الشاعر حسام الناشي(الميرزا)

اعله أبو الزهره اويلاه ////////////////////////////////// الكون اعلن حداده على هيبة الساده عميد الساده طايح والحزن حضر نگابه عليه كلشي بگه اينوح يحته القلم والوح العرش والبلعرش كلهه تون تبجي المصابه اويلي مات مسموم وعلى امته مهضوم يعرف اهل السقيفه اعله إبن عمه اشد حرابه /////////////////////////////// ينوحون المصابه هله وزين الصحابه الملائك بلعزاه كضت لبوالزهره الزجيه لبو الزهره الزجيه نصبنه احنه العزيه السماء السبعه حزنانه على خير البريه نعزي داحي الباب على عضيم الامصاب عليه نلطم وسوينه عله امصابه عزيه /////////////////////////////// عله الشيعه مصيبه رسول والله وحبيبه تلوع بلسم القاتل اويلي ياهضيمه يضل العزه دائم لمايضهر القائم الرسول الله أو ذريته عزاء دائم نقيمه أبد ماتنشف العين تصب الجد الحسين نشد حيل اعله حيل احنه مصيبتنه عضيمه ///////////////////////////// يضل الكلب مجروح تضل ارواحنه اتنوح لحد يوم الحشر يبقه لبو القاسم لطمنه أبد مايبرد الحيل لطم من جيل إلى جيل حراره بلكلب تلهب ولايبرد عزمنه رزيتنه جبيره على شيخ العشيره لطمنه امگابل ابفاتحته شدينه حزمنه ///////////////////////////// الميرزا حسام الناشي

ثكيل/// تراثي ///////////////////////////// اه يبن امي ياضامي شسولف عليسر يحسين_ وشنهي الصار بحوالي شفت امن اليسر لوعات_ أبد ماجانت ابالي ركبت الهزله خويه حسين_ اوشمر يتمضحك اكبالي افا فرجه اصبحت للناس_ وانه الماطلع اخيالي ////////////////////////// شسولفلك يفص العين_اختك وين خلوها بخرابه مهدمه وموخوش_ واعداكم يحرسوها اومن بعد الخرابه احسين_ للديوان ودوها طبت والزلم صوبين__ كلهه اتصيح شوفوها /////////////////////////// كلهه اتصيح اخت عباس _هذي طبت الديوان جبناهه اسيره اهنا_ واخوتهه عله التربان وانه بس نسه وياي_ واه ياهضمة النسوان كلهه امدنكه يحسين _اويتمضحك افا مروان ///////////////////////////// مواقف بليسر يحسين _منهه اتشيب الرضع يضربون الطفل بسوط_ لوصوت الطفل يطلع سوط يورم الجفين_ اوسوط اعله المتن يطبع اوشتايم خويه غادي اشكال _من اهل الرجس نسمع /////////////////////////////// خويه حسين موقف صار_ بدو ضعني يوكفونه اوجابو جربه من الماي_ وعمدا بيه يراوونه والتهد الكلب والحيل_ يم راسك يبدونه بدوه كطره كطره الماي_ اوكالو ماتشربونه /////////////////////////// الميرزا حسام الناشي

ثكيل يااباعبدلله __ نعمه الخدمه يامولاي لاتحرمنه هلخدمه بچينه عله اخيامك وزود للگلب لچمه المايخدملك ابعاشور مايستاهل النعمه المايخدملك مابيه كل غيره يمكبرنه اوخدمتنه ازغيره __ عذرآ ياچبير الشان عذرا يابعد روحي يلمنطيني كل الخير شويه اعليكم اجروحي انه امقصر اهواي اوياك اوياك امقصر ابنوحي امقصره اهواي اوياك اعيوني ماابجي اله الناس ايبجوني __ خلني بصايتك يحسين ولو حاشاك تطردني بس خاف الزمان ايدور واتيهك لاتتيتهني اخاف حزامي يرخه اعليك بديك الحلوه حزمني يمخليني اتسميني الناس خادم لحسين اوللعباس __ اجيك ابكلبي المتعوب واخلص بلعطش دربي تعب بس ياحلاته اعليك اشحلاته اعليك ياتعبي غريب الوادم يكولون غريب اوعايش ابكلبي يمطيبنه ومتروس اجراح كون الحبك لا مايرتاح __ احبك ياحزن كلبي وانه المايحمل الفرگه من يبطي العزه اعليه تكتلني اوعلي الحرگه يماخذ عقلي وافكاري مثلك مايصح والگه وين الكه المثلك يامولاي انه الموزين اونت اوياي __ يمسلوب اوتغطيني اوعايش من فضل خيرك ازغير اوكبرتني اهواي وماترضه امشي يم غيرك ياسر ياعشك يحسين يدرك شنهي تفسيرك ياسر الله المحد حلاك بلدنيه اوبلموت أنه اوياك __ الميرزا حسام الناشي

هلا ابزرت هاشم /////////////////////////// يبن حسين يالاكبر يازعيم الحومه اليلاگيك هد حيله اليوم الاكبر يومه يلمشيم احسينه اوواضحات اعلومه والاتگرب صوبك تنزل من القاده .......................................... يصمصامهه الديره يلمخوف القاده يشبل الماثنو يلمشيم الساده يلموكر علطف يلمثبت اوتاده عنيد اومن تكثر هم يزود اعناده ؟........................................... جدح عرج الغيره وبيده كض الرايه وابن احسين ماثنه وثبتاهه الثايه والجيوش لوحاشهه تمشي كلهه ابرايه ابن احيودهه البيده وبلحراب اسياده ///////////////////////////////// لزم بيده الباشط كفو بزرت هاشم واليصير اكباله لهله مارد سالم ايصول ويكر بيهه واعتلاها الغانم يعيد كرت حيدر من يسطر امجاده /////////////////////////////////// هلا ابزرت هاشم والتخوف اعيونه يشد حيله ابحيله اويلكد الميمونه الزلم من يكبلهم كلهم ايخافونه هلا ابزرت هاشم شمرته من اجداده ////////////////////////////////// الميرزا حسام الناشي

Channel photo updated

نزلت يوتيوب👆 ملا مهدي العايدي /الشاعر حسام الناشي

https://youtu.be/Akg5476jFIc?si=_o_1_aQG3Bo0SMw2

نزال مجلس// لزم بيده الباشط اوطبالهه ضاع صيت الخيل من خيالهه ========================== لزم بيده الباشط اوكض الوه اختبصت اوصارت عياي ابنينوه الزلمه بيهم بيهم گوه يشتم الهوه زلم ضل تسال زلم هذا واقع لوحلم زلمه بلطك مايهم الخيل والفوگاها شل احواله ======================= طب عليهه المايخاف أمن العرك ابن المخلص العرب من الشرك والقويه اگلوبهم رغما ترك غير ابوفاضل نزل فحل وامخلفه فحل جبل شيهز الجبل اشما ادور أمن العكس دارالهه ======================= كض لجام الشكره ابن حامي الحمه خنست وماضل بعد بيهه ازلمه راخيه الچانت گبل متحزمه راخيه ازلام الحرب لازم اعليهه الدرب ماكو طلعه ولاتطب تهيت وين الزلم مشرادهه =================== كام يكتل جمله مايهوه السره زلمه حيد اويشتري الطك مشتره اشمااتقدم كلهه ردت للوره ضيع اعليهه المفر ضهر يتلاگه ابضهر الحذر من عده الحذر گلوب للمامش زلم خلالهه ================== عليسار اوعليمين ايذب زلم الخيل والخياله تترادم ردم اشمااتزود ايزود وياهه العزم الميه يطبگهم طبگ شي ابسيف وشي سحك والركض هم ينلحك الزلم ملك الموت طب حسبالهه ========================= الميرزا حسام الناشي

شور گعده// كتله خويه اشلونك ومارد عليه گتله احبك گام يتحرك خطيه كتله زينب  شهك بس شهگت منيه ماخذه ابن امي الحوافر حيله موش كله وزينب اتچيله موش كله حسين ماهوو وين ادور ه اشويه منه اوياها اسولف وذره وذره ༺༺༻༻༺༺༻༻ هوه ميت وانه اكله شلونه حالك الموت مايخذني ياخويه بدالك انه موت وانت تتمشى العيالك ادري ميت كلبي شنهي ايقنعه ابعيني شفت ابضهره داير ضلعه ابعيني شفته الحافر ايدوس أعله صدره صدره دار وشفته مطبوك أعله ضهره ༺༺༻༻༺༺༻༻ هوه مذبوح اواكله اتباوعلنه انه وانت احسين خل نرجع لهلنه كلهم ايكرهونه ومحد يحبنه خل المك وصله وصله ياتعبنه عوفك راسك وانه ادليك بدربنه گوم خويه وخل اتچي وانت امشي ياتعب زينب يسهري اوشيب رمشي ༺༺༻༻༺༺༻༻ رغم ماميت ابنحره ايگلي زينب كبل ساعه الخيل فوگ اضلوعي تلعب اشما ردت ارتاح تصعد فوگي واتعب زينب ايتعبج احسين اوگومي ردي يابكاية صحبتي وياشوف ولدي گومي ردي احسين ميت مايفيدج ايسي راح احسين منج صفگي بيدج ༺༺༻༻༺༺༻༻ كتله اگعد  حضرو نوگ الهزيله حسين تدري إبركبت الناكه ثجيله عاد كوم اوياي بس عديلي ليله گوم ليه فدوه خويه كوم ليه گبل لاصير الغريبه والسبيه موت باچر موش وكتك يابن امي ياونستي او ايتعبي اوثگل همي ༺༺༻༻༺༺༻༻ الميرزا حسام الناشي

تراثي//             اه يحسين ياخويه شسولفلك يخويه وريحت الخوه دوهني الوكت يحسين ياسلوه من بلوه اكوم اوعثر ابلوه وتعبني الطريج اوحيل تعبانه تعبني السبي وشيحمله ممشانه مرات إنه أحاجي الروح موش إنه موخوش الضعن موخوش ممشانه من سوگ اولسوگ انطب بلولايه اه يحسين ياخويه ༺༺༻༻༺༺༻༻ ياخويه اوطريج الشام تعبنه بلف يحسين گوه اليوم اعبرنه موزين الحچي موزين اسمعنه كلهه أصيح زينب هاي شوفوها كلهه اصيح زينب هاي طلعوهه فروها اعله سوگ الشام فروهه ابدرب البيه شماته اهناك وگفوها وكل الشام صيح هاي مسبيه اه يحسين ياخويه ༺༺༻༻༺༺༻༻ خلوه ابطريح الماتريده ام عون وكلهم گابلوني اوگامو ايضحكون هاي ابلاعشيره اسمعهم ايگولون ترضاها يخويه تحسين ترضاهه حادينه وگف ويحشم الوادم تعالو اتفرجو أعله امخدرة هاشم جبناها وخوها احسين  ضل نايم هاي الخارجيه اومحد اوياهه اه يحسين ياخويه ༺༺༻༻༺༺༻༻ شسولفلك بعد عن طبت الديوان ديوان الخوارج موش للنسوان كلهم موش اهلنه موبني عدنان احشمن لونهم عالو اعليه الوذ من النضر عن لايشوفوني اوذيچ اخت البلايه اچفان صاحوني من دون النسه يحسين شتموني عگب ذاك الخدر بس اصفج أيديه ༺༺༻༻༺༺༻༻ اجيتك والهوم امثگله اچتافي صار اهواي  جفن اختك ولاغافي متعافي اليسر وياي متعافى اجيتك بلسياط امورمه امتوني اجيت من السياط امتون ماعدي وتدري السوط مايرهم للبگدي ومن گد البواچي حفرت خدي گوه احچيهه بس ياخويه چتفوني اه يحسين ياخويه ༺༺༻༻༺༺༻༻ الميرزا_حسام_الناشي

بدر الهواشم ...بدر الهواشم طلع من اخيامه طلع حيد هاشم يريد يحد سيفه ابرگبهم عازم ولازلمه يکبله كفيل الحره اليبين جدامه ولارد سالم من اتعله ولاخله زلم للحومه تطلع شهر سيفه واخذ حيفه يكل للسيف تشبع _______ يديرلهه اعيونه وزلمهم تركع أويگل البتاره لحد ماتشبع تحد روحك كون برگبهم ذوله ولوهمه اشويه وعدد مايقنع تگص بيهه تخليهه دماهه يعبر الطف من اولهه لإخرهه رگب علرگب تصطف ,_______ البطل من ايطگهه الحسين ايگله حلو طگ ايمينك بعد كون احله يجرار اعگال اليصير اگباله فحل تهوى العز وكرهت الذله يبن حيدر اسد يزئر ولاواحد يگدره يذب ميه على ميه ثگيل وحار سطره ,_______ الفرات اومادنك شرب من مايه خذه الماي لخيامه وترف الرايه ترس روحه من الشط تبده الزينب وتكله المحروسه يبو الوفايه هلا الساكي روه ارياكي هلا بلشهم كلش ببو ضعوني يخيعوني جثث علكاع يفرش ................................................. حمل من ايمينه ويساره الاكبر التوه الطف ابكبره الموذن حذر اجو بزرت حيدر الموت اوياهم اعله اعداهم يوم الغزو يوم اكشر زلم شرسه عله الفرسه تفيض الكاع بلدم الرفع روحه خسر روحه تكطع لواتخذم .......................................... ......؟ من الاول للاخر خلسهه النشمي والحسين ايكله كفو يبن امي كفو بلو بهضب يدخن راسه من اشوفنه ايعارك يزود عزمي يدور ايده عله البيده الزلم ختلات تشرد يكر جيمه عله الجيمه لمن عباس يفرد ... ........................................... الميرزا حسام الناشي ْ

علي الأكبر وابوفاضل بيهه اوگالو اليوم الزلم نوليهه ///////////////////////////////////////// شدو اعله الميمنه اوفاض العزم مالت الحومه اوبعد ماتنلزم وال اميه اتصيح ماكو الهم زلم وي خلفت هاشم اشيگضيهه ///////////////////////////////////////// ايد بيد اوشدو الضهر ابضهر ابن المخوف الزلم وي الگمر وال اميه بعد ماالهم مفر الحومه مسدود اول اوتاليهه ///////////////////////////////////////// گامو السطره يسطروهه سوه وكام تطاير رگب وي الهوه اختنگت وغصت من الدم نينوه والچثت صارت ترس واديهه ///////////////////////////////////////// شافو الروس اعتلت وي السمه صاحو ادخيلك يراعي الملحمه هلعساكر يم نعلكم خادمه لچن من الموت هذا اعفيهه ///////////////////////////////////////// سددو كل الدروب اعله الجمع خنست اوصوت الهواشم ينسمع وين اليگابلنه وايبين السبع هاي ساعته الزلم نفنيهه ///////////////////////////////////////// حملو الحمله بسم ياحيدره حيدريه اوبيهه سوو مجزره كربله اختلفت أوصارت مگبره والاجساد الدفن مايكضيهه ///////////////////////////////////////// الميرزا حسام الناشي

طك عرج هاشم وطب رياله ابكربله واجيوش شل احواله ༺༺༻༻༺༺༻ طب ابن حيدر التخافه الزلم كضهه راس ابراس ضل يردم لايخاف وبلمعسكر مايهم تبچي كامت خيلهه اوخيالهه ༺༺༻༻༺༺༻ زلم تبجي اوضيع اعليهه المفر والقياده وجيش آلاف انكسر هذا ابو فاضل حذر منه الحذر اتريد حل اودوم ماتلگالهه ༺༺༻༻༺༺༻ الحذر منه وهذا حيد المايرد خيل والخياله يمردهه مرد لاحصاهم عدد لاكفه الجرد اكبور يم المشرعه سوالهه ༺༺༻༻༺༺༻ سطراهه وگام يسطرهه سوه والمعسكر من الأطراف التوه اختنگت  اوگامت ادور علهوه وزينب اتصيح كفو الكفالهه ༺༺༻༻༺༺༻ القاده والشجعان والحل اوحرس الخير البيهم سمع بسمه اوخنس الخيل والفوگاها من عده اختلس ماتعرف الحرم من ارجالهه ༺༺༻༻༺༺༻ ✍️الميرزا حسام الناشي

محرم/// اليوم مسلم صول ابكوفانهه اومايلحك علدفن دفانهه نزل بيده السيف اليحب النزال ابن هاشم حيد ويهز الرجال مسلم المعروف مايخسر قتال رعش الكوفه شبل عدنانهه ༺༺༻༻༺༺༻༻ صاح يحسين ونهض شد الحزام وراسه دخن مثل دخان الخيام اطير من يچهب رگبهه ابن الهمام بانت الكوفه حذر عربانهه ༺༺༻༻༺༺༻༻ اختنگت الكوفه وثغيب ابكل درب اوشكو قائد صاح ماريد الحرب لايطب اعلينه مسلم لايطب استسلمت وامشرعه ذرعانهه ༺༺༻༻༺༺༻ كام يكتل جمله ويطر الدروع وصاحت ادخيلك يمسلم هلجموع القاده والفرسان من سيفه تلوع والصگر هدم وكر غربانهه ༺༺༻༻༺༺༻༻ ها يحيد المايرد اولايهاب مسلم المايهتم الكل الصعاب والأوامر منه ويصدر العقاب صدره ولبست شيل فرسانهه ༺༺༻༻༺༺༻༻ صاح ياحيدر علي حامي الحمه اوباچ من كثر الذبايح صارمه ومثل سيل العرم سيال الدمه اويصوت اليثغبون طك بعنانهه ༺༺༻༻༺༺༻༻ الشاعر حسام الناشي ✍️

///////ثگيل///// بويه علي الله اوياك يابو احسين ولو موحلوه هلفرگه الله اوياك من تنگال يطلع گلبي بلشهگه بعدني ازغيره وي الأخ وبعدني اشتاگ للشبگه انتهت واتوادعيت اوياك..وبعد مايحصل الملگه الله اوياك وهاي اخر مره .ياثاني الچمه البعد الزهره ༺༺༻༻༺༺༻༻ رايح من يعين حسين لوضل يكسر الخاطر اتگلب بيه حوافر خيل ويتوزع وذر باچر باچر ينگل بلخيل وكل لحمه ابطن حافر حسين اهنانه غاد احسين احسين ابكل كتر صاير احسين أهنانه وغاد احسين اكثر اشماامشي الگالي احسين امطشر ༺༺༻༻༺༺༻༻ باچر ياعلي نحتار  ببنك ياهو الليلمه باچر فوگ صدره اتصير زلمه ايدرفع ابزلمه باچر بس اثر علگاع نلگه من ابو اليمه ولامش غيره لوفزاع للمتگطع انحشمه اتعب لوگالو باچر نرجع . .انرد انگطع احسين المتگطع ༺༺༻༻༺༺༻༻ فوگ الببنك ايذبحون فوگ الهوه موهوه اعله زينب باچر ايصيحون تطلع هسه بلگوه وغصب من اركب اعله النوك وسوط اعليه يتلوه واليحدي الضعن موخوش .مابيه غيره وامروه الماشايفهه أحد طلعت گوه والموزلمه اعليهه ايضل يگوه ༺༺༻༻༺༺༻༻ ولو ماتنحچي وتنگال  اتبين باچر الحره ابزينب باچر ايطرون سوك الشام الاشكبره ابسوك اليكره اه يحسين اووين الدافع الزهره شماته والضحك صوبين...التغث بلمسمع اطره فرحانين ايصفگون اگبالي ايهوسون ابراس احسين الغالي ༺༺༻༻༺༺༻༻ الميرزا حسام الناشي

نزال /استعراض اليوم كل شيعة علي محزونه الكاضم اعله الموت دار اعيونه ༺༺༻༻༺༺༻༻ اليوم يوم الاخ واهموم اوحزن اليوم شيعة حيدره كلهه تون عله الذي خلص حياته بلسجن ضلمأ ابلاسبب ويسمونه ༺༺༻༻༺༺༻༻ اليوم طلعت كلهه شيعة حيدره اتواسي مولانه الرضا ع الي جره امگبعه بهمومهه وامكدره فزعو الواليهم ايشيعونه ༺༺༻༻༺༺༻༻ اليوم حزنانه السمه وأهل الأرض چن خيول ألطف اجت بيهه ترض ومن صلاة الواجبه طايح فرض وحزن بيهه الدرة المكنونه ༺༺༻༻༺༺༻༻ علگت راياته وعم السواد اونشرت اعله الدور حي اعله الحداد تودع المسموم عطاي المراد ع الجسر واليهم ايودعونه ༺༺༻༻༺༺༻༻ بن سويد اليوم حشم شيعته ابن جعفر ضال وحده ابغربته اتحاشموله وخل نشيل اجنازته افا الكاضم غربه اليشيلونه ༺༺༻༻༺༺༻༻ الميرزا حسام الناشي ،

اشتركو بقناته مصور جديد ويخبل ... يصور جلسات ومجالس حسينيه ومناسبات ومن طرفي❤

مصور فوتوغرافي 📷😏 https://t.me/rt_11t

تراثي//             اه يحسين ياخويه شسولفلك يخويه وريحت الخوه دوهني الوكت يحسين ياسلوه من بلوه اكوم اوعثر ابلوه وتعبني الطريج اوحيل تعبانه تعبني السبي وشيحمله ممشانه مرات إنه أحاجي الروح موش إنه موخوش الضعن موخوش ممشانه من سوگ اولسوگ انطب بلولايه اه يحسين ياخويه ༺༺༻༻༺༺༻༻ ياخويه اوطريج الشام تعبنه بلف يحسين گوه اليوم اعبرنه موزين الحچي موزين اسمعنه كلهه أصيح زينب هاي شوفوها كلهه اصيح زينب هاي طلعوهه فروها اعله سوگ الشام فروهه ابدرب البيه شماته اهناك وگفوها وكل الشام صيح هاي مسبيه اه يحسين ياخويه ༺༺༻༻༺༺༻༻ خلوه ابطريح الماتريده ام عون وكلهم گابلوني اوگامو ايضحكون هاي ابلاعشيره اسمعهم ايگولون ترضاها يخويه تحسين ترضاهه حادينه وگف ويحشم الوادم تعالو اتفرجو أعله امخدرة هاشم جبناها وخوها احسين  ضل نايم هاي الخارجيه اومحد اوياهه اه يحسين ياخويه ༺༺༻༻༺༺༻༻ شسولفلك بعد عن طبت الديوان ديوان الخوارج موش للنسوان كلهم موش اهلنه موبني عدنان احشمن لونهم عالو اعليه الوذ من النضر عن لايشوفوني اوذيچ اخت البلايه اچفان صاحوني من دون النسه يحسين شتموني عگب ذاك الخدر بس اصفج أيديه ༺༺༻༻༺༺༻༻ اجيتك والهوم امثگله اچتافي صار اهواي  جفن اختك ولاغافي متعافي اليسر وياي متعافى اجيتك بلسياط امورمه امتوني اجيت من السياط امتون ماعدي وتدري السوط مايرهم للبگدي ومن گد البواچي حفرت خدي گوه احچيهه بس ياخويه چتفوني اه يحسين ياخويه ༺༺༻༻༺༺༻༻ الميرزا_حسام_الناشي