પારસ દિવ્ય ગર્ભ સંવાદ ગ્રુપ

https://youtu.be/fnQg4e4vNnc?si=9OoKqHgUHpmdUI6c

*સ્પર્શ : આજના તરુણ થકી આવતીકાલના ભારતનું નિર્માણ.!* ડૉ.કૃણાલ પંચાલ *ક્ષણે ક્ષણ શિક્ષણ, ગાંધીનગર સમાચાર* *પિક્ચર અભી બાકી હૈ, મેરે દોસ્ત ! આ ફિલ્મી સંવાદ તરુણો માટે ઉત્સાહ અને નવી આશાનો સંકેત છે. હજુ ઘણું બાકી છે. તરુણો તમારું જીવન અને તમારા સપના હજુ સાકાર થવાના બાકી છે. આજે લેવાયેલા નિર્ણયો, આજે વિકસાવેલા જીવનકૌશલ્યો, આજે અપનાવેલી જીવનશૈલી અને આજે મળેલી યોગ્ય દિશા આવતીકાલની ઉત્તમ કહાની લખશે.* તરુણો અને તરુણાવસ્થા વિશે વિચારતા મને કેટલાક ફિલ્મી ડાયલોગ અને ગીત યાદ આવે છે. ફિલ્મ સંજુનુ એક ગીત "કર હર મેદાન ફતેહ" જ્યારે પડદા પર ગુંજે છે ત્યારે તે માત્ર વિજયનું ગીત નથી લાગતું. તે સંઘર્ષ સામે ઊભા રહેવાની, પડકારોને પાર કરવાની અને પોતાની અંદરની શક્તિને ઓળખવાનો ધક્કો બની જાય છે. કદાચ તરુણાવસ્થાને સમજવા માટે આનાથી સુંદર કોઈ રૂપક ન હોઈ શકે..! કારણ કે તરુણાવસ્થા એટલે જ સપનાં જોવાની, પડકાર સ્વીકારવાની અને પોતાની ઓળખ ઊભી કરવાની ઉંમર. પણ પ્રશ્ન એ છે કે આપણે આપણા તરુણોને જીતવાનું શીખવીએ છીએ, પરંતુ શું આપણે તેમને પોતાને ઓળખવાનું શીખવીએ છીએ ખરા ? આજનો તરુણ પહેલાં કરતાં વધુ માહિતીથી ઘેરાયેલો છે, પરંતુ કદાચ પહેલાં કરતાં વધુ પ્રશ્નોથી પણ ગૂંચવાયો છે. તેની આંગળીના ટેરવે આખી દુનિયા છે પરંતુ ક્યારેક પોતાના મનની દુનિયા સમજવામાં તે એકલો પડી જાય છે. તેની પાસે હજારો ‘ફોલોઅર્સ’ છે, પરંતુ દિલની વાત કહેવા માટે એક સાચો ‘સાથી’ શોધવો મુશ્કેલ બની જાય છે. આવા સમયે તરુણને ઉપદેશ નહીં, ‘સ્પર્શ’ની જરૂર છે. આ જ સંવેદનાને કેન્દ્રમાં રાખીને ચિલ્ડ્રન્સ રિસર્ચ યુનિવર્સિટી દ્વારા ગુજરાતના તરુણો માટે ‘સ્પર્શ – તારુણ્ય સપ્તાહ’ની ઉજવણી કરવામાં આવી રહી છે. આ માત્ર એક સપ્તાહનો કાર્યક્રમ નથી; આ ગુજરાતની તરુણ પેઢીના મનને સમજવાનો, તેમની શક્તિને ઓળખવાનો અને તેમની ઉર્જાને રાષ્ટ્રનિર્માણની દિશામાં વાળવાનો પ્રયાસ છે. એક વાત તો પાક્કી છે કે, તરુણોને સમજતા કે સમજાવતા પહેલાં આપણે પોતાની જાતને બદલવી પડશે. તરુણાવસ્થા એટલે માત્ર ઉંમરનો આંકડો નહીં. શરીરમાં થતા પરિવર્તનો સાથે મન, લાગણી, વિચાર, સંબંધો અને પોતાની ઓળખ અંગેના પ્રશ્નોનો દીર્ઘકાળ. તું કેમ આવું કરે છે?તને કંઈ સમજાતું નથી? અમારા જમાનામાં તો આવું નહોતું ! આવા વાક્યો કદાચ આપણે ખૂબ સહેલાઈથી બોલી દઈએ છીએ. પરંતુ એક વાર વિચારીએ - શું આપણે ખરેખર તરુણને સમજવાનો પ્રયત્ન કર્યો છે? ‘સ્પર્શ’નું પ્રથમ અને સૌથી મહત્ત્વનું પગથિયું છે‘તરુણોને સમજીએ.’ આ વિષય પર માનનીય શિક્ષણમંત્રીએ તરૂણોને પ્રેરક સંબોધન કર્યું છે. તરુણના વર્તન પાછળનું કારણ સમજવું પડશે. તેની મૂંઝવણને જગ્યા આપવી પડશે. કારણ કે ઘણી વખત તરુણનો ગુસ્સો તેની અંદરની કોઈ પીડાનો અવાજ હોય છે અને તેની જીદ તેની પોતાની ઓળખ સ્થાપિત કરવાનો નિષ્ફળ પ્રયત્ન. તેથી આપણે તરુણ ને સુધારવા કરતા તેને સમજવાની તાલીમ લેવા જેવી છે..! ક્યારેક-ક્યારેક માનસિક રીતે એક્સપાયરી ડેટ વટાવી ચૂકેલી જૂની પેઢીના આપણે ગણિતના દાખલા ઉકેલવાનું શીખવીએ છીએ, પરંતુ જીવનના દાખલા ઉકેલવાનું કદાચ ભૂલી જઈએ છીએ. પરીક્ષામાં નિષ્ફળતા આવે ત્યારે શું કરવું? મિત્રોના દબાણ સામે ‘ના’ કેવી રીતે કહેવું? ગુસ્સો આવે ત્યારે પોતાની જાતને કેવી રીતે સંભાળવી? સોશિયલ મીડિયામાં દેખાતી ચમકદાર જિંદગી સાથે પોતાની સરખામણી કેવી રીતે ન કરવી? સમસ્યા આવે ત્યારે ભાગી જવાને બદલે તેનો સામનો કેવી રીતે કરવો? આ બધા પ્રશ્નોના જવાબ આપી શકે તેવા જીવનકૌશલ્યોની જડીબુટ્ટી તરુણોને પીવડાવી પડશે..! તરુણોને જીવન જીવવાની કળા શીખવવી એ પણ અગત્યનું શિક્ષણ છે. તમે જ છો નકશો અને તમે જ નિર્માતા આ વાક્ય તરુણો માટે ખૂબ જ પ્રેરક બને છે. માતા પિતા તરીકે આપણે ક્યારેય વિચાર્યું છે કે, તરુણને સૌથી મોટી ભેટ શું આપી શકાય? કદાચ આત્મવિશ્વાસ. અને તેના કરતાં પણ મોટી ભેટ પોતાના જીવનની જવાબદારી સ્વીકારવાની સમજ આપવા જેવી છે. તરુણનું જીવન ક્યાં જશે તે માત્ર સંજોગો નક્કી કરતા નથી. આ સમયે તરૂણના નિર્ણયો, મહેનત, પસંદગીઓ અને અભિગમ પણ અગત્યનો ભાગ ભજવે છે. આ સમયે તરુણ પોતે પોતાના સપનાંનો આર્કિટેક્ટ હોય છે. કારણ કે જે પેઢી પોતાનું જીવન ઘડવાનું શીખી જાય છે તે જ પેઢી દેશનું ભવિષ્ય ઘડી શકે છે. તરણોમાં વ્યસન એ આજકાલ ફેશન બની ગઈ છે અને આગળ જતા તેના ગંભીર પરિણામો સમાજને ભોગવવા પડે છે ત્યારે નશામુક્ત યુવા થકી જ વિકસિત ભારતના સ્વપ્નને સાકાર કરી શકાશે. કેમ કે નશો માત્ર શરીરને નુકસાન કરતો નથી. તે સ્વપ્નોને મારી નાખે છે, સંબંધોને તોડે છે, નિર્ણયશક્તિને નબળી પાડે છે અને આખરે વ્યક્તિની સંભાવનાઓ અને શક્તિઓને ઉધઈની માફક ખાઈ જાય છે. આપણા તરુણો હાથમાં નશાની બોટલ નહીં સર્જનની તક પકડે, આંખોમાં નશાની લાલાશ નહીં, ભવિષ્યનાં સપનાં જુએ, તેના પગ ભટકવાના રસ્તે નહીં, વિકાસના માર્ગે આગળ વધે.

૧૯

આજની વાર્તા - વિજેતા દેડકો

આજના જોડકણાં

આરોગ્ય ખાવાની અસલી અને નકલી વસ્તુ કઈ રીતે ઓળખવી તેની સરળ પદ્ધતિઓ

વારંવાર માથું દુખે છે ?

થાક નબળાઈ અને ચક્કરનું સાચું કારણ

બાળક ના જન્મ દિવસ