አጫጭር ግጥሞችና መጣጥፎች 📚

ደረጃ አንድ፦ ሀቺኮ (Hachiko) — የሰው ልጅን የፍቅር እና የታማኝነት ድንበር የሻገረው ዘለዓለማዊ ተአምር (ጃፓን / 1923–1935) በሺ ዘጠኝ መቶ ሀያ ሶስት የፈረንጆች ዓመት በጃፓን አኪታ ግዛት በረዶማ እርሻ ውስጥ የተወለደውና ሀቺኮ የተባለው የነጭ አኪታ ዝርያ ውሻ፣ በዓለማችን ታሪክ ውስጥ ትልቁን እና እጅግ ልብ የሚነካውን የታማኝነት ታሪክ ይፅፋል ብሎ ያሰበ አልነበረም። በሺ ዘጠኝ መቶ ሀያ አራት የቶኪዮ ዩኒቨርሲቲ ፕሮፌሰር የነበሩት ሂደሳቡሮ ኡኤኖ ይህንን ትንሽ አኪታ ወደ ቤታቸው አምጥተው በፍቅር ማሳደግ ጀመሩ። በሰውየውና በውሻው መካከል የተፈጠረው ጥልቅ መንፈሳዊ ቁራኝነት፣ የተራ እንስሳና የባለቤት ግንኙነት ሳይሆን የሁለት ነፍሳት ጥልቅ ፍቅር ነበረ። በየቀኑ ጠዋት ፕሮፌሰሩ ወደ ሥራ ለመሄድ ከቤታቸው ሲወጡ፣ ሀቺኮ አብሯቸው እስከ ሺቡያ የባቡር ጣቢያ ድረስ ይሸኛቸዋል። ከሰዓት በኋላ ደግሞ ፕሮፌሰሩ ከሥራ የሚመለሱበት የባቡር ሰዓት ሲደርስ፣ ሀቺኮ በራሱ አእምሮ ሰዓቱን አክብሮ ወደ ጣቢያው በመሄድ በደስታ እየዘለለ ይቀበላቸዋል። ይህ በየቀኑ የሚደጋገም ውብ የተፈጥሮና የፍቅር ህግ ሆኖ በሺቡያ ጣቢያ መንገደኞች ዘንድ እጅግ የተለመደ ውብ እይታ ሆነ። ነገር ግን በሺ ዘጠኝ መቶ ሀያ አምስት የሜይ ወር ላይ ያልተጠበቀ አሰቃቂ አደጋ ተከሰተ። ፕሮፌሰር ኡኤኖ በዩኒቨርሲቲው ውስጥ ንግግር እያደረጉ ሳለ በድንገት በጭንቅላት ደም መፍሰስ ምክንያት ህይወታቸው አለፈ። በዚያች ምሽት በጣቢያው በር ላይ ቆሞ ባለቤቱን ሲጠብቅ የነበረው ሀቺኮ፣ የሚወደው ጌታው ዳግመኛ በዚያ የባቡር በር በኩል ወጥቶ እንደማይመጣ አላወቀም ነበር። ባለቤታቸው ካረፉ በኋላ የፕሮፌሰሩ ቤተሰቦች ሀቺኮን ወደ ሌሎች የተለያዩ ቦታዎች ወስደው ለማሳደግ ቢሞክሩም፣ ሀቺኮ ግን ያንን የፍቅር ሰንሰለት መበጠስ አልፈለገም። በየቀኑ አመሻሽ ላይ ከማንኛውም ቦታ አምልጦ በመሮጥ፣ ፕሮፌሰሩ ይወጡበት ወደነበረው የሺቡያ ባቡር ጣቢያ ደጃፍ እየሄደ በዓይኖቹ ሰዎቹን ማተኮር ጀመረ። ቀናት ወደ ሳምንታት፣ ሳምንታት ወደ ወራት፣ ወራት ደግሞ ወደ ረጅም ዓመታት ተለወጡ። ሀቺኮ በየቀኑ ልክ ባቡሩ በሚደርስበት ሰዓት ላይ በሺቡያ ጣቢያ በር ላይ ተቀምጦ የጌታውን መምጣት በፀጥታ ይጠብቅ ነበር። የበጋው የሚያቃጥል ፀሐይ፣ የክረምቱ አጥንት ሰብሪ ቅዝቃዜና የሚያወርደው የበረዶ ማዕበል አንዳችም ከቆመበት ቦታ ሊያንቀሳቅሰው አልቻለም። የጣቢያው ሰራተኞች እና መንገደኞች መጀመሪያ ላይ ውሻውን ያባርሩትና ይገፉት የነበረ ቢሆንም፣ ከጊዜ በኋላ ግን ይህ ባለ አራት እግር ፍጡር በየቀኑ በተመሳሳይ ሰዓት ለምን እንደመጣ ሲረዱ ልባቸው በጥልቅ ሀዘንና አድናቆት ተነካ። ወዳጆቹና በጣቢያው ዙሪያ ያሉ ነጋዴዎች ምግብና ውኃ ያቀረቡለት ጀመር፤ እርሱ ግን ከምግቡ ይልቅ ዓይኖቹ የሚያተርፉት የባቡሩን በር ነበር። በሺ ዘጠኝ መቶ ሰላሳ ሁለት የአሳሂ ሺምቡን ጋዜጣ የሀቺኮን ታሪክ በግንባር ገጹ ላይ ይዞ ሲወጣ፣ የሀቺኮ ታማኝነት መላውን የጃፓን ህዝብ አሳበደው። የትምህርት ቤት መምህራን እና ወላጆች ለልጆቻቸው ስለ ፍቅር፣ ስለ ታማኝነትና ስለ ፅናት ሲያስተምሩ የሀቺኮን ታሪክ እንደ ታላቅ ምሳሌ መጠቀም ጀመሩ። ሀቺኮ የጃፓን ብሔራዊ የታማኝነት አርማ እና የፍቅር ምልክት ሆነ። ሀቺኮ ያለ አንዳች ተስፋ መቁረጥ ለተከታታይ ዘጠኝ ዓመታት ከዘጠኝ ወር በሺቡያ ጣቢያ በር ላይ ቆሞ የሞተውን ጌታውን ጠበቀ። አካሉ በውጭ አየርና በእድሜ ብዛት እየደከመ፣ ፀጉሩ እየረገፈና ዓይኖቹ እየፈዘዙ ቢሄዱም፣ በልቡ ውስጥ የነበረው የፍቅር እሳት ግን እስከ መጨረሻዋ ህቅታ ድረስ አላረበበም ነበር። በሺ ዘጠኝ መቶ ሠላሳ አምስት የመጋቢት ወር ላይ፣ ይህ ታላቅ ባለ አራት እግር አቅኚ በሺቡያ ጎዳና ላይ በሰላም አረፈ። ሀቺኮ ህይወቱ ሲያልፍ መላው የጃፓን ህዝብ የታላቅ ሀዘን እንባ አፈሰሰ። አካሉ ከሞተ በኋላ በቶኪዮ የአኦያማ መቃብር ውስጥ ከሚወደው አባቱ እና ጌታው ከፕሮፌሰር ኡኤኖ ጎን በክብር እንዲያርፍ ተደረገ። ዛሬ በቶኪዮ ሺቡያ ባቡር ጣቢያ በር ላይ፣ ሀቺኮ በነሐስ ተቀርፆ በክብር ቆሞ ይገኛል። ያ ቦታ በዓለማችን ላይ እጅግ ታዋቂው የመገናኛና የፍቅር ቀጠሮ ቦታ ሆኖ የሚያገለግል ሲሆን፣ በየዓመቱ በሚሊዮኖች የሚቆጠሩ የዓለም ህዝቦች ወደዚያ በመመጣት የዚህን ፍጡር ታሪክ እያሰቡ እንባቸውን ያፈሳሉ። በመታሰቢያው ሀውልት ስር የተቀረፀው ቃል የሀቺኮን ታሪክ እንዲህ ሲል ያበስራል፦ *"ሀቺኮ — የሰው ልጅ አእምሮ ሊደርስበት የማይችለው የታማኝነት፣ የፍቅር እና የፅናት ዘለዓለማዊ ተአምር!"* ሀቺኮ በሰው ልጅ የታሪክ ድርሳናት ውስጥ ሞትን፣ ጊዜንና ተፈጥሮን በፍቅር ድል ያደረገ፣ የሰውን ልጅ አእምሮ ያስደመመ፣ በታሪክ መዝገብ ላይ በደረጃ አንድ ላይ የተቀመጠው የዓለማችን ቁጥር አንድ ታማኝና ታላቅ ውሻ ነው! Share @snetsehuf

◉ በፍቅር ስም እና Behind Her Eyes ➊ አውሊያ የጠገነው 'ታለ' የ"በፍቅር ስም" ዋና ገፀ ባህሪ ታለ በ 7 እህቶች የተከበበ ነው። አንጓቼና ቢዘን እሱን ለማግኘት ሲሉ ነው ሰባት ሴቶችን የቀፈቀፉት። ታለ ተለፍቶበታል። እንዲያ ሆኖ ግን ሲወለድ ታማሚ ይሆናል። ዝግግግ ያለ...የማይናገር የማይናገር ሆነ። ነገሮችን ያለ ሰው እርዳታ የማይከውን። ይህን ግዜ እናቱ አንጓቼ 'ኦፋ አቡኮ' የሚባል ጠንቋይ ዘንድ ሄዳ በድግምት የጎረቤታቸውን ልጅ እጣ ፈንታ ይሁን ነፍሱን አልያም የሆነ ነገሩን ወደ ልጇ ታለ እንዲዘዋወር ማድረጓን እንሰማለን። ቹቹ የተባለው ምስኪን ልጅ በጠንቋዩ ሐይል የታለን ክፉ መንፈስ የተሸከመ ዘገምተኛ ይሆናል። ብቻ የሆነ ነገራቸውን አለዋወጡት። ታለ  የሚጠይቃቸው ያልተመለሱለት ጥያቄዎች በርካታ ናቸው። ይህንን እናቱ ያደረገችውን ሚስጥር ከሰማ በኋላ ደግሞ እራሱን ሲጠራጠር እናገኘዋለን። "ቹቹ ነኝ አሁን ወይስ ቹቹ ነው እኔ?" እያለ። ምናቸው እንደተቀያየረም ግራ ይገባዋል። "ስጋዬ ነው ቹቹ ወይስ ነፍሴ" እስከሚል ድረስ። ◈ "ለሁለት ወር ያህል እኔ ቹቹን ሁኜ ነበር። ወይም ቹቹ እኔን ሆኖ ነበር።" ◈ "ሁለት ቹቹ ከየት መጣ? አንዱ ታለ ነው።" የሆነ ሰዓት ልውጥውጡ እክል ሲገጥመው እናያለን። ታለ የተገፈፈው ማንነቱ ተመልሶ ሲደረብለት እናገኛለን። - "ማነህ?" - "ቹቹ ነኝ" - "ማነህ ?" - "ቹቹ ነኝ" - "በእየሱስ ስም ውጣ!" - "ደሞ ከየት ልውጣ?" አለማየሁ በፈላስፋዎቹ ጃክሰኖች አማካኝነት የፍልስፍና አስተያየቶችን እያቀረበ ነገሮችን እንድንመረምር ያቀርባል። አንባቢ እንዲመረምርና የራሱን ሀሳብ እንዲይዝ ይለፋል። ለምሳሌ ከታሪኩ ቀጥተኛ ግንኙነት ስላለው የአውሊያ፣ የጥንቆላ ጉዳይ ምላሽ ለመስጠት ሲምክር እናያለን።" "Behind the iron curtain" የተሰኘ መፅሐፍ እየጠቀሰ ያነሳው ሀሳብ ተዓማኒነትን እንዲላበስ ሲጥር እንታዘባለን።  ◈  «በተለያየ ባህል የተለያየ ሥምና ቦታ ይሰጣቸዋል፡፡ በሰለጠኑት ዓለማት “ሳይኪ” ይሏቸዋል፡፡ ጊዜ፣ ቦታና ሁኔታ ሳይገድባቸው በተለያየ “ዲያሜንሽን" ያያሉ፡፡ በእኛ ባህል ደግሞ ባለአውሊያ፣ ጠንቋይ፣ ጠጠር ጣይ፣ ደብተራ… በሚል የመጥፎ መንፈሰ ተራዳኢነት እንዳላቸው ይደመደማል፡፡» ◈  «መጥፎ መንፈስ ከሌለባቸው ታዲያ ለምን ይካደማሉ? ለምን ይለማመናሉ? ማለቴ “ጌታዬ፣ ጌታዬ” ለምን ይባላሉ?» ◈  «ልዩ ተሰዕጠው የሚነቃቃው በተለያየ ልምድ ሊሆን ይችላል፡፡ ወካያሙንም፡ መለማመኑንም ያንን ልዩ ተሰዕጠ ለማነቃቃት የሚጠቀሙበት ዘዴ አድርጎ ማየት ይቻላል። አኛ እንኳን ጫት ስንቅምና ስንቅም ያለውን ልዩነት አዩት፡፡ አንዳንድ ችሎታ ያላቸው ሰዎች ለምሳሌ ደራሲዎች ከመፃፋቸው በፊት የሚያከናውኑት የተለያየ ልምድ አንዳላቸው አንብቤአለሁ፡፡ አንደዛ ነው፡፡” ◈  «ስለዚህ ሴጣን አድሮባቸው፣ ጋኔን ለክፏቸው የሚባለው እንዲሁ ነው?» ◈  "አንድን ነገር የምትጠቀሚበት አላማ ጥሩ እና መጥፎ የሚል ተቀጥላ ያሰጠዋል። [ገፅ 193] አለማየሁ የሰው ልጅ ስላለው ድብቅ ሀይል ሲያወራ፣ ሩሲያዎች ልዮ ተሰጥኦ ያላቸው ሰዎች ለመጠቀም በድብቅ ያደረጉትን ምርምር ሲጠቅስ ስናይ በታለ ላይ የሆነውን ነገር ለማወቅ መቋመጣችን አይቀርም። "ምን የሚባል ጥበብ እነ ታለ ላይ ተደረገ? እንዴት ተከወነ?" ምናልባት በዘርፉ የሚመራመር አካል ካለ ጉዳዩ ስምና አተገባበር ይኖረዋል።" ብዬ መጠዬቄ አልቀረም። በመፅሐፉ ላይ ግን ምላሽ አላገኘሁም።  ለአባብዬ ምን ይሳናቸዋል በሚል የሆነው በደፈናው ሆኗል። ቀሪውን እኛ እንድንመልሰው ይሆናል።  ለዚህ ጥያቄዬ መልስ የሚመስል ነገር ያገኘሁት behind her eyes የተሰኘውን Mini tv series ካየሁ በኋላ ነበር። ❷ Behind Her Eyes Behind Her Eyes  በ2021 በNetflix  የወጣና በብዙዎች ዘንድ መነጋገሪያ የሆነ በጣምም የወደድኩት Mini-series ነው። ሲሪየሱ Sarah Pinborough ተመሳሳይ ስም ባለው መጽሐፍ ላይ የተመሠረተ ነው። ​ይህ ሲሪየስ መጀመሪያ ዘውጉ Psychological Thriller ቢመስልም፣ ወደ መጨረሻው ግን  Supernatural/Sci-fi ዘውግ ይቀየራል። ይህን ሲሪየስ ትልቅ መነጋገሪያ ያደረገው መጨረሻው ነው። ጨርሶ የማይገመትና Mind-blowing የሆነ አስተላለቅ አለው። በታሪኩ ውስጥ "Astral Projection" (ነፍስን ከሥጋ ለይቶ የማንቀሳቀስ ጥበብ) ታሪኩን የሚቀይር ትልቅ መሣሪያ ነው። ​ግለሰቡ ጥልቅ እንቅልፍ ውስጥ ሆኖ አእምሮው ግን ነቅቶ እንዲቆይ በማድረግ (Lucid Dreaming)፣ ንቃተ-ህሊናው ከሰውነቱ ወጥቶ እንዲንሸራሸር ያደርጋል። በዚህም ​መቀያየር (Body Swapping) ሊፈጠር ይችላል ይላሉ። ሁለት የAstral Projection ችሎታ ያላቸው ሰዎች በአንድ ጊዜ ከሰውነታቸው ከወጡ፣ አንደኛው ወደ ሌላኛው ሰውነት በመግባት "መቀያየር" ይችላሉ። ይህ ነው እንግዲህ የሲሪየሱ ትልቁና አስፈሪው ምስጢር። ▭▭ Astral Projection የምር ይሰራል? ወይስ ለልቦለድ ፍጆታ የሚውል ሀሳብ ነው? ለሚለው ጥያቄ ስጠይቅ ምላሹ በሁለት መንገድ፤ ማለትም ሳይንሳዊው  እና በመንፈሳዊ (Esoteric) በሆነ መንገድ ማየት እንደሚያስፈልግ ተረድቻለሁ። ​ ​◈ ከ  Scientific View አንፃር ስንቃኘው ​ሳይንስ እስካሁን ድረስ "ነፍስ" ወይም "ንቃተ-ህሊና" ከሰውነት ወጥቶ በተጨባጭ ዓለም ውስጥ ሊንቀሳቀስ እንደሚችል የሚያሳይ የተረጋገጠ ማስረጃ የለውም።  በሲሪየሱ ላይ እንደታየው፣ ብዙ ሰዎች Lucid Dreaming ውስጥ ሆነው የፈለጉትን እያደረጉ እንደሆነ ያስባሉ። ይህ በአንጎል ውስጥ የሚፈጠር የህልም አይነት እንጂ ትክክለኛ ጉዞ አይደለም ይላል ሳይንስ። ◈ ​ከ Spiritual View አንፃር ስናዬው ደሞ ​በብዙ ጥንታዊ ባህሎች እና መንፈሳዊ ትምህርቶች ለምሳሌ በህንድ ዮጋ ወይም በአንዳንድ መንፈሳዊ ልምምዶችና ትምህርቶች Astral Projection  እውነት እንደሆነ ይታመናል። ሰዎች ከሥጋዊ አካላቸው ውጭ "የብርሃን" ወይም "የመንፈስ" አካል አላቸው ተብሎ ይታመናል። ሰዎች በተለያዩ የ Meditation ዘዴዎች ንቃተ-ህሊናቸውን ከሥጋቸው አውጥተው በተለያዩ ቦታዎች መዘዋወር እንደሚችሉ ይናገራሉ። ​እኔ ከሁለቱም ወገን የለሁበትም። ድምፀ ታዕቅቦ አደርጋለሁ። ሳይንስ ያልደረሰባቸው ብዙ ነገሮች እንዳሉ ሁሉ መንፈሳዊ ነገሮችም ለደረሰባቸውና ላልደረሰባቸው ሰው የተለያዩ መገለጦች አሉት ባይ ነኝ። ግን በፍቅር ስም እነ ታለ ላይ ያየሁት ነገር ሲሪየሱን ካየሁ በኋላ ስሜት ሰጥቶኛል። ይበልጥ ለማወቅ እንድጓጓና እንድቆፍር አድርጎኛል። እናንተስ ምን ሀሳብ አላችሁ? ፊልሙን ወይም ሲሪየሱን ያያችሁስ ምን ተሰማችሁ? @snetsehuf

ድህረ- ፌስታል (በእውቀቱ ስዩም) ስሙኝማ  አሁን ረፋዱ ላይ ሱቅ ሂጄ “ እንጀራ ‘ ለመግዛት ጠየቅሁ፤ ባለሱቁ ፥ ከእጁ ላይ ያለውን ዱቄትና አቧራ  አራግፎ ሲያበቃ  ከሞሰቡ አንድ  እንጀራ ነጥሎ  አንስቶ፥ “ምን ላይ ላርግልህ ?” አለኝ ፤ “ በፌስታል አድርግልኝ “ አልኩት፤ “ ፌስታል መከልከሉን አልሰማህም? ” “ሰምቻለሁ ፤ የምራቸውን አልመሰለኝም እንጂ “ "በል አሁን  ፖለቲካውን  ትተህ የሆነ መያዣ አምጣ” “ምን ላምጣ?” “ ከፌስታል ውጭ ይሁን እንጂ ባንቀልባም ብትይዘው አያገባኝም “   ተናድጄ ጥየው መውጣት ስጀምር በረጅሙ ተነፈሰና እንዲህ አለኝ ፤ “ ካልሆነ  ለምን እዚህ  በልተኸው አትሄድም ?” ወረድ ብየ ደግሞ  ወደ “ ፍሪምባ የ ፍራፍሬ መሸጫ መደብር “  ጎራ አልሁ፤ አንድ ብርቱካን እና  አንድ አቮካዶ ገዛሁና በለመደብሯ “ በኪስህ  ላርግልህ ስትለኝ “ አያስፈልገኝም “  አልሁና ፍራፍሬውን  እንደ ሰርከስ ተጫዎቾች ወደላይ እያጎንሁ እየቀለብሁ ሳሳያት አጨብጭባ  ተደንቃ መለስተኛ  ሀብሀብ ሸለመችኝ፤ ያን በእቅፌ ይዤ ወደ  ግቢያችን ስገባ አንድ ደስ እምትለኝ  ትልቅ መቆንጠጫ ያላት ሴትዮ ብላቴና  ልጅዋን ይዛ ስትወጣ መንገድ ላይ ተገናኘን፤ “ ብርቱካኑን ስጠኝ “ አለኝ ልጁ፤ አይ መንግስት ! እግዜር ይይልህ! እናቲቲ “ ተው ሰው አታስቸግር “ አለችው እየሳቀች ፤ “ እረ ምን ችግር አለ፤  ያዝ አልኩና “ ብርቱካኑን አቀበልኩት፤ ወድያው አእምሮየ ብዙ ነገር  አሰበ፤ በዚህ አጋጣሚ ከሴትዮይቱ ጋር ተዋውቀን፥ ልጁን አያቱ ቤት ልከነው አለማችንን ስንቀጭ በምናቤ  ታየኝ ፤ “ደረቴ ላይ ተኝታ የደረቴን ጭገር እየዳበሰች ፥ አይ አንተ ጉደኛ ፤ ሎሚ ትወረውራለህ ብየ ስጠብቅ ፥ ወደ ልጄ ብርቱካን ወርውረህ  በእጅህ አስገባኸኝ አይደል “ ስትለኝ አስመለከተኝ ፤ ከሰመመኔ  የመለሰኝ የልጁ  ደም- አፍይ ደምጽ ነው፤ “እሱንም ስጠኝ “ አለኝ ወደ ሀብሀቡ እየጠቆመ፤ “ ይሄ ለልጅ አይሆንም ማርኮን “ አልሁት ፤ ስሙን  በግምት እንጂ አላውቀውም፤ ግን የዛሬ ልጆችን ስም ስገምት ካስር ዘጠኙ ግምቴ  ይይዝልኛል ፤ እናቲቱ ትገስጸዋለች ብየ ሳስብ “ግዴለም ስጠው ለአባቱ ይሆናል “ አትለኝም! እርርርር ድብን አልሁ !  እናትና ልጅ ቫላንታይን ቀኔን የሰማእታት ቀን አደረጉብኝ ! ሀብ ሀቡን እንቅርጫት ኩዋስ አቀበልኩትና መራመድ ጀመርኩ፤ በጄ ላይ የቀረችውን አቮካዶየን  አይተው “  እሱን ቦንብ የያዝከው ያፍሪካን መሪዎች ልትፈጅበት ነው? “ ብለው አንድ ነገር እንዳያረጉኝ እየሰጋሁ ጥግ ጥጉን  ተራመድሁ፤

አንድ ተቃዋሚ ፓርቲ ነው አሉ ዛሬ ለምርጫ ቦርድ "የምርጫ ምልክቴ ማጭድ ነው" ምርጫ ቦርድ፣ "ማብራሪያ ያስፈልገዋል" ፓርቲው፣ "ያው ስንዴ ለማጨድ ነዋ፣ ሌላ ምን እናጭዳለን" ምርጫ ቦርድ፣ "አይቻልም" ፓርቲው፣ "ለምን?" ምርጫ ቦርድ፣ "ለምን ገብስ ወይ ሳር አታጭዱም?"

https://t.me/Yosi716/s/7

ፕሮፌሰሩ ክፍል ውስጥ የተሰበሰቡትን ተማሪዎች እንዲህ ብሎ ይጠይቃል "86,400 ብር አላችሁ እንበል፤ አንድ ሰው ይመጣና 10ብር ይዞባቹ ይሮጣል፤ እና ለዛች 10ብር ብላቹ 86,390ብሩን ትታቹ ሰውየውን ተከትላቹ ትሮጣላቹ ወይስ የቀረውን 86,390ብር ይዛቹ መንገዳችሁን ትቀጥላላቹ?" ‎ ‎ተማሪዎቹም ቀላል ጥያቄ ይሆንባቸውና "የቀረውን ብር ይዘን እንቀጥላለን እንጂ!" ብለው መለሱ። ‎ ‎ፕሮፌሰሩም እንዲህ አላቸው "ይሄውላቹ በቀን ውስጥ 86,400 ሰከንዶች አላችሁ። እናም አንድ ሰው በ10 ሰከንድ ውስጥ ለተናገራቹ ነገር ቀኑን ሙሉ ስትበሳጩ፣ ስታዝኑ፣ ስትናደዱ የምትውሉ ከሆነ 86,390 ሰከንዶቹንም ታጣላቹ። ‎ ‎ሰው አሉታዊ ነገር የሚናገራቹ ከራሱ አንፃር ነው። እናም መንገዳችሁን ቀጥሉና የቀሩትን 86,390 ሰከንዶችን አትርፉ!" ‎

ለፈገግታ አንዲት የባንኩ ከፍተኛ አስቀማጭ የሆነች ደንበኛ በየቀኑ እየመጣች ቅርንጫፉ ላይ ብዙ ብር ገቢ ታደርግ ነበር። ከእለታት አንድ ቀን የቅርንጫፉ ስራ አስኪያጅ ደንበኛዋን በደምብ ለማወቅ ሲል እንድህ በሎ ጠየቃት "አንቺ የቅርንጫፋችን ትልቅ ደንበኛ ነሽ። ምን አይነት ስራ ዘርፍ ላይ ነው የተሰማራሺው?" ሲላት: እሷም "እኔ እንኳ ድርጅትም ሆነ ፋብሪካ የለኝም። ስራዬ ቁማር መጫወት ነው፤ ስጫወት ደግሞ አንድም ሰው ቁማር አይበላኝም። ሁሌ ነው የማሸንፈው" ስትለው ስራ አስኪያጁ ተገርሞ "በጭራሽ ማንም አሸንፎሽ አያቅም ማለት ነው?" አላት። እሷም "አዎ ማንም አሸንፎኝ አያውቅም። ከፈለግክ ሞክረኝ አታሸንፈኝም። እንደውም ነገ ምን አይነት ፓንት ለብሰህ እንደምትመጣ አውቃለሁ። 50ሺ ብር እናሲዝ?" ስትል በፍፁም አታውቀውም በሚል ሙሉ ልብ ተወራረዱና እያንዳንዳቸው 50ሺ ብር አስይዘው ተለያዩ። በማግስቱ እንደተለመደው ወደ ቅርንጫፉ ሰትመጣ ከሷ ጋር አንድ ቦርሳ የያዘ ግለሰብ ወደ ቅርንጫፉ አብሯት ገባ። ከዛ ማናጀሩ ሰላም ብሏቸው ሲያበቃ የለበሰውን ፓንት እንድትገምት ጠየቃት። እሷም የለበስከው ፓንት መልኩ ነጭ ነው ስትለው ማናጀሩ በደስታ ዬስ! ብሎ ሱሪውን አውልቆ ሲያሳይ የለበሰው ቀይ ፓንት ነው። ደንበኛዋም ከሷ ጋር ከመጣው ግለሰብ 200 ሺህ ብር ተቀብላ 50ሺ ብር ለማናጀሩ ሰጠችውና 150 ሺህ ብሩን ወደአካውንቷ አስገባችው። ማናጀሩም "ማንም አያሸንፈኝም አላልሽምነበር? ይሄው አሸነፍኩሽ እኮ!" ሲላት እሷም በደስታ ፈገግ እያለች "አልተሸነፍኩም። ከኔ ጋር ከመጣው ሰውየ ጋር የቅርንጫፍ ማነጀሩን ሱሪ አስወልቀዋለሁ ብየ በ200ሺ ብር አሲዘን ነበር የመጣነው። ይሄው እምደምታየው 150 ሺ አተረፍኩ" አለችው። ©ከFB መንደር የተገኘ @snetsehuf

ለፈገግታ!! በደርግ ዘመን አንድ ባልዋ ፀረ አብዮት ሆኖ የታሠረባት ሴትዮ ነበረች፡፡ ሴትዮዋ ድኽነቱ ሲመራት በቤቷ ጓሮ ድንች ተክላ መሸጥ ፈለገች፡፡ ግን ጉልበት ከየት ይምጣ፡፡ ሰው እንዳትቀጥር፣ ገንዘብ ከየት ይገኝ፡፡ በመጨረሻ ለባልዋ እንዲህ የሚል ደብዳቤ ጽፋ በወኅኒ ቤቱ በኩል ላከችለት ‹‹በጓሯችን ድንች ልተክል ነበር፡፡ ነገር ግን ማን ይቆፍርልኛል፤ አንተ እንዳታግዘኝም ገና ሁለት ዓመት ይቀርሃል›› ባልዋም ‹‹ጓሮውን ስትቆፍሪ ተጠንቀቂ፤ እጅግ ውድ የሆኑ ነገሮችን ደብቄበታለሁ›› ብሎ መልሶ ላከላት፡፡ ደብዳቤው በደረሳት ሌሊት ፖሊሶች መጥተው የተደበቀውን ነገር ፍለጋ የቤቷን ጓሮ ከጥግ እስከ ጥግ ቆፋፈሩት፡፡ እርሷም በድንጋጤ ከረመችና ‹‹ስድስት ፖሊሶች መጥተው የሆነ ነገር ፍለጋ ጓሮውን በቁፋሮ እንዳልነበረ አደረጉት፤ ያልቆፈሩት መሬት የለም፤ ምን ባደርግ ይሻለኛል?›› ስትል ጻፈችለት፡፡ ባሏም ‹‹አሁንማ ቆፍረውልሻል ድንችሽን ትከይ›› ብሎ መለሰላት፡፡ ከ facebook መንደር @snetsehuf

''እንዳትሞኙ!'' መምህሩ ወደክፍል ሲገባ ተማሪዎቹ የሚቀመጥበትን ወንበር በገመድ ጣራ ላይ አንጠልጥለው ጠበቁት፡፡ ምንም የመገረምም የመናደድም መልክ አላሳየም፡፡ ወደተማሪዎቹ ፊቱን አዙሮ በፈገግታ አያቸውና ቃል ሳይተነፍስ ብላክቦርዱ ላይ መጻፍ ጀመረ፡፡ የሙከራ ፈተና - የተሰጠው ጊዜ 15 ደቂቃ የሚይዘው ነጥብ - 30 ማርክ 1. ጣራ ላይ ከተንጠለጠለው ወንበር እስከወለሉ ድረስ ያለው ርቀት ሲለካ በሴንቲሜትር ምን ያህል ይሆናል? (1 ማርክ) 2. በተንጋደደው ወንበር እና በጣራው መካከል ያለው አንግል ስንት ነው? ሙሉ ስሌቱን ከነፎርሙላው አሳዩ፡፡ (1 ማርክ) 3. ወንበሩን ጣራ ላይ በገመድ ያንጠለጠለውን ተማሪ ስም እንዲሁም ይህንን ሲያደርግ ያገዙትን ተማሪዎች ስም በሙሉ ጻፉ (28 ማርክ) ተማሪዎች ከ30 ማርክ 28 አግኝተው አለፉ፡፡ መምህሩም አምስት ተማሪዎችን አስወጥቶ ወላጅ ካላመጡ በርሱ ፔሬድ እንደማይገቡ ነግሮ አባረራቸው፡፡ አንዳንድ ጊዜ ጓደኛዬ “ የነገርኩትን ምስጢር ሁሉ ይጠብቅልኛል ፣ በምንም አይነት ሁኔታ አሳልፎ አይሰጠኝም” ብለህ እርግጠኛ እንዳትሆን፡፡ ብዙ ሰዎች ከጓደኝነት በላይ የግል ጥቅም በልጦባቸው ተገኝተዋል፡፡ መጽሃፈ ሲራክ ምዕራፍ 8 እንዲህ ይላል፡፡ “ የሰማውን ነገር ማስቀረት አይችልምና ከቀላል ሰው ጋራ አትማከር…ዋጋህ እንዳይጠፋብህ ለሰው ሁሉ የልብህን ምስጢር አታውጣ” ከFacebook መንደር የተገኘ ነዉ @snetsehuf

‎አስራ ስድስት ዓመቷ ነበር፡፡ የአስረኛ ክፍል ተማሪ ነበረች፡፡ ድርስ ነፍሠ ጡር ነበረች፡፡ ‎ ‎የልጇ አባት (የልጅሽ አባት ሲባል ደስ አይላትም፡፡ ያስረገዘኝ ወንድ በሉ ትላለች) የሰባት ወር ቦይፍሬንዷ ነበር፡፡ ማርገዟን እንደሰማ ብን ብሎ ጠፋ፡፡ ‎ ‎ ‎ለመጀመሪያ ጊዜ ያፈቀረችው ወንድ ነበር፡፡ ለመጀመሪያ ጊዜ የሳማት፡፡ ለመጀመሪያ ጊዜ ሰውነቷን የሰጠችው፡፡ ‎ ‎ ‎ ‎ከብዙ ማባበል በኋላ ስትለምደውና ስትወደው በአንዱ ቀን እንዲህ አላት፤ ‎‹‹አጎቴ ተከራይቶ የሚኖርበት ቤት እዚሁ ቤላ ጋር ነው፡፡ ለስራ ሐረር ሲሄድ ቁልፍ ሰጥቶኛል፡፡ ለምን እዚያ ሄደን በነጻነት ስናወራ አንውልም?›› ‎ ‎‹‹አጎቴ ቤት ልወስድሽና ድንግልናሽን ልወሰደው ›› የሚል ወንድ የለ መቼስ፡፡ ‎ ‎ ‎ ‎እጁን ይዛ ተከተለችው፡፡ የአጎቱ አንድ ክፍል ቤት በአግባቡ ከተነጠፈ ፍራሽ፣ ከብዙ መፅሐፍትና ከትልቅ ቴፕና አጠገቡ ከተዘረገፉ ካሴቶች በስተቀር ዐይን የሚገባ ነገር አልነበራትም፡፡ ‎ ‎ ‎ ‎ፍራሹ ላይ አደላድሎ እንዳስቀመጣት ሰንደል ለኮሰ፡፡ ‎ ‎‹‹ዘና እንድንል ነው፡፡ በዚያ ላይ ቤቱ ተዘግቶ ስለዋለ ይናፈስ ብዬ ነው›› ብሎ፡፡ ‎ ‎‹‹ሰንደል በየት ሃገር ነው የታፈነ ቤት የሚያናፍሰው..?ይልቅ ለምን መስኮቷን አትከፍታትም?›› አላለችውም፡፡ ‎ ‎ ‎‹‹አጎቴ ሙዚቃ በሃይል ይወዳል፡፡ የወጣ ካሴት አያመልጠውም፡፡ ቆይ ሰሞኑን የወጣ የፍቅራዲስ ካሴት አለ፡፡ እሱን ልክፈተው ለሙድ›› አላት ቀጥሎ፡፡ ‎ለሙድ፡፡ ‎ ‎ ‎ ‎ምንም አላለችውም፡፡ ‎ ‎ ‎ከዚያ…. ‎ ‎ ‎ ‎ፍቅርአዲስ ቤቱን በአስረቅራቂ ድምፅዋ ስትሞላው የእሱ ከንፈሮች አንገቷ ላይ ነበሩ፡፡ ‎ ‎ ‎ሰላማዊት ተነክታ የማታውቀው ቦታ ስትነካ ፍቅርአዲስ አትርሳኝ እያለች በሚያባብል ድምፅዋ ታለቃቅስ ነበር፡፡ ‎ ‎ፍቅርአዲስ ፣ ‎‹‹ሄደሃል አሉ ብዙ ርቀህ እንደኔ ሆነህ አንተም ናፍቀህ ‎ምናለ ሆዴ ብትመጣልኝ ብታስብልኝ›› ብላ ስትለማመጥ ‎‹‹እንዲመችሽ ጃኬትሽን አውልቂው›› ብሎ እየተለማመጣት ነበር፡፡ ‎ ‎በስልምልም ዐይኖቹ ሲለማመናት፣ በምትወደው ድምፁ ሲያባብላት ታዘዘችለት፡፡ ‎ ‎ ‎ ‎በዚያ ላይ ቀኑን ሙሉ እህል አልበላችም ነበር፡፡ ከምሳ በፊት አስፎርፏት ስትወጣ ምሳቃዋን ረስታ፡፡ ‎ሲገቡ ከሱቅ ካስመጣላት ሙቅ ሚሪንዳ በቀር ሆዷ ባዶ ነበር፡፡ ‎እንደማቅለሽለሽ እያላት ነበር፡፡ ‎ ‎እስከዛሬ ድረስ ሙቅ ለስላሳ አልጠጣም ብላ ስትከላከል ብዙ ሰዎች ‹‹ብርድ አይደል…ምን ማለትሽ ነው?›› ሲሏት አታብራራም፡፡ ግን ካልቀዘቀዘ ለስላሳ፣ በተለይ ሚሪንዳ አትነካም፡፡ ‎ ‎ ‎እስከዛሬ ድረስ ፍቅርአዲስን ስትሰማ ዐይኖቿ በእምባ ይሞላሉ፡፡ ምን ሆንሽ ብሎ የሚጠይቃት ሲኖር መልሷ አንድ ነው፡፡ ‎ ‎‹‹ድምጽዋ ደስ ስለሚለኝ ነው›› ‎ግን ውሸቷን ነው፡፡ ፍቅርአዲስ በአትርሳኝ ሙዚቃ አጃቢነት በአንዲት ቀን አስረግዞ የረሳት የመጀመሪያ ቦይፍሬንዷን ስለምታስታውሳት ነው፡፡ ድምፅዋ ሃዘን የሃዘን በረዶ ያወርድባታል፡፡ ‎ ‎ ‎ ‎ከሶስት ወራት በኋላ የኮከበ ፅባህን ግምብ ተደግፈው እያወሩ ‹‹አርግዣለሁ›› ስትለው አመዱ የጨሰው ሳሙኤል ብን ብሎ ጠፋ፡፡ ‎ ‎ምስጢረኛ ጓደኞቿ ‹‹ድሮስ ከቅምቢቢት ዱርዬ ምን ይጠበቃል?›› ብለው አብረዋት አለቀሱ፡፡ ‎ ‎አማራጭ ስላልነበራት ቤት ሄዳ የሆነችውን ስትናገር አባቷ ያለችውን የሰሙበትን ጆሯቸውን ማስቆረጥ ቢችሉ ደስ ይላቸው ነበር፡፡ እናቷም ከአንግዲህ ዐይኔ እንዳያይሽ አለቻት፡፡ ‎ ‎ ‎ ‎ልብሷን ሸክፋ ወደ ብቸኛ መሸሸጊያዋ - ወደምትወዳት አክስቷ- ከመሄዷ በፊት ግን እናቷ ለሚቀጥሉት ሃያ አመታት ላትዘነጋው የወሰነችውን ነገር ተናገረቻት፡፡ ‎ ‎‹‹ሕይወትሽን ጨርሰሽ አበላሽተሽዋል፡፡ ከእንግዲህ የትም አትደርሺም›› ብላ፡፡ ‎ ‎ ‎ ‎እርግዝናዋ የኮከበጽባህ ትምህርት ቤት ርእሰ ሃሜት ሆኖ ቢከርምም በአክስቷ ፍቅርና ማበረታቻ ተደግፋ አስረኛ ክፍልን ከገፋ ሆዷ ጋር አገባደደችና ሰኔ 12/1989 ልጇን ወለደች፡፡ ‎ ‎ ‎ሚካኤሏ አለቻት፡፡ የሰኔ ሚካኤል ልጅ ስለሆነች፡፡ ‎ ‎አክስቷ ጥላ፣ አክስቷ ግድግዳና ማገር ሆናላት ሚካኤላን ከልጆቿ ጋር ስታሳድግላት መራር የእናቷን የእርግማን ቃል እንደምታመክን ቃል አስገብታት ነበር፡፡ ‎ ‎ ‎‹‹ዛሬ ተሳስተሻል ማለት እስከወዲያኛው ሕይወትሽ ተበላሽቷል ማለት አይደለም፡፡ ይሄን እውነት ኖረሽ ካሳየሽኝ ልፋቴን ካስሽው ማለት ነው›› ብላ የልጅነትእኩያ ልጇን ከጎኗ፣ የሰላማዊትን ጨቅላ በእቅፏ አድርጋ ስትመክራት ጉልበት ሆናት ነበር፡፡ ‎ ‎ ‎ ‎ ‎ ‎ ‎ጥር 2016 ‎ ‎የአርባ አራት ዐመቷ ሰላማዊት ከሃያ ስድስት ዐመት እኩያ ልጇ ሚካኤሏ ጋር እስክስታ ትወርዳለች፡፡ ‎የሚካኤሏ ሰርግ ነው፡፡ ‎ ‎በቅርበት የማያውቃቸው ሰው ሁሉ ደጋግሞ እንዲህ ይላል፡፡ ‎ ‎ቀልዳችሁን ነው…እናቷ ልትሆን አትችልም፡፡ ታናሽ እህቷ ናት! ‎አይሆንም! ‎እውይ ደስ ሲሉ! ‎ታድለው! ‎ ‎ትንሽ ቆይቶ፣ ‎ጭፈራው አድክሟት በሚዜና አጃቢዎቿ ታጅባ ከአዲሱ ባሏ ጋር የምትጨፍረውን ሙሽራ ልጇን እያየች ቁጭ ያለችው የሙሽሪት እናት ሙቅ ሚሪንዳዋን እየጠጣች ለራሷ- ‎‹‹ምንም የተበላሸ ነገር የለም፡፡ ሁሉም ነገር ግሩም ነው›› አለችና፤ ‎ ‎ወዲያው በሰዎች ምርጫ ሙዚቃ ወደሚያጫውተው ዲጄ ለመሄድ ወሰነች፡፡ ‎ ‎ ‎‹‹የፍቅርአዲስ ዘፈን ይኖረው ይሆን?›› ብላ እያሰበች፡፡ ‎ ‎© Hiwot Emishaw ‎@snetsehuf

የቀኔን ትካዜ በቅኔ ለውጨ (በእውቀቱ ስዩም) የደረሰኝ ደስታ፥ ከልቦናሽ ፈልቆ እንደ ንፉግ ምጽዋት፥ አለ ሲባል አልቆ፤ ማለዳ ላይ ፍቅር ፥ ቀትር ላይ ትዝታ ያቀድነውን ሁሉ እንደ ኦሪት ሽሮት፥ ጊዜና ቸልታ፤ ስትቀመጭበት በነበረው ወንበር አሁን ተቀምጬ እምባየን ወደ ውስጥ ፥ እንደ ክኒን ውጬ፤ የቀኔን ትካዜ፤ በቅኔ ለውጬ እንደዚህ እላለሁ፦ “ ጊዜ ውስጡ ጨካኝ፤ ከላይ ከላይ ገራም ሕይወትን ያልማረ፤ ለፍቅር አይራራም::

ሰሞንኛ (በእውቀቱ ስዩም) ሰሙኝማ!  በቀደም አነቃቂ ሀሳብ አቅራቢው ማንያዘዋል ምግብ ቤት ጎራ አልሁ፤ ያው እኔ ከተነቃቂዎች መሀል አይደለሁም፤ ግን ችግሩ ከኔ  ሳይሆን አይቀርም፤ የሚያፈስ ጣራና የረጠበ ፍራሽ  የሚያነቃኝ ሰው አይደለሁም፤ ምግቡ ግን  በስምአብ ! ገራሚ ነው፤ ጣት ብቻ ሳይሆን ክርን አያስቆረጥማል!  አጋነንህ በሉኝና  ወደፊት ያገራችን ምግብ በሶስት   የሚከፈል ይመስለኛል፥ የፍስክ ምግብ፥ የጦም ምግብና የማኔ ምግብ፤   ፎሰሴ የተባለው ምግብ በተለይ የሚዳሰስ ቅርስ ማለቴ ቁርስ ሆኖ መመዝገብ አለበት፤ ገና ከጉሮሮህ ሳይወርድ የሶስት ፈረስ ጉልበት ይሰማሀል፤  ብርድልብስ እንደ መሀረብ ማጠብ የሚያስችል አቅም ያጎናጽፍሀል ፤ እንዲያውም አንድ ጉዋደኛየ ባለፈው ፎሰሴ በልቶ መንገድ ሲያቋርጥ፥ ሲኖትራክ ገጨው፤  አሁን ሲኖትራኩ ጋራጅ ገብቶ እየተጠገነ ነው፤ የምር ይሄ ማስታወቂያ አይደለም  ! የማኔን  ቤት ጎብኙለት፤ እኛ ሙድ ስንይዝ እሱ ብርና ደንበኛ በመያዝ ላይ ነው:: ክረምቱ እየተገባደደ ነው “ቡሄ እየመጣነው  ! ያ ማበጠር የተነሳነው!”   እኔ ብዙ ጊዜ ረቂቅ ነገሮችን በምሰል ካላሰብሁዋቸው አይገቡኝም፤ ቡሄን ሳስብ፥ ሰይፉ ፋንታሁን የደብረብርሀን  በርኖስ ለብሶ  wireless ጭራ ሲነሰንስ ነው የሚታየኝ፤ በኛ ሰፈር  ዱላ ይዞ ያልተሰማራ ፈላ የለም፤ ዘንድሮ ቡሄ ለየት የሚያደርገው  ህጻናት ብቻ ሳይሆን አዋቂዎችም  ፥ አይናቸውን በጨውና በበረኪና  አጥበው መሳተፋቸው ነው፤ ቅድም አንድ ያምሳ አመት ጎልማሳ በህጻናቱ መሀል ተቀላቅሎ  ጥሩንባ እየነፋ እኔ በር ላይ ሲጨፍር ነበር ፤ አምሳ ብር ሰጥቼ አርባ ብር መልስ ከተቀበልሁት በሁዋላ፥ “ ግን በቡሄ አዋቂዎች እንዲጨፍሩ ባህሉ ይፈቅዳል እንዴ?"  ስል ጠይቅሁት፤ ሰውየውየ ምን ብሎ መለሰ? “ባህሉ ባይፈቅድም የኑሮ ውድነቱ ይፈቅዳል”🙂

"እንጋባ" ሲል ጠየቃት አሳምነው ። አልተቀበለችውም አስማሩ "ወንድምና እህትነቱ ይበልጣል" አለችው። ተስማሙ ቤት እየመጣ ይጠይቃታል። ቡና ታፈላለች ይጠጣሉ፣ ካላት ታቀርባለች ይበላሉ። አወግተው ይለያያሉ። የትዳር ነገር ዳግም አልተነሳም። አሳምነው አንድ ቀን በጠራራ ፀሀይ መጣ። እንደመጣ የደረበውን ሹራብ አውልቆ አስቀመጠ። ስለ ሙቀቱ ብዙ አውርተው ተለያዩ። አስምሩ አሰምነው ረስቶት የሄደውን ሹራብ ልብሷን ስታጥብ አጠበችለት። ዳግም ሲመጣ ደርቦ ደራርቦ ነበርና የሚያወልቀው እንጂ የሚደርበው ልብስ አላስፈለገውም ጃኬቱን አውልቆ ሄደ። አስምሩ እሱንም አጥባ አኖረችው ሱሪውን ደርቦ መጣ "ወበቀኝ!" አወለቀው። አስማሩ አጥባ አኖረችው ካፕርቱን ጥሎ ሄደ ፣አጥባ አኖረችው አንድ ቀን በጠራራ ፀሀይ ብርድ ልብሱን ለብሶ መጣ ፣አስማሩ "ምነው?" አለችው በጠራራ ፀሀይ ብርድ ሆዴ ገባ አላት ። "ምች ይሆናል" አለችው ። የምች መድኀኒት ብታሽለት ተሻለው ። ሲሻለው ብርድ ልብሱ አላስፈለገውም ጥሎት ሄደ። አስማሩ አጥባ አኖረችው። ትንሽ ቆይቶ ፍራሹን ተሸክሞ መጣ ። "ምነው?" አለችው ። "ላሳድሰው መሄዴ ነው ። አይቼሽ ልለፍ ብዬ ነው"አላት አመነችው ጨዋታው ደራ ፣ ፍራሹን ረስቶት ሄዶ ኖሮ እኩለ ሌሊት ቢመጣ አስማሩ ቦታ ስላጣች ፍራሹን ፍራሿ ላይ ደርባው ደረሰ..ያኔ "ተነሼ ከማለት "ጠጋ በይ" ማለት ቀልሎ ተገኘ። ጠጋ አለች 😊🅦🦋 ደራሲ:- ዓለማየሁ ገላጋይ

ታሪክን ወደ ሁዋላና ወደፊት (በእውቀቱ ስዩም) አጼ በከፋ በዘመናቸው በጣና ሀይቅ  ላይ፥ ለህዝብ  መጓጓዣ የሚሆን ግሩም  መርከብ “ብርጊዳ “በሚባል ቦታ አሰርተዋል፤ ካልተሳሳትኩ  ብርጊዳ ደቡብ ጎንደር ውስጥ  የሚገኝ ስፍራ መሰለኝ ፤  ቦታውን በቅጡ የምታውቁ ማረምያ ወይም ማብራሪያ መረጃ ከታች ልታክሉልኝ ትችላላችሁ:: መርከቡን የገነቡት ፥ ከአገርቤት፥   እሳት ውላጅ እና አንጣጭ ማሞ  የተባሉ ጠቢባን ሲሆኑ፥  ከፈርኦኖች አገር  የመጡ ድሚጥሮስ እና ጊዮርጊስ የተባሉ ሊቃውንት አብረዋቸው ሰርተዋል::   ለመርከቡ ግንባታ  ዋንዛ የተባለ የማይነቅዝ ዛፍ እንዲሁም ሁለት መቶ ማረሻ መስራት የሚችል ብረት አገግልግሎት ላይ ውሏል፤  ወለሉን እና ግድግዳውን ለመገንባት ከቅባኑግ እና ከእጣን የተቀመመ ማጣበቂያ ተጠቅመዋል:: በመርከቡ ገጽታ ዙርያ ሰፊ ሐተታ የሚያቀርበው ያጼ በካፋ ዜና መዋእል ጸሀፊ፥ የመርከቡ ጋቢና  “ የግመል አንገት  “ እንደሚመስል ዘግቧል፤  “በአምዱ ራስ ላይ ነፋስ የሚስብ ስንደቅ አለ፤ መርከቡን ወደ ፈቀደው ወደብ ያደርሰዋል” የሚለውን የጸሀፊው ምስክርነት ይዘን ፥  መርከቡ በነፋስ ሀይል እንደሚንቀሳቀስ መገመት እንችላለን :: ከሶስት መቶ አመታት በሁዋላ  “ ጣና ነሽ” የተባለች መርከብ ቻይና ውስጥ ተበጅታ  ፥ያለ ፍጥረቷ በየብስ ለወራት  ተንከራትታ መዳረሻዋ ላይ ማረፏን ሰምተናል :: ለሕዝብ አገልግሎት መርከብ መሸመት ጥሩ ነገር ነው፤ ከዚያ ይበልጥ ፤ እዚሁ በወንዛችን በቀያችን  ለመፈብረክ  እና  ለመገንባት  የሚያቅዱ ካሉ ይህ የታሪክ ቁራሽ ፥ማነቃቂያ ሊሆናቸው ይችላል፤

ለእጅጋዬሁ ሺባባው የተፃፈ ፍሬዓለም ሺባባው ሀገር ደብቀሻል ወደ አንቺ ምመጣው ሀገሬ ናፍቃኝ ነው አንቺን ያስቸገርኩሽ ሀገሬ ጠፍታኝ ነው አንቺ ምትናፍቂኝ ሀገር ተርቤ ነው... ፍቅር ተርቤ ነው... ሰው ማዬት ናፍቆኝ ነው... ሀገር የገባው.. ሰው ሀገር የገባው ሰው የናፈቀኝ ለታ ወደ አንቺ እመጣለሁ ሀገሬን ስፈልግ አንቺን አስባለሁ አዬሽ..እምዬዋ... እኔ በዚህ ጉዳይ እቸገራለሁኝ እቸገራለሁኝ ሀገር እየጠፋኝ እጅግ ተቸገርኩኝ ትርጉሙ እየጠፋኝ ሰው መሆን ክቡር ነው ያለችው ሀገሬ አድዋ ላይ ወጥታ እንድታውጅ ዛሬ ወደ አንቺ እመጣለሁ.. ሀገሬን ስናፍቅ አንቺን አስባለሁ እንድታስታውሺኝ ወርቃማዋን ሀገር እንድታስታውሺኝ የደጎቹን መንደር ሀገሬን ስናፍቅ ወደ አንቺ መጣሁኝ አሁንም ድጋሚ እንደገና አስታውሺኝ አንቺ ባትይንም ይታወቅብሻል ወጣ በይ እንይሽ ሀገር ደብቀሻል ሐምሌ 11, 2017 ለእጅጋዬሁ ሺባባው የተፃፈ አክባሪያችሁ ፍሬዓለም ሺባባው

ቀብዲ (በእውቀቱ ስዩም) በዚህ ዓለም ላይ  እንደ ዘፋኝ የታደለ  የለም፤ አንድ ነጠላ ዜማ ሰርተህ ድርብርብ ህይወት ትኖራለህ፤ ስቴድየም ሙሉ ታዳሚ ታስጨፍራለህ፤  ታዋቂ ዘፋኞች ባንድ መድረክ የሚያገኙት ገንዘብ  የኢትዮጵያን ህዝብ አመታዊ በጀት  ያክላል ቢባል ማጋነን ይሆናል፤   ዘፋኝ መንግስተ ሰማያት አይገባም የሚባለው አለምክንያት መስሎሀል?   ዘፋኞች የመንግስተ ሰማያት ድርሻቸውን  እዚህ ምድር  ላይ ጨርስዋል፤ ሁለቴ መንግስተ ሰማያት የለም፤ ይብላኝ ለገጣሚ!  እውነተኛ ሰማእታት ማለት እኛ ነን ፤    እልም ባለው ወበቅ “ስካርፍ” እምንለብሰው ወደን አይደለም፤ ሆድ ቢብሰን ለመታነቅ እንዲያመቸን ነው፤    ይህ በእንዲህ እያለ፥  ባለፈው ግሪንላንድ ሚባል አህጉር ውስጥ የሚኖር  አንድ  ዲያስፖራ  የግጥም ምሽት እንዳዘጋጅ  ጋበዘኝ ፤ “ ያውሮፕና ትኬት ታሰናዱልኛላችሁ?” “በጀት የለንም ! እንደ ፍራሽ የሚነፋ ጀልባና   የሚያሻግሩህ  ሰዎችን አዘጋጅተናል” ሲለኝ ሙያየን ጠላሁት፤ ባለፈው ደግሞ “አላስካ”   የተባለ ጠቅላይ ግዛት ሄድኩ፤ አላስካ ማለት ሩሲያዎች “ብርድ ያስመታናል  “ብለው ለአሜካኖች የሸጡላቸው  ያገር መስኮት ነው፤  ካውሮፕላን ስወርድ አንድ ብርቱ  ዲያስፖራ ተቀበለኝ፤  “አበባ ይዘው የሚጠብቁኝ ቆነጃጅት  ጠብቄ ነበር ’ አልሁት፤   ‘ወገኛ ነህ ባክህ!  እዚህ  አገር አመቱን ሙሉ ክረምት ነው፤ ካገራችን ከወጣን ወዲህ አበባ አይተን አናውቅም ፤  “ አለና የምጎትተውን ሻንጣ ብድግ አርጎ አሸከመኝ፤ “እሺ አበባውስ ይቅር፤ የቆነጃጅቱስ ነገር?  “ አልሁት፤ “ሲጀመር ቆነጃጅት ከሆኑ ስንት እድል እያላቸው  እዚህ፥ የግዜር ፍሪጅ የሆነ  አገር ለምን ይመጣሉ? እኛም ካናዳ የለመግባት ስንሞከር ተቆርጠን ቀርተን ነው” አለኝና መኪናው ውስጥ ገፍትሮ አስገባኝ ፤ በጥሩንባና በነጋሪት ተቀስቅሶ  ለዝግጅቴ የመጣው ዲያስፖራ አስራ ሁለት አይሞላም፤  ፕሮሞተሩ  ለዶዶራንት መግዣ የሚበቃ  ቀብድ ሰጠኝ ፤ ዝግጅቴን ለመታደም ከመጡት  ሰዎች ፥ልጅ ሚካኤል ሲያትል ላይ   ሲዘፍን  ያጀቡት ፖሊሶች በቁጥር  ይበልጣሉ፤ አብዛኞቹ  አሳ ሲያጠምዱ፥ ለዶልፊን አክሮባት ሲያለማምዱ፥  ሻርክ ሲበልቱ ውለው ስለመጡ  ከፍተኛ ድካም ይነብባቸዋል ፤ የገቡት አብዛኞቹ እኔ እያነበብሁ እንደ ሰነፍ ተማሪ ዴስካቸው ላይ ተኝተዋል፤ ከዝግጅቱ በሁዋላ  አዘጋጁን ካጠገቤ አጣሁት ፤ በስንት ፍለጋ ከአዳራሹ ጀርባ ባለው ባር ውስጥ  ጅን በበረዶ እየጣጣ  ሲያለቅስ አገኘሁትና፥ ለበረዶው ከፍየ  አጽናንቼው ዞር ስል፤ “በውቄ “ አለኝ ፤ “ወየ”  “ ቅድም ከሰጠሁህ ቀብድ ላይ ትንሽ  ልታበድረኝ ትችላለህ?  “

አንዳንድ ልቦች በአንድ ጎናቸው ጥላቻን ካላቀፉ ፍቅር ብቻውን መንተራስ የማይችሉ አሉ ። ምንዱባን ማዳምና ሚስተር ቴናድዩ ምን ዓይነት ሰዎች ይሆኑ? ምድባቸው እውቀት ኖሯቸው ግን ጊዜ ከጣላቸው ሳይሆን የተናቁ ሆነው ጊዜ ካነሳቸው ሰዎች ውስጥ ነበር፡፡ ጊዜ ያነሳቸው ሰዎች ጥፋት ሲፈጽሙ የሠርቶ አደሩ ትጋት ወይም የቡርዣው ክብር የተጐናጸፉ ባይሆነም ስህተታቸው ጊዜ አጣላቸው ሰዎች ላይ ተደፍድፎ እነርሉ ከጥፋቱ ነፃ ይሆናሉ፡ ይህም በመሆነ ባልና ሚስት መደባቸው ከተናቁ ሰዎች መካከል ቢሆንም ጊዜ ስለስጣቸው ብቻ እንደ ትልልቅ ሰዎች ይከበራለ-:: ሴትዮዋ ጨካኝ፤ ስውዬው በዋል-ፈሰስ ዓይነት ሰዎች ነበሩ:: ሁለቱም ትንሽ ቀዳዳ ካገኙ ተንኮል ከመሥራት አይቆጠቡም፣ እንደ ትል ከብርሃን ወደ ጨሰማ! እንደ አባያ በሬ ወደፊት ከመራመድ ወደኋላ ማፈግፈግ፤ እንደ እባብ ከቀና አስተሳሰብ ተንኮል ወደ መሸረብ፣ ከሰፊው ጠባብ መንገድን የሚመርጡ ዓይነት ሰዎች ናቸው፡፡ የሚገርመው ግን ክፋት፣ ተንኮልና ምቀኝነት ለኑሮ መሳካት ዋስትና ሊሆን ስለማይችል እነዚህ ሰዎች በሆቴል ቤታቸው ብዙም አልተጠቀሙም። ፋንቲንን ያመስግነና ሳያስቡት በድንገት ሃምሣ ሰባት ፍራንክ፤ አግኝተዋል፡፡ ይህን ገንዘብ በማግኘታቸው ሆቴል ቤታቸው ከመታሸግ ዳነ። ግን አሁንም ቢሆን በሚቀጥለው ወር ተጨማሪ ገንዘብ ያስፈልጋቸው ስለነበር ሴትዮዋ የኮዜትን ጋቢና ቀሚሶች ወደ ገበያ ወስዳ በስልሣ ፍራንክሸጠቻቸው:: ገንዘቡ ሲያልቅ ኮዜትን ለነፍሳችን ብለው ያስጠግዋት እንጂ ጥቅም እንዳገኙባት ረስተው በጣም ጨከኑባት፡፡ የራስዋ የሆኑ ልብሶች ተሽጠው የተቦጫጨቁትን የልጆቻቸው ውራጅ አለበስዋት፡፡ ለውሻ እንደሚሰጥ አጥንት ከበላተኛ የወዳደቀ ትርፍራፊ አበልዋት: ምድብዋ በርላይ ተኝቶ ዓይን ዓይን ከሚያይ ውሻና ከተመጋቢ እግር ስር ድምፅ እያሰማ ከሚሄድ ድመት ጋር ሆነ ምግብ እንደ ውሻና ድመት በገበቴ መሣይ ነገር መሬት ተጣለላት፡፡ እናትዋ አገርዋ ከገባች በኋላ ከእዚህ ግባ የማይባል ሥራ አገኘች፡፡ በየወሩ ደብዳቤ ለእነ ሚስተር ቴናድዬ ጻፈችላቸው:: በደብዳቤዋ ከልጅዋ ደኅንነት በስተቀር ሌላ የምትጠይቀው ነገር አልነበራትም:: ባልና ሚስት የመልስ ደብዳቤ ሲልኩ ኮዜት ተመችቶአት እንደምትኖርና ጤናዋም ደህና መሆኑን ገልጸው ነበር የሚጽፉላት፡፡ አንዳንድ ልቦች በአንድ ጎናቸው ጥላቻን ካላቀፉ ፍቅር ብቻውን መንተራስ የማይችሉ አሉ፡፡ መዳም ቴናድዬ የራስዋን ልጆች በጣም ትወዳለች:: የልጆችዋ ፍቅር አዲስዋን ልጅ እጅግ እንድትጠላ አደረጋት፡፡ ኮዜት ያለ አግባብ ስትነቀፍ፤ ስትገረፍ፤ ስትሰደብ፥ ስትመናጨቅና ስትጠላ እኩዮችዋ የሆነ ሌሎቹ ሁለት ልጆች ሲታቀፉ፣ እሽሩሩ ሲባሉ፤ የማይገባቸውን ምስጋና ሲያገኙ በማየትዋ ነገሩ ሊገባት አልቻለም:: የሰው ልጅ ጭካኔ፤ የዚህ ዓለም ውጣ ውረድ፧ የእግዚአብሔር ሽረትና ምህረት ምን እንደሆኑ ለማወቅ እድሜዋ አልፈቀደላትም:: ሴትዮዋ ትጨክንባታለች፡፡ ኢፓኒንና አዜልማም ይጨክኑባታል:: ምናልባት የጭካኔው መጠን ይለያይ ይሆናል እንጂ በዚያ እድሜ ልጆች ቤተሰቦቻቸው የሚፈጽሙትን ነው የሚከተሉት:: ዓመት አለፈ፣ ሌላውም ተደገመ:: የስፈር ሰዎች ምን ብለው ያወሩ ጀመር፤ «እነመዳም ቴናድዬ ምን ዓይነት ርህሩህና ደግ ቢሆኑ ነው እባካችሁ፡፡ እነርሱ ለራሳቸው ምስኪኖች ሆነው መጠጊያ የሌላትንና እናትዋ የጣለቻትን ልጅ ያሳድጋሉ-:: የነሱ ቤት እናት ልጅዋን የረሳች መሰላቸው። ከዓመት እስከ ዓመት ቁመቱዋ እየጨመረ ሲሄድ መከራዋና ስቃይዋም እንዲሁ ጨመረ። ምንዱባን ገፀ 43

ሰሞንኛ (በእውቀቱ ስዩም) ጀርመን   በገባሁ በሁለተኛ ቀኑ ማካፋት  ጀመረ፤ ዝናብ ያረጠበው አፈር  ሽታ ናፈቀኝ ፤   እዚህ ደግሞ  መሬቱ እንዳለ በኮብል ተሸፍኗል፤  ደግነቱ ከኢትዮጵያ ስወጣ አፈር በያይነቱ ቆጣጥሬ ነው የወጣሁት፤  ቀይ አፈር - ደባይ አፈር - የመቃብር አፈር- በርበሬ እንዲበረክት የሚያረግ አፈር-  ሙሉቀን መለሰ ምነው ባደረገኝ ብሎ የተመኘው “የሚነፈራፈር አፈር”፤ ከሁሉም አፈር አይነት ቆነጣጥሬ፥ በጀርመን ዝናብ ለውሼ ማግ ሳደረገው እልል ያለ  አጭሬ ግጥም መጣልኝ፥ “እንዴት ነሽ አገሬ ከነገ አንጻር ሲታይ ደግ ቀን ነው  ዛሬ ስንት ገባ ይሆን የውጭ ምንዛሬ ? ከጀርመን ከተማዎች ባንዱ እየተርመሰመስሁ ነበር ፤የሆነ  መጸዳጃ ቤት ገብቼ ስሙኒ ከፍየ እጄን ታጠብሁ፤ አለንጋ ጣቶቼን ሳራግፍ ወለሉ ላይ ጥቂት ነጠብጣብ አረፉ፤  ወለል  ጠራጊው ሽማግሌ  ፈረንጅ ይሄን ሲያይ እንደማበድ አረገው፤ “ቫሩም?” ብሎ ቀወጠው፤ “ ጀርመንኛ ብዙ ባላውቅም፥ “ ምን ነካህ? እንዴት   ልፋቴን መና ታደርገዋለህ?” ምናምን ማለት እንደሆነ ቀልቤ ነግሮኛል፤( እምገርመው ። ቀልቤ ከኔ የተሻለ ጀርመንኛ ያውቃል) ጌታ ሆይ !  ብዙ ሺህ ማይል አቆራርጬ ፥ አውሮፓ ገብቼ ፥ ፈረንጅ የማናድድበት  ሐይል  የሰጠኸኝ እኔ ማን ነኝ? ብየ ተደነቅሁ፤ መልሼ ሳስበው ግን ተጸጸትሁ፤  ያንጠባጠብሁትን  የውሀ ርጋፊ ላጸዳ መጥረጊያውን ብድግ ሳረግ ሰውየው እንደገና ተንደቀደቀ፤ ከውጭ የሚጠብቀኝን  ዲያስፖራ ሰለሞን ሞገስን “ምንድነው የሚለው”  ብየ ጠየቅሁት፤ ተረጎመልኝ፤ ጠራጊው ሽማግሌ እንዲህ ነው ያለኝ፤ “ውሀ ስታንጠባጥብ ታግሼሀለሁ፤ መጥረጊያየን ስትሰርቀኝ ግን እፋረድሀለሁ” ሳያሳፍሰኝ  አመለጥኩ፤ የሆነ ሰአት ብቻየን እየተራመድኩ  አንድ ሀውልት አገኘሁ፤ ሀውልት ከማይሰምርበት አገር ስለመጣሁ ሀውልት ብርቄ  ቢሆን አይገርምም ፤ ከሀውልቱ ስር ፎቶ ለመነሳት ፈለግሁ፤ አንድ  ፈረንጅ ባጠገቤ ሲያልፍ  ተከትየ በጀርመንኛ አንሳኝ አልሁት፤ ዝም ብሎኝ ሄደ፤ በላቲን ሳይቀር ጠየቅሁት፤ ገላምጦኝ ርምጃውን አፋጠነ፤ አይ ፈረንጅ! ከላይ ሲታዩ የተማሩ ይመስላሉ! ፎቶ በሞባይል  እንዴት እንደሚነሳ እንኳ አያውቁም ፤ “ብየ ራሴን ለማጥናናት ሞከርኩ፤   አማራጭ ሳጣ ፥ሰልፊ ፊቴ ላይ ደገንኩ፤  ካሜራው የኔን ፊት እየዘለለ ሀውልቱን መቅረጽ ጀመረ፤  አጥብቆ ሆድ ባሰኝ! ሆድ ለባሰው ሞባይል አታውሰው!   ድንገት ስልኬ ከመዳፌ ላይ ሲንሸራተት  ይታወቀኛል፤ ቷ!   ስልኬ  በግንባሩ ክንብል ካለበት አንስቼ  ሳየው  ስክሪኑ የሸረሪት  ድር ሪልስቴት  መስሏል፤ በመጨረሻ ወደ ማረፊያ ቤቴ ስመለስ  ሁለት  ደጋግ ያገሬ ልጆችን አገኘሁ፤ ትንሽ ሰላምታ ከተለዋወጥን በሁዋላ፤ “  የምትፈልገው ካለ ንገረን ?” አሉኝ ፤ “ ባስቸኳይ ወደ አገሬ መልሱኝ "

" ያለፈው በሚመጣው ላይ ምንም ጥቀርሻ መተው የለበትም ብዬ ያለፈውን ከኔ አርቄ የጣልኩ ይመስለኝ ነበር። ምናልባት አይቻል ይሆናል። ዛሬ ከተከሰተው ክስተት ምኑ ከኔጋ እንደሚያያዝ አላውቅም። የሰው ልጅ ሁሉ ከትላንቱ ተጋብቶ ሳይሆን አይቀርም የሚኖረው። ዛሬው የትላንት ጭማቂ ነዋ!! የዛሬ ግቡ የትናንት ምክኒያቱ ነበራ! ከዓመታት በፊት እናቴ ወይ አባቴ ያነቡት እንባ ምክንያቱን እንኳን ሳይቀይር በልጃቸው  ጉንጭ ላይ ሊወርድ ይችላል። አባቶች በበሉት መራር ፍሬ የልጆች ጥርስ በለዘ አይነት ሆኖብኝ ትላንት ትዝታ ብቻ አለመሆኑ የገባኝ ዛሬ ነው፡፡ ትናንት ትውልድን እንኳን ጥሶ እንደሚያልፍ አስቤ አላውቅም ነበር፡፡ ሀበሻ ሙዚቃው ውስጥ እንኳን ትዝታ ስልት መኖሩ ከትናንት መፋታት አለመፈለጉ ወይ አለመቻሉ ይሆናል። " ጠበኛ እውነቶች በሜሪ ፈለቀ

ባሻዬ! ከ 40 ዓመት በፊት እንዲህ ነበር.. (Tesfaye Hailemariam) 1. ከ40 ዓመት በፊት ልጆች ወላጆቻቸውን ያከብሩ ነበር ፣ ዛሬ ግን ወላጆች ልጆቻቸውን ያከብራሉ፣ ይፈራሉ። 2. ከ40 ዓመት በፊት ሴቶች ጠይሞች ነበሩ፣ ዛሬ ግን  ሴቶቻችን ቢጫ ሆነዋል፣ 3. ከ40 ዓመት በፊት ሴቶች ካስክ ውስጥ ገብተው ፀጉራቸውን እየተተኮሱ ጥፍራቸውን ይሠሩ ነበር፣ ከ40 ዓመት በኋላ ጥፍርና ተረከዛቸውን ከሚሠሩ ወንዶች ጋር መጋፋት ግድ ሆኖባቸዋል፣ 4. ከ40 ዓመት በፊት ማግባት ቀላል ሲሆን ፍቺ ደግሞ እጅግ ከባድና እደ ሃጢአት ይቆጠር ነበር፣ ዛሬ ግን ማግባት ከብዶ ፍቺ ውሃ የመጠጣት ያህል ቀላል ሆኗል፣ 5. ከ40 ዓመት በፊት የሠፈራችንን ሰዎች በሙሉ እናውቃቸው ነበር፣ ዛሬ ግን ጎሰቤቶቻችንን አናውቃቸውም፣ 6. ከ40 ዓመት በፊት ሃብታም ሰው ደሃ ለመምሰል ይሞክር ነበር፣ ዛሬ ግን ደሃው ሃብታም ለመምሰል ይጋጋጣል፣ 7. ከ40 ዓመት በፊት ሙሉ ቤተሰቡን ለመመገብ አንድ ሰው ብቻ ሥራ ይሠራ ነበር፣ ዛሬ ግን አንድ ልጅ ለመመገብ ቤተሰቡ ሁሉ ሥራ ይሠራል፣ 8. ከ40 ዓመት በፊት ጥፋት ያጠፋ ልጅ ተቀጥቶ ራቱን ሳይበላ ይተኛል፣ ዛሬ ግን ያጠፋ ልጅ ራቱን እንዲበላ እናትና አባት ቆመው ይለማመጡታል፣ 9. ከ80 ዓመት በፊት መሪዎቻችን የሚነግሩንን ዕውነት ነው ብለን እንቀበል ነበር፣ ዛሬ ግን መሪያችን "እናቴ ትሙት!" ብሎ ቢነግረን እንኳን  በጭራሽ አናምነውም፣ ባሻዬ! ከ40 ዓመት በፊት.....