Namangan Savdo-sanoat palatasi

Ирода ва меҳнат ғалабаси: “Фаол тадбиркор”га муносиб инсон Баъзан инсоннинг имкониятлари унинг жисмоний ҳолати билан эмас, балки орзу-интилишлари, меҳнатсеварлиги ва ҳаётга бўлган ишончи билан ўлчанади. Учқўрғон туманидаги “Citrus city” МЧЖ директори Носиржон Бекмуратовнинг ҳаёт йўли бунинг яққол исботидир. Асли касби ўқитувчилик бўлган Носиржон ака қарийб 20 йил давомида касбий таълим соҳасида фаолият юритди. Бироқ у доимо ердан унумли фойдаланиш, замонавий боғдорчиликни ривожлантириш орқали янги иш ўринлари яратишни мақсад қилди. Аввал хонадон томорқасидаги 30 сотих майдонда лимон парваришлаган бўлса, 2020 йилда самарасиз боғлар ўрнида 1,5 гектар майдонда лимонария ташкил этиб, “Citrus city” корхонасига асос солди. Қатъият ва изланишлар натижасида бугунги кунда иссиқхона майдони 8 гектарга етди. Корхонада 50 нафар фуқаро доимий иш билан таъминланган бўлса, мавсумий ишлар даврида 200 нафарга яқин аҳоли даромад манбаига эга бўлмоқда. Бу эса тадбиркорликнинг нафақат шахсий манфаат, балки ижтимоий масъулият эканини кўрсатади. Уч йил аввал юз берган нохуш воқеа туфайли унинг соғлигида жиддий муаммолар пайдо бўлди, ҳаракатланиш имкониятлари чекланди. Аммо бу ҳолат унинг мақсадлари ва ҳаётга бўлган муҳаббатини сусайтирмади. Аксинча, у янада катта режалар сари интилишда давом этди. Бугун Носиржон Бекмуратовнинг навбатдаги мақсади — 100 тоннали музлатгичли омбор ташкил этиш, маҳсулотларни сақлаш имкониятларини кенгайтириш ва маҳаллий лимонни халқаро бозорларга экспорт қилишдир. Унинг кўп йиллик самарали меҳнати, тадбиркорликни ривожлантириш, янги иш ўринлари яратиш ва мамлакат иқтисодиётига қўшаётган муносиб ҳиссаси юксак баҳоланиб, Ўзбекистон Республикаси Президентининг Фармойишига мувофиқ “Фаол тадбиркор” кўкрак нишони билан тақдирланди. Бу мукофот фақат бир инсоннинг эмас, балки меҳнат, сабр-тоқат ва қатъиятнинг эътирофидир. ————————————————— Iroda va mehnat g‘alabasi: “Faol tadbirkor”ga munosib inson Ba’zan insonning imkoniyatlari uning jismoniy holati bilan emas, balki orzu-intilishlari, mehnatsevarligi va hayotga bo‘lgan ishonchi bilan o‘lchanadi. Uchqo‘rg‘on tumanidagi “Citrus city” MCHJ direktori Nosirjon Bekmuratovning hayot yo‘li buning yaqqol isbotidir. Asli kasbi o‘qituvchilik bo‘lgan Nosirjon aka qariyb 20 yil davomida kasbiy ta’lim sohasida faoliyat yuritdi. Biroq u doimo yerdan unumli foydalanish, zamonaviy bog‘dorchilikni rivojlantirish orqali yangi ish o‘rinlari yaratishni maqsad qildi. Avval xonadon tomorqasidagi 30 sotix maydonda limon parvarishlagan bo‘lsa, 2020 yilda samarasiz bog‘lar o‘rnida 1,5 gektar maydonda limonariya tashkil etib, “Citrus city” korxonasiga asos soldi. Qat’iyat va izlanishlar natijasida bugungi kunda issiqxona maydoni 8 gektarga yetdi. Korxonada 50 nafar fuqaro doimiy ish bilan ta’minlangan bo‘lsa, mavsumiy ishlar davrida 200 nafarga yaqin aholi daromad manbaiga ega bo‘lmoqda. Bu esa tadbirkorlikning nafaqat shaxsiy manfaat, balki ijtimoiy mas’uliyat ekanini ko‘rsatadi. Uch yil avval yuz bergan noxush voqea tufayli uning sog‘ligida jiddiy muammolar paydo bo‘ldi, harakatlanish imkoniyatlari cheklandi. Ammo bu holat uning maqsadlari va hayotga bo‘lgan muhabbatini susaytirmadi. Aksincha, u yanada katta rejalar sari intilishda davom etdi. Bugun Nosirjon Bekmuratovning navbatdagi maqsadi — 100 tonnali muzlatgichli ombor tashkil etish, mahsulotlarni saqlash imkoniyatlarini kengaytirish va mahalliy limonni xalqaro bozorlarga eksport qilishdir. Uning ko‘p yillik samarali mehnati, tadbirkorlikni rivojlantirish, yangi ish o‘rinlari yaratish va mamlakat iqtisodiyotiga qo‘shayotgan munosib hissasi yuksak baholanib, O‘zbekiston Respublikasi Prezidentining Farmoyishiga muvofiq “Faol tadbirkor” ko‘krak nishoni bilan taqdirlandi. Bu mukofot faqat bir insonning emas, balki mehnat, sabr-toqat va qat’iyatning e’tirofidir.

Наманган вилояти делегациясининг Беларусь Республикасига ташрифи давом этмоқда Наманган вилояти ҳокими Шавкатжон Абдураззоқов бошчилигидаги делегация Беларусь Республикаси вазирлик ва идоралари мутасаддилари билан учрашув ўтказди. Хусусан, “Беллегпром” концерни мутасаддилари билан учрашувда енгил саноат йўналишида қўшма инвестиция лойиҳаларини амалга ошириш, замонавий технологияларни жалб этиш ҳамда Наманган текстиль маҳсулотларини Беларусь бозорига экспорт қилиш масалалари муҳокама қилинди. «Беллегпром» енгил саноат маҳсулотларини ишлаб чиқариш ва реализация қилиш билан шуғулланувчи корхоналарни бирлаштиради. Концерн таркибига 60 дан ортиқ ташкилот киради. Улар тўқимачилик, тикувчилик, трикотаж ҳамда чарм-пойабзал саноати йўналишларига бўлинади. Шунингдек, Беларусь Республикаси Қишлоқ хўжалиги ва озиқ-овқат вазирлиги, Озиқ-овқат саноати бирлашмаси вакиллари билан мулоқотларда икки томонлама ҳамкорлик алоқаларини ўрнатиш ва уларни янада ривожлантириш асосий эътиборда бўлди.  Наманган вилояти делегациясининг Беларусь Республикасига сафари давом этмоқда. Наманган вилояти ҳокимлиги Ахборот хизмати. __ Namangan viloyati delegatsiyasining Belarus Respublikasiga tashrifi davom etmoqda Namangan viloyati hokimi Shavkatjon Abdurazzoqov boshchiligidagi delegatsiya Belarus Respublikasi vazirlik va idoralari mutasaddilari bilan uchrashuv oʻtkazdi. Xususan, “Bellegprom” konserni mutasaddilari bilan uchrashuvda yengil sanoat yoʻnalishida qoʻshma investitsiya loyihalarini amalga oshirish, zamonaviy texnologiyalarni jalb etish hamda Namangan tekstil mahsulotlarini Belarus bozoriga eksport qilish masalalari muhokama qilindi. «Bellegprom» yengil sanoat mahsulotlarini ishlab chiqarish va realizatsiya qilish bilan shugʻullanuvchi korxonalarni birlashtiradi. Konsern tarkibiga 60 dan ortiq tashkilot kiradi. Ular toʻqimachilik, tikuvchilik, trikotaj hamda charm-poyabzal sanoati yoʻnalishlariga boʻlinadi. Shuningdek, Belarus Respublikasi Qishloq xoʻjaligi va oziq-ovqat vazirligi, Oziq-ovqat sanoati birlashmasi vakillari bilan muloqotlarda ikki tomonlama hamkorlik aloqalarini oʻrnatish va ularni yanada rivojlantirish asosiy eʼtiborda boʻldi. Namangan viloyati delegatsiyasining Belarus Respublikasiga safari davom etmoqda. Namangan viloyati hokimligi Axborot xizmati. Sayt | Telegram | Instagram | Facebook | X | YouTube