүп берет: бул ыймандын алсырашы жана Аллахтан болгон коркуунун азайышы. Бул тууралуу Аллах Таала мындай дейт: «Кургакта да, деңизде да бузукулук адамдардын өз колдору менен кылган иштеринин айынан пайда болду. Аллах аларды кылган иштеринин айрымдарынын азабын таттыруу үчүн, балким алар кайра кайтышар». (Рум: 41-аят) Бул аят ар бирибизге сабак. Коом өзүнөн өзү бузулбайт. Коомду адамдар түзөт. Адам оңолсо – коом оңолот. Адам бузулса – коом да бузулат. Бүгүн көпчүлүк адамдар дүйнөлүк пайда үчүн акыретти унутуп калышты. Чындыкты жашыруу, жалган сүйлөө, аманатка кыянаттык кылуу, пара алуу, зынага жол ачуу, ата-энени капа кылуу кадимки көрүнүшкө айланып баратат. Мындай абалдын негизги себеби – жүрөктөгү такыбанын азайышы. Пайгамбарыбыз ﷺ мындай деген: «Денеде бир кесим эт бар. Эгер ал оңолсо, бүт дене оңолот. Эгер ал бузулса, бүт дене бузулат. Ал – жүрөк.» (Бухари жана Муслим) Жүрөк Аллахты эстөө менен тирилет. Намаз, Куран окуу, зикир жана тообо жүрөктү тазалайт. Ал эми күнөөлөр жүрөктү карайтат. Карарган жүрөк акыйкатты кабыл албай калат. Дагы бир чоң көйгөй – эки жүздүүлүк. Айрымдар сыртынан жакшы көрүнгөнү менен, ичиндеги ниети башка болот. Пайгамбарыбыз ﷺ мындай деген: «Мунафыктын белгиси үчөө: сүйлөсө – жалган сүйлөйт, убада берсе – аткарбайт, аманат берилсе – кыянаттык кылат.» (Бухари жана Муслим) Бул сыпаттар бир адамда көбөйгөн сайын коомдогу ишеним жоголот. Ишеним жок жерде биримдик болбойт, биримдик жок жерде береке болбойт. Аллах Таала дагы мындай дейт: «Чындыгында, Аллах бир коомдун абалын алар өздөрүн өзгөртмөйүнчө өзгөртпөйт.» (Раъд: 11-аят) Демек, өзгөрүү өзүбүздөн башталат. Ар бирибиз таухидке бекем болсок, беш убак намазыбызды бекем кармасак, адал менен арамды айырмаласак, үй-бүлөбүзгө жакшы тарбия берсек, чынчыл жана адилет болсок – коом акырындап оңолот. Урматтуу мусулман бир тууган! Коомду оңдоонун эң күчтүү жолу – өзүңдөн баштоо. Өзүңдү өзгөрт, үй-бүлөңдү өзгөрт, анан айланаңа жакшы үлгү бол. Анткени эң жакшы даават – бул жакшы сөздөн мурда жакшы амал. Аллах Таала баарыбызды туура жолдон айырбасын, жүрөгүбүздү ыйман менен бекемдесин, коомубузга тынчтык, ынтымак жана береке насип кылсын. ➖➖➖➖➖➖➖➖ ✍ Нематулла Кадайев ▶️ YouTube: 👉https://youtu.be/6ZepES2xVGc?si=HmZWwRrYjScMNTMF

▶️ YouTube: 👉https://youtu.be/6ZepES2xVGc?si=HmZWwRrYjScMNTMF

https://youtu.be/6ZepES2xVGc?si=HmZWwRrYjScMNTMF «ТӨРТ ЭРЕЖЕ» ТУУРАЛУУ 9-САБАК Бул ширкти таанып, таухидди туура түшүнүүгө жана аны жүрөктө бекемдөөгө жардам берген маанилүү сабак. Ар бир мусулман үчүн эң маанилүү илим – Аллахты туура таануу жана Ага эч нерсени шерик кылбай ибадат кылуу. Ушул себептен пайгамбарлардын баары өз коомун эң биринчи таухидге чакырып, ширктен сактанууну эскертишкен. Бул тууралуу Аллах Таала мындай деп айткан: «Биз ар бир үммөткө: “Аллахка гана ибадат кылгыла жана тагуттан алыс болгула”, – деген элчи жибердик.» (Нахл: 36-аят). «Төрт эреже» китеби ушул улуу чакырыкты жөнөкөй, так жана далилдер менен түшүндүрөт. Ошондой эле ширктин айла-амалдарын таанытып, таухидди бекем кармоого жана пайгамбарлардын жолун туура түшүнүүгө жардам берет. 📚 Бул сабакты көңүл коюп угуп, үйрөнүп жана жакындарыңыз менен бөлүшүүгө аракет кылыңыз. Балким, Аллах ушул илим аркылуу жүрөктөрдү туура жолго салат. ➖➖➖➖➖➖➖➖ ✍ Нематулла Кадайев ▶️ YouTube: 👉https://youtu.be/6ZepES2xVGc?si=HmZWwRrYjScMNTMF

https://youtu.be/6ZepES2xVGc?si=HmZWwRrYjScMNTMF

🌿 ТИЛИҢДИ ЗИКИР МЕНЕН АЛЕК КЫЛ Имам Ибн аль-Каййим (рахимахуллах) мынтип айткан: «Адамдын тили — Аллахты эстеп, зикир кылуучу тил болот, же болбосо пайдасыз бош сөздөрдү сүйлөөчү тил болот. Бул экөөнүн бирөөсү сөзсүз болот. Анткени, эгер напсиңди акыйкат менен алек кылбасаң, анда ал сени жалган, пайдасыз жана зыяндуу нерселер менен алек кылат». 📚 «Аль-Уабил ас-Саййиб» ⸻ 🌱 Ой жүгүрт: Адамдын напсиси бош турганды жактырбайт. Эгер аны жакшы иштер, зикир жана пайдалуу нерселер менен тарбиялабасаң — ал өзүңдү пайдасыз жана зыяндуу иштерге тартып кетет. ⸻ ЗИКИР ҮЧҮН ЭМНЕ ТОСКООЛ БОЛОТ? «Сени Аллахты зикир кылуудан эмне тосуп жатат? Сен отуруп эле: سُبْحَانَ اللهِ Субхааналлах — Аллах бардык айып-кемчиликтерден аруу жана таза зат. الْحَمْدُ لِلَّهِ Альхамдулиллах — бардык мактоо Аллахка таандык. لَا إِلٰهَ إِلَّا اللهُ Лаа илааха иллаллах — Аллахтан башка сыйынууга татыктуу эч ким жок. اللهُ أَكْبَرُ Аллаху акбар — Аллах баарынан Улуу. деп айтууга эмне тоскоол болуп жатат? Сен менен бул зикирлердин ортосунда эч кандай тоскоолдук жок! Бул үчүн ордуңдан туруунун да кереги жок, даарат алуунун да зарылдыгы жок. Эч кандай өзгөчө даярдык талап кылынбайт. Бул — эң жеңил жана эң улуу ибадаттардын бири!» ⸻ 📌 Эсиңде болсун: Тил бош калса — аны жалган, пайдасыз нерселер ээлейт. Тил зикир менен алек болсо — жүрөк тирилет. ➖➖➖➖➖➖➖➖ ✍ Нематулла Кадайев 📲 Telegram: 👉 https://t.me/islambulagy 📸 Instagram: 👉 https://instagram.com/islambulagy ▶️ YouTube: 👉 https://youtube.com/channel/UCtuOzuA3x1mDPhdhD3HKMHA 📘 Facebook: 👉 https://www.facebook.com/groups/1009528672915026

САБЫР ЖАНА НАМАЗ – МОМУНДУН КҮЧҮ Аллах Таала Куранда: «Эй, ыйман келтиргендер! Сабыр жана намаз менен кубаттангыла! Албетте, Аллах сабырдуулар менен бирге» деп буюрат (Бакара, 153). Бул аят момун адамга жашоодогу бардык сыноолордо эки улуу тирекке таянууну үйрөтөт: сабыр жана намаз. Сабыр — кыйынчылыкта нааразы болбой, Аллахтын өкүмүнө ыраазы болуу. Намаз болсо — пенденин Раббиси менен түз байланышы, жүрөктүн тынчтыгы жана руханий күч булагы. Дүйнөлүк же диний иштерде тоскоолдукка учураганда, адам жалгыз эмес. Сабыр кылып, намазга бекем болсо, Аллахтын жардамы жакын болот. Анткени Аллах Таала сабырдуулар менен бирге экенин убада кылган. —•—•—•—•— 🔎 «САБЫР» тууралуу толук сабакты «Ислам Булагы» YouTube каналынан уга аласыз. 📌 Каналга катталууну унутпаңыз! ▶️ YouTube: https://youtu.be/6t-1eRjuoIc?si=FQ2iRdym7IFr_601 ➖➖➖➖➖➖➖➖ ✍ Нематулла Кадайев Telegram 👉https://t.me/islambulagy

АШУРА ОРОЗОСУН КАНТИП КАРМОО КЕРЕК? Мухаррам айынын онунчу күнү — Ашура күнү. Бул күндүн орозосу чоң соопко ээ. Аллахтын Элчиси ﷺ Ашура күнү орозо кармоого үндөп, анын артыкчылыгы тууралуу мындай деген: «Ашура күнүнүн орозосу өткөн бир жылдын күнөөлөрүнө каффарат болот деп Аллахтан үмүт кылам». (Муслим) Яхудийлер да Мухаррам айынын онунчу күнү орозо кармашкан. Абдуллах ибн Аббас (Аллах андан ыраазы болсун) айтат: «Аллахтын Элчиси ﷺ Мадина шаарына келгенде, яхудийлердин Мухаррам айынын онунчу күнү болгон Ашура күнү орозо кармап жатканын көрдү. Анан алардан: — Бул кандай күн? — деп сурады. Алар: — Бул улуу күн. Бул күнү Аллах Муса пайгамбарды жана анын коомун Фиръаундан куткарып, Фиръаунду жана анын коомун сууга чөктүргөн. Ошондуктан Муса пайгамбар Аллахка шүгүр кылып орозо кармаган, — дешти. Ошондо Аллахтын Элчиси ﷺ: — Биз Мусага силерден да жакыныраакпыз, — деп айтты да, өзү орозо кармады жана мусулмандарга да ушул күнү орозо кармоону буйруду». 📚 Бухари (2004), Муслим (1130) Мына ушул себептен мусулмандар Ашура күнү орозо кармашат. Бул күн — Аллах Тааланын Муса пайгамбарга жана анын элине берген улуу жеңишин жана куткаруусун эскерген күн. Ошондуктан Аллахтын Элчиси ﷺ мусулмандардын алардан айырмаланышы үчүн онунчу күнгө дагы бир күн кошуп орозо кармоону каалаган. Ибн Аббас (Аллах андан ыраазы болсун) айткан: «Аллахтын Элчиси ﷺ айтты: “Эгер кийинки жылга чейин жашасам, сөзсүз тогузунчу күндү да орозо кармайм”». (Муслим) Ошондуктан аалымдар Ашура орозосун төмөнкү даражалар боюнча кармоону айтышкан: ⸻ 1. Эң жакшы жана эң толук түрү Мухаррам айынын 9, 10 жана 11-күндөрүн орозо кармоо. Бул эң артыкчылыктуу түр болуп саналат. Анткени: • Ашура орозосунун сообуна жетет; • Яхудийлерден айырмалануу ишке ашат; • Ай сайын үч күн орозо кармоонун сообуна да ээ болот. ⸻ 2. Экинчи даражасы 9 жана 10-күндөрдү орозо кармоо. Бул Аллахтын Элчисинин ﷺ сөзүнө жана ниетине ылайык келгендиктен эң жакшы жана эң этияттуу түрү болуп эсептелет. ⸻ 3. Үчүнчү даражасы Мухаррам айынын 10 жана 11-күндөрүн орозо кармоо. Бул дагы яхудийлерден айырмалануу максатын ишке ашырат. Айрыкча, 9-күнү орозо кармай албай калган адам үчүн жакшы мүмкүнчүлүк болуп саналат. ⸻ 4. Төртүнчү даража Мухаррам айынын 10-күнүн гана орозо кармоо. Бул дагы уруксат берилген жана Ашура орозосу болуп эсептелет. Бирок жакшыраагы — ага 9-күндү же 11-күндү кошуп орозо кармоо. Анткени бул Пайгамбарыбыздын ﷺ көрсөтмөсүнө көбүрөөк ылайык келет жана яхудийлерден айырмаланууну камсыз кылат. ➖➖➖➖➖➖➖➖ ✍ Нематулла Кадайев