Urban Hrodna — городская среда Гродно

🗑 У Гродне пенсіянерка ператварыла двор у музей ЖКГ-арту Двор дома на вуліцы Бялінскага ў Гродне нагадвае запаведнік дрэннага густу. Яго стварыла 74-гадовая пенсіянерка, якая жыве тут больш за 50 гадоў, піша «Вечерний Гродно». Пасля выхаду на пенсію жанчына пачала ператвараць непатрэбныя рэчы ў дваровыя аб’екты. З бака ад матацыкла яна зрабіла бусла, з касак — божых каровак, а са шкляных бутэлек і размаляваных камянёў — грыбы. Паламаныя пластыкавыя тазікі сталі фантанам з парасятамі, старыя выхлапныя трубы ў дзіцячым адзенні — чалавечкамі, а звычайны пень атрымаў вочы, нос і рот. На сцяне дома таксама з’явіўся вялізны металічны павук, якога зрабіў зяць пенсіянеркі. З карыснага жанчына сама косіць траву, размалёўвае гаспадарчыя пабудовы і робіць кармушкі для птушак. Побач з фігуркамі яна высадзіла кветкі — некаторыя з іх прабіваюцца нават праз асфальт. Як вам такое «ўпрыгожванне двара»? Фота: «Вечерний Гродно».

🧱 Як можа выглядаць аднаўленне страчанага палаца Масальскіх на Замкавай у Гродне Даследчык і архітэктар Раман Забела паказаў, як у сучасную забудову Замкавай можна інтэграваць частку страчанага палаца Масальскіх. Палац быў адным з найстарэйшых мураваных будынкаў вуліцы і займаў прастору паміж сённяшнімі дамамі № 7 і № 9. Пасля пажару 1899 года яго разабралі, а на старых падмурках на пачатку ХХ стагоддзя з’явіліся цяперашнія будынкі. На Замкавай, 7 плануюць узвесці новы двухпавярховы аб’ект з гандлёвымі памяшканнямі і гасцініцай на 10 нумароў. Праект ужо разглядалі на горадабудаўнічай радзе. Раман Забела прапануе іншы падыход: не проста пабудаваць новы камерцыйны аб’ект, а часткова «выявіць» страчаны палац Масальскіх у навукова абгрунтаваных гістарычных формах. Пры гэтым захаваны аднапавярховы дом-помнік № 7 мог бы стаць часткай адзінай архітэктурнай кампазіцыі. Такі варыянт мог бы вярнуць Замкавай страчаны маштаб і цэласнасць забудовы, не ператвараючы новы аб’ект у выпадковую сучасную дамінанту. 📷 Візуалізацыі: Раман Забела / Facebook

🌉 Аўтамабільны рух пад пуцеправодам на Падольнай у Гродне аднавілі, але пешаходам даводзіцца выходзіць на праезную частку Вуліцу Падольную ў Гродне адкрылі для руху пасля рамонту чыгуначнага пуцеправода. Праезд быў закрыты каля месяца, піша гарадскі партал Newgrodno.by. Пасля рамонту ўздоўж чыгуначных пуцей з’явілася новая агароджа. Сцены пуцеправода і падпорныя сценкі таксама абнавілі і пафарбавалі ў адзіны шэры колер. Аднак праблему для пешаходаў так і не вырашылі. Дарожкі на падыходзе да пуцеправода, як і раней, раптоўна абрываюцца. Каб прайсці далей, напрыклад, ад цэнтра Гродна ў бок Скідзельскага рынку, людзям даводзіцца выходзіць на праезную частку і ісці побач з аўтамабілямі. Такім чынам, пуцеправод адрамантавалі, але бяспечнага маршруту для пешаходаў пад ім па-ранейшаму няма. Фота: Newgrodno

🧱 У цэнтры Гродна хочуць рэканструяваць гістарычны будынак, дабудаваць яму два паверхі і ператварыць у грамадска-спартыўны комплекс. Таксама ў планах пабудаваць гасцініцу Горадабудаўнічая рада разгледзела перадпраектныя рашэнні па двух аб’ектах у гістарычным цэнтры Гродна. Гаворка ідзе пра рэканструкцыю былога клуба на вуліцы Леніна і будаўніцтва гасцініцы з гандлёвымі памяшканнямі на Замкавай, паведамляе прэс-служба Гродзенскага гарвыканкама ў Telegram, Будынак былога клуба на вуліцы Леніна, 26Б плануюць ператварыць у грамадска-спартыўны комплекс. Ён адносіцца да радавой гістарычнай забудовы. Паводле праекта, прыбудову 1950-х гадоў дэмантуюць, а першаму паверху вернуць гістарычны выгляд і колер. Над будынкам з’явяцца яшчэ два паверхі. Агульная вышыня комплексу не перавысіць 15 метраў. Новыя паверхі выканаюць у сучаснай стылістыцы, але паспрабуюць упісаць у гістарычнае асяроддзе. Яшчэ адзін аб’ект хочуць пабудаваць на пустым участку на вуліцы Замкавай, каля дома №7. Гэта будзе двухпавярховы будынак плошчай больш за 1600 квадратных метраў. У ім размесцяць гандлёвыя памяшканні і гасцініцу на 10 нумароў, разлічаную максімум на 20 чалавек. Пасля канчатковага ўзгаднення перадпраектных рашэнняў распрацуюць будаўнічыя праекты. Фота: Гродзенскі гарвыканкам.