عبد الرحمن حمادة

🔔🔴مفيش مقارنة بين التجارة والوظيفة والفريلانس.. انا جربت التلاتة وبقولك التجارة في القمة ✨ بتفتحلك فرص كتير.. بتعلمك بالإجبار كل يوم.. بتخليك تعرف تتصرف وتوجد حلول.. بتعرفك على البشرية (المحترم والحلنجي.. بتخليك تحتك بناس كتير بمختلف طبقاتهم.. للأسف خسرنا كتير بسبب اننا مجتمع بيحب الوظيفة خصوصا في النقطة رقم 3 (ياما قابلت شباب مخهم عاجز عن التفكير.. كانوا بيفكروني بحزلئوم.. انهون.. انهين..).. دي نقطة خطر جدا في الازمات الاقتصادية الحالية.. ان جزء التصرف يعطل في الوضع دا، بيخليك محبوس ومش بتفكر في حاجة غير السفر مع ان الحلول بتبقى تحت رجلك. *كان عندي صديق سوري فاتح مشروع هنا، بيقولي وهو مستغرب: هو انتوا عايزين تسافروا ليه؟ دا الشغل هنا كتير جدا (هو شايف اللي احنا مش شايفيينه لإنه جاي من بيئة بتدعم الشغل من الصغر ومعظمهم تجار.. دمياط من حوالي عشر سنين تقريبا كانت كلها كدا.. المحافظة كلها شغالة مفهاش عواطلي والناس بتشتغل في الورش من بدري) تاجر..ابدأ على أدك.. خليها على الله انا بدأت بياع (البياع هو موظف بدرجة تاجر) ثم بقيت فري لانسر + موظف (مستحملتش الوظيفة 9 شهور) ثم فري لانسر بشكل كامل ثم حاليا شغل خاص (صفيت كل العملاء الفري لانس اللي معايا.. اخرهم عميل قالي عندنا ظروف مادية ومش هنقدر نكمل) اللي سندني اني كنت بعمل حاجتين مع بعض، فكنت لما بخسر حاجة، التانية بتشيلني. دا كويس ووحش في نفس الوقت.. كويس اني كنت بلاقي حاجة تسندني.. الوحش اني مكنتش مركز على حاجة واحدة بكامل طاقتي فدا كان مضيع جزء كبير من مجهودي... عشانا عليك يارب

هعلمك حيلة في التفاوض كسبتني مميزات كتير لما عرفتها وخسرت كتير لما كنت جاهل بيها: "إوعى تتنازل بدون مقابل" يعني لو واحد قالك نزلي سعر الشقة دي، ماتوافقش بدون ماتطلب منه شيء مقابل التخفيض دا. زي انك تقوله تمام بس هسلمك خلال 6 شهور مش فوري.. أو هسلمهالك بدون محارة وحلوق.. قالولك المرتب خمسة وانت عايز سبعة.. ماتوافقش.. قولهم ستة مثلا وخد مميزات زي: أجازات أكتر.. حوافز أعلى.. بدل انتقالات.. وهكذا.. المهم ماتوافقش بدون ماتاخد شيء في المقابل.. قبل ماتدخل العملية، حضر بدايل وسيناريوهات كتير.. لو قالولي كذا هقول كذا.. --- لو قرأت التدوينة دي، عايزك تتفاعل معاها عشان بقالي فترة منزلتش تدوينات فحاسس انك نسيتني 💔

🔔أعظم نظام انتاجية نفع معايا بعد النوم بدري + البعد عن السكريات والدهون الصناعي+ البعد عن السوشيال ميديا هو نظام "تجميع المهمات المتشابهة" لو مطلوب منك 10 كيلو قهوة هاتعملهم ازاي؟ فيه صنفين: الأول هايطحن كيلو كيلو بعدها يعبيه بعدها يغلفه بعدها يكتب عليه العنوان واسم الزبون. الثاني هايتبع نظام التجميع: هطحن العشرة كيلو مرة واحدة بعدها هعبيهم مرة واحدة بعدها هغلفهم مرة واحدة بعدها هكتب عليهم الاسم والعنوان مرة واحدة ايه الفرق؟ غالبا في الوقت لو حسبتها بدقة ممكن ماتلاقيش فرق في البداية. بس مع الاستمرارية هقولك اللي هيحصل: فيه حاجة في العقل بتحصل اسمها "تكلفة التنقل بين المهمات" لما تيجي تطحن بعدها تعبي (هنا عقلك تم استنزافه بنسبة عشان نقل على مهمة تانية) لما تيجي تغلف هايتم استنزافه مرة تانية لما تيجي تكتب الاسامي هايتم استنزافه مرة تالتة. بعد فترة بسيطة هاتلاقي نفسك تعبت وبقيت تايه في النص: اه دا انا نسيت اكتب الاسامي.. استنى نسيت اعبي دا.. الخ وساعتها الفرق هايظهر في الوقت بشكل كبير جدا وهاتلاقي ان عشرة كيلو قهوة اخدوا يوم والعشرة التانيين اخدوا ساعتين لكن تجميع المهمات مفهوش تكلفة الاستنزاف دي.. بتشغل عقلك على وضعية الاوتوماتيك وتدوس بنزين. طحن طحن طحن طحن.. عبي عبي عبي عبي.. غلف غلف غلف.. مفيش مساحة للتفكير.. مفيش مساحة للتوقف.. --- النظام دا انا اتبعته وخلصت شغل شهر في أسبوع! *ينفع جدا مع الناس اللي بتنتج محتوى بشكل مستمر.. فمثلا لو بتكتب سكربتات: هتكتب الأفكار كلها في يوم هتكتب المقدمات كلها في يوم hooks هتكتب ال cta كلها في يوم هتصورهم كلهم في يوم.. هاتلاقي نفسك اتحولت لماكينة انتاج ⚙️🔥 حاول تطبق نظام التجميع اللي شغلك قدر الإمكان وهتشوف الفرق بنفسك

فيه نمط اتكرر معايا ويمكن حصل معاك انت شخصيا: المبالغة في تقييم الخسائر. تخيل كدا الراجل اللي في الصورة تسأله بتعيط ليه: فيقولك بغرق الحقني. فتقوله بتغرق ايه! دا الماية ماوصلتش لركبتك!! هو معتقد إنه بيغرق وعايش في الموود دا.. مع انه لو فاق للحظة.. هايلاقي ان بنطلونه بس اللي اتبل. طيب دا حصل معايا بأنهي شكل؟ لما كنت بحط خطة مثلا والاقي نفسي ما التزمتشلمدة يومين تلاتة.. كنت بدخل في مود المبالغة في تقييم الخسائر.. اللي بيحصل ان الخسائر بتزيد فعلا لإني عايش في المود دا ومبتحركش.. خطة من 100 يوم.. عدم التزام 3 ايام يعني خسارة 3٪.. تركز على ال 3٪ وتحس انهم كبار.. فتدخل في موود المبالغة في تقييم الخسارة فمتتحركش فاللي يحصل ان الخسارة تبقى 10٪ وأحيانا تقرر توقف كل حاجة.. او تخسر مشروع ضمن مشاريعك فتهمل في الباقي مع ان المشروع دا لا يمثل 20٪ من دخلك مثلا.. فتخسر في باقي المشاريع بسب دخولك في موود "المبالغة في تقييم الخسائر" 🔻 وتفقد فرص تانية ممكن تكون اتفتحتلك اساسا بس الموود عملك ضبابية في الرؤية 🔻 أو إن الخسائر اللي حصلت تعويضها أصلا سهل! اللي هو شغل أسبوع زيادة.. مش حوار.. او اعتبارها مصاريف إهلاك.. الخ ⬛ طيب دا ليه بيحصل؟ في الاقتصاد السلوكي: العقل مابيحبش الخسارة وبيهرب منها وبيخاف ودا ممكن يشل حركته ويخليه ياخد قرارات غير عقلانية.. لو كسبت 100 جنيه هاتفرح بس لو خسرت 100 جنيه هاتزعل أوي وأكتر من فرحك بمكسب ال 100 جنيه بكتير.. --- تعمل ايه عشان تطلع من "موود المبالغة في تقييم الخسائر" أو متدخلوش أصلا.. اعمل إعادة تقييم للخسائر.. ويفضل التقييم دا يكون بالأرقام عشان الجزء المنطقي عندك يتفعل.. انت راجل طول 180 سم والماية واصلة لركبتك يعني 50 سم.. هاتغرق فين 🤔 موود المبالغة في تقييم الخسائر هو قصة ذهنية خيالية بيعيشها دماغك.. لكن الحقيقة: انت مو انت وانت جوعان

🔔طالما دخلك ضعيف يبقى ابعد عن حاجتين: 1- التوفير اللي يخنقك 2- الديون. ركز على زيادة الإنتاجية أكتر لغاية ماتوصل لمستوى يخليك تقدر توفر وانت مرتاح. بس خد بالك: التوفير اللي يخنقك المقصود بيه هو اللي بيعطلك عن الإنتاجية ويخليك حاسس ان الدنيا سودا في وشك. مثلا: اشتري الوجبة دي ولا اوفر فلوسها؟ لو سألت السؤال دا اعرف ان عندك مشكلة حادة في الإنتاجية. تجربة شخصية: انا جربت الاتنين وفي الاخر اكتشفت ان التوفير خنقني وعطلني.. لما جربت اسيب براح لنفسي لقيت اني بدأت انطلق.. 🚀 --- إيه هي الإنتاجية المقصودة؟ - تنمية مهارات - تنويع مصادر دخل أو تنمية مصدر أساسي مش المقصود عدد الساعات لإن زيادة عدد الساعات ساحلة معظم شباب مصر.. دا أسلوب عقيم ماينفعش غير في الأزمات الحادة، اللي هو انا عايز فلوس في أسرع وقت ولو انتظرت انمي مهارة هكون اتطردت في الشارع مثلا! . ساعتها أسرع حاجة تبدل وقتك ومجهودك بفلوس وطبعا سعرهم ضعيف لإن احنا ملايين فالعشرة مننا بملاليم. --- إمتى تلجأ للتوفير اللي يخنق؟ لو عندك هدف محدد محتاج فلوس مش كتيرة، زي انك محتاج راس مال (٢٠ الف مثلا) عشان ابدأ تجارة. ساعتها قرط على نفسك عادي لإن دي فترة مؤقتة وهاتنتهي اول لما يبقى معاك راس المال(الصغير) . ---- كلامي مش موجه للناس اللي بتفرتك مرتبها اول يومين.. عشان دول عايزين دماغهم تتفرمت من أول وجديد. *الثقافة المالية مفهاش صح مطلق وغلط مطلق ولكن فيها كلام عام لإن في النهاية كل واحد وبيئتة وظروفه

🔔إعلان عاجل ويهمك منصة ينفع عاملة الاشتراك في السنة كاملة ب 350 جنيه عشان خصومات الجمعة البيضاء. وقايلين ان الخصم هايخلص يوم 1 ديسمبر، فنصيحة لو عايز تبدأ في عالم الأونلاين اشترك بدون تفكير وخد الخصم. *للمبتدئين فقط وكمان الناس اللي مهتمين باللغات (الماني- اسباني - انجليزي- فرنساوي-روسي) لو مستواك متقدم المنصة مش ليك (دي نصيحة مني) اتواصل معاهم ( هنا) وقولهم عايز خصم الجمعة البيضاء اللي ب 350 جنيه

🔔لو سألت واحد سنة 2005 عن الذهب هايقولك خلاص كان زمان دلوقتي سعره 120 جنيه ياعم. وتسمع كلامه لو سألت شخص تاني عن الذهب 2010 هايقولك خلاص كان زمان ياعم دلوقتي سعره 180 جنيه ياعم. وتسمع كلامه لو سألت شخص تالت عن الذهب 2015 هايقولك خلاص كان زمان ياعم دلوقتي سعره 700 جنيه ياعم. وتسمع كلامه لو سألت شخص رابع عن الذهب 2025 هايقولك خلاص كان زمان ياعم دلوقتي سعره 5600 جنيه ياعم. وتسمع كلامه لو سألت شخص خامس عن الذهب 2030 هايقولك خلاص كان زمان ياعم دلوقتي سعره & $#. وهاتسمع كلامه بردو --- اسأل عن اللي في الخليج هايقولولك تيجي فين خلاص كان زمان من عشر سنين. وهاتسمع كلامه اسأل اللي من عشر سنين هايقولك تيجي فين خلاص كان زمان من عشر سنين قبلهم. وهاتسمع كلامه *حد اسمع عنه كان في التمانينات بيقول: خلاص بيفنشونا (بينهوا عقودنا)!! ---- الدرس عشان لو مش عارف الحكمة فين: ماتسمعش كلام حد.. كل واحد ليه ظروف مختلفة كل واحد ليه دماغ مختلفة الفرص مالهاش حدود ولكن أشكالها ممكن تتغير (مفيش فرص بتخلص) مش كل النفوس سالكة خصوصا في المجتمعات الفقيرة واللي جاية من تعليم نظامي حاططهم في قوالب جاهزة وغير مستعدة للتعامل مع متغيرات الحياة بيبقوا مؤمنين إن الحياة فرصها محدودة لذلك بيتقاتلوا وشايفين إن أي طرف بيمثل ليهم تهديد ويجب إقصاءه للنجاة *هاتلاقيها واضحة عند المغتربين المصريين، هايبيعك رغم انك من نفس بلده عشان أسبوع أجازة أو المدير يرضى عليه(أظن انت لو مغترب قابلتك الحوارات دي كتير) ---- المهم ماتسمعش كلام حد (مقصدش الخبراء ولكن قصدي على عامة الناس) * 2018 الدولار وصل 18 جنيه وكنا بنصيح، حد فاهم قالي خد بالك يمكن دي تكون من أفضل ايامك. وحصل فعلا، في 2025 فرحانين ان الدولار بقى ب 47 بعد ماكنا بنصيح انه ب 18!! بقولك صحيح : الشغل الاونلاين وحش تيجي فين كان زمان حلو. والسوق المصري مفهوش شغل كان زمان حلو.

🔔قابلت رجالة كتير مابيعملوش حاجة بحجة ان مفيش راس مال. والحقيقة ان الاعتقاد دا مدمر، لإن عندك راس المال اللي تبدأ بيه في البداية: صحتك + وقتك + دماغك (خصوصا في عصر النت وأدوات الذكاء الاصطناعي) دول هدفهم يحركوك في البداية بشكل كويس ولكن ببطء. (أنا اعرف على المستوى الشخصي 15 شخص تقريبا عملوا كدا وانا منهم) طيب ايه هدف الفلوس؟ عامل حفاز.. لو بتمشي على سرعة 10 كيلو هاتخليك على سرعة 100 كيلو من غيرها مش هاتعرف تكبر لإن سقف مجهودك وصحتك محدودين جدا. فالخطة كالتالي: بستغل الأدوات المتاحة في البداية لغاية ما اعمل شوية الفلوس اللي استخدمهم كعامل حفاز. الخلاصة: عدم الحركة بسبب الفلوس مش منطقي، وعدم استخدام الفلوس عشان تجري.. حماقة انما انت عايز تجري من البداية فدا لما تكون مولود غني في عيلة تجار تبقى شارب منهم اصول التجارة، عشان حتى لومعاك فلوس وانت مش فاهم فهتضيعها. *هاتبقى زي المغترب اللي قعد يلم فلوس طول عمره ونزل لقى قريبه النصاب عنده فكرة مشروع هايلة جدا بس ياعيني محتاجة راس مال.. وانت عارف الباقي

🔴متصفح تمنه مليون جنيه! هايخليك تستغنى عن كروم للأبد شركة الذكاء الاصطناعي بيربليكستي عملت متصفح أقل حاجة توصفه إنه: مجرم! اولا اخف من كروم ثانيا مدمج فيه كل نماذج الذكاء الاصطناعي تقريبا في مكان واحد gpt- gemeni - claude.. ثالثا زيه زي واجهة كروم مش هاتحس باختلاف رابعا تقوله انا فاتح فيديو على اليوتيوب، لو سمحت لخصهولي فيبعتهولك متلخص! خامسا يقدر يدير الإيملات بتاعتك: يبعت للي انت عايزه في الوقت اللي انت عايزه للعدد اللي انت عايزه!! المتصفح انا لسة بكتشف فيه لحد دلوقتي وفعلا حاسس اني لقيت كنز مفقود، وبقى بالنسبالي موظف شغال معايا بدون مرتب! معايا لينك مباشر هايخليك تحمله بدل ماتنتظر في الويتنج ليست لإنه مش متاح للجميع.. 🔻 تقدر تحمله من هنا (للديسكتوب مش للموبايل) https://pplx.ai/abdelrahma6933 انا قلت لما ارجع لازم اجيبلك حاجة قوية جدا تشكرني عليها 🖤

🔴🔔اعلان كورس ألماني مسجل بسعر رمزي. خش اسألهم عن العينة المجانية ابعتلهم هنا دليلك إلى الكورسات

🔔🔴لو دخلك زاد 15% ماترفعش نمط معيشتك 15% كدا مش هاتعرف تكسر قرش، وهاتحس انك دايما بتجري على مشاية كهرباء، المشاية مش هاتقف، بس طاقتك هاتخلص. الصح: زدت 15% ارفع نمط حياتك بنسبة اقل ( 8% مثلا) والباقي حوشه ذهب.. ابدأ استثمر..الخ النصيحة دي مش بتتطبق على نفس البلاد بنفس الطريقة، لإن كل بلد وليها ظروفها الاقتصادية. فمثلا مصر لو مرتبك زاد 15% هاتلاقي ان الأسعار زادت 25% فبدل ما كنت بتفكر تحوش هاتلاقي عندك عجز 10%. العيب بقى مش فيك، ولكن في الوضع الاقتصادي لذلك هنا مهمتك انك تحاول تخرج من المنظومة، لإن اللعب معاها بالقواعد التقليدية مش هايقدم ولا هايأخر. يعني انتظارك لزيادة سنوية مبتغطيش التضخم دا مش هاينفعك. والحل إما إن الزيادة تكون أعلى من التضخم، أو إنك بتقبض بعملة مستقرة، أو إن نفس مجهودك دا بتوجهه لحاجة بتجيب فلوس أكتر. دي بقى مشكلة اللي بيقرأ كتب في الثقافة المالية بدون مايكون واخد باله من ظروف بيئته. ----- القاعدة العامة: - عيش بأقل من دخلك، بس لو دخلك مش بيتاكل أساسا من ناحية تانية. - لو دخلك بيتاكل من ناحية تانية دا مش ذنبك، بس دي مشكلة مفروضة عليك وعشان تخرج منها لازم تخرج من المنظومة التقليدية. - الحل فردي، محدش هايعملك حاجة.

⏰إعصار؟! لما تلاقي نفسك فاقد السيطرة على مجريات حياتك، دا معناه إنك لازم تفعل وضعية الإعصار 🌪️🌩️ ابل غرقت = رجعوا ستيف جوبز تاني لإدارتها= نسف معظم المنتجات جنرال اليكتريك غرقت= جابو جاك ويلش= نسف معظم المنتجات.. قفل مصانع كتير.. رفد عمالة مالهاش لازمة ستاربكس غرقت= رجعوا شولتز تاني لإدارتها= قفل فروع كتير.. رفد عمالة كتير.. قلص المنتجات. النتيجة= التلاتة رجعوا للريادة مرة تانية. الحاجات الكتير حتى لو صغيرة بتبقى عاملة زي الخطاطيف بتشل حركتك.. اخلص منها وحرر نفسك عشان تعرف تسيطر مرة تانية. 🔴 بس انت مش شركة كبيرة؟ بس انت معندكش بزنس اساسا؟.. الكلام دا مش هايفيدك! لأ هايفيدك.. - انت عندك ملفات كتير على الموبايل (خطاف صغير) - عندك ملفات كتير على اللاب (خطاف صغير) عندك افكار كتير عايز تنفذها (لوكشة خطاطيف) - عندك كذا كورس بتاخدهم (لوكشة تانية) عندك كذا حساب على منصات كتير (لوكشة مميتة) - عندك كركبة في الأوضة (لوكشة تخنق) - عندك حاجات كتير مابتستخدمهاش بس مش عايز تخلص منها. مجموع الحاجات دي يغرقك. لذلك فعل وضع الاعصار عشان تعرف تسيطر مرة تانية.. فعله بدون عواطف. --- اضافة مش موجودة في التدوينة اللي نشرتها على الفيس بوك فيه تأثير اسمه زيجارنيك – Zeigarnik Effect" ببساطة: المهمات اللي مخلصتهاش، هاتفضل شغالة في دماغك في الخلفية وانت مش حاسس وبتسحب منك طاقة بدون ماتاخد بالك. الكلام دا قد يكون مش علمي ولكن بالتجربة هاتلاقيه فعلا حقيقي. دماغك هاتحس انها مشوشة.. فيه ارهاق عقلي بدون تفسير واضح منك. الكلام دا من اسبابه تأثير "زيجارنيك" تعمل ايه عشان تخلص منه؟ اولا اكتب كل حاجة في حياتك في ورقة دا هايخفف الضغط من على دماغك (الورقة هي دماغك التانية) 📆 ثانيا قفل ملفاتك بشكل اسبوعي: تأجيل.. أو انهاء.. او حذف بشكل نهائي. رسايل مردتش عليها.. كتاب قرأت منه 10 صفح.. مشوار هاتعمله..

⏰تراجع لتغير الظروف من حوالي 3 سنين مثلا هاتلاقيني كتبتلك تدوينات عن اهمية توفير النفقات الصغيرة اليومية زي المولتو.. السناكس.. الايس كريم..الخ وكنت بقولك ان تراكمها مع بعض هايعملك مبلغ مش بطال شهريا. الفكرة دلوقتي ان الزيادة في الاسعار بقي معدله عالي جدا، ففكرة انك تفضل ضاغط نفسك مش هاتخليك تعرف تواكب وفي نفس الوقت هاتحس انك بتتخنق. الضغطة دي هاتخليك متضايق ومش عارف تفكر ودماغك محصورة في التوفير فقط. لذلك ابسط نفسك لإن المرحلة الحالية محتاجة استراتيجية مختلفة عن الإفكار القديمة. زي ان التوفير يكون في المبالغ الكبيرة اللي مالهاش لازمة: -شهادة من جامعة خاصة مالهاش وزن في كلية سوق العمل مش بيبصلها بتقدير كبير (تجارة على سبيل المثال) *انا تجارة بالمناسبة وهي اجدع كلية لو استغليت فترتها صح بس بقولك حقيقتها عشان ماتفتكرش اني بغلط فيها - تليفون لايقدم قيمة حقيقية تناسبك مقابل سعره - مصاريف جواز مالهاش لازمة زي البذخ في الأفراح والخطوبات وبعض قطع الاثاث والاجهزة اللي مالهاش لازمة - مصاريف مدارس انترناشيونال لا تقدم قيمة حقيقية تستاهل زي انهم ياخدو منك 60 الف سنوي عشان يعلموا ابنك انجلش واساسات برمجة (بأقل من ربع السعر تقدر تخليه تنين مجنح) من وجهة نظري حاليا: - التوفير في النفقات الصغيرة هايضغطك - التوفير في النفقات الكبيرة وتوجيهها للأماكن الصح هايريحك

⏰50% من هم و تعب وفقدان الرغبة في الشغل في جملة: لما نشوف النهاردة عندنا ايه" انت تبدأ يومك وانت عارف: - عندك ايه - هاتعمله ازاي - هاتعمله امتى السيستم 80% من الشغل.. الباقي تنفيذ. لما تعمل كدا هاتحس ان دماغك مش محروقة.. هاتحس انها خفيفة.. هاتبدأ تدرك الواقع من حواليك (احساس انك تايه وحد ضاربك على دماغك بمفتاح انبوبة ومفصول عن الواقع دا جاي من عدم وجود سيستم) هاتعرف تفكر.. هاتلاقي وقت كبير تمارس هواياتك.. تهتم بنفسك وبأسرتك.. غير كدا هاتحس دماغك تقيلة وفيها صخرة 2 طن. أكبر هدر للطاقة هو استنزاف عقلك يوميا في التفكير.. لازم يكون فيه موتور تاني مساعد هو اللي يشيل الليلة دي مكانه، هو اللي يتعامل مع القرارت اليومية الكتير جدا، انما عقلك الاساسي تخليه للقرارات الكبيرة اللي محتاجة تفكير. *الموتور دا هو "السيستم" ----- لو شفت التدوينة دي اثبت وجودك بلايك عشان انا مقصر معاك جامد وحاسس انك نسيتني

🔔يفيد بإيه تسويق قوي، وفريق التسليمات بيضيع مجهودك؟ لما بدخل شغلانة لازم اجيب اخرها وإلا مش بكمل فيها ودا اللي حصل معايا لما كنت شغال في التكيفات. من أول يوم اشتغلت فيها وانا حاطط عيني على اني اتعلم عشان افتح شركة. كنت ببقى دايما مع صاحب الشركة.. ومع المدير ومفيش فرصة اني اتعلم إلا وبستغلها. حتى فريق التركيبات نزلت معاهم اشوف بيعملوا ايه على الرغم انه مش اختصاصي لإني كنت مبيعات بس عشان اعمل رؤية شاملة 360 درجة، تفيدني بعد كدا. وبالفعل دا خلاني اشوف ثغرات كتير اوي في السوق محدش واخد باله منها، وبناء عليها تقدر تسدها وتفتح عليها شركة. المشكلة إن كان فيه ثغرة مكانش ليها حل من وجهة نظري بسبب عوامل كتير، وهي: "فريق التركيبات" ابذل أكبر مجهود في التسويق.. اوعد العميل زي انت عايز وفريق التركيبات هو اللي هايقول كلمته في الآخر: هانجحلك خططك.. او هابوظهالك كلها واعملك مشاكل تجيبلك صداع وتتمنى انك ماتكونش بيعت البيعة دي😠 لما فكرت في حل، لقيت ان مالهاش حل لإن جذر المشكلة دي يتعلق بالثقافة المهنية في مصر فقررت اني مش هاكمل في المجال لإن آخره مرهق جدا جدا وهابقى ممسوك من رقبتي والجهد المبذول مش هايساوي النتيجة اللي هاحصل عليها. ---- تستفيد إيه من الكلام دا؟ 1- مافيش شغلانة سالكة 100% 2- دا معناه إنك لازم تشوف مجهودك اللي هاتبذله هايحققلك أعلى عائد في المقابل ولا لأ. 3- فيه حلقات في الشغل ممكن تفتكر انها ضعيفة بس في الحقيقة هي كارثية لو ما اهتمتش بيها زي: المودريتور.. التسليمات.. الخ 4- عافر في الحلول حتى لو بشكل جزئي (هاشتغل مع شركات شحن + مناديب شحن حر + مناديب تبعي للأماكن القريبة.. الخ) 5- الانسحاب مش استسهال، لو مش هاتعرف تتعامل مع بعض المشاكل او تفوض حد يعرف يتعامل معاها. انت عايز فلوس، يعني تشوف إيه أكتر حاجة تجبهالك وتعملها، وطالما عينك شايفة ان اخر الطريق مش حلو ماتكملش. *فيه مهندس اتعين في شركة حكومية، ومن اول شهر دخل سأل: هو أكبر موظف هنا بياخد كام؟ قالوله رقم معجبهوش وشاف انه مش هايستاهل شغل عشرين سنة، لذلك قرر انه مش هايكمل وهايشوف طريق تاني. اشوفك في تدوينة جديدة ✨

🔔لازم بخمسة جنيه تشغيل دماغ اجتهادك لوحده مش هايحسن ظروفك، لازم بخمسة جنيه تشغيل دماغ عليهم عشان المعادلة تتظبط. يا إما هاتبقى عامل زي اللي بيجري على مشاية كهرباء، المشاية مش هاتقف بس هايجيله وقت ويتعب. ابعتها لصاحبك اللي بيشتغل شغلانتين تلاتة ومصر يبيع وقته ومجهوده بالطريقة القديمة. قوله مصر اتغيرت.. افهم. *الجزء التاني: اشغل دماغي ازاي يعني؟ اللي دماغه عطلانة، يسأل chat gpt مفيش اسهل من كدا!. سألته عن أزمة الشغل في مصر والدوامة بتاعة اشتغل شغلانة واتنين والاسعار بردو بتضغط.. فقولتله: طبعا انت كخبير اقتصادي عارف ان الوضع الاقتصادي في مصر مش أحسن حاجة، فدلوقتي فيه شاب بيقبض 5 الاف جنيه ومش بيكفوه لإن الأسعار غالية، فبيضطر يشتغل شغلانة تانية يعني اجمالي 16 ساعة بيقبض فيهم 10 الاف. بس المشكلة ان الزيادة السنوية مش بتغطي فروق الاسعار.. تفتكر ممكن يعمل ايه، وهل حل الشغل التاني دا حل منطقي؟ جاوبني: كلامك في محله جدًا، والمشكلة دي بقت واقع يومي لشريحة كبيرة من الناس في مصر. بالنسبة للشاب ده: 1. الشغل التاني مش حل مستدام الشغل 16 ساعة يوميًا حل مؤقت، لكنه بيؤدي على المدى الطويل للإرهاق الجسدي والنفسي، وهيخليه يدوّر في آخر اليوم على الراحة مش التطوير. كمان مع التضخم، الـ10 آلاف مش هيكفوا برضه بعد سنة أو اتنين. 2. الحل مش في "عدد الساعات" بس، لكن في "قيمة الساعة" لازم يشتغل على رفع سعر الساعة بتاعته. يعني بدل ما يشتغل ساعتين زيادة وياخد 100 جنيه، يشتغل نفس الساعتين وياخد 500 أو أكتر. وده بييجي من: تعلم مهارة قابلة للبيع أونلاين أو بسوق حر (زي التسويق، التصميم، البرمجة، الكتابة، الفيديو، تحليل البيانات… إلخ) العمل الحر (Freelancing) أو مشاريع جانبية (زي التجارة الإلكترونية، التسويق بالعمولة…) الاستثمار في النفس حتى لو ببطء (كورسات، كتب، تجارب صغيرة) 3. الادخار والاستثمار حتى بمبالغ بسيطة حتى في الظروف الصعبة، لو قدر يوفر 100–200 جنيه شهريًا، ويستثمرهم في حاجة بتعلّي قيمته أو بتجيب له دخل تراكمي، دا أحسن من صفر. 4. تفكير طويل المدى مقابل قصير المدى الشغل الإضافي بيحل الأزمة الشهرية، لكن المهارة والدخل المتنامي هو اللي بيحل الأزمة العمرية. الخلاصة: الشغل التاني ممكن يساعد حاليًا، بس لو فضل يعتمد عليه بس من غير يغيّر نوعية دخله، هيفضل في نفس الدوامة. الحل مش إنك تشتغل أكتر، إنما تشتغل "أذكى". --- انتهت اجابته.

🔔 تدوينة كتبتها لما كان عندي 25 سنة دلوقتي انا 30 (32 نقطة من خبرة شاب مصري 25 سنة) انا حبيت انقلكم ال 32 نقطة اللي عديت بيهم خلال ال 25 سنة اللي عيشتهم على الأرض: ١- العب رياضة مش عشان شكل جسمك لأ عشان صحتك النفسية وانتاجيتك هاتعلى. ٢- لو مش مجبر على الشغل يبقى اختار ان شغلك مايكونش بعيد عنك أزيد من نص ساعة بالكتير حتى لو المرتب أقل شوية لإن دا هايجي على حساب صحتك النفسية ( لو انت من مصر) ٣- الشغل مش قليل بل بالعكس كتير جدا، الفكرة في إنك هل هاتعرف تدخل للشركة فلوس ولا لأ ؟ ٤- أسهل وظيفة ممكن تشتغل فيها من بكرا هي السيلز، لإن مافيش صاحب شركة هاتقوله انا هابيع ليك كذا ومش هاخد مرتب بس اديني عمولة و هايرفضك إلا لو ال iQ بتاعه في مستوى البطاطس المسلوقة. ٥- اتعلم حرفة + الحد الأدنى من علم التسويق. ٦- ماتصرفش فلوس على الأكل برا لو مرتبك ضعيف عشان مع الوقت هاتندم وهاتكتشف إنك خلال سنة صرفت مبلغ محترم جدا جدا كان ممكن تشتري بيه كورسات محترمة أو تعمل بيه تجارة صغيرة ( سبوبة بلغتنا في مصر) ٧- خلي هدفك في بداية الشغل انك تتعلم عشان تعرف بعد كدا تعمل فلوس، يعني لو المكان اللي انت فيه مش بيعلمك أو عندهم بخل في المعلومة، سيبهم فورا. ٨- اتعلم الحد الأدنى من الثقافة المالية ٩- اتعلم الحد الأدنى من الإنجليزي اللي يخليك تعرف تفهم اللي بيتلكم وتقرأ اللي مكتوب عشان 80 ٪ من العلم مكتوب بالإنجليزي . ١٠- لاتثق في حد ولا تخون حد، خليك على الحياد زي مابيقولوا راجل بروفيشنال بيمشي بالورق و القانون. ١١- التنازل مع العملاء بيخليهم يدوسوا عليك أكتر مش بيحسن وضعك. ١٢- مافيش حاجة اسمها ماعنديش وقت لإن دي كدبة كبيرة إلا لو انت ظروفك خاصة وبتشتغل 18 ساعة مثلا عشان عندك مسؤليات حقيقية. ١٣- ماتشتغلش نفسك، اعترف لنفسك بالحقيقة ١٤- أسف اني بقولك كدا بس أغلب الناس بائسة وسلبية. ١٥- استشير الناس الناجحة دايما وحاول تلزقلهم، والناس الفاشلة-بمقاييسنا الدنيوية- اتعلم من تجاربهم السلبية . ١٦- أهلك أكتر ناس بتحبك وتخاف على مصلحتك، بس رأيهم مش صح في كل حاجة، اسمعلهم كنوع من التقدير مش أكتر ولكن اعمل اللي في دماغك لو ناس تانية عندها خبرة وافقتك عليه. ١٧- المحتوى المجاني ضعيف جدا، اتعلم تدفع فلوس لو معاك عشان المجاني بتدفع تمنه بطريقة غير مباشرة . ١٨- قوي إيمانك بربنا عشان كل اللي بتعمله هاييجي عليك لحظات متكررة تقول لنفسك وايه الفايدة في النهاية يعني. ١٩- مش غرور ولكن بالمقاييس الدنيوية أغلب الناس فشلة ومابتفكرش والمنطق عندهم مضروب بالنار. ٢٠- المظاهر مهمة جدا عندنا في مصر، أنا مابحبش المبدأ دا ومعادي ليه بس مع الأسف دي حقيقة ولازم تعملها. ٢١- ماتخليش أخبار الناس على السوشيال ميديا تحبطك، اغلبها مظاهر كدابة وبيشتغلوا نفسهم. ٢٢- ماتقولش للناس على أهدافك حتى للمقربين ليك دا بيحفزك انك تحققها بشكل أكبر. ٢٣- انت مش مهم أوي عند الناس بالقدر اللي ممكن تكون فاكره. ٢٤- لما تقع في مشكلة أغلب الناس هاتقولك معلش وهايتعاطفوا معاك بس في النهاية ماحدش هايقف معاك أوي إلا أهلك ( ابوك وامك) يعني قوي نفسك لدرجة انك تخلي الناس هي اللي محتاجالك وانت خليك دايما محتاج لربنا. ٢٥- اتعامل مع ربنا بمبدأ التاجر، يعني دايمام فكر في الصدقات الجارية مش اللي ثوابها بتنتهي في وقتها. ٢٦- انت بتطلب من ربنا يعني خليك طماع، بالعقل كدا اللي رزق بيل جيتس يقدر يرزقك، بلاش ياعم بيل جيتس، خليها واحد عنده مليون جنيه بس ( اطمع يابا رزق ربنا كتير أوي). ٢٧- ماتنتظرش انك تتقدر زي ما انت متصور، ممكن تكون انت بتبالغ في تصورك عن نفسك مش شرط العيب يكون من الناس. ٢٨- ماتقارنش نفسك بحد حتى لو أنجح منك بمليون مرة، هاتعيش مرتاح ٢٩- لو كليتك سهلة اشتغل معاها، مش هاتفرق أخدتها في سنة ولا عشر سنين بالعكس الشغل هايخليك تنجزها بسرعة أكبر عشان عايز تخلص منها. ٣٠- ماتنضمش لأنشطة طلابية فاكس اوي وأغلبهم هلاسين وبيشتغلوا بعض، انت لو اشتغلت شهر في العتبة بياع، شخصيتك هاتتحول تماما. ٣١- ماتسمعش للناس اللي بتقولك وقت ما الناس صاحية اشتغل ووقت ما الناس نايمة اشتغل، هي مش حرب ياحبيبي، خلي وقت لنفسك ولصحابك ولأهلك. ٣٢- السمارت فون مش مهم بالدرجة اللي انت متخيلها يعني بلاش يكون في إيدك دايما. *فيه حاجات تاني بس دا اللي انا جربته سواء عملته أو اتأثرت من عدم عمله ----- التدوينة دي كانت من خمس سنين، دلوقتي انا خبرتي بقت أكتر وطبقت أكتر وحاجات كتير اختلفت. معظمها متفق معاها لحد دلوقتي وبعضها محتاج تحديث وبعضها ممكن اكون تراجعت عنه ✨ --

مفيش تشجيع لاخوك، عايزين نتشهر ونجيب الڤيلا وال g class اول فيديو ليا https://www.facebook.com/share/v/14x4vcBLdN/?mibextid=qi2Omg

🔔 متبقي معاك فلوس من المرتب؟ (إعلان هايفيدك) تعالى اقولك تعمل بيهم ايه بدل ماتصرفهم في الأكل. منصة الكورسات الأونلاين "ينفع - yanfaa" بتتطور باستمرار وبتضيف كورسات مع الوقت خصوصا في مجالات زي التسويق. في البداية الكورسات مكنتش حلوة أوي ولكن دلوقتي بدأت الدنيا تتظبط وخد بالك إن 800 جنيه مش رقم إطلاقاً بالنسبة للفايدة اللي هاتاخدها. المنصة دلوقتي فيها أكتر من 300 كورس يعني الكورس تقريباً واقع عليك ب 2 جنيه ونص! ___ المنصة تنفع لمين؟ *مبدئياً لو انت مستواك متقدم وخبرة فالمنصة دي مش ليك إطلاقاً إلا في بعض المسارات زي الموشن جرافيك وتصحيح الألوان. لكن بشكل عام المنصة دي موجهة للمبتدئين وتحت المتوسطين (إلى الآن دا اللي انا شايفه) يعني لو لسة بتبدأ طريقك في الأونلاين وعايز مكان تلاقي فيه كورسات لمعظم المجالات اللي الواحد ينفع يشتغلها أونلاين، يبقى "ينفع" نقطة بداية حلوة أوي. مش بس كدا دا كمان عندهم كورسات في السوفت سكيلز اللي بتخدم أي مجال الواحد هايدخله: تسويق - برمجة - تصميم.. إلخ الحلو بقى إن عندهم كورس كامل انجليزي (34 ساعة) 🔰 والأحلى إنهم بدأوا في كورسات الألماني 🇩🇪 *دلع الدلع بأمانة. كل دا وأكتر بـ 800 جنيه! (تمن 3 خروجات حرفياً) ____ فلو عايز تبدأ بداية حلوة بسعر ولا في الخيال يبقى لازم تشترك عندهم. *هاتبقى كمان حلوة للناس اللي عندها أولاد في سن الـ 15 وعايزين يشتركولهم في حاجات مفيدة بدل مايضيعوا وقته على النت على الفاضي. ✅ فيه كود تحية مني ليك هايديك خصم اضافي بقيمة 100 جنيه يعني الاشتراك هايبقى ب 700 جنيه بدل 800 وهايفتحلك الاشتراك لمدة سنة كاملة تكون فرمت فيهم الكورسات. الكود👈MM92 طرق الاشتراك عن طريق: فوري.. او فيزا.. أو فيزا اونلاين بتاعة فودافون كاش لينك الاشتراك https://yanfaa.com/eg/subscribe